1. ¿Kʼãrẽta osi Jeowabara Adán Evaʉ̃me nemitia oda tẽãra? (Génesis 3:15).

 ADÁN Evaʉ̃meba nemitia oda tẽãra Jeowaba propesiadeba jarasi, ãyideba zebʉrʉra nebia jʉ̃ãita. Maʉ̃ propesiara ũduseapanʉ Génesis 3:15de (akʉra).

2. ¿Kʼãrẽa arigʉ yibia propesia Génesis 3:15de jarabʉra?

² Naʉ̃ propesiara Daizeze Bedʼeade yi nabema librodebʉ, naʉ̃ra yibia wuabema propesiarasida naʉ̃ ʉ̃rʉ bedʼeabʉ baera. Bari jaradaita, krĩchara jʉ̃karaba tʉbʉ toabemata ãba zebibʉta, maʉ̃ kĩrãkʼa propesia Génesis 3:15debʉbara wuabema librora propesia ʉ̃rʉ bedʼeabʉra ãba zebibʉ iyabaʉ bedʼeata jaraita. ¿Saʉ̃ maʉ̃ bedʼeara? Daizezeba Ẽdrʉbibari aba zokʼaita, maʉ̃ba Diaruta akʉza iyi kʼaidubemara jõma makenaita. * Naʉ̃ra bedʼea bia yi Daizeze Jeowa kãgapanʉitara.

3. ¿Kʼãrẽta kʼawuadai naʉ̃ artikulodera?

³ Naʉ̃ artikulodera kʼawuadayi propesia Génesis 3:15 ʉ̃rʉ widibʉta: ¿kʼaira ʉ̃rʉ bedʼeabʉ maʉ̃ propesiabara?, ¿maʉ̃ra sãwũã aripe berabari zebʉrʉ? akʉza ¿maʉ̃ba sãwũã idi kʼarebabʉ dayirãra?

4. ¿Kʼai damara akʉza sãwũã kʼawuapanʉ?

⁴ Génesis 3:14, 15de bedʼeabʉ «dama» ʉ̃rʉ akʉza iyideba zedara ʉ̃rʉ, adewara «yuwẽrã» ʉ̃rʉ akʉza iyideba  zedara ʉ̃rʉ. Daizeze Bedʼeaba naʉ̃ra ʉ̃rʉ bedʼeabʉ baera dayirãbara bia ũdukʼawuapanʉ kʼairata. * Nããra bedʼeadaya dama ʉ̃rʉ. Naʉ̃ra damaʼara ẽ basibaibara, iyita damaʼarabasibʉrʉ ũrĩ ẽ bakasi Jeowaba kʼãrẽ berabarita jaradara. Mawũẽra naʉ̃ra ẽbẽra buru biabasibaibara, Daizeze Bedʼeabara jarabʉ kʼaita naʉ̃ra. Apocalipsis 12:9de jarabʉ naʉ̃ damara Diaruta, ¿kʼaira damaneba zedarãra?

5. ¿Kʼaira damaneba zedarãra?

⁵ Daizeze Bedʼeade «descendencia» jarabʉrʉdera naʉ̃ bedʼeabara jarakĩrãbʉ, ẽbẽra abaʉba awuruba obʉta abarika obʉta akʉza abarika krĩchabʉta, maʉ̃ba jaraseapanʉ maʉ̃ wũãwũã kĩrãkʼabʉta. Damaneba zedarabara jarakĩrãbʉ ẽbẽrarãta akʉza angelerata Daizeze Jeowaba zokʼabʉta okĩrã ẽãta, Diarude kĩrãkʼa. Maʉ̃rane edabʉ angelera Noé ewaribaside ʉ̃tʉbadata ẽbẽra kakuade zedarata akʉza ẽbẽrarã nemitia opanʉta ãyi zeze Diarude kĩrãkʼa (Gén. 6:1, 2; Juan 8:44; 1 Juan 5:19; Jud. 6).

6. ¿Kʼãrẽa Eva ẽ Génesis 3:15de yuwẽrã ʉ̃rʉ bedʼeabʉra?

⁶ ¿Kʼai yuwẽrãra? ¿Evaka? Mawũã ẽ. Propesiaba jarabʉ yuwẽrãneba zedaraba dama buruta birachita. Dayirãba kʼawuada kĩrãkʼa damara Diaru, maʉ̃ kʼarea Evadeba zebʉrʉra ẽbẽrarã nemitia omia baera, beabe ẽ bakasi damara.

7. Génesis 3:15de bedʼeabʉ yuwẽrã ʉ̃rʉ, ¿sãwũã kʼarebabʉ Apocalipsis 12:1, 2, 5 akʉza 10ba kʼawuaita kʼaita maʉ̃ yuwẽrãra?

⁷ Apocalipsis librode jara ũrĩbibʉ kʼaita yuwẽrã Génesis 3:15de jarabʉra (akʉra Apocalipsis 12:1, 2, 5, 10). Naʉ̃  ẽbẽra wẽrãra bʉwʉrʉ akʉza yara barabʉ ẽ. Maʉ̃ wẽrã jĩrʉ edrera basi jedekota, iyi burudera koronata erbʉ maʉ̃ne 12 chĩdaurabʉ. Akʉza naʉ̃ wẽrãba wũãwũãta tosi, maʉ̃ wũãwũãra Daizeze Nokʼo, naʉ̃ Nokʼora ʉ̃tʉbema baera yuwẽrãsida ʉ̃tʉbemabaibara. Naʉ̃ wẽrãbara jarakĩrãbʉ Jeowa organizasion ʉ̃tʉbemata, maʉ̃ organizasione edapanʉ angelera kʼẽrẽpapanʉrata (Gál. 4:26).

8. ¿Kʼaibasi yuwẽrãneba zedadebema yi audre yibiara akʉza sõbedaʉba ʉ̃ta mawũã berabarisi? (Génesis 22:15-18).

⁸ Daizezeba bia jara ũrĩbibʉ baera, dayirãba kʼawuaseapanʉ saʉ̃ta yuwẽrãneba zedadebema yi audre yibiara. Daizeze Bedʼeabara jarabʉ naʉ̃ra zeibarabasita Abrahánʼneba (akʉra Génesis 22:15-18). Naʉ̃ propesiara aripe berabarisi, Jesura Abrahánʼneba zesi baera (Luc. 3:23, 34). Mamina maʉ̃ yuwẽrãneba zedadebemara ẽbẽra ẽ baibarabasi Diaru beaira. Maʉ̃ kʼarea Jesu 30 poagabaside Jeowaba jidasi iyi jaure zareaba, maʉ̃neba ʉ̃ta Daizeze Warrabasi, mawũã yuwẽrãneba zedadebema yi audre yibiabasi (Gál. 3:16). Jesu bei kʼãrãpe akʉza jẽda piradrʉda tẽã iyi ʉ̃ta wãside, Daizezebara iyaʼa zareata diasi mawũã zokʼamarẽã ʉ̃tʉbʉta akʉza nama drʉadebʉta, mawũã Jesubara jõma jõbiyi Diaruba obʉra (Heb. 2:7; Mat. 28:18; 1 Juan 3:8).

9, 10. (1) ¿Kʼaira awurura yuwẽrãneba zedara akʉza sõbede mawũã berabari? (2) ¿Atia kʼãrẽta kʼawuadayi?

⁹ Mamina, bʉ awuruta maʉ̃ yuwẽrãneba zedata. Apostol Pabloba jarasi kʼairata naʉ̃ra awurura, kristiano judiorata akʉza awuru pʉwʉrʉdebema kristianota naʉ̃ bedʼea bʉside: «Adewara marata Kristodebʉrʉ, mawũãra Abrahánʼneba zeda akʉza nebia diaya adata marabida jidaseabʉ» (Gál. 3:28, 29). Jeowaba iyi jaure zareaba kristiano abaʉta jidara, naʉ̃ra yuwẽrãneba zedadebema babʉrʉ. Yuwẽrãneba zedadebemara naʉ̃ra: Jesu akʉza iyiʉ̃meba 144.000 ʉ̃tʉ zokʼairata (Apoc. 14:1). Naʉ̃ra jõmaʉ̃ba abarika opanʉ akʉza abarika krĩchapanʉ yi Zeze Jeowade kĩrãkʼa.

¹⁰ Dayirãba kʼawuatabeda kʼaira ʉ̃rʉ bedʼeabʉta Génesis 3:15dera, kõbebʉrʉ kʼawuadayi kʼãrẽta ozebʉrʉta Jeowaba iya jarada aripe oita akʉza kʼawuadayi idi ewade sãwũã kʼarebabʉta naʉ̃ propesiaba.

11. ¿Sãwũã kasi yuwẽrãneba zedara jĩrʉ ãbidarramara?

¹¹ Génesis 3:15ba jarabʉ damabara jĩrʉ ãbidarrama kaita yuwẽrãneba zedara. Maʉ̃ra aripe berabarisi Diaruba judioraʼa akʉza romanoraʼa beabiside Daizeze Warrata (Luc. 23:13, 20-24). Jĩrʉ ãbidarrama pora ewari biobayeda wãbe ẽ chubeseabʉ, maʉ̃ kĩrãkʼa Jesura ewari ũbeabayeda kʼãrẽ oẽ basi iyira beisi baera (Mat. 16:21).

12. ¿Sõbede akʉza sãwũã birachi dama burura?

¹² Génesis 3:15de propesia jarabʉ aripe berabarimarẽãra, Jesura jipa beibara ẽ basi. Naʉ̃ propesiaba jarabʉ baera yuwẽrãneba zedabara dama burura birachibasita. Maʉ̃ kʼarea Jesu beida ewari ũbea babʉrʉde jẽda piradrʉsi jaurede, mawũã wua beika bʼaita, maʉ̃ba Jeowaba Diaru beaita ewari jʉrʉda zebʉrʉdera, Jesuba jõbiyi Diarura (Heb. 2:14). Akʉza yi Jesuʉ̃meba zokʼapanʉrabara  kʼarebayi Daizeze nejʉrara jõma makenaita, maʉ̃rãra damaneba zedara baera (Apoc. 17:14; 20:4, 10). *

13. ¿Sãwũã kʼarebabʉ naʉ̃ propesia aripe berabarinʉmʉbara?

¹³ Bʉta kristiano yi buru kʼoemabʉrʉ akʉza Daizeze Bedʼeata biʼia kʼawuabʉbʉrʉ, naʉ̃ propesiaba bʉra biode kʼarebabʉbaibara. Jesura nama egoroedara zesi dayi ẽbẽra kĩrãkʼa akʉza iyara yi Zeze sãwũãbʉ kĩrãkʼa jõma oũdubisi (Juan 14:9). Iyi yizadeba kʼarebasi dayirãba Jeowa ũdukʼawuamarẽã akʉza mawũã iyi kãga zeita, iya dayirã jaradiabʉdeba akʉza iya organizasion sãwũã edebʉdeba dayirãra kʼarebabʉ. Jesubara dayirã jaradiabʉ kʼãrẽ, kʼãrẽta oibarata Jeowa sobiabita. Jesu jĩrʉ ãbidarrama kadaba (iyi beiside), kʼarebabʉ dayirãta, Jesu jẽda piradrʉsidera diasi baera iyi wata dayirã jõmaʉ̃bari, mawũã dayirãta nemitiadeba ẽdrʉbita (1 Juan 1:7).

14. ¿Sãwũã kʼawuapanʉ Jeowaba Edénʼne propesia jaradara waña aripe berabari ẽ basita?

¹⁴ Jeowaba propesia Edénʼne jaradara waña aripe berabari ẽ basi, mawũẽra ewari bio berabaribarabasi yuwẽrãba iyideba zedata erbamarẽã akʉza Diaruba iyi kʼaidubemata erbamarẽã, mawũã ãyirainʉ yi jʉradamarẽã. Poaga mejãcha berabarida tẽã Jesuba iyi kʼaidubemaraʼa naʉ̃ bedʼea kĩrãkʼabʉta jarasi (Mar. 13:13; Juan 17:14). ¿Sãwũã kʼarebabʉ dayirãra naʉ̃ kʼawuaibara? Kʼarebabʉ dayirãta jʉra kʼawua bamarẽã: naʉ̃ drʉa Diaruba zokʼabʉbara jʉradai baera Jeowa ʉ̃rʉ Kʼawuabipanʉrãta. Akʉpanʉ naʉ̃ propesiara jõma aripe berabari zebʉrʉta, mamina audre ũdupanʉ naʉ̃ 100 poaga berabari zebʉrʉde, ¿kʼãrẽa mawũã jarapanʉ?

15. (1) ¿Kʼãrẽa ẽbẽrarãbara Jeowa ʉ̃rʉ Kʼawuabipanʉrãra audre jʉrapanʉ? (2) ¿Kʼãrẽa wawiada ẽ baibara Diarura?

¹⁵ Jesura Daizeze Nokʼobasi 1914de, maʉ̃ne ʉ̃tʉba jʉretasi Diaruta. Atiara Diarubara naʉ̃ drʉadebʉrʉ ẽbẽrarãta sewabʉ akʉza jʉ̃ãbʉ iyi beadai ewari zeita (Apoc. 12:9, 12). Mamina iyara bari kʼãrẽ oẽã jʉ̃ãbʉ ẽ, mejãcha kĩrʉbʉ baera zʉbʉria onʉmʉ Jeowa pʉwʉrʉrata (Apoc. 12:13, 17). Maʉ̃ kʼarea Jeowa ʉ̃rʉ Kʼawuabipanʉrãra mejãcha pẽwãpanʉ zʉbʉria odaita mamina perada ẽ baibara Diaru kʼarea akʉza iyi kʼaidubema kʼarea, awuarabʉrʉ wãrĩnu ĩjãbaibara Pabloba ĩjãbada kĩrãkʼa, mawũã ũdubisi iya bʉside: «Daizezeta dazhiaare bʼʉra, ¿dazhira kʼaiba sãwũãĩpe?» (Rom. 8:31). Dayirãbara wãrĩnu ĩjãseapanʉ Jeowa ʉ̃rʉ, Génesis 3:15de propesia jarabʉra jõma aripe berabari wã baera.

16-18. ¿Sãwũã kʼarebasi Curtis, Ursula akʉza Jessicara propesia Génesis 3:15debʉ kʼawuaibara?

¹⁶ Jeowaba bedʼea Génesis 3:15de jaradabara kʼarebabʉ dayirãba bedʼea zroma awuantadaita. Curtisʼra Daizeze Bedʼea jaradiabʉ pʉwʉrʉ Guamʼne, iya naʉ̃ta jarabʉ: «Edaʉde mʉ̃a bedʼea zroma ũdubʉba zareabʉ mʉ̃ Jeowaʉ̃me kʼẽrẽpa bʼaita, mamina mawũã berabaribʉrʉde Génesis 3:15de bedʼea jarabʉta krĩchaiba, kʼarebasi audre ĩjãita mʉ̃ Zeze ʉ̃tʉbemata». Curtisbara meserabai zemarẽã kãgabʉ Daizeze ewarita, mawũã jõbita zʉbʉriara.

 ¹⁷ Mebẽã wẽrã Ursula, iyira Bavieradebema (Alemania), iya jarabʉ propesia Génesis 3:15 bia ũrĩba audre ĩjãbisita Daizeze Bedʼeara Daizezedeta. Iyira audre kʼarebasi ũduiba, wuabema propesiarasida bedʼeabʉta Génesis 3:15de propesiabʉ ʉ̃rʉ, adewara iya jarabʉ: «Mʉ̃ra mejãcha sobiasi kʼawuaside Jeowaba mesera nekʼãrẽ osita mawũã ẽbẽraba nebia zeita jʉ̃ãmarẽã».

¹⁸ Jessica Micronesiadebemaba jarabʉ: «Mʉ̃a wabida kĩrãbebʉ mʉ̃ sãwũã sentisita mʉ̃a wãrĩnuta kʼawuaside Daizeze ʉ̃rʉ. Génesis 3:15de propesia jarabʉta aripe berabarinʉmasi, naʉ̃ propesiaba jarabʉ bia kʼawuaiba, kʼarebasi kʼawuaita dayirã kʼãwũãpanʉra biade panʉ ẽãta, ʉ̃rabʉrʉ zeita dayirã sobiade panaita. Naʉ̃ propesiaba kʼarebabʉ mʉ̃a audre ĩjãita Daizezeba zokʼabʉta obʉbʉrʉ, bia bʼaita idi ewade mamina ẽjũã biade audre bia bʼaita».

19. ¿Kʼãrẽa wãrĩnu ĩjãnaibara yi propesiade bedʼea aba waebʉra aripe berabarita?

¹⁹ Dayirãba ũdutabeda kĩrãkʼa Génesis 3:15de propesia jarabʉra jõma aripe berabarinʉmʉ. Dayirãbara kʼawuapanʉ kʼairata yuwẽrãneba zedarãra akʉza damaneba zedarãra. Yuwẽrãneba zedadebema yi audre yibiara Jesu, iyira jĩrʉ ãbidarrama kasi iyi beasidade, mamina iyi beidata jẽda piradrʉsi jaurede, mawũã beikatabʉ akʉza Nokʼo zarea barabʉ. Aranʉbai jõma jida berabariyi awurura yuwẽrãneba zedarata. Naʉ̃ propesiade yi bedʼea nããra jarabʉra aripe berabarisi, mawũẽra waebʉ naʉ̃ propesiade ababema bedʼea jarabʉta aripe berabarita: dama burura birachiyi. Yi Daizeze ode kʼẽrẽpapanʉrãra mejãcha sobiadayi Diaru jõbʉrʉdera. Maʉ̃ ewari zeiyedara dayirãra paeda ẽ baibara, dayirãbara soiduba ĩjãnaibara Jeowata, yuwẽrãneba zedaraneba «nebia ũdudayi pʉwʉrʉ naʉ̃ drʉadebʉra jõma» (Gén. 22:18).