1. Yinki Yehova salaka kaka na manima ya ntangu yina Adamu mpe Eva salaka disumu? (Kuyantika 3:15)

 KAKA na manima ya ntangu yina Adamu mpe Eva salaka disumu, Yehova pesaka kivuvu na bana na bau na nzila ya mbikudulu mosi ya kukamua. Beto kekuta mambu yina yandi tubaka na Kuyantika 3:15.​—Tanga.

2. Samu na yinki mbikudulu yayi kele mfunu?

² Mbikudulu yango kele na mukanda ya ntete ya Biblia. Kasi mikanda nionso yankaka ya Biblia kele na nguizani na mbikudulu yango na mutindu mosi to yankaka. Mutindu kaka kuvertire ya mukanda mosi kekangikisaka bapaje na yau nionso kintuadi, bampova yina kele na Kuyantika 3:15 kekangikisaka mikanda nionso yankaka yina kele na Biblia samu yapesa kaka nsangu mosi, yina kele ti Mvuluzi mosi ketindama samu na kufua Diabulu mpe bantu na yandi nionso ya yimbi. * Yakevuanda mpenza lusakumunu samu na bantu yina kezolaka Yehova!

3. Yinki beto ketubila na disolo yayi?

³ Na disolo yayi, beto kebaka bamvutu na biuvu yayi melanda yina metadila mbikudulu ya Kuyantika 3:15: Banani bametubila na mbikudulu yango? Yinki mutindu mbikudulu yango kena kukokisama? Mpe yinki mutindu beto kena kubakila yau mambote?

4. Nani kele “nioka,” mpe yinki mutindu beto mezabila yau?

⁴ Kuyantika 3:14, 15 metubila “nioka,” ‘nkuna’ ya nioka, “nketo,” mpe ‘nkuna’ ya nketo. Biblia kena kusadisa beto beto zaba mosimosi na bau. * Beto banda ntete na “nioka.” Nioka ya kedika lendaka bakusa ve mambu yina Yehova tubaka na bilanga ya Edeni. Na yau, yalombaka nsambusulu ya Yehova salama nde na kisemua mosi ya mayele. Kisemua yango nde nani? Kusonga 12:9 mesasila puelele nani kele nioka yango. Yametuba puelele ti ‘nioka ya ebandeli’ kele Satana Diabulu. Kasi banani kele na kati ya nkuna ya nioka?

5. Banani kele na kati ya nkuna ya nioka?

⁵ Ntangu Biblia ketubilaka nkuna na bampova ya kifuani, yakemonisaka bantu yina kekanisaka mpe kesalaka mambu mutindu mosi na tata na bau ya kifuani. Na yau, nkuna ya nioka kena kusangisa bisemua ya kukondua kukuikama ya kimpeve mpe bantu yina keteleminaka Yehova Nzambi mpe bisadi na Yandi mutindu mosi na Satana. Yamesangisa bambasi yina bikaka kisika na bau na dizulu na ntangu ya Noa buela diaka bantu ya yimbi yina kele lokola tata na bau Diabulu.​—Kuy. 6:1, 2; Yoa. 8:44; 1 Yn. 5:19; Yude 6.

6. Samu na yinki Eva kele ve “nketo” yina mbikudulu metubila?

⁶ Ntangu yayi, bika beto sosa kuzaba nani kele “nketo.” Nketo yango kele Eva ve. Samu na yinki? Beto tadila mfunu mosi kaka. Mbikudulu yango metuba ti nkuna ya nketo ‘kediata’ yintu ya nioka. Mutindu kaka beto mekatuka tubila yau, nioka kele Satana kisemua ya kimpeve, mpe ata muntu mosi ve ya kuzanga kukoka yina kele na nkuna ya Eva lenda  vuanda na dikoki ya kudiata yandi. Na yau, yinki mutindu Satana kebebisama.

7. Mutindu Kusonga 12:1, 2, 5, 10 memonisa yau, nani kele nketo yina Kuyantika 3:15 metubila?

⁷ Mukanda ya nsuka ya Biblia mezabisa beto nani kele nketo yina Kuyantika 3:15 metubila. (Tanga Kusonga 12:1, 2, 5, 10.) Yakele ve nketo yina kevuandaka awa na ntoto! Nketo yango kele na ngonda na makulu na yandi mpe yimpu ya kimfumu yina kele na bambuetete 12 na yintu na yandi. Yandi butaka muana yina mesuasana na bana yankaka—Kimfumu ya Nzambi. Kimfumu ya Nzambi kele na dizulu, na yau nketo yango fueti vuanda mpe na dizulu. Nketo kena kumonisa kitini ya nkubukulu ya Yehova na dizulu yina mesangisa bisemua na yandi ya kukuikama ya kimpeve.​—Bag. 4:26.

8. Nani kele nkuna ya ntete ya nketo, mpe yinki ntangu yandi kumaka nkuna yango? (Kuyantika 22:15-18)

⁸ Mpova ya Nzambi kena kusadisa beto beto zaba nkuna ya ntete ya nketo. Nkuna yango vuandaka nkuna ya Abrahami. (Tanga Kuyantika 22:15-18.) Mutindu kaka mbikudulu samunaka yau, Yesu vuandaka muntu yina katukaka mbala mosi na muntu yango ya kukuikama. (Luka 3:23, 34) Kasi nkuna yango fueti vuanda na kilendo mingi kuluta bantu samu yandi fueti diata Satana Diabulu samu yandi monana diaka ve. Na yau, ntangu Yesu vuandaka na bamvula 30, yandi tuluaka mafuta na kimpeve samu na kukuma Muana ya kubutuka ya kimpeve ya Nzambi. Ntangu Yesu tuluaka mafuta na kimpeve, yandi kumaka nkuna ya ntete ya nketo. (Bag. 3:16) Na manima ya lufua ya Yesu mpe kufutumuka na yandi, Nzambi pesaka yandi ‘nkembo mpe lokumu’ mpe yandi pesaka yandi ‘kimfumu . . . na dizulu mpe na ntoto,’ ‘buela diaka kimfumu ya kufua bisalu ya Diabulu.’​—Ebr. 2:7; Mat. 28:18; 1 Yn. 3:8.

9-10. (a) Banani diaka kele na kati ya nkuna ya nketo, mpe yinki ntangu bakekumaka bankuna yango? (b) Yinki beto kezola tadila?

⁹ Kasi katula Yesu, yakele diaka na bantu yankaka yina fueti kuma nkuna ya nketo. Ntumua Paulo monisaka bantu yina kele na kati ya nkuna yango ntangu yandi tubilaka Baklisto ya Yuda mpe ya makanda yankaka yina tuluaka mafuta na kimpeve: ‘Kana beno kele bantu ya Klisto, beno kele mpenza nkuna ya Abrahami, bantu yina kebaka dikabu yina bapesaka yandi nsilulu.’ (Bag. 3:28, 29) Ntangu Yehova ketulaka Muklisto mafuta na kimpeve, yandi kekotaka na kati ya nkuna ya nketo. Na yau, nkuna yango mesangisa Yesu Klisto mpe bantu 144 000 yina keyala kintuadi na yandi. (Kus. 14:1) Bau nionso kesalaka nionso samu na kukanisa mpe kusala mambu lokola Tata na bau, Yehova Nzambi.

¹⁰ Ntangu yayi, lokola tomezaba bantu yina Kuyantika 3:15 metubila, beto tubila mbotembote mutindu Yehova kokisaka malembemalembe mbikudulu yango mpe mutindu beto kena kubakila yau mambote.

11. Na yinki mutindu batatikaka nkuna ya nketo ‘na kitambi’?

¹¹ Na kutadila mbikudulu ya Kuyantika 3:15, nioka fueti tatika nkuna ya nketo ‘na kitambi.’ Mbikudulu yango kokisamaka ntangu Satana tindaka Bayuda mpe Baroma bakufua Muana ya Nzambi. (Luka 23:13, 20-24) Mutindu kaka mputa ya kedika na kitambu lenda sala ti muntu bika tambula samu na mua ntangu, mutindu mosi Yesu vuandaka ve na dikoki ya kusala ata diambu mosi samu na mua ntangu, ntangu yandi vuandaka ya kufua na diziami bilumbu tatu.​—Mat. 16:21.

12. Yinki mutindu mpe yinki ntangu bakediata yintu ya nioka?

¹² Mbikudulu ya Kuyantika 3:15 memonisa  ti yalombaka ve Yesu tatamana kuvuanda na diziami. Samu na yinki? Samu na kutadila mbikudulu yango, nkuna ya nketo fueti diata yintu ya nioka. Yazola monisa ti yalombaka Yesu futumuka. Mpe yasalamaka mutindu yina! Na kilumbu ya tatu na manima ya lufua na yandi, Yesu futumukaka lokola kisemua ya kimpeve yina lenda kufua diaka ve. Na ntangu yina Nzambi mebongisa, Yesu kediata Satana samu yandi monika diaka ve. (Ebr. 2:14) Klisto mpe bantu yina keyala kintuadi na yandi kekufua bambeni nionso ya Nzambi​—nkuna ya nioka.​—Kus. 17:14; 20:4, 10. *

13. Yinki mutindu beto kena kubaka mambote na kukokisama ya mbikudulu yango?

¹³ Kana nge kele kisadi ya Nzambi, nge kena kubaka mambote na kukokisama ya mbikudulu yango. Yesu kuizaka na ntoto lokola muntu. Yandi landaka kifuani ya kimuntu ya Tata na yandi na mutindu ya kukoka. (Yoa. 14:9) Na yau, na kulongukaka mambu metadila Yesu, beto kezaba mpe beto kezola Yehova Nzambi. Beto kebakaka diaka mambote na malongi mpe lutuadusu ya Yesu mpe na mutindu yandi kena kutuadisa kimvuka ya Buklisto bubu yayi. Yandi longaka beto mutindu ya kuvuanda na luzingu yina kesepedisaka Yehova. Mpe beto nionso beto lenda baka mambote na lufua ya Yesu​—yina batatikaka na kitambi. Yinki mutindu? Ntangu Yesu futumukaka, yandi monisaka valere ya menga na yandi lokola nkayilu ya kukoka yina ‘kena kukatula masumu na beto nionso.’​—1 Yn. 1:7.

14. Yinki mutindu beto mezaba ti mbikudulu yina Yehova pesaka na Edeni kokisamaka ve na ntangu yango? Sasila.

¹⁴ Mambu yina Yehova tubaka na mbikudulu yina yandi pesaka na bilanga ya Edeni kena kumonisa ti yavuandaka ve samu yakokisama na ntangu yango. Yavuandaka lomba ntangu samu nketo bimisa nkuna yina pesamaka nsilulu, samu Diabulu sangisa bantu na yandi mpe samu kimbeni (to kuyinana) kula kati na bagrupe yango zole. Beto kebakaka mambote na kuzabaka mbikudulu yango samu yakeluengisaka beto ti yinza yina kena kutuadusua na Satana keyina bisadi ya Yehova. Na manima, Yesu pesaka banlonguki na yandi nduengoso ya mutindu yina. (Mar. 13:13; Yoa. 17:14) Kondua ntembe beto kena kumona kukokisama ya mbikudulu yango, mingimingi na bamvula 100 yayi mekatuka luta. Na yinki mutindu?

15. Samu na yinki yinza keyinaka nkuna ya nketo bubu yayi mingi kuluta, kasi samu na yinki beto kele ve na mfunu ya kubanga Satana?

¹⁵ Ntangu fioti na manima ya kukuma Ntinu Masiya na 1914, Yesu kukaka Satana na dizulu. Bubu yayi yandi kele ya kukangama nzinganzinga ya ntoto, yandi kena kuvingila lufua na yandi. (Kus. 12:9, 12) Kasi atako plina, yandi kanga maboko ve. Satana kele na nganzi mpe yandi kena kunuanisa bisadi ya Nzambi. (Kus. 12:13, 17) Yakele samu na yau nde yinza ya Satana kena kuyina beto mingi kuluta. Kasi beto kele na mfunu ve ya kubanga Satana mpe bantu na yandi. Kutu beto lenda ndimisama lokola ntumua Paulo, yina sonikaka: ‘Kana Nzambi kele samu na beto, nani kesala beto yimbi?’ (Bar. 8:31) Beto lenda tudila Yehova ntima ya mvimba samu mutindu beto monaka yau bambikudulu mingi yina kele na Kuyantika 3:15 mekokisamaka deja.

16-18. Yinki mutindu Curtis, Ursula, mpe Jessica bakaka mambote na kubakusaka mukanda ya Kuyantika 3:15?

¹⁶ Mbikudulu ya Yehova yina kele na Kuyantika 3:15 lenda sadisa beto nunga konso kumekama yina kekumina beto. Curtis, yina kele misionere na Guam, metuba: “Na bantangu  yankaka, yavuandaka na mambu yina vuandaka kumina munu na luzingu, yavuandaka sala ti yavuanda mpasi samu na munu munu bikana ya kukuikama na Yehova. Kasi kuyindula na mpinda na mbikudulu yina kele na Kuyantika 3:15 sadisaka munu munu tatamana kutudila Tata na munu ya dizulu ntima.” Curtis kevingilaka na nsatu ya ngolo kilumbu yina Yehova kemanisa bampasi na beto nionso.

¹⁷ Mpangi mosi ya nketo na nkumbu ya Ursula na buala ya Bavière metuba ti kubakusa Kuyantika 3:15 sadisaka samu yandi ndimisama ti Biblia kele ya kupemama na Nzambi. Yandi monaka mutindu bambikudulu nionso yankaka kele na nguizani na mbikudulu yango, mpe yavuandaka kamuisa yandi mingi. Yandi mebuela diaka: “Ntima na munu simbamaka ntangu munu bakusaka ti Yehova salaka mbala mosi diambu mosi samu bantu zimbisa ve kivuvu na bau.”

¹⁸ Jessica, yina kevuandaka na buala ya Micronésie, metuba: “Munu kena kuzaba diaka mutindu munu kukimonaka ntangu munu bakusaka samu na mbala ya ntete ti munu memona kedika! Mbikudulu yina kele na Kuyantika 3:15 vuandaka kokisama. Yasadisaka munu munu zaba ti mambu yina beto kena kukutana na yau bubu yayi kele ve luzingu ya kedika. Mbikudulu yango kindisaka munu diaka samu munu ndima ti kusadila Yehova kele luzingu yina meluta mbote munu lenda vuanda na yau bubu yayi mpe yakevuanda mbote kuluta na bilumbu kena kuiza.”

19. Samu na yinki beto lenda ndimisama ti kitini ya nsuka ya mbikudulu yango kekokisama?

¹⁹ Mutindu beto monaka yau, Kuyantika 3:15 kena kutatamana kukokisama bubu yayi. Nkuna ya nketo mpe nkuna ya nioka mezabana puelele. Yesu, yina kele kitini ya ntete ya nkuna ya nketo, mputa na yandi ya kitambi mebulukaka mpe bubu yayi yandi kele Ntinu ya kilendo, mpe yina lenda kufua ve. Bubu yayi Yehova meponaka ndambu ya bantu yina keyala kintuadi na Yesu na dizulu. Lokola kitini ya ntete ya mbikudulu yango mekokisamaka, beto kele mpenza na bamfunu ya kutula ntima ti kitini na yau ya nsuka yina metubila kudiata yintu ya nioka, kekokisama. Yakevuanda diambu ya kukindisa samu na bantu ya kukuikama ntangu Satana kebebisama! Tekila ntangu yango fuana, beto bika ve. Nzambi na beto mefuana beto tudila yandi ntima. Na nzila ya nkuna ya nketo, yandi kepesa balusakumunu mingi na ‘makanda nionso ya ntoto.’​—Kuy. 22:18.