STÙDIO 29
Sìpia sicuro che Gesù l’è drio tender del pòpolo de Dio!
“Dio el me ga dato autorità sora tute le robe nel cielo e nela tera.” — MAT. 28:18.
CÀNTICO 58 Ndemo catar i mansi
COSSA CHE NDAREMO IMPARAR? *
1. Cossa che Geovà el vol tanto che sìpia fato?
GEOVÀ el vol tanto che le bone notìssie le sìpia predicade in tuta la Tera. (Mar. 13:10; 1 Tim. 2:3, 4) Come questo laoro l’è tanto importante, Geovà el ga scoliesto el so Fiol, Gesù, par tenderlo. Podemo esser sicuri che Gesù el ndarà far questo laoro del tuto vanti del fin e dela maniera che Geovà el vol. — Mat. 24:14.
2. Cossa che ndaremo imparar in questo stùdio?
2 In questo stùdio, ndaremo imparar che Gesù l’è drio doperar el “schiavo fedele e prudente” par giutarne a capir la Bìblia e par tender del laoro de predicassion. (Mat. 24:45) Ndaremo anca imparar come che podemo giutar a Gesù e el “schiavo fedele e prudente”.
GESÙ L’È DRIO TENDER DEL LAORO DE PREDICASSION
3. Che autorità Geovà el ga dato a Gesù?
3 Come che savemo che Gesù l’è drio tender del laoro de predicassion? Par via de quel che el ga dito a arquanti dei so dissìpoli poco vanti de ndar al cielo. Lu el ghe ga dito: “Dio el me ga dato autorità sora tute le robe nel cielo e nela tera. Alora, gavé de ndar e far dissìpoli intrà le persone de tute le nassion.” (Mat. 28:18, 19) Alora, Geovà el ga anca dato a Gesù la autorità de tender del laoro de predicassion.
4. Parché che podemo esser sicuri che Gesù l’è drio tender dela predicassion anca ancoi?
4 Gesù el ga prometesto che el laoro de predicar e far dissìpoli el saria fato in “tute le nassion” e che lu el saria insieme coi so dissìpoli tuti i giorni fin el fin. (Mat. 28:20) Quel che Gesù el ga dito ne mostra che lu l’è drio tender de questo laoro anca ancoi.
5. Come che podemo giutar a realisar la professia del Salmo 110:3?
5 Gesù el savea che nel tempo del fin ghen saria persone par far la predicassion. Lu l’era sicuro che la professia del Salmo 110:3 la ndaria realisarse. Questo testo el dise: “El to pòpolo el va meterse a disposission de volentiera nel di che el to esèrsito el ndarà par la guera.” Alora, se te predichi le bone notìssie, te sì drio giutar a Gesù, al schiavo fedele e prudente e a realisar questa professia. Ma che dificoltà fursi infrontemo par far questo laoro?
6. Parché che pol esser fadiga far el laoro de predicassion?
6 Parché che pol esser fadiga far el laoro de predicassion? Parché le persone le ne vien contra. Arquanti che i ze contra Geovà e la so organisassion, polìtichi e autorità dele ciese i conta busie sora el nostro laoro. Pol esser che persone dela nostra fameia e del laoro le crede in queste busie e le proa intrigarne de predicar e de servir a Geovà. In tanti paesi, arquante persone le va contra i nostri fradei e anca li mete in preson. Noantri belche saveino che questo ndaria suceder parché Gesù el ga dito: “Valtri saré persone odiade par tute le nassion par via del me nome.” (Mat. 24:9) Ma queste dificoltà le mostra che semo drio servir a Geovà dela maniera giusta. (Mat. 5:11, 12) Ghemo de ricordarse che el Diaol el dopera queste persone par vegnerne contra. Ma no ne ocore gaver paura del Diaol parché Gesù l’è tanto pi poderoso che lu e l’è drio tenderne. Cossita, semo sicuri che le bone notìssie le sarà predicade in tute le nassion. Adesso ndaremo veder arquante prove de questo.
7. Come che savemo che quel che dise Apocalisse 14:6, 7 l’è drio realisarse ancoi?
7 Podaria anca esser fadiga predicar le bone notìssie parché ghen’è tante léngue nel mondo. Anca cossita, Gesù el ga dito che le bone notìssie le saria predicade a tute le nassion. (Ledi Apocalisse 14:6, 7. *) Sicuro che questa professia la ze drio realisarse. Vedemo che el laoro de predicassion l’è fato in tanti paesi e léngue difarente. Par esémpio, persone in tuto el mondo le pol ndar rento el nostro site e catar publicassion in de pi de mila léngue. El libro Te pol viver felice par sempre!, che doperemo par insegnar la Bìblia ale persone, l’è drio esser fato in de pi de 700 léngue. Anca quei che i ze sordi e orbi i ga tuto quel che i ga de bisogno par far pi forte la so fede in Geovà. Cossita, persone de tute le léngue le ze drio imparar a parlar la ‘léngua pura’. (Zac. 8:23; Sof. 3:9) Sicuro che el nostro Rè, Gesù Cristo, l’è drio tender de questo laoro, e noantri restemo tanto contenti de veder queste professie realisarse.
8. Cossa che l’è drio suceder par via del laoro de predicassion?
8 Ancoi, de pi de 8 milioni de persone in 240 paesi le serve a Geovà. Tuti i ani miliari de persone le se batesa. Ma el pi importante l’è che queste persone le se ga fermà de far quel che l’è sbalià e le ga scominsià a far quel che l’è giusto. (Col. 3:8-10) Par esémpio, tanti i se ga fermà de pensar e far robe sporche, de esser violenti, de tratar mal i altri e de meterse nela polìtica. Noantri vedemo che la professia de Isaia 2:4 la ze drio realisarse parché i servi de Dio i se sforsa tanto par viver in pace. Cossa che l’è drio suceder par via del bel esémpio dei servi de Dio? Lori i mostra che i ze drio obedir a Gesù Cristo e i giuta quei che no serve mia a Geovà a voler farlo. (Gioani 13:35; 1 Pie. 2:12) Questa la ze una bela prova del aiuto de Gesù.
GESÙ EL GA SCOLIESTO UN SCHIAVO
9. De acordo con Mateo 24:45-47, cossa che Gesù el ga dito che ndaria suceder nel tempo del fin?
9 Ledi Mateo 24:45-47 *. Gesù el ga dito che nel tempo del fin, lu ndaria scòlier un schiavo fedele e prudente par giutar el pòpolo de Dio a capir la Bìblia. Questo l’è drio suceder ancoi parché un pìcolo grupo de untadi el dà al pòpolo de Dio e ale altre persone pròpio quel che i ga de bisogno par esser amighi de Dio. Anca che questi òmini i se sforse tanto par farlo, lori no i pensa che i pol comandar i altri. (2 Cor. 1:24) Invesse, lori i sa che l’è Gesù che el ga la autorità sora noantri e che lu l’è el nostro governante. — Isa. 55:4.
10. Che libro te ga giutà a scòlier servir a Geovà? (Vedi le ilustrassion.)
10 Nel ano de 1919, el schiavo fedele e prudente el ga scominsià a far tante publicassion par giutar le persone a capir la Bìblia. Par esémpio, nel ano de 1921 lori i ga fato el libro A Harpa de Deus che el ga giutà tanti a imparar le verità pi importante dela Bìblia. Dopo i ga fato i libri “Seja Deus Verdadeiro”, A Verdade Que Conduz à Vida Eterna, Poderá Viver Para Sempre no Paraíso na Terra, Conhecimento Que Conduz à Vida Eterna, O Que a Bíblia Reamente Ensina?, Cossa la Bìblia la Pol Insegnarne e Te pol viver felice par sempre! Che libro te ga giutà a cognosser e a amar a Geovà? Tuti lori i ne ga giutà a insegnar ai altri sora Geovà e tuti lori i ze stati boni par el so tempo.
11. Parché che anca quei che serve a Geovà i ga de imparar cada volta de pi sora lu?
11 Ma tuti noantri ghemo de seitar a imparar sora Geovà. El apòstolo Paolo el ga dito che anca le persone che belche le serve a Geovà le ga de imparar cada volta de pi sora lu. Lu el ga anca dito che quando le mete in pràtica quel che le impara, le ze bone de capir quel che l’è giusto o sbalià. (Ebr. 5:14) L’è vera che no l’è fàcile far quel che l’è giusto parché le persone le fà cada volta de pi quel che l’è sbalià. Ma Gesù el dopera el schiavo fedele e prudente par darne quel che ghemo de bisogno par seitar a far pi forte la nostra fede.
12. Come che ghe demo onor al nome de Dio compagno a Gesù?
12 Compagno a Gesù, noantri demo al nome de Dio el onor che el mèrita. (Gioani 17:6, 26) Par esémpio, nel ano de 1931, ghemo scominsià a doperar el nome Testimònie de Geovà. (Isa. 43:10-12) Parché che lo ghemo fato? Parché volemo che le persone le sàpie che servimo a Geovà e che le cognossa a Dio. Nel mese de otobre de 1931, el schiavo el ga scominsià a doperar el nome Geovà anca nela prima pàgina dela revista La Sentinela. E anca che tante ciese le cave via el nome Geovà dele so Bìblie, la Tradução do Novo Mundo da Bíblia Sagrada lo ga assà in tuti i posti.
GESÙ EL INSEGNA QUEI CHE VA DRIO A LU
13. Cossa che te assa sicuro che Gesù l’è drio doperar “el schiavo fedele e prudente” ancoi? (Gioani 6:68)
13 Gesù l’è drio doperar el schiavo fedele e prudente par gaver una organisassion qua nela Tera che la adore a Geovà dela maniera giusta. Come che te te senti de far parte de questa organisassion? Fursi te pensi nele parole de Piero, che el ga dito: ‘Signor, a chi che ndaremo drio? Sol quel che ti te insegni pol dar la vita eterna.’ (Gioani 6:68) Gesù el dopera la organisassion par giutarne a capir cada volta de pi la Bìblia e a far el laoro de predicassion. Ela anca la ne giuta a far quel che l’è giusto e assar Geovà contento. Sito bon de imaginar come saria la to vita se no te fessi parte dela organisassion de Geovà? — Efe. 4:24.
14. Come che la organisassion la te ga giutà nela pandemia dela COVID-19?
14 Gesù anca el ne dise quel che ghemo de far quando infrontemo dificoltà. Par esémpio, varda quel che ga sucedesto quando la pandemia dela COVID-19 la ga scominsià. Ghemo visto che le persone del mondo no le savea cossa far, ma Gesù el ne ga dito quel che gaveino de far par meso dela organisassion. Par esémpio, ela la ne ga dito de doperar le màscare e de proar no star darente dei altri quando ndeino via de casa. I ansiani i ze stati incoraiadi a discorer sempre coi fradei e a giutarli a seitar a gaver una forte fede e quel che ghe ocorea par viver. (Isa. 32:1, 2) Noantri anca ghemo bio tanti relatori del Corpo Governante che i ne ga giutà a saver cossa far e i ne ga incoraià tanto.
15. (a) Cossa che la organisassion la ne ga dito sora le riunion e la predicassion nela pandemia? (b) Che benedission Geovà el ne ga dato?
15 Nela pandemia, la organisassion de Geovà ne ga dito come seitar a far le riunion e la predicassion. Par esémpio, suito ghemo scominsià a veder le nostre riunion, assemblee e congressi par meso dela internet. Ghemo anca scominsià a far la predicassion par meso dela internet, carte e telèfono. Che benedission Geovà el ne ga dato? Arquanti Betei i ga dito che tanti i ze deventadi predicadori e i fradei i ze drio gaver bele speriense nela predicassion. — Vedi el quadro “ Geovà l’è drio benedir el laoro de predicassion”.
16. De cossa che podemo esser sicuri?
16 Pol esser che arquanti i pense che no gavarissino de tenderse tanto cossita come la organisassion la dise. Ma semo drio restar cada volta pi sicuri che quel che la organisassion la ne dise l’è el meio par noantri. (Mat. 11:19) Vedemo che Gesù l’è drio tenderne con tanto amor. Questo ne assa ancora pi sicuri che Geovà e Gesù i ndarà sempre tender de noantri, no importa quel che ndarà suceder nel futuro. — Ledi Ebrei 13:5, 6. *
17. Come che te te senti de saver che Gesù l’è drio tender dela organisassion de Geovà qua nela Tera?
17 Gesù l’è drio tender tanto ben dela organisassion de Geovà qua nela Tera. Noantri restemo pròpio contenti de far parte de una fameia che ghen’è persone de tute le culture, nassion e léngue. Ela anca la ne dà tuto quel che ne ocore par capir cada volta de pi la Bìblia e par far un bel laoro nela predicassion. Ela anca la ne giuta a gaver cada volta de pi bele qualità e a amarse un al altro. Sicuro che restemo tanto contenti de saver che Gesù l’è drio tenderne par meso dela organisassion de Geovà qua nela Tera.
CÀNTICO 14 Lodemo a Gesù el nostro Rè
^ Milioni de òmini, done e tosatei i ze drio predicar le bone notìssie e fursi anca ti te sì drio farlo. Se te sì drio predicar le bone notìssie, te sì drio giutar Gesù a far questo laoro. In questo stùdio, ndaremo veder che Gesù l’è drio tender del laoro de predicassion ancoi. Pensar sora questo ndarà giutarne a seitar a servir a Geovà e a scoltar a Gesù.
^ (Apocalisse 14:6, 7) E mi go visto nantro àngelo zolando in meso al cielo e el gavea bone notìssie eterne par proclamar a quei che i vive nela tera, a cada nassion, tribo, léngua e pòpolo. 7 Lu el disea con alta voce: “Temé a Dio e deghe glòria, parché l’è rivà la ora del so giulgamento. Cossita, gavé de adorar quel che el ga fato el cielo, la tera, el mar e le fontane de àque.”
^ (Mateo 24:45-47) Chi che l’è pròpio el schiavo fedele e prudente che el so signor lo ga metesto par tender dei so servi e par darghe el magnar nel tempo giusto? 46 Questo schiavo el sarà felice quando el so signor el vien e el vede che lu l’è drio far cossita! 47 Mi ve digo la verità: Lu lo meterà par tender de tuto quel che lu el ga.
^ (Ebrei 13:5, 6) Che la vostra maniera de viver la mostre che no amé mia i soldi. Sté contenti cole robe che valtri gavé. Parché lu el ga dito: “Mi mai vao assarte e mai vao abandonarte.” 6 Cossita, podemo parlar con tuto el coraio: “Geovà l’è quel che me giuta, no gavarò mia paura. Cossa che pol farme i òmini?”
