1. I ng’ey m’Adamu giku Eva gidubo, ndhundhu Yehova utimo ang’o? (Thangambere 3:15)

 I NG’EY m’Adamu giku Eva gidubo, ndhundhu Yehova umiyo genogen ni nyikwaygi nikadhu kud i lembila moko ma pire tek m’eewo. Lembilane jukiewo i Thangambere 3:15.​—Som.

2. Ang’o m’uketho lembila maeni pire tie teki?

² Lembila eno nwang’ere i buku ma kwong’a mi Biblia. Ento i yo moko, buku mange ceke mi Biblia utie ku winjiri kude. Tap calu udok ma jumwono ko the buku diko dhu karatasi ma tung’ tung’ i acel, wec m’i Thangambere 3:15 de udiko wec ma tung’ tung’ mi Biblia ni lembe acel, nia jubioro Jalar moko ma binyotho Wonabali ku jupare ceke. Eno bibedo mugisa ma dit mandha ni ju m’umaru Yehova!

3. Wabidwoko wang’ penji ma kani i thiwiwec maeni?

³ I thiwiwec maeni, wabidwoko wang’ penji m’ulubo e iwi lembila ma nwang’ere i Thangambere 3:15: Jukani ma juweco pigi i lembilane? Lembilane upong’o nenedi? Man wabenwang’u bero ma kani i kume?

4. “Thwol” utie ng’a, man wang’eyo ke nenedi?

⁴ Ju ma juweco pigi i lembila ma jukiewo i Thangambere 3:14, 15 utie “thwol,” “kodhi” pa thwol, “dhaku,” man  “kodhi” pa dhaku. Biblia ubekonyowa ning’eyo ng’atuman m’i kindgi. * Wakecak ku “thwol.” Thwol mandha copo nyang’ ungo i wec ma Yehova ugam uyero i podho mir Eden. Pieno, ng’atu ma Yehova upoko lembe i wiye ucikere nibedo giracwiya moko ma riek. Giracwiyane ubino ng’a? Lembanyutha 12:9 unyutho kamaleng’ nia thwolne ubino ng’a. Eyero nia “thwol ma con” eca utie Sitani Wonabali. Dong’ kodhi pa thwol ke utie ng’a?

5. Jukani ma gitie kodhi pa thwoli?

⁵ Wang’ ma pol Biblia betiyo ku wec ma nia “kodhi” i ayi mi lapor, pi niweco pi ju ma gikwanyu kit paru man timo pa ng’atu moko, ma jucopo wacu nia gitie awiya pare. Pieno, kodhi pa thwol utie jumalaika m’ujai man dhanu ma gijai ni Yehova Mungu, man bende ma gibenyutho jai ni dhanu pare. Eno uketho i iye jumalaika ma giweko kabedo migi i polo i rundi pa Noa, man bende dhanu ma reco ma timo migi ubedo ve pa Weggi ma Wonabali.​—Tha. 6:1, 2; Yoh. 8:44; 1 Yoh. 5:19; Yuda 6.

6. Pirang’o “dhaku” ma juweco pire utie ngo Eva?

⁶ Wakenen kawoni nia “dhaku” utie ng’a. Dhaku eno copo bedo ngo Eva. Pirang’o? Wakewec iwi lembe acel kende. Lembila uwacu nia kodhi pa dhaku “bicanyu” wi thwol. Calu ma waai waneno, thwol utie Sitani m’utie giracwiya mi tipo, man ng’atu moko mbe m’uai i Eva ma copo bedo ku copo mi canyu wi Sitani. Ka dong’ jucopo nyotho Sitanine ke nenedi?

7. Calu ma jukoro i Lembanyutha 12:1, 2, 5, 10; dhaku ma juweco pire i Thangambere 3:15 utie ng’a?

 ⁷ Buku ma tokcen mi Biblia unyutho nia dhaku ma juweco pire i Thangambere 3:15 utie ng’a. (Som Lembanyutha 12:1, 2, 5, 10.) Eno tie dhaku mi lapor! Dwi ni the tiende man ekendo nyikaluku 12 i wiye ni jamkermiwic. Enyolo nyathin moko ma segi, nyathin ne tie Ker pa Mungu. Calu ma Kerne n’i polo, pieno dhakune de ucikere nibedo i polo. Dhakune ubenyutho thenge mi polo mi dilo pa Yehova, m’uketho i iye jumalaika ma gigwoko bedoleng’ migi.​—Gal. 4:26.

8. Ng’a m’utie thenge ma kwong’a ma pire tek mi kodhi pa dhaku, man edoko kodhine ke awene? (Thangambere 22:15-18)

⁸ Lembe pa Mungu ubekonyowa ning’eyo bende kodhi pa dhaku. Kodhine ucikere nibedo nyakwar Abraham. (Som Thangambere 22:15-18.) Calu ma lembila ular uewo, Yesu uai kud i anyoli pa Abraham. (Luka 3:23, 34) Ento kodhine ucikere nibedo ku tego ma kadhu pa dhanu, pilembe ukwayere nia eng’eny wi Sitani Wonabali pi ninege. Pieno, kinde ma Yesu udoko ku oro ma romo 30, juwire ku tipo ma leng’. Saa maeno edoko thenge ma kwong’a ma pire tek mi kodhi pa dhaku. (Gal. 3:16) I ng’eye kinde ma Yesu utho man ecer, Mungu ‘uronye ku dwong’ man yung’ man emiyo ire “dito ceke . . . i polo kud i ng’om,” uketho i iye dito mi ‘rungo tic pa Wonabali.’​—Ebr. 2:7; Mat. 28:18; 1 Yoh. 3:8.

9-10. (a) Jukani mange ma gitie bende thenge mi kodhi pa dhaku man gibed gidoko thenge mi kodhine saa ma kani? (b) Wabiweco iwi lembang’o kawoni?

⁹ Ento thenge mir ario mi kodhine de unuti. Jakwenda Paulo unyutho pi theng kodhi maeno kinde m’ebino weco pi Jukristu ma Juyahudi man mi thek dhanu mange ma juwirogi ku tipo. Ewacu kumae: “Tek wu pa Kristu, nwang’u andha wutie kodhi pa Abraham, jucampacu calku lembang’ola.” (Gal. 3:28, 29) Ka Yehova uwiro Jakristu moko ku tipo ma leng’, Jakristune doko thenge mi kodhi pa dhaku. Pieno, kodhi pa dhaku uketho i iye Yesu Kristu ku dhanu 144 000 ma gibibimo karacelo kude. (Nyu. 14:1) Ju maeno ceke gibeii niparu man nitimo lembe calu Weggi ma Yehova Mungu.

¹⁰ Calu ma wadaru ng’eyo nia ju ma juweco pigi i Thangambere 3:15 utie jukani, dong’ wakewec kawoni iwi kite ma Yehova ubed upong’o ko nok nok lembila maeno man kite ma lembene ubekonyo kowa tin.

11. Lembila m’uwacu nia thwol bitong’o “ufunytiend” kodhi pa dhaku upong’o nenedi?

¹¹ Nimakere ku lembila mi Thangambere 3:15, junyutho nia thwol bitong’o ‘ufunytiend’ kodhi pa dhaku. Lembuno upong’o kinde ma Sitani utiyo ku Juyahudi man Juroma pi ninego Wod Mungu. (Luka 23:13, 20-24) Tap calu ma ka ng’atini unwang’u ret ebedo ire tek niwotho pi nindo moko, kumeno bende Yesu de ubino mbe ku copo mi timo lembe moko ci kinde m’ebino i liel pi nindo adek.​—Mat. 16:21.

12. Jubinyotho Sitani nenedi man ke awene?

¹² Lembila mi Thangambere 3:15 unyutho nia Yesu bibedo ngo magwei i liel. Pirang’o? Pilembe nimakere ku lembilane, kodhi pa dhaku binyono kunoke bing’enyo wi thwol. Eno ubenyutho nia ret ma Yesu unwang’u ucikere nikey, niwacu  ebicer kud i liel. De andha ecer! Kinde m’etho, i nindo mir adege ecer ni giracwiya mi tipo ma tho ngo. Yesu bing’enyo wi Sitani cen pi ninyothe i nindo ma Mungu uketho. (Ebr. 2:14) Kristu karacelo ku dhanu m’ebibimo kugi, gibinyotho judegi pa Mungu ceke kum gi nyikway thwol.​—Nyu. 17:14; 20:4, 10. *

13. Wabenwang’u bero ma kani i kum pong’o mi lembila mi Thangambere 3:15?

¹³ Tek itie jaratic pa Mungu, m’umbe jiji ibenwang’u bero i kum pong’o mi lembila maeni. Yesu ubino iwi ng’om ku kum mi dhanu. Enyutho tap tap kite pa Won. (Yoh. 14:9) Nikadhu kud i bang’e, wang’eyo Yehova Mungu man wamare. Wanwang’u bero i ponji pa Yesu man i telowic pare, calu m’ebemiyo bende tin ni cokiri mi Jukristu. Eponjowa ku kite ma wakwo ko kara wanwang’ bero i wang’ Yehova. Bende, wan ceke wabenwang’u bero i kum tho pa Yesu, niwacu ret m’enwang’u i ufunytiende. Nenedi? Kinde m’ecer, ethiero valer mi rimo mi lam ma leng’ ‘m’ulonyowa kud i dubo ceke.’​—1 Yoh. 1:7.

14. Wang’eyo nenedi nia lembila ma Yehova uewo i podho mir Eden, ugam upong’o ngo ndhundhu saa nica? Kekor.

¹⁴ Lembila ma Yehova uewo i podho mir Eden, unyutho kamaleng’ nia wecne bipong’o ngo ndhundhu saa maeca. Kum ugam ukwayere nia nindo ukeukadhi kara kodhi pa dhaku ma jung’olo pire uwoki, kara Wonabali de ucok dhu ju pare, man kara adegi kunoke amone de ubed unuti i kind ungu ario eno. Nyang’ i lembila eni ubekonyowa, kum ebepoyo wiwa nia ng’om maeni ma Sitani ubetelo wiye bidagu jurutic pa Yehova. I ng’eye Yesu udok upoyo wi julub pare de pi lembe ma rom. (Mark. 13:13; Yoh. 17:14) Wadaru neno kite ma kum lembila maeno upong’o ko, asagane i kind oro 100 m’ukadhu ceng’ini eni. Epong’o nenedi?

15. Pirang’o tin ng’om udaguwa nisagu zoo, man pirang’o wacikara ngo nilworo Sitani?

¹⁵ Nyanok i ng’eye kinde ma Yesu udoko Ubimo i oro 1914, jubayu Sitani wang’ acel kud i polo. Kawoni kwo tie likili ire iwi ng’om, kum ebekuro nyoth pare. (Nyu. 12:9, 12) Re ebekuro nyothne ungo ma cinge adola. Kwinyo ubenege man eloko kwinyone i kum dhanu pa Mungu. (Nyu. 12:13, 17) Eno re m’uketho tin ng’om udaguwa nisagu zoo. Re kadok kumeno de, wambe ku thelembe mi lworo Sitani ku ju pare. Watie ku tegocwiny ma rom ku ma jakwenda Paulo ubino ko. Ekiewo kumae: “Ka Mungu ni kudwa, ng’a ma bibedo jadhogwa?” (Rum. 8:31) Waketh genogen mwa zoo iwi Yehova pilembe calu ma waneno, lembila ma dupa ma juweco pigi i Thangambere 3:15 udaru nipong’o.

16-18. Curtis, Ursula, man Jessica ginwang’u kony ma kani i kum Thangambere 3:15 ma ginyang’ i iye?

¹⁶ Lembang’ola pa Yehova ma nwang’ere i Thangambere 3:15 copo konyowa ninyego ku peko moko ci. Umego Curtis m’utie misioner i ng’om mi Guam, uyero kumae: “Saa moko anwang’ara ku peko man turcwiny m’uketho nigwoko bedoleng’ para ni Yehova ubino ngo lembe ma yot. Ento nyamu lembe iwi Thangambere thek 3:15 ukonya niketho genogen  para asu i Vwa m’i polo.” Curtis ubekuro kud ava nindo ma Yehova bidaru iye peko mwa ceke.

¹⁷ Nyamego Ursula ma kwo i adhura mi Bavière i Allemagne uwacu nia, ninyang’ i Thangambere 3:15 uketho ebedo ma cwinye tek nia Biblia utie buku ma Mungu uyuyo i wiye. Eneno kite ma lembila mange ceke utie ku winjiri ku lembila maeno, man lembene uwang’u iye lee. Emedo kumae: “Lembe m’umulo adundena utie nia, Yehova umaku yub ndhundhu kara dhanu kud ubed m’umbe genogen.”

¹⁸ Nyamego Jessica ma kwo i ng’om mi Micronésie ke uyero kumae: “Fodi abepoy asu pi kite m’awinjara ko wang’ ma kwong’a kinde m’anwang’u lemandha! Lembila ma jukiewo i Thangambere 3:15 ubino nipong’o. Ekonya ninyang’ nia, peko ma wabenwang’ara ko tin e, utie ngo gin ma Yehova ukeco en piwa. Lembila eni utielo yiyoyic para bende nia nitimo ni Yehova ketho jubedo ku kwo ma ber kawoni man i nindo m’ubino ke ma ber nisagu.”

19. Pirang’o cwinywa tek nia thenge ma tokcen mi lembila mi Thangambere 3:15 bipong’o kakare?

¹⁹ Calu ma waneno, tin lembila m’i Thangambere thek 3:15 ubepong’o. Wanyang’ kamaleng’ nia kodhi pa dhaku man kodhi pa thwol utie jukani. Wanwang’u nia Yesu utie thenge ma kwong’a mi kodhi pa dhaku, bende ret m’enwang’u i ufunytiende udaru key, man kawoni dong’ etie Ubimo ma tek ma tho ngo. Yehova udaru ng’iyo jumapol ma gitie thenge mir ario mi kodhine. Calu thenge ma kwong’a mi lembila maeni udaru nipong’o, cwinywa tek nia thenge ma tokcen de bipong’o kakare, ma jubing’enyo ko wi thwol. Ebibedo anyong’a ma lee mandha ni jurutic pa Mungu kinde ma jubinyotho Sitani! Ento pi kawoni, kud ivoci. Mungu mwa utie Mungu ma jugeno. Ebikonjo mugisa ma kwanere ngo iwi “thek ceke m’i ng’om” nikadhu kud i kodhi pa dhaku​—Tha. 22:18.