Mon ti ne an 1935 dan lavil Darlaston. Sa lavil i form parti en rezyon Langleter ki apel Black Country. Sa rezyon ti ganny son non apre sa lafimen nwanr ki bann lizin laba ti large e kouver sa landrwa. Ler mon ti annan apepre kat-r-an, mon paran ti konmans etidye Labib avek Temwen Zeova. Dan mon bann 14 a 15 an, mon ti konvenki ki sa ti laverite e an 1952, a laz 16 an mon ti batize.

Dan apepre sanmenm sa bann letan, mon ti vin en apranti dan en gran lizin ki fer zouti ek pyes pour transpor. Mon ti konmans ganny formen konman en sekreter dan sa lakonpannyen e mon ti vreman kontan sa travay.

Me apre mon ti bezwen fer en desizyon enportan. Sirveyan rezyonal ti envit mwan pour konmans kondwir Letid Liv Kongregasyon dan renyon lasemenn dan kongregasyon Willenhall. Sa pa ti pou fasil parski sa letan, mon ti asiste bann renyon dan de kongregasyon. Pandan lasemenn, mon ti asiste renyon dan sa kongregasyon ki ti pli pros avek landrwa kot mon ti travay an Bromsgrove, ki ti apepre 32 kilomet avek mon lakour. Ler mon ti al kot mon paran dan wikenn, mon ti asiste renyon dan kongregasyon Willenhall.

Vi ki mon ti anvi siport lorganizasyon Zeova, mon ti aksepte lenvitasyon sirveyan rezyonal menm si sa ti vedir ki mon ti pou bezwen kit sa travay ki mon kontan. Mon pa’n zanmen regret sa desizyon pour les Zeova gid mwan parski sa in permet mwan pour annan en lavi ki gou.

Ler mon ti pe asiste renyon dan kongregasyon Bromsgrove, mon ti zwenn en zoli ser. Sa ser i apel Anne e i ti pe konsantre lo servi Zeova. An 1957, nou ti marye e ansanm nou’n fer diferan servis parey pionye ordiner, pionye spesyal, sirveyan rezyonal e servi dan Betel. Pandan bann lannen ki’n pase, Anne in fer mwan vreman zwaye.

 An 1966, nou ti kontan pour asiste 42 zyenm laklas Lekol Gilead. Nou ti ganny demande pour al servi Malawi, en landrwa kot dimoun i zantiy e kontan akey lezot. Nou pa ti ekspekte ki nou pa ti pou kapab reste laba pour bokou letan.

Nou ti ariv Malawi le 1 Fevriye 1967. Dan sa premye mwan, nou ti pas laplipar nou letan pe aprann langaz sa pei e apre nou ti konmans vizit bann kongregasyon konman sirveyan distrik. Nou ti annan en Kaiser Jeep, en transpor ki serten ti krwar i kapab vwayaz partou menm dan larivyer. Me sa pa ti leka, nou ti kapab vwayaz zis dan bann larivyer ki pa tro fon. Parfwa nou ti reste dan bann pti lakaz ki ti ganny fer avek labou. Sa bann lakaz ti ganny kouver avek lapay e pandan sezon lapli, nou ti bezwen met en prela pour ki lapli pa tonm anndan. Sa pa ti en bon fason pour konmans nou servis misyonner me nou ti vreman kontan nou servis.

An Avril, mon ti realize ki avek letan nou ti pou ganny problenm avek gouvernman. Mon ti’n tann en diskour ki Dr. Hastings Banda ki prezidan Malawi, ti’n fer. Dan son diskour, i ti dir ki Temwen Zeova pa ti pey taks e ki zot ti enterfer avek politik. Byensir sa pa ti vre. Nou tou nou ti konnen ki gouvernman pa ti kontan ki nou pa ti pran kote dan bann zafer politik e ki nou ti refize aste bann kart pour vin manm en parti politik.

An Septanm, nou ti lir dan zournal ki prezidan ti’n dir ki Temwen Zeova ti pe fer problenm partou. Dan en miting politik, prezidan ti anonse ki son gouvernman ti pou byento enterdi larelizyon Temwen Zeova. Sa ti arive le 20 Oktob 1967. Pa bokou letan pli tar, lapolis ek zofisye imigrasyon  ti vin ferm Biro Brans Temwen Zeova e fer bann misyonner kit sa pei.

Apre trwa zour dan prizon, nou ti ganny anvoye Moris, ki ti en koloni Angle. Me gouvernman pa ti les nou reste Moris konman bann misyonner. Alor nou ti ganny anvoye Rhodesia (ki aprezan i apel Zimbabwe). Ler nou ti ariv laba, nou ti zwenn en zofisye imigrasyon ki ti dominer e i ti refize les nou antre dan pei. I ti dir: “Zot in ganny pouse Malawi. Zot pa’n ganny permisyon pour reste Moris e aprezan zot in vin isi parski sa i pli fasil pour zot.” Anne ti konmans plere. I paret ki personn pa ti oule nou! A sa moman, mon ti anvi retourn Langleter. Apre en pe letan, bann zofisye imigrasyon ti les nou reste en nwit kot Biro Brans Temwen Zeova me zot ti dir nou ki nou ti pou bezwen vin kot zot son lannmen. Nou ti fatige me nou ti kontinyen espere e vwar ki mannyer Zeova ti pou ed nou. San ekspekte son lannmen apremidi nou ti ganny permisyon pour reste Zimbabwe konman bann viziter. Mon pa pou zanmen oubliye ki mannyer mon ti santi sa zour. Mon ti asire ki Zeova ti pe gid nou.

Dan Betel Zimbabwe, mon ti ganny demande pour travay dan Departman Servis, dan seksyon ki pran swen avek bann kongregasyon Malawi ek Mozanbik. Bann frer ek ser Malawi ti pe ganny en kantite persekisyon. Enn bann keksoz ki mon ti fer i tradwi bann rapor ki bann sirveyan rezyonal Malawi ti anvoy Betel. En zour swar ler mon ti pe travay ziska tar, mon ti plere ler mon ti lir konsernan sa kantite vyolans ki mon bann frer ek ser ti pe eksperyanse. * Zot fidelite, lafwa ek landirans ti vreman ankouraz mwan.​—2 Kor. 6:4, 5.

Nou ti fer tou sa ki nou kapab pour fer sir ki bann frer ek ser ki ti ankor Malawi ek bann ki ti’n kit Malawi e al Mozanbik ti ganny manze spirityel. Sa lekip tradiksyon ki tradwir dan langaz Chichewa, sa langaz ki laplipar dimoun i koze Malawi, ti bouz lo laferm en frer Zimbabwe. Sa frer ti konstrir bann lakour ek en lofis pour zot e zot ti kontinyen fer zot travay enportan pour tradwir bann piblikasyon baze lo Labib.

Nou ti fer laranzman pour bann sirveyan rezyonal Malawi vin Zimbabwe tou le lannen pour zot asiste lasanble dan langaz Chichewa. Ler zot ti laba, zot ti ganny bann plan diskour pour lasanble. Ler zot ti pe retourn Malawi, zot ti fer zot mye pour partaz sa ki zot in aprann avek bann frer ek ser. En fwa ler zot ti vin vizit Zimbabwe, nou ti organiz en Lekol Minister Rwayonm pour ankouraz sa bann sirveyan rezyonal.

An Fevriye 1975, mon ti al vizit serten frer ek ser ki ti’n kit Malawi e al dan bann kan Mozanbik. Sa bann frer ti pe swiv bann dernyen lenstriksyon sorti kot lorganizasyon Zeova e sa ti enkli sa nouvo laranzman pour annan en konsey ansyen. Sa bann nouvo ansyen ti’n organiz en kantite aktivite. Sa ti enkli fer bann diskour piblik, diskit lo teks pour lazournen, fer letid Latour Veyer e menm fer bann lasanble. Zot ti’n organiz bann kan parey zot ti pou organiz en lasanble avek bann departman pour netwaye, distribye manze ek sekirite. Avek benediksyon Zeova, sa bann frer ti’n akonpli en kantite keksoz e apre ki mon ti’n vizit zot, mon ti’n ganny ankouraze.

Ver lafen bann lannen 1970, Biro Brans Temwen Zeova Zanmbya ti konmans pran swen avek bann kongregasyon Malawi. Me kantmenm sa, mon ti kontinyen mazin sa ki ti pe arive Malawi e mon ti priy pour bann frer ek ser laba. Lezot osi ti fer parey. Vi ki mon ti lo Komite Biro Brans Zimbabwe, plizyer fwa mon ti zwenn bann reprezantan biro prensipal Temwen Zeova ansanm avek bann frer ki sorti Malawi, Sidafrik ek Zanmbya. Sak fwa nou ti zwenn nou ti demande, “Kwa ankor ki nou kapab fer pour bann frer ek ser Malawi?”

 Avek letan, bann persekisyon ti diminyen. Dousman dousman, bann frer ek ser ki ti’n kit Malawi ti konmans retournen e bann ki ti’n reste Malawi pa ti pe ganny sitan persekite parey avan. Bann pei ki ti pros avek Malawi ti pe konmans les Temwen Zeova fer predikasyon, zwenn ansanm e zot ti pe retir bann restriksyon ki zot ti’n mete lo Temwen Zeova. An 1991, Mozanbik ti fer parey. Me nou ti mazinen, ‘Kan ki Temwen Zeova Malawi ti pou lib pour servi Zeova zot osi?’

Avek letan, keksoz ti sanze Malawi e an 1993, gouvernman ti aret enterdi Temwen Zeova. Pa bokou letan apre, mon ti koz avek en misyonner e i ti demann mwan, “Eski ou pe retourn Malawi?” Sa letan mon ti annan 59 an alor mon ti dir, “Non, mon tro vye!” Me sa menm zour, nou ti ganny en mesaz sorti kot Konsey Direkter e zot ti demann nou pour retourn Malawi.

Sa ti en desizyon difisil pour nou fer parski nou ti kontan nou servis Zimbabwe. Nou ti kontan Zimbabwe e nou ti annan en kantite bon zanmi. Konsey Direkter ti dir ki nou kapab reste Zimbabwe si nou ti anvi. Alor nou ti’n kapab reste Zimbabwe si nou ti anvi. Me mon ti rapel ki menm si Abraam ek Sara ti aze, zot ti kit zot lakour konfortab pour obei lenstriksyon Zeova.​—Zen. 12:1-5.

Nou ti deside pour swiv gidans lorganizasyon Zeova e le 1 Fevriye 1995, nou ti retourn Malawi. Sa ti egzakteman 28 an apre ki nou ti’n ariv Malawi pour premye fwa. En Komite Biro Brans ti ganny formen e lo sa komite i ti annan mwan ek de lezot frer. Nou pa ti tarde pour konmans organiz bann aktivite Temwen Zeova dan sa pei.

Mon kontan pour vwar lafason ki Zeova in beni sa travay ki pe ganny fer Malawi! Lakantite proklanmater in ogmante sorti 30,000 an 1993 pour al plis ki 42,000 an 1998. * Konsey Direkter in donn laprouvasyon pour fer en nouvo Betel pour nou kapab pran swen avek sa kantite travay ki nou ti annan pour fer. Nou ti aste en bout later 30 arpan Lilongwe e mon ti ganny apwente lo komite konstriksyon.

An Me 2001, Frer Guy Pierce ki ti lo Konsey Direkter ti fer diskour dedikasyon pour sa nouvo batiman. Plis ki de mil Temwen Zeova dan sa pei  ti asiste e laplipar parmi zot ti’n batize pour plis ki 40 an. Pandan bann lannen ki Temwen Zeova ti’n ganny enterdi, sa bann frer ek ser fidel in fer fas avek bokou persekisyon. Zot ti napa bokou larzan me zot ti annan en lafwa for ek en lanmitye pros avek Zeova. Aprezan zot ti vreman kontan pour vizit zot nouvo Betel. Partou kot zot ti ale dan Betel, zot ti sant kantik dan stil Afriken e sa ti en levennman pli spesyal ki mon’n deza eksperyanse. Sa ti montre ki Zeova i beni bann ki reste fidel e andir zot bann problenm.

Apre ki Betel ti’n fini ganny konstrir, mon ti konmans ganny demande pour fer diskour dedikasyon pour bann Lasal Rwayonm e sa ti fer mwan kontan. Bann kongregasyon Malawi ti pe ganny zot Lasal Rwayonm atraver sa laranzman ki lorganizasyon ti’n met an plas pour konstrir bann Lasal Rwayonm vitman. Sa laranzman ti pour bann landrwa kot bann frer ek ser ti napa bokou larzan. Oparavan, serten kongregasyon ti fer renyon anba bann langar ki ti ganny fer avek pye kaliptis. Zot ti kouver sa bann langar avek bann nat ki’n ganny fer avek lapay e zot ti asiz lo bann ban ki’n ganny fer avek labou. Aprezan bann frer ti servi bann blok ki zot ti’n fer dan bann four pour konstrir bann zoli Lasal Rwayonm. Me zot ti prefere met bann ban dan Lasal Rwayonm olye sez parski zot ti dir ki i toultan annan plas pour en lot dimoun lo en ban!

Mon’n osi kontan pour vwar lafason ki Zeova in ed bann dimoun pour vin bann Kretyen matir. Bann zenn frer Afriken ti vreman enpresyonn mwan parski zot ti pare pour ede e zot ti vitman ganny leksperyans atraver formasyon ki lorganizasyon Zeova ti donnen e atraver sa travay ki zot ti fer. Sa ti fer ki zot ti kapab ganny plis responsabilite dan Betel e dan bann kongregasyon. I ti osi annan bann sirveyan rezyonal ki ti ganny apwente e zot ti kapab ankouraz kongregasyon plis. Laplipar sa bann sirveyan ti’n marye e ansanm avek zot madanm, zot ti’n swazir pour fer plis pour Zeova dan plas annan zanfan menm si lezot dimoun ek zot fanmir ti ekspekte ki zot annan zanfan.

Apre 52 an ki mon’n pase Lafrik, mon ti konmans ganny problenm lasante. Biro Brans Malawi ti fer rekomandasyon pour nou retourn Langleter e Konsey Direkter ti donn laprouvasyon. Nou ti vreman dezapwente pour kit sa servis ki nou ti kontan me lafanmir Betel Langleter pe pran byen swen avek nou dan nou vye zour.

Mon asire ki sa pli bon desizyon ki mon’n fer i pour les Zeova gid mwan. Si mon ti’n depan lo mon prop lentelizans, mon lavi ti pou’n vreman diferan. Zeova in toultan konnen ki mon bezwen pour ‘fer drwat mon santye.’ (Prov. 3:5, 6) Ler mon ti ankor zenn, mon ti kontan pour aprann ki mannyer en gran lakonpannyen i marse. Me dan lorganizasyon Zeova mon’n ganny en pli bon karyer. Mon servis pour Zeova ti fer mwan annan en lavi vreman satisfezan e mon ankor santi parey!