1. I biny bidy Yehow mukat leel oow?

 LEEL OOW lukat lwa Mawej ludy neey: badiil baat ba ha bulab butuutul musah a Bukaleng. (Mark 13:10; 1 Tim. 2:3, 4) Mudimw oow i wa Yehow, ni udy ni buseeb buvul menmen bwaal i muteek mwaan indiy udyey mukat Yeez Krist bwa kwiikaley Mukaleng. Tudy batwiishiibw neey, bu mudy Yeez wiitulombol, mudimw a kudiil baat musah oow, wiiyiiy kukumban teng mudy Yehow mukat kuuhal kwa bulekel kwiiyebw.​—Mat. 24:14.

2. I myand kaay yitwiiyiiy kwiisambil mu ciin bwaal eecy?

² Mu ciin bwaal eecy, twiiyiiy kutal mudy Yeez mulongolol “muhik a lulamat udy mudimuk” bwa kulongolol byaakudy bya mu spirit ni kulongolol biiyiij bindiy ku mudimw mutam a kudiil baat musah. (Mat. 24:45, NWT) Twiiyiiy kutal cikwaabw mudy woos wa kutudy mwa kut Yeez ni muhik a lulamat nyam ku mikon.

3. I bukookesh kaay bwaakishilebw Yeez?

³ Yeez wendend ni kulombol mudimw a kudiil baat musah. I biny bitujaajaadikil naak? Mafuk makeeh kuuhal kwa kuyey mu diiwul, Yeez uhetelangan ni bamw ba ku biyiij bindiy ba lulamat ha mulund a Kalileh. Wiibambil neey: “Bukaleng boos bwa mwiiwul ni bwa ha bulab i baayaakishebw mim.” Wiiyil kwiimbambil cikwaabw neey: “Yindaay byeen, kudy baat ba bis byoos bya ha bulab, nwiibaalabul bashaal biiyiij ba mim.” (Mat. 28:18, 19) Nook, mu myand yikwaabw Yeez i bamwaakish bukookesh bwa kulombol mudimw a bukajaady.

4. Bwabiny tudy batwiishibw neey, Yeez ki uloolombol mudimw a kudiil baat musah?

 ⁴ Yeez uleejel neey, mudimw a kudiil baat musah ni kwaalabul baat bwa bashaal biiyiij, biiyiiy kumulong mu “bis byoos” ni wiiyiiy kwiikal ni biiyiij bindiy “mafuk moos teng ni ku bulekel kwa bulongolody bwa myand oobw.” (Mat. 28:20, NWT) May aam maleeleej biin-biin neey, mudimw a kudiil baat musah biiyiiy kutungunuk ni kumulong ku buludik bwa Yeez teng ni ku mafuk miitut aam.

5. I biny bitudy mwa kulong biikal mwa kuleej kukumban kwa may ma buprofet mady mu Misambw 110:3?

⁵ Yeez kumvwiiloh bend biibiih neey, kwiiyiiy kwiikal biin mudimw bakeeh mu ciisang cya mafuk ma myand yibiih eey. Waakady mumanyik neey, may ma buprofet maleebel mumb a Misambw miiyiiy kukumban: ‘Baat biibuh yaaw biiy kwiitwaal kayaabw, diifuk diwiiyiiy kukongakany basalaay biibuh.’ (Mis. 110:3) Uw mwiitwaal mu mudimw a bukajaady, utwaat Yeez ni muhik a lulamat nyam ku mikon ni wambambulwiish bwa kukumbaj diiy dya buprofet eedy. Mudimw oow bacyendend teng ni kumulong, ki kudyok makab.

6. I lutat kaay lutwiitwiilangan naalw badiil ba baat musah leel oow?

⁶ Lutat ludy neey, badiidiil baat musah a Bukaleng bataataatameen bulwiish. Batontolody, bafumw ba bitendeleel, ni biin cidiidy baleeleeb myand yiibiih yivul habiitaatal mudimw iitut. Iikal balel biitut, baat bamanyikangan naab, ni biin mudimw neet bamwamwangalaj myand yiibiih ya makos eey, bady mwa kwiitusak bwa tulek kukadil Yehow mudimw ni kwiimanyik mudimw a bukaajaady. Mu bibunj bikwaabw, balwiish biitut bady mwa kwiitulwiish eecy bakwaat biin-kweet baan-balum ni baan bakaj, ni biibumb mu nzubw a lukan. Kabiinoh bend bitukemesh hady myand ya nook yilongek. Yeez uleebel kal neey: “Bis byoos biiyiiy kwiinukin bwa diijin dya mim.” (Mat. 24:9, NWT) Makab makasakan matutwiitwiilangan naam aam bumudy lukin, bileeleej neey Yehow i mwiitwanyish. (Mat. 5:11, 12) Dyabol ki ukaakaamish makab aam. Ki Yeez udy ni bukash buvul buhitok bwa Sataan! Ku dyambulwiish dya Yeez, musah mulengel oow i mudiil baat ba bis byoos. Tukontononaay cijaadik ciileeleej bwaal oobw.

7. I bwaal kaay buwudy mutal bwend bukumban bilondeshel mukand a Myand Yisokolweel Jah 14:6, 7?

⁷ Lutat lukwaabw lutudy naalw mu mudimw iitut a bukajaady i lwa neey, baat baleeleeb bileebel bishilangan, baat bavul kabiishoh bend baleeb cileebel cyaakaabumw neet. Mu bwaal busokolweelobw mupostol Jah, Yeez uleebel neey, mu mafuk miitut aam musah mulengel baakady mwa kumudiil baat ni kakuy cidy mwa kumukaakeesh. (Bal Myand Yisokolweel Jah 14:6, 7.) Ku dyambulwiish dya biny? Tudy baakish baat bavul dyaakatook dya kwiitabob musah a Bukaleng. Leel oow, baat bady bitunyunguluk ha bulab bady ni mushind a kubal myand yidy yishimatil mu Bibl ku dyambulwiish dya sit iitut a jw.org bwaal myand eey yidyok mu bileebel bihit ha 1 000! Biin mu Kasumbw kaludik i biitwanyishil bwa kwaalabul mukand a Iikal ni buumy buyiil!​—mukand iitut a buseeb wa kulongweesh nend baat bwa bashaal biiyiij, mu bileebel bihit ha 700! Byaakudy bikwaabw bidyok mu video ya batumaam ni mikand ya mu braille ya bafw mees. Twendend ni kutal mukuukumban may ma buprofet mady mu Bibl. Baat ba “bileebel byoos ni ba bis byoos“ biiyiiy kulong bwa kuleeb “cileebel cikiish cyonyek” cya biin-biin cidy mu Bibl. (Zak. 8:23; Sef 3:9, NWT) Myand yoos eey yendend ni kukumban ku dyambulwiish dya Mukaleng udy mukumban Yeez Krist.

8. I bihet kaay bitudy bahet ku mudimw iitut a kudiil baat musah?

⁸ Leeloow, mu bibunj 240 tudy baat bahit ha 8 000 000 mu bulongolody bwa Yehow, ni  muvw woos oow, baat diikumy ha lukam baheehet baatiisumw! Bwaal bwa buseeb budy buhitok buuny bwa baat oobw, i biikadil bya mu spirit, “buumuut buhyaabuhy,” budy naabw biin Krist bahyaabahy aab. (Kol. 3:8-10) Baat bavul i balek bulongavy, cikis, kutobolol baat bakwaabw, ni kuyumb mwiiwul bwa cibunj. Diiy dya buprofet didy mu Yeshaay 2:4 dyendend ni kukumban; baat kabiishoh bend biiy “kwiiyij cikwaabw mwa kulw diivit.” Bu mutuloolong mwiitut moos bwa kuvwaal buumuut buhyaabuhy, twambambulwiish baat bwa batweel mu bulongolody bwa Mawej, ni hatuloolong nook, tuleeleej neey, tuloolond Mukaleng iitut Yeez Krist. (Jah 13:35; 1 Py. 2:12) Bwabiny myand eey yiloolonyek. Bwaal Yeez wiitwaakaakish bitudy naaby diikeng.

9. Bilondeshel Matewus 24:45-47, i biny bileebel Yeez bwa mafuk ma bulekel?

⁹ Bal Matewus 24:45-47. Yeez uleebel neey, mu mafuk ma bulekel, waakady mwa kuteek “muhik a lulamat udy mudimuk” bwa kwiitulongolweeley byaakudy bya mu spirit. Nook, tudy batal mudy muhik ukal mudimw mukasakan mu mafuk miitut aam. Myand eey yikaady ya biin-biin. Yeez i mukal mudimw ni kasumbw kakeeh ka bashing diisaby bwa kulongolweel baat ba Mawej myand ni kwiibatabaleel hakwiibaakish “byaakudy bya mu spirit mu ciisang cikumban.” Baat aab kabiishoh bend biital bu bafumw bady ni diiy ha diitabij dya bakwaabw. (2 Kor. 1:24) I bamanyik neey Yeez Krist i yiy “Mukaleng ni mulombol a baat bindiy”.​—Ye. 55:4.

10. I mukand kaay wa ku mikand yidyobw baleej ha cifwaatul waakady mukujaadikil neey ukaady wendel mu njil ufiifikij ku buumy bwa mwendelel?

¹⁰ Kacy mu muvw a 1919, muhik a lulamat i mulongolol mikand yishil-shilangan yidy yambulwiish baat bahyaabahy bakacil bwa kulongobw myand ya biin-biin yidy mu Diiy dya Mawej bwa musang aabab a kuuhal. Mu muvw a 1921, muhik ulongolweel mukand wa Harpe de Dieu bwa kwambulwiish baat baakady bakat  myand ya biin-biin bwa kulong malongweesh mashimat ma mu Bibl. Bu mwaakady biisang byaalabuk balongel mikand yikwaabw. I mukand kaay udy mukwambulwiish bwa kumanyik ni kukat Taat iitut a mu diiwul? Waakady i mukand wa “ Que Dieu soit reconnu pour vrai ! ”, La vérité qui conduit à la vie éternel, Vous pouvez vivre éternellement sur une terre qui deviendra un Paradis, Dimanya didi difikisha mu muoyi wa kashidi, Bible utu ulongesha tshinyi menemene?, Malu kayi adi Bible utulongesha?, eecy mukand iitut muhyaamuhy wa neey: Iikal ni buumy buyiil! Mikand yoos eey yaakady yilong bwa kwiitwambulwiish bwiitut kwaalabul baat bwa bashaal biiyiij, ni ki cyaakadyobw bakaam haakadyobw bahatul mikand eey.

11. Bwabiny bidy ni buseeb bwa woos wa kutudy ahet byaakudy bya mu spirit?

¹¹ Baat bahyaabahy bady bakat myand ya biin-biin kabiish teng bab bakaakaam bya kudy bya mu spirit bikasakan. Tut boos twiibikaakaam. Mupostol Pool ufundil neey: “byaakudy bikasakan i bidyaady bakuluuh.” Pool uleebel cikwaabw neey, tut tukooyel may ma mu spirit mady mwa kwiitwambulwiish bwa “bwiitut kujingunun myand yilengel ni yibiih.” (Eb 5:14) Mu biisang bikasakan eeby mudy myand ya bukalang yinyanguk menmen, bidy mwa kwiikal lutat lwa biin-biin bwa kukooyel may ma Yehow. Ki Yeez wiitujaajaadikil neey, tudy mwa kuhet diikand hatudyaady byaakudy bya mu spirit. Tuheehet byaakudy eeby mu Bibl Diiy dya Mawej difundish ku dyambulwiish dya spirit mujilang. Muhik a lulamat wiituloolongolweel ni wiitwaakish bya kudy eeby ku buludik bwa Yeez.

12. Teng bu Yeez i mushind kaay utudy batumbish diijin dya Mawej?

¹² Teng bu Yeez, tutuutumbish diijin dya Mawej bwaal yiy ki udy mwaakanyin lutumb. (Jah 17:6, 26) Cileejel, mu muvw a 1931 twangacil diijin eedy Batemw ba Yehow mu Bibl, kulong nook tuleej mutudy bangat diijin dya Mawej ni  buseeb ni tudy bakat bwa biikal biitubiikan mu diijin dya taat iitut udy mu diiwul. (Ye. 43:10-12) Kutwaadijil teng ku suuny a Diikumy a muvw aaw, batwaadijil kufund diijin dya Mawej ha mut a cizubw cya cibij-bij eecy. Cikwaabw, mu Bibl wa Nkudimuinu wa bulongolodi bupiabupia i bateekomw diijin dya Mawej ha cyaab cya didy. Kushilangan kudyok i kwa neey, biin mu bitendeleel bya bukwaabwiin Krist i baful diijin dya Yehow mu Bibl yaabab yivul yidyobw baalabul!

13. I biny bikujaajaadikil neey Yeez ukaakal mudimw ni “muhik a lulamat udy mudimuk” leeloow? (Jah 6:68)

¹³ Ku dyambulwiish dya “muhik a lulamat udy mudimuk,” Yeez i muteek bulongolody ha bulab bwa kulong bwa myand ya kuhambidil kujilangan yiy kuuhal. I mushind kaay utaatal bulongolody eebw? Bwa kwaalabul, misang yikwaabw udy mwa kulangil a may ma mupostol Pyeel uhangujil Yeez neey: “i kwa ngany kutuyaay? Uw i yiy udy ni may ma buumy bwa mwendelel.” (Jah 6:68) I cyaab kaay citwaakady mwa kumanyikil myand tut biikal katuy batweel mu bulongolody bwa Yehow? Ku dyambulwiish dya bulongolody eebw, Krist wiitujaadikil neey, tudy ni byoos biitukaakaam bwa kushaal ni lulamat kudy Mawej. Cikwaabw i mwiitulongweesh bilengel bwa kukal mudimw iitut a bukajaady. Ni wiitwambambulwiish bwiitut kuvwaal “buumuut buhyaabuhy,” ni kiihacil kiitut kusangeej Yehow.​—Ef. 4:24.

14. I myand kaay yilengel yiwudy muhet hakwiikal mu bulongolody bwa Yehow mu ciisang cya KOVID-19?

¹⁴ Yeez wiitwaatwaakish may ma kulond mu biisang bikasakan. Myand yilengel ya ku buludik eey yimweekel hatook hatwaadijil cihuh cya KOVID-19. Haakady baat bavul ba ha bulab kabay bamanyik cya kulong, Yeez waakady mutwiishiibw neey, tudy bahet buludik bwa biin-biin bwiitut kutungunuk ni kwiilam. Baakady  bitukashish bwa kuvwaal kazang kabwiibwiikil myuul ni mishik (mask) hatudy mukacy mwa baat ni bwa kwiikalok ha bul ni muut mukwaabw. Baakady bavulwiij bakul bwa biikal ni ciibidil cya kwiisamb ni woos wa mu cisumbw ni bwa kumanyik biit byaakadyobw naaby dikeng bya ku nyeet ni bya mu spirit. (Ye. 32:1, 2) Tuhetel cikwaabw may ma kulond ni makaakashish maakadyobw batwaal kudy biin mu Kasumbw Kaludik.

15. I may ma kulond kaay miitwaakishilobw bwa kulong bisangil ni bwa kukal mudimw iitut a bukajaady mu ciisang cya cihuh, ni i bihet kaay bituhetel?

¹⁵ Mu cihuh eecy, tuhetel cikwaabw may ma kulond ma biin-biin ha biitaataal mushind a kulong bisangil ni mushind utudy mwa kukal mudimw iitut a bukajaady. Musang aakaabumw, tutwaadijil kulong bisangil biitut bya biin Krist, mu hwiil, ni mu bihwiil ku dyambulwiish dya byaamw bya baat biisamb batalangan. Tutwaadijil cikwaabw ku dyambulwiish dya kufundilangan mikand ni ku telefon. Yehow i mubenesh kwiikashishomw kwiitut. Betel yivul i yitwaal lwaapool lwa neey: buuny bwa bakajaady bwendend teng ni kuvul. Biin-biin, baat bavul i bibakashish bikasakan mu ciisang eecy.​—Tal kazub ka neey: “ Yehow Ubebeenesh Mudimw iitut a Bukajaady.”

16. Biikaam twiikal batwiishiibw bwa bwaal kaay?

¹⁶ Bakwaabw bady mwa kwiikal balang neey, bulongolody bwaakady buhitijoh ni kwiitudimwiij habitaatal cihuh. Ki ku musang ni ku musang bimweekel hatook neey, may ma kulond matuhetel maakady ma meej. (Mat. 11:19) Ni hatulaalangil ha lukat ludy naalw Yeez bwa mushind udyey ulombol baat bindiy, tudy batwiishiibw neey ning bwa bwaal kaay boos bwiikal mwa kutufikil muucy, Yehow ni Mwaan indiy udyey mukat biikaakal neet.​—Bal Biin Ebreh 13:5, 6.

17. Wiiyuuyumvw bicy hawukaakal mudimw mu bulongolody buloolombol Yeez?

¹⁷ I musangal kaay muvul utudy nend hatudy ni mulombol iitut Yeez! Tudy mu bulongolody budy mu kaacyumw mudy baat bady baalukil mu byaab bishiil-shilangan, mu bibunj bishiil-shiilangan, ni baleeb bileebel bishiil-shiilangan. Tudy badiishiibw bikasakan ni myand ya mu spirit ni tudy ni biit byoos bilengel bitwaatwambulwiish bwa kukal mudimw a bukajaady. Woos wa kutudy wendend uhet malongweesh mady mwa ku mwambulwiish bwa kuvwaal buumuut buhyaabuhy, ni tuloolong mushind a kukatangan. Bu mudy Yeez mwiikal mulombol iitut, tudy ni kabingil ka kwiiyumvw biin-biin ni musangal!