1. Eaha ta Iehova e hinaaro ra i teie mahana?

 I TEIE mahana, te porohia ra te parau apî oaoa o te Faatereraa arii na te ao nei e tera mau te hinaaro o te Atua. (Mar. 13:10; Tim. 1, 2:3, 4) Inaha na Iehova tera ohipa e mea faufaa roa te reira no ˈna, ua maiti o ˈna i ta ˈna Tamaiti here no te haapao i tera ohipa. Papu maitai, e rave-faahope-roa tatou i tera ohipa pororaa mai ta Iehova e hinaaro ra no te mea o Iesu te aratai ra ia tatou.​—Mat. 24:14.

2. Eaha ta tatou e ite i roto i teie tumu parau haapiiraa?

² I roto i teie tumu parau haapiiraa, e ite tatou e nafea Iesu e faaohipa ˈi i ta ˈna “tavini haapao maitai e te paari” no te horoa i te maa pae varua e no te aratai i ta ˈna mau pǐpǐ i roto i te ohipa pororaa rahi roa ˈˈe. (Mat. 24:45) E ite atoa tatou eaha ta tatou tataitahi e nehenehe e rave no te turu ia Iesu e i te tavini haapao maitai.

3. Eaha te mana tei horoahia ia Iesu?

³ Te aratai ra Iesu i te ohipa pororaa. E nafea tatou e papu ai i te reira? Hou a hoˈi ai i te raˈi, ua farerei Iesu vetahi o ta ˈna mau pǐpǐ haapao maitai i te hoê mouˈa i Galilea. Ua parau o ˈna ia ratou: “Ua horoahia mai ia ˈu te mana atoa i te raˈi e i te fenua.” A tapao na i ta ˈna i parau i muri iho: “A haere ïa e faariro i te taata o te mau nunaa  atoa ei pǐpǐ.” (Mat. 28:18, 19) Te auraa ïa e, ua horoahia ia Iesu te mana no te aratai i te mau mea atoa, mai te ohipa pororaa.

4. No te aha tatou e papu ai e te aratai noa ra Iesu i te ohipa pororaa?

⁴ Ua parau Iesu e porohia te parau apî oaoa na “te mau nunaa atoa” e e faarirohia te taata ei pǐpǐ. Hau atu, e vai o ˈna i pihai iho i ta ˈna mau pǐpǐ “i te mau mahana atoa e tae noa ˈtu i te anotau hopea o te ao nei.” (Mat. 28:20) Te faaite papu ra te reira e te aratai noa ra Iesu i te ohipa pororaa i to tatou tau.

5. Eaha ta tatou tuhaa i roto i te tupuraa o te Salamo 110:3?

⁵ Aita Iesu i haapeapea aˈe e navai anei te feia rave ohipa i te anotau hopea o te ao nei. Ua ite o ˈna e tupu iho â teie mau parau ta te papai salamo i tohu: “E pûpû to nunaa ia ratou iho ma te aau tae i te mahana o to oe nuu.” (Sal. 110:3) Mai te peu te poro atoa ra outou i te parau apî oaoa, te turu ra ïa outou ia Iesu e i te tavini haapao maitai. Hau atu, te haa ra outou ia tupu taua parau tohu ra. Noa ˈtu te vai ra te tahi mau haafifiraa, te nuu noa ra te ohipa pororaa i mua.

6. Eaha te tahi fifi ta te feia poro o te Faatereraa arii e faaruru ra i teie mahana?

⁶ Hoê fifi ta te feia poro o te Faatereraa arii e faaruru ra, o te patoiraa ïa. Mea rahi te parau haavare ta te mau apotata, tia faaroo e tia faatere e haaparare nei no nia i ta tatou ohipa. Ia vare noa ˈtu râ to tatou mau fetii, hoa ohipa aore ra te feia ta tatou e matau nei i taua mau parau ra, e faahepo mai paha ratou ia tatou ia faaea i te tavini ia Iehova e i te poro. I te tahi mau fenua, e faainohia to tatou mau taeae e tuahine, e haamǎtaˈuhia e e tapeahia ratou. Aita tatou e maere nei i taua mau huru raveraa. Ua tohu hoi Iesu: “E hae te mau nunaa atoa ia outou no to ˈu nei iˈoa.” (Mat. 24:9) Ia faaruru tatou i te fifi, tapao faaite ïa e te fanaˈo ra tatou i te farii maitai o Iehova. (Mat. 5:11, 12) O te Diabolo to muri mai i te mau patoiraa. Mea puai aˈe râ Iesu! Maoti ta ˈna tauturu, te porohia ra te parau apî oaoa i te taata o te mau nunaa atoa. E nehenehe iho â tatou e papu i te reira!

7. Eaha te haapapu ra e te tupu ra te mau parau o te Apokalupo 14:6, 7?

⁷ Ei taata poro o te Faatereraa arii, te faaruru atoa ra tatou i te fifi o te reo. I roto i te orama ta Iesu i horoa i te aposetolo Ioane, ua tohu o ˈna e i to tatou tau, eita taua fifi ra e tapea i te ohipa pororaa. (A taio i te Apokalupo 14:6, 7.) Ei hiˈoraa, ua imihia te ravea ia nehenehe e rave rahi taata e faaroo i te poroi o te Faatereraa arii. I teie mahana, e nehenehe te taata na te ao nei e taio i ta tatou mau papai Bibilia i nia i ta tatou reni natirara jw.org no te mea ua hurihia te reira na roto hau atu 1 000 reo. Ua fariihia ia hurihia te buka Ia ora oe e a muri noa ˈtu! na roto hau atu 700 reo. Tera hoi te buka ta tatou e faaohipa nei no te faariro i te taata ei pǐpǐ. Te fanaˈo atoa nei tatou i te maa pae varua na roto i te mau video haruharuhia no te feia tariˈa turi e te mau papai piahia no te mau matapo. Te ite ra tatou i te tupuraa o te mau parau tohu Bibilia. Te haapii ra te taata “no te mau reo atoa o te mau nunaa” i te “reo viivii ore” o te parau mau Bibilia. (Zek. 8:23; Zeph. 3:9) Te tupu ra te reira maoti te aratairaa a Iesu Mesia.

8. Eaha te itehia ra maoti ta tatou ohipa pororaa?

 ⁸ I teie mahana, ua hau atu i te vaˈu mirioni taata te apiti ra i te faanahonahoraa a Iehova i roto e 240 fenua. I te mau matahiti atoa, e ahuru tausani taata te bapetizohia. Te mea faufaa ˈtu â te itehia ra, o te mau huru maitatai ïa ta teie mau pǐpǐ apî a Iesu e faatupu ra a ahu atu ai i “te huru taata apî.” (Kol. 3:8-10) E rave rahi tei faaea i te rave i te mau peu taotoraa tia ore e i te ohipa ino. Ua faaea atoa ratou i te faaino i te tahi atu e i te manaˈo e o to ratou nunaa te mea maitai aˈe. Te tupu ra te parau tohu faahitihia o te Isaia 2:4, te na ôhia ra, e ore ratou “e haapii faahou i te tamaˈi.” Ma te tutava i te ahu i te huru taata apî, te tauturu ra tatou i te taata ia faafatata ˈtu i te faanahonahoraa a te Atua e te faaite ra tatou i to tatou turu ia Iesu Mesia, to tatou tiaau. (Ioa. 13:35; Pet. 1, 2:12) Aita tera ohipa e tupu noa mai mai tera. Na Iesu e horoa ra i te tauturu ta tatou e hinaaro ra.

9. Ia au i te Mataio 24:45-47, eaha te tupuraa ta Iesu i tohu no te anotau hopea?

⁹ A taio i te Mataio 24:45-47. Ua tohu Iesu e i te anotau hopea, e faatoroa o ˈna i te hoê “tavini haapao maitai e te paari” no te horoa i te maa pae varua. Mea tano ïa ia manaˈo e e haa rahi taua tavini ra i to tatou tau. Tera iho â ta tatou e ite nei! Ia fanaˈo te nunaa o Iehova e te feia e anaanatae ra i te maa pae varua “i te taime tano,” te faaohipa ra Iesu i te tahi noa mau taeae faatavaihia. Aita teie mau taeae e manaˈo ra e o ratou te fatu o te faaroo o vetahi ê. (Kor. 2, 1:24) Te farii nei râ ratou ia Iesu Mesia “ei aratai e ei raatira” o to Iehova nunaa.​—Isa. 55:4.

10. Eaha te papai itehia i nia i te hohoˈa o tei tauturu ia outou ia haere na nia i te eˈa e tae atu ai i te ora mure ore?

 ¹⁰ Mai 1919 mai â, te nenei ra te tavini haapao maitai i e rave rau papai. Maoti te reira, ua nehenehe te taata e haapii i te parau mau Bibilia. I 1921, ua piahia te buka Te kinura a te Atua (Beretane) no te tauturu i te taata ia ite i te mau haapiiraa tumu Bibilia. Ua neneihia hau atu â papai i te roaraa o te tau. Eaha te papai tei tauturu ia outou ia ite o vai Iehova e ia here ia ˈna? O te buka “Ei parau mau ta te Atua” (Beretane) anei, aore ra Te parau mau e aratai i te ora mure ore ra, E nehenehe oe e ora e a muri noa ˈtu i roto i te paradaiso i nia i te fenua nei, Te ite e aratai i te ora mure ore, Eaha ta te Bibilia e haapii mau ra? Peneiaˈe, te buka Eaha ta te Bibilia e haapii mai? Aore ra, ta tatou buka apî Ia ora oe e a muri noa ˈtu! Ua piahia tera mau buka atoa no te tauturu ia tatou ia faariro i te taata ei pǐpǐ. Ua matara mai te reira i te taime iho â ta tatou i hinaaro mau.

11. No te aha mea faufaa ia fanaˈo tatou paatoa i te maa pae varua?

¹¹ E ere te feia anaˈe o te anaanatae noa ˈtura i te parau mau te hinaaro ra i te maa pae varua etaeta. O tatou paatoa râ. Ua papai te aposetolo Paulo: “Area te maa etaeta, na te feia paari ïa i te pae varua.” Ua parau â Paulo e ma te faaohipa i ta tatou i haapii, e tauturu te reira “ia faataa ê i te maitai i te ino.” (Heb. 5:14) No te mea te ino noa ˈtu ra te huru o te taata i teie mahana, e ere roa ˈtu i te mea ohie ia pee i te mau ture aveia a Iehova. Te haapao nei râ Iesu ia fanaˈo tatou i te haapiiraa tano ia puai noa to tatou faaroo. No ô mai te reira i te Parau a te Atua. I raro aˈe i te aratairaa a Iesu, te  faaineine e te horoa mai ra te tavini haapao maitai i te maa pae varua.

12. Mai ia Iesu, e nafea tatou e faahanahana ˈi i te iˈoa o te Atua?

¹² Mai ia Iesu, te faahanahana nei tatou i te iˈoa o te Atua. (Ioa. 17:6, 26) Ei hiˈoraa, i 1931, ua farii tatou i te amo i te iˈoa Ite no Iehova mai te itehia ra i roto i te Bibilia. Ua faaite ïa tatou e mea faufaa roa to Iehova iˈoa no tatou e te hinaaro nei tatou e amo i tera iˈoa. (Isa. 43:10-12) E mai te avaˈe Atopa mai â o taua matahiti ra, ua faaohipa tatou i te iˈoa o te Atua i nia i te api matamua o ta tatou mau Pare Tiairaa atoa. Hau atu, i roto i Te Bibilia, Huriraa o te ao apî, ua faahoˈihia te iˈoa Iehova i to ˈna vairaa mau. Mea taa ê mau te reira i ta te mau haapaoraa i rave a tatara ˈi i te iˈoa o Iehova i roto e rave rahi huriraa Bibilia.

13. Eaha te haapapu ra ia outou e te faaohipa ra Iesu i “te tavini haapao maitai e te paari” i teie mahana? (Ioane 6:68)

¹³ Na roto i “te tavini haapao maitai e te paari,” ua haamau Iesu i te tuhaa i nia i te fenua nei o te faanahonahoraa e paturu ra i te haamoriraa viivii ore. Eaha to outou manaˈo no nia i tera faanahonahoraa? No te pahono atu, te haamanaˈo ra paha outou i ta te aposetolo Petero i parau ia Iesu: “E haere ïa matou ia vai ra? Tei ia oe ra hoi te mau parau o te ora mure ore.” (Ioa. 6:68) Ihea tatou e haere ai aita anaˈe tatou e apiti i ta Iehova faanahonahoraa? Maoti noa hoi te reira, e haapao ai Iesu ia fanaˈo tatou i te titauhia no te vai taiva ore i te Atua. Te faaineine atoa ra o ˈna ia tatou ia aravihi atu â i roto i te taviniraa. Hau atu, te tauturu ra o ˈna ia tatou ia ahu i “te huru taata  apî,” a faaoaoa ˈtu ai ia Iehova.​—Eph. 4:24.

14. Mea nafea tatou i te faufaaraahia i te apitiraa i te faanahonahoraa a Iehova a haamata ˈi te maˈi pee COVID-19?

¹⁴ Te horoa ra Iesu i te aratairaa î i te paari i te tau fifi mau. Ua ite-papu-hia te faufaaraa o tera aratairaa i te taime a haamata ˈi te maˈi pee COVID-19. Aita te taata na te ao nei i ite eaha te rave. Ua haapao râ Iesu ia fanaˈo tatou i te aratairaa papu o te paruru ia tatou. Ua faaitoitohia tatou ia tuu i te paruru vaha e ia faatura i te faaateatearaa i te vahi taata. Ua haamanaˈohia i te mau matahiapo ia paraparau tamau i te mau mero atoa o te amuiraa e ia haapao e te fanaˈo ra ratou i te hinaarohia i te pae tino e i te pae varua. (Isa. 32:1, 2) Ua horoahia mai i te aratairaa hau e te faaitoitoraa na roto i te mau video parau apî a te Tino aratai.

15. Eaha te aratairaa horoahia ia tupu noa ta tatou mau putuputuraa e te ohipa pororaa i te tau maˈi pee e eaha te mau maitai i itehia?

¹⁵ I te tau maˈi pee, ua fanaˈo tatou i te aratairaa papu ia tupu noa ta tatou mau putuputuraa e ia tamau tatou i te poro. Oioi tatou i te apitiraa i te mau putuputuraa e tairururaa na roto i te mau ravea roro uira. Ua haamata atoa tatou i te poro na roto i te rata e te niuniu paraparau. Ua haamaitai Iehova i ta tatou mau tutavaraa. E rave rahi amaa tei tapao i te hoê maraaraa o te feia poro. E rave rahi tei ite i te mau tupuraa faaitoito mau i taua taime ra.—A hiˈo i te tumu parau “ Te haamaitai ra Iehova i ta tatou pororaa.”

16. Eaha ta tatou e tiaturi papu nei?

¹⁶ A faaruru ai i teie maˈi pee, ua manaˈo paha vetahi aita i tano te mau faaotiraa ta te faanahonahoraa i rave. A mairi ai râ te mau avaˈe, ua papu ia tatou e e aratairaa î i te paari ta tatou i fanaˈo. (Mat. 11:19) Ia feruriruri tatou i nia i te here o Iesu a aratai ai i te nunaa o Iehova, ua puai atu â to tatou tiaturi e noa ˈtu eaha te tupu ananahi, e haapao iho â Iehova e Iesu ia tatou.​—A taio i te Hebera 13:5, 6.

17. Eaha to outou huru a ohipa ˈi i raro aˈe i te aratairaa a Iesu?

¹⁷ Auê tatou i te oaoa i te ohipa i raro aˈe i te aratairaa a Iesu! Tei roto tatou i te hoê faanahonahoraa aita e amahamaha ra i te pae o te taere, te fenua e te reo. Te fanaˈo nei tatou e rave rahi maa pae varua e ua ineine maitai tatou no te ohipa pororaa. Te tauturuhia ra tatou tataitahi no te ahu i te huru taata apî e te haapii nei tatou e nafea ia here te tahi i te tahi. Ua riro te reira ei haapeuraa no te mea o Iesu to tatou Aratai.