1. Andi Jehovah kë a di ten aki?

 GADU kë taa u paaja di bunu buka u di Könuköndë a hii di goonliba a di ten aki (Maik. 13:10; 1 Tim. 2:3, 4). Jehovah hën abi di wooko aki, nöö u di a dë sö wan fanöudu wooko, mbei a buta di Womi Mii fëën u tei fesi a di wooko aki. U sa dë seiki taa u di u abi Jesosi kuma di fesima fuu, mbei di peleikiwooko o du kumafa Jehovah kë ufö di kaba dou.​—Mat. 24:14.

2. Andi woo luku a di woto aki?

² A di woto aki, woo luku unfa Jesosi ta wooko ku „di köni saafu di dë u futoou” u lei u soni u di Wöutu u Gadu, söseei u seeka dee bakama fëën u de du di peleikiwooko möön gaanfa (Mat. 24:45). Woo luku söseei andi hiniwan fuu sa du u wooko makandi ku Jesosi ku di saafu di dë u futoou.

3. Andi da di makiti di Jesosi kisi?

³ Jesosi ta tei fesi a di peleikiwooko. Unfa u sa dë seiki u di soni aki? Jesosi bi fan ku wantu u dee bakama fëën a wan kuun liba a Galilea, kölö sö ufö a toona go a liba ala. A bi piki de taa: „Söö, wë dee sëmbë, un haika e. Mi kisi hii makiti a liba ala ku goon aki tuu.” Luku di woto soni di a taki: „Un musu ta waka a dee köndëköndë u goonliba ta paaja di buka u mi da  hii sëmbë, be de bia ko dë bakama u mi kuma unu” (Mat. 28:18, 19). Jesosi bi kisi di makiti u tei fesi a di peleikiwooko, boiti dee woto soni di a bi musu du.

4. Faandi mbei u sa dë seiki taa Jesosi ta tei fesi a di peleikiwooko te dou di ten aki jeti?

⁴ Jesosi bi taki taa di peleikiwooko bi o du a hii „dee köndëköndë u goonliba”, söseei a bi taki tu taa a bi o dë ku dee bakama fëën „hiniwanten, u tee a kaba u di goonliba aki” (Mat. 28:20). Dee soni aki ta lei u taa Jesosi o ta tei fesi a di peleikiwooko te dou di ten fuu aki.

5. Unfa u ta mbei di tjabukama woto u Psalöm 110:3 pasa tuutuu?

⁵ Jesosi an bi ta booko hën hedi taa sëmbë an bi o dë tjika u du di wooko aki, a di pisiten u di kaba u di goonliba aki. A bi sabi taa di tjabukama woto u di psalöm sikifima bi o pasa tuutuu. A bi taki taa: „A di daka di joo tja dee sodati fii go a feti, dee sëmbë fii o dë kabakaba u go tu” (Ps. 110:3). Ee i ta paaja di bunu buka, nöö hën da i ta wooko makandi ku Jesosi ku di saafu di dë u futoou, söseei i ta heepi du soni u mbei di tjabukama woto aki pasa tuutuu. Hii fa di wooko aki nango a fesi, tökuseei an dë wan kösökösö soni.

6. Andi ta mbei soni ta taanga da so peleikima a di ten aki?

⁶ Wan u dee soni di ta mbei taa di peleikiwooko an dë wan kösökösö soni, hën da u di sëmbë ta du ku dee peleikima. Sëmbë di bia baka da di tuutuu lei, so keiki fesima, söseei so tiima ta mindi soni da u u di wooko di u ta du. Te dee famii fuu, nasö woto sëmbë di u sabi ko jei dee mindimindi woto aki, nöö de sa duwengi u fu wa dini Jehovah möön, söseei fuu tapa ku di peleikiwooko. A so köndë dee felantima fuu ta taki soni u mbei u fëëë, de ta du ku u, de ta buta u a dunguwosu seei tu. Ma dee soni aki an ta foondo u. Jesosi bi taki taa: „Hii sëmbë o ta buuse unu fu di un nama ku mi hedi” (Mat. 24:9). Wë di du di sëmbë ta du ku u ta lei u gbelingbelin taa Jehovah ta wai ku u (Mat. 5:11, 12). Didibi hën wë ta mbei sëmbë ta du ku u sö e. Ma Jesosi abi möön makiti möön Saatan! U di Jesosi ta heepi u, mbei sëmbë u hii pei föluku ta jei di bunu buka. Boo taki u soni di ta lei taa sö soni dë tuutuu.

7. Faandi mbei i sa taki taa di soni di sikifi na Akoalimbo 14:6, 7 ta pasa tuutuu?

⁷ Wan woto soni di ta mbei di peleikiwooko ta taanga da u, hën da u di sëmbë ta fan peipei töngö. Ma Jesosi bi piki apösutu Johanisi taa a di ten fuu aki, u bi o sa peleiki da sëmbë di ta fan wan woto töngö. (Lesi Akoalimbo 14:6, 7.) Na un futu? Wë u ta paaja di buka u di Könuköndë da gaan hia sëmbë. A di ten fuu aki, sëmbë a hii së u goonliba sa feni soni u Bëibel lesi a di website fuu, u di de dë u feni a möön leki 1000 töngö! Di Tii Kulupu bi da pasi fuu puu di buku de kai I sa dë waiwai u teego!, ko a möön leki 700 töngö! Ku di buku aki u ta lei sëmbë soni u Bëibel. Dee bookojesima ta feni dee lei u Bëibel ku dee fëlön di de ta mbei da de, söseei de ta mbei buku  da dee bookowojoma u de lesi. U ta si fa dee tjabukama woto u Bëibel ta pasa tuutuu. Sëmbë „di ta fan peipei töngö” ta lei „di soifi töngö” u dee tuutuu lei u Bëibel (Sak. 8:23; Sef. 3:9). Hii dee soni aki ta pasa, u di Jesosi Keesitu da di fesima fuu.

8. Un bunu di peleikiwooko ta tja ko?

⁸ A di ten aki, pasa 8.000.000 sëmbë, di ta libi a 240 tookatooka köndë, dë a di ölganisaasi u Jehovah. Nöö hiniwan jaa dusudusu sëmbë ta dopu. Dee sëmbë aki mbei möiti u de „ko dë njunjun sëmbë di abi njunjun fasi” (Kol. 3:8-10). Sömëni u de bi ta libi fanafiti libi, sömëni u de bi ta feti ku wotowan, söseei sömëni u de bi ta lei taa de lobi wan sëmbë möön di wotowan. Ma de tuu tapa ku dee soni aki. Di soni di sikifi a Jesaaja 2:4 ta pasa tuutuu. De an ta „feti möön”. U di u ta mbei möiti u ko dë njunjun sëmbë di abi njunjun fasi, mbei sëmbë ta ko a di ölganisaasi u Gadu, söseei u ta lei taa u ta haika di fesima fuu, Jesosi Keesitu (Joh. 13:35; 1 Pet. 2:12). Faandi mbei a ta pasa sö? Wë u di Jesosi ta heepi u.

9. Andi Jesosi bi taki taa bi o pasa a di pisiten u di kaba, te u luku Mateosi 24:45-47?

⁹ Lesi Mateosi 24:45-47. Jesosi bi taki taa a di pisiten u di kaba u di goonliba aki, a bi o buta wan „köni saafu di dë u futoou” a wooko, sö taa a sa lei u soni u di Wöutu u Gadu. Wë di saafu dë bi o ta wooko taanga a di ten fuu aki. Nöö sö a ta pasa tuu. Di fesima fuu buta wantu womi di dë salufuwan, u de da dee sëmbë u Gadu ku woto sëmbë di kë ko sabi soni u Gadu, „njanjan a di soifi ten”. Dee womi aki an ta pëë basi a u liba, söseei de an ta taki da u andi u musu  biibi (2 Kol. 1:24). Ma de ta fusutan taa Jesosi Keesitu da di „fesima ku di hedima” u dee sëmbë fëën.​—Jes. 55:4.

10. Undi u dee buku di i ta si a di peentje bi heepi i fii bigi dini Jehovah?

¹⁰ Sensi di jaa 1919, di saafu di dë u futoou ta seeka peipei buku di ta heepi sëmbë u de ko sabi soni u di Wöutu u Gadu. A di jaa 1921, di saafu tja wan buku de kai De Harp Gods ko a döö. Di buku aki bi heepi sëmbë u de ko sabi wantu fanöudu soni u Bëibel. Möön di ten bi ta pasa, möön de bi ta tja woto buku ko a döö. Dee buku dee de bi tja ko a döö da: „God zij waarachtig”, De waarheid die tot eeuwig leven leidt, Joe kan libi foe têgo na ini wan paradijs na grontapoe, Sabi di e tjari joe go na têgo libi, Andi di Bëibel ta lei u tuutuu?, San Bijbel kan leri wi?, ku di njunjun buku fuu I sa dë waiwai u teego! Undi u dee buku aki bi heepi i fii ko sabi di Tata fuu di dë a liba ala, söseei fii ko lobi ën? Wë hii dee buku aki u bi abi fanöudu fuu heepi woto sëmbë u de ko toon bakama u Keesitu.

11. Faandi mbei a dë fanöudu taa hii u tuu ko sabi soni u Jehovah ku di Bëibel?

¹¹ Na dee sëmbë dee ta bigi lei soni u Bëibel wanwan musu ko sabi soni u Jehovah ku di Bëibel finifini. Hii u tuu musu ko sabi dee soni aki. Apösutu Paulosu bi taki taa: ’Gbelingbelin njanjan, dë da gaangaan sëmbë.’ Paulosu bi taki tu taa te u ta du dee soni dee u ta lei a di Bëibel, nöö de o heepi u fuu „ko ta sabi andi da hogi ku andi da bunu” (Heb. 5:14). A sa dë wan taanga soni da u fuu piki Jehovah buka a di ten aki, u di sömëni sëmbë an ta libi a wan fasi di fiti. Ma Jesosi ta sölugu taa u feni dee soni dee u abi fanöudu, sö taa u sa ta abi wan taanga biibi go dou. U ta feni dee soni dee u abi fanöudu a Bëibel, di Wöutu u Gadu. Jesosi ta  mbei di saafu di dë u futoou seeka dee soni dee u abi fanöudu.

12. Unfa u ta djeesi Jesosi a di hei di a ta hei Gadu në?

¹² Kuma Jesosi u ta hei Gadu në (Joh. 17:6, 26). A di jaa 1931 u bigi ta tja di në Jehovah Kotoigi. A sö wan fasi u ta lei unfa di në u Gadu dë fanöudu da u, söseei taa u kë dë zuntu ku Gadu (Jes. 43:10-12). Nöö sensi tinimu-liba u di jaa 1931, hën di në Jehovah bi dë u si a di kafiti u Di Hei Wakitimawosu. Boiti di dë, a di Bijbel Nyun-Grontapuvertaling de buta di në Jehovah baka a dee kamian ka a bi musu dë. Di soni aki ta mbei taa u tooka gaanfa ku dee keiki, dee puu di në Jehovah a gaansë u dee Bëibel u de!

13. Faandi mbei i sa dë seiki taa Jesosi ta wooko ku di „köni saafu di dë u futoou” a di ten aki? (Johanisi 6:68)

¹³ Jesosi wooko ku di „köni saafu di dë u futoou”, u seeka wan ölganisaasi a goonliba aki, di ta heepi u fuu dini Jehovah a di soifi fasi. Unfa i ta fii u di ölganisaasi aki? Wë kandë i ta fii kumafa apösutu Petuisi bi ta fii di a bi taki taa: „Na ambë seei u sa go möönsö? Biga i nöö abi dee wöutu dee ta da sëmbë libi u teego” (Joh. 6:68). Unfa di libi fuu bi o dë ee wa bi ko sabi di ölganisaasi u Jehovah? Jesosi ta wooko ku di ölganisaasi aki u da u hii soni di u abi fanöudu fuu sa hoi useei a Gadu. A lei u tu unfa u sa du di diniwooko fuu a wan bunu fasi. Boiti di dë, a ta heepi u fuu „ko dë njunjun sëmbë di abi njunjun fasi”, sö taa Jehovah sa ta wai ku u.​—Ef. 4:24.

14. Un bunu i feni a di pisiten di di kolona siki bi ta paaja, u di i dë a di ölganisaasi u Jehovah?

¹⁴ Jesosi ta da u köni lai te u dë a nöutu.  U bi feni wini u dee lai dee a bi da u di di kolona siki bi ko. Hii fa sömëni sëmbë u di goonliba aki an bi saandi de bi musu du, Jesosi bi lei u gbelingbelin andi u musu du fuu tjubi useei. De bi da u taanga fuu bisi soni u tapa nusu ku buka te u bi o go a sitaati, söseei fu wa taanpu zuntu ku wotowan poi. De bi ta mëni dee gaanwomi taa de musu ta buta pakisei a hii dee baaa ku dee sisa u di kemeente, söseei u de mbei möiti u de ko sabi andi de abi fanöudu u de sa ta dë gösöntu, söseei u de ku Jehovah sa dë mati go dou (Jes. 32:1, 2). Di Tii Kulupu bi da u lai, söseei de bi da u degihati ku dee njunsu di de bi ta da.

15. Andi de bi piki u u di fasi fa u bi musu hoi dee komakandi fuu, ku di fasi fa u bi musu du di peleikiwooko a di pisiten u di kolona siki, söseei un bunu u feni?

¹⁵ A di pisiten u di kolona siki de bi piki u limbolimbo unfa u musu hoi dee komakandi fuu, söseei unfa u bi musu du di peleikiwooko. An bi tei longi seei ufö u ko guwenti di go di u nango a dee komakandi, dee gaan komakandi, ku dee könklësi fuu a Internet. U bi ta bëli sëmbë, söseei u bi ta sikifi biifi u peleiki da de. Jehovah bi mbei u feni gaan bunu u di möiti di u bi mbei u peleiki da sëmbë. Sömëni bëikantoo bi taki taa dee peleikima ko möön hia. Sömëni baaa ku sisa bi feni gaan bunu a di pisiten dë.​—Luku di pisi „ Jehovah ta mbei soni waka bunu da u a di peleikiwooko”.

16. Fuun soni u sa dë seiki?

¹⁶ Kandë so sëmbë bi ta si kuma di ölganisaasi u Jehovah bi ta mbei ën poi a di së u di kolona siki. Ma sömëni pasi a bi dë u si taa dee soni di di ölganisaasi bi ta piki u fuu du bi dë bumbuu soni (Mat. 11:19). Te u ta pakisei di fasi fa Jesosi ta tja dee sëmbë fëën a wan lobihati fasi, nöö u ta dë seiki taa aluwasi andi o pasa a di ten di ta ko, Jehovah ku di lobi Womi Mii fëën o ta dë ku u.​—Lesi Hebelejën 13:5, 6.

17. Unfa i ta fii u di Jesosi da di Fesima fii?

¹⁷ U ta wai seei taa Jesosi da di fesima fuu! U dë a wan ölganisaasi di lobi hii pei sëmbë. U ta feni andi u abi fanöudu a di Wöutu u Gadu, söseei u ta feni dee lei dee u abi fanöudu u du di peleikiwooko. Hiniwan fuu ta kisi lei u di fasi fa u musu ko abi njunjun fasi, söseei u ta lei soni di sa heepi u fuu lobi u na u. Awa, sömëni soni dë di ta mbei u ta djula da Jesosi, di Fesima fuu!