SUOBEL EL BO DOSUUB 30
Chuodel el Ulaoch el Klou a Ultutelel el Kirem
“Kau ma redil a mo kauketui.”—GEN. 3:15.
CHELITAKL 15 Modengesii a Ketengel a Jehovah!
NGAR TIA EL SUOBEL *
1. Ngera ngrirellii a Jehovah er a kedeb el taem er uriul er a lerebet er a klengit a Adam me a Eva? (Genesis 3:15)
KEDEB el taem er uriul er a lerebet er a klengit a Adam me a Eva e a Jehovah milsterir a ruldidellel a rsechir a omelatk loeak a kmal klou a ultutelel el ulaoch. A tekingel a debetik er ngii er a Genesis 3:15.—Monguiu.
2. Ngera uchul me tia el ulaoch a kmal ileakl?
2 Tia el ulaoch a debetik er ngii er a kot el babier er a Biblia. Me nguaisei engdi aike el rokui el babier er a Biblia a ulekuak er tia el ulaoch. Ngdi ua decholel a babier el mechull a llel el mo tang, aika el tekoi el ngar er a Genesis 3:15 a odak aike el rokui el llechukl er a Biblia el mo ta el klumech. Tia el klumech a kmo, a Dios a mo oderchii ngike el mo osobel el me okngemedii a Diabelong me a rokui el oltirakl er ngii. * Ngmera el klengeltengat el mo er tirke el rokui el betik a rengrir er a Jehovah!
3. Ngera kede mo mesaod er tia el suobel?
3 Ngar tia el suobel e kede mo onger aika el edei el ker el kirel a ulaoch er a Genesis 3:15: Te rua techa tirka el chad el ngar tia el ulaoch? Ngmekera tia el ulaoch e mo tmaut? E mekera tia el ulaoch e olengeseu er kid er chelechang?
TE RUA TECHA TIRKA EL CHAD ER A ULAOCH?
4. Ngtecha “bersoech”? E kede mekerang e medengelii tiang?
4 A rechad el losaod er tir a Genesis 3:14, 15, a “bersoech,” ‘ruldidellel a rsechel’ a bersoech, “redil,” me a “ruldidellel a rsechel” a redil. A Biblia ngosukid el mo medengelterir tirka el kmo te rua techang. * A mera el charm el bersoech a diak lodengei a ledilu Jehovah er a sers er a Eden. Me ngika melutk el kirel a mellomes a rengul blebelel a Jehovah. Ngika ngtechang? A Ocholt 12:9 ouchais er kid. “[Ngika el] bersoech er a rechuodel” a Satan el Diabelong. Engdi tirka te rua techang el ruldidellel a rsechel?
5. Ngtecha ruldidellel a rsechel a bersoech?
5 A Biblia sel lousbech er a ruldidellel a rasech el okesiu e ngmelutk el kirir tirke el omdasu e meruul a tekoi el ua ngike el okesiul a demerir. Me a ruldidellel a rsechel a bersoech a rechanghel me a rechad el ua Satan, el omtok er a Jehovah el Dios me a rechedal. Tirka uldimukl er tir tirke el mekngit el anghel er a taem er a Noah el chiloit a delengcheklir er a eanged, me a remekngit el chad el chelutel er a Demerir er a Diabelong.—Gen. 6:1, 2; Jn. 8:44; 1 Jn. 5:19; Jud. 6.
6. Ngera uchul me a redil a diak el sebechel Eva?
6 Chelechang e kede kuk mesaod er a redil. Ngika diak el sebechel melutk er a Eva. E ngerang? Molatk er tia el ta er a uchul. A ulaoch a kmo a ruldidellel a rsechel a redil a mo “rukemii” a bdelul a bersoech. Kede mla smodii el kmo a bersoech omtechei er a mekngit el anghel el Satan me ngdiak el sebechel a ngelekel a Eva el diak el cherrungel el rukemii. Me ngmekera Satan a bo el merukem?
7. Ngua losaod er ngii a Ocholt 12:1, 2, 5, 10, ngtecha ngike el redil er a Genesis 3:15?
7 A ulebongel el babier er a Biblia ouchais er kid el kmo ngika el redil ngtechang. (Monguiu er a Ocholt 12:1, 2, 5, 10.) Ngika diak el redil er tia el chutem! Ngika serrochel er a buil e telechull er a krone el ngar ngii a 12 el btuch er ngii. Ngika mechellii a Rengedel a Dios. Tia el Renged a ngar er a eanged me a leuaisei ngika el redil a dirrek el ngar er a eanged. Ngika omtechei er a diak lemeues el cheldebechelel a Jehovah el tir a reblak a rengrir el anghel.—Gal. 4:26.
8. Ngtecha ngike el kot el klou a ultutelel el chedal a ruldidellel a rsechel a redil, e mlo uaisei er oingerang? (Genesis 22:15-18)
8 A Tekingel a Dios a dirrek el ngosukid el mo mesa el kmo, ngtecha ngike el kot el klou a ultutelel chedal a ruldidellel a rsechel a redil. Ngika el chad a uldidellel a rsechel a Abraham. (Monguiu er a Genesis 22:15-18.) Me ngua losaod a ulaoch a Jesus a uldidellel a rsechel a Abraham. (Lk. 3:23, 34) Engdi ngika el uldidellel a rasech a kirel lmuut el mesisiich er a rechad e le ngii a kirel mo rukemii a Satan el Diabelong e okngemedii. Me sera lebo el bekord el 30 a rekil a Jesus e ngmlucheluch er a chedaol reng. Sera lemucheluch e ngmlo ngike el kot el klou a ultutelel chedal a ruldidellel a rsechel a redil. (Gal. 3:16) Uriul er a lemad e lebekiis er a kodall, e a Dios a ‘milsa krone er ngii er a klebkall ma deruchall’ e milsang a “rokui el klisiich er omerreder er a eanged ma beluulchad,” luldimukl er ngii a “mo melemall a urerel a Diabelong.”—Heb. 2:7; Mt. 28:18; 1 Jn. 3:8.
9-10. (a) Te rua techa dirrek el chedal a ruldidellel a rsechel a redil, e oingerang e te mo chedal a ruldidellel a rasech? (b) Ngera kede mo mesaod er ngii er chelechang?
9 Me nguaisei engdi te ngar ngii a dirrek el lmuut el bebil chedal a ruldidellel a rsechel a redil. A apostol Paulus a uluuchais el kirir er a longedecheduch er a Rechijudea me a Rechisentael el ngellitel el Kristiano el kmo: “Lsekum kom chedal a Kristus, e kom ngelekel a Abraham me kom mo nguu a telbilel a Dios el kirir a re ngelekel a Abraham.” (Gal. 3:28, 29) A Jehovah sel ngiltii a Kristiano loeak a chedaol reng el mo ngellitel, e ngika el chad a mo chedal a ruldidellel a rsechel a redil. Me a ruldidellel a rsechel a redil a Jesus Kristus me a re 144,000 el mo mengedereder el obengkel. (Och. 14:1) Tirka melasem el moba uldesuel a Demerir el Jehovah el Dios e meruul a tekoi el uai ngii.
10 Chelecha el bla bo dodengelterir a rechad el losaod er tir a Genesis 3:15, e me dosaod er a rolel e a Jehovah mla mekekokil loltaut er tia el ulaoch me a klungiaol el bla dengai er ngii.
NGMEKERA TIA EL ULAOCH E MLA TMAUT?
11. Ngoeak a ngera el rolel e a ruldidellel a rsechel a redil a ulebangch a “kotel ochil”?
11 A doltirakl er a ulaoch er a Genesis 3:15, e a bersoech a mo mengchii a “kotel ochil” a ruldidellel a rsechel a redil. Tia tilaut er sel taem el Satan uluusbech er a Rechijudea me a rechad er a Rom el mo mekodir a Ngelekel a Dios. (Lk. 23:13, 20-24) A chad sel lemetemall a kotel ochil e nglocha diak el sebechel merael el telkib el taem. Ngdi osisiu a kodellel a Jesus a uchul me ngdimlak el sebechel mekerang el edei el klebesei.—Mt. 16:21.
12. Ngmekera mo merukem a bdelul a bersoech? E tiang ngmo duubech er oingerang?
12 Me a lsekum tia el ulaoch er a Genesis 3:15 a mo tmaut e a Jesus a dimlak el sebechel melemolem el ulekoad. E ngerang? E le doltirakl er a ulaoch e a ruldidellel a rasech a kirel mo rukemii a bdelul a bersoech. Tia belkul a kmo a Jesus a mle kirel mo ungil er a bengchel a kotel ochil. E tia mlo uaisei! Ongedei el klebesei er uriul er a kodellel e ngmilekiis el mo nguu a diak el sebechel metemall el klengar er a eanged. E ngar sel telutk el temel a Dios e a Jesus a mo okngemedii a Satan. (Heb. 2:14) Tirke el mo mengedereder lobengkel a Jesus a mo obengkel el olekngemed er a rokui el cherrouel a Dios, el tir a ruldidellel a rsechel a bersoech.—Och. 17:14; 20:4, 10. *
NGMEKERA TIA EL ULAOCH E OLENGESEU ER KID ER CHELECHANG?
13. Ngmekera otutel tia el ulaoch e olengeseu er kid er chelecha el taem?
13 A lsekum e ke mla metecholb el mesiungel a Dios e a otutel tia el ulaoch a olengeseu er kau er chelecha el taem. A Jesus a mlei er tia el chutem el chad. Ngmle cherrungel el okesiul a blekerdelel a Demal. (Jn. 14:9) Me ngoeak ngii e kede mla mo medengelii e mo betik a rengud er a Jehovah el Dios. Kede dirrek el mla ngmai a klungioled er a osisecheklel a Jesus me a rolel a lomekrael er a ongdibel er a Kristiano er chelecha el taem. Ngmla osisecheklid er a rolel a klengar el odeuir a rengul a Jehovah. E kid el rokui a sebeched el ngmai a klungioled er a blengchelel a kotel ochil. Ngoeak a ngera el rolel? A Jesus er a lemad e lebekiis, e ngmilsa demal a kerresel a rsechel a cherrungel el tengetengel, el ngii a “kikidid er a rokui el klengit.”—1 Jn. 1:7.
14. Kede mekera medengei el kmo a otutel a ulaoch er a Eden a mo ousbech a taem? Mosaod.
14 Aike el ledilu Jehovah er a ulaoch er a Eden ochotii el kmo, a otutel tia el ulaoch a mo ousbech a taem. Ngousbech a taem a redil el mo meskid ngika el telbiil el ruldidellel a rasech, Diabelong el mo melai er a rultirakl er ngii, me a taem el mo duubech a kltui er a delongelir. Kede ngmai a klungioled sel bo dodengelii a belkul tia el ulaoch le tia ouchais er kid el kmo, a beluulechad el cheltikaik er a Satan a mo ouketui er a remesiungel a Jehovah. Jesus er uriul a dirrek el uluuchais er a redisaiplo er ngii el kirel tiang. (Mk. 13:13; Jn. 17:14) Kede mera el mla mesa otutel tia el tedebechel a ulaoch, tokubets a chelsel aika el dirk mlo merek el dart el rak. Ngera kede mla mes?
15. Ngera uchul me a beluulechad a kmal mla mo ouketui er a ruldidellel a rsechel a redil, engdi ngera me ngdiak demedakt er a Satan?
15 Kedeb el taem er uriul er a lebo el King a Jesus er a 1914, e a Satan a mlodik er a eanged. Ngika ngar tia el chutem el mengiil er a okngemedel. (Och. 12:9, 12) Seikid el taem el mei er chelechang e ngkmal mla mo blak a rengul loltobed er a ngesechel a rengul er a rechedal a Dios. (Och. 12:13, 17) Tiakid a uchul me a beluulechad a kmal mla mo ouketui er a rechedal a Dios. Me nguaisei engdi ngdiak a belkul demedakt er a Satan me a rultirakl er ngii. Kede bai oba osisiu el ulterekokl el reng lobang a apostol Paulus, el ngii a dilu el kmo: “A lsekum a Dios olab el mer kid, e ng techa sebechel el omtok er kid?” (Rom 8:31) Kede mui el oumerang er a Jehovah le kede omes er a ulaoch er a Genesis 3:15 el toutang.
16-18. Ngera el klungiaol a bla lengai a Curtis, Ursula, me a Jessica e le tir el mla mo medengelii a belkul a Genesis 3:15?
16 A telbilel a Jehovah el ngar er a Genesis 3:15 a ngosukid loutekangel a ngii di el omelsemai el bo dechebangel. A Curtis el missionari er a beluu er a Guam a kmo: “Ngar ngii a tekoi el dilubech er a klengar er ngak el millasem er a blakerreng er ngak el mora Jehovah. Engdi omelebedebekek er a ulaoch er a Genesis 3:15 a mla ngosukak el mo melemolem el oumerang el ulsirs er a Demad el ngar er a eanged.” A Curtis a kmal omes el beduluchei el kirel sel taem el lemokngemed a rokui el ringel.
17 A odos er a Bavaria el Ursula a kmo, ngii el mla mo medengelii a belkul a ulaoch er a Genesis 3:15 a oterekeklii a rengul el kmo a Biblia a mlukreng er a Dios. Ngmlo mtebengii el kmo aike el bebil er a ulaoch el rokui a ulekuak er tia el ulaoch, e tia kmal rirtechii a rengul. Ngkmo: “Ngkmal rirtechii a renguk er a ksuubii el kmo a Jehovah a kmal di mle mereched el mo rullii a tekoi el mo uchul me a rechad a ngar ngii omeltkir.”
18 A Jessica er a Micronesia a kmo: “Ak kmal dirk medengelii sel taem er a bo kudengei el kmo ak mla metik er a klemerang! A ulaoch er a Genesis 3:15 a toutang. Tia mla ngosukak el mo blechoel el melatk el kmo a klengar er chelechang a diak lemera el klengar. Tia el ulaoch a dirrek el mla smisichii a klaumerang er ngak el kmo, ngdiak a mo ungil klengar er chelechang me a lmuut el ungil el klengar er a ngar medad, el ua sel dosiou er a Jehovah.”
19. Ngera uchul me ngulterekokl a rengud el kmo sel medechel el telengtengil a ulaoch a mo tmaut?
19 Me kede mla mesa el kmo a Genesis 3:15 a toutang. Kede mla mo medengelterir a ruldidellel a rsechel a redil me a bersoech. A Jesus el ngike el kot el klou a ultutelel chedal a ruldidellel a rsechel a redil a mlo ungil er a bengchel a kotel ochil e chelechang ngmesisiich el King. E di kmedung e ngmecherrungel a ildisir tirke el mo mengedereder lobengkel. Me a kot el telengtengil tia el ulaoch el mla tmaut a uchul me ngulterekokl a rengud el kmo, a bersoech a mo merukem a bdelul. Ngkol uangerang el deurreng a bo lolechesuar er ngii a reblak a rengrir el chad sel lemokngemed a Satan! Me lak em give up e molemolem el mengiil. Ngkmal sebeched loumerang el ulsirs er a Dios er kid. Ngoeak a ruldidellel a rsechel a redil e ngmo omekngeltengat a “bek el beluu er a beluulchad.”—Gen. 22:18.
CHELITAKL 23 Jehovah Omuchel er a Omengederederel
^ Ngkmal diak el sebeched el mo ungil medengelii a Biblia a lak bo dodengelii a belkul a ulaoch el ngar er a Genesis 3:15. Omesubed er tia el ulaoch a sebechel smisichii a klaumerang er kid er a Jehovah e oterekeklii a rengud el kmo, ngmo otaut a rokui el telbilel.
^ Momes er “A Klumech er a Biblia,” el ngar er a Ngeso el Kirel a Omesubel a Tekingel a Dios.
^ Momes er a baks el “Rechad el Losaod er Tir a Genesis 3:14, 15.”
^ Momes er a baks el “ Meklou a Ultutelel el Tekoi el Dilubech el Otutii a Genesis 3:15.”