ATUAQQISSAAGASSAQ 29
Nakkutilliisorput Jiisusi tapersersoruk
“Qilammi nunarsuarmilu oqartussaassuseq tamarmi uannut tunniunneqarpoq.” – MAT 28:18.
ERINARSUUT 69 Naalagaaffik pillugu oqaluussisa!
QILANAARTUUT a
1. Jehovap suna piumasaraa?
NALITSINNI Kunngeqarfik pillugu nutaarsiassat nuannersut nunarsuaq tamakkerlugu oqaluussissutigineqarnissaat Guutip piumasaraa. (Mak 13:10; Tim 1. 2:3, 4) Tamanna Jehovap suliaraa, pingaartingaaramiullu ernini asasani tamatumani siulersuisunngortippaa. Qularinngissinnaavarput Jiisusip nakkutilliilluarneratigut oqaluussinermik suliap Jehovap naammaginartitaanik naggatissap nalliutinnginnerani naammassineqarnissaa. – Mat 24:14.
2. Allaaserisami matumani suut sammissavagut?
2 Allaaserisami matumani Jiisusip “inussiaq aalajaallunilu silatooq” aqqutigalugu anersaakkut nerisassanik qanoq pilersuinera oqaluttuarisaanermilu oqaluussilluni immikkut suliniuteqarnermi annerpaami malinnitsini qanoq aaqqissuussaatittarai sammissavarput. (Mat 24:45) Aamma sammissavarput tamatta immikkut Jiisusi inussiarlu aalajaatsoq tapersersorumallugit qanoq iliorsinnaasugut.
JIISUSIP OQALUUSSINEQ NAKKUTIGAA
3. Jiisusi sumik oqartussaassusilerneqarpa?
3 Jiisusip oqaluussineq nakkutigaa. Tamanna qanoq nalunngilarput? Jiisusip qilalianngitsiarnermini malinnitsimi aalajaatsut ilaat qaqqami Galiliiami naapikkamigit oqarfigai: “Qilammi nunarsuarmilu oqartussaassuseq tamarmi uannut tunniunneqarpoq.” Maluginiaruk qanoq nangilluni oqaaseqartoq: “Taamaattumik inuit inuiaqatigiinnit tamaneersut uannik malinnittunngoqqullugit ilinniartikkiartorsigit.” (Mat 28:18, 19) Tassa oqaluussinermik siulersuinissaq Jiisusip oqartussaaffigiligaasa ilagaat.
4. Sooq qularinngissinnaavarput Jiisusip oqaluussineq suli nakkutigigaa?
4 Jiisusi oqarpoq oqaluussineq imminillu malinnittunngortitsineq ‘inuiaqatigiinni tamani’ naammassineqassasoq malinnitsinilu “naggatissap nalaata tungaanut ullut tamaasa” najussallugit. (Mat 28:20) Tassa oqaluussinermik suliaq Jiisusip ulloq manna tikillugu nakkutigaa.
5. Tussiaat 110:3 eqquuteqqullugu qanoq ikiuuppugut?
5 Jiisusip naggatissap nalaata tungaa tikillugu sulisunik amigaateqarnissani ernumassutiginngilaa. Nalunngilaa tussiaasiortup siulittuutaa eqquutissasoq: “Ullormi sorsuffigisanni innuttatit kajumillutik sassarumaarput.” (Tuss 110:3) Oqaluusseqataasaruit Jiisusi inussiarlu aalajaatsoq tapersersorlugillu siulittuut taanna eqquuteqqullugu ikiuupputit. Sulialli naammassiniarnerani unamminiarnartoqarpoq.
6. Kunngeqarfik pillugu oqaluussisartut unamminiarnartitaasa ilaat suua?
6 Kunngeqarfik pillugu oqaluussisartut akerlilersorneqarnerat unamminiarnartut ilagaat. Tunussisut, upperisarsiornikkut siulersortaasut politikkerillu suliarput pillugu salluliortarput. Ilaquttatta, nalunngisatta suleqatittalu eqqunngitsumik paasitinneqarnertik pissutigalugu Jehovamut kiffartorunnaarsinniarlutalu oqaluussisarunnaarsinniarsinnaavaatigut. Nunat ilaanni qunusaarinikkut, sioorasaarinikkut, tigusarinninnikkut allaallu parnaarussaatitsinikkut akerlilersuisoqartarpoq. Tamanna tupigusuutiginngilarput Jiisusi ima siulittuimmat: “[Atera] pissutigalugu inuiaqatigiinnit tamanit uumissorneqarumaarpusi.” (Mat 24:9) Taama uumissorneqarnerput Jehovamit iluarisaanitsinnut uppernarsaataavoq. (Mat 5:11, 12) Akerlilersuinermut tamatumunnga Diaavulu akisussaavoq. Jiisusimulli sanilliullugu suunngilaq! Jiisusip tapersersuineratigut inuit inuiaqatigiinnit tamaneersut nutaarsiassanik nuannersunik oqaluussiffigineqarput. Uppernarsaatit eqqarsaatigikkit.
7. Saqqummersitat 14:6, 7-illu eqquunneranut uppernarsaatit suut takuigit?
7 Kunngeqarfik pillugu oqaluussisartut allamiunut oqaluussisarnertik unamminiarnartitaasa ilagaat. Jiisusip apustilimut Johannesimut saqqummersitamini nalitsinni nutaarsiassanik nuannersunik oqaluussinermi unamminiarnartup tamatuma qaangerneqarnissaa siulittuutigaa. (Saqqummersitat 14:6, 7 atuakkit). Qanoq? Nittartakkatsinni jw.org-imi Biibililersaarutit oqaatsini 1.000-nit amerlanerusuni atuarneqarsinnaammata inuit nunani tamalaaniittut Kunngeqarfik pillugu tusarliussamut qisuariarnissamut pitsaanerpaamik periarfissippagut! Atuakkap Naassaanngitsumik pilluarsinnaavutit!, Jiisusimik malinnittunngortitsiniarnitsinni pingaarnertut atortakkatta, oqaatsinut 700-nit amerlanerusunut nutserneqarnissaa akuerineqarpoq! Aamma tusilartunut isiginnaagassianik immiussinikkut toorneeqqallu atorlugit Biibililersaarutinik tappiitsunut saqqummersitsisarnikkut anersaakkut nerisassat aamma agguaanneqartarput. Biibilimi siulittuutit eqquuttut takusinnaavarput. Inuit ‘inuiannit assigiinngitsunit tamaneersut’ Biibilimi ilumoortoq malillugu oqaatsinik “minguitsunik” oqaaseqalernissaq ilinniarpaat. (Zak 8:23; Sef 3:9) Tamakku tamarmik Jiisusip Kristusip nakkutilliilluarneratigut naammassineqarput.
8. Ulloq manna tikillugu oqaluussinermi sunik angusaqarpugut?
8 Nalitsinni nunani 240-ni inuit 8 millioninit amerlanerusut Jehovap peqatigiissortaanut ilaapput ukiullu tamaasa tituusintillit imermut morsutsitaasarlutik! Kisitsisinilli pingaarnerusoq tassaavoq ilinniartitanngortut taakkua kristumiutut pissuseqalertarnerat, tassa ‘kinaassutsimik nutaamik atisisimanerat’. (Kol 3:8-10) Amerlasuut atoqatigiinnikkut eqqunngitsuliussaarput, nakuusissaarput, kinaassusersiorunnaarput sumiuussutsimillu pingaartitsiunnaarlutik. Esaja 2:4-mi siulittuutigineqartutut ‘sorsunnissamut sungiusarunnaarput’. Kinaassutsip nutaap atinissaa ilungersuutigigatsigu inuit Guutip peqatigiissortaanut ilaaleqqullugit ikiorpagut, aamma nakkutilliisorput Kristusi Jiisusi malillutigu uppernarsartarparput. (Joh 13:35; Pet 1. 2:12) Tamanna nalaatsornikkut pinngilaq. Jiisusip pisariaqartitatsinnik ikiorpaatigut.
JIISUSI INUSSIAMIK TOQQAAVOQ
9. Naggatissap nalaa pillugu qanoq siulittuuteqarpa? (Matiusi 24:45-47)
9 Matiusi 24:45-47 atuakkit. Jiisusip siulittuutigaa naggatissap nalaani “inussiaq aalajaallunilu silatooq” anersaakkut nerisassanik tunniussisartussaq toqqassallugu. Taamaattumik naatsorsuutigisinnaavarput inussiaq taanna tamaviaarluni nalitsinni sulissasoq, taamaaliorporlumi. Nakkutilliisutta angutit tanitat amerlanngitsut atorlugit Guutip innuttai soqutiginnittullu anersaakkut “nerisassanik piffissaq eqqorlugu” tunisarpai. Angutit taakku allat uppernerannut naalakkatut imminut isiginngillat. (Kor 2. 1:24) Nalunngilaalli Jiisusi Kristusi tassaasoq innuttaminut ‘naalagaanerullunilu naalagaq’. – Es 55:4.
10. Assilissami takutinneqartumi Biibililersaarut sorleq iluaqutigalugu Jehova kiffartorfigilerpiuk?
10 1919-imiilli inussiap aalajaatsup Biibililersaarutit assigiinngitsorpassuit piareersarsimammagit soqutiginnilerlaat anersaakkut nerisassat inuussutissaqarluartut siullermeerlutik ussersimavaat. 1921-mi inussiap soqutiginnittut Biibilimi ilinniartitsissutigineqartunik tunngaviusunik paasinneqqullugit atuagaq Guds Harpe piareersarpaa. Pissutsit allanngormata Biibililersaarutit allat saqqummersinneqarput. Biibililersaarut sorleq iluaqutigalugu Ataatarput qilammiusoq ilisarisimalerlugulu asalerpiuk? “Gud Maa Være Sanddru”, sagdlusuíssut inûnigssamut nâgssáungitsumut sangmisoĸ, pâratîsime nuname nâgssáungitsumik inûsínauvutit, Ilisarsineq inuunermut naassaanngitsumut sammisoq, Biibilimi sorpiaat ajoqersuutigineqarpat? imaluunniit Biibililersaarutitsinni nutaanerpaaq Naassaanngitsumik pilluarsinnaavutit! iluaqutigalugu? Biibililersaarutit taakku tamarmik piffissami saqqummersitsiffimmi pisariaqartinneqartunut tulluarsaqqissaarneqarput.
11. Sooq tamatta anersaakkut nerisassanik pisariaqartitsilluinnarpugut?
11 Soqutiginnilerlaat anersaakkut nerisassanik tamuasarissanik kisimik pisariaqartitsinngillat. Tamatta pisariaqartitsivugut. Apustili Paulusi allappoq: ‘Nerisassat tamuasarissat inersimalluartunit nerineqartussaapput.’ Paulusi aamma allappoq anersaakkut inuussutissat taamaattut “eqqortumik eqqunngitsumillu immikkoortitsinissamut” iluaqutigissagigut. (Hebr 5:14) Nalitsinni inuit ileqqorloqimmata Jehovap ileqqorissaarneq pillugu najoqqutassiaasa maleruarnissaat sapernarsinnaavoq. Jiisusilli pisariaqartitatsinnik nakussatsikkumalluta anersaakkut nerisassanik mamarunartunik tunineqarnissarput isumagisarpaa. Nerisassat taakku Guutip oqaasianit isumassarsiarititaasumit, Biibilimit, aallaaveqarput. Inussiaq aalajaatsoq Jiisusimit siulersorneqarluni nerisassanik piareersaasarlunilu agguaasarpoq.
12. Jiisusitut Guutip atia qanoq ataqqivarput?
12 Jiisusitut Guutip atia ataqqivarput. (Joh 17:6, 26) Assersuutigalugu 1931-mi Biibili tunngavigalugu Jehovap Nalunaajaasuinik taaneqartaleratta Ataatatta qilammiusup atiata ilisimaneqaatiginissaa pingaartingaarlutigu ersersipparput. (Es 43:10-12, 21) Ukiumi tassani oktobarimiit Guutip atia atuagassiap matuma saqqaaniittalerpoq. Tamatuma saniatigut Biibili – Nunarsuup nutaanngornissaanik nutsikkami Guutip atia oqaasiani allassimaffissaani allassimasarpoq. Tamanna kristumiuunerartunit, Biibilini nutsigarpassuarminni Jehovap atianik peersisunit, allaanerulluinnarpoq!
JIISUSIP MALINNITSINI AAQQISSUUSSAATIPPAI
13. Suna pissutigalugu qularinngiliuk Jiisusip “inussiaq aalajaallunilu silatooq” atortaraa? (Johannesi 6:68)
13 Jiisusi minguitsumik guutisiorneq pitsanngorsarumallugu “inussiaq aalajaallunilu silatooq” aqqutigalugu nunarsuarmi immikkuullarissumik peqatigiiffiliorpoq. Peqatigiiffik taanna qanoq isumaqarfigaajuk? Immaqa apustilip Petrusip Jiisusimut oqaasii akissutitut eqqaavatit: “Kina ornissagatsigu? Illit oqaatsitit naassaanngitsumik inuussutaapput.” (Joh 6:68) Jehovap peqatigiissortaanut attaveqalersimanngikkaluarutta sumiissimassagaluarnerpugut. Kristusip taanna aqqutigalugu anersaakkut nerisilluartarpaatigut. Aamma pitsaanerpaamik kiffartoqqulluta ilinniartittarpaatigut. Taamatuttaaq Jehovamit iluarisaaqqulluta ‘kinaassutsip nutaap atinissaanut’ ikiortarpaatigut. – Ef 4:24.
14. COVID-19-ip nunani tamalaani tuniluunnerani Jehovap peqatigiissortaanut ilaanerit qanoq iluaqutigaajuk?
14 Jiisusip pinartoqartillugu silatusaarluni ilitsersortarpaatigut. COVID-19 nunani tamalaani tuniluutilermat ilitsersuutit taakkua iluaqutissartaat ersaripput. Inuppassuit qanoq iliussanerlutik nalornissutigaat, Jiisusilli illersorniarluta paasiuminartumik siunnersorpaatigut. Tamanit orninneqartartuniikkaangatta kiinnakkut assiaquteqartarnissamik allanullu qanillinaveersaarnissamik kajumissaarneqarpugut. Utoqqaanertat ilagiinniittunut tamanut attaveqakulasarnissamik qatanngutillu timikkut anersaakkullu pisariaqartitaannik eqqumaffiginninnissamik eqqaasinneqarput. (Es 32:1, 2) Aamma Siulersuisoqatigiit nalunaarusiaannit ilitsersorneqartarlutalu qiimmassarneqartarpugut.
15. Nunani tamalaani tuniluuttoqarnerani ataatsimiittarnerput oqaluussisarnerpullu pillugit qanoq ilitsersuisoqarpa, qanorlu kinguneqartumik?
15 Nunani tamalaani tuniluuttoqarnerani qanoq ataatsimiittarnissatsinnik oqaluussisarnissatsinnillu paasiuminartumik ilitsersorneqarpugut. Ingerlaannangajak internetikkut ataatsimiittalerlutalu ataatsimeersuartalerpugut. Aamma allakkat oqarasuaallu atorlugit oqaluussinerusalerpugut. Jehovap ikiungaarpaatigut. Immikkoortortaqarfippassuit nalunaarput oqaluussisartut amerleriarujussuarsimasut. Allaat piffissami tamatumani amerlasuut qiimmaallannartunik misigisaqarput. – Takuuk ungalusaq “ Jehovap oqaluussinitsinni ikiorpaatigut”.
16. Suna qularinngilarput?
16 Nunani tamalaani tuniluuttoqalermat immaqa ilaat misigipput peqatigiiffipput mianersorpallaartoq. Arlaleriarlutali takuarput ilitsersuutit tunngavissaqarluartut. (Mat 11:19) Jiisusip asannilluni innuttaminik siulersuinera eqqarsaatigeqqissaaraangatsigu qularineq ajorparput qanorluunniit pisoqassagaluarpat Jehovap erneratalu asasaata najussagaatigut. – Hebræerit 13:5, 6 atuakkit.
17. Jiisusimit nakkutigineqarlutit sulinerit qanoq isumaqarfigaajuk?
17 Jiisusimit nakkutigineqarluta sulinerput qujamasuutigeqaarput! Peqatigiissortat kulturimik, sumiuunermik oqaatsinillu aporfeqanngitsut ilaaffigaagut. Anersaakkut pilersorneqarluarlutalu oqaluussinissamut atortussaaleqinngeqaagut. Tamatta immikkut kinaassutsimik nutaamik atisinissamut ikiorneqarlutalu asaqatigiinnissamik ilinniartinneqarpugut. Nakkutilliisutta Jiisusip tulluusimaarutiginissaanut pissutissaqarluarpugut!
ERINARSUUT 16 Ernera tanitaq pillugu Jehova unnersiutigisiuk
a Angutit, arnat meeqqallu millionillit aallussilluarlutik nutaarsiassat nuannersut oqaluussissutigaat. Taakkua ilagaatsit? Taamaappat Naalakkatsinnit Jiisusimit Kristusimit nakkutigineqarlutit sulivutit. Allaaserisami matumani nalitsinni oqaluussinerup Jiisusimit nakkutigineqarneranut uppernarsaatit sammissavagut. Tamatuma eqqarsaatigeqqissaarneratigut Kristusimit siulersorneqarluta Jehovamut kiffartortuarnissarput aalajangiusimanerulersinnaavarput.