Kuv yug xyoo 1935 hauv lub zos Dalaxitees (Darlaston) hauv Nplaj Kharhis (Black Country) uas yog ib thaj tsam nyob hauv teb chaws Askiv. Tau muab thaj tsam no hu ua Nplaj Kharhis los sis teb chaws dub nciab vim lub sij hawm ntawd muaj cov tsev ua hauj lwm uas ncho pa dub nciab nto ntuj plaws. Thaum kuv muaj li plaub xyoos, kuv niam thiab kuv txiv pib kawm Vajlugkub nrog Yehauvas Cov Tim Khawv. Thaum kuv muaj 14 mus rau 15 xyoos, kuv ntseeg tias tej kuv kawm yeej yog qhov tseeb. Ces thaum kuv muaj 16 xyoo, kuv thiaj ua kev cai raus dej.

Lub sij hawm ntawd, kuv pib kawm ua hauj lwm hauv ib lub tsev hauj lwm loj heev uas tsim tej twj kho ub kho no thiab tsim tej khoom ua tsheb. Lawv cob kuv tuav ib tes hauj lwm tseem ceeb uas kuv nyiam heev.

Thaum tus kwv tij uas ncig xyuas cov koom txoos tuaj saib peb lub koom txoos hauv lub zos Vileehos (Willenhall). Nws kom kuv ua tus coj lub Koom Txoos Kev Kawm Vajlugkub. Lub sij hawm no, kuv mus koom ob lub koom txoos. Thaum kuv mus ua hauj lwm ces kuv mus koom lub koom txoos hauv lub zos uas kuv ua hauj lwm Nploxinkauj (Bromsgrove) uas nyob deb li 32 kilumev (20 mais) ntawm peb lub zos. Tiam sis thaum kuv so es rov mus tsev lawd ces kuv mus koom lub koom txoos hauv Vileehos. Vim li no, kuv yuav tau txiav txim siab seb kuv yuav ua li cas.

Vim kuv xav pab Yehauvas lub koom haum, kuv thiaj ua li tus kwv tij uas ncig xyuas cov koom txoos hais txawm kuv yuav tau muab kuv txoj hauj lwm uas kuv nyiam heev tso tseg. Vim kuv cia Yehauvas coj kuv txoj hau kev, kuv thiaj tau ib lub neej uas kuv yeej tsis xav txog lig li.

Thaum kuv tseem mus lub koom txoos Nploxinkauj, kuv ntsib ib tug muam zoo nkauj heev thiab kub siab teev tiam Yehauvas kawg li uas hu ua Es (Anne). Wb sib yuav nyob rau xyoo 1957. Tom qab ntawd, wb kuj tho kev, ua ob tug tho kev tshwj xeeb, ua tus ncig xyuas cov koom txoos, thiab ua hauj lwm hauv Npe-ee. Kuv zoo siab uas muaj Es nyob hauv kuv lub neej.

Xyoo 1966, wb tau mus kawm Kile-a pab 42. Wb raug txib mus rau teb chaws Malavim (Malawi) uas  sawv daws pom tias lawv yog cov neeg Afika siab dawb siab zoo thiab nyiam txais qhua. Wb yeej tsis paub txog tias wb yuav tsis tau nyob ntev.

Wb mus txog hauv Malavim thaum lub 2 Hlis tim 1, xyoo 1967. Wb siv thawj lub hlis los kawm lus. Tom qab ntawd, wb thiaj mus ua tus saib xyuas cheeb tsam. Thaum wb mus, wb caij ib lub tsheb uas neeg hais tias mus tau txhua qhov thiab hla tau dej. Tiam sis thaum wb caij tsis zoo li ntawd, tsuas hla tau tej dej ntiav ntiav xwb. Tej thaud wb so hauv tej tsev av vov nqeeb. Cov tsev no thaum los nag yuav tau rub thav los vov ntxiv sab hauv cov nqeeb xwv thiaj tsis ntub nag. Thaum wb nyuam qhuav mus txog, wb yeej tsis nyiam li. Tiam sis thaum wb swm lawd, wb nyiam heev.

Thaum lub 4 Hlis, kuv hnov tias lub teb chaws muaj kev kub ntxhov. Kuv mloog xov tooj cua thiab hnov tus nom hauv Malavim uas yog Dotawm Haxatees Npadas (Dr. Hastings Banda) tshaj tawm. Nws liam tias Yehauvas Cov Tim Khawv tsis them se thiab tawm tsam tej nom tej tswv. Qhov tseeb, yeej tsis muaj li nws liam ntawd. Peb yeej paub tias qhov teeb meem ces yog vim peb tsis tuaj ib tog twg thiab peb tsis yuav nom tswv cov ntawv uas tuaj ib tog twg.

Thaum lub 9 Hlis, peb tau nyeem tej ntawv xov xwm uas tus nom hauv Malavim tau liam tias peb cov kwv tij tau tsim teeb meem nyob txhua qhov hauv lawv lub teb chaws. Nws tau tshaj tawm rau cov nom tswv tias nws yuav txwv Yehauvas Cov Tim Khawv tes hauj lwm. Lub 10 Hli tim 20 xyoo 1967, lawv thiaj txwv peb tes hauj lwm lawm. Tom qab ntawd, ib co tub ceev xwm nrog ib co neeg saib xyuas cov tuaj txawv teb chaws txawm tuaj muab Npe-ee kaw thiab muab cov tub txib tshaj tawm txawv teb chaws ntiab rov qab.

 Wb nyob tau peb hnub hauv tsev loj cuj. Ces lawv thiaj muab wb xa mus rau ib lub teb chaws uas teb chaws Askiv tswj hu ua Malisam (Mauritius). Tiam sis cov nom tswv hauv teb chaws Malisam tsis pub wb nyob. Yog li ntawd, lub koom haum thiaj kom wb mus rau teb chaws Laudixias (Rhodesia) uas tam sim no yog Zinpaves (Zimbabwe). Thaum wb mus txog, wb mus ntsib ib tug uas saib xyuas cov tuaj txawv teb chaws tuaj. Nws npau taws rau wb thiab tsis pub wb nyob hauv lawv lub teb chaws. Nws hais tias: “Lawv tsis pub neb nyob hauv Malavim. Tsis pub neb nyob hauv Malisam. Es neb xav tias neb yuav tau nyob ntawm no lod?” Ces kuv poj niam txawm quaj kiag. Zoo li tsis muaj leej twg kam txais wb li. Tam sim ntawd, kuv xav sau khaub sau tsuag es ncaj qha rov mus tsev tim teb chaws Askiv. Thaum kawg, cov uas saib xyuas cov tuaj txawv teb chaws tuaj, thiaj cia wb nyob ib hmos hauv Npe-ee yog hnub tom qab wb kam rov mus cuag lawv lub hauv paus loj. Wb sab kawg li, tiam sis wb tso txhua yam rau Yehauvas saib xyuas. Hnub tom qab thaum tav su, lawv thiaj tso cai rau wb nyob ua qhua hauv Zinpaves. Kuv tseem nco ntsoov hnub ntawd kuv zoo siab npaum li cas. Yuav tsum yog Yehauvas coj wb txoj hau kev xwb.

Thaum wb nyob hauv ceg Zinpaves, kuv ua hauj lwm hauv Chav Saib Xyuas Kev Tshaj Tawm rau Malavim thiab Mauxanpij (Mozambique). Cov kwv tij nyob hauv Malavim raug tsim txom hnyav kawg li. Kuv tes hauj lwm yog los mus txhais cov ntaub ntawv uas cov saib xyuas thaj tsam hauv Malavim xa tuaj. Muaj ib hmos, kuv ua hauj lwm txog ib tag hmo los txhais ib daim ntawv uas xa tuaj. Thaum kuv txhais daim ntawv no, ua rau kuv quaj vim peb cov kwv tij thiab nkauj muam raug tsim txom hnyav heev. * Tiam sis kuv kuj zoo siab tias txawm lawv raug tsim txom hnyav li ntawd los lawv tseem muab siab npuab Yehauvas, tuav rawv kev ntseeg, thiab ua siab ntev thev.​—2 Kauleethaus 6:4, 5.

Peb ua txhua yam li peb ua tau los mus npaj ntaub ntawv Vajlugkub rau cov kwv tij uas tseem nyob hauv Malavim thiab rau cov uas tau khiav mus rau Mauxanpij. Tau muab pab txhais lus rau yam lus Tshitshevas (Chichewa) hauv Malavim tshem mus rau hauv ib tug kwv tij daim liaj hauv Zinpaves. Tus kwv tij tsa tau ib co tsev rau lawv nyob thiab ib lub tsev rau lawv ua hauj lwm. Lawv thiaj rau siab ntso txhais tej ntaub ntawv Vajlugkub nyob rau qhov ntawd.

Txhua txhua xyoo peb kuj nrhiav kev rau cov kwv tij saib xyuas thaj tsam hauv Malavim tuaj koom lub rooj sib txoos loj ua lus Tshitshevas hauv Zinpaves. Thaum lawv tuaj lub rooj sib txoos, lawv mam li tuaj nqa cov ntawv rau cov lus qhuab qhia rau lub rooj sib txoos. Ces thaum lawv rov mus tsev, lawv mam muab qhia rau cov kwv tij hauv Malavim li lawv qhia tau. Muaj ib xyoos thaum lawv tuaj hauv Zinpaves, peb kuj npaj txoj Kev Kawm Rau Cov Kwvtij Tuav Haujlwm los txhawb cov kwv tij saib xyuas thaj tsam ntawd.

Lub 2 Hlis xyoo 1975, kuv tau mus xyuas cov kwv tij uas khiav hauv Malavim mus rau lub yeej thoj nam hauv Mauxanpij. Cov kwv tij yeej coj raws nraim li lub koom haum tau qhia, tsis hais tej kev uas siv los tsa cov txwj laus. Cov uas nyuam qhuav ua txwj laus kuj tau npaj lus qhuab qhia, tau siv sij hawm los tham phau Niaj Hnub Tshawb Nrhiav Phau Vajlugkub thiab Phau Tsom Faj, thiab kuj tau npaj tej rooj sib txoos. Nyob hauv lub yeej thoj nam, cov kwv tij coj ib yam li thaum mus rooj sib txoos. Lawv tau tsa ib co kwv tij los tu, los faib zaub faib mov, thiab los zov. Vim lawv tuav rawv kev ntseeg, Yehauvas foom koob hmoov rau lawv ntau heev. Thaum kuv rov los tsev, lawv tus qauv txhawb tau kuv lub zog kawg li.

Nyob rau lub caij 1979, ceg nyob rau hauv Xanpiam (Zambia) tau los saib xyuas cov kwv tij nyob rau hauv Malavim. Txawm li ntawd los lawv tseem nyob rawv hauv kuv siab thiab kuv tseem thov Vajtswv pab lawv tsis tseg. Cov kwv tij los kuj thov Vajtswv pab lawv thiab. Kuv yog ib tug hauv pab uas saib xyuas ceg Zinpaves, yog li ntawd tej thaud kuv kuj tau ntsib cov kwv tij uas tuaj hauv lub hauv paus koom haum loj tuaj, nrog rau cov kwv tij uas tuaj hauv Malavim, Afika Qab Teb (South Africa), thiab Xanpiam tuaj. Txhua zaus peb sib ntsib,  peb kheev nug tias, “Peb yuav pab cov kwv tij hauv Malavim li cas ntxiv?”

Sij hawm dhau mus, peb cov kwv tij kuj tsis tshua raug kev tsim txom hnyav lawm. Cov kwv tij uas tau khiav thiaj rov qab los zuj zus rau hauv Malavim. Cov kwv tij uas nyob hauv Malavim kuj tsis raug kev tsim txom hnyav lawm thiab. Cov teb chaws uas nyob ib ncig ntawd los kuj pib qhib kev rau peb cov kwv tij mus sib txoos thiab mus qhia Vajlugkub. Xyoo 1991, Mauxanpij los kuj tsis txwv peb cov kwv tij lawm thiab. Tiam sis peb pheej tseem xav tias, ‘Yuav yog thaum twg tav twg es peb cov kwv tij hauv Malavim thiaj li tsis raug txwv lawm?’

Cov nom tswv hauv Malavim tau hloov zuj zus. Ces xyoo 1993, lawv thiaj tsis txwv Yehauvas Cov Tim Khawv lawm. Tom qab ntawd, ib tug tub txib tshaj tawm txawv teb chaws thiaj nug kuv tias, “Koj puas xav rov qab mus rau Malavim?” Thaum ntawd kuv twb muaj 59 xyoos lawm, kuv thiaj teb nws tias, “Kuv tsis mus rau qhov kuv laus heev lawm.” Tiam sis hnub ntawd, Pab Uas Ntaus Thawj xa ntawv tuaj rau kuv kom kuv rov mus rau Malavim.

Wb nyiam wb tes hauj lwm hauv Zinpaves kawg li. Tsis yooj yim rau wb tso tes hauj lwm ntawd tseg. Wb muaj phooj muaj ywg zoo nyob rau ntawd. Pab Uas Ntaus Thawj hais tias yog wb tsis xav mus ces wb tsis mus los tau. Yog li ntawd, yog wb xav nyob hauv Zinpaves los yeej tau. Tiam sis kuv xav txog Anplahas thiab Xalas uas tau tso nkawd tej vaj tse tseg es ua raws li Yehauvas hais.​—Chivkeeb 12:1-5.

Thaum lub 2 Hlis tim 1 xyoo 1995, wb thiaj rov los rau hauv Malavim li Yehauvas lub koom haum hais. Hnub ntawd wb mus rau sab Afika tau 28 lub xyoos txwm nkaus. Lub koom haum thiaj tsa pab uas saib xyuas ceg Malavim. Lawv kuj xaiv kuv ua ib tug thiab. Tsis ntev ntawd, peb txawm rau siab ntso ua Yehauvas tes hauj lwm nyob rau hauv lub teb chaws ntawd.

Yehauvas foom koob hmoov rau peb kawg li. Nws tes hauj lwm thiaj nthuav dav zuj zus thiab peb coob zuj zus. Xyoo 1993, peb muaj 30,000 tus tshaj tawm tiam sis xyoo 1998, peb muaj 42,000 tus tshaj tawm. * Pab Uas Ntaus Thawj thiaj tso cai rau peb ua dua ib lub Npe-ee tshiab rau ceg hauv Malavim. Peb thiaj mus yuav tau ib thaj av dav li 30 acre hauv lub nroog Lilooves (Lilongwe). Lawv thiaj muab kuv tsa ua ib tug nrog pab uas saib xyuas ua vaj ua tsev.

Thaum ua tau lub Npe-ee tshiab rau lub 5 Hlis  xyoo 2001, Kwv Tij Nkais Phiaj (Guy Pierce) uas yog ib tug ntawm Pab Uas Ntaus Thawj tuaj muab lub Npe-ee cob rau Yehauvas. Muaj tshaj li 2,000 tus kwv tij nkauj muam uas nyob ib ncig ntawd tuaj koom. Feem coob yog cov uas twb ua kev cai raus dej tau 40 tawm xyoo lawm. Cov kwv tij nkauj muam no tau thev kev nyuaj siab ntau heev thaum peb tes hauj lwm raug txwv. Lawv tsis muaj qhov txhia chaw ntau tiam sis lawv txoj kev ntseeg loj heev. Thaum lawv tuaj saib lub Npe-ee tshiab mas lawv zoo siab kawg li. Thaum lawv ncig ib lub tsev rau tsev hauv Npe-ee, lawv muab peb cov nkauj hu li cov neeg Afika hu mas zoo mloog kawg li. Yog ib qho uas raug peb sawv daws uas tuaj hnub ntawd siab heev. Tej no ua pov thawj tias Yehauvas yeej foom koob hmoov ntau heev rau cov uas muab siab npuab nws thaum raug kev sim siab.

Thaum ua tau lub Npe-ee tshiab lawm, kuv zoo siab tias kuv kuj tau mus muab cov Tsev Nceeg Vaj tshiab cob rau Yehauvas thiab. Cov kwv tij kuj ua tau cov Tsev Nceeg Vaj, uas tsis siv sij hawm ntau los ua, rau cov koom txoos nyob rau hauv Malavim uas txom nyem me ntsis. Cov koom txoos no muaj tej lub ces yav tas los tsuas mus sib txoos hauv tej tsev me me uas txiav me nyuam ntoo los txhos xwb. Lawv muab nqeeb los vov thiab muab av los puab tej lub rooj ntev ntev zaum. Tam sim no lawv ci thwv cib coj los ua tau Tsev Nceeg Vaj zoo nkauj heev rau cov kwv tij sib txoos. Tiam sis cov kwv tij nyiam cov rooj av ntev ntev dua rau qhov zoo li lawv hais, cov rooj ntev txawm coob npaum twg los yeej zaum tsis puv.

Kuv zoo siab pom Yehauvas pab cov kwv tij nkauj muam txoj kev ntseeg loj hlob. Cov kwv tij Afika uas tseem hluas zoo siab hlo siv lawv lub dag lub zog thiab lub sij hawm los mus pab lub koom txoos thiab los mus kawm tej uas lub koom haum qhia. Qhov no ua rau kuv zoo siab kawg li. Cov kwv tij no zoo siab hlo tuav tej hauj lwm hnyav hauv lub koom txoos thiab hauv Npe-ee. Coob tus kwv tij kuj tau los ua cov saib xyuas thaj tsam. Cov kwv tij no feem coob kuj muaj txij muaj nkawm lawm. Lawv txhawb tau cov koom txoos kawg li. Cov txij nkawm no tsis kam muaj me nyuam xwv lawv thiaj ua tau Yehauvas tes hauj lwm, txawm lawv tsev neeg thiab tej phooj ywg pheej txhawb kom lawv muaj tub muaj ki.

Tom qab nyob hauv Afika tau 52 lub xyoos, kuv txawm pib muaj mob muaj nkeeg. Pab Uas Ntaus Thawj thiaj kom kuv mus nyob rau hauv ceg Askiv. Wb tu siab tias wb tau tso tes hauj lwm uas wb nyiam tseg, tiam sis wb kuj zoo siab tias cov kwv tij nkauj muam hauv lub Npe-ee hauv ceg Askiv kuj saib xyuas wb zoo heev.

Kuv ntseeg tias vim kuv cia Yehauvas coj kuv txoj hau kev, kuv thiaj tau ib lub neej uas zoo tshaj plaws. Yog tias kuv ua raws li kuv lub siab ntshaw es tuav rawv txoj hauj lwm kuv ua thaum kuv hluas ces xyov kuv lub neej yuav zoo li cas lawm. Yehauvas yog tus paub tias txoj kev twg yog txoj zoo rau kuv taug. (Pajlug 3:5, 6) Thaum kuv hluas kuv xav kawm txhua yam txog kuv txoj hauj lwm. Tiam sis Yehauvas ho muab ib tes hauj lwm hauv nws lub koom haum uas ua rau kuv txaus siab heev. Kuv pom tias lub neej uas teev tiam Yehauvas yog lub uas txaus siab tshaj plaws.