1. Ko Yahova ankufuna kuti timbachite chani ntsiku zino?

 MULUNGU ankufuna kuti ntsiku zino tilalikire ntontholo wabwino wa Ufumu padziko yose yapasi. (Maliko 13:10; 1 Tim. 2:3, 4) Imweyi ni basa ya Yahova ndipo ni vabwino maninge kuti adasankhula Mwana wake wapamoyo kuti aitsogolere. Tinashuwa kuti motsogolerewa na Yesu, basa mweyi ichitike bwinobwino ninge momwe Yahova ankufunira mapeto yakanati yafika.—Mat. 24:14.

2. Ko tikambirane chani munkhani ino?

² Munkhani ino, tikambirane momwe Yesu ankuphatisira basa ‘kapolo wokhulupirika na wanzeru’ pakupereka malangizo ya m’Mawu ya Mulungu kwa wopfunzira wake kuti aphate bwino basa yolalikira. (Mat. 24:45) Tiwone pomwe vomwe aliyese angachite kuti athandizire Yesu na kapolo wokhulupirika.

3. Ko ni udindo uponi womwe Yesu adapasiwa?

³ Yesu ankutsogolera basa yolalikira. Ko tingatsimikizire tani vimwevi? Padasala pang’ono kuyenda kudzulu, Yesu adagumana na wopfunzira wake azinji wokhulupirika paphiri ya Galileya. Iye adawauza kuti: ‘Ulamuliro wose waperekewa kwa ine kudzulu na padziko yapasi.’ Patsogolo pake adawauza pomwe kuti: ‘Ndipomwapa, ndokoni mukalalikire ntontholo wabwino kwa wanthu wakhaindi yose.’ (Mat. 28:18,  19) Vimwevi vinkutitsimikizira kuti Yesu adapasiwadi udindo wotsogolera basa yolalikira.

4. Ndawa chani tingakhale wotsimikiza kuti Yesu adakali kutsogolera basa yolalikira?

⁴ Yesu adalewa kuti ‘wanthu wamakhaindi yose’ achadekana kulalikiriwa na kupfunzisiwa ndipo adati adzakhale na wopfunzira wake ‘ntsiku zose mpakana mapeto ya nthawe ino.’ (Mat. 28:20) Mawu mwaya yankuwonesa kuti Yesu adakatsogolera basa yolalikira mpakana ntsiku zathu zino.

5. Ko tinkuthandizira tani kuti lemba ya Salimo 110:3 ikwanirisike?

⁵ Yesu wenze alibe nkhawa yakuti muntsiku zomalizira angadzakhale na wanthu wochepa womuthandiza pa basa yolalikira. Iye ambadziwa bwino kuti mawu yomwe wamasalimo adalosera yadzakwanirisike. Wamasalimo adati: ‘Wanthu wako adzadzipereke mofunisisa pantsiku yomwe udzatsogolere masocha yako kunkhondo.’ (Sal. 110:3) Peno imwepo mulalikirambo, ndiye kuti munkuthandiza Yesu na kapolo wokhulupirika pakukwanirisa ulosi moyu. Basa mweyi inkufamba inde, koma pali mabvuto.

6. Ko olalikira va Ufumu ankugumana na bvuto yanyi ntsiku zino?

⁶ Bvuto ibodzi yomwe wanthu wolalikira va Ufumu ankugumana nayo ni kutsutsiwa. Wanthu wampatuko, azitsogoleri wavipembedzo na wandale ankuchitisa wanthu azinji kuti ambaiwone kuipa basa yathu. Peno azibale wathu na anzathu wakubasa ankukhulupirira mabodza ya wanthu mwawa, angayambe kutichichimiza kuti tileke kutumikira Yahova na kulalikira. M’madziko yanango, adani wathu adzudza abale na alongo wathu mpakana kuwaikha mudjeri. Koma tidabwalini peno wanthu ankutidzudza teneuyu. Viri teno ndawa Yesu adaleweratu kuti: ‘Mudzazondewe na wanthu wakhaindi yose ndawa ya dzina yangu.’ (Mat. 24:9) Tikambadzudziwa tene, ni chizindikiro chakuti Yahova ankukondwa nase. (Mat. 5:11, 12) Satana ndiye ankuchitisa kuti wanthu ambatizonde tene. Koma iye alibe mphanvu zolimbana na Yesu. Ndipomwapa iye ankukwanisalini kutikangisa kulalikira ntontholo wabwino kwa wanthu wakhaindi yose ndawa Yesu ankutitsogolera. Yesu ankutsogolera basa yolalikira ndipo Satana ankukwanisalini kukangisa. Onani vinthu ivi vomwe vinkutitsimikizira.

7. Nchani chinkukutsimikizirani kuti lemba ya Chivumbulutso 14:6, 7 inkukwanirisika?

⁷ Bvuto inango kwa isepano ni yakuti tilalikira wanthu woyankhula viyankhulo vosiyanasiyana. Yesu adaululira mtumi Yohane kuti mu ntsiku zathu zino, ni vokwanisika kulalikira wanthu watene. (Chivumbulutso 14:6, 7.) Ko ni vokwanisika tani? Tinkuchita vose vatingakwanise kuti wanthu abve ntontholo wa Ufumu. Ntsiku zino, wanthu padziko yose angawerenge mabukhu yofotokoza nkhani za m’Baibolo muviyankhulidwe voposha 1000. Ndipo Bungwe Yotonga idabvumiza kuti bukhu yakuti Kondwani na moyo mpaka kalekale! itsumbudzuliriwe muviyankhulidwe voposha 700 kuti timbapfunzisire wanthu. Tinkukonza pomwe mavidiyo yazinji yothandiza wanthu wosakwanisa kubva na mabukhu yothandiza wanthu wosawona. Wanthu ‘waviyankhulo vosiyanasiyana’ ankupfunzira ‘chiyankhulo chochena’ chomwe ni choonadi cha m’Baibolo. (Zek. 8:23; Zef. 3:9) Vose vimwevi vinkukwanisika ndawa yakuti Yesu ankutsogolera.

8. Ko basa yolalikira yabweresa maphindu yaponi?

⁸ Ntsiku zino, isepano wa Mboni za Yahova tiripo oposha 8000 000 m’madziko yokwana 240 ndipo gole iliyose wanthu azinji  maninge ankubatizika. Ndipo chokomedza maninge sikuti ni kuwanda kwa wanthu, koma ni makhalidwe yomwe ankuyesesa kukhala nayo pakuvala ‘umunthu unyowani.’ (Akol. 3:8-10) Azinji adaleka chigololo, kuchita ndewo, kuba na kusalulana dzinza. Vimwevi vinkukwanirisa ulosi wa pa Yesaya 2:4 wakuti ‘iwo adzapfunzirelini pomwe nkhondo.’ Tikambayesesa kuvala umunthu unyowani, tithandiza wanthu kubwera mugulu ya Mulungu ndipo tiwonesa kuti tinkutsogolerewadi na Yesu Khrisitu. (Yoh. 13:35; 1 Pet. 2:12) Vimwevi sikuti vikundochitikambo vokha neye, koma ndawa yakuti Yesu ankutithandiza.

9. Mobverana na Mateyu 24:45-47, ko Yesu adaleweratu kuti nchani chidzachitike muntsiku zomalizira?

⁹ Lewengani Mateyu 24:45-47. Yesu adaleweratu kuti nkati mwa ntsiku zomalizira, adzasankhule ‘kapolo wokhulupirika’ kuti ambapereke malangizo yochokera kwa Mulungu. Ndipomwapa tingafune kuti kapolo moyu atichitire vizinji ntsiku zino ndipo ndivo vankuchita kale. Mtsogoleri wathu ankuphatisa basa kagulu kang’ono ka odzozewa pakupereka ‘chakudya chapanthawe yake’ kwa wanthu wofunisisa. Amuna mwawa sikuti adziwona ninge mafumu yotonga abale wawo neye. (2 Akor. 1:24) Koma azindikira kuti Yesu Khrisitu ndiye ‘mtsogoleri na wopereka malamulo’ kwa wanthu wake.—Yes. 55:4.

10. Pa mabukhu yali pafoto aya, latani yomwe idakutsimikizirani kuti munkufamba pansewu wakumoyo wosapera.

¹⁰ Kundochokera mu 1919, kapolo wokhulupirika wakhala ankukonza mabukhu yosiyanasiyana pakufuna kuthandiza wanthu kuti adziwe Yahova. Mu 1921, kapolo adakonza bukhu yakuti Zeze wa Mulungu pofuna  kuthandiza wanthu kudziwa vipfunziso va m’Baibolo. Nkuyenda kwa nthawe, gulu idakonza pomwe mabukhu yanango. Ko ni bukhu yanyi yomwe idakuthandizani kuyamba kukonda Ababa wathu wakudzulu? Ko ni yakuti “Mulungu Akhale Woona,” Choonadi Chotsogolera ku Moyo Wosatha, Mungathe Kukhala ndi Moyo Wosatha M’Paradaiso Padziko Lapansi, Chidziwitso Chotsogolera ku Moyo Wosatha, Kodi Baibulo Limaphunzitsa Chiyani Kwenikweni?, Vomwe Baibolo ichapfunzisa panango bukhu yakuti Kondwani na moyo mpaka kalekale! yomwe ni inyowani? Mabukhu yose mwaya yadakonzewa na cholinga chopfunzisa wanthu ndipo yadadindiwa yazinji.

11. Ndawa chani tifunika kuyesesa kupfunzira Baibolo kuti timudziwe bwino Yahova?

¹¹ Sikuti ni anyowani okha omwe achadekana kupfunzira Baibolo mwakhama kuti adziwe Yahova, koma ni vofunika kwa tose. Mtumi Paulo adanemba kuti: ‘Chakudya chotampfuna ni cha wanthu wokhuma.’ Ndipo Paulo adalewa pomwe kuti kuphatisa basa vomwe tinkupfunzira m’Baibolo kungatithandize ‘kusiyanisa chabwino na choipa.’ (Aheb. 5:14) Pakuti ntsiku zino wanthu azinji akonda kuchita makhalidwe yoipa, vingakhale votishupa kutewedza mpfundo za Yahova. Koma Yesu ankuyesesa kutipfunzisa kuti tikhale na chikhulupiriro cholimba. Iye atilangiza pakuphatisa basa Mawu ya Mulungu. Ndipo Yesu ankuphatisa basa kapolo pakugawa malangizo mwaya.

12. Ko tinkuwonesa tani kuti tinkulemekeza dzina ya Yahova ninge Yesu?

¹² Isepano tinkulemekezambo dzina ya Mulungu ninge mwadachitira Yesu. (Yoh. 17:6, 26) Mwakulinganiza, mu 1931 patidatambira dzina yakuti Mboni za Yahova, tidawonesa kuti dzina mweyi ni yofunika kwa ise ndipo tinkufuna kumbadziwika na dzina ya Ababa wathu. (Yes. 43:10-12) Ndipo  kundochokera mu Outubro mugole mweyi, dzina yakuti Yahova idayamba kumbabwera pakhava ya Ntsanja ya Olonda. Kuthimizira mwapa, mu Baibulo la Dziko Latsopano la Malemba Opatulika mudabwezeresewa dzina ya Mulungu pamalo yomwe yenze idachosewa. Vimwevi vidatisiyanisa maninge na matchetchi yanango yomwe yadachosa dzina Yahova pakutsumbudzulira Mabaibolo.

13. Nchani chinkukutsimikizirani kuti Yesu ankutsogolera ‘kapolo wokhulupirika na wanzeru’ ntsiku zino? (Yohane 6:68)

¹³ Pakuphatisa basa ‘kapolo wokhulupirika na wanzeru,’ Yesu wakonza gulu yapadziko yapasi kuti timbatumikire Yahova munjira yobvumizika. Ko imwepo mukubva tani ndawa yokhala mugulu mwiyi? Panango pakudawira mbvunzo moyu, imwepo mungalewe mawu ninge yomwe Petulo adauza Yesu kuti: ‘Ko tingayende pomwe kwa mbani? Imwepo ndimwe munamawu ya moyo wosapera.’ (Yoh. 6:68) Ko sembe tiri kuponi adakati tiribe kudziwana na Mboni za Yahova? Onani kuti Yesu ankutipasa vose vofunika kuti tikhale na chikhulupiriro cholimba. Iye ankutipfunzisa pomwe kuti timbaphate bwino basa yolalikira. Ndipo chofunika maninge nchakuti ankutithandiza kuvala ‘umunthu unyowani’ kuti timbakondwerese Yahova.—Aef. 4:24.

14. Ko panthawe ya koronaviru ino, taphindula tani ndawa yokhala mugulu ya Yahova?

¹⁴ Yesu apereka malangizo yanzeru panthawe yoshupa. Tawona vimwevi kundochokera pomwe koronaviru idayamba. Podiya kuti wanthu kudziko uku angasowa chochita, isepano tingapasiwa malangizo yoteteza. Tidalimbikisiwa kuti timbavale mascara na kukhalirana patalipatali. Akulu adauziwa kuti  ambayankhulane pafupipafupi na abale na alongo nkuwona peno ankufunika kuthandiziwa mwakuthupi panango mwauzimu. (Yes. 32:1, 2) Timbatambira pomwe malangizo yanango m’mavidiyo ya lipoti ya Bungwe Yotonga.

15. Ko panthawe ya nthenda tidatambira malangizo yaponi pankhani ya misonkhano na kulalikira, ndipo tidaphindula tani?

¹⁵ Panthawe ya koronaviru, tidatambira pomwe malangizo ya momwe tingachitire misonkhano na momwe tingalalikirire. Ndipo mwakankulumize tidayamba kuphatisa basa mafoni pakuchita misonkhano ya mpingu, yadera na yachigawo. Tidayamba pomwe kulalikira pakuphatisa basa foni na makalata. Yahova adadalisa maninge khama yathu. Tinkulewa teno ndawa yakuti maofesi ya nthambi yadapereka chiwerengero chikulu maninge cha ofalisa. Azinji ankufotokoza kuti aphindula maninge panthawe mweyi.—Onani bokosi yakuti “ Yahova ankudalisa basa yathu yolalikira.”

16. Ko tingakhale otsimikizira chani?

¹⁶ Vingachitike kuti anango ambawona kuti gulu inkunyanyira pakupereka malangizo yolewa va nthenda. Koma nkuyenda kwa nthawe, tose tidawona kuti malangizo mwayale yenze yanzeru. (Mat. 11:19) Ndipo tikambaganizira momwe Yesu ankutitsogolerera mwachikondi, tingakhale otsimikiza kuti podi tidzagumane na bvuto yanyi kutsogolo, Yahova na Mwana wake adzatisiyelini.—Lewengani Aheberi 13:5, 6.

17. Ko mukubva tani mukambatsogolerewa na Yesu?

¹⁷ Ni mwayi ukulu maninge kwa isepano kuphata basa motsogolerewa na Yesu. Tili mu gulu ya wanthu omwe asankhulanalini ndawa yosiyana chikhalidwe, dziko na viyankhulidwe. Titambira malangizo ya m’Mawu ya Mulungu yotithandiza pa basa yolalikira. Ndipo aliyese ankupfunzisiwa momwe angavalire umunthu unyowani na momwe angawonesere chikondi kwa anzake. Ndipomwapa tinachifukwa chobveka chokhalira wokondwa ndawa yotsogolerewa na Yesu.