آپبیتی
میں یہوواہ دی دَسی ہوئی راہ تے چلن دا فیصلہ کیتا
جدوں میں نوجوان ساں تے میں اپنے لئی اِک ایہو جہی راہ چُنی جدے تے چلن دا مینوں بڑا مزہ آ رہیا سی۔ پر یہوواہ نے میرے لئی اِک فرق ای رستہ سوچیا ہویا سی۔ اِک لحاظ نال اوہ مینوں کہہ رہیا سی کہ میں تینوں تلیم دواں گا تے تینوں دَساں گا کہ تینوں کیس راہ تے جانا اے۔ (زبور 32:8) یہوواہ دی دَسی ہوئی راہ تے چلن دی وجہ توں مینوں فرق فرق طریقیاں نال اوہدی خدمت کرن دا موقع ملیا تے بوہت ساریاں برکتاں وی ملیاں۔ اِک برکت ایہہ سی کہ میں 52 سال تک افریقہ چ یہوواہ دی خدمت کیتی۔
اِنگلینڈ توں افریقہ دا سفر
میں 1935 چ اِنگلینڈ دے شہر ڈارلاسٹن چ پیدا ہویا۔ جدوں میں چار سال دا ساں تے میرے امی ابو یہوواہ دے گواہواں کولوں بائبل کورس کرن لگ پئے۔ تے چودہ پندرہ سال دی عمر چ مینوں وی یقین ہو گیا کہ یہوواہ دے گواہ بائبل دی صحی تلیم دیندے نیں۔ ایس لئی 1952 چ 16 سال دی عمر چ میں بپتسمہ لے لیا۔
ایسے دوران میں اِک ہنرُ سکھن لئی اِک وڈی جہی فیکٹری چ لگ گیا جتھے اوزار تے گڈیاں دے سپیئر پارٹ بنائے جاندے سن۔ میں اوس کمپنی چ سیکٹری بنن دی ٹریننگ لینی شروع کر دِتی تے ایس کم چ مینوں بڑا مزہ آ رہیا سی۔
پر اوس ویلے مینوں اِک اہم فیصلہ کرنا پیا جدوں سفری نگہبان نے مینوں کہیا کہ میں اپنی وِلنہال کلیسیا چ بائبل دا کلیسیائی مطالعیا کراواں۔ پر ایہدے چ اِک مسئلہ سی۔ اوس ویلے میں دو کلیسیاواں چ جاندا ہنا ساں۔ ہفتے دے دوران میں برومز گرو کلیسیا چ جاندا ساں۔ ایہہ کلیسیا میرے گھر توں تقریباً 32 کلومیڑ یعنی 20 میل دُور سی۔ پر میں اوتھے ایس لئی جاندا ساں کیونکہ ایہہ کلیسیا فیکٹری دے نیڑے سی۔ ہفتے دے آخر چ جدوں میں اپنے گھر جاندا ساں تے میں وِلنہال دی کلیسیا چ عبادت تے جاندا ساں۔
میری دلی خواہش سی کہ میں یہوواہ تے اوہدی تنظیم دے کم آواں۔ ایس لئی میں سفری نگہبان دی گل من لئی، بھانویں کہ ایس وجہ توں مینوں اپنا کم چھڈنا پیا جنہوں کرن چ مینوں بڑا مزہ آ رہیا سی۔ میں یہوواہ دی دَسی ہوئی راہ تے چلن دا فیصلہ کیتا جدی وجہ توں میری زندگی خوشیاں نال بھر گئی تے میں اپنے ایس فیصلے تے کدی نئیں پچھتایا۔
جدوں میں برومز گرو کلیسیا چ جاندا ساں تے اوتھے میری ملاقات اِک بڑی سوہنی بھین نال ہوئی جدا ناں این سی۔ یہوواہ نال اوہدی دوستی بڑی مضبوط سی۔ 1957 چ اَسی شادی کر لئی تے اَسی مل کے یہوواہ دی خدمت چ بوہت سارے کم کیتے۔ اَسی پہلکاراں تے خصوصی پہلکاراں دے طور تے خدمت کیتی۔ جدوں میں حلقے دا نگہبان ساں تے اَسی فرق فرق کلیسیاواں دا دورہ کیتا تے بیت ایل چ وی خدمت کیتی۔ این دا ساتھ میرے لئی ہمیشاں اِک برکت ثابت ہویا اے۔
1966 چ جدوں اَسی گلئیڈ دی کلاس نمبر 42 توں تربیت لئی گئے تے ساڈی خوشی دی کوئی اِنتہا نئیں سی۔ سانوں ملک ملاوی چ خدمت کر ن
لئی کہیا گیا جدے بارے مشہور اے کہ ایہہ افریقہ دا دل اے کیونکہ ایتھوں دے لوک بڑے ملنسار تے مہمان نواز نیں۔ پر سانوں نئیں پتہ سی کہ اوہ لوک سانوں ایتھے زیادہ دیر ٹِکن نئیں دین گے۔ملاوی چ شدید مسئلیاں دا سامنا
1 فروری 1967 نُوں اَسی ملاوی پونچے۔ پہلا مہینہ تے اوتھوں دی زبان سکھن چ لگ گیا تے فیر میں صوبائی نگہبان دے طور تے خدمت کرنی شروع کیتی۔ اَسی اوتھوں دی اِک خاص جیپ چ سفر کرنے ساں جدے بارے لوک کہندے سن کہ ایہہ کسے وی رستے تے چل سکدی اے، ایتھوں تک کہ دریا وی پار کر سکدی اے۔ پر ایہہ سچ نئیں سی کیونکہ اَسی صرف اوہی دریا پار کرسکنے ساں جیہڑے زیادہ ڈُونگے نئیں ہوندے سن۔ کدی کدار اَسی کچے مکاناں چ ٹھہرنے ساں جنہاں چ بارش دے موسم چ چھت دے تھلے ترپال لانی پیندی سی تاکہ پانی اندر نہ آ سکے۔ اِنج مشنری دے طور تے کم شروع کرنا کافی مشکل سی پر سانوں ایس کم چ مزہ آ رہیا سی۔
اپریل دے مہینے چ مینوں پتہ چلیا کہ ایس ملک چ ساڈے لئی بڑی مشکل کھڑی ہون والی اے۔ میں ریڈیو تے ملاوی دے صدر ڈاکٹر ہیسٹنگز باندا دی تقریر سنی جدے چ اوہ کہہ رہیا سی کہ یہوواہ دے گواہ ٹیکس نئیں دیندے تے حکومت لئی مسئلے کھڑے کر رہے نیں۔ ظاہری گل اے کہ ایہہ سارے اِلزام جھوٹھے سن۔ سانوں پتہ سی کہ اصل مسئلہ ایہہ وے کہ اَسی سیاست چ اوہناں دی حمایت نئیں کر رہے تے اوہناں دی سیاسی پارٹی دا ممبر بنن لئی کارڈ نئیں خرید رہے۔
ستمبر چ اَسی اِک اخبار چ پڑھیا کہ ملک دے صدر نے یہوواہ دے گواہواں تے اِلزام لایا اے کہ اوہ سارے لوکاں لئی مسئلہ بنے ہوئے نیں۔ اوس صدر نے اپنے اِک جلسے چ ایہہ اعلان کیتا کہ اوہدی حکومت بوہت چھیتی یہوواہ دے گواہواں دے کم تے پابندی لا دے گی۔ تے فیر 20 اکتوبر 1967 نُوں ساڈے کم تے پابندی لگ گئی۔ ایہدے تھوڑی ای دیر بعد پولیس تے امیگریشن والے ساڈی برانچ نُوں بند کرن تے مشنریاں نُوں ملک چوں کڈھن لئی آ گئے۔
سانوں تِن دن جیل چ رکھیا گیا تے فیر سانوں ملک موریشس بھیج دِتا گیا جدے تے برطانیہ حکومت کر رہیا سی۔ پر سانوں موریشس چ وی مشنریاں دے طور تے رہن دی اجازت نئیں ملی۔ ایس لئی تنظیم نے سانوں روڈیشیا بھیج دِتا (جنہوں ہن زمبابوے کہیا جاندا اے)۔ جدوں اَسی اوتھے پونچے تے اَسی اِک بوہت ای کھر دماغ افسر نال ملے۔ جنہے سانوں ملک چ رہن دی اجازت دین توں انکار کر دِتا۔ اوہنے کہیا: ”پہلے توانوں ملاوی توں کڈھیا گیا۔ فیر توانوں موریشس چ رہن دی اجازت وی نئیں ملی تے ہن تُسی ایتھے آ گئے او کیونکہ ایتھے آنا اسان سی۔“ ایہہ سن کے این رون لگ پئی۔ اِنج لگ رہیا سی کہ کوئی وی سانوں اپنے ملک چ نئیں رکھنا چاہندا۔ اوس ویلے میرا دل کر رہیا سی کہ میں سارا کجھ چھڈ چھڈا کے اپنے گھر اِنگلینڈ چلا جاواں۔ پر فیر امیگریشن والیاں نے سانوں ایس شرط تے ساڈی برانچ چ اِک رات گزارن دی اجازت دِتی کہ اَسی اگلی سویر اوہناں دے ہیڈکوارٹر چ حاضر ہوئیے۔ ساڈی ہمت جواب دے رہی سی پر اَسی سارا کجھ یہوواہ دے ہتھ چ چھڈ دِتا۔ اگلی دوپہر سانوں اِک ایہو جہی خبر ملی جدی سانوں توقع وی نئیں سی۔ سانوں زمبابوے چ کجھ دیر رہن دی اجازت مل گئی سی۔ میں اوہ وقت کدی وی نئیں بُھل سکدا کیونکہ اوس دن مینوں یقین ہو گیا سی کہ یہوواہ ساڈی رہنمائی کر رہیا اے۔
اِک نوِیں ذمےداری
زمبابوے برانچ چ مینوں خدمتی شعبے چ کم کرن لئی کہیا گیا جیہڑا ملاوی تے موزمبیق چ مُنادی دے کم دی نگرانی کردا سی۔ ملاوی چ ساڈے بھین بھراواں نُوں بوہت سخت اذیت دِتی جا رہی سی۔ میرے کم چ ایہہ وی شامل سی کہ میں اوہناں رپورٹاں دا ترجمہ کراں جیہڑیاں ملاوی توں حلقے دے نگہبان بھیج دے سن۔ اِک شام نُوں جدوں میں کافی دیر تک کم کر رہیا ساں تے میں ایہہ پڑھ کے رون لگ پیا کہ ساڈے بھین بھراواں نُوں ایناں زیادہ ماریا کٹیا جا رہیا اے۔ * پر یہوواہ لئی اوہناں دی وفاداری، ایمان تے اوہناں دے صبر نُوں ویکھ کے میری ہمت بوہت ودھی۔—2-کُرنتھیوں 6:4، 5۔
اَسی اوہناں بھین بھراواں تک روحانی کھانا پونچان دی پوری کوشش کر رہے ساں جیہڑے ملاوی چ رہ گئے سن تے جیہڑے پناہ لین لئی موزمبیق چلے گئے سن۔ چچیوا زبان چ ترجمہ کرن والی ٹیم ملاوی توں زمبابوے چلی گئی۔ اوتھے اِک بھرا نے اپنے وڈے جہے کھیت چ گھر تے دفتر بنائے۔ ایس طرحاں ایہہ بھین بھرا ترجمے دا کم جاری رکھ سکے۔
اَسی ملاوی دے حلقے دے نگہباناں لئی ایہہ بندوبست کیتا کہ اوہ زمبابوے چ ہر سال چچیوا زبان چ ہون والی کنونشن تے جا سکن۔ اوتھے اوہ کنونشن تے ہون والیاں تقریراں دے خاکے لے سکدے سن تے ملاوی واپس جا کے بھین بھراواں نُوں اوہ گلاں دَس سکدے سن جیہڑیاں اوہناں نے کنونشن تے سکھیاں ہوندیاں سن۔ اِک واری جدوں ایہہ حلقے دے نگہبان زمبابوے آئے تے اوس سال اَسی اوہناں دا حوصلہ ودھان لئی بادشاہتی خدمتی سکول دا بندوبست کیتا۔
فروری 1975 چ میں اوہناں گواہواں نُوں مِلن گیا جیہڑے پناہ لین لئی ملاوی توں موزمبیق آئے سن۔ ایہہ بھین بھرا یہوواہ دی تنظیم دے نال نال چل رہے سن۔ اوہ تنظیم وَلّوں مِلن والیاں نوِیاں ہدیتاں تے پوری طرحاں عمل کر رہے سن جنہاں چ ایہہ بندوبست وی شامل سی کہ کلیسیا چ بزرگاں دی اِک جماعت ہووے۔ ایہناں بزرگاں نے یہوواہ دی خدمت دے حوالے نال بوہت سارے کماں نُوں منظم کیتا ہویا سی۔ ایہناں چ عوامی تقریراں دینا، روزانہ دی ایت تے گل کرنا، ”مینارِنگہبانی“ دا مطالعیا کرانا تے کنونشناں دا بندوبست کرنا شامل سی۔ اوہناں نے کنونشناں وانگوں صفائی ستھرائی کرن والے، کھانا ونڈن والے تے سیکیورٹی دے شعبے بنائے ہوئے سن۔ اوہ وفادار بھرا یہوواہ دی مدد نال بوہت کجھ کر سکے تے اوہناں نُوں مِلن توں بعد میرا حوصلہ وی بوہت ودھیا۔
تقریباً 1980 چ زمبیا برانچ ملاوی چ مُنادی دے کم دی نگرانی کرن لگ پئی۔ پر میں فیر وی ملاوی چ رہن والے بھین بھراواں بارے سوچدا رہنا ساں تے اوہناں لئی دُعا کرنا ساں۔ دُوجے بھین بھرا وی اِنج ای کردے سن۔ میں زمبابوے برانچ کمیٹی دا ممبر ساں، ایس لئی کئی واری میری ملاقات ساڈے ہیڈکوارٹر دے نمائندیاں نال ہوئی۔ ایہناں موقعیاں تے میرے نال ملاوی، جنوبی افریقہ تے زمبیا توں وی کجھ بھرا ہوندے سن۔ ہر واری اَسی ایس بارے گل کردے ساں کہ اَسی ملاوی چ رہن والے بھین بھراواں دی مدد کرن لئی ہور کیہہ کرسکنے آں۔
ہولی ہولی ملاوی چ ساڈے بھین بھراواں لئی اذیت گھٹ ہونا شروع ہو گئی تے اوہناں نے سُکھ دا ساہ لیا۔ جیہڑے بھین بھرا اذیت دی وجہ توں ملاوی چھڈ کے چلے گئے سن اوہ وی ملاوی واپس آن لگ پئے۔ آنڈ گوانڈ دے
مُلکاں نے یہوواہ دے گواہواں دے کم توں پابندیاں ہٹا دِتیاں تے اوہناں نُوں مُنادی کرن تے عبادت لئی جمع ہون دی اجازت دے دِتی۔ 1991 چ موزمبیق چ وی اِنج ای ہویا۔ ساڈے ذہن چ بس ایہی سوال گھم رہیا سی کہ ملاوی چ یہوواہ دے گواہ کدوں آزادی نال یہوواہ دی عبادت کر سکن گے۔ملاوی چ واپسی
اخیر ملاوی چ حالات بدل گئے تے 1993 چ اوتھوں دی حکومت نے یہوواہ دے گواہواں دے کم توں پابندی ہٹا لئی۔ ایہدے کجھ عرصے بعد میں اِک مشنری نال گل کر رہیا ساں جنہے مینوں پچھیا: ”کیہہ تُسی ملاوی واپس جاؤ گے؟“ اوس ویلے میری عمر 59 سال ہو چُکی سی۔ ایس لئی میں اوہنوں کہیا: ”نئیں ہون تے میری عمر کافی ہو گئی اے۔“ پر اوسے دن سانوں گورننگ باڈی وَلّوں اِک خط ملیا جدے چ بھراواں نے سانوں پچھیا سی کہ کیہہ اَسی ملاوی واپس جانا چاہنے آں۔
سانوں زمبابوے چ یہوواہ دی خدمت کرنا بوہت اچھا لگ رہیا سی۔ ایس لئی ملاوی جان دا فیصلہ کرنا اسان نئیں سی۔ اَسی اوتھے بوہت خوش ساں تے کجھ بھین بھراواں نال تے ساڈی بڑی پکی دوستی ہو گئی سی۔ گورننگ باڈی نے ایہہ فیصلہ ساڈے تے چھڈیا سی کہ اَسی ملاوی جاواں گے یاں نئیں۔ ایس لئی جے اَسی چاہندے تے اَسی زمبابوے چ رُک سکنے ساں۔ پر مینوں یاد اے کہ اوس ویلے میں ابراہام تے سارہ بارے سوچیا جنہاں نے زیادہ عمر ہون دے باوجود یہوواہ دی ہدیت تے عمل کیتا تے اوس راہ تے ٹر پئے جیہڑی یہوواہ نے اوہناں نُوں دَسی سی۔—پیدایش 12:1-5۔
اَسی یہوواہ دی ہدیت تے عمل کرن دا فیصلہ کیتا تے 1 فروری 1995 نُوں ملاوی واپس آ گئے یعنی پہلی وار ملاوی پونچن دے 28 سال بعد۔ ملاوی چ برانچ کمیٹی بنائی گئی جدے چ میں تے دو ہور بھرا سن۔ اَسی فوراً ای ملاوی چ یہوواہ دے گواہواں دے کم نُوں منظم کرنا شروع کر دِتا۔
یہوواہ ای برکت دیندا اے
سانوں ایہہ ویکھ کے بڑی خوشی ہوئی کہ ملاوی چ یہوواہ نے ساڈے کم چ کِنّی برکت پائی اے۔ 1993 چ اوتھے 30 ہزار مبشر سن پر 1998 چ اوہناں دی تعداد 42 ہزار توں وی ودھ چُکی سی۔ * ملاوی چ مبشراں دی ودھدی ہوئی تعداد نُوں ویکھ کے گورننگ باڈی نے اوتھے اِک نوِیں برانچ بنان دی منظوری دِتی۔ ایس کم لئی اَسی شہر للونگوے چ 30 ایکڑ زمین خریدی تے مینوں تعمیر دی کمیٹی چ کم کرن دی ذمےداری دِتی گئی۔
مئی 2001 چ گورننگ باڈی دے ممبر گائے پییس نے نوِیں برانچ نُوں یہوواہ لئی مخصوص کرن واسطے تقریر دِتی۔ ایس موقعے تے 2 ہزار توں وی زیادہ یہوواہ دے گواہ موجود سن۔ جنہاں وچوں زیادہتر نُوں بپتسمہ لئے 40 سال توں وی زیادہ عرصہ ہو چُکیا سی۔ ایہناں بھین بھراواں نُوں پابندی دے
دوران ایہو جہیاں مصیبتاں برداشت کرنیاں پئیاں جنہاں نُوں بیان کرنا وی مشکل اے۔ اوہ غریب تے ہے سن پر اوہناں کول ایمان تے یہوواہ نال دوستی دی دولت سی۔ نویں بیت ایل نُوں ویکھ کے اوہناں نُوں بوہت زیادہ خوشی ہو رہی سی۔ بیتایل دا ہر کونا یہوواہ دی حمد دے گیتاں نال گُونج رہیا سی جنہاں نُوں بھین بھرا اپنی زبان چ گا رہے سن۔ دل نُوں جوش نال بھر دین والا ایہو جیہا منظر میں پہلے کدی نئیں ویکھیا سی۔ ایہہ ایس گل دا پکا ثبوت سی کہ جیہڑے لوک مصیبتاں دے باوجود یہوواہ دے وفادار رہندے نیں، یہوواہ اوہناں نُوں ڈھیروں ڈھیر برکتاں دیندا اے۔برانچ بنن دے بعد ملاوی چ بوہت ساریاں عبادت گاہواں وی بننا شروع ہو گئیاں۔ میرے لئی ایہہ بڑے مان دی گل اے کہ ایہناں وچوں بوہت ساریاں عبادت گاہواں نُوں یہوواہ لئی مخصوص کرن واسطے مینوں تقریر دین لئی کہیا گیا۔ ملاوی چ کلیسیاواں نُوں اوس اِنتظام توں بڑا فائدہ ہویا جدے تحت تنظیم اوہناں مُلکاں چ بڑی تیزی نال عبادت گاہواں بناندی اے جتھے بھین بھرا غریب نیں۔ ایس توں پہلاں بھین بھرا سفیدے دے درختاں نال بنیاں ہوئیاں عبادت گاہواں چ جمع ہوندے سن۔ ایہناں عبادت گاہواں دِیاں چھتاں گھاہ نال بنیاں چٹائیاں دِیاں ہوندیاں سی تے ایہناں چ بیٹھن لئی مٹی دے بینچ ہوندے سن۔ پر فیر بھین بھرا بڑی محنت نال اَگ دی بھٹی چ اِٹاں تیار کرن لگ پئے تے ایہناں اِٹاں توں خوبصورت عبادتگاہواں بنان لگ پئے۔ پر اوہناں نُوں مٹی دے بینچاں تے ای بیٹھنا پسند سی کیونکہ اوہ کہندے سن کہ بینچ تے زیادہ توں زیادہ لوکاں نُوں بٹھایا جا سکدا اے۔
مینوں ایہہ ویکھ کے وی بڑی خوشی ہوئی کہ کیویں یہوواہ نے لوکاں دی پُختہ مسیحی بنن چ مدد کیتی۔ مینوں افریقہ چ خاص کر نوجوان بھراواں نُوں ویکھ کے بڑی خوشی ہوئی جیہڑے ہمیشاں مدد لئی تیار رہندے سن تے اوہناں نے بڑی چھیتی اوہ کم سکھ لئے جیہڑے یہوواہ دی تنظیم اوہناں نُوں سکھا رہی سی۔ اوہناں نے بیتایل تے کلیسیاواں چ وڈیاں وڈیاں ذمےداریاں سنبھالنا وی شروع کر دِتا۔ افریقہ دے رہن والے بوہت سارے بھراواں نُوں حلقے دا نگہبان بنایا گیا جدے توں کلیسیاواں نُوں بوہت فائدہ ہویا۔ ایہناں وچوں بوہت سارے بھرا شادی شُدہ سن۔ بھانویں کہ افریقہ دی ثقافت دے مطابق شادی شُدہ لوکاں لئی بچے پیدا کرنا ضروری ہوندا اے تے کدی کدار اوہناں دے گھر والے وی اوہناں تے دباؤ پاندے نیں کہ اوہ بچے ضرور پیدا کرن۔ پر ایہناں جوڑیاں نے یہوواہ دی زیادہ خدمت کرن لئی ایہہ فیصلہ کیتا کہ اوہ بچے پیدا نئیں کرن گے۔
میں اپنے فیصلیاں توں خوش آں
میں اپنے فیصلے تے بوہت مطمئن تے خوش آں۔ جدوں مینوں افریقہ چ خدمت کردے 52 سال ہو گئے سن تے مینوں صحت دے کجھ مسئلے شروع ہو گئے۔ برانچ کمیٹی دے کہن تے گورننگ باڈی نے سانوں خدمت لئی برطانیہ بھیج دِتا۔ سانوں افریقہ چھڈن دا بڑا دُکھ سی۔ پر برطانیہ دے بیت ایل چ رہن والے بھین بھرا ساڈے بڑھاپے چ ساڈا بڑی چنگی طرحاں خیال رکھ رہے نیں۔
یہوواہ دی دَسی ہوئی راہ تے چلنا میری زندگی دا سب توں چنگا فیصلہ سی۔ جے میں اپنے آپ تے بھروسہ کیتا ہوندا تے شاید میری زندگی اینی چنگی نہ ہوندی۔ یہوواہ شروع توں ای جان دا سی کہ مینوں اپنیاں راہواں نُوں سدِھا کرن لئی کیہہ کجھ کرن دی ضرورت اے۔ (امثال 3:5، 6) جدوں میں نوجوان ساں تے مینوں ایہہ سکھ کے بڑی خوشی ہوئی کہ اِک وڈی کمپنی کیویں کم کردی اے۔ پر جیہڑی خوشی تے اِطمینان مینوں یہوواہ دی تنظیم چ کم کر کے ملیا اے، اوہ کسے وی وڈی کمپنی چ کم کر کے نئیں مل سکدا سی۔ یہوواہ دی خدمت کر کے مینوں پہلاں وی بوہت سکون مِلدا سی تے اَج وی بوہت سکون مل رہیا اے۔