TƆM ÑƲƲ ŊGƲ ÐƖKPƐLƖKƖƔ YƆ 30
Caanaʋ taa natʋ tɔm ndʋ titukuuni-ŋ yɔ
“Mankaɣ koyindiye ɖʋʋ ña nɛ halʋ mɩ-hɛkʋ taa.”—KIÐE 3:15.
HENDU 15 Ðɛyɩ Yehowa Pɩyalʋ kajalaɣ tʋ!
LƖMAƔZA SƆSƆNA a
1. Aɖam nɛ Ɛva palabɩ kɩwɛɛkɩm nɛ pitileɖi lɛ, ɛbɛ Yehowa laba? (Kiɖe Tɛɛ Tɔm 3:15)
AÐAM nɛ Ɛva palabɩ kɩwɛɛkɩm nɛ pitileɖi lɛ, Yehowa yɔɔdɩ natʋ tɔm kɩcɛyɩtʋ natʋyʋ se ɛtɩŋnɩ tɩ-yɔɔ nɛ ɛha lidaʋ pa-lʋlʋʋ taa mba. Tɔm ndʋ ɛyɔɔdaa yɔ tɩwɛ Kiɖe Tɛɛ Tɔm 3:15 taa.—Kalɩ Kiɖe Tɛɛ Tɔm 3:15.
2. Natʋ tɔm ndʋ tɩwɛ Kiɖe Tɛɛ Tɔm 3:15 taa yɔ, ɛbɛ yɔɔ tɩwɛ ŋgee?
2 Natʋ tɔm ndʋ, tɩwɛ Bibl taa takayaɣ kajalaɣ ñɩŋga taa. Ɛlɛ, nɔɔ kʋɖʋmaɣ wɛ Bibl taa takayɩsɩ lɛɛsɩ tɩŋa nɛ Bibl taa kajalaɣ takayaɣ ŋga pɛ-hɛkʋ taa. Ɛzɩ pɛkpɛndʋʋ takayaɣ nakɛyɛ hatʋ tɩŋa tigiɖe kʋɖʋmɖɩyɛ yɔɔ nɛ pɩpɩsɩɣ pʋyʋ kʋɖʋm yɔ, mbʋ ɖɔɖɔ tɔm ndʋ tɩwɛ Kiɖe Tɛɛ Tɔm 3:15 taa yɔ tɩkpɛndɩɣ paa Bibl taa takayaɣ ŋga lɛ ka-taa tɔm nɛ tɩpɩsɩɣ tɔm kʋɖʋmtʋ. Tɔm ndʋ yɔ: Ɛsɔ kaɣ tiyinuu Ñʋʋ Yaɖʋ nɔɔyʋ se ɛɖɩzɩ Eleeu nɛ ɛ-wayɩ tɩŋɩyaa tɩŋa. b Mba pɔsɔɔlɩ Yehowa yɔ, pɩkaɣ-wɛ kɛʋ wazaɣ siŋŋ.
3. Ɛbɛ taa ɖɩkaɣ tazʋʋ tɔm ñʋʋ kʋnɛ kɩ-taa?
3 Tɔm ñʋʋ kʋnɛ kɩ-taa, ɖɩkaɣ cosuu tɔm pɔzʋʋ mbʋ pɩkɔŋ yɔ pɩ-yɔɔ; pitukuuni natʋ tɔm ndʋ tɩwɛ Kiɖe Tɛɛ Tɔm 3:15 taa yɔ. Tɔm pɔzʋʋ mbʋ yɔ: Mba pɔ-tɔm pɔyɔɔdɩ natʋ tɔm ndʋ tɩ-taa yɔ, mba pɛkɛnaa? Ɛzɩma natʋ tɔm ndʋ tɩwɛɛ nɛ tɩlakɩ? Nɛ ɛzɩma tɩwɛɛ nɛ tɩwazɩɣ-ɖʋ?
MBA PƆ-TƆM PƆYƆƆDƖ NATƲ TƆM NDƲ TƖ-TAA YƆ, MBA PƐKƐNAA?
4. Anɩ lɛ “ɖʋm,” nɛ ɛzɩma ɖɩlaba nɛ ɖɩtɩlɩ?
4 Kiɖe Tɛɛ Tɔm 3:15 yɔɔdʋʋ “ɖʋm,” ɖʋm “liɖe,” “halʋ,” nɛ halʋ “pʋlʋlaɣ” tɔm. Bibl sɩɣnɩ-ɖʋ se ɖɩtɩlɩ weyi pa-taa paa weyi lɛ ɛsɩŋnaa yɔ. c Iyele nɛ ɖɩpaɣzɩnɩ “ɖʋm.” Ðʋm maɣmaɣ taapɩzɩɣ se ɛnɩɩ tɔm ndʋ Yehowa yɔɔdɩ Edɛɛnɩ kaɖaɣ taa yɔ tɩ-taa. Ye mbʋ, pɩtʋʋ fɛyɩ se wonuu kɩlɩzʋʋ ŋgʋ kɩsɩm lɔŋ yɔ Yehowa heyi nɩŋgbaŋʋʋ hɔm tɔm ndʋ. Ɛnʋ lɛ anɩ? Natʋ 12:9 heyiɣ-ɖʋ weyi ɖʋm ɛnʋ ɛsɩŋnaa yɔ kpayɩ kpayɩ. Mayaɣ ŋga kɔyɔɔdʋʋ se “ɖooo kiɖe tɛɛ ɖʋm” kɛnɩ Sataŋ Eleeu. Ɛlɛ, mba ɖʋm liɖe sɩŋnaa?
ÐƲM
Sataŋ Eleeu; Natʋ 12:9 ya-ɩ se “ɖooo kiɖe tɛɛ ɖʋm” (Cɔnɩ tayʋʋ 4)
5. Mba ɖʋm liɖe sɩŋnaa?
5 Nabʋyʋ taa, Bibl lakɩnɩ tʋmɩyɛ tɔm pee “liɖe” yaa “pʋlʋlaɣ” se kɩyɔɔdɩ ɛyaa mba pamaɣzɩɣnɩ ɛyʋ nɔɔyʋ ɖeyi ɖeyi nɛ ɛyʋ ɛnʋ ɛpɩzɩɣ nɛ ɛyaa-wɛ se e-piya yɔ pɔ-tɔm. Ye mbʋ, ɖʋm liɖe sɩŋnɩ Ɛsɔ tiyiyaa mba pɛfɛyɩ siɣsiɣ yɔ nɛ ɛyaa mba pakʋyʋʋ Yehowa Ɛsɔ yɔɔ nɛ pakaɖɩɣnɩ ɛ-samaɣ ɛzɩ Sataŋ lakʋʋ yɔ. Ɛsɔ tiyiyaa mba peyebi pa-tʋma ɛsɔdaa nɛ petii tɛtʋ yɔɔ Noowa alɩwaatʋ taa yɔ nɛ ɛyaa kɩdɛkɛdaa mba palakɩ ɛzɩ pa-caa Eleeu yɔ, pɛwɛ ɖʋm liɖe taa.—Kiɖe 6:1, 2; Yoh. 8:44; 1 Yoh. 5:19; Yud. 6.
ÐƲM LIÐE
Ɛsɔ tiyiyaa kɩdɛkɛdaa nɛ ɛyaa mba pakʋyʋʋ Yehowa yɔɔ nɛ pakaɖɩɣnɩ ɛ-samaɣ yɔ (Cɔnɩ tayʋʋ 5)
6. Ɛbɛ yɔɔ “halʋ” ɛɛpɩzɩɣ nɛ ɛkɛnɩ Ɛva?
6 Lɛɛlɛɛyɔ iyele nɛ ɖɩna weyi “halʋ” sɩŋnaa yɔ. Ɛɛpɩzɩɣ nɛ ɛkɛ Ɛva. Ɛbɛ yɔɔ? Iyele nɛ ɖɩna lɩmaɣzɩyɛ kʋɖʋmɖɩyɛ ɖeke. Natʋ tɔm ndʋ, tɩyɔɔdʋʋ se halʋ pʋlʋlaɣ kaɣ “tɔyɩtʋʋ” ɖʋm ñʋʋ. Ɛzɩ ɖɩnaʋ nɛ pɩɖɛɛ yɔ, ɖʋm sɩŋnɩ tiyiyu kɩdɛkɛdʋ Sataŋ, nɛ Ɛva lʋlʋʋ taa mba tɩtalɩ pilim pʋyɔɔ lɛ pa-taa nɔɔyʋ fɛyɩnɩ ɖoŋ se ɛpɩzɩɣ nɛ ɛtɔyɩtɩ Sataŋ. Ye mbʋ, ɛzɩma pakaɣ Sataŋ ɖɩzʋʋ?
7. Ɛzɩ Natʋ 12:1, 2, 5, 10 wɩlʋʋ yɔ, halʋ weyi ɛ-tɔm pɔyɔɔdɩ Kiɖe Tɛɛ Tɔm 3:15 taa yɔ, ɛbɛ ɛsɩŋnaa?
7 Halʋ weyi ɛ-tɔm pɔyɔɔdɩ Kiɖe Tɛɛ Tɔm 3:15 taa yɔ, Bibl taa takayaɣ kɛdɛzaɣ ñɩŋga sɩɣnɩ-ɖʋ se ɖɩtɩlɩ mbʋ ɛsɩŋnaa yɔ. (Kalɩ Natʋ 12:1, 2, 5, 10.) Halʋ ɛnʋ, ɛtɩkɛ tɛtʋ yɔɔ halʋ nɔɔyʋ. Pɔyɔɔdaa se fenaɣ wɛ ɛ-nɩŋgbanzɩ tɛɛ nɛ ɛ-ñʋʋ taa nɛ awiya hulaɣ nakɛyɛ, palabɩ-kɛ nɛ tɩɩnzɩ 12. Ɛlʋlɩ pɩɣa nakɛyɛ nɛ kɛwɛ ndɩ kpem nɛ piya lɛɛsɩ. Pɩɣa ŋga lɛ Ɛsɔ Kewiyaɣ. Kewiyaɣ ŋga kɛwɛ ɛsɔdaa, ye mbʋ pɩwɛɛ se halʋ ɛnʋ ɛwɛɛ ɛsɔdaa ɖɔɖɔ. Halʋ ɛnʋ, ɛsɩŋnɩ Yehowa ɛgbɛyɛ hɔɔlʋʋ ŋgʋ kɩwɛ ɛsɔdaa yɔ nɛ Ɛsɔ tiyiyaa siɣsiɣ tɩnaa wɛnɩ ɛgbɛyɛ hɔɔlʋʋ ŋgʋ kɩ-taa.—Gal. 4:26.
HALƲ
Yehowa ɛgbɛyɛ hɔɔlʋʋ ŋgʋ kɩwɛ ɛsɔdaa yɔ; Ɛsɔ tiyiyaa siɣsiɣ tɩnaa wɛnɩ ɛgbɛyɛ hɔɔlʋʋ ŋgʋ kɩ-taa (Cɔnɩ tayʋʋ 7)
8. Akɛ halʋ pʋlʋlaɣ hɔɔlʋʋ kajalaɣ ñɩŋgʋ, nɛ ɛzɩmtaa ɛpɩsɩ mbʋ? (Kiɖe Tɛɛ Tɔm 22:15-18)
8 Ɛsɔtɔm sɩɣnɩ-ɖʋ ɖɔɖɔ se ɖɩtɩlɩ weyi halʋ pʋlʋlaɣ hɔɔlʋʋ kajalaɣ ñɩŋgʋ sɩŋnaa yɔ. Pɩpɔzaa se pʋlʋlaɣ ŋga kɛkɛ Abraham liɖe taa tʋ. (Kalɩ Kiɖe Tɛɛ Tɔm 22:15-18.) Ɛzɩ natʋ tɔm ndʋ tɩyɔɔdʋʋ yɔ, Yesu kɛ abalʋ siɣsiɣ tʋ ɛnʋ ɛ-lʋlʋʋ taa tʋ keekee. (Luka 3:23, 34) Ɛlɛ pɩwɛɛ se pʋlʋlaɣ ŋga kɛwɛɛ ɖoŋ siŋŋ nɛ pɩkpaɖɩ ɛyʋ mbʋ pʋyɔɔ yɔ, pɩpɔzʋʋ se kɔtɔyɩtɩ Sataŋ Eleeu ñʋʋ nɛ kaɖɩzɩ-ɩ caɣ caɣ. Pʋyɔɔ Yesu kaawɛnɩ ɛzɩ pɩnzɩ 30 lɛ, Ɛsɔ ta-ɩ num nɛ e-fezuu kiɖeɖeu. Alɩwaatʋ ndʋ pata Yesu num yɔ, ɛpɩsɩ halʋ pʋlʋlaɣ hɔɔlʋʋ kajaɣ ñɩŋgʋ. (Gal. 3:16) Yesu sɩba nɛ Ɛsɔ fezi-i nɛ pɩtɛ lɛ, Ɛsɔ ha-ɩ ‘samtʋ nɛ ɛɖʋ-ɩ hɩɖɛ’ nɛ ɛha-ɩ “ɖoŋ tɩŋa ɛsɔdaa nɛ tataa;” nɛ ɛha-ɩ ɖoŋ ɖɔɖɔ se “ɛwɛɛkɩ Eleeu tʋma.”—Ebr. 2:7; Mat. 28:18; 1 Yoh. 3:8.
HALƲ PƲLƲLAƔ
Yesu Krɩstʋ nɛ patam numwaa 144000 mba pa nɛ ɩ pakaɣ tɔɔʋ kewiyitu yɔ (Cɔnɩ tayʋʋ 8-9)
9-10. (a) Mba ɖɔɖɔ kɛ halʋ pʋlʋlaɣ taa mba, nɛ ɛzɩmtaa papɩsɩɣ mbʋ? (b) Ɛbɛ taa ɖɩkaɣ tazʋʋ lɛɛlɛɛyɔ?
9 Ɛlɛ, pɩtasɩnɩ Yesu lɛ, ɛyaa lalaa kaɣ kɛʋ ɖɔɖɔ halʋ pʋlʋlaɣ hɔɔlʋʋ naalɛ ñɩŋgʋ. Tɔm ndʋ apostoloo Pɔɔlɩ heyi Yuuda mba nɛ ajɛɛ lɛɛna taa Krɩstʋ ñɩma patam numwaa yɔ tɩsɩnɩ-ɖʋ nɛ ɖɩtɩlɩ ɛyaa mba pɛkɛ pʋlʋlaɣ hɔɔlʋʋ ŋgʋ yɔ. Eheyi-wɛ se: “Ye ɩkɛ Krɩstʋ pʋyʋ yɔ, pʋbʋ lɛ, ɩkɛ Abraham liɖe toovenim taa, mba pɔkɔŋ mʋʋ ñɩm ɛzɩ Ɛsɔ yɔɔdʋʋ yɔ.” (Gal. 3:28, 29) Alɩwaatʋ ndʋ Yehowa taɣ Krɩstʋ tʋ nɔɔyʋ num fezuu kiɖeɖeu taa yɔ, ɛyʋ ɛnʋ ɛpɩsɩɣ halʋ pʋlʋlaɣ taa tʋ. Ye mbʋ, Yesu Krɩstʋ nɛ ɛyaa 144000 mba ɛ nɛ wɛ pakaɣ tɔɔʋ kewiyitu yɔ mba kpɛndɩna nɛ pɛkɛ halʋ pʋlʋlaɣ. (Natʋ 14:1) Pa-tɩŋa pañakɩ pana se pɛwɛɛnɩ maɣzɩm nɛ lakasɩ nzɩ sɩnɩɣzɩnɩ pa-Caa Yehowa Ɛsɔ ñɩnzɩ yɔ.
10 Mba pɔ-tɔm pɔyɔɔdɩ Kiɖe Tɛɛ Tɔm 3:15 taa yɔ, ɖɩtɩlɩ mba pɛkɛnaa yɔ. Lɛɛlɛɛyɔ iyele nɛ ɖɩtazɩ pazɩ nɛ ɖɩna ɛzɩma Yehowa wɛɛ eyeki nɛ natʋ tɔm ndʋ tɩlakɩ pazɩ pazɩ yɔ nɛ ɖɩna ɖɔɖɔ ɛzɩma tɩwɛɛ nɛ tɩwazɩɣ-ɖʋ yɔ.
ƐZƖMA NATƲ TƆM NDƲ TƖWƐƐ NƐ TƖLAKƖ?
11. Ɛzɩma tɩyɛ pañasɩ halʋ pʋlʋlaɣ “naatalʋʋ”?
11 Natʋ tɔm ndʋ tɩwɛ Kiɖe Tɛɛ Tɔm 3:15 taa yɔ tɩwɩlɩɣ se ɖʋm kaɣ ñasʋʋ halʋ pʋlʋlaɣ “naatalʋʋ.” Tɔm ndʋ tɩlaba alɩwaatʋ ndʋ Sataŋ seɣti Roma mba nɛ Yuuda mba nɛ pakʋ Ɛsɔ Pɩyalʋ yɔ. (Luka 23:13, 20-24) Alɩwaatʋ ndʋ heŋ lakɩ ɛyʋ nɔɔyʋ naatalʋʋ yɔɔ yɔ, pɩwɛɣ-ɩ kaɖɛ se ɛɖɔ alɩwaatʋ natʋyʋ. Mbʋ ɖɔɖɔ Yesu taapɩzɩɣ se ɛla nabʋyʋ alɩwaatʋ ndʋ ɛsɩba nɛ pepimi-i pɩlaʋ taa yɔ.—Mat. 16:21.
12. (a) Ɛzɩma pakaɣ tɔyɩtʋʋ ɖʋm ñʋʋ? (b) Nɛ ɛzɩmtaa pɩkaɣ labʋ mbʋ?
12 Pɩsa nɛ natʋ tɔm ndʋ tɩwɛ Kiɖe Tɛɛ Tɔm 3:15 taa yɔ tɩla lɛ, pɩtɩpɔzɩ se Yesu ɛwɛɛ pɩlaʋ taa tam mbʋ. Ɛbɛ yɔɔ? Mbʋ pʋyɔɔ yɔ, natʋ tɔm ndʋ tɩwɩlɩɣ se pʋlʋlaɣ kaɣ tɔyɩtʋʋ ɖʋm ñʋʋ. Tɔm ndʋ tɩwɩlɩɣ se pɩpɔzʋʋ se pefezi Yesu. Nɛ toovenim taa lɛ, pefezi-i. Yesu sɩba nɛ pɩla kɩyakɩŋ naadozo lɛ, pefezi-i nɛ pʋwayɩ lɛ ɛkpa ɛsɔdaa nɛ wiɖiyi ɛɛkaɣ tasʋʋ sɩbʋ kpa. Alɩwaatʋ ndʋ Ɛsɔ ɖʋwa yɔ tɩtalɩɣ lɛ, Yesu kaɣ tɔyɩtʋʋ Sataŋ ñʋʋ caɣ caɣ. (Ebr. 2:14) Mba pa nɛ Yesu pakaɣ kewiyitu tɔɔʋ yɔ, pakaɣ-ɩ ɖʋʋ nesi nɛ paɖɩzɩ Ɛsɔ koyindinaa tɩŋa tɛtʋ yɔɔ; pʋ-tɔbʋʋ se ɖʋm liɖe.—Natʋ 17:14; 20:4, 10. d
ƐZƖMA NATƲ TƆM NDƲ TƖWƐƐ NƐ TƖWAZƖƔ-ÐƲ?
13. Natʋ tɔm ndʋ tiɖiɣni labʋ yɔ, ɛzɩma tɩwɛɛ nɛ tɩwazɩɣ-ɖʋ?
13 Ye pamɩyɩsɩ-ŋ lɩm nɛ ŋpɩsɩ Ɛsɔ sɛyʋ yɔ, ɛzɩma natʋ tɔm ndʋ tiɖiɣni labʋ yɔ, tɩwɛɛ nɛ tɩwazɩɣ-ŋ. Yesu kɔm tɛtʋ yɔɔ nɛ ɛpɩsɩ ɛyʋ. Ɛmaɣzɩnɩ ɛ-Caa wɛtʋ pilim. (Yoh. 14:9) Pʋyɔɔ lɛ, ɖɩtɩŋnɩ ɛ-yɔɔ nɛ ɖɩkpɛlɩkɩ nɛ ɖɩtɩlɩ Ɛsɔ Yehowa nɛ ɖɩsɔɔlɩ-ɩ. Pɩtasɩ lɛ, Yesu wɩlɩtʋ nɛ ɛzɩma ɛwɛɛ nɛ eɖiyiɣ Krɩstʋ ɛgbɛyɛ sɔnɔ yɔ, pɩwɛɛ nɛ pɩwazɩɣ-ɖʋ. Ɛwɩlɩ-ɖʋ ɛzɩma pɩpɔzʋʋ se ɖɩcaɣ wezuu nɛ pɩsa nɛ ɖɔ-tɔm kɛdɩnɩ Yehowa yɔ. Nɛ Yesu sɩm, pʋ-tɔbʋʋ se ɛzɩma pañasɩ ɛ-naatalʋʋ yɔ, pɩpɩzɩɣ nɛ pɩwazɩ ɖa-tɩŋa. Ɛzɩma tɩyɛ? Yesu sɩba nɛ Yehowa fezi-i nɛ pɩtɛ lɛ, Yehowa mʋ ɛ-Pɩyalʋ kɩlaʋ ŋgʋ kɩtalɩ pilim yɔ; nɛ kɩlaʋ ŋgʋ, ‘kɩñalɩɣ kɩwɛɛkɩm tɩŋa ɖɔ-yɔɔ.’—1 Yoh. 1:7.
14. Natʋ tɔm ndʋ Yehowa yɔɔdɩ Edɛɛnɩ kaɖaɣ taa yɔ, ɛzɩ pɩɩwɛɛ se ɛyaa ɩɖaŋ se tɩlakɩ kpaagbaa? Lɩzɩ pɩ-taa.
14 Tɔm ndʋ Yehowa yɔɔdɩ Edɛɛnɩ kaɖaɣ taa yɔ, tɩwɩlɩɣ se alɩwaatʋ natʋyʋ kaɣ ɖɛʋ pʋcɔ nɛ natʋ tɔm ndʋ tɩ-tɩŋa tɩla. Pʋcɔ nɛ halʋ pɩzɩ nɛ ɛlʋlɩ pʋlʋlaɣ ŋga kɔ-tɔm pɔyɔɔdaa yɔ, nɛ Eleeu kpeɣli ɛ-wayɩ tɩŋɩyaa, nɛ koyindiye (yaa paɖɩyɛ) wɛɛ tindima ana a-naalɛ a-hɛkʋ taa lɛ, pɩkaɣ kpaɣʋ alɩwaatʋ. Ye ɖɩnɩ natʋ tɔm ndʋ tɩ-taa yɔ, pɩwazɩɣ-ɖʋ mbʋ pʋyɔɔ yɔ, tɩpakɩ-ɖʋ se ɛjaɖɛ kaɣ paɖʋʋ Ɛsɔ sɛyaa; Sataŋ ɖiyiɣni-ɖɩ. Pʋwayɩ Yesu heyi ɛ-tɔmkpɛlɩkɩyaa tɔm kʋɖʋmtʋ ndʋ nɛ ɛpaɣ-wɛ. (Mark. 13:13; Yoh. 17:14) Pɩtʋʋ fɛyɩ se ɖɩna ɛzɩma natʋ tɔm ndʋ tɩ-hɔɔlʋʋ kʋnɛ kɩlaba yɔ, kɔzɩ kɔzɩ pɩnzɩ 100 ŋgʋ kɩɖɛwa yɔ kɩ-taa. Ɛzɩma tɩyɛ?
15. (a) Ɛbɛ yɔɔ ɛjaɖɛ wɛɛ nɛ ɖɩpaɖɩɣ Ɛsɔ samaɣ siŋŋ nɛ pɩkɩlɩɣ? (b) Ɛlɛ ɛbɛ yɔɔ pɩtɩpɔzɩ se ɖise Sataŋ sɔɔndʋ?
15 Pasɩ Yesu Mesiya Kewiyaɣ Wiyaʋ pɩnaɣ 1914 taa nɛ pitileɖi lɛ, ɛɖɔɔnɩ Sataŋ ɛsɔdaa. Lɛɛlɛɛyɔ lɛ, Sataŋ wɛ tɛtʋ yɔɔ nɛ ɛɖaŋaa se pakaɣ-ɩ ɖɩzʋʋ. (Natʋ 12:9, 12) Ɛlɛ alɩwaatʋ ndʋ ɛwɛɛ nɛ ɛɖaŋɩɣ yɔ, ɛtɩcaɣ yem nɛ ɛkpɛkɩ e-nesi e-yo taa. Sataŋ fɛyɩnɩ lidaʋ nakʋyʋ nɛ ɛkɔ pana; nɛ ɛwɛɛ nɛ ɛpɩyɩɣ ɛ-pana ana Ɛsɔ samaɣ yɔɔ. (Natʋ 12:13, 17) Pʋyɔɔ lɛ, ɛjaɖɛ wɛɛ nɛ ɖɩpaɖɩɣ Ɛsɔ samaɣ siŋŋ nɛ pɩkɩlɩɣ. Paa mbʋ yɔ, pɩtɩpɔzɩ se ɖise sɔɔndʋ Sataŋ nɛ ɛ-wayɩ tɩŋɩyaa. Ɛlɛ, ɖa-taa pɩzɩɣ nɛ pɩtɛ ɛzɩ apostoloo Pɔɔlɩ taa kaatɛm yɔ. Ɛyɔɔdaa se: “Ye Ɛsɔ ɛwɛ ɖɔ-yɔɔ, akaɣ-ɖʋ kaɖɩnʋʋ?” (Roma 8:31) Ðɩpɩzɩɣ nɛ ɖɩtaa Yehowa liu kiya mbʋ pʋyɔɔ yɔ, ɛzɩ ɖɩnaʋ nɛ pɩɖɛɛ yɔ, natʋ tɔm ndʋ ɛyɔɔdɩ Kiɖe Tɛɛ Tɔm 3:15 taa yɔ tɩ-hɔɔlʋʋ sɔsɔʋ tɛm labʋ.
16-18. Curtis, Ursula, nɛ Jessica panɩ natʋ tɔm ndʋ tɩwɛ Kiɖe Tɛɛ Tɔm 3:15 taa yɔ tɩ-taa lɛ, ɛzɩma pɩwazɩ-wɛ?
16 Lidaʋ tɔm ndʋ Yehowa yɔɔdɩ Kiɖe Tɛɛ Tɔm 3:15 taa yɔ, tɩpɩzɩɣ tɩsɩnɩ-ɖʋ nɛ ɖɩlʋbɩnɩ kala wena payɩ ɖɩkatɩɣ ɖe-wezuu caɣʋ taa yɔ. Curtis kɛ Ɛsɔtɔm tiyiyu Guwaam ɛjaɖɛ taa. Ɛyɔɔdaa se: “Me-wezuu caɣʋ taa mankatɩ kala nabʋyʋ taa nɛ piitibi-m yɔɔɔ; piiyeba nɛ pɩtakɩ ɛzɩma mɔnɖɔkɩ me-siɣsiɣ wɛtʋ Yehowa ɛsɩndaa yɔ. Ɛlɛ, mankpaɣ alɩwaatʋ nɛ mamaɣzɩ natʋ tɔm ndʋ tɩwɛ Kiɖe Tɛɛ Tɔm 3:15 taa yɔ tɩ-yɔɔ lɛ, pɩsɩnɩ-m nɛ mantilesi lidaʋ ŋgʋ mɛwɛnɩ man-Caa weyi ɛwɛ ɛsɔdaa yɔ ɛ-yɔɔ yɔ.” Curtis ɖaŋ kɩyakʋ ŋgʋ Yehowa kaɣ yebu nɛ ɖa-kʋñɔmɩŋ tɩŋa sɩɩ tɩnaɣ yɔ kpam.
17 Payaɣ koobu halɩñɩnʋ nɔɔyʋ se Ursula, ɛwɛ Baviyɛɛrɩ, Caama ɛjaɖɛ taa. Ɛyɔɔdaa se ɛnʋ nɩ natʋ tɔm ndʋ tɩwɛ Kiɖe Tɛɛ Tɔm 3:15 taa yɔ tɩ-taa lɛ, pɩsɩnɩ-ɩ nɛ ɛ-taa tɛ se Ɛsɔ fezuu ɖiyina nɛ pama Bibl. Ɛna ɛzɩma nɔɔ kʋɖʋmaɣ wɛ natʋ tɔm lɛɛtʋ tɩŋa nɛ natʋ tɔm ndʋ tɩ-hɛkʋ taa yɔ, nɛ pitukuni-i siŋŋ. Ɛyɔɔdaa ɖɔɖɔ se: “Alɩwaatʋ ndʋ mɛnkpɛlɩkaa nɛ mantɩlɩ se Yehowa labɩ nabʋyʋ kpaagbaa se pɩsa nɛ ɛyaa wɛɛnɩ lidaʋ yɔ lɛ, pitukuni ma-laŋɩyɛ.”
18 Jessica wɛ Mikroneezii. Ɛyɔɔdaa se: “Menɖiɣni tɔzʋʋ ɛzɩma pɩlabɩ-m alɩwaatʋ ndʋ menɖiɣzinaa se malɩ toovenim yɔɔ yɔ pɩ-yɔɔ. Natʋ tɔm ndʋ tɩwɛ Kiɖe Tɛɛ Tɔm 3:15 taa yɔ, tɩɩwɛɛ nɛ tɩlakɩ. Pɩsɩnɩ-m nɛ mɔntɔzɩ se kʋñɔmɩŋ weyi ɖɩtɔkɩ sɔnɔ yɔ, Yehowa taaɖʋ se pɩwɛɛ mbʋ. Natʋ tɔm ndʋ, tɩkpazɩ ɖoŋ ɖɔɖɔ tisuu mbʋ mɛwɛna se ye mɛnsɛɣ Yehowa yɔ, piyeki nɛ manɩɩ leleŋ me-wezuu caɣʋ taa sɔnɔ nɛ halɩ manɩɩ leleŋ cee wayɩ nɛ pɩkɩlɩ yɔ.”
19. Ɛbɛ yɔɔ ɖa-taa pɩzɩɣ nɛ pɩtɛ se natʋ tɔm ndʋ tɩwɛ Kiɖe Tɛɛ Tɔm 3:15 taa yɔ, tɩ-hɔɔlʋʋ kɛdɛzaɣ ñɩŋgʋ kaɣ labʋ?
19 Ɛzɩ ɖɩnaʋ nɛ pɩɖɛɛ yɔ, natʋ tɔm ndʋ tɩwɛ Kiɖe Tɛɛ Tɔm 3:15 taa yɔ, tiɖiɣni labʋ lɛɛlɛɛyɔ. Ðɩsɩm mba halʋ pʋlʋlaɣ nɛ ɖʋm liɖe pasɩŋnaa yɔ kpayɩ kpayɩ. Yesu kɛnɩ halʋ pʋlʋlaɣ hɔɔlʋʋ kajalaɣ ñɩŋgʋ, heŋ weyi ɛɛlabɩ ɛ-naatalʋʋ yɔɔ yɔ ɛwawa; nɛ lɛɛlɛɛyɔ lɛ, ɛkɛ Wiyaʋ weyi ɛwɛ ɖoŋ yɔ nɛ wiɖiyi ɛɛkaɣ sɩbʋ. Mba palɩzɩɣ se pɛkɛ pʋlʋlaɣ hɔɔlʋʋ naalɛ ñɩŋgʋ yɔ, pɩkazɩ pazɩ lɛ pɛtɛŋ-wɛ lɩzʋʋ. Natʋ tɔm ndʋ tɩ-hɔɔlʋʋ kajalaɣ ñɩŋgʋ tɛm labʋ; pʋyɔɔ lɛ, ɖɩwɛnɩ toovenim se ɖa-taa ɛtɛ se tɩ-hɔɔlʋʋ kɛdɛzaɣ ñɩŋgʋ kaɣ labʋ ɖɔɖɔ. Tɩ-hɔɔlʋʋ kɛdɛzaɣ ñɩŋgʋ ŋgʋ lɛ se pakaɣ tɔyɩtʋʋ ɖʋm ñʋʋ. Alɩwaatʋ ndʋ paɖɩzɩɣ Sataŋ yɔ, Yehowa sɛyaa taa kaɣ labʋ leleŋ siŋŋ. Pʋcɔ nɛ pɩtalɩ mbʋ lɛ, taalɔ lidaʋ. Ðɛ-Ɛsɔ kɛ Ɛsɔ weyi papɩzɩɣ nɛ pataa-ɩ liu yɔ. Ɛkaɣ tɩŋnʋʋ halʋ pʋlʋlaɣ yɔɔ nɛ ɛkɔnɩ wazasɩ sakɩyɛ “tataa ajɛɛ kpeekpe yɔɔ.”—Kiɖe 22:18.
HENDU 23 Yehowa paɣzɩ kewiyitu tɔɔʋ
a Ye ɖɩtɩnɩɩ natʋ tɔm ndʋ tɩwɛ Kiɖe Tɛɛ Tɔm 3:15 taa yɔ tɩ-taa yɔ, ɖɩɩpɩzɩɣ nɛ ɖɩnɩɩ Bibl taa tɔm taa camɩyɛ. Ye ɖɩtazɩ natʋ tɔm ndʋ tɩ-taa yɔ, pɩzɩɣ nɛ pɩkpazɩ ɖoŋ tisuu mbʋ ɖɩwɛnɩ Yehowa yɔɔ yɔ. Pɩpɩzɩɣ ɖɔɖɔ nɛ pɩkpazɩ ɖoŋ tisuu mbʋ ɖɩwɛna se ɛkaɣ labʋ ɛ-tamasɩ tɩŋa yɔɔ yɔ.
b Kalɩ Appendice B1, “Le message de la Bible,” pɩwɛ La Bible. Traduction du monde nouveau taa.
c Kalɩ aɖakaɣ “Mba pɔ-tɔm pɔyɔɔdɩ Kiɖe Tɛɛ Tɔm 3:14, 15 taa yɔ.”
