A fɔ mi ngɛ jeha 1935 ɔ mi ngɛ Darlaston. Darlaston ji ma nyafii ko nɛ ngɛ England ma a he ko nɛ a tsɛɛ ke Black Country ɔ. Ní tsumihi fuu ngɛ lejɛ ɔ, nɛ klamahi nɛ ní tsumi he nɛ ɔmɛ kɛ tsuɔ ní ɔ ha nɛ lasuku hyi ma a mi tɔ. Lɔ ɔ he je nɛ a tsɛɛ lejɛ ɔ kɛ Black Country ɔ nɛ. Benɛ i ye maa pee jeha eywiɛ ɔ, ye fɔli ɔmɛ kɛ Yehowa Odasefohi bɔni Baiblo ɔ kasemi. Benɛ i ye maa pee jeha 14 loo 15 ɔ, i ná nɔ mi mami kaa anɔkuale ɔ ji nɛ ɔ nɛ, nɛ i ha nɛ a baptisi mi ngɛ jeha 1952 benɛ i ye jeha 16.

Jamɛ a be ɔ mi nɔuu nɛ a ngɔ mi ngɛ ní tsumi ko nɛ a peeɔ moto he níhi ɔ mi. A bɔni mi tsɔsemi konɛ ma tsu ní kaa womi ngmalɔ ngɛ ní tsumi ɔ mi, nɛ ye bua jɔ ní tsumi nɛ ɔ he wawɛɛ.

Be ko ɔ, kpɔ mi nɔ hyɛlɔ ɔ de mi ke ma bɔni Asafo Baiblo Mi Ní Kasemi ɔ nɔ hyɛmi ngɛ otsi kpɛti kpe ɔ mi ngɛ ye asafo ɔ mi ngɛ Willenhall. Enɛ ɔ biɔ nɛ ma mwɔ yi mi kpɔ ko nɛ he hia wawɛɛ. Se yi mi kpɔ mwɔmi nɛ ɔ he wa ha mi. Jamɛ a be ɔ, i yaa asafo mi kpe ngɛ asafo enyɔ mi. I yaa otsi kpɛti kpe ɔ ngɛ Bromsgrove, nɛ ji he nɛ ye ní tsumi ɔ ngɛ ɔ. Lejɛ ɔ kɛ ye we ɔ mi kɛmi maa pee si tomi 20. Nɛ ngɛ otsi ɔ nyagbe ɔ, i yaa asafo mi kpe ngɛ Willenhall, nɛ ji he nɛ ye fɔli ɔmɛ ngɛ ɔ.

Akɛnɛ i suɔ nɛ ma fĩ Yehowa asafo ɔ se he je ɔ, i kplɛɛ ní tsumi nɛ kpɔ mi nɔ hyɛlɔ ɔ kɛ wo ye dɛ ɔ nɔ. Se enɛ ɔ biɔ nɛ ma kpa ní tsumi nɛ ye bua jɔ he wawɛɛ ɔ tsumi. I ha nɛ Yehowa tsɔɔ mi blɔ, nɛ lɔ ɔ ha nɛ i ná si himi kpakpa. I pia we ye he kaa i pee jã.

Benɛ i ngɛ asafo mi kpe yae ngɛ Bromsgrove asafo ɔ mi ɔ, i kɛ nyɛmiyo ko nɛ a tsɛɛ lɛ ke Anne nɛ e he ngɛ fɛu ɔ kpe. Anne hɛ dɔɔ ngɛ Yehowa sɔmɔmi mi. Wa sɛ gba si himi mi ngɛ jeha 1957 ɔ mi, nɛ wa ná sɔmɔmi he blɔhi fuu ngɛ Yehowa asafo ɔ mi. Wa sɔmɔ kaa daa blɔ gbali, blɔ gbali klɛdɛɛ, wa tsu kpɔ mi nɔ hyɛmi ní tsumi ɔ, nɛ wa sɔmɔ ngɛ Betel hulɔ. Anne ha nɛ i ná bua jɔmi wawɛɛ ngɛ si himi mi.

 Ngɛ jeha 1966 ɔ mi ɔ, wa bua jɔ kaa wa ná he blɔ kɛ ya Gilead sukuu nɛ to nɔ 42 ɔ. A ha nɛ wa ya sɔmɔ ngɛ Malawi, he nɛ nihi fuu le kaa e ji Afrika ma ko nɛ a suɔ nibwɔ peemi wawɛɛ. Wa hyɛ we blɔ kaa wa se be kɛe ngɛ lejɛ ɔ.

Wa ya su Malawi ngɛ February 1, 1967 ɔ mi. Ngɛ nyɔhiɔ nɛ sɛ hlami ɔ mi ɔ, wa ngɔ be fuu kɛ kase a gbi ɔ, nɛ lɔ ɔ se ɔ, wa je kpokpa nɔ hyɛmi ní tsumi ɔ sisi. Wa hɛɛ lɔle ko nɛ a tsɛɛ ke Kaiser Jeep. Lɔle nɛ ɔ ngɛ he wami saminya, nɛ e nyɛɔ yaa he fɛɛ he. Ni komɛ susu kaa e ma nyɛ maa nyɛɛ pa mi po. Se tsa pi anɔkuale, lɔle ɔ ma nyɛ maa gu pa nɛ e mi kuɔ we pɛ mi. Be komɛ ɔ, wa hii zu tsu nɛ a kɛ nga bli (bu yi) ɔ mi, nɛ ke e su hiɔmi nɛmi be ɔ, e biɔ nɛ waa ngɔ rubber nɛ e mi ti nɛ a tsɛɛ ke tarpaulin ɔ kɛ wo nga nɛ a kɛ bu tsu ɔ yi ɔ sisi. Enɛ ɔ ha nɛ benɛ wa je ma se sane kpakpa fiɛɛmi ní tsumi ɔ sisi ɔ, pɔtɔ wa he bɔɔ, se kɛ̃ ɔ, wa bua jɔ.

Ngɛ April nyɔhiɔ ɔ mi ɔ, i yɔse kaa e be kɛe nɛ waa kɛ nyagba ko maa kpe ngɛ ma a mi. I nu nɛ Malawi ma nɔ yelɔ nɛ a tsɛɛ lɛ ke Dr. Hastings Banda a ngɛ dee ngɛ radio nɔ kaa Yehowa Odasefohi wui tó, nɛ a ngɛ ma a haoe. Ngɛ anɔkuale mi ɔ, nya pomi nɛ ɔmɛ tsuo be mi. Se sane ɔ ji kaa waa kɛ wa he wui ma kudɔmi sanehi a mi, nɛ wa he we kaadi ko nɛ tsɔɔ kaa wa piɛɛ ma kudɔmi kuu ko he.

Ngɛ September nyɔhiɔ ɔ mi ɔ, wa na ngɛ adafi fiami womi ko mi kaa ma nɔ yelɔ ɔ ngɛ tsɔɔe kaa Yehowa Odasefohi ngɔ haomi kɛ ba he fɛɛ he. Ngɛ ma kudɔmi kpe ko sisi ɔ, nɔ yelɔ ɔ de ke e be kɛe nɛ a maa tsi Yehowa Odasefohi a ní tsumi ɔ nya. Ngɛ October 20, 1967 ɔ, a tsi wa ní tsumi ɔ nya. Lɔ ɔ se ɔ, e kɛ we nɛ polisi ɔmɛ kɛ  immigration bi ɔmɛ ba nga asafo ɔ ní tsumi kɔni ɔ nya, nɛ a fiee ma se sane kpakpa fiɛɛli ɔmɛ kɛ je ma a mi.

A wo wɔ tsu ligbi etɛ, nɛ lɔ ɔ se ɔ, a fiee wɔ kɛ ho Mauritius ya. Jamɛ a be ɔ mi ɔ, Britain nɛ ngɛ ma nɛ ɔ nɔ yee. Se ma nikɔtɔma amɛ ngmɛ́ wɔ blɔ nɛ waa hi ma a mi kaa ma se sane kpakpa fiɛɛli. Lɔ ɔ he ɔ, a wo wɔ blɔ kɛ ho Rhodesia (amlɔ nɛ ɔ a tsɛɛ ma nɛ ɔ ke Zimbabwe). Benɛ wa su lejɛ ɔ, waa kɛ immigration officer ko nɛ e hɛ mi jɔɛ kpe, nɛ e sume nɛ e maa ngmɛ wɔ blɔ nɛ waa sɛ ma a mi. E de ke: “A fiee nyɛ kɛ je Malawi ma a mi, Mauritius hu a ha we nɛ nyɛɛ hi lejɛ ɔ, nɛ amlɔ nɛ ɔ nyɛ ba hiɛ ɔ ejakaa nyɛ susu kaa hiɛ ɔ maa hi ha nyɛ.” Kɛkɛ nɛ Anne bɔni ya fomi. E pee kaa nɔ́ nɛ nɔ ko nɔ ko sume wa sane! Benɛ e ba jã a, i ná nɛ i kpale kɛ ho wa ma mi ya ngɛ England. Nyagbenyagbe ɔ, immigration nikɔtɔma amɛ ha wɔ he blɔ kaa wa ma nyɛ ma ya hwɔ asafo ɔ ní tsumi kɔni ɔ, konɛ e we je na a, waa ba a ní tsumi yi ɔ. Pɔtɔ wa he saminya, se wa ya nɔ nɛ wa ngmɛɛ sane ɔ he kɛ ha Yehowa. E nɔ je na piani ɔ, a ha wɔ he blɔ kaa wa ma nyɛ maa hi Zimbabwe ma a mi kaa nibwɔhi, wa hyɛ we blɔ kulaa. Bɔ nɛ i nu he ha jamɛ a ligbi ɔ, ye hɛ be nɔ jee gblee. I ná nɔ mi mami kaa Yehowa lɛ ngɛ wɔ blɔ tsɔɔe.

Benɛ wa ngɛ Zimbabwe ní tsumi kɔni ɔ, a ha nɛ i tsu ní ngɛ Service Department, nɛ i tsu Malawi kɛ Mozambique níhi a he ní. Jamɛ a be ɔ mi ɔ, a ngɛ nyɛmimɛ nɛ a ngɛ Malawi ɔ yi mi wae wawɛɛ. Ye ní tsumi kake ji kaa i tsɔɔ amaniɛ bɔmi nɛ kɔɔ níhi nɛ ngɛ nɔ yae nɛ Malawi kpɔ mi nɔ hyɛli kɛ baa a sisi kɛ jeɔ Chichewa gbi mi kɛ yaa Blɛfo gbi mi. Gbɔkuɛ ko nɛ i ngɛ amaniɛ bɔmi ɔ eko sisi tsɔɔe ɔ, i fo ya ngɛ yi wu tso níhi nɛ a ngɛ wa nyɛmimɛ ɔmɛ pee ɔ he je. * Se benɛ i na bɔ nɛ a ngɛ anɔkuale yee nɛ a hɛɛ a hemi kɛ yemi ɔ mi, nɛ a fĩ si ha a, e wo mi he wami wawɛɛ.​—2 Kor. 6:4, 5.

Wa pee nɔ́ fɛɛ nɔ́ nɛ wa ma nyɛ konɛ nyɛmimɛ nɛ a ngɛ Malawi loloolo kɛ nyɛmimɛ nɛ a tu fu kɛ ho Mozambique ya a, a nine nɛ su Baiblo kasemi womihi a nɔ. Chichewa ji gbi nɛ nihi hiɛhiɛɛ tuɔ ngɛ Malawi. Nihi nɛ a tsɔɔ gbi sisi kɛ yaa Chichewa mi ɔ hia kɛ ya hi nyɛminyumu ko e ngmɔ agbo ko mi ngɛ Zimbabwe. E ma wehi kɛ ɔfisihi kɛ ha mɛ. Lejɛ ɔ ji he nɛ a ya tsa ní tsumi nɛ he hia wawɛɛ nɛ ji Baiblo kasemi womihi a sisi tsɔɔmi ɔ nɔ ngɛ.

Wa to blɔ nya konɛ kpɔ mi nɔ hyɛli nɛ a ngɛ Malawi ɔ nɛ a ya kpe ngua nɛ a peeɔ daa jeha a ngɛ Chichewa gbi mi ngɛ Zimbabwe ɔ. Ke a ya Zimbabwe ɔ, a nine suɔ kpe ɔ munyu tumi he womi ɔmɛ a nɔ. Ke a kpale kɛ ya Malawi ɔ, a bɔɔ mɔde nɛ a kɛ nyɛmimɛ ɔmɛ susuɔ kpe ɔ mi munyu ɔmɛ a he. Jeha ko nɛ kpɔ mi nɔ hyɛli nɛ ɔmɛ nɛ a ngɛ kã a ya Zimbabwe ɔ, wa to Matsɛ Yemi Sɔmɔmi Sukuu he blɔ nya kɛ ha mɛ konɛ a kɛ wo mɛ he wami.

Ngɛ February jeha 1975 ɔ mi ɔ, i ya slaa Odasefohi nɛ a je Malawi nɛ a tu fo kɛ ho Mozambique sito hehi ya a. I ya na kaa nyɛmimɛ nɛ ɔmɛ kɛ blɔ tsɔɔmi ehe nɛ Yehowa asafo ɔ kɛ ha a ngɛ ní tsue, nɛ a kɛ blɔ tsɔɔmi ehe nɛ a kɛ ha kaa nikɔtɔmahi a kuuhi nɛ a hyɛ asafo ɔ nɔ ɔ ngɛ ní tsue hulɔ. Asafo mi nikɔtɔma amɛ to blɔ nya nɛ a kɛ nyɛmimɛ ɔmɛ susuɔ ligbi ɔ ngmami ɔ he, a tuɔ magbɛ nɔ munyuhi nɛ a kaseɔ Hwɔɔmi Mɔ ɔ, nɛ a peeɔ kpɔ mi kpehi hulɔ. Bɔ nɛ a to níhi a blɔ nya ngɛ sito he ɔ ngɛ kaa bɔ nɛ a toɔ níhi a blɔ nya ngɛ kpe sisi ɔ. A ngɛ nihi nɛ a hyɛɛ lejɛ ɔ dlami kɛ niye ní gbami nɔ, kɛ nihi nɛ a hyɛɔ konɛ nyɛmimɛ ɔmɛ nɛ a pee slɔkee. Yehowa jɔɔ nyɛmimɛ nyumu nɛ ɔmɛ nɛ a nyɛ nɛ a tsu ní tsumi babauu. Enɛ ɔ wo mi he wami wawɛɛ nitsɛ.

Maa pee jeha 1979 ɔ mi ɔ, nyɛmimɛ nɛ a ngɛ Malawi ɔ ba je Zambia ní tsumi kɔni ɔ nɔ hyɛmi sisi. Se loloolo ɔ, i susuɔ nyɛmimɛ ɔmɛ nɛ a ngɛ Malawi ɔ a he wawɛɛ, nɛ i sɔleɔ kɛ haa mɛ, nɛ nyɛmimɛ kpahi hu peeɔ jã. I piɛɛ Asafo ɔ Ní Tsumi Kɔni ɔ Ajla Toli nɛ a ngɛ Zimbabwe ɔ he. Enɛ ɔ he ɔ, behi fuu ɔ, i kɛ asafo ɔ ní tsumi yi ɔ nane mi dali kɛ nyɛmimɛ nyumuhi nɛ a nyɛɛɔ ní tsumi ɔ hɛ mi ngɛ Malawi, South Africa, kɛ Zambia a  kpeɔ. Be fɛɛ be nɛ wa maa kpe ɔ, wa biɔ ke: “Anɛ nɔ́ kpa ko hu ngɛ nɛ wa ma nyɛ maa pee kɛ ha nyɛmimɛ nɛ a ngɛ Malawi ɔ lo?”

Jeha komɛ a se ɔ, yi mi wami ɔ nya ba si bɔɔ. Nyɛmimɛ nɛ a tu fo kɛ je Malawi ɔ bɔni a se kpalemi, nɛ a ti nihi nɛ a tlɔ ma a mi ɔ hu ɔ, a wɛ mɛ yi mi kaa be ko nɛ be ɔ, nɛ a he jɔ mɛ bɔɔ. Bɔɔbɔɔbɔɔ ɔ, mahi nɛ a bɔle Malawi ɔ je nya tsimi nɛ a kɛ fɔ Yehowa Odasefohi a nɔ ɔ, nɛ a nyɛɔ nɛ a fiɛɛɔ nɛ a peeɔ asafo mi kpehi. Ngɛ jeha 1991 ɔ mi ɔ, Mozambique hu pee jã nɔuu. Se wa bi wa he ke: ‘Mɛni be po nɛ a ma je nya tsimi ɔ ngɛ Yehowa Odasefohi nɛ a ngɛ Malawi ɔ a nɔ?’

A tsake ma kudɔmi blɔ nya tomi ɔ ngɛ Malawi, lɔ ɔ he ɔ, ngɛ jeha 1993 ɔ mi ɔ, amlaalo ɔ je nya tsimi ɔ ngɛ Yehowa Odasefo ɔmɛ a nɔ. Be bɔɔ se ɔ, i kɛ ma se sane kpakpa fiɛɛlɔ ko ngɛ ní sɛɛe nɛ e bi mi ke, “O maa suɔ nɛ o kpale kɛ ya Malawi lo?” Jamɛ a be ɔ mi ɔ, i ye jeha 59, lɔ ɔ he ɔ, i ha lɛ heto ke, “Dɛbi, i wa tsɔ!” Se jamɛ a ligbi ɔ nɔuu ɔ, wa nine su sɛ womi nɔ kɛ je Blɔ Tsɔɔmi Ajla Toli ɔmɛ a ngɔ kaa waa kpale kɛ ya Malawi.

Wa bua jɔ ní tsumi nɛ wa ngɛ tsue ngɛ Zimbabwe ɔ he, enɛ ɔ he ɔ, e he wa ha wɔ kaa wa maa je lejɛ ɔ. Wa ná huɛmɛ kpakpahi fuu ngɛ lejɛ ɔ, nɛ enɛ ɔ ha nɛ wa bua jɔ wawɛɛ. Blɔ Tsɔɔmi Ajla Toli ɔmɛ de wɔ kaa ke wa suɔ nɛ waa hi Zimbabwe ɔ, wa ma nyɛ maa hi lejɛ ɔ. Jinɛ wa ma nyɛ maa mwɔ wa yi mi kpɔ kaa wa maa hi Zimbabwe. Se i kai Abraham kɛ Sara. Jinɛ a ngɛ mɛ nitsɛmɛ a we mi, nɛ nɔ́ ko hia we mɛ, nɛ a wa ngɛ jeha mi hulɔ, se a bu Yehowa blɔ tsɔɔmi tue nɛ a hia kɛ je lejɛ ɔ.​—1 Mose 12:1-5.

Wa ma wa juɛmi nya si kaa waa kɛ blɔ tsɔɔmi nɛ Yehowa asafo ɔ kɛ ha wɔ ɔ ma tsu ní, lɔ ɔ he ɔ, wa kpale kɛ ho Malawi ya ngɛ February 1, 1995. Kɛ je kekleekle be nɛ wa ya Malawi kɛ ba si be nɛ wa kpale kɛ ya lejɛ ɔ ekohu ɔ, e peeɔ jeha 28 pɛpɛɛpɛ. A to Asafo ɔ Ní Tsumi Kɔni ɔ Ajla Toli a kuu sisi, nɛ i kɛ nyɛmimɛ nyumu kpahi enyɔ lɛ ngɛ kuu ɔ mi. Amlɔ nɔuu nɛ wa bɔni Yehowa asafo ɔ níhi a he blɔ nya tomi ekohu.

Yehowa jɔɔ ní tsumi ɔ nɔ, nɛ e ya hɛ mi mlamlaamla! Kɛ je jeha 1993 kɛ ya si jeha 1998 ɔ, fiɛɛli a yibɔ ya hɛ mi kɛ je 30,000 kɛ ya su 42,000. * Blɔ Tsɔɔmi Ajla Toli ɔmɛ kplɛɛ nɔ kaa a ma asafo ɔ ní tsumi kɔni ehe, konɛ a kɛ tsu hiami nɛ ngɛ zugba kpɔ ɔ mi ɔ he ní. Enɛ ɔ he ɔ, wa he zugba nɛ e klemi maa su eka (acre) 30 ngɛ  Lilongwe, nɛ a hla mi kaa ma piɛɛ nyɛmimɛ nɛ a maa hyɛ tsu mami ní tsumi ɔ nɔ ɔ a he.

Nyɛminyumu Guy Pierce nɛ e piɛɛ Blɔ Tsɔɔmi Ajla Toli ɔmɛ a he ɔ jɔɔ asafo ɔ tsu ehe nɛ ɔmɛ a nɔ ngɛ May 2001 ɔ mi. Odasefohi nɛ a ngɛ Malawi nɛ a ya ní peemi ɔ hiɛ pe akpe enyɔ, nɛ a kpɛti nihi fuu ji nihi nɛ a baptisi mɛ jeha 40 kɛ se. A wa nyɛmimɛ anɔkualetsɛmɛ nɛ ɔmɛ yi mi wawɛɛ jehahi babauu ngɛ nya tsimi ɔ mi, se a fĩ si. A be nɔ́ ko tsɔ mohu lɛɛ, se a ngɛ hemi kɛ yemi wawɛɛ, nɛ huɛ bɔmi kpakpa ngɛ a kɛ Yehowa a kpɛti. Benɛ a ngɛ si slaae ngɛ Betel ehe nɛ a ma ha mɛ ɔ mi, a bua jɔ wawɛɛ, nɛ a ngɛ Matsɛ Yemi la amɛ lae ngɛ a je gbi mi. Enɛ ɔ ha nɛ ye bua jɔ ní peemi ɔ he wawɛɛ, nɛ ye hɛ be nɔ jee. Enɛ ɔ tsɔɔ kaa Yehowa jɔɔ nihi nɛ a kɛ anɔkuale yemi fĩɔ si ngɛ kahi a mi ɔ.

Benɛ a ma asafo ɔ ní tsumi kɔni ɔ ta a, i ná he blɔ kaa ma jɔɔ Matsɛ Yemi Asahi a nɔ. Ye bua jɔ ní tsumi nɛ ɔ he wawɛɛ. Asafo ɔ to blɔ nya kaa a ma Matsɛ Yemi Asahi ngɛ mahi nɛ a be sika tsɔ ɔ a nɔ, nɛ nyɛmimɛ nɛ a ngɛ Malawi ɔ ná blɔ nya tomi nɛ ɔ he se. Be ko nɛ be ɔ, asafo komɛ kpeɔ ngɛ gbahi a sisi. A kɛ nga nɛ buɔ gba a yi, nɛ a kɛ bɛntsi maa sisi nɛ a hiɔ nɔ. Amlɔ nɛ ɔ, nyɛmimɛ ɔmɛ tsuɔ ní wawɛɛ kɛ sãa bliikisi kɛ maa tsuhi nɛ a ngɛ fɛu, nɛ a yaa asafo mi kpehi ngɛ mi. Se loloolo ɔ, nyɛmimɛ ɔmɛ a bua jɔ bɛntsi ɔ he ejakaa a le kaa a ma nyɛ maa tsɛ̃ kɛ ya nɛ nɔ ko nɛ hi a kasa nya!

Ye bua jɔ hu kaa Yehowa ye bua nyɛmimɛ ɔmɛ nɛ a ya hɛ mi ngɛ mumi mi. Jehanɛ hu ɔ, ye bua jɔ bɔ nɛ nyɛmimɛ nihewi nɛ a ngɛ Afrika a ngɔ a he kɛ ha nɛ a kaseɔ níhi nɛ Yehowa asafo ɔ tsɔɔ mɛ ɔ mlamlaamla nɛ a kɛ tsuɔ ní ha a he. Enɛ ɔ ha nɛ a nyɛɔ nɛ a tsuɔ blɔ nya ní tsumihi fuu a he ní ngɛ Betel kɛ a we asafo ɔmɛ a mi. Nihi nɛ a hla mɛ kaa kpɔ mi nɔ hyɛli ehehi ngɛ Malawi nɛ a ti nihi fuu sɛ gba si himi mi ɔ hu wo asafo ɔmɛ he wami. E ngɛ mi kaa ke nihi sɛ gba si himi mi ɔ, a weku li kɛ nihi fuu hyɛɔ blɔ kaa a fɔ mohu lɛɛ, se nyɛmimɛ nɛ ɔmɛ ma a juɛmi nya si kaa a be fɔe ngɛ Satan je nɛ ɔ mi konɛ a nyɛ nɛ a tsu babauu ngɛ Yehowa sɔmɔmi mi.

Benɛ i sɔmɔ jeha 52 ngɛ Afrika a se ɔ, hiɔ bɔni ye nya gbami. Asafo ɔ Ní Tsumi Kɔni ɔ Ajla Toli nɛ a ngɛ Malawi ɔ ma nya si kaa wa ya sɔmɔ ngɛ Britain, nɛ Blɔ Tsɔɔmi Ajla Toli ɔmɛ kplɛɛ nɔ. Wa hyɛ we blɔ kaa wa maa je ní tsumi nɛ wa bua jɔ he wawɛɛ ɔ he, se Britain Betel weku ɔ ngɛ wa nɔ hyɛ saminya ngɛ wa bwɔmi si nɛ ɔ.

I ngɛ nɔ mi mami kaa blɔ nɛ i ha nɛ Yehowa tsɔɔ mi ɔ ji yi mi kpɔ nɛ he hia pe kulaa nɛ i mwɔ ngɛ ye si himi mi. Kaa i ngɔ ye hɛ kɛ fɔ nɔ́ nɛ i susu kaa i le ɔ nɔ ɔ, jinɛ be nɛ ɔ mi ɔ, jije i ngɛ? Yehowa le nɔ́ nɛ he hia mi, nɛ e ‘tsɔɔ mi blɔ nɛ da.’ (Abɛ 3:5, 6) Benɛ i ji niheyo ɔ, i ná he blɔ nɛ i kase níhi fuu ngɛ ní tsumi ngua ko mi. Se ngɛ lɔ ɔ tsuo se ɔ, ní tsumi nɛ Yehowa asafo ɔ ha mi ɔ ha nɛ ye tsui nɔ ye mi wawɛɛ. I na kaa benɛ i ngɔ ye be tsuo kɛ sɔmɔ Yehowa ngɛ ye nihe mi ɔ, i ngɛ bua jɔmi wawɛɛ, nɛ amlɔ nɛ ɔ nɛ i bwɔ nɛ i ngɛ jã pee ɔ hu ɔ, i nuɔ he jã nɔuu!