1. Wat nao Jehovah laekem pipol blo hem for duim distaem?

 DISTAEM God laekem pipol blo hem for talemaot gud nius abaotem Kingdom lo pipol lo evri kantri lo world. (Mark 13:10; 1 Tim. 2:3, 4) Diswan hem waka blo Jehovah and hem barava important, dastawe hem markem spesol Son blo hem for leadim disfala waka. From Jesus nao leadim preaching waka, iumi savve sure waka hia bae gohed gud olsem hao Jehovah laekem bifor world hem finis.​—Matt. 24:14.

2. Wat nao bae iumi storyim lo disfala article?

² Lo disfala article, bae iumi storyim hao Jesus iusim datfala “wakaman wea faithful and wise” for provaedem spiritual kaikai, and for organizem olketa follower blo hem for duim preaching waka wea gohed evriwea lo world. (Matt. 24:45) Bae iumi storyim tu wanem iumi each wan savve duim for sapotim Jesus and datfala faithful wakaman.

3. Wat nao Jesus kasem paoa for duim?

³ Hao nao iumi sure Jesus hem leadim preaching waka? No longtaem bifor Jesus go bak lo heven, Jesus story witim samfala lo olketa faithful disaepol blo hem lo wanfala maunten lo Galilee. Hem sei lo olketa: “God givim paoa long mi ovarem evri samting long heven and earth.”  Tingim next samting wea hem talem: “Iufala go and teachim pipol long evri kantri for kamap disaepol bilong mi.” (Matt. 28:18, 19) So God givim paoa lo Jesus for leadim disfala preaching waka.

4. Why nao iumi savve sure Jesus still leadim preaching waka distaem?

⁴ Jesus sei hao olketa follower blo hem bae duim preaching waka and teachim pipol for kamap disaepol lo “evri kantri,” and hem bae stap witim olketa “go kasem taem wea world hem finis.” (Matt. 28:20) Toktok hia showimaot hao Jesus bae gohed leadim preaching waka kam kasem taem blo iumi distaem.

5. Hao nao iumi help for mekem profesi lo Sams 110:3 kamap tru?

⁵ Lo olketa last day Jesus savve pipol bae willing for duim preaching waka. Hem savve toktok blo man wea raetem disfala psalm bae kamap tru, wea sei: “Bae olketa pipol blong yu i hapi tumas fo kam an joen long ami blong yu.” (Sams 110:3) Sapos iu duim preaching waka, iu sapotim Jesus and datfala faithful wakaman, and iu help for mekem datfala profesi kamap tru. Iumi Olketa Jehovah’s Witness gohed duim datfala waka distaem, bat iumi feisim samfala challenge tu.

6. Wat nao wanfala challenge wea iumi feisim distaem?

⁶ Wanfala challenge wea iumi feisim nao hem hao pipol againstim preaching waka blo iumi. Olketa apostate and olketa bigman lo religion and lo gavman savve talem olketa samting wea no tru abaotem waka blo iumi. If olketa relative, olketa wea iumi savve, and olketa workmate bilivim olketa false information hia, olketa maet trae for stopem iumi for worshipim Jehovah and for no preach. Lo samfala kantri pipol savve attakim, arrestim, mekem olketa brata and sista for fraet, and putim olketa lo prison tu. Iumi no sapraes bikos Jesus sei: “Long evri kantri bae olketa heitim iufala bikos iufala olketa disaepol bilong mi.” (Matt. 24:9) From pipol duim olsem lo iumi, datwan pruvim iumi followim example blo Jesus and duim waka wea Jehovah hapi lo hem. (Matt. 5:11, 12) Nomata Satan bihaenem pipol wea againstim iumi, Jesus garem bigfala paoa winim Satan! From Jesus leadim preaching waka, gud nius hem kasem pipol lo evri kantri.

7. Wat nao happen wea pruvim wanem Revelation 14:6, 7 storyim hem kamap tru?

⁷ Nara challenge wea iumi feisim lo preaching waka hem from pipol story lo staka difren languis. Toktok wea Jesus talem lo John lo wanfala vision showimaot hao iumi bae winim datfala challenge. (Readim Revelation 14:6, 7.) Hao nao olsem? Distaem staka pipol garem chance for herem message abaotem Kingdom. From olketa Bible pablikeson lo jw.org website stap lo winim 1,000 languis, pipol evriwea lo world savve readim! Governing Body appruvim transleison blo Enjoyim Laef for Olowe! buk lo winim 700 languis. Distaem hem nao main buk wea iumi iusim for studyim Bible witim pipol. Olketa video stap tu for pipol wea deaf and olketa braille pablikeson stap for olketa wea blind, mekem olketa hia savve kasem spiritual kaikai tu. Iumi lukim olketa Bible profesi kamap tru bikos Bible sei pipol lo evri kantri “wea langguis blong olketa hemi deferen” bae lanem datfala “pure languis,” wea hem nao truth lo Bible. (Sekaraea 8:23; Zeph. 3:9, NWT)  Evri samting hia hem happen bikos Jesus nao leadim disfala waka.

8. Wanem gud samting nao kamap from preaching waka wea iumi duim?

⁸ Distaem winim 8,000,000 pipol wea stap lo 240 kantri olketa part lo organization blo Jehovah, and winim 100,000 pipol baptaes evri year! Olketa niu disaepol hia lusim oldfala wei blo olketa and “garem niufala wei.” (Col. 3:8-10) Staka lo olketa stop for durong, no raf, heitim narawan, and no ting daonem pipol from nara kantri distaem. And olsem profesi lo Aesaea 2:4 talem, olketa “no faetem moa olketa long narafala kantri.” From iumi waka hard for garem niufala wei, pipol laek for kam lo organization blo God, and datwan pruvim iumi followim leader blo iumi Jesus. (John 13:35; 1 Pet. 2:12) Evri samting hia happen bikos Jesus nao helpem iumi.

9. Olsem Matthew 24:45-47 storyim, wat nao Jesus sei bae happen lo olketa last day?

⁹ Readim Matthew 24:45-47. Jesus sei lo olketa last day, hem bae markem wanfala “wakaman wea faithful and wise” for provaedem spiritual kaikai. And iumi savve datfala wakaman waka hard for duim datwan distaem. Jesus markem datfala smol grup blo olketa anointed man for provaedem spiritual ‘kaikai lo barava taem’ for pipol blo God and for olketa wea interest. Olketa man hia no tingse olketa boss lo iumi. (2 Cor. 1:24) Bat olketa luksavve Jesus Christ nao hem “leader and komanda” blo iumi.​—Isa. 55:4, NWT.

10. Which buk insaed piksa nao helpem iu for laek worshipim Jehovah?

¹⁰ Start lo 1919 datfala faithful wakaman redyim olketa difren buk for helpem olketa wea interest for lanem truth lo  Bible. Lo 1921 datfala wakaman redyim datfala buk The Harp of God, for helpem olketa wea interest for lanem olketa main teaching lo Bible. Bihaen datwan, olketa redyim samfala buk moa. Which buk nao helpem iu for savve lo God and for lovem hem? Waswe, hem “Let God Be True,” Truth Where Bringim Man Long Life All-the-Way, You Savvy Stop All-the-Way Long Paradise Long Earth, Savvy Wea Lead Go long Laef Olawe, Wanem Nao Really Samting wea Bible Teachim?, Wanem Nao Iumi Savve Lanem Long Bible?, or datfala buk Enjoyim Laef for Olowe!, wea hem niu study buk blo iumi distaem? Olketa buk hia barava fitim need blo pipol lo taem wea olketa release.

11. Why nao hem important for iumi evriwan savve gud lo Jehovah and Bible?

¹¹ Pipol wea interest lo truth, and iumi tu, need for savve gud lo Jehovah and Bible. Aposol Paul sei: “Strongfala kaikai hem for pipol wea mature.” Paul sei tu sapos iumi followim wanem iumi lanem from Bible, datwan bae helpem iumi “for luksavve long wanem hem stret and wanem hem no stret.” (Heb. 5:14) Distaem, maet hem no isi for followim olketa standard blo Jehovah bikos wei blo pipol hem nogud tumas. Bat Jesus mek sure iumi bae lanem olketa samting wea bae strongim faith blo iumi. Olketa spiritual kaikai hia hem kam from Bible. Datfala faithful wakaman redyim and distributim spiritual kaikai hia anda lo direction blo Jesus.

12. Olsem Jesus, hao nao iumi ting lo nem blo God?

¹² Olsem Jesus, iumi Olketa Jehovah’s Witness showimaot iumi barava respectim nem blo God. (John 17:6, 26) For example, lo 1931, iumi start for iusim datfala nem Olketa Jehovah Witness. Datwan showimaot iumi tinghae lo nem blo God  and iumi praod for garem datfala nem. (Aesaea 43:10-12) And start lo October blo datfala year, nem blo Jehovah stap lo front kava blo The Watchtower magasin. And tu, lo New World Translation of the Holy Scriptures olketa putim bak nem blo God lo evri ples wea hem shud stap. Datwan hem barava difren from olketa church wea sei olketa Christian, wea olketa aotem nem blo Jehovah from staka Bible transleison blo olketa!

13. Wat nao mekem iu sure Jesus iusim “datfala wakaman wea faithful and wise” distaem? (John 6:68)

¹³ Jesus iusim “datfala wakaman wea faithful and wise” for organizem gud pipol blo Jehovah for helpem olketa narawan for savve lo truth. Hao nao tingting blo iu abaotem organization blo Jehovah? Maet iu garem sem tingting olsem aposol Peter, wea sei lo Jesus: “No eniwan moa for mifala followim. Toktok bilong iu nomoa savve mekem man laef olowe.” (John 6:68) Bae iumi hao distaem, sapos iumi no kam insaed lo organization blo Jehovah? Christ iusim disfala organization for mek sure iumi kasem spiritual kaikai. Hem trainim iumi tu for duim gud ministry blo iumi. And hem helpem iumi for “garem niufala wei” for mekem Jehovah hapi.​—Eph. 4:24.

14. Lo taem blo COVID-19 pandemic, wanem gud samting nao iumi kasem from iumi part lo organization blo Jehovah?

¹⁴ Jesus provaedem olketa wise direction lo olketa hard taem wea iumi feisim. Iumi lukim pruv blo diswan taem COVID-19 pandemic hem start. Taem staka pipol lo world no savve wat for duim,  Jesus mek sure iumi kasem klia direction wea savve helpem iumi for stap sef. Iumi kasem encouragement for werem feis mask taem iumi go aot lo pablik and for practicem social distancing. Olketa elder kasem reminder for evritaem contactim olketa pablisa lo kongregeson for mek sure olketa stap sef, healthy, and gohed fren gud witim Jehovah. (Aesaea 32:1, 2) Iumi kasem tu encouragement and direction from olketa Governing Body update.

15. Lo taem blo pandemic, wanem direction nao iumi kasem for duim olketa meeting and preaching waka, and wanem gud samting nao kamaot from datwan?

¹⁵ Lo taem blo pandemic, iumi kasem tu klia direction lo hao for duim olketa meeting and preaching waka. No longtaem bihaen pandemic start, iumi start for iusim Internet for attendim olketa Christian meeting, assembly, and convention. And iumi start for duim telephone witnessing and leta raeting. Jehovah blessim hard waka blo iumi. Staka branch reportim bigfala increase lo namba blo olketa pablisa. And lo taem blo pandemic, staka brata and sista garem olketa naes experience.—Lukim box “ Jehovah Blessim Preaching Waka wea Iumi Duim.”

16. Wat nao iumi sure lo hem?

¹⁶ Samfala maet ting direction wea organization givim lo taem blo pandemic hem ova tumas. Bat evritaem iumi luksavve olketa direction hia hem helpem iumi. (Matt. 11:19) And taem iumi ting raonem hao Jesus hem leadim iumi gud, datwan mekem iumi sure nomata wanem bae happen lo future, Jehovah and Son blo hem bae stap witim iumi.​—Readim Hebrew 13:5, 6.

17. Hao nao iu feel from Jesus nao hem leader blo iumi?

¹⁷ Iumi hapi tumas from Jesus nao leader blo iumi! And iumi part lo wanfala organization wea culture, kantri, and languis no divaedem iumi. Iumi kasem staka spiritual kaikai and training wea iumi needim for duim preaching waka. Each wan lo iumi lanem hao for garem datfala niufala wei and for lovem narawan. Iumi hapi tumas from Jesus nao hem leader blo iumi!