1. Erisonda lya Yehova ly’eryahi munabwire?

 MUNABWIRE erisonda lya Nyamuhanga liri lithi engulhu yuwene y’Obwami yithulhughanibawe omo kihugho kyosi. (Mk. 13:10; 1 Tim. 2:3, 4) Oyu ni mubiiri wa Yehova, kandi ni mubiiri mukulhu kundi abirihiragho ahisi sy’obusondoli bwa Mughalha wiwe mwanzwa. Thwangana kakasya ngoku omwa busondoli bwa Yesu obuwene, omubiiri w’erithulira akendi syahwa ngoku Yehova anzire, enduli yithe yasa.​—Mt. 24:14.

2. Thukendi kania okuki omo mwatsi ono?

² Omo mwatsi ono, thukendi lhangira ngoku Yesu anemukolesya ‘omughombe wiwe oyutheleghulha n’ow’amenge’ eriha abakamukwama b’akalyo k’obunyakirimu n’eritheghekaniabo busana n’omubiiri munene ow’erithulhughania omwa kihugho kyosi. (Mt. 24:45) Kandi thukendi lhangira ebya buli mughuma w’okw’ithwe angakolha erisighika Yesu n’omughombe oyutheleghulha.

3. Ni hamuli yahi eyo Yesu abirihebwa?

³ Yesu anemusondolha omubiiri w’erithulira. Ekyo thwanga kiminya thuthi? Buthuku buke athali asuba elhubulha, Yesu mwahindana n’abaghuma b’okwa bigha biwe abathaleghulha okwa kithwe omwa Galilaya. Mwababwira athi: “Ehamuli yosi nabirihebwayo omo lhubulha n’omo kihugho.” Thalebya eby’ongerako bino: “Neryo mughende, muyire abigha oko bihanda byosi.” (Mt. 28:18, 19) Neryo eryongera okwa byahebawa, Yesu abirihebwa ehamuli y’erisondolha omubiiri w’erithulira.

4. Busana naki ithwaligha ngoku Yesu akinasondolha omubiiri w’erithulira?

 ⁴ Yesu mwabugha athi omubiiri w’erithulira n’eriyira abigha angakolirwe omwa “bihanda byosi” kandi athi angabere iniane haghuma n’abakamukwama “ebiro byosi erihika okw’ihwererera ly’emighulhu.” (Mt. 28:20) Ebinywe ebi bikakanganaya ndeke-ndeke ngoku omubiiri w’erithulira angalholire embere ahisi sy’obusondoli bwa Yesu erihika namunabwire.

5. Thukawathikaya thuthi omw’ibererera lya Esyonyimbo 110:3?

⁵ Yesu sy’abya ayilhalikirire athi abakoli bangabere bake omwa buthuku bw’erihwererera ly’emighulhu. Abya inianasi ngoku ebinywe by’obuminyereri eby’omuhandiki w’esyonyimbo byangabererere: “Abandu bawu basyayiha okw’iwe ekiro wasyalhwa n’esyonzighu syawu.” (Esy. 110:3) Wamabya iwunemusangira omwa mubiiri w’erithulira, wunemusighika Yesu n’omughombe oyutheleghulha kandi wunemuwathikya omw’iberererya obuminyereri obo. Omubiiri anemulholha embere, aliwe hane ebitsibu.

6. Ni kitsibu kyahi kighuma ekya bathuliri b’Obwami bakabana munabwire?

⁶ Ekitsibu kighuma eky’abathuliri b’Obwami bakabana ly’erihakanisibwa. Abakayisamambulha okw’ikirirya, abasondoli b’amadini, n’abanya politiki bakabwira abangyi b’amabehi okwa mubiiri wethu. Abahughu bethu, abandu abo thwasi, n’abathukakolha nabu bamathebibwa omwa mabehi ayo, ibangana thuhira kw’akahathikano k’erianza thuleke erikolera Yehova n’erileka erithulira. Omwa bindi bihugho, erihakanisya lyanganabya omwa mulingo w’eryubahisibwa, erihayirwa, erihambwa, nibya n’erihirwa omwa ngomo. Eki sikirithuswekaya. Yesu mwalhaghulha athi: “Ebihanda byosi byasyabakwa obusu busana n’erina lyaghe.” (Mt. 24:9) Eribya ithunemuyilhangirira eriponwa ng’eri kikakanganaya ngoku Yehova anathulighire. (Mt. 5:11, 12) Diabolo yukaleka ihabya erihakanisya eri. Aliwe Yesu awithe amaaka manene oku Sitani! Busana n’obuwathikya bwa Yesu, engulhu yuwene yinemuhika okwa bandu b’ebihanda byosi. Thalhangira obwema.

7. Ni bwema bwahi obwa wukalhangira obukakanganaya ngoku ebiri omwa Eribisulirwa 14:6, 7 binemubererera?

⁷ Ithwe ng’abathuliri b’Obwami, thukabana n’ekitsibu ky’emibughe. Omw’ibisulirwa ery’aha omukwenda Yoane, Yesu mwabisulha ngoku abakathulhughanaya engulhu yuwene bangasingwire ekitsibu ekyo. (Soma Eribisulirwa 14:6, 7.) Bathi? Thunemuha abangyi b’akaghisa k’erihulikirira omwatsi w’Obwami ngoku thwanga thoka. Munabwire, abandu erithimba omwa kihugho kyosi banemusoma emyatsi eyiseghemere okwa Biblia okwa muthahulha wethu owe jw.org kundi yineko omwa mibughe eyilhabire omu 1,000! Akathunga Akakasondolha mukalighira erihindulhwa ly’ekitabu kikulhu ekya thukakolesaya eriyira abigha ekya Tsemera Engebe Kera na Kera!, omwa mibughe eyilhabire omu 700! Abatsiha banemubana ebyalya by’obunyakirimu erilhabira omwa syovidiyo, n’esyondimethime banemubana ebitabu by’esyondimethime. Thunemulhangira amaminyereri we Biblia akabererera. Abandu “abakalhua oko bihanda by’obuli mubughe” banemw’igha omubughe ow’erire ow’ekwenene ye Biblia. (Zek. 8:23; Zef. 3:9) Ebyosi ebi binemukoleka ahisi sy’obusondoli bwa Yesu Kristo.

8. Ni byahi ebyabirilhwiririra omwa mubiiri wethu w’erithulira?

⁸ Munabwire, abandu abalhabire omu 8,000,000 omwa bihugho 240 bane omwa kithunga kya Yehova, kandi obuli mwaka abandu abalhabire omu 100,000  bakabatizibawa! Aliwe ekirengire n’emighanzo eyi y’emibere y’obunyakirimu​—“omundu muhya-muhya”—​eyo abigha bahyaka aba babirikulha-kulhania. (Kol. 3:8-10) Abangyi mubaleka eby’obutswatswa, obutsurumi, akasolholho, n’eby’erianza ekihugho kyabu kya kutsibu. Obuminyereri obuli omu Isaya 2:4 bunemubererera; ‘sibakiyeghesaya amalhwa.’ Thukabya thukalengaho eriambalha omundu muhya-muhya, thukaleka abandu ibasa omwa kithunga kya Nyamuhanga kandi thukakanganaya ngoku thukakwama omusondoli wethu Kristo Yesu. (Yn. 13:35; 1 Pet. 2:12) Okw’ebi, sihali ekikasa bwase. Yesu anemuthuha obuwathikya obwa thukayithagha.

9. Ngoku kiri omu Matayo 24:45-47, ni byahi ebyalhaghulhawa ebihambire okwa mughulhu w’enduli?

⁹ Soma Matayo 24:45-47. Yesu mwalhaghulha athi omwa mughulhu w’enduli angasombwere “omughombe oyutheleghulha n’ow’amenge” erithuha ebyalya by’obunyakirimu. Neryo ithwangana yikethera ngoku omughombe oyu akendi kolha kutsibu omwa buthuku bwethu buno. Eki kyabirilhangirika ndeke-ndeke. Omusondoli wethu abirikolesya egurupu nyike ey’abalhume abahakabibwa eriha abandu ba Nyamuhanga n’abakanzisibawa ‘b’akalyo k’obunyakirimu oko mughulhu atholere.’ Abalhume abo sibali yilhangira ng’abakathabalha okw’ikirirya ly’abandi. (2 Kor. 1:24) Omwakanya k’ekyo, bakaminya ngoku Yesu Kristo ya “musondoli n’omukulhu” ow’abandu biwe.​—Isa. 55:4.

10. Ni kitabu kyahi okwa biri omwa kisasani ekyaleka iwaligha erilendera omwa nzira eyikakolhaya okwa ngebe y’erikotha?

¹⁰ Eritsuka 1919, omughombe oyutheleghulha abiribya inianemuthegheka ebitabu muthina-muthina ebyabirileka abakanzisibawa ibabana akaghisa k’erirozya okwa kalyo  k’obunyakirimu akakahimba. Omwa 1921, omughombe mwatheghekania ekitabu The Harp of God eriwathikya abakanzisibawa erigha esyongangirirya sye Biblia esy’omusingyi. Emibere yabere yinemuhinduka, ebindi bitabu mubyahulhukibwa. Ni kitabu kyahi ekya kuwathikaya eriminya n’erianza Thatha wethu w’elhubulha? Mbwino ky’ekitabu “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, E Biblia Kwenene Yikakangiriraya Ki?, E Biblia Yanga Thukangiriryaki?, kutse Tsemera Engebe Kera na Kera!, ekitabu kyethu ekihyaka? Ebitabu byosi ebi byakolhawa eriberererya ekiyithawa ekyabyaho okwa buthuku byahulhukibawa.

11. Busana naki ni kikulhu ithwe bosi erithunga akalyo k’obunyakirimu?

¹¹ Abakanzisibawa sibo basa abakayithagha ebyalya ebikalha-kalire eby’obunyakirimu. Ithwe bosi thukabiyithagha. Omukwenda Paulo mwahandika athi: “Ebyalya ebikalha-kalire ni by’abandu abakulire.” Paulo mwongerako athi erighendera okwa by’obunyakirimu ng’ebyo kyanga thuwathikirye “erithoka erighabulha ekibuya n’ekibi.” (Ebr. 5:14, NWT) Omwa buthuku obukalire buno omughulhu eby’esyongeso byabiritsandira ighuma, kyangana kalha erighendera okwa bihano bya Yehova. Aliwe Yesu akalhangira athi thukabana akaghalha akathukayithagha erilhabira omwa kalyo k’obunyakirimu akuwene. Akalyo aka kakalhua omwa Kinywe kya Nyamuhanga ekyasondolibawa, e Biblia. Omughombe oyutheleghulha akathegheka n’erighaba akalyo aka erilhabira omwa busondoli bwa Yesu.

12. Nga Yesu, thwabiriha thuthi erina lya Nyamuhanga ly’olhukengerwa?

¹² Nga Yesu, thwabiriha erina lya Nyamuhanga ly’olhukengerwa olhutholereryo. (Yn. 17:6, 26, NWT) Ng’eky’erileberyako, omwa 1931  muthwahebwa erina erilhuire omwa Masako erya Abema ba Yehova, ekyabirileka ithwabya n’obughuma obwa hakuhi na Thatha wethu w’elhubulha. (Isa. 43:10-12) Kandi eritsuka Okwerikumi oko mwaka oyo, erina lya Nyamuhanga lyabiribya likabya okwa kidipa ky’obuli gazeti y’Akaleberyo. Eryongera okw’ekyo, e New World Translation of the Holy Scriptures yabirisubya erina lya Nyamuhanga ahalitholere omwa Kinywe kiwe. Eki kiri mbaghane okwa makanisa w’Ekikristendomu awabirilhusya erina lya Yehova omwa syombindulha syagho nyingyi esye Biblia!

13. Ni kyahi ekikaleka iwaligha ngoku Yesu anemukolesya “omughombe oyutheleghulha n’ow’amenge” munabwire? (Yoane 6:68)

¹³ Erilhabira omwa “mughombe oyutheleghulha n’ow’amenge,” Yesu abirihira okwa kihugho kw’ekithunga ekikakulha-kulhanaya eriramya ly’okwenene. Wukayowa wuthi busana n’ekithunga ekyo? Obundi wukalengekanaya okwa binywe by’omukwenda Petero, oyuwabwira Yesu athi: “Thwasyaya okundi kwehi? Iwe wuwithe ebinywe by’engebe y’erikotha.” (Yn. 6:68) Thwangabere hayi munabwire ku thuthabya omwa kithunga kya Yehova? Erilhabira mukyo, Kristo akalhangira athi thukalisibawa ndeke bunyakirimu. Kandi akathuthendeka erikolha ndeke omubiiri wethu w’erithulira. Eryongera okw’ekyo, akathuwathikaya eribya “bandu bahya-bahya,” nuku thutsemesaye Yehova.​—Efe. 4:24.

14. Wabirighasirwa wuthi busana n’eribya omwa kithunga kya Yehova omwa buthuku bw’ekihunzo ky’ekorona?

¹⁴ Yesu akathuha obusondoli obuwene omwa mighulhu eyikalire. Omughaso w’obusondoli obo mwalhangirikire omughulhu ekihunzo ky’ekorona (COVID-19) kyatsuka. Omughulhu abangyi omwa kihugho  babya ibanemubulha nga bakoleki, Yesu mwalhangira athi thukabana obusondoli obuwene erithutheya. Muthwahiribwa mw’omuhwa w’eribya thukambalha esyomasiki n’erithendi segheranako hakuhi. Abasyakulhu mub’ibukibwa eribya ibanemukanirania n’abosi abali omwa kithunga n’eriminya ebiyithawa byabu eby’ekinyamubiri n’eby’obunyakirimu. (Isa. 32:1, 2) Muthwahebwa obundi busondoli n’erihumulikanibwa erilhabira omwa syoripoti esikalhua okwa Kathunga Akakasondolha.

15. Ni busondoli bwahi obwa hebawa obuhambire okwa mihindano n’okwa mubiiri w’erithulira omwa buthuku bw’ekihunzo, kandi mumwalhwiririraki?

¹⁵ Kandi omwa buthuku bw’ekihunzo muthwahebwa obusondoli obuwene obuhambire okw’ithunga emihindano n’erisangira omwa mubiiri w’erithulira. Muthwatsukiraho erihindana okwa mihindano y’Ekikristayo n’emihindano eminene-minene erilhabira okwa Intaneti. Kandi hakuhi ithwe bosi muthwatsuka erisangira omw’ithulira omw’ihandika esyobaruha n’erikolesya esimu. Yehova mwatsumulha akaghalha kethu. Ebyaghanda bingyi by’omuthahulha mubyaripotinga omughanzo munene ow’abathuliri. Ni kwenene, abangyi mubabana ebyalholirweko ebikahimba omwa buthuku obu.​—Lebaya akasanduko “ Yehova Akatsumulha Omubiiri Wethu w’Erithulira.”

16. Ni kyahi ekya thwanga yikethera?

¹⁶ Abandi bangabya imubayowa bathi ekithunga kyamalhabirirania omwa by’eriyitheya bikahika okwa kihunzo. Aliwe mughulhu wosi, mukyalhangirika ngoku obusondoli obwa thwahebawa bwabya bw’amenge. (Mt. 11:19) Kandi thukabya thukaghanirya okwa mibere y’olhwanzo eyo Yesu anemusondoleramo abandu biwe, thukayikethera ngoku nomubyangabya bithi omwa buthuku obukasa, Yehova na Mughalha wiwe mwanzwa bakendibya ibane haghuma nethu.​—Soma Abaebrania 13:5, 6.

17. Wukayowa wuthi erikolera ahisi sy’obusondoli bwa Yesu?

¹⁷ Ka ni mughisa erikolera ahisi sy’obusondoli bwa Yesu! Thuli omwa kithunga ekithemo akasolholho k’ekalikya, ak’ebihanda, n’emibughe. Thukalisibawa ndeke bunyakirimu kandi thwabirithendekwa erikolha omubiiri w’erithulira. Obuli mundu anemuwathikibwa eriambalha omundu muhya-muhya, kandi thunemw’igha erianzana. Thuwithe nzumwa mbuya esyanga leka ithwayisyethera omusondoli wethu Yesu!