1. Kisa Jéhova té fè touswit apwé Adanm épi Èv péché? (Jennésis 3:15)

 TOUSWIT apwé Adanm épi Èv péché, Jéhova té bay an bèl pwofèsi ki té kay bay désandan yo èspwa. Nou sa li pwofèsi sala an Jennésis 3:15.—Liʼy.

2. Pouki pwofèsi sala tèlman enpòtan?

² Pwofèsi sala ékwi an pwèmyé liv Bib-la, mé an yon mannyè ében an lòt, tout lézòt liv ki an Bib-la ni pou fè épi pwofèsi sala. Menm kon lakòl ka kolé fèyèt épi tjenn yo ansanm pou fè yon liv, pwofèsi-a ki ékwi an Jennésis 3:15 ka mennen tout sa ki an Bib-la ansanm, pou fè yon konmisyon. Konmisyon-an sé sa: Bondyé té kay voyé an Sovè pou détwi Denmou-an épi tout sé zèlèv li-a. * Sa kay an bennédiksyon pou tout moun ki enmen Jéhova!

3. Kisa nou kay diskité an atik sala?

³ An atik sala nou kay wéponn twa (3) kwèsyon ki ni pou fè épi pwofèsi-a ki an Jennésis 3:15: Ki moun pwofèsi-a ka palé konsèné? Ki mannyè pwofèsi-a ka akonpli? Èk, ki mannyè pwofèsi sala sa édé nou?

4. Ki moun ki ‘sèpan-an,ʼ èk ki mannyè nou sav sa?

⁴ Jennésis 3:14, 15 ka palé konsèné an ‘sèpan,ʼ ‘désandanʼ sèpan-an, an ‘madanm,ʼ épi ‘désandanʼ madanm-lan. Mé Bib-la ka édé nou pou idantifyé chak di yo. * Annou koumansé épi ‘sèpan-an.ʼ An sèpan pa té sa konpwann sa Jéhova té di an jaden Édenn. Konsa, sèpan-an té ka wépwézanté an moun ki té entélijan. Mé ki moun? Wévélasyon 12:9 ka di nou a klè, “gwo sèpan-an ki té la dépi an koumansman-an” sé yonn-lan “yo ka kwiyé Satan ében Denmou-an.” Mé ki moun ki désandan sèpan-an?

5. Ki moun ki désandan sèpan-an?

⁵ Lè Bib-la ka palé konsèné désandan adan an mannyè senbòlik, i ka palé konsèné sa ki ka katjilé èk ki ni menm atitid kon papa senbòlik yo. Alò, désandan sèpan-an sé nanj épi lézòm ki ka fè menm kon papa senbòlik yo, Satan. Yo ka opozé Jéhova épi pèp li. Anpami yo sé, sé nanj-lan ki té kité twavay yo an syèl an tan Nowa, épi lézòm ki méchan ki ni menm atitid papa yo, Denmou-an.—Jen. 6:1, 2; Jan 8:44; 1 Jan 5:19; Joud 6.

6. Pouki nou sa di sé pa Èv ki ‘madanm-lanʼ pwofèsi-a ka mansyonnen-an?

⁶ Apwézan, nou vlé konnèt ki moun ‘madanm-lanʼ yé. Mé nou sav, madanm sala sé pa Èv. Pouki nou sa di sa? Annou konsidiwé yon wézon. Pwofèsi-a di, désandan madanm-lan té kay ‘kwazéʼ tèt sèpan-an. Èk kon nou ja wè, sèpan-an sé an lèspwi, Satan Denmou-an. Konsa, pyès désandan Èv pa té kay sa détwi Denmou-an. Alò, ki moun ki té kay détwi Denmou-an?

7. Silon Wévélasyon 12:1, 2, 5, 10, ki moun ki madanm-lan Jennésis 3:15 ka mansyonnen?

⁷ Liv Wévélasyon ka édé nou pou konnèt ki moun ki madanm-lan Jennésis 3:15 ka mansyonnen. (Li Wévélasyon 12:1, 2, 5, 10.) Madanm sala sé pa an madanm ki fèt épi zo èk lachè. Nou sav sa paski, i ni lalin-an anba pyéʼy, èvèk i ni an kouwonn asou tèt li ki fèt épi douz (12) étwal. I fè an ich ki byen spésyal, paski ich sala sé Wéyòm Bondyé. Mé Wéyòm Bondyé sé an Wéyòm an syèl, konsa madanm-lan sipozé an syèl tou. Madanm-lan ka wépwézanté ògannizasyon Jéhova an syèl. Sa vlé di, tout sé nanj-lan ki fidèl.—Gal. 4:26.

8. Ki moun ki pwèmyé pa-a an désandan madanm-lan, èk ki lè i té vini pwèmyé pa-a? (Jennésis 22:15-18)

⁸ Pawòl Bondyé ka édé nou pou idantifyé pwèmyé pa-a an désandan madanm-lan. Sa vlé di moun-lan ki pli enpòtan an désandan madanm-lan. Osi, moun sala té sipozé an désandan Abrahanm. (Li Jennésis 22:15-18.) Èk vwéman, Jézi sété désandan Abrahanm. (Louk 3:23, 34) Mé désandan sala pa té sa an nonm òdinè, paski sé li ki té ni pou détwi Satan. Lè Jézi té ni twant (30) lanné, Bondyé annontéʼy épi lisentèspwi kon Gasonʼy. Sé a lè sala i vini pwèmyé pa-a an désandan madanm-lan. (Gal. 3:16) Apwé Jézi mò, èk i wésisité, Bondyé “onnowéʼy èk [i] lévé nonʼy”, épi i bay “tout pouvwa asou tout sa ki an syèl-la épi sa ki asou latè-a.” Jézi jis ni pouvwa pou “détwi twavay Denmou-an”.—Hib. 2:7; Maf. 28:18; 1 Jan 3:8.

9-10. (a) Ki moun ki ka fòmé dézyenm pa-a an désandan madanm-lan, èk ki lè sa ka fèt? (b) Kisa nou kay konsidiwé apwézan?

⁹ Apa di Jézi, la té kay ni an dézyenm pa an désandan madanm-lan. Zapòt Pòl té idantifyé dézyenm pa sala, lèʼy té di Jwif èk moun hòd sé nasyon-an ki té annonté: “Si ou sé sa Jézi Kwi, ou sé yonn an sé désandan Abrahanm-lan pou vwé, épi ou ja wisivwè tout sé bennédiksyon-an Bondyé té ja pwonmèt li-a.” (Gal. 3:28, 29) Lè Jéhova sèvi lisentèspwiʼy pou chwazi an moun pou alé an syèl, moun sala ka vini an pa an désandan madanm-lan. Alò, désandan madanm-lan sé Jézi épi san kawant kat mil-la (144,000) ki kay kondwi épiʼy. (Wév. 14:1) Yo tout ka fè éfò pou katjilé èk fè menm kon Papa yo, Dyé Jéhova.

¹⁰ Bon, kon nou idantifyé sé moun-lan pwofèsi-a an Jennésis 3:15 ka mansyonnen, annou konsidiwé mannyè Jéhova ka akonpli pwofèsi sala piti an piti, èk mannyè sa ka édé nou.

11. An ki mannyè yo té blésé désandan madanm-lan ‘an talonʼyʼ?

¹¹ Silon pwofèsi-a an Jennésis 3:15, sèpan-an té kay blésé désandan madanm-lan ‘an talonʼy.ʼ Sa fèt lè Satan pousé sé Jwif-la èk sé sòlda Ronm-lan pou tjwé Jézi. (Louk 23:13, 20-24) Lè an moun blésé an talonʼy, i ka ni difikilté pou maché pou an ti tan. An menm mannyè-a, lè Jézi té mò, i pa té sa fè anyen lè i té an tonbo-a pou pwèskè twa jou.—Maf. 16:21.

12. Ki mannyè èk ki lè tèt sèpan-an kay kwazé?

¹² Si pwofèsi-a an Jennésis 3:15 té ni pou akonpli, Jézi pa té sa wèsté an tonbo-a. Pouki? Sé paski silon pwofèsi-a, désandan madanm-lan té kay kwazé tèt sèpan-an. Konsa, asou twazyenm jou-a apwé lanmòʼy, Jéhova wésisité Jézi kon an lèspwi ki pa kay janmen mò ankò. A lè-a Jéhova chwazi-a, i kay sèvi Jézi pou détwi Satan. (Hib. 2:14) Èk sé moun-lan ki kay kondwi épi Jézi kay édéʼy pou détwi désandan sèpan-an, sa vlé di, tout lèlmi Bondyé ki asou latè-a.—Wév. 17:14; 20:4, 10. *

13. Ki bennéfis nou ka twapé kon pwofèsi sala ka akonpli?

¹³ Siʼw sé yon sèvant Jéhova, ou ka twapé an chay bennéfis kon pwofèsi sala ka akonpli. Pou ègzanp, lè Jézi té an nonm asou latè-a, i té imité kawaktè Papaʼy adan an mannyè ki pawfé. (Jan 14:9) Konsa ègzanp Jézi ka édé nou pou vini konnèt Jéhova pli mèyè épi pou enmenʼy pli. Osi, nou ka twapé bennéfis an lésisyon Jézi, èvèk an mannyè-a i ka djidé kongwigasyon Kwityen-an jòdi. I ka enstwi nou mannyè pou viv lavi nou pou nou sa ni favè Jéhova. Jis blésé-a an talonʼy, sa vlé di lanmòʼy, ki ka pòté nou bennéfis. Ki mannyè? Apwé Jézi wésisité, Jéhova aksèpté sanʼy ki ni an chay valè kon an sakwifis ki pawfé pou “nétwayé tout péché sòti an lavi nou.”—1 Jan 1:7.

14. Ki mannyè nou sav pwofèsi-a an jaden Édenn pa té akonpli la menm?

¹⁴ Sé pawòl-la Jéhova té di an jaden Édenn té ka moutwé, tan té kay pasé avan pwofèsi-a té kay akonpli, paski la ni twa (3) bagay ki té ni pou fèt. Pwèmyé, madanm-lan té ni pou pwodwi désandan-an. Dézyenm, Satan té ni pou sanblé désandanʼy. Èk twazyenm, la té kay ni hayisans ant dé gwoup sala. Tan té ni pou pasé pou tout sé bagay sala dévlopé. Nou sa jwenn bennéfis si nou konpwann pwofèsi sala paski, i ka vèti nou, latè sala ki anba pouvwa Satan, kay hayi sèvant Jéhova. Pli ta, Jézi té bay sé disip li-a menm avètisman sala. (Mak 13:13; Jan 17:14) San dout, nou ka wè hayisans sala, èspwèsman diwan dènyé san (100) lanné-a ki pasé. Pouki nou sa di sa?

15. Pouki latè-a hayi sèvant Bondyé pli pasé avan, èk pouki nou pa ni pou pè Satan?

¹⁵ Touswit apwé Jézi vini Wa an Wéyòm-lan an lanné mil nèf san katòz (1914), yo “jété [Satan] désann anlè latè-a”. (Wév. 12:9, 12) Mé paditan i asou latè-a i byen faché épi i ka pasé tout waj li asou pèp Bondyé. (Wév. 12:13, 17) Sé pou wézon sala latè-a hayi pèp Bondyé pli pasé avan. Mé nou pa ni pyès wézon pou pè Satan, sé zèlèv li-a, épi népòt lòt moun ki hayi nou. Okontwè, nou sa ni menm konfyans-lan zapòt Pòl té ni, lèʼy di: “Si Bondyé pou nou, kilès moun ki kay kont nou?” (Ronm. 8:31) Wi, nou sa ni tout konfyans nou an Jéhova, paski kon nou ja wè, an gwo pa an pwofèsi-a ki an Jennésis 3:15 ja akonpli.

16-18. Ki bennéfis Curtis, Ursula, épi Jessica twapé paski yo ka konpwann pwofèsi-a ki an Jennésis 3:15?

¹⁶ Pwonmèt Jéhova ki ékwi an Jennésis 3:15 sa édé nou pou aji épi népòt difikilté nou pé èspéyansé. Curtis sé yon fwè ki ka wann sèvis kon yon misyonnè an péyi Guam. I di: “Délè mwen ka èspéyansé difikilté ki ka fèʼy difisil pou mwen wèsté fidèl pou Jéhova. Mé lè mwen mèdité asou pwofèsi-a ki an Jennésis 3:15, i ka édé mwen pou kontiné tjenn konfyans mwen an Papa mwen ki an syèl.” Curtis ka èspéyé jou-a lè Jéhova kay mennen an bout pou tout difikilté nou ka èspéyansé.

¹⁷ Ursula sé an sè ki ka viv an péyi Bavaria. I di lèʼy konpwann pwofèsi-a ki an Jennésis 3:15, sa édéʼy pou ni asiwans-lan ki, Bib-la sé vwéman Pawòl Bondyé. I té wè mannyè tout lòt pwofèsi ki an Bib-la ni pou fè épi pwofèsi sala. Épi sa touché tjèʼy an chay. Osi, i di: “Lè mwen apwann sa Jéhova té fè la menm pou bay lézòm èspwa, sa fè mwen enmenʼy pli.”

¹⁸ Jessica sé yon sè ki sòti péyi Micronesia. I di: “Jis jòdi mwen ka chonjé mannyè mwen té santi lè mwen wéyalizé mwen twouvé lavéwité-a! Pwofèsi-a ki ékwi an Jennésis 3:15 ja ka akonpli. Sa ka édé mwen pou chonjé, Jéhova pa té janmen vlé nou soufè. Pwofèsi sala ka osi ban mwen asiwans-lan ki, lè nou sèvi Jéhova nou ka ni pli mèyè lavi-a apwézan, èk an tan pou vini nou kay ni an lavi ki otan pli mèyè.”

19. Pouki nou sa ni konfyans ki, dènyé pa-a an pwofèsi-a kay akonpli?

¹⁹ Kon nou ja wè, pwofèsi-a ki an Jennésis 3:15 ja ka akonpli. Nou konnèt byen klè ki moun ki désandan madanm-lan, épi ki moun ki désandan sèpan-an. Jézi sé pwèmyé pa-a an désandan madanm-lan. Blésé-a i té twapé an talonʼy-lan té djéwi. Apwézan i sé an Wa ki plen laglwa, èk i pa sa mò ankò. An tan nou jòdi, Jéhova ja pwèskè fini chwazi sé moun-lan ki kay kondwi épi Jézi an syèl-la. Paski pwèmyé pa-a an pwofèsi-a ja akonpli, nou ni bon wézon pou ni konfyans ki, dènyé pa-a an pwofèsi-a kay akonpli. Sa vlé di, Jézi kay kwazé tèt sèpan-an. Mi soulajman lézòm ki fidèl kay twapé, lè Jézi détwi Satan! Padan nou ka èspéyé tan sala, annou kontiné tjébé fò. Nou sa mété tout konfyans nou an Dyé nou Jéhova. Gwanmèsi désandan madanm-lan, ‘tout nasyon asou latè-a kay jwenn an chay bennédiksyon.ʼ—Jen. 22:18.