1. Бөгүн Иегованың күзел-соруу кандыгыл?

 БӨГҮН Бурганның күзел-соруу дээрге Чагырга дугайында өөрүшкүлүг медээни бүгү делегейге суртаалдаары-дыр (Мк. 13:10; 1 Тим. 2:3, 4). Ол — Иегованың Бодунуң ажылы-дыр. Ол ажыл-херек Аңаа дыка чугула боорга, ону удуртур кылдыр, Бурган ынак Оглунга дагзып каан. Иисустуң удуртуп турар суртаал ажылы үениң төнчүзү келбээнде доостур деп бүзүреп болур бис (Мф. 24:14).

2. Бо статьяга чүнү сайгарар бис?

² Иисус «аъш-чемни» үлээр дээш, «шынчы болгаш сарыылдыг чалчаны» канчаар ажыглап турарын бо статьяга сайгарар бис (Мф. 24:45). Иисус ооң ачызында төөгүде кайгамчык дээн улуг суртаал ажылынга эдерикчилерин канчаар удуртуп турарын база көөр бис. Оон ыңай бистиң кижи бүрүзү Иисусту болгаш шынчы чалчаны канчаар деткип болурун көрүптээлиңер.

3. Иисус кандыг эрге-чагырганы алган?

³ Иисус суртаал ажылын удуртуп турар деп кайыын билир бис? Ол дээрже үнериниң бетинде шынчы эдерикчилери-биле Галилеяга ужуражып келгеш, мынча дээн: «Дээрге база черге бүгү эрге-чагырганы Меңээ берген-дир». Эскерип көрүңер даан, Иисус ол сөстерни чугаалаан соонда: «Ынчангаш барыңар... бүгү чоннарны... Мээң өөреникчилерим боор кылдыр ээлдириңер» — дээн (Мф. 28:18, 19). Ынчап кээрге, Иисуска берген эрге-чагыргаже суртаал ажылын удуртуру база кирип турар.

4. Иисус амгы үеде суртаал ажылын удуртуп турар деп чүге чигзинмес бис?

⁴ Иисус эдерикчилерин «бүгү чоннарга» суртаалдап,  оларны өөреникчилер кылдыр ээлдириңер дээш: «Бо делегейниң төнчүзүнге чедир силер-биле кады мен» деп бүзүреткен (Мф. 28:20). Бо сөстерден Иисус амгы үеде суртаал ажылын удуртуп турар деп көскү.

5. Ырлар 109:3-те сөстерниң күүсеттинип турарынга канчаар киржип турар бис?

⁵ Дүжүт ажаалдазының төнчүзүнде ажылчыннар чедишпейн баар деп, Иисус сагыш човаваан. Чүге дизе: «Аг-шерииңни ыдык дагларже эдертип аппаарың хүнде чонуң сеңээ эки туразы-биле чедип кээр» деп өттүр билген медеглелдиң күүсеттинерин ол эки билир турган (Ыд. ыр. 109:3). Чагырга дугайында өөрүшкүлүг медээни суртаалдап турар болзуңарза, Иисусту болгаш шынчы чалчаны деткип, ол өттүр билген медеглелде киржип турар силер. Бо ажыл-чорудулганы соксадыры болдунмас-даа болза, шаптараазыннар база бар.

6. Чагырга медээчилериниң таваржып чоруур бир шаптараазынын чугаалаңар.

⁶ Чагырга медээчилериниң таваржып чоруур бир шаптараазыны — удурланыышкыннар-дыр. Ойталакчылар, шажын башкарыкчылары болгаш эрге-чагырга улузу бистиң дугайывыста хөй нүгүл-мегени тарадып турар. Төрелдеривис, таныыр улузувус база кады ажылдакчыларывыс оларга бүзүрей бээр болза, бисти Иеговадан хая көрнүп, суртаалдаарын соксадыр кылдыр албадап болур. Чамдык чурттарда бисти тудуп хоруп, кыжанып, безин кара-бажыңнарже суп турар. Ону көргеш, кайгавас бис. Чүге дизе Иисус: «Мээң адым ужун бүгү кижи төрелгетен силерни көөр хөңнү чок апаар» — дээн (Мф. 24:9). Улустуң биске ол хире хөңнү чок болганы бис Иисустуң үлегерин эдерип, Иегованың сеткилинге кирип турарывысты бадыткап турар (Мф. 5:11, 12). Бо бүгүнүң артында Эрлик бар деп билир бис. Ынчалза-даа ол Иисуска канчап-даа күш четпес! Удуртукчувустуң деткимчезиниң ачызында бүгү чоннар өөрүшкүлүг медээни дыңнап чоруур.

7. Ажыдыышкын 14:6, 7-де сөстер күүсеттинип турар деп кандыг бадыткалдар бар?

⁷ А бир өске шаптараазын дээрге кижилерниң аңгы-аңгы дылдарда чугааланып турары-дыр. Иисус Христос Иоанн элчинге көстүүшкүнге бистиң хүннерде медээни суртаалдаарынга аңгы-аңгы дылдар моондак болбас деп көргүскен. (Номчуптуңар: Ажыдыышкын 14:6, 7.) Ол көстүүшкүн канчаар күүсеттинип турар? Чагырга дугайында медээни шупту улуска таныштырып турар бис. Бөгүн библейжи материалдарны сайтывыстан бүгү делегейде улус номчуп турар. Чүге дизе ол 1 000 ажыг дылда бар. Удуртукчу чөвүлел «Аас-кежиктиг мөңге чуртта!» деп Библия өөренир кол дептеривисти 700 ажыг дылга очулдурарын чөпшээрээн. Оон аңгыда, караа көрбес улуска Брайль шрифтизинге дептерлерни парлап, а кулаа дыңнавас улуска видеороликтерни үндүрүп турар бис. Ийе, өттүр билген медеглелдер караавыста күүсеттинип турар. «Аңгы-аңгы дылдарда чугаалап турар бүгү чоннардан» улус алыс шынның арыг дылынга чугааланып өөренип турар (Зах. 8:23; Соф. 3:9). Бо бүгү Иисус Христостуң тергиин удуртулгазының ачызында болдунуп турар.

8. Суртаал ажылы кандыг түңнелдерни эккелген?

⁸ Амгы үеде Иегованың организациязында 240 чурттарда болгаш девискээрлерде чурттап чоруур 8 000 000 ажыг кижи бар. Чыл санында он-он муң чаа өөреникчилер сугга суктуруп турар. Мында саннар-даа эвес, а кижилерниң «чаа бүдүштү» кедип алганы, азы христиан шынарларны  сайзырадып алганы, чугула (Кол. 3:8—10). Исайя 2:4-те: «Моон соңгаар дайын чорударынга өөренмес» дээн сөстер оларда күүсеттинип турар. Оларның хөй кезии каржы болгаш мөзүзү куду ажыл-херектерин каггаш, кижилерни аңгылавас, язы-сөөк ылгавас апарган. Шак ынчаар төлептиг алдынып турарывыс-биле Бурганның организациязынче улусту хаара тудуп, Удуртукчувус Иисус Христосту эдерип чоруурувусту бадыткап турар бис (Ин. 13:35; 1 Пет. 2:12). Бо бүгү Иисус биске дузалап турар боорга, болдунуп турар.

9. Матфей 24:45—47-де үениң төнчүзүнүң дугайында баш удур чүнү бижип каан?

⁹ Номчуптуңар: Матфей 24:45—47. Үениң төнчүзүнде Иисус «шынчы болгаш сарыылдыг чалчаны» эдерикчилеринге «аъш-чемни» бээр кылдыр, томуйлап каар деп баш удур чугаалаан. Ол чалча бөгүн холдарынга дыш бербейн, ажылдап турар деп көрүп турар бис. Удуртукчувус ол каш санныг шилип чагдырган акыларны таварыштыр Бурганның бараалгакчылары болгаш алыс шынны сонуургаар улус «чогуур үезинде аъш-чемни» алыр кылдыр сагыш човаан. Ол шилип чагдырганнар өскелерниң бүзүрелин башкарбайн турар (2 Кор. 1:24). Олар Иисус Христосту Бурганның чонунуң «баштыңы болгаш чагырыкчызы» кылдыр хүлээп турар (Иса. 55:4).

10. Мөңге амыдыралга чедирер орукче туруп алырынга силерге кандыг ном дузалаан? (Чуруктарны көрүңер.)

¹⁰ 1919 чылдан тура шынчы чалчаны томуйлап каарга, ол ак сеткилдиг улуска алыс шынның медээзин «амзаар» кылдыр дыка хөй номнарны үндүрген. 1921 чылда улуска кол библейжи өөредиглерни билип алырынга дузалаар дээш, чалча «Арфа  Божия» деп номну үндүрген. Үелер эртерге, чаа-чаа дептерлер үнүп турган. Дээрде Адавысты билип алырынга база Аңаа ынак апаарынга силерге кандыг ном дузалаан? «Бог верен», «Истина, ведущая к вечной жизни», «Ты можешь жить вечно в раю на земле», «Познание, ведущее к вечной жизни», «Библия бисти херек кырында чүге өөредип турар?», «Библия бисти чүү чүвеге өөредип турар?» азы бистиң эң сөөлгү «Аас-кежиктиг мөңге чуртта!» деп номувус бе? Ол номнар биске Христостуң өөреникчилерин белеткээринге дузалаар кылдыр парлаттынган. База ном бүрүзү чогуур үезинде үнүп турган.

11. Бистиң кижи бүрүзүнге «аъш-чем» чүге эргежок чугула?

¹¹ Кадыг чем алыс шынны чүгле чаа сонуургай берген улуска эвес, а бистиң кижи бүрүзүнге херек. Павел элчин: «А кадыг чем чедишкен улуг улуска хамааржыр» — дээн. Ооң ачызында «буянны бузуттан ылгап» болур бис (Евр. 5:14). Амгы үеде улустуң мөзү-шынары эң куду деңнелде келген боорга, Бурганның хоойлуларын күүседири белен эвес. Ынчангаш Иисус Библияга үндезилээн амданныг «чем» бүзүреливисти быжыктырзын дээш хайгаарап турар. Шынчы чалча Иисустуң удуртулгазы-биле ол «аъш-чемни» белеткеп база үлеп турар.

12. Иисус ышкаш, бис база Иегованың адын ханы хүндүлеп турар бис деп чүге чугаалап болур?

¹² Иисус ышкаш, бис база Бурганның адын ханы хүндүлеп чоруур бис (Ин. 17:6, 26). Чижээ, 1931 чылда дээрде Адавыс-биле тускай хамаарылгавысты онзалаан «Иегованың Херечилери» деп атты хүлээп алган бис (Иса. 43:10—12). Ол-ла чылдың октябрьда Бурганның ады «Таңныыл суургазының» үндүрүлге бүрүзүнүң даштынга үнүп эгелээн. Оон аңгыда, ол атты «Чаа делегей» деп Библияның очулгазында турар  ужурлуг черлеринде катап киирип каан. Боттарының очулдурган Библияларындан Иегованың адын ап каапкан бо делегейниң христиан церковьтарындан дыка-ла ылгалдыг бис!

13. «Шынчы болгаш сарыылдыг чалчаны» Иисус удуртуп турар деп чүге чигзинмес силер? (Иоанн 6:68).

¹³ Иисус «шынчы болгаш сарыылдыг чалчаны» ажыглап, кижилерни Бурганче хаара тудар дээш, черде эдерикчилерин организастап каан. Иегованың организациязынга кандыг хамаарылгалыг силер? Пётр элчинниң: «Дээрги, кымга баар улус бис? Мөңге амыдыралды бээр сөстер Силерде-дир» деп Иисуска чугаалаан минниишкиннерин үлежир чадавас силер (Ин. 6:68). Үезинде Иегованың Херечилеринге ужурашпаан болзувусса, амгы үеде кайда боор бис? Бурганның организациязының дузазы-биле Иисус биске элбек «аъш-чемни» берип чоруур. Оон аңгыда, ол бисти суртаалдаарынга өөредип турар. Бисти Иегованы өөртсүн дээш, чаа кижиниң бүдүжүн кедип алырынга база ол дузалап турар (Эф. 4:24).

14. COVID-19 деп хамчык аарыг үезинде Иеговага Ооң организациязы-биле бараалгап турарыңар силерге кандыг ажык-дузаны эккелген?

¹⁴ Иисус биске бо берге үеде бүзүрелдиг удуртулганы берип турар. Ол чүүл COVID-19 деп хамчык аарыг тыптып кээрге, ылаңгыя көскү болган. Делегейде хөй улус дүвүреп, чүнү канчаарын аайын тыппайн турда, Иисус бисти камгалаар дээш, тода айтыышкыннарны берген. Чижээ, маскаларны кедип, дистанцияны сагыырынче кыйгырган. Удуртукчуларга чыышта акы-угбалар-биле үргүлчү харылзажып, оларның кадыкшылын болгаш Иегова-биле хамаарылгазын  сонуургаар кылдыр сагындырган (Иса. 32:1, 2). А Удуртукчу чөвүлелдиң дыңнадыгларындан немелде айтыышкыннарны болгаш деткимчени ап турган бис.

15. Пандемия үезинде организация суртаалга болгаш чыышка хамаарыштыр кандыг айтыышкыннар берген база ооң түңнели кандыг болган?

¹⁵ Пандемия үезинде чыыштарны эрттиреринге база суртаалдаарынга хамаарыштыр тода айтыышкыннарны алган бис. Бис чыыштарны, шуулганнарны видеохарылзаа-биле эрттирип, телефон болгаш чагаалар таварыштыр суртаалдап эгелээн бис. Иегова бистиң күжениишкиннеривисти йөрээген. Хөй чурттарда суртаалчыларның саны ушчок көвүдей берген. Оон ыңай хөй кезиивис суртаалга солун таварылгаларлыг болган. ( «Иегова суртаал ажылын йөрээп турар» деп көзенекти көрүңер.)

16. Чүү чүвени ыяк билир бис?

¹⁶ Удуртукчу чөвүлел артык айтыышкыннар берип турар деп, чамдык улус бодап турган чадавас. Ынчалза-даа организацияның айтыышкыннарының ажыктыынга бо-ла шынзыгып турган бис (Мф. 11:19). Шынап-ла, Иисус бисти ынакшылдыы-биле башкарып турар деп кандыг-даа чигзиниг чок. Келир үеде бисти чүү-даа маназа, Иегова болгаш Ооң ынак Оглу бисти кажан-даа кагбас деп билир бис. (Номчуптуңар: Еврейлерге 13:5, 6.)

17. Баштыңчывыс Иисус боорга, чүнү миннир-дир силер?

¹⁷ Бистиң баштыңчывыс Иисус болганынга дыка-ла өөрүүр-дүр бис. Бис — язы-сөөгү, культуразы дээш, кымны-даа аңгылавас организацияның кежигүнү бис. Оон ыңай бай, элбек кылдыр делгээн «аъш-чемниг» бис. Кижи бүрүзү Чагырга дугайында медээни суртаалдаарынга эки белеткеттинген. Ол ышкаш шуптувус христиан шынарларны сайзырадып, бот-боттарывыска бодун хайыралавас ынакшылды илередиринге өөренип турар бис. Ынчангаш Удуртукчувус Иисус дээш чоргаарланыр-дыр бис!