1. Adam le Evi nih sualnak an tuah hnu tlawmpal ah Jehovah nih zeidah a tuah? (Genesis 3:15)

 ADAM le Evi nih sualnak an tuah hnu tlawmpal ah Jehovah nih a biapi tukmi chimchungbia pakhat thawngin an tefa kha ruahchannak a pek hna. Mah kha Genesis 3:15 ah hmuh khawh a si.—Rel.

2. Mah chimchungbia cu zeicah a biapit?

² Mah chimchungbia cu Baibal cauk i a pakhatnak ah hmuh khawh a si. Asinain Baibal chung i a dang cauk vialte he lamkhatkhat in an i pehtlai dih. Cahmai tampi fonh in ṭhitmi cauk pakhat i a kengruh bantukin Genesis 3:15 chung i bia cu Baibal cauk ah a ummi a konglam vialte a funtom dihtu a si. Mah cu Pathian nih Satan le Satan hnu a zulmi miṭhalo vialte hrawh awkah Khamhtu a thlah lainak kong kha a si. Jehovah a dawmi hna caah mah cu thluachuah taktak a si lai!

3. Hi capar ah zei kong dah kan i ruah hna lai?

³ Hi capar ah Genesis 3:15 i chimchungbia kong he aa tlaimi mah biahalnak hna hi kan i ruah lai: Chimchungbia ah ahote dah aa tel? Mah chimchungbia cu zeitindah a tlin? Mah in zeitindah ṭhatnak kan hmuh?

4. “Rul” cu ahodah a si i zeitindah kan hngalh khawh?

⁴ Genesis 3:14, 15 ah “rul,” rul “tefa,” “nu” le nu “tefa” kong a langhter. Baibal nih mah pakhat cio kha hngalh awkah a kan bawmh. * “Rul” kong in thawk hna u sih. Rul taktak nih cun Eden dum i Jehovah chimmi bia kha a hngalthiam kho lai lo. Cucaah Jehovah biaceihnak i aa tinhnak cu fimnak a ngeimi thilnung pakhat caah a si lai. Ahodah a si? Biathlam 12:9 nih mah rul cu ahodah a si ti kha fiang tein a langhter. Mah Baibal caang nih “rulpi tar” cu Satan Khuachia a si tiah fiang tein a langhter. Cu a si ah rul tefa cu ahodah a si?

5. Rul tefa cu ahote dah an si?

⁵ Baibal nih langhternak in tefa a ti tikah langhternak an pa i a ruahnak le a tuahsernak ningin a ruat i a tuah vemi kha a chim duhmi a si. Cucaah rul tefa cu Jehovah Pathian le a miphun a ralchanhmi Satan bantukin zumhfek tein a um lomi vancungmi le minung kha an si. Mah ah Noah chan ah vancung i an rian a kaltakmi vancungmi hna le an pa Khuachia bantuk ziaza a ngeimi miṭhalo pawl an i tel.—Gen. 6:1, 2; Johan 8:44; 1 Johan 5:19; Judas 6.

6. “Nu” cu zeicah Evi cu a si khawh lo?

⁶ Atu “nu” kong i ruah hna u sih. Mah nu timi cu Evi cu a si kho lo. Zeicah? A ruang pakhat in zohhmanh u sih. Mah chimchungbia ah minu tefa nih rul lu kha a “rial” lai tiah a ti. Atu kan i ruah cang bantukin rul cu thlarau pum a ngeimi Satan a si i mitlinglo a simi Evi tefa nih cun a lu rial khawh, hrawh khawh a si lai lo. Cu a si ah Satan cu zeitindah hrawh a si lai?

7. Biathlam 12:1, 2, 5, 10 ningin Genesis 3:15 ah langhtermi nu cu ahodah a si?

 ⁷ Baibal i a donghnak cauk nih Genesis 3:15 i nu cu ahodah a si ti kha a langhter. (Biathlam 12:1, 2, 5, 10 rel.) Mah cu nu taktak kha a si lo! Mah nu nih thlapa kha a ke in a lamh i a lu ah arfi 12 bawiluchin aa chinh. Aa thleidang tukmi nau a ngei—mah cu Pathian Pennak kha a si. Mah Pennak cu vancung ah dirh a si caah mah nu zong vancung ah a ummi a si ve lai. Mah nu nih zumhfekmi vancungmi hna in dirhmi, vancung Jehovah bupi kha a aiawh.—Gal. 4:26.

8. Minu tefa i a biapi bikmi cu ahodah a si, zeitik in dah cutin a hung si? (Genesis 22:15-18)

⁸ Baibal nih minu tefa i a biapi bikmi kha hngalhthiam awk zongah a kan bawmh. Mah tefa cu Abraham hrinsor chungin a si lai. (Genesis 22:15-18 rel.) Chimchung a si bantukin Jesuh cu mah zumhfekmi Abraham hrinsor a si taktak. (Luka 3:23, 34) Asinain mah tefa nih Satan Khuachia kha a hrawh khawh caah minung pakhat nakin ṭhawnnak a ngei deuhmi a si a hau. Cucaah Jesuh cu kum 30 hrawng a si tikah Pathian Fapa in thiang thlarau toih a si. Cutin thiang thlarau toih a si tikah Jesuh cu minu tefa i a biapi bikmi a hung si. (Gal. 3:16) Jesuh cu a thih i a thawh ṭhan hnuah Pathian nih “sunparnak le upatnak” kha a chinh i “Khuachia rianṭuannak hrawh” ding i telin “vancung le vawleicung i a ummi nawlngeihnak vialte” kha a pek.—Heb. 2:7; Matt. 28:18; 1 Johan 3:8.

9-10. (a) Minu tefa ah ahote zong dah an hun i tel i zeitik in dah an i tel? (b) Atu zei kong dah kan i ruah hna lai?

⁹ Asinain Jesuh lengah midang zong minu tefa i a pahnihnak ah an hun i tel ve. Lamkaltu Paul nih Judah mi le Jentail mi chiti thuhmi Khrihfa hna sin a chimmi ah mah tefa i aa telmi hna kong kha hitin a langhter: “Khrih ta nan si ahcun Abraham tefa nan si i Pathian biakam ningin rocotu nan si.” (Gal. 3:28, 29) Jehovah nih Khrihfa pakhat kha thiang thlarau in chiti a toih tikah anih cu minu tefa ah a hun i tel. Cucaah mah tefa cu Jesuh Khrih le amah he uktu a ṭuanṭi ding 144,000 kha an si. (Biat. 14:1) Annih cu an Pa, Jehovah Pathian bantukin khua an ruat i thil an tuah.

¹⁰ Atu Genesis 3:15 i langhtermi cu ahote dah an si ti kha kan hngalh cang. Cucaah Jehovah nih mah chimchungbia kha a dotdot in zeitindah a tlinter i mah in zeitindah ṭhatnak kan hmuh ti kha a tawinak in i ruah hna u sih.

11. Zeiti lam in dah minu tefa i a “kedil” cu cuk a si?

¹¹ Genesis 3:15 i chimchungbia ningin rul nih minu tefa i a “kedil” kha a cuk lai. Mah cu Satan nih Pathian Fapa thah awkah Judah mi le Rom mi a hman hnanak thawngin a rak tling. (Luka 23:13, 20-24) Kedil hma nih mi pakhat kha chikkhat chung a beiter khawh bantukin Jesuh thihnak nih chikkhat cu zeihmanh tuah khawh loin a umter i nithum chung thlan ah nunnak ngei loin a umter.—Matt. 16:21.

12. Rul i a lu cu zeitindah rial a si lai i zeitik ah dah a si lai?

¹² Genesis 3:15 i chimchungbia nih Jesuh cu thlan chungah a um zungzal lai lo ti kha a langhter. Zeicah? Chimchungbia ningin tefa nih rul lu kha a rial lai caah a si. Mah cu Jesuh a kedil hma cu a dam a hau tinak a si. Cutin a rak si taktak! Jesuh cu a thihnak in a nithumnak ni ah a thi kho lomi thlarau pum in a tho ṭhan. Pathian rikhiahmi caan a  phanh tikah Jesuh nih Satan kha a hrawh cang lai. (Heb. 2:14) Khrih le amah he uktu a ṭuan dingmi hna nih Pathian ral vialte—rul tefa kha an hrawh dih cang hna lai.—Biat. 17:14; 20:4, 10. *

13. Mah chimchungbia tlinnak in zeitindah ṭhatnak kan hmuh?

¹³ Aa pumpe cangmi Pathian sal na si ahcun mah chimchungbia tlinnak in ṭhatnak na hmu ko lai. Jesuh cu minung pakhat in vawlei ah a ra. A Pa sining hna kha tling tein a langhter. (Johan 14:9) Cucaah amah thawngin Jehovah Pathian kong kha kan hngalh i kan hun dawt. Cun Jesuh cawnpiaknak le tuchan Khrihfabu a hruai ning zongin ṭhatnak kan hmu. Jehovah mithmai ṭha hmuh awkah a kan bawmmi lam in nunning zong a kan cawnpiak. Kan dihlak in Jesuh thihnak—a kedil cuk a sinak in ṭhatnak kan hmu kho. Zeitin in dah? Jesuh nih a thih i a thawhṭhan hnuah ‘kan sualnak vialte in thenh’ kan si nakhnga a tlingmi raithawinak in a thisen man kha a pek.—1 Johan 1:7.

14. Eden dum ah Jehovah pekmi chimchungbia cu mah lio caan ah a rak tling lo ti kha zeitindah kan hngalh? Fianter.

¹⁴ Eden dum i Jehovah pekmi mah chimchungbia cu mah lio caan ah a rak tling lo ti kha Jehovah bia nih a langhter. Minu nih tefa a hrin nakhnga, Satan nih a hnu zultu pawl a khawmh khawh hna nakhnga le phu pahnih karah ralnak (asiloah huatnak) a um nakhnga a caan a hau. Satan ukmi hi vawlei nih Jehovah a biami a huat hna lai ti kha ralrin a kan pek caah mah chimchungbia kong hngalhnak in ṭhatnak kan hmu. A hnuah Jesuh nih a zultu pawl kha mah he aa lomi ralrinnak a rak pek hna. (Marka 13:13; Johan 17:14) A hleiin a luancia kum 100 chungah mah chimchungbia a tlinmi kha fiang tein kan hmuh khawh. Zeitin in dah?

15. Satan vawlei huatnak cu zeicah a fah chinchin, asinain Satan cu zeicah ṭih awk a ruang a um lo?

¹⁵ Jesuh cu 1914 ah Messiah Siangpahrang in rian pek a si hnu tlawmpal ah Satan kha vancung in a thlak. Atu ah Satan cu vawlei lawngah umnak nawl a ngei i hrawh a si lai kha a hngak. (Biat. 12:9, 12) Asinain hngah sawhsawh in a hngak lo. Satan cu a thin a hung tuk i Pathian miphun kha a doh hna. (Biat. 12:13, 17) Mah ruangah Satan vawlei nih Pathian miphun kha a huat chin hna. Asinain Satan le a mi pawl kha ṭih awk a ruang a um lo. Mah canah hitin a ṭialmi lamkaltu Paul bantuk zumhnak kan ngei kho: “Pathian cu kanmah lei i a ṭan ahcun aho nih dah an kan doh khawh lai?” (Rom 8:31) Genesis 3:15 i chimchungbia tampi a tlinmi kha kan hmuh cang caah Jehovah cungah a fekmi zumhnak kan ngei kho.

16-18. Curtis, Ursula le Jessica cu Genesis 3:15 kong hngalhthiamnak in zeitindah ṭhatnak an hmuh?

¹⁶ Genesis 3:15 i Jehovah biakam nih kan nunnak ah kan tonmi zei bantuk harnak paoh kha tei khawh awkah a kan bawmh. Guam ah missionary a ṭuanmi Curtis nih hitin a ti: “A caan ah Jehovah cung i ka zumhfehnak a hneksakmi harnak le lungdonghnak hna ka tong. Asinain Genesis 3:15 i chimchungbia kong ruahnak nih vancung ka Pa kha i bochan peng awkah a ka bawmh.” Jehovah nih kan tonmi harnak vialte a donghter lai caan kha Curtis nih aa ngaih tuk.

¹⁷ Bavaria ah a ummi unaunu Ursula nih Genesis 3:15 kong hngalhthiamnak nih Baibal  cu Pathian thawchuah hnawhmi a si ti kha zumh awkah a ka bawmh tiah a ti. Mah chimchungbia le a dang chimchungbia vialte an i pehtlaih ning a hmuh tikah a lung a suk tuk. Hitin a ti: “Minung nih ruahchannak ngei loin kan um nakhnga lo Jehovah nih thil a tuah colh ti ka hngalh tikah ka lung a ka suk tuk.”

¹⁸ Micronesia ah a ummi Jessica nih hitin a ti: “Biatak ka hngalh hmasa bik lio i ka intuar ning kha kaa cinken rih! Genesis 3:15 i chimchungbia cu a tling thluahmah. Mah nih tuchan kan tonmi harnak hna cu Jehovah nih a kan tinhpiakmi a si lo ti kha i cinken awkah a ka bawmh. Cun Jehovah biaknak nih atu ah a ṭha bikmi nunnak ngeih awk le hmailei ah a ṭha deuhmi nunnak ngeih awkah a ka bawmh timi ka zumhnak zong a fehter chin.”

19. Chimchungbia i a donghnaklei cu a tling hrimhrim lai tiah zeicah kan zumh khawh?

¹⁹ Kan i ruah cang bantukin Genesis 3:15 cu atu ah a tling cuahmah. Minu tefa le rul tefa cu fiang tein hngalh an si cang. Minu tefa i a biapi bikmi Jesuh cu a kedil hma a dam cang i atu ah a thi kho lomi Siangpahrang sunparnak pek a si cang. Minu tefa i a pahnihnak ah aa telmi hna thimnak cu aa liim deng cang. Mah chimchungbia i a hmasalei cu a tlin cang caah a donghnaklei a simi, rul lu rial a si lainak zong a tling hrimhrim lai ti zumh dingin a ruang kan ngei. Satan hrawh a si tikah Pathian salle cu an i nuam tuk lai! Mah caan a phanh hlan tiang na lung dong hlah. Kan Pathian cu zumhawktlak a si. Minu tefa thawngin Pathian nih “vawleicung miphun vialte” kha thluachuah tampi a pek hna lai.—Gen. 22:18.