CIPANDE CA KUSAMBILILAMO 29
Ukuombela Pamwi ni Ntunguluzi Itu Yesu
“Impeelwa amaka yonsi umwi yulu na pano nsi.”—MATE. 28:18.
LWIMBO NA. 13 Lyonsi Twakolanya Klistu
VINO TUMASAMBILILAPO *
1. I vyani vino Yeova akulonda vicitike ndakai?
NDAKAI Leza akulonda ukuti ilyasi lisuma ilya wene lisimikilwe umu nsi yonsi. (Mako 13:10; 1 Tim. 2:3, 4) Uu umulimo wakwe Yeova, fwandi wasoolola umwakwe wino watemwa ukutungulula umulimo uu. Pa mulandu wakuti Yesu akututungulula tungasininkizya ukuti umulimo wa kusimikila ulaombwa ningo ukulingana sile na vino Yeova akalonda lino impela itatala iza.—Mate. 24:14.
2. I vyani vino tumasambilila umu cipande ci?
2 Umu cipande cii, tumasambilila pali vino Yesu akuomvya “umuomvi mutailwe nupya uwa mano” ukutunena ivyeo ivya kutwazwa ukufuma umwi Izwi Lyakwe Leza nu kutungulula alondezi yakwe ukuombesya umu mulimo wa kusimikila vino utatala waombwapo. (Mate. 24:45) Nupya tumasambilila na pali vino swensi wenga na wenga tungacita pakuti tuombele pamwi na Yesu nu muomvi mutailwe.
YESU AKATUNGULULA UMULIMO WA KUSIMIKILA
3. Aamaka ci yano Yesu wapeelwa?
3 Yesu akutungulula umulimo wa kusimikila. Tungasininkizya uli vivyo? Lino kwasile sile panono ukuti Yesu aswilile ukwi yulu wakomenkine pamwi na alondezi yakwe yamwi acisinka pa mwamba wa Galili. Wayanenyile ukuti: “Impeelwa amaka yonsi umwi yulu na pano nsi.” Uvwini amazwi na yauze yano walanzile watiile: “Acino fwandi, yangini mukapange antu amu nko zyonsi ukuya asambi.” (Mate. 28:18, 19) Fwandi, apa vintu vino Yesu wapeelwa amaka paya nu kutungulula umulimo wa kusimikila.
4. Tungasininkizya uli ukuti Yesu acili akutungulula umulimo wa kusimikila?
4 Yesu walanzile ukuti umulimo wa kupanga asambi wali nu kuombwa umu nko zyonsi nupya watiile alaya na alondezi yakwe “amanda yonsi ukufika nu ku mpelelekezyo ya nsi.” (Mate. 28:20) Amazwi yaa yakalangilila ukuti Yesu wali nu kutwalilila ukutungulula umulimo wa kusimikila ukufika nu mu manda itu.
5. Tungazwilizyako uli ukufikilizya vino Masamu 110:3 ikalanda?
5 Yesu ataasakamile ukuti aakuomba umulimo wa kusimikila umu manda akusyalikizya yali nu kucepa. Wamanyile ukuti amazwi amu Masamu yali nu kufikiliziwa akuti: “Antu yako yalaipelesya, apa wanda uno wemo ulalwisya anisi yako.” (Masa. 110:3) Ndi cakuti mukuombako umulimo wa kusimikila ala mu kuombela pamwi na Yesu nu muomvi umutailwe nupya mu kwazwilizyako ukufikilizya usesemo uu. Mulimo ukuombwa, nanti cakuti kukaya intazi.
6. Iintazi ci yonga ino yakasimikila ya Wene yakakwata ndakai?
6 Intazi yonga ino yakasimikila ya Wene yakakwata ndakai u kucuziwa. Asangu, intunguluzi zya mu mipepele, ni ntunguluzi zya tuungwe twa miteekele yanena antu aingi ivya ufi pa mulimo witu. Ndi cakuti ya lupwa itu, ivyuza na yano tukaomba nayo yuvwila ufi uu, cingalenga yatandike ukutupatikizya ukuta ukuombela Yeova nu kuta ukusimikila. Umu mpanga zimwi alwani itu yakatiinya, ukuma, ukulema aina na ya nkazi nanti sile ukuika umu vifungo. Tusizunguka ndi cakuti ya kutucitila ivintu vya musango uu. Yesu wasowile ukuti: “Antu amu nko zyonsi yalamupata pa mulandu wi zina lyane.” (Mate. 24:9) Ndi cakuti ivintu vya musango uu vikutucitikila ala Yeova ali naswe. (Mate. 5:11, 12) Ciwa aakulenga vyonsi vii ukucitika. Nomba Yesu wacila Satana amaka. Pa mulandu wakuti Yesu akutungulula umulimo uu, antu yonsi umu nko yakuvwa ilyasi lisuma. Lekini tuvwe usininkizyo umwi.
7. I vyani vino mukulola vikufikiliziwa ivyaya pa Kusokolola 14:6, 7?
7 Intazi na yuze ino tukakwata iyakuti antu aingi yakavwanga indimi zipusanepusane. Muli vino Yesu wasokololwile uku mutumwa Yoani wasoowile nu kuti umu manda itu ilyasi lisuma lilatwalilila ukusimikilwa asi mulandu ni ntazi ii. (Belengini Kusokolola 14:6, 7.) U mulandu ci uno twalandila vivyo? Tukaazwa antu aingi ukuvwa ilyasi lya Wene. Ndakai, antu yonsi umu nsi yangabelenga impapulo izikalanda pali Baibo pa webusaiti itu iya jw.org pa mulandu wakuti paya ivyeo ivingi umu ndimi ukucila pali 1,000. Iumba ilikatungulula lyazumilizye ukusenula ibuku lya kuti Mungaya ni Nsansa Manda Pe! Umu ndimi ukucila pali 700 pakuti twaliomvya umu mulimo wa kupanga asambi. Kwaya na mavidyo akopelwe limwi umu lulimi lwakwe ya ciulu alino ni mpapulo zya mpafu ivikalanda pali Baibo. Tukulola kuno mausesemo ya muli Baibo yakufikiliziwa. Antu ukufuma umu yantu aakalanda “indimi zipusanepusane” yakusambilila ivya kuvwanga ululimi ulusanguluke ulwaya umu cumi ca muli Baibo. (Zaka. 8:23; Zefa. 3:9) Vii vyonsi vikucitika pa mulandu wakuti Yesu Klistu intunguluzi itu akatungulula ningo.
8. I vyani ivyacitika pa mulandu nu mulimo uno tukaomba uwa kusimikila?
8 Ndakai antu ukucila pali 8 milyoni umu mpanga 240 yaya umwi uvi lyakwe Yeova, nupya cila mwaka antu aingi yakabatiziwa. Nomba icicindamisye ukucila pa mpendwa ya yantu, asambi yaa yazwala untu upya nu kuya ni miyele ino aina Klistu yalinzile ukukwata. (Kolo. 3:8-10) Antu aingi yata ukuya ni miyele iipe wakwe, unkalwe, kapatulula, nu kutemwisya sana impanga yao. Amazwi aaya pali Ezaya 2:4 yakufikiliziwa; yata ukusambalila ivya nkondo. Pa mulandu wakuti tukaombesya ukuzwala untu upya tukaazwa antu ukwiza umwi uvi lyakwe Leza, nupya tukalanga ukuti tukalondela intunguluzi itu Klistu Yesu. (Yoa. 13:35; 1 Pet. 2:12) Vyonsi vii visiicitikila sile. Lelo vikacitika pa mulandu wakuti Yesu akatwazwa.
YESU WASONTA UMUOMVI
9. Ukulingana na Mateo 24:45-47, i vyani vino Yesu wasoowile ukuti ivicitika umu manda yaa akusyalikizya?
9 Belengini Mateo 24:45-47. Yesu wasoowile ukuti umu manda akusyalikizya wali nu kusonta “umuomvi mutailwe nupya uwa mano” pakuti aapekanya ivyeo ukufuma umwi Izwi Lyakwe Leza. Fwandi tukaenekela ukuti umuomvi wii alinzile ukuombesya sana umu manda itu. Nupya vikwene avino caya. Yesu akaomvya iumba ilinono ilya onsi apakwe ukupekanyizizya antu yakwe Leza na yayo aakalonda ukusambilila pali aliwe ivyakulya pa nsita ilinge. Aonsi yaa yasiilola ukuti aangalizi pa utailo wakwe yauze. (2 Kol. 1:24) Lelo yamanya ukuti Yesu Klistu aali ntunguluzi nupya kateeka wa yantu yakwe.—Eza. 55:4.
10. U lupapulo ci pa mpapulo izili pa cikope ulwamwazwile ukutandika ukuombela Yeova?
10 Ukufuma umu 1919, umuomvi mutailwe wapekanya impapulo ipusanepusane izyazwa antu ukusambilila icumi pali Leza. Umu 1921, umuomvi wii wapanzile ibuku lyakuti The Harp of God ukwazwa antu ukusambilila amasambililo ya kutandikilapo muli Baibo. Lino ivintu vyayanga vikusenuka wapanzile impapulo na zyuze. Ulupapulo ci pa mpapulo zii ulwamwazwile ukumanya Tata witu uwa kwi yulu nu kumutemwa? Uzye ulwakuti “Let God Be True,” The Truth That Leads to Eternal Life, Mungikala Umu Paladaise Pano Nsi Amanda Pe, Knowledge That Leads to Everlasting Life, Uzye Baibo Ikasambilizya Ukuti Uli, Uzye Baibo Ikasambilizya Vyani? nanti ulupapulo ulupya luno tukweti ulwakuti Mungaya ni Nsansa Manda Pe! Impapulo zyonsi kwene zii zyapangiilwe ukukutwazwa ukupanga asambi nupya ali zino twalondekwanga pa nsita kwene iya ino zyampanzilwe.
11. U mulandu ci uno tulinzile ukusambililila pali Yeova na Baibo?
11 Antu aakulondesya ukusambilila asi aliyo sile alinzile ukusambilila Baibo na pali Leza. Swensi kwene tulinzile ukusambilila. Umutumwa Paulo walemvile ukuti: “Ivyakulya vikome i vya yantu aikolo.” Paulo walanzile nu kuti ukuomvya vino tukusambilila muli Baibo kungatwazwa “ukupusanya icisuma ni ciipe.” (Aeb. 5:14) Cingatutalila ukulauvwila amasunde yakwe Yeova pa mulandu wakuti antu aingi yakacita ivintu vingi viipe sana. Nomba Yesu akasininkizya ukuti twasambilila ivintu ivingatwazwa ukuya nu utailo ukome. Ivyeo vii vino tukasambilila vikafuma umwi Izwi Lyakwe Leza, Baibo. Umuomvi mutailwe akatungululwa na Yesu lino akutupekanyizizya ivyeo vii.
12. Wakwe Yesu tukalanga uli ukuti twacindika izina lyakwe Leza?
12 Wakwe Yesu, twapeela izina lyakwe Leza umucinzi uno lilinzile ukupeelwa. (Yoa. 17:6, 26) Wakwe, umu 1931 twatandike ukwamwa ukuti ya Nte Yakwe Yeova ukucita vivyo kwalangilile vino twacindike izina lyakwe Leza nu kuti twalondanga ukumanyikilwa ukwi zina lyakwe Tata witu uwa kwi yulu. (Eza. 43:10-12) Nupya ukufuma umu umwaka kwene uwa izina lyakwe Leza likalolekela pa nkupo ya kutandikilapo pa Lupungu Lwa Mulinzi. Muli Baibo wa Muzilo Uwa Malembo ya Nsi Ipya mwaya izina Lyakwe Leza ponsi pano lilinzile ukuya. Cii calenga tupusaneko na maceici yauze afumya izina lyakwe Leza umu Mabaibo yano yasenula.
YESU AKATUNGULULA ALONDEZI YAKWE
13. I cani calenga musininkizye ukuti Yesu akuomvya “umuomvi mutailwe nupya uwa mano” ndakai? (Yoani 6:68)
13 Ukupitila umu “umuomvi mutailwe nupya uwa mano” Yesu wikako iuvi iliiyele pano nsi ilikatungilila ukupepa kwa cumi. Uzye mukayuvwa uli api iuvi lilyo? Limwi mukayuvwa wakwe vino umutumwa Petulo wayuvwanga, uwanenyile Yesu ati: “Mwene nga a kuli weni kuno tumaya? Wewe uli na mazwi ya umi wa pe.” (Yoa. 6:68) Uzye nga aekwi kuno tuli ndi cakuti tutali umwi iuvi lyakwe Yeova? Klistu akaomvya iuvi kwene lii pa kusininkizya ukuti itukwata vyonsi vino tukulondekwa pakuti tutwalilile ukuya acisinka kuli Leza. Nupya akatusambilizya ivya kuomba ningo umulimo wa kusimikila. Akatwazwa nu kuzwala untu upya pakuti twazanzya Leza.—Efes. 4:24.
14. Uzye ukuya umwi iuvi lyakwe Yeova kwamwazwa uli umu nsita ii yakwe COVID-19?
14 Yesu akatunena ivya kucita ndi cakuti kuli mazanzo. Twasininkizye ukuti vino akatunena vingatwazwa lino ulwale wakwe COVID-19 watandike. Lino antu aingi umu nsi yatali yamanye vino yalinzile ukucita Yesu wasininkizye ukuti twapeelwa utunguluzi pali vino tulinzile ukucita pakuti tuye acingililwe. Yatukomelezyanga ukulazwala mamasiki nu kutaalukana lino tuli ukuli antu aingi. Ya eluda yaiusyangako ukuti yalinzile ukulalanzyanya na amu cilongano lyonsi nu kumanya vino yakulondekwa pakuti yatwalilile ukuya nu umi usuma na ucuza na Yeova. (Eza. 32:1, 2) Nupya ukufuma pano ulwale watandikila lyonsi tukapokelela utunguluzi nu kukomeleziwa ukufuma ukwi Umba Ilikatungulula, ukupitila umu mavidyo akuti ivyeo ivipya ukufuma ukwi Umba Ilikatungulula.
15. Uutunguluzi ci uno twapokelile pa milonganile ni misimikilile umu nsita ii iya ulwale, nupya i vyani ivyacitika?
15 Nupya twapokelela utunguluzi pali vino tungalongana nu kusimikila umu nsita ii iya ulwale. Lino ulwale watandike sile, zuwa zuwa twatandike ukulongana kwa pa cilongano, maukongano akalamba na anono ukuomvya intaneti. Nupya twatandike ukusimikila ukomvya makalata na mafoni. Yeova watwazwa sana umu nsita ii iya ulwale. Imisambo iingi yaticita lipoti ukuti ya kasimikila yakuya ya kuvulilako sile. Nupya aingi iyakwata ivintu ivisuma nupya ivya kukomelezya ivyacitika umu nsita ii.—Lolini kambokosi akakuti “ Yeova Akapaala Umulimo Witu Uwa Kusimikila.”
16. I vyani vino tungasininkizya?
16 Limwi yamwi yakayuvwa ukuti iuvi lyakomya sile ivintu pa ulwale uu. Nomba lino insita ikuya ikupita tukailolela ukuti utunguluzi uno twapokelile wali sile ningo. (Mate. 11:19) Nupya ndi cakuti twelenganya pa nzila isuma ino Yesu akatungulwilamo antu yakwe, tukasininkizya ukuti asi mulandu ni vilacitika uku nkoleelo, Yeova nu mwanakwe yalaya naswe.—Belengini Aebele 13:5, 6.
17. Uzye mukauvwa uli ukutungululwa na Yesu lino mu kuombela Yeova?
17 Twaya ni nsansa ukukwata Yesu intunguluzi itu. Twaya umwi iuvi umwaya antu aakaombela pamwi asi mulandu nu kupusana kwa mpanga, inkanda, ni ndimi. Tukapokelela ivyeo ivingi ukufuma umwi Izwi Lyakwe Leza nupya tukasambiliziwa vino tulinzile ukucita pakuti twaomba ningo umulimo wa kusimikila. Swensi kwene tukusambiliziwa vino tulinzile ukucita pakuti tuzwale untu upya na vino tungatemwana. Fwandi tukayuvwa acilumba pa mulandu wakuti Yesu intunguluzi itu.
LWIMBO NA. 16 Lumbanyini Jah pa Mwanakwe Umupakwe
^ Antu aingi aonsi, anaci, na ana ya kuombesya umu mulimo wa kusimikila ilyasi lisuma ndakai. Uzye muli pa yantu yayo? Nga vino cili ale mukutungululwa nu Mwene witu Yesu Klistu. Umu cipande cii tumalanda pa usininkizyo umwi ukulangilila ukuti Yesu akutungulula umulimo wa kusimikila ndakai. Ukwelenganya pa vyeo vivyo kumatwazwa ukutwalilila ukulondesya ukuombela Yeova lino tukutungululwa na Klistu.
