1. Iyini intando kaJehova namhlanjesi?

 NAMHLANJESI kuyintando kaZimu ukuthi iindaba ezimnandi zomBuso zitjhunyayelwe ephasini loke. (Mar. 13:10; 1 Thim. 2:3, 4) Lo, msebenzi kaJehova begodu kuqakatheke khulu ukuthi ukhethe iNdodanakhe ayithandako bona inqophise umsebenzi lo. Singaqiniseka ngokuthi ngaphasi kwelawulo lakaJesu, umsebenzi wokutjhumayela uzokwenziwa ngendlela ethabisa uJehova ngaphambi kokuthi isiphelo sifike.—Mat. 24:14.

2. Sizokucoca ngani esihlokwenesi?

² Esihlokwenesi, sizokubona indlela uJesu asebenzisa ngayo “inceku ethembekileko nehlakaniphileko” bona asinikele isinqophiso esivela eliZwini lakaZimu, nokuthi ahlele abalandeli bakhe ekwenzeni umsebenzi omkhulu wejima lokutjhumayela ekhe labakhona emlandweni. (Mat. 24:45) Sizokubona nokuthi khuyini ngamunye wethu angayeza bona asekele uJesu nenceku ethembekileko.

3. Ngiliphi ilungelo uJesu anikelwa lona?

³ UJesu unqophisa umsebenzi wokutjhumayela. Kubayini sitjho njalo? Msinyana ngaphambi kokuthi aye ezulwini, uJesu wahlangana nabalandeli bakhe abathembekileko entabeni yeGalile. Wathi kibo: “Nginikelwe loke ilawulo ezulwini nephasini.” Tjheja lokho akutjho ngokulandelako: “Yeke, khambani niyokwenza abantu bazo zoke iintjhaba babe bafundi.” (Mat. 28:18, 19) Hlangana nezinye izinto, uJesu wanikelwa ilawulo lokunqophisa umsebenzi wokutjhumayela.

4. Kubayini singaqiniseka ngokuthi uJesu usawunqophisa umsebenzi wokutjhumayela namhlanjesi?

⁴ UJesu wathi umsebenzi wokutjhumayela nokwenza abafundi  bewuzokwenziwa kizo “zoke iintjhaba” begodu wathi yena uzokuba nabalandeli bakhe “imihla yoke bekube sekupheleni kwephasi.” (Mat. 28:20) Amezwi lawo akuveza ngokukhanyako ukuthi umsebenzi wokutjhumayela bewuzokuraga ungaphasi wesinqophiso sakaJesu bekube kunamhlanjesi.

5. Ngiyiphi ingcenye esinayo ekuzalisekeni kwesiphorofido esisencwadini yeRhubo 110:3?

⁵ UJesu khenge imtshwenye yokuthi kungenzeka kutlhayele iinsebenzi emalangeni wokuphela. Bekazi ukuthi amezwi womrhubi asiphorofido azokuzaliseka: “Abantu bakho bazimisele ukulandela mhlana amandlakho abonakaliswa.” (Rhu. 110:3) Nangabe utjhumayela iindaba ezimnandi, usekela uJesu nenceku ethembekileko begodu unengceye ekuzalisekeni kwesiphorofidwesi. Umsebenzi lo usaragela phambili, nanyana kunjalo kuneentjhijilo.

6. Ngisiphi esinye seentjhijilo abatjhumayeli bomBuso abaqalana naso namhlanjesi?

⁶ Esinye seentjhijilo abatjhumayeli bomBuso abaqalana naso kuphikiswa. Iinhlubuki, abadosiphambili bezekolo nebezepolotiki benze abantu baba nombono ongakafaneli ngomsebenzi wokutjhumayela. Nange iinhlobo zethu, abantu esibajayeleko nabantu esisebenza nabo bakholelwa amala la, bangasigandelela bona silise ukulotjha uJehova, silise nokutjhumayela. Kwezinye iinarha, amanabethu athusela abafowethu nabodadwethu, abasahlele abe abafake nemajele. Ayisirari indlela abasiphatha ngayo. UJesu wabikezela wathi: “Nizokuzondwa ziintjhaba zoke ngebanga lebizo lami.” (Mat. 24:9) Ihloyo evela emanabenethu ibufakazi bokuthi siyamukeleka kuJehova. (Mat. 5:11, 12) UDeveli ungumdosiphambili wokuphikiswa kwethu kodwana akasililitho nakamadaniswa noJesu. Ngesekelo lakaJesu, iindaba ezimnandi zifikelela abantu bazo zoke iintjhaba. Cabanga ngobufakazi obulandelako.

7. Ngibuphi ubufakazi obubonako bokuthi isAmbulo 14: 6, 7 siyazaliseka?

⁷ Esinye isitjhijilo esiqalana naso nasitjhumayelako kukuthi sihlangana nabantu abangalizwisisiko ilimi lethu. Esambulweni asinikela umpostoli uJwanisi, uJesu wabikezela ukuthi esikhathini sethu iindaba ezimnandi zizosihlula isitjhijilweso. (Funda IsAmbulo 14:6, 7.) Njani? Sinikela abantu abanengi ithuba lokuzizwela umlayezo womBuso. Namhlanjesi, abantu ephasini loke bakghona ukufunda iincwadi ezisekelwe eBhayibhelini kuzinzolwazethu i-jw.org ngebanga lokuthi ineencwadezi ngamalimi angaphezu kwe-1 000. IsiHlopha esiBusako sisinikele imvumo yokutjhugulula incwadi eyithulusi lokwenza abafundi ethi, Thabela Ukuphila Ngokungapheliko! ngamalimi angaphezu kwama-700. Isinqophiso esivela eBhayibhelini sifumaneka ngamavidiyo ebantwini abangezwako begodu kuneencwadi ze-braille ezigadangiselwa abantu abangaboniko. Iimphorofido zeBhayibheli ziyazaliseka. Abantu abavela “kizo zoke izizwe ezihlukeneko” bafunda ukukhuluma ilimi ‘elihlambulukileko’ leqiniso elivela eBhayibhelini. (Zak. 8:23; Zef. 3:9) Koke lokhu kwenziwa ngaphasi kwelawulo lomtlhogomelethu uJesu Krestu.

8. Ngimiphi imiphumela yomsebenzethu wokutjhumayela bekube nje?

⁸ Namhlanjesi, abantu abangaphezu kwee-8 000 000 eenarheni ezima-240 bazihlanganisa nehlangano kaJehova begodu qobe mnyaka kubhajadiswa iinkulungwana zabantu. Okuqakatheke khulu kuneembalwezi, bubuntu bamaKrestu,  “ubuntu obutjha,” abalandeli bakaKrestu abatjhaba ababutjengisako. (Kol. 3:8-10) Abanengi balise ukuziphatha okusilapheleko, ukuba nenturhu nokubandlulula abantu abavela kwezinye iinarha. Isiphorofido esisencwadini ka-Isaya 2:4 siyazaliseka: ‘abasazibanduleli ipi.’ Njengombana senza koke okusemandlenethu bona simbathe ubuntu obutjha, sisiza abantu bathande ihlangano kaZimu begodu sitjengisa nokuthi silandela umtlhogomelethu uKrestu Jesu. (Jwa. 13:35; 1 Pit. 2:12) Izintwezi azenzeki ngengozi. UJesu usinikela isizo esilitlhogako.

9. Ngokomtlolo kaMatewu 24:45-47, uJesu wathi kuzokwenzekani emalangeni wokuphela?

⁹ Funda uMatewu 24:45-47. UJesu wabikezela ukuthi emalangeni wokuphela bekazokubeka “inceku ethembekileko nehlakaniphileko” ezosinikela isinqophiso esivela eliZwini lakaZimu. Singalindela ukuthi inceku le isebenze budisi esikhathini sethu. Ngilokho okwenzekako namhlanjesi. Umtlhogomelethu usebenzisa isiqhema esincani samadoda azesiweko bona anikele abantu bakaZimu nalabo abanekareko ‘ukudla kwabo ngesikhathi esifaneleko.’ Amadoda la awaziqali njengabalawuli bokukholwa kwabanye. (2 Kor. 1:24) Kunalokho, bayalemuka ukuthi nguJesu Krestu ‘omrholi nomlawuli’ wabantu bakhe.—Isa. 55:4.

10. Ngiyiphi incwadi kilezi ezivezwe esithombeni eyakusiza wathoma ukulotjha uJehova?

¹⁰ Kusukela ngo-1919, inceku ethembekileko beyigadangisa iincwadi ezihlukahlukeneko ezinikele abantu abanekareko ithuba lokuthoma lokufunda iqiniso eliseliZwini lakaZimu. Ngo-1921, inceku le yagadangisa incwadi ethi-The Harp of God bona isize abanekareko ukuthi bafunde amaqiniso asisekelo weBhayibheli. Njengombana  isikhathi sikhamba, kwatjhatjhululwa ezinye iincwadi. Ngiyiphi incwadi ekusize wazi uBabethu wezulwini bewamthanda? Kghani bekuyincwadi ethi-“Let God Be True,” The Truth That Leads to Eternal Life, Ungaphila Phakade EPharadesi Emhlabeni, Ulwazi Oluholela Ekuphileni Okumi Phakade, Khuyini Kwamambala Okufundiswa YiBhayibhili? Lisifundisani IBhayibheli? Namkha yincwadethu etja ethi-Thabela Ukuphila Ngokungapheliko! Iincwadezi zoke zenzelwa ukusisiza senze abafundi begodu bezingilokho esikutlhogako nazitjhatjhululwako.

11. Kubayini kuqakathekile ukuthi soke sibe nelwazi elingeziweko ngoJehova nangeBhayibheli?

¹¹ Akusibabantu abasanda ukufunda amaqiniso abanekareko kwaphela ekufuze babe nelwazi elidephileko ngoJehova nangeBhayibheli. Soke kufuze sibe nalo. Umpostoli uPowula watlola wathi: “Ukudla okuqinileko kungekwabantu abavuthiweko.” Wangezelela ngokuthi ukusebenzisa lokho esikufunda eBhayibhelini kuzosisiza sikghone “ukuhlukanisa kokubili okuhle nokumbi.” (Heb. 5:14) Kungaba budisi ukuphila ngendlela uJehova ayamukelako esikhathini esiphila kiso namhlanjesi ngombana abantu abanengi baziphatha kumbi. UJesu uyaqinisekisa ukuthi sifunda izinto ezizosisiza siqinise ukukholwa kwethu. Lokhu sikufumana eliZwini lakaZimu eliphefumulelweko, iBhayibheli. Inceku ethembekileko isilungiselela amaqiniso avela eBhayibhelini ngaphasi kwesinqophiso sakaJesu.

12. Silidumise njani igama lakaZimu njengoJesu?

¹² NjengoJesu, sinikele igama lakaJehova idumo elilifaneleko. (Jwa. 17:6, 26) Ngokwesibonelo, ngo-1931 sathoma ukusebenzisa igama elingokomtlolo elithi aboFakazi bakaJehova. Ngokwenza njalo, sitjengisa ukuthi igama lakaZimu liqakatheke kangangani kithi nokuthi sifuna  ukubizwa ngalo. (Isa. 43:10-12) Kusukela ngo-Oktoba wangomnyaka loyo, igama elicwengilekweli lathoma ukuvela esigubuzesweni sesithala ngasinye. Ukungezelela kilokho, iTjhugululo yePhasi eliTjha yemiTlolo eCwengileko ibuyisele igama lakaJehova eendaweni ezifaneleko eliZwini lakhe. Lokhu kuhluke khulu kilokho okwenziwa masondo ngombana alisusile igama elithi Jehova emaBhayibhelinabo.

13. Khuyini ekwenza uqiniseke ngokuthi uJesu usebenzisa “inceku ethembekileko nehlakaniphileko” namhlanjesi? (Jwanisi 6:68)

¹³ Asebenzisa “inceku ethembekileko nehlakaniphileko,” uJesu uhlele ihlangano ephuma phambili ephasini ukwenzela bona athuthukise ukulotjha okuhlwengileko. Uzizwa njani ngehlangano le? Kungenzeka uzizwa njengompostoli uPitrosi, owathi kuJesu: “Sizokuya kubani? Nguwe onamezwi wokuphila okungapheliko.” (Jwa. 6:68) Besizokuba kuphi namhlanjesi ngathana akhenge sizihlanganise nehlangano kaJehova? Ngehlangano le, uKrestu uyaqinisekisa ukuthi sinakho koke esikutlhogako bona sihlale sithembekile kuZimu. Uyasibandula ukuthi sitjhumayele ngendlela ephumelelako. Ngaphezu kwalokho, usisiza simbathe “ubuntu obutjha” ukwenzela bona sithabise uJehova.—Efe. 4:24.

14. Uzuze njani ngokuba yingceye yehlangano kaJehova esikhathini sesindabelaphi i-COVID-19?

¹⁴ UJesu usinikela isinqophiso esihlakaniphileko ngeenkhathi zehlekelele. Iinzuzo zesinqophisweso zabonakala ngokukhanyako nakuthoma isindabelaphi i-COVID-19. Lokha abantu abanengi ephasini nabangazi ukuthi benzeni, uJesu waqinisekisa ukuthi sifumana iinqophiso ezikhanyako bona siphephe. Sakhuthazwa ukuthi sifake  iimfonyo nasisebantwini abanengi begodu singatjhidelani khulu nabantu. Abadala bebandla bakhunjuzwa ukuthi kufuze bathintane nawo woke amalunga webandla qobe, ukuqiniseka bona aphephile begodu ayakufumana akutlhogako bebaqinisekise nokuthi anetjhebiswano elihle noJehova. (Isa. 32:1, 2) Safumana iinqophiso ezingeziweko neenkhuthazo emibikweni evela esiHlopheni esiBusako.

15. Ngisiphi isinqophiso esisifumeneko malungana nokuraga imihlangano yebandla nokutjhumayela esikhathini sesindabelaphi i-COVID-19 begodu kube namuphi umphumela?

¹⁵ Esikhathini sesindabelaphi, sifumene nesinqophiso esikhanyako sendlela etja yokuraga imihlangano yebandla nokutjhumayela. Ngokuphazima kwelihlo, sathoma ukuya emihlanganweni yobuKrestu, imihlangano yesifunda neyesigodi sisebenzisa i-inthanethi. Sathoma nokutjhumayela ngokutlola iincwadi nokusebenzisa umtato. UJehova uyibusisile imizamwethu. Amagatja amanengi abike ukukhula okukhulu kwesibalo sabarhuweleli. Abanengi babe nemiphumela ekhuthazako hlangana nesikhathesi.—Funda ibhoksi elithi “ UJehova Uyawubusisa Umsebenzethu Wokutjhumayela.”

16. Khuyini esiqiniseka ngayo?

¹⁶ Kungenzeka abanye bazizwa ngasuthi ihlangano iyikhwez’ intaba indaba ye-COVID-19. Njengombana kukhamba isikhathi, kwakhanya ukuthi isinqophiso esisifumeneko sihlakaniphe khulu. (Mat. 11:19) Njengombana sicabangisisa ngendlela yethando uJesu anqophisa ngayo abantu bakhe, siyaqiniseka ngokuthi nanyana kungenzekani esikhathini esizako, uJehova neNdodanakhe ayithandako bazokuba nathi.—Funda amaHebheru 13:5, 6.

17. Uzizwa njani ngokusebenza ngaphasi kwelawulo lakaJesu?

¹⁷ Kusithabisa khulu ukuthi uJesu ungumRholethu! Singaphasi kwehlangano enabantu abavela kiwo woke amasiko, iintjhaba namalimi. Sifumana isinqophiso eliZwini lakaZimu begodu sifumana nebandulo esilitlhogako lokwenza umsebenzi wokutjhumayela. Ngamunye wethu ufundiswa indlela yokumbatha ubuntu obutjha begodu sifunda ukuthandana. Sinawo woke amabanga wokuzikhakhazisa ngomtlhogomelethu uJesu!