1. ¿Ndáaña ke̱ʼé Jehová tá sa̱kán ni̱ki̱ʼvi ta̱ Adán xíʼin ñá Eva ku̱a̱chi? (Génesis 3:15).

 TÁ SA̱KÁN ni̱ki̱ʼvi ta̱ Adán xíʼin ñá Eva ku̱a̱chi nu̱ú Jehová, nu̱ú iin profecía ni̱ka̱ʼa̱n Jehová xa̱ʼa̱ ña̱ va̱ʼa ña̱ ndakiʼin na̱ se̱ʼe na̱yóʼo. Ta nu̱ú Génesis 3:15 * va̱xi ña̱ ni̱ka̱ʼa̱nra xa̱ʼa̱ (kaʼviña).

2. ¿Nda̱chun ndáyáʼviní profecía ña̱ va̱xi nu̱ú Génesis 3:15?

² Profecía yóʼo va̱xiña nu̱ú libro ña̱ Génesis. Ta ndáyáʼviní ña̱yóʼo, ¿nda̱chun? Saáchi tu̱ʼun ña̱ va̱xi nu̱ú Génesis 3:15, kúú ña̱ káʼa̱nníka tu̱ʼun Ndióxi̱ xa̱ʼa̱. Ta ndiʼika libro ña̱ va̱xi nu̱ú tu̱ʼun Ndióxi̱ kítáʼanníña xíʼin ña̱ káʼa̱n ña̱yóʼo. Nu̱ú profecía yóʼo káʼa̱nña xa̱ʼa̱ iin ta̱ sakǎku ndiʼi na̱ yiví, ta saátu káʼa̱nña ña̱ sandíʼi-xa̱ʼa̱ra ta̱ Ndi̱va̱ʼa xíʼin ndiʼika na̱ kítáʼan xíʼinra. * Tá ná xi̱nu profecía yóʼo, ndiʼi na̱ ndásakáʼnu Jehová kusi̱íní-inina.

3. ¿Ndáaña sakúaʼayó nu̱ú artículo yóʼo?

³ Nu̱ú artículo yóʼo ndakuiinyó sava pregunta ña̱ káʼa̱n xa̱ʼa̱ Génesis 3:15, tá kúú: ¿Ndáana káʼa̱n profecía yóʼo xa̱ʼa̱? ¿Ndáa ki̱ʼva xa̱a̱ xínu profecía yóʼo? Ta, ¿ndáa ki̱ʼva chíndeétáʼanña xíʼinyó tiempo vitin?

4. ¿Ndáana kúú tí ko̱o̱, ta nda̱chun va̱ʼa xíni̱yó ña̱yóʼo?

⁴ Nu̱ú Génesis 3:14, 15 káʼa̱nña xa̱ʼa̱ iin “tí ko̱o̱” xíʼin na̱ se̱ʼe  tíyóʼo, ta saátu káʼa̱nña xa̱ʼa̱ iin “ñaʼá” xíʼin na̱ se̱ʼe ñáyóʼo. Tu̱ʼun Ndióxi̱ va̱ʼaní chíndeétáʼanña xíʼinyó ña̱ kunda̱a̱-iniyó ndáana káʼa̱nña xa̱ʼa̱. * Ná kixáʼayó ka̱ʼa̱nyó ndáa ko̱o̱ kúú tí káʼa̱n ña̱yóʼo xa̱ʼa̱. Su̱ví iin ko̱o̱ kúú tí níka̱ʼa̱n Jehová xíʼin nu̱ú jardín ña̱ Edén, saáchi tá níxi̱yorí iin ko̱o̱, va̱ása kiviví kunda̱a̱-inirí xa̱ʼa̱ ña̱ ni̱ka̱ʼa̱n Jehová. Ña̱kán su̱ví iin kitíví kúú tí níka̱ʼa̱n Jehová xíʼin, chi na̱ ni̱ka̱ʼa̱nra xíʼin ku̱ndaa̱va-inina xíʼin ña̱ ni̱ka̱ʼa̱nra. Ña̱kán tu̱ʼun Ndióxi̱ káxiní káʼa̱nña xíʼinyó ndáa na̱ kúú “ko̱o̱ tí nu̱ú” tí káʼa̱n libro ña̱ Apocalipsis 12:9 xa̱ʼa̱, tíyóʼo kúú tí káʼa̱nna xíʼin naní Satanás xíʼin Diablo. Ta, ¿ndáana kúú se̱ʼe tí ko̱o̱?

5. ¿Ndáana kúú se̱ʼe tí ko̱o̱?

⁵ Tu̱ʼun Ndióxi̱ káʼa̱nña xa̱ʼa̱ na̱ kúú se̱ʼe tí ko̱o̱, ta na̱yóʼo kúú na̱ ta̱chí ndi̱va̱ʼa xíʼin na̱ yiví na̱ ndákanixi̱ní nda̱a̱ táki̱ʼva ndákanixi̱ní ta̱ Ndi̱va̱ʼa ta kéʼéna nda̱a̱ táki̱ʼva kéʼéra. Ta kúndasína xínina Jehová ta saátu na̱ ñuura. Na̱ Ángel na̱ ndu̱u ta̱chí ndi̱va̱ʼa tá tiempo ta̱ Noé, nda̱koona ndiví ta ki̱xaa̱na nu̱ú ñuʼú yóʼo. Ta ki̱xáʼana kéʼéna nda̱a̱ táki̱ʼva kéʼé ta̱ Ndi̱va̱ʼa ta saátu kininí ki̱xáʼa kéʼé na̱ yiví na̱ kítáʼan xíʼinra nda̱a̱ tiempo vitin (Gén. 6:1, 2; Juan 8:44; 1 Juan 5:19; Jud. 6).

6. ¿Nda̱chun su̱ví ñá Eva kúú ñá káʼa̱n Génesis 3:15 xa̱ʼa̱?

⁶ Vitin ná ka̱ʼa̱nyó xa̱ʼa̱, ndáa ñaʼá kúú ñá ni̱ka̱ʼa̱n profecía xa̱ʼa̱. ¿Á ñá Eva kúú ñáyóʼo? Va̱ásaví. Ná ndakanixi̱níyó xa̱ʼa̱ ña̱yóʼo. Profecía káʼa̱nña xa̱ʼa̱ na̱ se̱ʼe ñá ñaʼá: “Ta̱kán ku̱a̱ñi̱ndosóra á ku̱niʼnira xi̱ní” tí ko̱o̱. Nda̱a̱ táki̱ʼva íyo ña̱ xa̱a̱ sa̱kúaʼayó, tí ko̱o̱ yóʼo kúú ta̱ Ndi̱va̱ʼa. Ña̱kán su̱ví xa̱ʼa̱ ñá Eva káʼa̱n ña̱yóʼo saáchi na̱ se̱ʼeñá xíʼin miíñá na̱ yiví ku̱a̱chi kúúna, ta va̱ása kuchiñu na̱ se̱ʼe ñáyóʼo sandíʼi-xa̱ʼa̱na ta̱ Ndi̱va̱ʼa. Tá saá, ¿ndáa ñaʼá kúú ñá káʼa̱n ña̱ profecía xa̱ʼa̱?

7. ¿Ndáa ki̱ʼva chíndeétáʼan Apocalipsis 12:1, 2, 5, 10 xíʼinyó kunda̱a̱-iniyó ndáa ñaʼá kúú ñá káʼa̱n Génesis 3:15 xa̱ʼa̱?

 ⁷ Libro ña̱ Apocalipsis chíndeétáʼanña xíʼinyó ña̱ kunda̱a̱-iniyó ndáa ñaʼá kúú ñá káʼa̱n Génesis 3:15 xa̱ʼa̱ (kaʼvi Apocalipsis 12:1, 2, 5, 10). Ñáyóʼo su̱ví iin ñaʼá ndixa kúúñá, ta ti̱xin xa̱ʼa̱ñá ndíka̱a̱ yo̱o̱, ta xi̱níñá kánuu iin corona ña̱ kúúmií 12 ki̱mi. Ta saátu káʼa̱nña ña̱ ka̱ku iin ta̱ loʼo se̱ʼeñá ta̱ ndáyáʼviní, ta ta̱ loʼo yóʼo ndána̱ʼa̱ra Reino Ndióxi̱. Reino yóʼo chí ndiví íyoña, ña̱kán ñá ñaʼá ñá káʼa̱nyó xa̱ʼa̱ yóʼo ndána̱ʼa̱ñá ndiʼi na̱ se̱ʼe Jehová na̱ íyo chí ndiví (Gál. 4:26).

8. ¿Ndáa ta̱ kúú se̱ʼe ñá ñaʼá, ta ama ni̱xa̱a̱ ta̱yóʼo ndu̱ura se̱ʼeñá? (Génesis 22:15-18).

⁸ Tu̱ʼun Ndióxi̱ chíndeétáʼanña xíʼinyó kunda̱a̱-iniyó, ndáana kúú se̱ʼe ñá ñaʼá. Ta káʼa̱ntuña ña̱ ta̱ se̱ʼe ñáyóʼo kixira ti̱xin na̱ veʼe ta̱ Abrahán (kaʼvi Génesis 22:15-18). * Ta ni̱xi̱nuva profecía yóʼo, saáchi ta̱ Jesús ki̱xira ti̱xin na̱ veʼe ta̱ Abrahán (Luc. 3:23, 34). Ta nda̱a̱ táki̱ʼva íyo ña̱ xa̱a̱ sa̱kuaʼayó, iin na̱ yiví va̱ása kuchiñuna sandiʼi-xa̱ʼa̱na ta̱ Ndi̱va̱ʼa. Ña̱kán tá kúúmií ta̱ Jesús 30 ku̱i̱ya̱ra, Ndióxi̱ nda̱kaxinra ta̱yóʼo xíʼin espíritu santo. Tasaá kúú ña̱ ni̱xa̱a̱ra ndu̱ura se̱ʼe ñá ñaʼá ñá káʼa̱n profecía xa̱ʼa̱ (Gál. 3:16). Ña̱kán tá ni̱xi̱ʼi̱ ta̱ Jesús ta nda̱takura, Ndióxi̱ ta̱xira ña̱ ná ndasakáʼnunara ta ná ixato̱ʼónara. Ta saátu ta̱xira chiñu ndaʼa̱ra ña̱ kiʼinra kuenta xíʼin ña̱ʼa ña̱ íyo chí ndiví xíʼin ña̱ʼa ña̱ íyo nu̱ú ñuʼú yóʼo, ta ta̱xitura chiñu ndaʼa̱ra ña̱ “sandíʼi-xa̱ʼa̱ra ña̱ʼa ña̱ kéʼé ta̱ Ndi̱va̱ʼa” (Heb. 2:7; Mat. 28:18; 1 Juan 3:8).

9, 10. a) ¿Ndáana xáa̱ka ndúu se̱ʼe ñá ñaʼá, ta ama xáa̱na ndúuna se̱ʼeñá? b) ¿Ndáaña ka̱ʼa̱nkayó xa̱ʼa̱?

⁹ Profecía káʼa̱nña xa̱ʼa̱ ta̱ Jesús ña̱ kúúra se̱ʼe ñá ñaʼá, ta saátu íyo inkaka na̱ xáa̱ kúú se̱ʼe ñáyóʼo. Ta̱ apóstol Pablo ni̱ka̱ʼa̱nra xa̱ʼa̱ na̱yóʼo nu̱ú carta ña̱ ka̱ʼyíra ku̱a̱ʼa̱n nu̱ú na̱ judío xíʼin na̱ inka ñuu na̱ nda̱kaxin Ndióxi̱ ku̱ʼu̱n chí ndiví, ña̱ káchi: “Tá kúúndó kuenta ta̱ Cristo kúútundó se̱ʼe ta̱ Abrahán, ta ndakiʼinndó ña̱ ni̱ka̱ʼa̱n Ndióxi̱ taxira” (Gál. 3:28, 29). Tá ndáka̱xin Jehová iin na̱ ku̱ʼu̱n chí ndiví xíʼin espíritu santora, xáa̱tu na̱yóʼo ndúuna se̱ʼe ñá ñaʼá. Ña̱kán na̱ se̱ʼe ñá ñaʼá kúú ta̱ Jesucristo xíʼin na̱ 144,000 na̱ ku̱ʼu̱n kaʼndachíñu xíʼin ta̱ Jesús chí ndiví (Apoc. 14:1). Ta ndiʼi na̱yóʼo ndákanixi̱nína ta kéʼéna nda̱a̱ táki̱ʼva kéʼé yivána Jehová.

¹⁰ Xa̱a̱ ku̱nda̱a̱-iniyó ndáana kúú na̱ káʼa̱n Génesis 3:15 xa̱ʼa̱. Ta vitin ná ka̱ʼa̱nyó xa̱ʼa̱ ndáa ki̱ʼva sáxi̱nu Jehová profecía yóʼo. Ta saátu sakúaʼayó ndáa ki̱ʼva chíndeétáʼan profecía yóʼo xíʼinyó tiempo vitin.

11. ¿Ndáa ki̱ʼva sa̱túkue̱ʼe̱na si̱ʼndi̱-xa̱ʼa̱ se̱ʼe ñá ñaʼá?

¹¹ Génesis 3:15 káʼa̱nña xa̱ʼa̱ tí ko̱o̱, ña̱ tíyóʼo satúkue̱ʼe̱rí si̱ʼndi̱-xa̱ʼa̱ se̱ʼe ñá ñaʼá. Profecía yóʼo ni̱xi̱nuña tá chi̱kaa̱ ta̱ Ndi̱va̱ʼa ini na̱ judío xíʼin na̱ ñuu Roma ña̱ kaʼnína se̱ʼe Ndióxi̱ (Luc. 23:13, 20-24). Tá túkue̱ʼe̱ si̱ʼndi̱-xa̱ʼa̱ iin na̱ yiví kǒo kívi kakana, saáchi nda̱a̱ yáʼa ki̱vi̱ saáví kíxáʼana xíkana. Ta ki̱ʼva saá ndo̱ʼo ta̱ Jesús tá ni̱xi̱ʼi̱ra, saáchi u̱ni̱ ki̱vi̱ xi̱ndika̱a̱ra ti̱xin ya̱vi̱, ña̱kán kǒo níkivika keʼéra nda̱a̱ ni iin chiñu (Mat. 16:21).

12. ¿Ama ta ndáa ki̱ʼva ku̱a̱ñi̱ndosóna á ku̱niʼnina xi̱ní tí ko̱o̱?

¹² Ta ña̱ va̱ʼa xi̱nu profecía ña̱ va̱xi nu̱ú Génesis 3:15, ta̱ Jesús xi̱niñúʼu ndatakura. Saáchi profecía káʼa̱nña xa̱ʼa̱ ta̱ se̱ʼe ñá ñaʼá, ña̱ ta̱yóʼo kúú ta̱ ku̱a̱ñi̱ndosó xi̱ní tí ko̱o̱ á ku̱niʼnira  xi̱nírí. Ta ña̱ va̱ʼa keʼé ta̱ Jesús ña̱yóʼo xi̱niñúʼu ndatakura. Xa̱ʼa̱ ña̱kán tá ni̱ya̱ʼa u̱ni̱ ki̱vi̱ ña̱ ni̱xi̱ʼi̱ra, Jehová sa̱ndátakurara ta ndu̱ura iin espíritu ta ndiʼi tiempo kutakura. Ta tá ná kixaa̱ ki̱vi̱ ña̱ xa̱a̱ nda̱kaxin Jehová, ta̱ Jesús sandíʼi-xa̱ʼa̱ra ta̱ Ndi̱va̱ʼa (Heb. 2:14). Ta na̱ 144,000 chindeétáʼanna xíʼin ta̱ Jesús ña̱ sandíʼi-xa̱ʼa̱na ndiʼi ña̱ va̱ása va̱ʼa íyo nu̱ú ñuʼú yóʼo, ta saátu sandíʼi-xa̱ʼa̱na ndiʼi na̱ sáa̱-ini xíni Ndióxi̱ na̱ kúú se̱ʼe tí ko̱o̱ (Apoc. 17:14; 20:4, 10). *

13. Xa̱ʼa̱ ña̱ xa̱a̱ ku̱a̱ʼa̱n xínu profecía yóʼo, ¿ndáa ki̱ʼva chíndeétáʼanña xíʼinyó?

¹³ Tá iin na̱ xa̱a̱ ndásakáʼnu Ndióxi̱ kúún, ku̱a̱ʼání ña̱ va̱ʼa xa̱a̱ ndákiʼún xa̱ʼa̱ ña̱ xa̱a̱ ku̱a̱ʼa̱n xínu profecía yóʼo. Ta tá ki̱xi ta̱ Jesús nu̱ú ñuʼú yóʼo, va̱ʼaní ni̱na̱ʼa̱ra ndáa ki̱ʼva íyo yivára (Juan 14:9). Va̱ʼaní yichi̱ sa̱ndákoo ta̱ Jesús nu̱úyó, saáchi sa̱náʼa̱ra miíyó ndáa ki̱ʼva íyo Jehová ta kuʼvi̱-iniyó kuniyóra. Ta xa̱a̱ ku̱a̱ʼání ña̱ va̱ʼa ndákiʼinyó xa̱ʼa̱ ña̱ sánáʼa̱ra miíyó, chi miíra kúú ta̱ níʼi yichi̱ nu̱ú ndiʼi congregación ña̱ íyo tiempo vitin. Ta saátu sánáʼa̱ra miíyó, ndáaña xíniñúʼu keʼéyó ña̱ va̱ʼa sakúsi̱íyó-ini Jehová. Ta ku̱a̱ʼání ña̱ va̱ʼa ndákiʼinyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Saáchi tá nda̱takura, ni̱i̱ra kúú ña̱ cha̱ʼvi xa̱ʼa̱ ku̱a̱chiyó (1 Juan 1:7).

14. ¿Nda̱chun va̱ʼa xíni̱yó ña̱ su̱ví ndi̱ku̱n kama níxi̱nu profecía ña̱ ni̱ka̱ʼa̱n Jehová nu̱ú jardín ña̱ Edén?

¹⁴ Profecía ña̱ ni̱ka̱ʼa̱n Jehová nu̱ú jardín ña̱ Edén, ki̱ʼva ña̱ ni̱ka̱ʼa̱nraña ni̱na̱ʼa̱ña ña̱ su̱ví ndi̱ku̱n kamaví xi̱nuña. Saáchi xi̱niñúʼu ya̱ʼa ku̱a̱ʼání tiempo ta saáví xi̱nu profecía ña̱ káʼa̱n xa̱ʼa̱ ña̱ koo ku̱a̱ʼá na̱ se̱ʼe ñá ñaʼá, ta saátu ña̱ koo na̱ kundiku̱n sa̱tá ta̱ Ndi̱va̱ʼa ta u̱vi̱ saá na̱ se̱ʼe na̱yóʼo sa̱a̱-inina kunitáʼanna. Ña̱ kúnda̱a̱-iniyó xa̱ʼa̱ ña̱yóʼo, ¿ndáa ki̱ʼva chíndeétáʼanña xíʼinyó? Chíndeétáʼanña xíʼinyó kunda̱a̱-iniyó ña̱ nu̱ú ñuyǐví ta̱ Ndi̱va̱ʼa yóʼo, sa̱a̱na kunina na̱ ndásakáʼnu Jehová. Ta tá ni̱ya̱ʼa tiempo, ta̱ Jesús ni̱ka̱ʼa̱nra xa̱ʼa̱ ña̱yóʼo xíʼin na̱ discípulora (Mar. 13:13; Juan 17:14). Ta tiempo ña̱ so̱ndíʼi ña̱ ndóoyó vitin, xa̱a̱ kíʼinyó kuenta ña̱ xa̱a̱ ku̱a̱ʼa̱n xínu iin táʼví ña̱ profecía yóʼo. ¿Nda̱chun va̱ʼa kúnda̱a̱-iniyó xa̱ʼa̱ ña̱yóʼo?

15. a) ¿Nda̱chun sáa̱nína xínina miíyó tiempo vitin? b) ¿Nda̱chun va̱ása xíniñúʼu yi̱ʼvíyó ta̱ Ndi̱va̱ʼa?

¹⁵ Tá 1914 saá kúú ña̱ ni̱xa̱a̱ ta̱ Jesús ndu̱ura rey chí ndiví, ta tá ni̱ya̱ʼa loʼo, saá kúú ña̱ sa̱kánana ta̱ Ndi̱va̱ʼa nu̱ú ñuʼú yóʼo. Tasaá kúú ña̱ ki̱xáʼara xáʼndachíñura nu̱ú ñuʼú yóʼo ta ndáa si̱lóʼo kúma̱ní ta kixaa̱ ki̱vi̱ ña̱ ndiʼi-xa̱ʼa̱ra (Apoc. 12:9, 12). Ña̱kán sáa̱níra ta íxandi̱va̱ʼaníra xíʼin na̱ ñuu Ndióxi̱ (Apoc. 12:13, 17). Xa̱ʼa̱ ña̱kán na̱ yiví sáa̱nína xínina miíyó. Soo va̱ása xíniñúʼu yi̱ʼvíyó ta̱ Ndi̱va̱ʼa ni na̱ kítáʼan xíʼinra. Ta kivi ka̱ʼa̱nyó nda̱a̱ táki̱ʼva ni̱ka̱ʼa̱n ta̱ apóstol Pablo tá ka̱ʼyíra: “Tá Ndióxi̱ íyora xíʼinyó, ¿ndáana kivi kanitáʼan xíʼinyó?” (Rom. 8:31). Ña̱kán ná kandíxaníyó Jehová, saáchi nda̱a̱ táki̱ʼva íyo ña̱ xa̱a̱ sa̱kúaʼayó, xa̱a̱ ku̱a̱ʼa̱n xínu sava profecía ña̱ va̱xi nu̱ú Génesis 3:15.

16-18. Xa̱ʼa̱ ña̱ va̱ʼaní na̱kunda̱a̱-ini ta̱ Curtis, ñá Ursula xíʼin ñá Jessica xíʼin ña̱ káʼa̱n Génesis 3:15, ¿ndáa ki̱ʼva chíndeétáʼan ña̱yóʼo xíʼinna?

¹⁶ Ña̱ káʼa̱n Jehová nu̱ú Génesis 3:15, chíndeétáʼanña xíʼinyó ña̱ ndakú koo iniyó ya̱ʼayó nu̱ú nda̱a̱ ndáaka tu̱ndóʼo ña̱ ná kixi nu̱úyó. Iin ta̱ hermano ta̱ naní Curtis ta̱ kúú misionero ta̱ íyo chí Guam káchira: “Sava yichi̱ yáʼi̱ nu̱ú tu̱ndóʼo ta saátu íyo ña̱ sándakava-inii̱. Xa̱ʼa̱ ña̱kán íxayo̱ʼvi̱níña xíʼi̱n ña̱ nda̱kú koo inii̱ xíʼin Jehová. Soo tá ndóʼi̱ ña̱yóʼo ndákanixi̱níi̱ xa̱ʼa̱ profecía ña̱ va̱xi nu̱ú Génesis 3:15 ta ña̱yóʼo chíndeétáʼanña xíʼi̱n ña̱ kandíxaníkai̱ yiváyó Jehová”. Ta̱ Curtis xa̱a̱ kúni̱níra ña̱ ná  kixaa̱ ki̱vi̱ ña̱ sandíʼi-xa̱ʼa̱ Jehová ndiʼi tu̱ndóʼo ña̱ sáxo̱ʼvi̱ní miíyó.

¹⁷ Iin ñá hermana ñá íyo chí Baviera (Alemania) ñá naní Ursula káʼa̱nñá ña̱ tá na̱kunda̱a̱-iniñá xíʼin ña̱ káʼa̱n Génesis 3:15, chi̱ndeétáʼanña xíʼinñá ña̱ kandíxañá ña̱ ndiʼi ña̱ va̱xi nu̱ú Biblia, tu̱ʼun mií Ndióxi̱ kúúña. Iin ña̱ nda̱kanda̱ní-ini ñá Ursula xíʼin kúú ña̱, ndiʼi profecía kítáʼanníña xíʼin ña̱ va̱xi nu̱ú Génesis 3:15. Ñáyóʼo káʼa̱nkañá: “Tá ku̱nda̱a̱-inii̱ ña̱ ndi̱ku̱n kama ndu̱kú Jehová ki̱ʼva ña̱ ndatavára miíyó nu̱ú ku̱a̱chi ña̱ sa̱ndákoo ta̱ Adán ndaʼa̱yó, ña̱yóʼo chi̱ndeétáʼanña xíʼi̱n ña̱ kuʼvi̱níka-inii̱ kunii̱ra”.

¹⁸ Iin ñá hermana ñá íyo chí Micronesia ñá naní Jessica káchiñá: “Nda̱a̱ vitin ndákaʼánkai̱ ña̱ ni̱kusi̱íní-inii̱ tá ni̱xa̱i̱ ku̱nda̱a̱-inii̱ ña̱ xa̱a̱ xínu profecía ña̱ va̱xi nu̱ú Génesis 3:15. Ta ni̱xa̱i̱ ku̱nda̱a̱-inii̱ ña̱ va̱ása ní xi̱kuni Ndióxi̱ xo̱ʼvi̱yó nda̱a̱ táki̱ʼva xóʼvi̱yó tiempo vitin. Profecía yóʼo chíka̱a̱níña ndee̱ xíʼin ña̱ kachíñui̱ nu̱ú Jehová, saáchi ña̱yóʼo kúú ña̱ sákusi̱íníka-inii̱ vitin ta saátu ku̱a̱ʼání ña̱ va̱ʼa ndakiʼi̱n chí nu̱únínu”.

19. ¿Nda̱chun kándíxayó ña̱ ndixa xi̱nu inka táʼví ña̱ káʼa̱n Génesis 3:15?

¹⁹ Nda̱a̱ táki̱ʼva íyo ña̱ xa̱a̱ sa̱kuaʼayó, xa̱a̱ xínu iin táʼví profecía ña̱ va̱xi nu̱ú Génesis 3:15. Xa̱a̱ na̱kunda̱a̱-iniyó ndáana kúu se̱ʼe ñá ñaʼá ta ndáana kúú na̱ se̱ʼe tí ko̱o̱. Ta saátu sa̱kúaʼayó ña̱ ta̱ Jesús kúú se̱ʼe ñá ñaʼá ta sa̱ndátaku Jehová ta̱yóʼo, ta vitin xa̱a̱ íyora chí ndiví ta xa̱a̱ kúúra rey, ña̱kán ndiʼi tiempo kutakura. Ta saátu sa̱kúaʼayó ndáana kúú inkaka se̱ʼe ñá ñaʼá, ta na̱yóʼo kúú na̱ nda̱kaxin Ndióxi̱ na̱ íyoka nu̱ú ñuʼú yóʼo ta si̱lóʼoní kúma̱ní ta ndakiʼinra ndiʼi na̱yóʼo ña̱ ku̱ʼu̱nna chí ndiví ta ndakutáʼanna xíʼin na̱ xa̱a̱ íyo kán. Ña̱kán xa̱a̱ ni̱xi̱nu iin táʼví profecía yóʼo ta saátu kándíxaníyó ña̱ saátu xi̱nu inka táʼví profecía ña̱ kúma̱ní xi̱nu. Tá kúú ña̱ ku̱a̱ñi̱ndosóna á ku̱niʼnina xi̱ní tí ko̱o̱. Kusi̱íní-ini miíyó na̱ ndásakáʼnu Jehová tá ná ndiʼi-xa̱ʼa̱ ta̱ Ndi̱va̱ʼa. Ta nani ndátuyó ña̱ kixaa̱ ki̱vi̱ kán ná chika̱a̱yó ndee̱ ña̱ va̱ása ndakava-iniyó. Ña̱kán ná kandíxaníyó Jehová saáchi ku̱a̱ʼání ña̱ va̱ʼa taxira ndaʼa̱yó chí nu̱únínu tá ná kaʼndachíñu se̱ʼera ta̱ Jesús (Gén. 22:18).