MWAHA WOOSOMIYA 30
Inatiri yokhalayi inoophwanyihani ifayita nyuuva
“Kinaahala uhiwiiwananiha weeva ni nthiyana.”—UPHA. 3:15.
NCIPO 15 Louva o Filho de Jeová!
NINHALA WIITTHUCANI? *
1. Atamu ni Hawa uvara waya itampi, isiyani Yehova yoolumilyaawe? (Nwehe Uphattuwaca 3:15.)
ATAMU ni Hawa uvara waya itampi, Yehova ahopanka inatiri wiira avahe nweherero ucuulwaya wotheene. Itthu Yehova yoolumalyaawe imphwanyannya nhina Uphattuwaca 3:15.—Nsome. *
2. Kontha isiyani inatiri yo nlivuruni yo Uphattuwaca ihaana ifayita cinene?
2 Unookhalaru wiira iyo inatiriiyo imphwanyannya nhina ilivuru yoopacera yo mbiiblyani, ilivuru cikhwaawe co mbiiblyani cotheene cinaavaranaca niitthu inhimyaaya iyo inatiriiyo. Khampa nkhoyi cintthukaaya ikhuni wiira nikhale nivici nimoca, itthu inhimyaaya Uphattuwaca 3:15 inaaluttaniha ilivuru co mbiiblyani cotheene wiira ukhale mwaha mmoca paahi: Nluku anhala unveleeliha ntthu wiira awoopole apinaatamu ni ammalamalihe Sotwani ni attharyaawe. * Iyo itthwiiyo inhala ukhala iparakha yuulupale inhalaaya waakhela atthu otheene anonfenta Yehova!
3. Ninhala wiitthucani nhina ula mwahoola?
3 Nhina ula mwahoola, ninaahala wuuluma iri nlivuruni yo Uphattuwaca 3:15 ni waakhula ala makohwaala: Phaapani anoolumiya nhina iyo inatiriiyo? Manannani iyo inatiriiyo cineerannyaaya? Ni ifayitani iyo inatiriiyo inniphwanyihaaya otheene cihu?
PHAAPANI ANOOLUMIYA NHINA IYO INATIRIIYO?
4. “Inwaa” Yehova yoolumannyaawe aari tipani, ni nincuwela cani iyo itthwiiyo?
4 Atthu anoolumiya nhina inatiri yo nlivuruni yo Uphattuwaca 3:14, 15 ikhanle “inwaa,” “ucuulu” wo inwaa, “nthiyana,” ni “ucuulu” wa nthiyana. Ibiiblya inaanikavihera waacuwela ayo atthwaayo. * Woopacera, nttwee nincuwele tipani khanle inweeyo. Ule ukatyuule, Yehova khoolumanne inwaa; kontha unari wiira yaari inwaa, iyo khayaahala wiiwa citthu caapheelaawe uhimya. Phimaana, unawoonannya wiira Yehova oolumana nlayikha. Masi nlayikhani Yehova noolumanaawe? Ilivuru yo Apokalipise 12:9 inaanikavihera ucuwela. Iyo iveeruswiiyo inaahimya wiira “inwaa yokhalayi” aari Sotwani, Tiyapu. Vano phaapani akhanle ucuulwaawe?
INWAA
Apokalipise 12:9 inaahimya wiira “inwaa yoopacera” khanle Sotwani, Tiyapu (Nwehe iparaagarafu 4)
5. Ale yiihaniye ucuulu wo inwaa phaapani?
5 Ikwaha cikhwaawe, mbiiblyani yoolumiyaka asiculawe ntthu anaaciya atthu anontakiha venci uyo ntthuuyo, mpaka wanaaphwanelaaya wiihaniya asaanaawe awula asiculawe. Phimaana, ucuulu wo inwaa anaaciya malayikha ahiile umwiiwelela Yehova ni apinaatamu anontakiha Sotwani ni anrukunuwenle Nluku ni apoovwaawe. Wootakihera, yahaavo malayikha yanrukunuwenle Yehova uwakati wa Nowee ni khamala apinaatamu arina meettelo khampa aathumwanaya, Tiyapu.—Upha. 6:1, 2; Joau 8:44; 1 Jo. 5:19; Yuda 6.
UCUULU WO INWAA
Malayikha oohikhuluvelya ni apinaatamu anonrukunuwela Yehova ni anaarukunuwela apoovwaawe (Nwehe iparaagarafu 5)
6. Nlattuni uneereehu wiira nthiyana oolumiye khanakhala Hawa.
6 Vano nttwee nincuwele tipani khanle nthiyana noolumiya nhina iyo inatiriiyo. Uyo nthiyanooyo khanlamuliya ukhala Hawa. Nlattuni? Nttwee nuupuwele itthu imoca. Iyo inatiriiyo ineera wiira ucuulu wa nthiyana wanhala unyakata muru wo innwaa. Ni khampa ciitthucileehu, iyo inweeyo khanle Sotwani, Nlayikha. Unari wiira uyo nthiyanooyo khanle Hawa, khaavo mwaana awula mwanculawe Hawa aahala ukhitiri unnyakata Sotwani Tiyapu. Vano manannani Sotwani cinhalaawe unyakatiya awula umalamalihiya?
7. Toko cinthoonyeraaya Apokalipise 12:1, 2, 5, 10, nthiyana noolumiya nhina Uphattuwaca 3:15 inaaciya isiyani?
7 Ilivuru yoomalela yo mbiiblyani inanhimya tipani khanle nthiyana noolumiya nhina Uphattuwaca 3:15. (Nsome Apokalipise 12:1, 2, 5, 10. *) Uyo nthiyanooyo khanakhala pinaatamu! Nlivuruni yo Apokalipise uhohimiya wiira mweeri uri vathi waya inyaa cawe ni howara ikofiyo yeemweene irina itthontwaa 12. Uyo nthiyanooyo nannyara mwaana, ni mwaana nonnyaraawe ukhanle Umwene wa Nluku. Ukhala wiira Umwene wa Nluku umphwanyannya wiirimu, uyo nthiyanooyo ciicammo nlamuliya ukhala o wiirimu. Nthiyana noolumiya nhina iyo inatiriiyo unaaciya mphwinko woothotokanihiya wa Yehova wo malayikha ookhuluvelya umphwanyannya wiirimu.—Akalas. 4:26.
NTHIYANA
Mphwinko woothotokanihiya wa Yehova wo malayikha ookhuluvelya wiirimu (Nwehe iparaagarafu 7)
8. Tipani khanle mphantte muulupale wo ucuulu wa nthiyana, ni iyo itthwiiyo yiirannyeele ukatini? (Nwehe Uphattuwaca 22:15-18.)
8 Ibiiblya ciicammo inaanithoonyera wiira Yesu phikhanle mphantte muulupale wo ucuulwaawe uyo nthiyanooyo. Ibiiblya yahohimya wiira uyo ucuuluuyo waahala ukhumelela wanlokoni na Aparahaamu. (Nsome Uphattuwaca 22:15-18. *) Ni Yesu phaari ucuulu wa Aparahaamu woolumiye nhina iyo inatiriiyo. (Luka 3:23, 34) Masi ucuulu wa nthiyana aalamuliya ukhala ntthu okuru unvikana pinaatamu wiira akhitiri ummalamaliha Sotwani. Phimaana, Yesu ukati waarinaawe myaakha 30 ahothanliya ninnepa wowaarya wa Nluku. Uyo ukatyuuyo, Yesu ahokhala mphantte muulupale wo ucuulu wa nthiyana oolumiye nlivuruni yo Uphattuwaca. (Akalas. 3:16) Yesu waakhwilyaawe ni wonwelelihiyaawe, Yehova ‘ahonvaha nttitthimiho ni ikuru,’ ni ciicammo Yesu hovahiya “ukhulupale wotheene wiirimu ni vathi.” Phimaana, uyo naahala ‘utankanya miteko ca Sotwani.’—Mabere. 2:7; Mat. 28:18; 1 Jo. 3:8.
UCUULU WA NTHIYANA
Yesu Kristu ni makristau oothanliya 144.000 anhala ulamulela nuuyova (Nwehe iparaagarafu 8-9)
9-10. a) Phaapani-tho ampanka mphantte nhina ucuulu wa nthiyana, ni ukatini ayo unanceraaya upanka mphantte wo uyo ucuuluuyo? b) Isiyani impheeleehu vano woopela mwaha?
9 Masi unhiya Yesu, ahaavo-tho akhwaawe akhanle ucuulu wa nthiyana. Apostolu Paulu ahohimya wiira makristau oothanliya otheene ciicammo akhanle ucuulu wa nthiyana. Uyo enre co: “Wakhala wiira nyuuva mwaatthu a Kristu, otheene cinyu nkhanle ucuulu weekhweeli wa Aparahaamu ni nnohala waakhela itthuvo imocaaru.” (Akalas. 3:28, 29) Nkristau athanliyaka ninnepa wowaarya wa Nluku, uyo naakhala mphantte wo ucuulu wa nthiyana. Phimaana, ucuulu wa nthiyana uromoliye nlivuruni yo Uphattuwaca khanle Yesu ni makristau oothanliya 144.000 anhala ulamulela nkhayi nuuyo wiirimu. (Apoka. 14:1) Otheene ale ampanka mphantte nhina uyo ucuuluuyo anawiikurumica utakiha moopuwelelo ni makhalelo a Athumwanaya, Yehova Nluku.
10 Mpaka va, niheetthuca phaapani anromoliya nhina inatiri yo Uphattuwaca 3:15. Vano nttwee noone manannani Yehova cineerannyeehaawe vakaani-vakaani iyo inatiriiyo ni mananna iyo cinnikaviheraaya.
MANANNANI IYO INATIRIIYO CINEERANNYAAYA?
11. Manannani ucuulu wa nthiyana waarakalihiyaaya “nkottokotthoni”?
11 Inatiri yo Uphattuwaca 3:15 ineera wiira inwaa yaanaahala “urakaliha” ucuulu wa nthiyana nkottokotthoni. Iyo itthwiiyo yiirannyaale ukati Sotwani waakurumicilyaawe ayuuta ni arooma umwiiva Mwaana a Nluku. (Luka 23:13, 20-24) Ntthu arakalaka ikottokottho naasiviriha ukati hikhitiriki uvara miteko caalemalenlyaawe. Inanna imocaaru, Yesu ahoviriha mahuku mararu nakhwaale ni hikhitiriki uvara hataa itthu.—Mat. 16:21.
12. Manannani ni ukatini unhalaaya unyakatiya muru wo inwaa?
12 Masi wiira inatiri yo Uphattuwaca 3:15 yiirannye, Yesu khaalamuliya ukhala nanlelo nakhwile. Nineera commo kontha iyo inatiriiyo yahohimya wiira ucuulu wa nthiyana waanaahala unyakata muru wo inwaa. Wiira iyo itthwiiyo yiirannye, nikhwatta Yesu naarinaawe nkottokotthoni nahaana nivolaka. Ni iyo phi itthu yiirannyeele. Uvira waya mahumu mararu nakhwile, Yesu ahonwelelihiya wiira arwee akhale wiirimu woohiweherera-tho ukhwa. Ni waphiyaka ukati Yehova ulakenlyaawe, Yesu naahala unyakata muru wo inwaa, awula ummalamaliha Sotwani. (Mabere. 2:14) Yesu Kristu ni makristau oothanliya 144.000 anaahala umalamaliha ucuulu wo inwaa—atthu otheene anrukunuwenle Nluku.—Apoka. 17:14; 20:4, 10. *
IYO INATIRIIYO INNIPHWANYIHA IFAYITANI?
13. Wiirannya waya iyo inatiriiyo unniphwanyiha ifayitani?
13 Wakhala wiira nyuuva munswali a Yehova, iyo inatiriiyo inawuuphwanyihani ifayita venci. Manannani? Ukati Yesu waawilyaawe watuninyani khampa pinaatamu, uyo aanaatakiha sana-saana meettelo a Athumwaane. (Joau 14:9) Phimaana, neetthucaka meettelo a Yesu, ninaatepa uncuwela ni unfenta Yehova Nluku. Ciicammo, hiiva ninaaphwanya ifayita nasomaka citthu Yesu ciitthucihilyaawe ni noonaka mananna cinhoolelaawe maloko eekristau ntuninyani motheene. Yesu naanikavihera ukhala nincivelihaka Yehova ni ukhwa wa Yesu ulattanihiye nuurakalihiya nkottokotthoni uhoniphwanyiha ifayita otheene cihu. Manannani? Yesu Kristu wunwelelihiya wawe, hovaherera iphomyaawe wiira ‘irapihe matampiihu otheene.’—1 Jo. 1:7.
14. Niireke wiira inatiri Yehova yaapankilyaawe u Eeteni yaahala wiirannya yoole ukatyuule? Ntaphulele.
14 Inatiri Yehova yaapankilyaawe u Eeteni inthoonyera wiira ayo moolumwaayo khayaahala wiirannya ule ukatyuule, masi yaahala wiirannya wahoolo. Iyo inatiriiyo yaahimya wiira nthiyana aanaahala ukhalana ucuulu, Sotwani aanaahala ukhalana attharyaawe ni ikhurupwaawe khayaahala wiiwanana niikhurupu ya nthiyana. Wiira citthu cotheenennyo ciirannye, wahaana uviraka ukati mwinci. Ucuweleeha mananna cineerannyaaya iyo inatiriiyo unaanithoonyera wiira hiiva nihaana niwehereraka ulupatthiya ni Sotwani ni naatthu o ntuninyani inhoolelaawe. Ni iyo phi itthu Yesu yaahimenryaawe attharyaawe wiira yanhala uwiirannyeela. (Mark. 13:13; Joau 17:14) Hiiva otheene ninnoona iyo itthwiiyo yiirannyaaka, venci-venci myaakha 100 civinre uttuli. Masi manannani cineerannyaaya?
15. Kontha isiyani atthu o ntuninyani anaavira yatepaka unithanya, masi nlattuni uhinlamuliyeehu umoova Sotwani?
15 Uvira waya ukati vakaani Yesu nakhalihiye Mwene o Umwene wa Nluku mwaakha wo 1914, Sotwani ahoomoliya wiirimu. Ukhuma uyo ukatyuuyo, Sotwani ri watuninyani awehereraka uphiya ukati unhalaawe umalamalihiya. (Apoka. 12:9, 12) Masi Sotwani kheemenle paasi woohivara itthu. Uyo hovelavela ni nkhala oorusiya; ni urusiya wawe wotheene, naamalamalihera apoovu a Yehova. (Apoka. 12:13, 17) Phimaana, atthu o ntuninyani anaavira yatepaka waathanya apoovu a Nluku. Masi hi khaninlamuliya umoova Sotwani ni uwoova ale anontthara. Hi ninaakupali itthu yaakupalyaawe apostolu Paulu. Uyo hantikha co: “Ukhala wiira Nluku ri ni hiiva, tipani nhala unirukunuwela?” (Aroo. 8:31) Hi ninaakhuluvela wiira Yehova khanhala unihiya, kontha heerannyeeha citthu caahimyalyaawe nhina inatiri yo Uphattuwaca 3:15.
16-18. Inatiri yo Uphattuwaca 3:15 inaakavihera cani amunna Curtis, arokorihu Ursula ni arokorihu Jessica?
16 Inatiri yo nlivuruni yo Uphattuwaca 3:15 pooti unikavihera uvilela masakha annikhumelela muukumini wihu. Munna mmoca neehaniya Curtis novara nteko weemisiyonaariyu ncoko uneehaniya Guam, heera: “Ikwaha cinci muukumini waka yahokikhumelela masakha ni cahokikhumelela citthu cinci caakirikarikiha unvaresesa Yehova. Masi wuupuwela inatiri iri nhina Uphattuwaca 3:15 unaakikavihera uhihiya unkhuluvela Nlukwaaka.” Munna Curtis naaweherera avilelaka nihuku Yehova ninhalaawe umaliha masakha otheene anonkhumelela.
17 Arokorihu amoca ankhala u Alemanha aneehaniya Ursula aheera wiira wiiweeha inatiri yo Uphattuwaca 3:15 phaakavihenre ukupali wiira Ibiiblya ikhanle ilivuru ya Nluku. Ayo ahoona mananna inatiri co mbiiblyani cotheene cinvaranacaaya niiyo inatiriiyo, ni iyo itthwiiyo ihaavara nrima venci. Ayo arokorihwaayo aheera: “Mi kahokhala ootteeliya venci ukati wonnyaaka wiira Yehova khaapicapicile waavaha apinaatamu nweherero.”
18 Arokorihu akhwaawe ankhala u Micronésia aneehaniya Jessica, aheera: “Mi nanlelo kinawuupuwela inanna caakhanlyaaka ikwaha yoopacera koonelenlyaaka wiira kihophwanya ikhweeli ya Nluku. Kahoona wiira inatiri iri nhina Uphattuwaca 3:15 inawiirannya. Wuupuwela iyo itthwiiyo unaakithoonyera wiira nanlelo khaninaaya uphwanya ukumi weekhweeli. Iyo inatiriiyo inaalipihaca ukhuluvela waka wiira unswalela Yehova phinhala uniphwanyiha ukumi womaana nnava ni phinhala uniphwanyiha ukumi womaana wahoolo.”
19. Nlattuni ninlamuliyeehu ukhuluvela wiira mphantte woomalela wonatiri yo Uphattuwaca 3:15 unaahala wiirannya?
19 Toko ciitthucileehu, inatiri yo Uphattuwaca 3:15 nanlelo inawiirannya mahuku ankhaleehu. Niheetthuca phaapani akhanle ucuulu wa nthiyana ni ucuulu wo inwaa. Yesu, khanle mphantte muulupale wo ucuulu wa nthiyana, hovona nikhwatta naarakalihiyaawe nkottokotthoni ni hokhala Mwene okuru ni hinweherera ukhwa. Ni Yehova hanle vakaani umalihera waathanla atthu anhala urwaa ulamulela ni Yesu wiirimu. Ukhala wiira mphantte woopacera wo iyo inatiriiyo uheerannya, nihaana isariya yookhuluvela wiira mphantte woomalela wo iyo inatiriiyo ciicammo unaahala wiirannya. Muru wo inwaa khweeliini unaahala unyakatiya. Aswali a Yehova otheene unaahala waatteela nrima ukati unhalaaya ucuwela wiira Sotwani homalamalihiya. Masi nihinaphiya nno nihukunno, nhoocye. Munkhuluvele Yehova ni nkhuluvele wiira uyo naahala uruma ucuulu wa nthiyana waavaha iparakha cinci “atthu olapo cotheene ntuninyani.”—Upha. 22:18.
NCIPO 23 Jeova Começou a Reinar!
^ Unaahala unirika wiiweeha ikhweeli co mbiiblyani naahiiweeheke inatiri imphwanyannya nhina Uphattuwaca 3:15. Usoma iyo inatiriiyo unaahala ulipihaca waamini wihu, ni unaahala utepa unikupaliha wiira Yehova naahala wiirannyeeha citthu cotheene cikhuluvelihilyaawe.
^ Uphattuwaca 3:15 Kinaahala uhiwiiwananiha weeva ni nthiyana, ni kinaahala uhiiwananiha ucuulwaa weeva ni ucuulu wa nthiyana. Ucuulu wa nthiyana nokowuunyakata muru ni weeva unkonrakaliha ikottokotthwaawe.
^ Nwehe Apêndice B1, “A mensagem da Bíblia,” nhina Ibiiblya Tradução do Novo Mundo.
^ Nwehe ikwaaturu “Atthu anoolumiya nhina Uphattuwaca 3:14, 15.”
^ Apokalipise 12:1 Nahoonnya nthoonyihero wiirimu: nthiyana mmoca aawanre ncuwa; mweeri waari vathi manyaawe ni umuruni wawe ahowara ikofiyo yeemwene yaarina itthonttwa 12. 2 Uyo nthiyanooyo aari niirukulu ni aanawiipulela cinene kontha aahanle vakaani uyara. 5 Uyo ahonnyara mwaana mwanlopwana, nohala uhoolela ilapo cotheene niikopo yoyuuma. Masi wowaakuvya, uyo nthiyanooyo ahaakhiya mwaana annyanryaawe ni mwaanooyo ahorwaaniya wa Nluku ni wahiceni wawe. 10 Kaheewa ncu wiirimu neeraka: “Vano uheerannya woopoliya wihu, ikuru ni Umwene wa Nlukweehu, ni ukhulupale wa Kristwaawe, kontha hovonyeriya vathi ule nowootherya mayamunneehu uthana ni uhiyu, uhoolo wa Nlukweehu!”
^ Uphattuwaca 22:15 Vano, nlayikha na Yehova ninari wiirimu nahomwiihana Aparahaamu ikwaha yonayeeli, 16 ni nahomwiirela: “Yehova heera: ‘Ukhala wiira uhokipankela ila itthwiila ni khukithuwile mwaamwanaa, mi kinaalapha wiira 17 khweeliini kinaahala wuucaaliha ni kinaahala winciviha ucuulwaa khampa itthonttwa co wiirimu ni khampa nthaaka woomaka. Ucuulwaa unaahala utthema isittatti caawanannyaaya. 18 Nlattu wo ucuulwaa, maloko otheene o watuninyani anaahala wiiphwanyiha iparakha, ukhala wiira uheewelela ncu naka.’”
^ Nwehe ikwaaturu “ Citthu cuulupale cineerannyeeha inatiri yo Uphattuwaca 3:15.”
