1. Loonu, Yehova atonene ki?

 LOONU, Leeza atonene mpunda iweeme ya Bukolo isimikilue mu kyalo kyonse. (Mark. 13:10; 1 Tim. 2:3, 4) Ezio miilo ni yakue Yehova, kabili ni ya mana saana, keekio i kyaalengele amusaakule Muana wakue mutonua eevi atungulule ezio miilo. Kunti twaya twasininkiziizie nangue paantu Yesu ali mukututungulula, miilo ya kusimikila yakaba kufikiila kupua, ntaanzi mpela teinafike nga vitonene Yehova.​—Mat. 24:14.

2. Tuli kulondoluela ki mu leeli lyasi?

² Mu leeli lyasi, tuli kumona Yesu vyali mukumubombia muzia wa kisinka ni wa maano, eevi kufumia kyakulia kya kimupasi ni kupaanga basambi bakue palua kampanye ikata saana ya kusimikila mu buikazi bwa bantu. (Mat. 24:45) Kabili, tuli kumona kintu kipalile kukita kila umo weetu, eevi kumukwasia Yesu pamo ni muzia wa kisinka.

3. Yesu waapeelue buviinde ki?

³ Yesu ali mukutungulula miilo ya kusimikila. Ni kiki kyatusininkiziizia evio? Musita uniini ntaanzi ya kuya ku muulu, Yesu waasaakeene ni bange basambi bakue ku lupili, mu Galilaya. Waabalandile eevi: “Mpeelue buviinde bonse ku muulu ni pa kyalo.” Mona bulanzi bwaalandile Yesu kisiasie kulanda ezio milandu: “Ale, endo mwaye mukite basambi kufuma ku bantu ba ntundu yonse.” (Mat. 28:18, 19, NWT) Pakaako, pakati ka bintu binge, Yesu waapeelue ni buviinde bwa kutungulula miilo ya kusimikila.

4. Juu ya ki kunti twasininkizia nangue Yesu atwaliliile kutungulula miilo ya kusimikila?

 ⁴ Yesu waalandile nangue miilo ya kusimikila ni ya kukita basambi, yakakitua mu “ntundu yonse,” kabili nangue weene, wakaba wali pamo ni basambi bakue “nsiku yonse mpaka ku mpeleezio ya mpaangilo ya bintu.” (Mat. 28:20, NWT) Ezio milandu, yalangilila kakiine nangue miilo ya kusimikila ipalile kutwalilila mpaka mu nsiku yeetu yali pensina butunguluzi bwakue Yesu.

5. Tuli mukukwasia siani kufikilizia milandu ili mu Malumbo 110:3?

⁵ Yesu taali watwisika nangue ku mpeleezio ya mpaangilo ya bintu tekukaba bantu bengi ba kubomba miilo. Waali wamanine nangue milandu ya bukabika yakue kaleemba wa Malumbo yakafikiliziiwa. Ezio milandu ilandile eevi: “Bantu bobe bakepeela bo beene mu kwitonena busiku bwa kisepe kyobe kya balukale.” (Malum. 110:3) Kine ni weewe uli mukubomba miilo ya kusimikila mpunda iweeme, uli mukumukwasia Yesu pamo ni muzia wa kisinka, kabili uli mukukwasia kufikilizia bobo bukabika. Ezio miilo ili mukuya ku ntaanzi, inzi kuli ni maavia.

6. Ni buavia ki bumo buli mukupata bakasimika ba Bukolo loonu?

⁶ Buezio bumo buli mukusaakaana na bakasimika ba Bukolo, ni kupingua. Babisanguka, bantunguluzi ba ma diini, ni bakulu ba politike, bali mukubeepa bantu bengi palua miilo yeetu. Kine bantu ba mu lupua lwetu, bantu bange batumanine pamo ni babombi neetu bazeziiwa na ezio mpunda ya bufi, kunti batutiinta eevi tulekele kumubombela Yehova ni kusimikila. Mu byalo binge, balupua ni bankazi betu bali mukupingua kupitila kututumiiwa, kukitilua ovio, kukwatua ni kupoozua mu buloko. Tetwizi kupapa musita bantu lubali batukitila evio. Yesu waalandile eevi: “Mwakakwatua ni kutwalua ku kukandua ni kwipawa. Ntundu yonse yakamisuula pa mulandu wane.” (Mat. 24:9) Paantu tuli mukusaakaana ni azo maavia, keekio kilangiliile nangue twitabiilue na Yehova. (Mat. 5:11, 12) Kupingua kooko kusonseziiziwe na Kibanda. Inzi, Yesu ali ni maka saana kupita Sataana! Kupitila kukwasiiwa na Yesu, mpunda iweeme ili mukubafikiila bantu ba ntundu yonse. Ale mona bintu bisininkiziizie evio.

7. Ni kiki kisininkiziizie paswetele nangue milandu ili mu Nfyulo 14:6, 7 ili mukufikiliziiwa?

⁷ Buavia bunge butuli twapata musita utuli twasimikila ni bobu, bantu bali balanda ndimi ingi ipusene-puseene. Mu nfyulo yaapeelue Yoane kuli Yesu, Yesu waalandile nangue mu nsiku yeetu mpunda iweeme yakanzia buavia bwa lulimi. (Soma Nfyulo 14:6, 7.) Mu nzila ki? Kukoonkana ni buviinde bwetu, tuli mukubapeela bantu bengi fuasi ya kwitabila mpunda ya Bukolo. Loonu, bantu bengi mwaya kyalo, kunti basoma mpunda iswapiile Bibilia, ili ku kitente kyetu kya Enternete kya jw.org, ili mu ndimi ikilile pa 1 000! Kabungue Kali Katungulula, kaaitabiziizie eevi kitabu, Sekelela Buikazi Loonse!​—kiombo kikata kili kyatukwasia mu miilo ya kukita basambi​—kipilibulue mu ndimi ikilile pa 700! Kabili kyakulia kya kimupasi, kili mukufumiiwa kupitila ma viideo palua bampokoto ni mpapulo palua bampofu. Tuli mukumona bukabika bwa Bibilia bwafikiliziiwa. Bantu “kufuma mu ndimi yonse ya ntundu” bali mukusambilila “lulimi luswetele” lwa kisinka kya Bibilia. (Zek. 8:23; Zef. 3:9) Bebio byonse, bili mukufikiliziiwa paantu Yesu Kristu ali mukutungulula wali ni buviinde.

8. Ni mazabo ki ali mukufuma mu miilo yeetu ya kusimikila?

⁸ Loonu, bantu bakilile pa milioni munane (8 000 000), mu byalo 240, bali mukwingila mu kuteania kwakue Yehova. Kabili kila muaka, makumi a ma elufu ali mukubatiziiwa! Inzi, kintu kya mana kikilile pa ezio mpendua ni keeki, mibeele ya Kikristu, i kulanda “bumuntu bwa leenu” buli mukulangilila babo basambi  ba leenu. (Bakol. 3:8-10) Bengi baalekeele bintu bya bupungue, mazibo, bukapatulula, ni kutonesia kyalo kyabo. Bukabika buli mu Isaya 2:4 buli mukufikiliziiwa; ‘te bali mukusambilila kuluana ata kaniini.’ Paantu tuli mukwikwinda saana kuvuala bumuntu bwa leenu, tuli mukukwasia kusonsezia bantu bengile mu kuteania kwakue Leeza, kabili tuli mukulangilila nangue tuli mukumukoonka ntunguluzi weetu Kristu Yesu. (Yoan. 13:35; 1 Pet. 2:12) Juu ya ki keekio kili mukukitika? Paantu Yesu ali mukutukwasia mu nzila itukabiile.

9. Nga vilandile Mateo 24:45-47, Yesu waalandile ki lwa ntaanzi palua nsita ya mpela?

⁹ Soma Mateo 24:45-47. Yesu waalandile nangue mu nsita ya mpela wakasaakula “muzia wa kisinka ni wa maano” (NWT), eevi ateanie kyakulia kya kimupasi. Pakaako, tuswapiile ozo muzia aye wali ni mute saana mu miilo mu enu nsiku yeetu. Keekio ni kisinka. Kangalila weetu, Yesu, ali mukubombia kikundi kiniini kya balalume babiikilue mafuta eevi kubapeela bantu bakue Leeza pamo ni bantu bange batonene, “bilio pa musita upalile” bya kimupasi. Babo balalume te beezi kwimona kuya bali bakulu bemaniine kiketekelo kya bange. (2 Bakor. 1:24) Inzi, beene benikile nangue Yesu Kristu i “ntunguluzi kabili komanda” wa bantu bakue.​—Is. 55:4.

10. Ni mpapulo ki izimbuilue mu lifungu yaakukwasiizie weewe kutendeka kumubombela Yehova?

¹⁰ Kutendekela muaka wa 1919, muzia wa kisinka waatendekele kuteania mpapulo paleepale yaakwasiizie baalia baabambile kutona kisinka kya Bibilia. Kabili, yaabakwasiizie bantu babo kunvua lya kuanza kisinka kili mu Mulandu Wakue Leeza. Mu 1921, muzia waafumiizie kitabu La Harpe de Dieu, eevi kukwasia baalia batonene basambilile masambilizio a musinzi a Bibilia. Mu kupita kwa nsita, mpapulo inge yaateaniiziwe. Ni kitabu ki kyaakukwasiizie kufikiila kumumana ni kumutona Baba weetu wa ku muulu?  Eba, ni kitabu “ Que Dieu soit reconnu pour vrai ! ” (Leke Leeza Amanike Kuya Wali Wakisinka); Kweli Iongozayo Kwenye Uzima wa Milele; Unaweza Kuishi Milele Katika Paradiso Duniani; Ujuzi Uongozao Kwenye Uhai Udumuo Milele; Biblia Inafundisha Nini Hasa?; Bibilia Ili Yatusambilizia ki?; ao Sekelela Buikazi Loonse!, kitabu kyetu kya leenu? Bebio bitabu byonse, byaateaniiziwe juu ya kutukwasia kukita basambi. Kabili bebio bitabu i byenka bitwaali twakabiile musita lubyaafumiiziwe.

11. Juu ya ki ni kintu kya mana kila umo weetu aye wapata kyakulia kya kimupasi?

¹¹ Bantu bali mukumana kisinka loonu, te beenesie bunke bakabiile kyakulia kikosele kya kimupasi. Fwe bonse tukabiile keekio kyakulia. Mutumua Paulo waaleembele eevi: “Bilio bikosele bili byaliiwa na bantu bakulu (bakosele).” Paulo waaongeziizie kulanda nangue kubombia beelia bituli twasambilila mu Bibilia, kunti kwatukwasia “kwinika [kupusania] biweeme ni bibiipile.” (Baeb. 5:14) Kunti twamona kyakolele saana kukindika mafunde akue Yehova loonu, paantu bantu bengi bali ni lwendo lubiipile saana. Inzi Yesu ali mukusininkizia nangue tuli mukusambilila bintu bitukabiile eevi tukosie kiketekelo kyetu. Mulandu Wakue Leeza utungulwilue na mupasi, i kulanda Bibilia, i nsulo ya kyakulia kya kimupasi. Muzia wa kisinka ali wateania ni kukasania keekio kyakulia wali pensina butunguluzi bwakue Yesu.

12. Nga Yesu, tuli mukuya twaleetela siani liina lyakue Leeza bulumba?

¹² Nga Yesu, tuli mukuya twaleetela liina lyakue Leeza bulumba bupalile liina leelio. (Yoan. 17:6, 26) Kwa mufuano, mu 1931 twaatendekele kukuutua mu liina liswapiile Maleembo, i kulanda Bakasininkizia Bakue Yehova. Kukita evio kwaalangiliile nangue liina lyakue Leeza ni lya mana saana kuli fwefue, kabili nangue twaatonene kumanika mu liina lyakue Baba weetu wa ku muulu. (Is. 43:10-12) Kabili kutendekela Muezi wa Likumi wa ozo wenka muaka, liina lyakue Leeza lyaatendekele kumoneka pa lubali  lwa pa muulu lwa Lupungu Lwakue Kamwenenena. Kukila pakaako, Biblia​—Tafsiri ya Ulimwengu Mupya ibueziizie liina lyakue Leeza pa fuasi yakue ipalile. Keekio kipuseene saana ni ma diini ali aikuuta a Kikristu paantu ali afumia liina lyakue Yehova mu mpilibulo yabo ingi ya Bibilia!

13. Ni kiki kyakusininkiziizia nangue Yesu ali mukubombia “muzia wa kisinka ni wa maano” loonu? (Yoan. 6:68)

¹³ Kupitila “muzia wa kisinka ni wa maano,” Yesu waapaangile kuteania kwibeleele pa kyalo eevi aleete lupupo luswetele. Uli waiunvua siani palua kuteania kooko? Paange waiunvua nga mutumua Petro olia waamwanine eevi Yesu: “Tuli kuya kuli ni? Weewe i ali ni twebo tuli twaleeta bukose bwa muyayaya.” (Yoan. 6:68) Kabenge te twaaingiile mu kuteania kwakue Yehova, loonu nga tuli kupi? Kupitila kuteania kooko, Yesu ali mukusininkizia nangue tuli mukulisiiwa buino kimupasi. Kabili ali mukutubeelezia buino eevi tuye twali ni bufundi mu miilo yeetu ya kusimikila. Kukila pakaako, ali mukutukwasia kuvuala “mibeele ya leenu,” eevi tumusaansamusie Yehova.​—Baef. 4:24.

14. Weewe, waakinoonkelamo siani mu kuya wali mu kuteania kwakue Yehova mu kipindi kya korona (COVID-19)?

¹⁴ Yesu ali wafumia butunguluzi bwa mulangue mu nsita yaaviizie. Kuwaama kwa bobo butunguluzi kwaakimoneka musita waakitendeka korona (COVID-19). Bantu bengi mu kyalo bakiba batwisika palua kintu kibapalile kukita, inzi Yesu waakisininkizia nangue twapata butunguluzi bumanikile bwa kutusuunga. Twaakikinkiziiwa kuya twavuala maske mu fuasi ya bantu bengi ni kutiina kupalamana. Bakote baakilangulusiiwa kuya balondolola lingi pamo ni balupua ni bankazi bonse mu kilonghaano, ni kumana bintu bya kimubili ni bya kimupasi bibakabiile. (Is. 32:1, 2) Twaakipata kabili butunguluzi ni kukinkiziiwa kupitila mpunda  ya leenu kufuma ku Kabungue Kali Katungulula.

15. Ni butunguluzi ki bwaakileetua palua kutungulula kulonghaana ni kubomba miilo ya kusimikila mu kipindi kya korona, kabili keekio kyaakileeta mazabo ki?

¹⁵ Mu kipindi kya korona, twaakipata butunguluzi bumanikile buino bulangiliile vya kulonghaana ni vya kubomba miilo ya kusimikila. Bila kukokola, twaatendekele kulonghaana kwa Kikristu, kulonghaana kwa muputule ni kulonghaana kwa kalaale kupitila kubombia biombo bya kukuutana ku viideo. Kunti twalandasie nangue kusimikila konse kwaatendekele kukitua kupitila mikanda ni telefone. Yehova waakipaala kwikwinda kwetu. Misambo ingi yaakileeta mpunda ilangiliile nangue mpendua ya bakasimika yaakikila kuvula. Kakiine bantu bengi baakisaakaana ni bintu bingi bya kukinkizia mu kenu kipindi.​—Mona Kisanduku kilandile nangue “ Yehova Ali Mukupaala Miilo Yeetu ya Kusimikila.”

16. Kunti twaya twasininkiziizie ki?

¹⁶ Paange bantu bange baakiba bamwene nangue malaizio ali mukufumiiwa na kuteania palua buluele bwa korona apitile mipaka. Inzi, mukuya kwa nsiku, kyaakimoneka paswetele nangue bobo butunguluzi bwakiba bwa mulangue. (Mat. 11:19) Kabili kine twatontonkania Yesu vyali mukutungulula bantu bakue kwa ntono, anzia kine aali yakaba kwaluka siani musita uli mukuiza, Yehova pamo ni Muana wakue bakaba kuya balisie pamo ni fwefue.​—Soma Baebrania 13:5, 6.

17. Weewe pa lobe, waiunvua siani palua kutungululua na Yesu?

¹⁷ Kakiine tupaalilue saana kuya twali pensina butunguluzi bwakue Yesu! Tuli twasaangua mu kuteania kusikasanikile na tubeelela, byalo ao ndimi. Tuli mukulisiiwa buino kimupasi, kabili tukwete biombo bya kutukwasia mu miilo ya kusimikila. Kila umo pakati keetu, ali mukusambilila kuvuala bu muntu bwa leenu, kabili tuli mukusambiliziiwa kutonana. Kakiine, tuli ni nsaambu ikata ya kwitonena paantu Yesu i ntunguluzi weetu!