1. Kisa Jéova fè roun tibi tan apré Adan ké Èv péché ? (Genèse 3:15).

 ROUN tibi tan apré Adan ké Èv péché, Jéova bay yé timoun roun èspwar gras a roun bèl profési. Nou ka jwenn sa profési-a annan Genèse 3:15 (li).

2. Poukisa sa profési-a èspésyal ?

² Nou ka trouvé sa profési-a annan prémyé liv Labib-a, é nou pouvé di ki tout ròt profési-ya annan Labib-a ka tchenbé asou sa profési-a. Sa nou ka trouvé annan Genèse 3:15, a potomitan tout Labib-a ; tout liv-ya annan Labib-a ka palé di roun menm bagaj : roun moun ké libéré nou, é i ké krazé Djab-a ké tout sa ki ka maché ké li *. A ké roun soulajman pou tout sa ki kontan Jéova !

3. Ki késyon nou ké réponn annan sa artik-a ?

³ Annan sa artik-a, nou ké réponn sa trwa késyon-yan asou profési Genèse 3:15 : Di kimoun yé ka palé annan sa profési-a ? Kouman sa profési-a té ké fèt ? É ki bénédiksyon nou ka jwenn paské sa profési-a ka fèt ?

4. A kimoun ki « sèrpan »-an, é kisa ki ka pèrmèt nou di sa ?

⁴ Annan Genèse 3:14, 15, Jéova ka palé di plizyèr moun : roun « sèrpan », « désandans » sa sèrpan-an, roun « fanm » ké « désandans » sa fanm-an. Labib-a ka idé nou savé di kimoun yé ka palé *. Annou koumansé  ké « sèrpan »-an. Roun vré sèrpan pa té ké pouvé konprann sa Jéova té di annan jarden Édèn-an. Donk a fòrséman roun moun entélijan Jéova kondané. A kimoun ? Révélation 12:9 ka di nou a kimoun. Yé ka di nou ki « sèrpan-an ki té la o koumansman », a Satan Djab-a. Mé a kimoun ki désandans sèrpan-an ?

5. A kimoun ki désandans sèrpan-an ?

⁵ Détan lò Labib-a ka palé di « désandans », i lé palé di moun ki ka aji épi ki ka pansé kou rounòt moun. É afòrs yé ka sanblé sa moun-an, yé té ké pouvé di ki a so pitit. Donk désandans sèrpan-an, a zanj-ya ké moun-yan ki kont Jéova ké so sèrvitèr-ya, kou Satan. Parèkzanp zanj-ya ki lésé syèl-a annan lépòk Noé, épi osi moun-yan ki méchan ki ka aji kou yé papa Djab-a. (Gen. 6:1, 2 ; Jean 8:44 ; 1 Jean 5:19 ; Jude 6).

6. Poukisa « fanm »-an, a pa Èv ?

⁶ Annou palé di « fanm »-an aprézan. A pa Èv paské profési-a té ka di ki désandans fanm-an té ké krazé tèt sèrpan-an. Kou nou wè l’, sèrpan-an ka réprézanté roun zanj, Satan. Donk, pyès pitit Èv (yé pyès pa parfè) pa té ké pouvé krazé tèt sèrpan-an. Mé atò, kouman yé ké krazé Satan ?

7. Dapré Révélation 12:1, 2, 5, 10, a kimoun ki fanm-an yé ka palé annan Genèse 3:15 ?

⁷ Dèrnyé liv Labib-a ka di nou di ki fanm Genèse 3:15 ka palé (li Révélation 12:1, 2, 5, 10). A pa nenpòrt ki fanm ! Lalin anba so pyé é i gen roun kouròn ké 12 zétwèl asou so tèt. Anplis di sa, i ka akouché roun timoun èspésyal : rwayonm Bondjé-a.  Kou Rwayonm-an annan syèl-a, fanm-an osi divèt annan syèl-a. I ka réprézanté parti òrganizasyon Bondjé-a ki annan syèl-a, sa lé di tout zanj-ya ki fidèl (Gal. 4:26).

8. A kimoun ki prémyé parti désandans fanm-an, é kitan i divini l’ ? (Genèse 22:15-18).

⁸ Paròl Bondjé-a ka idé nou savé osi a kimoun ki prémyé parti désandans fanm-an. Kou profési nou ka jwenn annan Genèse 22:15-18 (li) ka di l’, sa désandans-a té divèt sa roun pitit di pitit Abraam. É Jézi té sa roun pitit di pitit Abraam (Luc 3:23, 34). Mé désandans fanm-an té divèt osi gen plis fòrs pasé roun moun, paské i té pou krazé Satan Djab-a. Lò i té gen apéprè 30 lannen, Bondjé wen so Pitit Jézi ké lèspri sen. A la i divini prémyé parti désandans fanm-an (Gal. 3:16). Apré so lanmò é apré so rézirèksyon, Bondjé « bay li laglwar kou roun kouròn asou so tèt ». É i bay li osi « tout pouvwar annan syèl-a ké asou latè-a », parèkzanp pouvwar pou « détrwi travay Djab-a » (Héb. 2:7 ; Mat. 28:18 ; 1 Jean 3:8).

9-10. a) Kimoun ankò ka fè parti di désandans fanm-an, é kouman yé ka vin fè parti di sa désandans-a ? b) Kisa nou ké wè aprézan ?

⁹ Annou palé aprézan di dézyèm parti désandans fanm-an. Lò apot Pòl palé pou krétyen wen-yan ki té Jwif ké sa ki pa té Jwif, i di a té kimoun. I di yé : « Kou zòt di Kris, zòt sa vréman désandans Abraam-an, zòt érityé parapòrta roun promès » (Gal. 3:28, 29). Roun krétyen ka fè parti di désandans fanm-an lò Jéova ka wen sa moun-an ké so lèspri sen. Donk, annan sa désandans-a, i gen Jézi ké 144 000-ya ki ké dirijé ké li (Rév. 14:1). Yé chak ka fè tousa yé pouvé pou réfléchi ké pou aji kou so Papa, Jéova.

¹⁰ Nou wè di kimoun yé ka palé annan Genèse 3:15. Annou wè aprézan kouman Jéova fè sa profési-a fèt piti piti. É annou wè osi ki bénédiksyon nou ka jwenn paské sa profési-a ka fèt.

11. Kouman yé blésé désandans fanm-an annan so talon ?

¹¹ Profési-a ki annan Genèse 3:15 té ka di ki sèrpan-an té ké blésé désandans fanm-an annan « so talon ». A sa ki fèt lò Satan fè Jwif-ya ké Romen-yan tchwé Pitit Bondjé-a (Luc 23:13, 20-24). Menm fason lò roun moun blésé annan so talon i pa pouvé fè sa i lé pannan roun tan, lò Jézi mouri, i pa té pouvé fè anyen pannan roun tan. I rété annan tonm-an pannan trwa jou (Mat. 16:21).

12. Kouman é kitan yé ké krazé tèt sèrpan-an ?

¹² Pou profési Genèse 3:15 té pouvé fèt, Jézi pa té divèt rété annan tonm-an. Poukisa ? Paské dapré sa profési-a, désandans fanm-an té pou krazé tèt sèrpan-an. Sa lé di ki Jézi té pou résisité. É a sa ki fèt : trwazyèm jou apré so lanmò, Bondjé résisité l’ pou i viv annan syèl-a san i pa janmen mouri. Lò Jéova ké désidé l’, Jézi ké fè Satan disparèt (Héb. 2:14). Sa-ya ki ké dirijé ké li, ké idé li tiré tout lèlmi Bondjé-a asou latè-a, sa lé di désandans sèrpan-an * (Rév. 17:14 ; 20:4, 10).

13. Ki bénédiksyon nou ka jwenn paské sa profési-a ka fèt ?

¹³ Si to ka adoré Jéova, réyalizasyon sa profési-a ka pèrmèt to jwenn roun patché bénédiksyon. Bondjé voyé Jézi asou latè-a é i divini roun moun. É i imité kalité so Papa parfètman (Jean 14:9). Gras a sa, nou anprann konnèt Jéova épi kontan l’. Nou ka jwenn roun patché bénédiksyon osi gras a sa Jézi ansényé, épi osi gras a fason i ka dirijé asanblé krétyen-an jòdla. I anprann nou kouman nou pouvé viv roun fason pou nou fè Jéova plézi. É sa yé fè l’ annan so talon, sa lé di so lanmò, ka pèrmèt nou gen rounòt bénédiksyon ankò. Apré so rézirèksyon, Jéova asèpté sakrifis so Pitit ki té parfè é ki ka « pirifyé nou di tout péché » (1 Jean 1:7).

14. Kouman nou savé ki profési Jéova bay annan jarden Édèn-an pa té ké fèt lanmenm ?

¹⁴ Sa Jéova di annan profési-a i bay annan jarden Édèn-an, ka montré ki tout profési-a pa té ké fèt lanmenm. Sa té ké pran tan pou fanm-an fè désandans Bondjé té promèt-a. Sa té ké pran tan osi pou Djab-a rasanblé tout so moun, é sa té ké pran tan pou sa dé group-ya rayi yé konpanyen. Poukisa sa bon pou nou konprann sa profési-a ? Pas i té ka di ki monn Satan-an té ké rayi sèrvitèr Jéova-ya. A sa Jézi di so disip-ya lontan pita (Marc 13:13 ; Jean 17:14). Nou wè sa parti-a annan sa profési-a fèt èspésyalman pannan sa 100 dèrnyé lannen-yan.

15. Poukisa monn-an rayi nou plis pasé anvan, mé poukisa nou pa bézwen pè Satan ?

¹⁵ Roun ti moso tan apré Jézi divini rwa annan syèl-a an 1914, i mété Satan dèrò di syèl-a. Satan asou latè-a ka antann yé détrwi l’ (Rév. 12:9, 12). Mé i pa ka antann tou jantiman konsa. I anrajé, é i ka pasé so raj asou nou ki ka sèrvi Jéova (Rév. 12:13, 17). A pou sa, monn-an rayi nou plis pasé anvan. Mé nou pa gen pou pè ni Satan ni sa-ya ki ka maché ké li. Kou Pòl, i gen roun bagaj nou pouvé sir. Men sa i di : « Si Bondjé pou nou, kimoun ki ké pouvé ganyen nou ? » (Rom. 8:31). Kou nou wè l’, plizyèr parti profési Genèse 3:15 ja fèt. Donk, nou pouvé fè Jéova konfyans.

16-18. Ki bénédiksyon Curtis, Ursula ké Jessica jwenn paské yé byen konprann Genèse 3:15 ?

¹⁶ Promès Jéova-a nou ka jwenn annan Genèse 3:15 pouvé idé nou tchenbé douvan nenpòrt ki kalité problèm. Curtis, roun misyonèr ki ka rété Gwam, ka di : « Akoz di plizyèr bagaj ki rivé mo annan mo lavi, détan sa té rèd pou mo rété fidèl douvan Jéova. Lò sa té ka rivé mo, mo té ka réfléchi asou Genèse 3:15, é sa té ka fè mo fè mo Papa annan syèl-a plis konfyans ankò. » A pa ti présé Curtis présé wè jou-a Jéova ké fè tout éprèv nou gen disparèt.

¹⁷ Roun sò yé ka aplé Ursula ki ka rété an Bavyèr ka di ki, a pas i konprann Genèse 3:15 ki i vin sir ki Labib-a ka vin di Bondjé. I rété èstébékwé lò i wè ki tout ròt profési-ya ka tchenbé asou sa profési-a. I ka di ankò : « Sa touché mo, lò mo anprann ki Jéova fè roun bagaj lanmenm pou bay moun-yan roun èspwar. »

 ¹⁸ Jessica ki ka rété an Mikronézi ka di : « Jis jòdla, mo ka sonjé sa mo rousanti lò mo konprann ki mo té trouvé lavérité-a. Genèse 3:15 té ka fèt ! Sa lidé-a ka idé mo pa bliyé ki lavi nou gen jòdla-a, a pa sa ki vré lavi-a. Gras a sa profési-a, mo plis sir ankò ki sèrvi Jéova ka pèrmèt nou gen pi bèl lavi i pouvé gen jòdla, é ki mo lavi ké pi bèl ankò dimen. »

19. Poukisa nou sir ki dèrnyé parti Genèse 3:15 ké fèt osi ?

¹⁹ Kou nou wè l’, profési Genèse 3:15 ka fèt. Nou ja savé a kimoun ki désandans fanm-an ké désandans sèrpan-an. Jézi prémyé parti désandans fanm-an pa blésé annan so talon ankò ; aprézan, i rwa annan syèl-a é i pa ké jen mouri. É Jéova ja près fini chwazi tout krétyen-yan ki ké fè parti di dézyèm parti désandans fanm-an. Kou près tout profési-a ja fèt, nou pouvé sir ki dèrnyé parti-a ké fèt osi : Jézi ki divèt krazé tèt sèrpan-an. Satan ké disparèt. A ké roun bèl soulajman pou tout sa ki fidèl ! Anvan sa rivé, pa lagé. Nou pouvé fè nou Bondjé konfyans. Gras a désandans fanm-an, i ké fè « tout nasyon asou latè-a » jwenn roun patché bénédiksyon (Gen. 22:18).