Iñche choyüngen 1935 tripantu Darlaston huaria Inglaterra mapu mu. Cheu ñi tremün iñche mülefui fentren fitrun fabrica mu tripaquelu. Meli tripantu nielu iñche tañi pu chau eluhuingu ñi chillcatual Biblia pu Dunguquelu Ineingen Jehová engün. Nielu 14 tripantu püle piuquentucufiñ ti rüf dungu. Feimu 1952 tripantu fautizahun, niefun 16 tripantu.

Pichi rupalu tañi fautizahun, eluhun ñi cüdahual quiñe fütra fabrica mu. Pepicahun tañi elungeal quiñe falin cüdau tati fabrica mu. Rume ayühuelquefeneu tañi cüdau.

Ti huitran-ngepaquechi loncolelu mangeleneu tañi adnieafiel ti chillcatun Biblia femngequelu tañi trahunche mu Willenhall huaria mu. Cüdautufun ñi dullial chem tañi chumal. Feichi mu amuquefun epu trahunche mu. Tañi cüdau camapulefui tañi ruca meu. Feimu semana mu amuquefun quiñe trahunche püllelelu tañi cüdau mu. Huelu fin de semana mu amuquefun quiñe trahunche püllelelu tañi ruca mu.

Iñche rume ayüfiñ tañi cüdau. Huelu doi ayüfun ñi quelluntucuafiel Jehová tañi troquiñche. Feimu elcünun tañi cüdau ca eluhun ñi femal tañi feipieteu ti huitran-ngepaquechi loncolelu. Eluhun tañi adnieaeteu Jehová, feimu cümelcaeneu com tañi mongen meu. Turpu huiño huitraulayafun tañi dulliel meu.

Petu amulu feichi trahunche fülcülefulu tañi cüdau meu, quimfiñ quiñe domo müna piuqueyefilu ta Jehová, Anne pingefui. Niehuiyu 1957 tripantu mu. Fillque cüdau femquefuyu tayu cüdahuelafiel ta Jehová: precursorado regular, precursorado especial, mangelngeyu tayu huitranmeafiel fillque trahunche ca cüdahuiyu Betel mu. Com tañi mongen mu Anne elueneu ayühun.

Mangelngeyu 1966 tripantu mu tayu amual Galaad pingechi escuela mu. Huercüngeyu Malaui mapu mu, África mu mülelu. Üye mu pu che rume poyechefengei. Turpu raquiduamlafuyu tayu pichiñmayal feichi mapu meu.

Puhuiyu ta Malaui 1 conchi febrero 1967 tripantu mu. Tati hunen cüyen com antü quimeltungeyu Malaui ñi quehun dungu. Fei eluhuiyu tayu huitranmeafiel fillque trahunche. Niefuyu quiñe fütra camioneta, feimu tati pu che feipieyumu: “Cheu rume miyahuafuimu, leufü mu cütu”. Huelu feingelai tati. Pepi nolayafuyu alüconchi co mu. Quiñeque mu umaquefuyu cüni ruca mu. Ca tayu cülchafnoal, tuculelquefuyu quiñe naylon. Hue misionerongefuyu iñchiu, feimu müna cüdaungefui rupayal tüfachi dungu mu, huelu müna ayühuelqueyumu tayu cüdau.

Abril cüyen mu, quimtucun ñi rupayal huesaque dungu Malaui mapu mu. Radio mu allcün quiñe hueupin ñi feipiel Hastings Banda, fei tüfa tati presidente Malaui mu. Feipi ñi culliquenon impuesto pu Dunguquelu Ineingen Jehová ca ñi chaftuquefiel ti gobierno. Huelu re coila tati. Rüfcünu tati gobierno ayüquelai taiñ conquenon politica dungu meu, doyelchi mai taiñ ngillaquenon feichi tarjeta nüucülelu partido politico mu.

Septiembre cüyen mu, tati diario meu ti presidente feipi taiñ pu peñi ca pu lamngen ñi pofolcachequen fill püle. Fei hula ca feipi tañi gobierno fillque dungu femai ñi catrütuafiel pu Dunguquelu Ineingen Jehová. Fei 20 conchi octubre 1967 tripantu catrütungei taiñ cüdau. Pichiñma mu fillque soltau acui ñi cerrantucuafiel Betel ruca ca ñi quechanentuafiel pu misionero Malaui mu.

Presuntucungeyu cüla antü, fei hula huercüngeyu Mauricio mapu mu. Üye mu tati autoridad elulaeyumu tayu misionerongeal. Feimu  pu peñi huercüeyumu Zimbabue mapu mu, feichi mu Rodesia pingefui. Üye mu quiñe huesa soltau ayülafui tayu conal Zimbabue mu, feipieyumu: “Eimu quechanentungeimu Malaui mu ca elungelaimu tamu mülenagal Mauricio mapu mu. Fei mülepaimu ngenon mu cangelu”. Fei Anne eluhui ñi ngümayal, fill püle quechanentungeyu. Feichi mu, ayüfun ñi elcünual com ca huiñotual ñi mapu mu. Pu autoridad elueyumu ñi umañpual Betel ruca mu. Huelu feipingeyu pulihuen mu ñi amual tañi cuartel mu. Ürcülefuyu, huelu fentecünulayu tayu maneluucülen Jehová mu. Rupan antü mu, elungeyu ñi mülenagal Zimbabue mapu mu. Chumcaunorume ngüyünentulayan Chau Jehová tayu adnieteu.

Conün mu tati Betel Zimbabue mu elfalcünungen ñi quelluntucual ti Troquiñche Adcünuquelu ti Amuldungun. Tati troquiñche ngüneduamquefingün pu peñi ca pu lamngen Malaui ca Mozambique mapu mu. Jehová ñi pu che caiñetuniengei Malaui mapu mu. Tañi cüdau mülefui ñi rulpadunguafiel chem ñi piel pu huitran-ngepaquechi loncolelu Malaui mu. Quiñe pun cüdaumequelu iñche, eluhun ñi ngümayal quimün mu tañi rume huesa rupamequen tañi pu peñi ca pu lamngen. a Pefiel mu tañi maneluucülen engün Jehová mu yafültucueneu (2 Cor. 6:4, 5).

Iñchiñ com taiñ nehuen mu cüdahuiyiñ. Femngechi taiñ pu peñi ca pu lamngen Malaui ca Zimbabue mu niefuingün com tañi duamnieel ca tañi hueniyeafiel Chau Jehová. Pu rulpadunguquelu chichewa quehun mu yengeingün quiñe lelfün Zimbabue mapu mu. Üye mu quiñe cüme peñi deumalelfi quiñeque ruca ca oficina. Femngechi amulerpui ti rulpadungun.

Iñchiñ cüme adcünuiñ com ti dungu tati pu huitran-ngepaquechi loncolelu Malaui mu ñi amual ti fütra trahun fill tripantu Zimbabue mapu mu. Quisu engün elungeingün tati fillque hueupin tati fütra trahun mu. Huiñometulu engün Malaui mapu mu, quimeltufingün com tañi pu lamngen ca peñi ñi elungeel ti fütra trahun mu. Quiñe tripantu Zimbabue mu pepicangei quiñe escuela ñi pepicangeal pu loncolelu ca pu quelluquelu. Ca mangelngei pu huitran-ngepaquechi loncolelu tañi yafültucungeal engün.

Febrero cüyen mu 1975 tripantu amun ta Mozambique ñi pemeafiel pu peñi ca pu lamngen lefmaulu Malaui mapu mu. Üye mu tañi pu peñi ca pu lamngen rume cüme inanieingün ti hueque dungu cütu ñi quimeltuel Jehová tañi troquiñche. Pu loncolelu cütu pepicaucüleingün ñi cüme yenieal ti hue dungu. Pu hue loncolelu cütu pepicaingün ñi hulal cümeque hueupin ñi cüme inaduamal ti texto diario ca Ti Huerquen. Ca pepicafingün ti fütraque trahun. Ca pepicangei pu peñi ca pu lamngen ñi müleal engün quiñe fütra trahun reque, cheu ñi mülen ti liftual ti ruca, cheu ñi hulal iyael ca cheu ñi cuñiutucungeal pu che. Tüfachi pu peñi müna cüme femingün Jehová ñi quellun mu. Huiñotulu iñche, ñi pefiel ñi cüme amulen engün yafültucueneu.

Epe puulu 1980 tripantu, Zambia eluhui ñi quelluafiel pu peñi ca pu lamngen Malaui mu. Huelu iñche piuquentucuniefiñ engün ca llellipuniefiñ Chau Jehová quisu engün mu. Fentren pu peñi ca femngechi femqueingün. Iñche coneltulefun ti Troquiñche Adcünuquelu ti Betel Zimbabue mu. Feimu lle fentren rupa trahuquefuiñ taiñ peñi engün. Tüfachi pu peñi tuhuingün central mundial, Malaui, Sudáfrica ca Zambia mu. Huelu ramtuuqueiñ: “¿Ca chem chumafuiñ taiñ pu peñi Malaui mu mülelu?”.

Rupachi tripantu mu taiñ pu peñi ca pu lamngen ñochiquechi inantucungehuelai. Taiñ pu peñi ca pu lamngen lefmaulu engün, huelu tüfa hula ñochiquechi huiñotuingün. Quiñequentu mülenaglu, tüfa hula nehuencontuingün. Fillque pais doi fülcülelu elufingün ñi huiño amuldungual taiñ pu peñi ca pu lamngen ca ñi trahuluhual,  fei catrütuhuelafingün. Mozambique ca femngechi femi 1991 tripantu mu. Huelu iñchiñ ramtuuqueiñ: “¿Chem antü am pu Malaui che lifreleaingün ñi poyeafiel ta Jehová?”.

Rupachi tripantu mu Malaui mu doi cüme dungu mületui. 1993 tripantu mu taiñ pu peñi ca pu lamngen tüngcüleingün ñi poyeafiel ta Jehová. Quiñe misionero engu nütramcahuiyu, fei ramtueneu: “¿Huiñoafuimi Malaui mu?”. “Femlayafun, 59 tripantu nien, rume füchan” feipifiñ. Huelu feitichi antü mu müten tati Troquiñ Adniechequelu mangeleneu tañi huiñotual.

Rume ayüquefuyu tayu cüdau Zimbabue mu. Fei cüdautuyu tayu chem femal. Ayüucülefuyu ca niefuyu cümeque hueni Zimbabue mu. Ti Troquiñ Adniechequelu feipieiñmu: “Ayüfuimu tamu mülenagal, mülenagafuimu”. Femngechi femfule, cüdautulayafuyu tayu mülenagal. Huelu raquiduamtucun Abrahán ca Sara. Füchalu rume engu, elcünuingu tañi ruca ñi feyentuafiel ta Chau Jehová (Gén. 12:1-5).

Eluhuiyu ñi adnieaeteu Jehová. 28 tripantu rupalu, 1 febrero 1995 tripantu mu huiñotuyu Malaui mu. Feimu pepicangei ñi müleal quiñe Troquiñche Adcünuquelu Betel ruca. Epu peñi ca iñche coneltuleiñ ñi cüdahual. Fei pürüm pepicaiñ ñi cüdahual Chau Jehová ñi pu che.

Jehová ñi duam mu alün-ngerpui ti troquiñche, rumeñma ayühueleneu. 30.000 amuldunguquelu mülefui 1993 tripantu mu. Huelu 1998 tripantu mu, doi mai 42.000 amuldunguquelu mülerpui. b Ti Troquiñ Adniechequelu eluhui ñi müleal ca quiñe Betel ñi eluafiel chem ñi duamnieel taiñ pu peñi ca pu lamngen. Fei ngillaiñ 12 hectarea Lilongüe mapu mu. Iñche üitungen ñi adcünuafiel ti hue ruca.

Tañi peñi Guy Pierce huli quiñe falin hueupin tañi chalintucuafiel ta Jehová ti hue Betel mayo cüyen 2001 tripantu mu. Feitichi peñi coneltulefui Troquiñ Adniechequelu. 2.000 che Malaui mu allcüingün ti hueupin. Epe com engün yenieingün ñi fautizahun 40 tripantu. Pütrün tripantu cutrancahuingün ñi inantucungen mu. Rume pofrelequefuingün, huelu rume maneluucüleingün Jehová mu ca mucüfcülei tañi  feyentun engün. Com ti pu che rumeñma ayüucüleingün tañi inaduamün mu ti hue Betel. Cheu ñi amulen engün Betel mu ülcantumequefingün ta Jehová ti africano ül reque. Pefiel mu tüfachi dungu rüf ayühuelpiuqueeneu. Tüfa mu pengeleneu chumngechi quelluquefi Jehová tati yafüluucülelu rupan mu huesaque dungu mu.

Deulu ñi deumangeel ti Betel, elungen quiñe cüdau ñi hulal fillque hueupin chalintucungelu ti hueque Trahunhue Ruca. Jehová ñi pu troquiñche pürüm pepicahuingün ñi deumayal Trahunhue Ruca cheu ñi mülen taiñ pu peñi ca pu lamngen pofrengelu. Feimu lle deumangei fillque Trahunhue Ruca Malaui mu. Cuifi mu trahuquefuingün quiñe cüni ruca mu ca quiñe fütraque huancu deumangelu fotra mu. Taiñ pu peñi ca pu lamngen ayühunquechi deumangeingün ladrillo ñi deumayal ayüfalngechi Trahunhue Ruca. Quisu engün ayüquelaingün ñi anüpual ti silla mu. Ayüleingün ñi anüpual feitichi fütraque huancu mu müten. Pütrün che anüpuingün feitichi fütraque huancu mu piqueingün.

Rume ayühuelqueneu chumngechi Jehová quelluquefi ti pu che ñi cüme cristianongerpual. Afmatuquefiñ tati pu huecheque peñi África tuulu. Ayühunquechi coneltuqueingün ñi cüdahual. Mütai müten quimtucuqueingün chumngechi ñi pepicangen Jehová ñi pu troquiñche ca rume cüme puuqueingün cüdau mu. Feimu lle doi cüdau elungeingün Betel mu ca ti trahunche mu. Tati pu huitran-ngepaquechi loncolelu cüpalu Malaui mu yafültucufi tati pu trahunche. Fentren pu huitran-ngepaquechi loncolelu nieingün domo. Pütrün che ca tañi pu reñma ayüniefuingün ñi nieal püñeñ engu. Huelu tüfachi pu curehuen nielaingün püñeñ tañi doyelchi mai cüdahuelafiel ta Jehová.

Mülepun 52 tripantu África mu, huelu cutranün. Feimu ti Troquiñ Adniechequelu huercüeneu ñi amual Betel Gran Bretaña mu. Hueñancünagiyu tayu elcünual ti falinque cüdau. Pu peñi ca pu lamngen Gran Bretaña mu rume cüme dapinieiñmu taiñ cümelcaleal.

Eluhun Jehová tañi adnieaeteu tañi mongen, rume cümelcaeneu. Quisu maneluufuli, cheu müleafun chi. Jehová quimniei chem ñi duamnieel iñche tañi nor miyahual (Prov. 3:5, 6). Huechengelu iñche ayüquefun ñi quimal chem cüdau femngequei quiñe fütra empresa meu. Huelu Jehová tañi troquiñche mu elungen fillque cüdau tañi ayühuelqueteu. Cuifi, famülque mu ca cüpalechi antü meu falintunieafiñ tañi cüdahuelquefiel Jehová. Tüfaque ta rume ayühuelqueneu.