1. Met Jiowa a féri ekiseló mwirin án Atam me Efa tipis? (Keneses 3:15)

 EKISELÓ mwirin án Atam me Efa tipis, Jiowa a fang ngeni mwirimwiriir kewe eú ápilúkúlúk me ren eú oesini mi fókkun aúchea, ewe mi mak lón Keneses 3:15.​—Álleani.

2. Pwata a fókkun aúchea ewe oesini lón Keneses 3:15?

² Ena oesini a mak lón ewe áeúin puk lón Paipel. Nge a wor met meinisin ekkewe pwal ekkóch puk lón Paipel ra riri ngeni wóón. Áwewe chék, efóch sáál a pinúkúfengeni epinúk émwúch, iwe pwal ina usun ren minne a mak lón Keneses 3:15, a pinúkúfengen masouen meinisin ekkewe puken Paipel lón chék eú pwóróus mi tipeeúfengen, ina án Kot epwe tiinaato emén Chón Amanaw pwe epwe nieló ewe Tefil me meinisin chienan kewe mi ngaw. * A ifa me amwararen ena pwóróus ngeni chókkewe mi tongei Jiowa!

3. Met sipwele káé lón ei lesen?

³ Lón ei lesen, sipwe pélúweni ekkeei kapas eis usun ewe oesini lón Keneses 3:15: Ié kewe ena oesini a fós usur? Ifa usun ena oesini a pwénútá? Me, ifa usun sia kúna feiéch seni ena oesini?

4. Ié ewe “serepenit,” me ifa usun sia silei?

⁴ Lón Keneses 3:14, 15, a fós usun emén “serepenit,” ‘mwirimwirin’ ena serepenit, emén “fefin,” me “mwirimwirin” ena fefin. Ewe Paipel a álisikich le silei ié kana. *  Sipwe poputá ren “ewe serepenit.” Wesewesen emén serepenit esap tongeni weweiti met Jiowa a erá lón ewe tánipiin Eten. Iwe, ewe emén mi kúna kapwúng me ren Jiowa, emén ménúmanaw mi tipachem. Epwe ié na? Pwärätä 12:9 a affata ié ena serepenit. A erá pwe “ewe serepenitin lom,” ina i Satan ewe Tefil. Nge, ié kana mwirimwirin ena serepenit?

5. Ié kewe mwirimwirin ewe serepenit?

⁵ Fán ekkóch, ewe Paipel a néúnéú ewe kapas mwirimwir ren an epwe áweweei chókkewe mi áppirúfichi emén, me usun itá iir néún eménna. Iwe, mwirimwirin ewe serepenit, iir ekkewe chónláng rese tuppwél, me ekkewe aramas mi usun Satan le ú ngeni Jiowa Kot me eriáfféwú néún kewe aramas. A kapachelong ekkewe chónláng mi likitaló leenier lón láng lón fansoun Noa we, me pwal ekkewe aramas mi ngaw mi áppirú féfférún me ekiekin semer we, ewe Tefil.​—Ken. 6:1, 2; Joh. 8:44; 1 Joh. 5:19; Jut. 6.

6. Pwata “ewe fefin,” esap i Efa?

⁶ Iei, sipwele ppii ié “ewe fefin.” Ena fefin, esap Efa. Pwata? Iei eú popun. Ewe oesini a affata pwe mwirimwirin ewe fefin epwe “puri” mékúren ewe serepenit. Usun met sia fen káé, pwe ewe serepenit ina i ewe chónláng mi ngaw Satan, me ese wor emén aramas tipis me lein mwirimwirin Efa kewe epwe tongeni nieló Satan. Iwe, ifa usun Satan epwe ninniiló?

7. Me ren Pwärätä 12:1, 2, 5, 10, ié ewe fefin lón Keneses 3:15?

⁷ Ewe sáingoon puk lón ewe Paipel a affata ié ewe fefin lón Keneses 3:15. (Álleani Pwärätä 12:1, 2, 5, 10.) Ena fefin esap i  seni fénúfan! A wor eféú maram ren pechen me epa mwaramwar wóón chamwan mi wor engol me rúúeféú fúú wóón. A oupwatiw emén ménúkol mi kkóló aúchean, ina ewe Mwúún Kot. Ena Mwú a nóm láng, iwe ese mwáál, ena fefin a pwal nóm láng. Neminna a liosuetá án Jiowa we mwicheich lón láng, ikewe ekkewe chónláng mi tuppwél ra nóm ie.​—Kal. 4:26.

8. Ié ewe mwirimwir mi kkóló aúchean, me ineet a wiliti ena mwirimwir? (Keneses 22:15-18)

⁸ Án Kot we Kapas a álisikich le silei ié ewe mwirimwir mi kkóló aúchean, mwirimwirin ewe fefin. A lamot epwe emén mwirimwirin Apraham. (Álleani Keneses 22:15-18.) Iwe, Jesus i mwirimwirin ena mwán mi tuppwél usun met Paipel a fen oesini. (Luk. 3:23, 34) Nge a lamot epwe manaman lap seni aramas pwe epwe tongeni unusen nieló Satan ewe Tefil. Iwe, lupwen a 30 ierin Jesus, a kepit ren ewe ngún mi fel. Atun Jesus a kepit, iwe a wiliti ewe mwirimwir mi kkóló aúchean, mwirimwirin ewe fefin. (Kal. 3:16) Mwirin án Jesus máló me manawsefál, Kot a “ämwärämwära ngeni ling me iteüöch,” me a ngeni “nemenem meinisin won läng me fanüfan,” kapachelong an tufichin “atala än Tefil angang.”​—Ipru 2:7; Mat. 28:18; 1 Joh. 3:8.

9-10. (a) Ié kewe ra pwal kapachelong lón ewe mwirimwir, me ineet atun a fis ena? (b) Met sipwele káé?

⁹ Nge me lúkún Jesus, a pwal wor ié a kapachelong lón ena mwirimwir. Ewe aposel Paulus a fós usun chókkana atun a ereni ekkewe chón Jus me ekkewe chón lúkún Israel, iir Chón Kraist mi kepit: “Are ämi oua nöün Kraist, mürin oua mwirimwirin Apraham, iwe, oupwe angei ewe mine Kot a fen pwonei.” (Kal. 3:28, 29) Atun emén Chón Kraist a kepit ren án Jiowa we ngún mi fel, a kapachelong lón mwirimwirin ewe fefin. Iwe ena mwirimwir, ikkena iir Jesus Kraist me chienan kewe le nemenem, iir 144,000. (Pwär. 14:1) Iir meinisin ra achocho le napanapeni napanapen Semer we, Jiowa Kot, me eáni an ekiek.

¹⁰ Pokiten sia silei ié kewe Keneses 3:15 a fós usur, iwe iei sipwele káé met Jiowa a fen féri ren an epwe apwénúetá ena oesini, me ifa usun a álisikich lón ei fansoun.

11. Met weween án ewe oesini erá pwe ewe serepenit epwe kkúú “apilipilin pechen” mwirimwirin ewe fefin?

¹¹ Me ren ewe oesini lón Keneses 3:15, ewe serepenit epwe kkúú “apilipilin pechen” mwirimwirin ewe fefin. A pwénúetá ena atun Satan a néúnéú ekkewe chón Jus me chón Rom le nieló Néún Kot we. (Luk. 23:13, 20-24) Atun a kinás epinipinin emén, esap tongeni fetál ren och fansoun. Iwe pwal ina usun ren Jesus, atun a máló, ese tongeni féri och mettóch ren och fansoun, me a nóm lón peiasan ren úkúkún úlúngát rán.​—Mat. 16:21.

12. Ifa usun ewe mwirimwir epwe puri mékúren ewe serepenit, me ineet epwe fis ena?

¹² Ewe oesini lón Keneses 3:15, a pwári pwe Jesus esap nómoffóch lón ewe peias. Pwata? Pún me ren ena oesini, ewe mwirimwir epwe puri mékúren ewe serepenit. Weween, Jesus epwe manawsefál. Me ina met a fis! Lón ewe aúlúngátin rán mwirin án Jesus máló, a manawsefál me a  inisini eú inisin ngún ese tongeni máló. Jesus epwe unusen nieló Satan lón ewe fansoun Kot a filatá. (Ipru 2:14) Kraist me chókkewe repwe fiti le nemenem, repwe nieló meinisin chón oputa Kot, iir mwirimwirin ewe serepenit.​—Pwär. 17:14; 20:4, 10. *

13. Ifa usun sia feiéch seni pwénútáán ewe oesini?

¹³ Ika en emén néún Kot chón angang, iwe ka kúna feiéch ren pwénútáán ena oesini. Jesus a feitiw fénúfan me a unusen áppirúfichi napanapen Seman we. (Joh. 14:9) Ina popun, ach kákkáé usun Jesus a álisikich ach sipwe silei me tongei Jiowa Kot. Sia pwal feiéch seni án Jesus káit me kapasen emmwen lón an ekkemmweni ewe mwichefelin Chón Kraist lón ei fansoun. A áiti ngenikich ifa usun sipwe eáni ewe esin manaw epwe álisikich le apwapwaai Jiowa. Me oukich meinisin sia kúna feiéch seni án Jesus máló, án ewe serepenit kkúú “apilipilin pechen.” Ifa usun? Lupwen Jesus a manawsefál, Jiowa a etiwa an we asor mi unuséch, ewe a “limetikich seni ach tipis meinisin.”​—1 Joh. 1:7.

14. Pwata sia silei pwe ewe oesini Jiowa a eáni me lón Eten, ese mwittir pwénútá lón ena atun? Áweweei.

¹⁴ Minne Jiowa a erá lón ewe oesini a eáni me lón Eten, a pwári pwe esap pwénútá lón ena atun. Epwe ttam fansoun án ewe fefin lón ena oesini epwe néúnatiw ewe mwirimwir mi pwonetiw, án ewe Tefil epwe ochufengeni chókkewe mi peni, me án koput epwe mááritá lefilen ekkena ruu kúmi. Ika sia weweiti ena oesini, iwe epwe álisikich pwe a áiti ngenikich pwe ei fénúfan mi nóm fán nemenien Satan epwe oputa chókkewe mi fel ngeni Jiowa. Jesus a pwal eáni ena esin éúréúr ngeni néún kewe chón káé. (Mark. 13:13; Joh. 17:14) Sia fókkun kúna pwénútáán ena kinikin lón ena oesini, ákkáeúin lón ekkewe 100 ier ra ló. Ifa usun?

15. Pwata a fókkun lapóló án fénúfan oputa mwirimwirin ewe fefin, nge pwata sisap niwokkusiti Satan?

¹⁵ Ekiseló mwirin án Jesus seikitá lón wisan kingen án Kot we Mwú lón ewe ier 1914, Satan a kóturutiw seni láng. A kalapus wóón fénúfan, me witiwiti fansoun an epwe ninniiló. (Pwär. 12:9, 12) Nge seni ena atun, a chómmóng met a féfféri. A fókkun song me oputa néún Kot kewe aramas. (Pwär. 12:13, 17) Ina popun, a fókkun lapóló án ei fénúfan oputa néún Kot kewe aramas. Nge sisap niwokkusiti Satan me chienan kewe. Sipwe fen lúkúlúk usun ewe aposel Paulus, ewe mi erá: “Are Kot a penikich, iö epwe tongeni pölüenikich?” (Rom 8:31) Sia tongeni unusen lúkú Jiowa, pún sia fen kúna pwe lape ngeni masouen ewe oesini lón Keneses 3:15 a fen pwénúetá.

16-18. Ifa usun Curtis, Ursula, me Jessica ra kúna álillis seni ar weweiti Keneses 3:15?

¹⁶ Án Jiowa we pwon lón Keneses 3:15 a tongeni álisikich le likiitú fán ese lifilifil sóssót sipwe kúna. Iei met emén misineri lón Guam, itan Curtis a erá: “A wor met a fis lón manawei mi áweiresi ai upwe chék tuttuppwél ngeni Jiowa. Nge ai ekilonei ewe oesini lón Keneses 3:15, a álisiei ai upwe chék lúkúlúk wóón Semei we lón  láng.” Curtis a mwétéresiti ewe atun Jiowa epwe asopwaló meinisin met ekkewe mi sótunikich.

¹⁷ Emén Chón Kraist fefin itan Ursula seni Bavaria a erá pwe an weweiti Keneses 3:15 a álisi le lúkú pwe ewe Paipel a pop seni Kot. A kúna ifa usun ekkewe ekkóch oesini ra riri ngeni ei oesini, me a fókkun ingeló ren. A pwal erá: “Atun ua silei pwe Jiowa a mwittir mwékút le fang ngeni aramas ápilúkúlúk, a lapóló ai tongei i.”

¹⁸ Iei met Jessica, seni Micronesia, a erá: “Ua chúen chechchemeni met ua meefi atun ua mirititi pwe ua kúna ewe enlet! Ewe oesini lón Keneses 3:15 a pwéppwénútá. A álisiei le chemeni pwe ekkewe mettóch sia riáfféú rer lón ei fansoun, esap iei met Kot a mochen fán itach. Ena oesini a alapaaló ai lúkú pwe ai angang ngeni Jiowa, a tongeni atoto ewe sókkun manaw mi múrinné seni meinisin lón ei fansoun me epwe lapóló múrinnéén lón mwachkkan.”

19. Pwata sia tongeni lúkúlúk pwe epwe pwénútá sáingoon kinikinin ewe oesini?

¹⁹ Sia silei seni ach ei lesen pwe Keneses 3:15 a fen pwéppwénútá iei. A ffat ngenikich ié mwirimwirin ewe fefin me mwirimwirin ewe serepenit. Jesus, i mwirimwirin ewe fefin mi aúchea seni meinisin, a mwó kinásen epinipinin pechen we, me iei a emén king mi fókkun manaman esap tongeni máló. Iei, Jiowa a fen filatá arapakkan meinisin chókkewe repwe fiti Néún na le nemenem lón láng. Pokiten a fen pwénútá ewin kinikinin ena oesini, iwe ese wor ach tipemwaramwar pwe epwe pwal pwénútá ewe sáingoon kinikin, ina án mwirimwirin ewe fefin puri mékúren ewe serepenit. Néún Kot kewe chón angang repwe fókkun pwapwa atun Satan epwe ninniiló! Nge ren mwo iei, sisap fangetá. Ach we Kot, i emén mi alúkúlúk. Epwe atoto chómmóng feiéch me ren mwirimwirin ewe fefin ngeni “chon ekewe mwü won unusen fanüfan.”​—Ken. 22:18.