I ipwidi nan 1935 nan Darlaston, wasa ehu nan England me adaneki Black Country. Eden wasao kohsang ediniei toantoal me kin kohda sang wasahn wiahda kilahs oh mete tohto, oh wasahn wiahda dipwisou teikan. Ni ahnsou me I sounpar pahieu, ei pahpa nohno tepida onop Paipel rehn Sounkadehdehn Siohwa kan. Sang ei sounpar 14 lel 15, I uhdahn kamehlele me met padahk mehlel, eri I papidaisla nan 1952 ni ei sounpar 16.

Erein ahnsowo, I tepida ale kaiahn en iang doadoahk nan wasahn doadoahk laud ehu me kin wiahda dipwisoun doadoahk kan oh pil kepwehn sidohsa kan. I tepida ale kaiahn en wiahla sekteri en kompanio, oh I uhdahn perenki.

Ahpw I anahne wiahda pilipil kesempwal ehu ni ahnsou me at sounapwalih me kin seiloak luke ie en tepida wia Onop en Paipel en Mwomwohdiso nan mwomwohdiso en Willenhall. Ahpw mie kahpwal ehu. Ni ahnsowo, I kin iang mwomwohdiso riau. Sang Niehd lel Nialem, I kin iang mwomwohdiso me karanih ei wasahn doadoahko nan Bromsgrove, mwail 20 sang imweo. Oh ni imwin wihk kan, I kin pwurala ni imwen pahpa oh nohno oh iang mwomwohdiso en Willenhall.

Pwehki I men utung sapwellimen Siohwa pwihn, I pwungki wia dahme sounapwalih me kin seiloako luke ie en wia, mendahki met wehwehki I anahne uhdihsang doadoahko me I uhdahn perenki. I sohte koluhkihla ei pilada en mweidohng Siohwa en ketin kahluwa elei kan, pwehki met kahrehiong ie en ahneki mour ehu me uhdahn kaperen.

Erein ei ieiang mwomwohdiso en Bromsgrove, I tuhwong sister masamwahu men me adaneki Anne, me kin uhdahn nsenohki eh papah Siohwa. Se pwopwoudla nan 1957, oh se ahneki soangen pwais kaselel tohto nan sapwellimen Siohwa doadoahk, duwehte doadoahk en pioneer, pioneer tohrohr, sounapwalih me kin seiloak, oh papah nan Pedel. Ei mour rehn Anne uhdahn kaperen.

Nan pahr 1966, se uhdahn perenki at iang Sukuhl en Kilead nempe 42. Se alehdi pwais en papah nan Malawi, wasa ehu me aramas tohto kin nda me aramas en wasao me kadek oh perenki  kasamwo meteikan. Ahpw se sehse me se sohte pahn mihmi mwo werei.

Se lel Malawi nan February 1, 1967. Erein sounpwongo pwon, pali laud en at ahnsou se sukuhlki lokaiahn wasao. Mwurinte mwo, se tepida doadoahk en sounapwalih me kin seiloak. Se kin tangahki jeep (Kaiser Jeep) ehu me ekei medewe se kak tangahkihla wasa koaros, pil kotehla pillap kan. Ahpw met sohte mehlel, se kak kotehlahte pillap me keieu pedeped. Ekei pak, se kin kousoan nan ihmw me wiawihsang pwehl oh oahsmetehki dihpw, oh anahne kappa en pwaindi kadoken ihmwo pwe en dehr mpwi ni ahnsoun keteu. Ahnsou ko uhdahn apwal ong at pahn tepida wia doadoahk en misineri, ahpw se uhdahn perenki!

Nan April, I esehda me se pahn kereniong lelohng kahpwal sang koperment en wasao. I rong kapahrek ehu nan redio sang president en Malawi, Dr. Hastings Banda. E nda me dene Sounkadehdehn Siohwa kan sohte kin pwain daksis oh kin kahrehda kahpwal ong kopermento. Ahpw karaun likamw kei mwo. Kiht koaros ese me kahpwalo uhdahn kohsang at kin soupoupali, ahpw keieu sang at sohte kin pwainda neirail card en iang arail pwihnen en politik kan.

Nan September, se wadek nan nuhs me presidento kin karaunehki brother oh sister kan me dene re kin kahrehda kahpwal wasa koaros. E pakairki nan ehu arail mihting laud ko me eh kopermento pahn wiahda koasoandi ehu me pahn keinapwihdi Sounkadehdehn Siohwa kan. Keinapwidi wet tepida wiawi nan October 20, 1967. Mwurinte mwo, pilismen kan oh tohndoadoahk en Immigration kan kohdo ni at ohpiso oh kauhdi doadoahk koaros wasao oh ritingedi, oh kadarasang sahpwo misineri ko.

Mwurin at mi nan imweteng rahn siluh, re kadarkitala Mauritius, sahpw ehu me mi pahn kaundahn  Britain. Ahpw kaun kan nan Mauritius sohte mweidohng kiht sen mi mwo nin duwen misineri kei. Irail eri kadarkitala Rhodesia (met Zimbabwe). Ni at lel mwo, tohndoadoahk en Immigration lemei men sohte men sen pedolong nan sahpwo, oh kin ndinda: “Malawi kalipkumwahsang wasao. Mauritius pil sohte mweidohng kumwa en mi mwo, oh met kumwa kohdo me pwe e mengei ong kumwa.” Anne tepida sengiseng. E mwomwen me sohte emen men kasamwo kiht! Ni ahnsowo, I uhdahn men kohkohla oh pwurala sapweio England. Ahpw mwuhr, irail kaun kan en Immigration mweidada sen pweidi pwohng ehu nan ohpis en Sounkadehdehn Siohwa kan, ihte ma se pwurala ni arail ohpiso rahno mwuri. Se uhdahn pwangada, ahpw se doulahte awih oh kilang ia duwen Siohwa eh pahn ketin sewesei kiht. Mwurin souwas en rahno mwuri, se pwuriamweikihla at alehdi mweimwei en mihmi Zimbabwe nin duwen sounmwamwaitih sahpwo. I sohte kak manokehla ei pepehm rahno​—I uhdahn kamehlele me Siohwa ketin kaukaweid kiht.

Nan ohpis en Sounkadehdehn Siohwa kan nan Zimbabwe, I iang doadoahk nan Pali en Kalohk, apwahpwalih Malawi oh Mozambique. Kristian kan nan Malawi kin lelohng kalokolok laud. Pil ehu ei pwukoa iei en kawehwehda ripoht kan me sounapwalih me kin seiloak kan sang Malawi kadarodo. Ehu ahnsou me I doadoahk lel nipwong, I tepida sengisengki riatail Kristian kan pwehki ar lelohng tiahk lemei kan. * Ahpw arail loalopwoat, lelepek, oh dadaur uhdahn sair ie.​—2 Kor. 6:4, 5.

Se wia soahng koaros me se kak wia pwehn kihda sawasepen Paipel kan ong riat Kristian ko nan Malawi oh pil irail kan me tangasang wasao pwehki tiahk lemei oh tangala Mozambique. Pwihn en kawehwe lokaiahn Chichewa, lokaia me pali laud en mehn Malawi kan kin lokaiahki, keseula nan sapwen brother men nan Zimbabwe. Brothero kauwada ihmw kei oh ohpis ehu ong irail. Irail eri pousehlahte wia arail doadoahk kesempwal en kawehwe sawasepen Paipel kan wasao.

Se koasoanehdi sounapwalih me kin seiloak kan nan Malawi ren kin iang towehda mihting tohrohr (district convention) en Chichewa sounpar koaros nan Zimbabwe. Wasao, re alehdi padahk kan en mihting tohrohro. Ni arail pwurupwuralahng Malawi, irail kin ehukihong riarail Kristian ko ni uwen arail kak padahk kan sang mihting tohrohro. Ehu pahr ko me irail mwemweitdo Zimbabwe, se koasoanehdi Sukuhl ong Elder kan oh Sounsawas kan en wiawi pwe en kangoange sounapwalih me kin seiloak eimah pwukat.

Nan February 1975, I mwemweitla rehn Sounkadehde kan me tangasang Malawi oh kohla kousoanla Mozambique, wasa me irail kan me tangasang sapwarail kin kousoan ie. Kristian pwukat kin ideidawehnte kaweid kan sang sapwellimen Siohwa pwihn, iangahki koasoandi kapw duwen en mie pwihn en elder kan. Elder kapw kan wiahda soangen koasoandi tohto, me iangahki kapahrek ong wehi pokon, koasoiapene iren rahn oh Kahn Iroir, oh pil wia mihting tohrohr kan. Irail koasoanehdi arail wasao en duwehte wasahn mihting tohrohr laud ehu, me mie palien kamwakel, palien wiahda mwenge, oh palien apwalih wasao sang keper. Siohwa ketin kapaiahda irail brother lelepek pwukat ni arail wiahda soahng tohto, oh met uhdahn kangoange ie laud mwurin ei pwurasang rehrail.

Kerenlahng pahr 1980, ohpis en Sounkadehdehn Siohwa kan en Zambia tepida apwalih Malawi. Ahpw I kin kalapw medemedewe duwen brother oh sister kan nan Malawi oh kapakapkin irail, oh me tohto teikan pil kin wia met. Pwehki I iang Pwihn me Kin Apwalih Ohpis en Sounkadehdehn Siohwa kan nan Zimbabwe, pak tohto I kin tuhwong wiliepen poasen kaun, iangahki brother kan sang Malawi, Palieir en Aperika, oh Zambia. Ehuehu ahnsou ko, se kin idek peidekohte, “Dahme se pil kak sewesehki riat Kristian kan nan Malawi?”

Kedekedeo, kalokolok kan tikitikla. Riatail kan me tangasang Malawi tepida pwurala wasao, oh irail kan me mihmihte wasao sohla nohn kin lelohng tiahk lemei kan. Sahpw kan me karanih Malawi tepida  mweidohng Sounkadehdehn Siohwa kan en tepida kalohk oh mihting oh sohla keinapwih irail. Mozambique pil wia met nan pahr 1991. Ahpw se kin men ese, ‘Iahd me Sounkadehdehn Siohwa kan nan Malawi pahn saledekla?’

Irair en politik en Malawi kedekedeo wekila, oh nan 1993, koperment en wasao sohla keinapwih Sounkadehdehn Siohwa kan. Mwurin mwo, I koasoakoasoi ong emen misineri me idek rehi, “Ke pahn pwurala Malawi?” I sounpar 59 ahnsowo, eri I nda, “Soh, I mahlahr!” Ahpw ni rahnohte, se alehdi kisinlikou ehu nan fax sang Pwihn me Kin Apwalih Mwomwohdiso nan Sampah Pwon me lukei kiht sen pwurala wasao.

Se uhdahn perenki at papah nan Zimbabwe, eri e wia pilipil apwal ehu ong kiht. Se wiahkilahr wasao imwat oh mie kompoakepaht kei me se ese wereilahr. Ni kadek, Pwihno ndaiong kiht me se kak mihmihte Zimbabwe ma se men. Eri e kak mengei ong kiht en pilada en mihmi. Ahpw I tamanda duwen Eipraam oh Sera ara kohkohsang imwarao ni ara mahlahr pwehki ira men peikiong sapwellimen Siohwa kaweid.​—Sen. 12:1-5.

Se pilada en idawehn kaweid sang sapwellimen Siohwa pwihn oh pwurala Malawi nan February 1, 1995, sounpar 28 mwurin at tepin lella wasao. Pwihn me Kin Apwalih Ohpis en Sounkadehdehn Siohwa kan wiawihda, oh ngehi oh brother riemen me wia tohn pwihn wet. Sohte pwand se tepida kedirepwkihla at kin wiahda koasoandi kan ong doadoahk en Sounkadehdehn Siohwa kan wasao.

Ia uwen eh wia kapai ehu en kilang Siohwa ketin kamwadangihala doadoahko! Nempehn sounkalohk kan mi ni mpen meh 30,000 nan 1993, ahpw tohtohla daulih meh 42,000 nan 1998. * Pwihn me Kin Apwalih Mwomwohdiso nan Sampah Pwon pwungki wiawihdahn ohpis kapw en Sounkadehdehn Siohwa kan pwehn apwalih kekeirdahn doadoahk en kalohko. Se alehda sahpw ehu me laudki eiker 30 nan Lilongwe, oh I alehdi pwukoa en iang pwihn me kin pwukoahki kauwada ihmw kan.

Brother Guy Pierce sang Pwihn me Kin Apwalih Mwomwohdiso nan Sampah Pwon me wia padahk en kasarawi ong ohpis kapw ko nan May 2001. Riatail Sounkadehde daulih riekid sang wasao me iang kasarawio, oh pali laud en irail papidaislahr dauliher sounpar 40. Irail me lelepek pwukat dadaurehr pahn kahpwal laud erein sounpar tohto ni ahnsou me atail doadoahko keinapwidi. Irail  semwehmwe ahpw irail ahneki pwoson laud oh nanpwungmwahu kehlail rehn Siohwa. Oh met irail uhdahn perenki arail kodohn kilang arail Pedel kapw. Wasa koaros me re kohla ie nan Pedel, ke kak rong arail koulki koul en kaping ong Siohwa ni mwomwen koul en Aperika. Mwekid wet me keieu sair ie laudsang mwekid teikan koaros me I kilang nan ei mour. E uhdahn kadehdehda me Siohwa kin ketin kapaiahda irail kan me kin lelepek dadaur pahn kahpwal kan.

Mwurin kokoudahn ohpiso eh nek, I perenki alehdi pwukoa en wia padahk kan en kasarawi ong Wasahn Kaudok kapw kan. Mwomwohdiso kan nan Malawi iang paiekihda prokram me kin sewese kauwada Wasahn Kaudok kan nan sahpw kan me sohte itar neirail mwohni. Mwohn prokramo wiawihda, ekei mwomwohdiso kin wia arail mihting nan kisin ihmw kan me wiawihsang tuhke eucalyptus. Irail kin pwainkihdi kadoken ihmw ko lohs me wiawihsang tehn ahlek. Arail sehr kan reirei oh wiawihsang pwehl. Met, riatail ko kin doadoahk laud en inimada piloak en pwehl nan sidohp kan me pein irail wiahda, oh kauwada wasahn kaudok kaselel kan. Ahpw re kin mwahukihte mwohd pohn sehr reirei ko me wiawihsang pwehl pwehki re perenki me me tohto kak mwohd pohn soangen sehr ko!

I pil perenki kilang duwen Siohwa eh ketin sewese aramas akan wiahla Kristian koahiek kei. I kin uhdahn pwuriamweikihla brother en Aperika pwulopwul kan me kin men sawas oh mwadang sukuhlki soahng tohto sang arail ale kasukuhl kan me sapwellimen Siohwa pwihn kin kihda oh sang arail wia doadoahk ko. Pwehki met, irail kak apwalih soangen pwukoa tohto nan Pedel oh pil nan mwomwohdiso kan. Mwomwohdiso kan pil kin kehlailkihda sounapwalih me kin seiloak kapw kan sang wasao, tohtohn irail pwopwoud. Pwopwoud pwukat pilada en dehr naineki seri nan koasoandi wet pwe ren kalaudehla arail papah Siohwa, mendahki pali laud en aramas akan, pil pein arail peneinei, kin kasik me me pwopwoudla kan pahn naineki seri.

Mwurin ei papah nan Aperika sounpar 52, I ahnekihda soangen soumwahu kei. Pwihn me Kin Apwalih Ohpis en Sounkadehdehn Siohwa kan en at wasao koasoanehdi sen pwurala Britain, oh Pwihn me Kin Apwalih Mwomwohdiso nan Sampah Pwon pwungki koasoandi wet. Se nsensuwedkihla at pahn kohkohsang at doadoahk me se perenkio, ahpw Pedel en Britain uhdahn kin apwalih kiht mwahu ni at mahlahr.

I uhdahn kamehlele me ei mweidohng Siohwa en ketin kaweid elei ka iei pilipil me keieu mwahu me I wiahda. Ma I koapworopworkihte pein ei loalokong, ei mour pahn uhdahn weksang met. Siohwa kin ahnsou koaros ketin mwahngih dahme I anahne pwehn ‘ketin kasalehiong ie ahl me pwung.’ (Lep. Pad. 3:5, 6) Ni ahnsou me I mwahnakapw, I uhdahn perenki sukuhlki doadoahk en kompani laud ehu. Ahpw sapwellimen Siohwa pwihn nan sampah pwon kihong ie doadoahk ehu me uhdahn mwahusang mwo. Ong ie, ei papah Siohwa wia elen mour ehu me uhdahn kaperen oh kansenamwahu oh pahn doulahte sohte uhdi!