ATUAQQISSAAGASSAQ 30
Itsaq siulittuut ilinnut pingaarutilik
“Akerariissikkumaarpassi illit arnarlu.” – MOS 1. 3:15.
ERINARSUUT 15 Jehovap angajulliliaa nersoruk!
QILANAARTUUT a
1. Adamip Evallu ajortuliornerisa kinguninngua Jehova sua? (Mosesimik 1. 3:15)
ADAMIP Evallu ajortuliornerisa kinguninngua Jehova pingaarutilimmik siulittuinermigut kinguaassaannut neriuutissiivoq. Jehovap oqaasii Mosesimik allakkat siulliit 3:15-imi allassimapput. – Atuaruk.
2. Sooq siulittuut tamanna pingaaruteqarpa?
2 Siulittuut taanna Biibilip atuagartaasa siullersaanniippoq. Biibililli atuagartai allat tamarmik tassunga arlaatigut attuumassuteqarput. Soorlu atuakkap qimerlua quppernernik tamanik ataqatigiissitsisuusoq, taamatuttaaq Mosesimik allakkat siulliit 3:15-imi allassimasut Biibilip atuagartaasa imarisaat oqariartuummut ataatsimut kattutitinneqarput. Tassa Diaavulu malinnittaalu ajortut tamarmik suujunnaarsinneqaqqullugit Aniguisitsisussaq aallartinneqassaaq. b Jehovamik asannittunut tamanna nuannaarutaangaassaaq!
3. Allaaserisami matumani suut sammissavagut?
3 Allaaserisami matumani apeqqutit uku Mosesimik allakkat siulliit 3:15-imi siulittuummut tunngasut akissutissarsissavagut: Eqqaaneqartut kikkuuppat? Siulittuut qanoq eqquuppa? Qanorlu iluaqutigaarput?
SIULITTUUMMI EQQAANEQARTUT KIKKUUPPAT?
4. “Pulateriaarsuk” kinaava, tamannalu qanoq nalunngilarput?
4 Mosesimik allakkat siulliit 3:14, 15-imilu eqqaaneqartut tassaapput “pulateriaarsuk”, pulateriaarsuup ‘kinguaassai’, ‘arnaq’ arnallu “kinguaassai”. Biibili iluaqutigalugu taakku kikkuunersut paasisinnaavagut. c “Pulateriaarsuk” aallarniutigeriartigu. Pulateriaarsuk naatsiivimmi Edenimi oqaaserineqartunik paasinnissinnaanngimmat Jehovap pinngortitaq silassorissoq eqqartuussimassavaa. Kina? Saqqummersitat 12:9-mi kinarpiaanersoq nassuiarneqarpoq. Tassani allassimavoq tassaasoq “itsaq pulateriaarsuk” Saatani Diaavulu. Taavami pulateriaarsuup kinguaavi kikkuuppat?
5. Pulateriaarsuup kinguaavi kikkuuppat?
5 Biibilimi erneriittut eqqarsarlutillu iliuuseqartartut ilaannikkut assersuutaasumik kinguaanik taaneqartarput. Taamaattumik pulateriaarsuup kinguaavi tassaapput inngilit inuillu Guutimut aalajaanngitsut Saatanitut Jehovamik Guutimik innuttaanillu akerlilersuisut. Taakkua ilagaat Nooap nalaani inngilit qilammi suliassaminnik sumiginnaasut aamma inuit ajortut Ataatamittut Diaavulutut pissusillit. – Mos 1. 6:1, 2; Joh 8:44; Joh 1. 5:19; Juud 6.
6. Sooq ‘arnaq’ Evaasinnaanngila?
6 Maanna ‘arnaq’ kinaanersoq paasiniariartigu. Evaasinnaanngilaq. Sooq? Pissutaasoq ataasiinnaq eqqarsaatigiuk. Siulittuummi allassimavoq arnap kinguaassaata pulateriaarsuup niaqua ‘aserortissagaa’. Eqqartoriikkatsitut pulateriaarsuk inngiliuvoq Saatani, Evallu kinguaavisa naammalluinnaanngitsut arlaannaataluunniit Saatani aserortersinnaanngilaa. Taavami kia aserortersinnaavaa?
7. Mosesimik allakkat siulliit 3:15-imi arnaq kinaava? (Saqqummersitat 12:1, 2, 5, 10)
7 Mosesimik allakkat siulliit 3:15-imi arnap kinaanera Biibilimi atuakkami kingullermi nassuiarneqarpoq. (Saqqummersitat 12:1, 2, 5, 10 atuakkit). Arnaq taanna immikkuullarissuuvoq! Qaammat isigaasa ataanniippoq ullorissanillu aqqaneq-marlunnik niaqorutaasaqarluni. Nalinginnaanngitsumik ernertaarpoq: Guutip kunngeqarfia. Kunngeqarfik qilammiimmat arnaq aamma qilammeersuuvoq. Arnaq taanna Jehovap peqatigiissortaasa ilaannut, inngilinut aalajaatsunut qilammiittunut, assersuutaavoq. – Gal 4:26.
8. Arnap kinguaassaa pingaarneq kinaava, qangalu pingaarninngorpa? (Mosesimik 1. 22:15-18)
8 Guutip oqaasia iluaqutigalugu arnap kinguaassaasa pingaarnerusortaat kinaasoq paasisinnaavarput. Kinguaassaq Aaperaamit kingoqqisuusariaqarpoq. (Mosesimik 1. 22:15-18 atuakkit). Siulittuutigineqartutut Jiisusi Aaperaamit aalajaatsumit kingoqqisuuvoq. (Luk 3:23, 34) Kinguaassarli Saatanimik Diaavulumik suujunnaarsitsisussaagami inuinnaasinnaanngilaq. Taamaattumik Jiisusi 30-t missaannik ukioqarluni anersaamit illernartumit Guutip erneratut taninneqarpoq. Jiisusi taninneqarami tassaalerpoq arnap kinguaassaa pingaarnerusoq. (Gal 3:16) Jiisusip toqunerata makititaaneratalu kingorna Guutip ‘alutornassutsimik ataqqinaammillu niaqoruserpaa’. Aamma qilammi nunarsuarmilu oqartussaassutsimik tamarmik, ilaatigut Diaavulup iliuusiinik unitsitsisinnaanermik, tunivaa. – Hebr 2:7; Mat 28:18; Joh 1. 3:8.
9-10. (a) Kikkut aamma arnap kinguaassaanut ilaappat, qanorlu ilannguppat? (b) Suut sammissavagut?
9 Jiisusilli saniatigut allat aamma arnap kinguaassaanut ilaasussaapput. Apustilip Paulusip kristumiut juutiusut juutiunngitsullu tanitat ima allaffigigamigit kinguaassat pingaannginnerusortaasa kikkuunerat paasinarsisippaa: “[Kristusip] pigippasi Aaperaap kinguaarissallusilu Guutip neriorsuutaa naapertorlugu kingornussissaasi.” (Gal 3:28, 29) Kristumiu Jehovamit anersaamik illernartumik taninneqaraangami arnap kinguaassaanut ilannguttarpoq. Tassa arnap kinguaassai tassaapput Jiisusi Kristusi naalakkersueqatissaalu 144.000-t. (Saqq 14:1) Taakku tamarmik Ataatamittut Jehovatut Guutitut eqqarsarlutillu pissuseqarniartarput.
10 Mosesimik allakkat siulliit 3:15-imi eqqaaneqartut kikkuunerat paasereerlugu siulittuut taanna eqquutitinniarlugu Jehovap iliuuserisimasai qanorlu iluaqutiginerlutigu sammilaariartigit.
SIULITTUUT QANOQ EQQUUTTOQ
11. Arnap kinguaavata ‘kimmimmigut’ kiineqarnera qanoq paasisariaqarpa?
11 Mosesimik allakkat siulliit 3:15-imi siulittuut naapertorlugu pulateriaarsuup arnap kinguaava “kimmiatigut” kiiumaarpaa. Saatanip juutit Romamiullu atorlugit Guutip ernera toqummagu tamanna eqquuppoq. (Luk 23:13, 20-24) Soorlu kimmikkut ikeqartoq pisussinnaajunnaarallartartoq, taamatuttaaq Jiisusi toqugami, ulluni pingasuni uumassuseqarnani ilivermiinnermini, iliuuseqarsinnaajunnaarallarpoq. – Mat 16:21.
12. Pulateriaarsuup niaqua qanoq qaqugulu aserorterneqassava?
12 Mosesimik allakkat siulliit 3:15-imi siulittuut eqquutitinneqassappat Jiisusi ilivermiiginnartussaanngilaq. Sooq? Siulittuut naapertorlugu pulateriaarsuup niaqua kinguaassap aserortissammagu. Tassa Jiisusip kimmimmigut ikia mamittariaqarpoq. Taamatorluinnarlu pisoqarpoq. Ullut pingajuanni Jiisusi anersaatut toqusuitsutut makititaavoq. Guutip piffissarititaani Jiisusip Saatani suujunnaarsissavaa. (Hebr 2:14) Kristusip naalakkersueqatissai Guutip akeraanik tamanik – pulateriaarsuup kinguaavinik – nungutitseqataassapput. – Saqq 17:14; 20:4, 10. d
SIULITTUUT QANOQ ILUAQUTIGIGIPPUT
13. Siulittuutip eqquunnera qanoq iluaqutigaarput?
13 Guuti tunniusimallutit kiffartorfigigukku siulittuutip eqquunnera iluaqutigaat. Jiisusi inuttut nunarsuarmukarami Ataatami pissusiinik ilaarseqqissaarpoq. (Joh 14:9) Taamaattumik Jiisusi pillugu ilinniarnitsigut Jehova Guuti ilisarisimalerlugulu asalerparput. Aamma Jiisusip ilagiit kristumiut siulersormagit ilinniartitsissutai ilitsersuutaalu iluaqutigaagut. Jehovap iluarisaatut inuunissatsinnik ilinniartippaatigut. Tamattalu Jiisusip toqunera, kimmiata kiineqarnera, iluaqutigisinnaavarput. Qanoq? Jiisusip makititaagami aammi nalinga ‘ajortuliatsinnik tamanik piiaasoq’ naammalluinnartoq pilliutitut sassaappaa. – Joh 1. 1:7.
14. Sooq siulittuut Edenimi ingerlaannaq eqquutinngila? Nassuiaruk.
14 Jehovap Edenimi oqaasiinit erserpoq siulittuutip tamakkiisumik eqquunnissaanut piffissaq sivisulaartoq ingerlaqqaartariaqartoq. Arnap neriorsuutigisamik kinguaassiornissaa, Diaavulup malinnitsiminik katersuinissaa eqimattallu taakkua marluk akerariinnerulernissaat (imaluunniit uumissueqatigiilernissaat) sivisussaaq. Siulittuummi inuit Saatanimit aqunneqartut Jehovamik guutisiortunik uumissuinissaat pillugu mianersoqqussut iluaqutigaarput. Kingusinnerusukkut Jiisusip ilinniartitani aamma taamatut mianersoqquai. (Mak 13:13; Joh 17:14) Ingammik ukiuni 100-ni kingullerni siulittuutip ilaa eqquuttoq ersarissumik takusimavarput. Qanoq?
15. Sooq inuit ajortut uumissuinerulerpat, Saatanilli ersiginissaanut sooq pissutissaqanngilagut?
15 Jiisusip 1914-imi Missiarsitut kunnginngortinneqarnerata kinguninngua Saatani qilammit igitaavoq. Maanna suujunnaarsitaanissami tungaanut taamaallaat nunarsuup eqqaaniissinnaavoq. (Saqq 12:9, 12) Unillunili utaqqiinnanngilaq. Uippakajaarluni kamaqalunilu Guutip innuttaanik saassussisarpoq. (Saqq 12:13, 17) Tamanna pissutigalugu inuit ajortut Guutip innuttaanik uumissuinerulerput. Saatanilli malinnittaasalu ersiginissaannut pissutissaqanngilagut. Apustilitut Paulusitut ima allattutut qulanngissinnaavugut: “Guuti iligigutsigu kia ajugaaffigissavaatigut?” (Rom 8:31) Mosesimik allakkat siulliit 3:15-imi siulittuutip annerpaartaa eqquutereersoq takusinnaagatsigu Jehova tatigilluinnarsinnaavarput.
16-18. Mosesimik allakkat siulliit 3:15-ip paasinera Curtisip, Ursulap Jessicallu qanoq iluaqutigaat?
16 Mosesimik allakkat siulliit 3:15-imi Jehovap neriorsuutaa qanorluunniit misilinneqarnitsinni pinertusaarnissamut iluaqutigisinnaavarput. Curtis, Guamimi oqaluussisartutut aallartitatut kiffartortoq, ima oqaluttuarpoq: “Jehovap ilumoorfigiuarnissaanik sapernartitsisunik ilaannikkut nalaataqartarpunga. Mosesimilli allakkat siulliit 3:15-imi siulittuut Ataatama qilammiusup tatigiuarnissaanut iluaqutigaara.” Jehovap misilinneqaatitsinnik tamanik atuukkunnaarsitsinissaa Curtisip qilanaaraa.
17 Bayernimi qatanngut Ursulamik atilik oqarpoq Mosesimik allakkat siulliit 3:15-ip paasinera Biibilip Guutimit isumassarsiarititaanerata qulariunnaarnissaanut iluaqutigisimallugu. Siulittuutit allat tamarmik siulittuummut tamatumunnga attaveqarnerat paasigamiuk tupigusungaarpoq. Aamma oqarpoq: “Inuit neriuutaaruteqqunagit Jehova ingerlaannaq iliuuseqartoq paasigakku killitsippunga.”
18 Jessica Mikronesiamiu oqarpoq: “Ilumoortoq paaseqqaarakku qanoq misiginerlunga suli eqqaamavara! Mosesimik allakkat siulliit 3:15-imi siulittuut eqquuppoq. Tamanna iluaqutigalugu eqqaasarpara naalliunnissarput Jehovap siunertarinngikkaa. Siulittuut pissutigalugu aamma upperinerulerpara Jehovamut kiffartorneq maanna pitsaanerpaamik inooriaaseqalersitsisartoq siunissamilu allaat pitsaanerusumik inooriaaseqalersitsissasoq.”
19. Siulittuutip immikkoortuata kingulliup eqquunnissaa sooq upperilluinnarsinnaavarput?
19 Sammeriikkatsitut Mosesimik allakkat siulliit 3:15 eqquukkiartorpoq. Arnap kinguaavi pulateriaarsuullu kinguaavi kikkuunersut inissereerparput. Jiisusi, arnap kinguaava pingaarneq, kimmimmigut ikeqarunnaareerpoq maannalu kunngiulluni pissarsuaq toqusuitsoq. Jehovallu ernermi qilammi naalakkersueqatissai tamangajaasa toqqareersimavai. Siulittuutip immikkoortua siulleq eqquutereermat aamma immikkoortuata kingulliup, pulateriaarsuup niaquata aserorterneqarnissaata, eqquunnissaa upperilluinnarsinnaavarput. Saatani suujunnaarsinneqarpat inuit aalajaatsut nuannaangaassapput! Tamanna nalliutserlugu tunniutiinnaqinak. Guuterput tatiginartuuvoq. Arnap kinguaavi aqqutigalugit ‘nunarsuarmi inuiaat tamaasa’ ajunngitsuliungaarfigissavai. – Mos 1. 22:18.
ERINARSUUT 25 Qinikkat erlinnartut
a Mosesimik allakkat siulliit 3:15-imi siulittuut paasilluarsimanngikkutsigu Biibilimi oqariartuut tamakkiisumik paasisinnaassanngilarput. Siulittuutip misissorneratigut Jehovamut uppernerulerlutalu neriorsuutaasa eqquukkumaarnerat qularinnginnerulissavarput.
b Takuuk Guutip oqaasianik misissueqqissaarut, immikkoortoq 5 “Biibilip oqariartuutaa”.
c Takuuk ungalusaq “Mosesimik allakkat siulliit 3:14, 15-imilu eqqaaneqartut”.
d Takuuk ungalusaq “ Mosesimik allakkat siulliit 3:15-ip eqquunnissaanut pisut pingaarutillit ilaat”.