مطالعے دا مضمون نمبر 30
اِک قدیم پیشینگوئی جدا سانوں بوہت فائدہ ہو رہیا اے
میں تیرے تے عورت دے درمیان دُشمنی پاواں گا۔–پیدایش 3:15۔
گیت نمبر 18: فدیے لئی احسانمند
مضمون تے اِک نظر *
1. آدم تے حوا دے گُناہ کرن توں بعد یہوواہ نے فوراً کیہہ کیتا؟ (پیدایش 3:15)
آدم تے حوا دے گُناہ کرن توں بعد یہوواہ نے اِک بوہت ای اہم پیشینگوئی کیتی جدے توں آدم دی آن والی نسل نُوں امید ملی۔ ایہہ پیشینگوئی پیدایش 3:15 چ لکھی اے۔—ایس ایت نُوں پڑھو۔
2. پیدایش 3:15 چ لکھی پیشینگوئی اینی اہم کیوں اے؟
2 ایہہ اہم پیشینگوئی بائبل دی سب توں پہلی کتاب چ لکھی اے۔ پر بائبل دِیاں باقی کتاباں کسے نہ کسے طرحاں ایس پیشینگوئی نال جُڑیاں ہوئیاں نیں۔ جیویں دھاگے چ فرق فرق موتیاں نُوں پرو کے اِک ہار بن دا اے، اوسے طرحاں پیدایش 3:15 چ لکھی پیشینگوئی بائبل دِیاں فرق فرق کتاباں نُوں آپس چ جوڑ کے اِک اہم پیغام بناندی اے۔ تے اوہ پیغام ایہہ وے کہ خدا اِک نجاتدہندہ بھیجے گا جیہڑا شیطان تے اوہدے ساتھیاں نُوں ختم کر دے گا۔ * ایہہ اوہناں ساریاں لوکاں لئی بڑی خوشی دی گل ہوئے گی جیہڑے یہوواہ نال محبت کردے نیں۔
3. ایس مضمون چ اَسی کیہڑے سوالاں تے غور کراں گے؟
3 ایس مضمون چ اَسی پیدایش 3:15 چ لکھی پیشینگوئی بارے ایہناں سوالاں تے غور کراں گے: ایس پیشینگوئی چ کنہاں دا ذکر کیتا گیا اے؟ ایہہ پیشینگوئی کیویں پوری ہونی سی؟ تے سانوں ایس پیشینگوئی دے پورا ہون توں کیہہ فائدہ ہو رہیا اے؟
پیشینگوئی چ کنہاں دا ذکر کیتا گیا اے؟
4. سپ کون اے تے اَسی ایہہ گل کیویں جاننے آں؟
4 پیدایش 3:14، 15 چ سپ تے سپ دی نسل تے عورت تے عورت دی نسل دا ذکر کیتا گیا اے۔ بائبل توں سانوں پتہ چلدا اے کہ اے کردار کنہاں وَل اشارہ کردے نیں۔ * آؤ سب توں پہلاں سپ بارے گل کرئیے۔ جیہڑی گل یہوواہ خدا نے عدن دے باغ چ کہی سی اوہنوں اِک اصلی سپ نئیں سمجھ سکدا سی۔ تے فیر ظاہری گل اے کہ یہوواہ اِک ایہو جہی ہستی نال گل کر رہیا سی جیہڑی اوس گل نُوں سمجھ سکدی سی۔ ایہہ ہستی کون سی؟ مکاشفہ 12:9 چ صاف صاف دَسیا گیا اے کہ ایہہ قدیم سپ شیطان اِبلیس اے۔ پر ایس سپ دی نسل کون اے؟
سپ
شیطان اِبلیس جنہوں مکاشفہ 12:9 چ پرانا سپ کہیا گیا اے۔ (پیراگراف نمبر 4 نُوں ویکھو۔)
5. سپ دی نسل چ کون شامل نیں؟
5 بائبل چ کدی کدار لفظ ”نسل“ یاں ”اولاد“ اوہناں لئی استمال ہویا اے جیہڑے کسے ہستی دی اینی زیادہ نقل کردے نیں کہ اوہناں نُوں اوس ہستی دے بچے کہیا جا سکدا اے۔ ایہدا مطلب اے کہ سپ دی نسل توں مُراد اوہ فرشتے تے انسان نیں جیہڑے شیطان وانگوں یہوواہ خدا تے اوہدے بندیاں دی مخالفت کردے نیں۔ ایہناں چ اوہ فرشتے شامل نیں جیہڑے نوح دے زمانے چ اسمان توں اپنا مقام چھڈ کے زمین تے آ گئے سن تے اوہ لوک وی جیہڑے اپنے پیو اِبلیس وانگوں بھیڑے کم کردے نیں۔—پیدایش 6:1، 2؛ یوحنا 8:44؛ 1-یوحنا 5:19؛ یہوداہ 6۔
سپ دی نسل
اوہ بُرے فرشتے تے انسان جیہڑے یہوواہ خدا تے اوہدے بندیاں دی مخالفت کردے نیں۔ (پیراگراف نمبر 5 نُوں ویکھو۔)
6. پیدایش 3:15 چ جیہڑی عورت دا ذکر کیتا گیا اے، اوہ حوا کیوں نئیں ہو سکدی؟
6 آؤ ہن ویکھنے آں کہ پیدایش 3:15 چ جیہڑی عورت دا ذکر کیتا گیا اے، اوہ کون اے۔ایہہ عورت حوا نئیں ہو سکدی سی۔ اَسی اِنج کیوں کہہ سکنے آں؟ اِک وجہ ایہہ وے کہ ایس پیشینگوئی دے مطابق عورت دی نسل نے سپ دے سر نُوں مِدنا سی۔ اَسی ویکھیا اے کہ سپ شیطان ول اشارہ کر دا اے جیہڑا اِک بھیڑا فرشتہ اے۔ عیب دار ہون دی وجہ توں حوا دی اولاد وچوں کسے دے اندر وی اینی طاقت نئیں اے کہ اوہ شیطان دے سر نُوں مِد سکے۔ تے فیر شیطان نُوں کنہے مارنا سی؟
7. مکاشفہ 12:1، 2، 5، 10 دے مطابق پیدایش 3:15 چ جیس عورت دا ذکر کیتا گیا اے، اوہ کون اے؟
7 بائبل دی آخری کتاب توں پتہ چلدا اے کہ پیدایش 3:15 چ جیہڑی عورت دا ذکر کیتا گیا اے، اوہ کون اے۔ (مکاشفہ 12:1، 2، 5، 10نُوں پڑھو۔) ایہہ عورت زمین تے رہن والی کوئی عورت نئیں اے۔ مکاشفہ دی کتاب چ دَسیا گیا اے کہ ایس عورت دے پیراں تھلے چن سی تے سر تے 12 ستاریاں دا تاج سی۔ ایس عورت نے جیس بچے نُوں جمیا، اوہ خدا دی بادشاہی اے۔ کیونکہ ایہہ بادشاہی اسمان تے وے ایس لئی ایہہ عورت وی اسمان تے ای اے۔ ایس عورت توں مُراد یہوواہ دی تنظیم دا اسمانی حصہ اے جدے چ وفادار فرشتے شامل نیں۔—گلتیوں 4:26۔
عورت
یہوواہ دی تنظیم دا اسمانی حصہ جدے چ فرشتے شامل نیں۔ (پیراگراف نمبر 7 نُوں ویکھو۔)
8. عورت دی نسل کون اے تے اوہ ایہہ نسل کدوں بنیا؟ (پیدایش 22:15-18)
8 خدا دے کلام توں سانوں ایہہ وی پتہ چلدا اے کہ عورت دی نسل کون اے۔ ایہہ نسل ابراہام دی اولاد چوں آنی سی۔ (پیدایش 22:15-18نُوں پڑھو۔) جیویں کہ پیشینگوئی چ دَسیا گیا سی، یسوع مسیح ابراہام دی نسل توں آیا۔ (لُوقا 3:23، 34) پر شیطان اِبلیس نُوں ختم کرن لئی مسیح دا انساناں توں زیادہ طاقتور ہونا ضروری سی۔ایس لئی جدوں یسوع 30 سال دا سی تے یہوواہ نے اوہنوں اپنی پاک روح نال مسح کر کے اپنا روحانی بیٹا بنا لیا۔ ایس طرحاں یسوع عورت دی نسل ثابت ہویا۔ (گلتیوں 3:16) یسوع دے مرن تے زندہ ہو جان دے بعد خدا نے اوہنوں جلال تے عزت دا تاج پایا تے اوہنوں اسمان تے زمین دا سارا اِختیار دِتا جدے چ اِبلیس دے کماں نُوں ختم کرن دا اِختیار وی شامل سی۔—عبرانیوں 2:7؛ متی 28:18؛ 1-یوحنا 3:8۔
عورت دی نسل
یسوع مسیح تے اوہدے نال حکمرانی کرن والے پاک روح نال مسح ہوئے 1 لکھ 44 ہزار مسیحی۔ (پیراگراف نمبر 8، 9 نُوں ویکھو۔)
9، 10. (الف) عورت دی نسل چ ہور کون شامل نیں تے اوہ ایس نسل دا حصہ کدوں بن دے نیں؟ (ب) ہُن اَسی کیہڑی گل تے غور کراں گے؟
9 عورت دی نسل چ یسوع مسیح دے علاوہ ہور لوکاں نے وی شامل ہونا سی۔ پولُس رسول نے ایہناں لوکاں بارے اوہدوں دَسیا جدوں اوہنے پاک روح نال مسح ہوئے یہودی تے غیریہودی مسیحیاں نُوں ایہہ گل کہی: جے تُسی مسیح دے او تے فیر تُسی سچ مچ ابراہام دی اولاد او تے اوس وعدے دے وارث او جیہڑا ابراہام نال کیتا گیا سی۔ (گلتیوں 3:28، 29) جدوں یہوواہ کسے مسیحی نُوں اپنی پاک روح نال مسح کردا اے تے اوہ مسیحی عورت دی نسل دا حصہ بن جاندا اے۔ ایس لئی عورت دی نسل چ یسوع مسیح دے علاوہ اوہدے نال حکمرانی کرن والے 1 لکھ 44 ہزار مسیحی شامل نیں۔ (مکاشفہ 14:1) ایہہ سارے مسیحی اپنے اسمانی باپ یہوواہ ورگی سوچ رکھدے نیں تے اوہدے ورگے کم کردے نیں۔
10 اَسی ویکھ لیا اے کہ پیدایش 3:15 چ جنہاں کرداراں دا ذکر ہویا اے، اوہ کون نیں۔ آؤ ہن ویکھنے آں کہ یہوواہ نے ہولی ہولی ایس پیشینگوئی نُوں کیویں پورا کیتا تے ایس پیشینگوئی توں سانوں کیویں فائدہ ہو رہیا اے۔
ہُن تک ایس پیشینگوئی دِیاں کیہڑیاں گلاں پوریاں ہو چُکیاں نیں؟
11. سپ نے کیس لحاظ نال عورت دی نسل دی اَڈّی تے وَڈیا؟
11 پیدایش 3:15 چ یہوواہ نے پیشینگوئی کیتی سی کہ سپ عورت دی نسل دی اَڈّی تے وَڈے گا۔ ایہہ گل اوس ویلے پوری ہوئی جدوں شیطان نے یہودیاں تے رومیاں نُوں اُکسایا کہ اوہ خدا دے پُتر نُوں جانوں مار دین۔ (لُوقا 23:13، 20-24) جیویں اَڈّی تے لگے زخم دی وجہ توں اِک بندہ وقتی طور تے ٹر پھر نئیں سکدا،اوسے طرحاں جدوں یسوع تِن دن لئی قبر چ سی تے اوہ وقتی طور تے کجھ نئیں کر سکدا سی۔—متی 16:21۔
12. سپ دا سر کدوں تے کیویں مِدیا جائے گا؟
12 پیدایش 3:15 دے مطابق عورت دی نسل نے سپ دے سر نُوں مِدنا سی تے ایہہ اوہدوں ای ہو سکدا سی جدوں عورت دی نسل دی اَڈّی د ا زخم بھرنا سی۔ ایہہ زخم اوس ویلے بھریا جدوں یہوواہ خدا نے یسوع نُوں تیجے دن غیر فانی ہستی دے طور تے زندہ کر دِتا۔ یسوع، خدا دے مقرر کیتے ہوئے وقت تے شیطان دے سر نُوں مِد دَوے گا۔ (عبرانیوں 2:14) یسوع تے اوہدے نال حکمرانی کرن والے سپ دی نسل یعنی خدا دے دُشمناں نُوں ختم کر دین گے۔—مکاشفہ 17:14؛ 20:4، 10۔ *
سانوں ایس پیشینگوئی توں کیہہ فائدہ ہوندا اے؟
13. ایس پیشینگوئی دے پورا ہون توں سانوں کیہہ فائدہ ہو رہیا اے؟
13 جے تُسی یہوواہ دی عبادت کردے او تے توانوں ایس پیشینگوئی توں کیہہ فائدہ ہو رہیا اے؟ یسوع اِک انسان دے طور تے زمین تے آیا۔ اوہنے بالکل اُنج دِیاں ای خوبیاں ظاہر کیتیاں جنج دِیاں یہوواہ چ نیں۔ (یوحنا 14:9) یسوع بارے سکھن نال اَسی یہوواہ نُوں ہور قریب توں جانیا اے تے اوہدے نال محبت کرن لگ پئے آں۔ سانوں یسوع دی تلیم تے اوہناں ہدیتاں توں وی فائدہ ہو رہیا اے جیہڑیاں اوہ اَج کلیسیا نُوں دے رہیا اے۔ یسوع مسیح نے سانوں سکھایا کہ اَسی کیہہ کر سکنے آں تاکہ یہوواہ ساڈے زندگی گزارن دے طریقے توں خوش ہوئے۔ سانوں ساریاں نُوں یسوع دی اَڈّی تے لگے زخم یعنی اوہدی موت توں فائدہ ہوندا اے۔ پر کیویں؟ اوہدے زندہ ہون دے بعد یہوواہ نے اوہدے خون دی قیمت نُوں فدیے دے طور تے قبول کیتا جیہڑا سانوں سارے گناہواں توں پاک کردا اے۔—1-یوحنا 1:7۔
14. اَسی کیویں جاننے آں کہ یہوواہ نے عدن دے باغ چ جیہڑی پیشینگوئی کیتی، اوہ فوراً پوری نئیں ہوئی؟ وضاحت کرو۔
14 یہوواہ نے عدن دے باغ چ پیشینگوئی کردے ویلے جیہڑیاں گلاں دَسیاں، اوہناں توں پتہ چلدا اے کہ ایس پیشینگوئی دے پورا ہون چ وقت لگنا سی۔ عورت توں نسل دے پیدا ہون، شیطان دے اپنے پیروکاراں نُوں جمع کرن تے عورت دی نسل تے شیطان دی نسل وچ دُشمنی پیدا ہون چ وقت لگنا سی۔ جدوں اَسی ایس پیشینگوئی نُوں سمجھ جانے آں تے سانوں ایہہ یاد رہندا اے کہ ایہہ دُنیا شیطان دی مُٹھی چ وے تے ایہہ یہوواہ دی عبادت کرن والیاں توں نفرت کردی اے۔ ایہہ گل یسوع نے وی اپنے شاگرداں نُوں دَسی سی۔ (مرقس 13:13؛ یوحنا 17:14) ایہہ گل پچھلے 100 سالاں دے دوران خاص طور تے پوری ہوئی اے۔ آؤ ویکھئے کہ کیویں۔
15. شیطان دی دُنیا عورت دی نسل توں ہور زیادہ نفرت کیوں کرن لگ پئی اے تے سانوں شیطان توں ڈرن دی ضرورت کیوں نئیں؟
15 یسوع مسیح نے 1914 چ خدا دی بادشاہی دا بادشاہ بنن دے تھوڑی دیر بعد شیطان نُوں اسمان توں کڈھ دِتا۔ ہُن شیطان دا اِختیار زمین تک رہ گیا اے تے اوہ اپنی موت دے دن گن رہیا اے۔ (مکاشفہ 12:9، 12) پر شیطان ہتھ تے ہتھ رکھ کے بیٹھیا نئیں ہویا۔ سگوں اوہ بڑے غصے چ وے تے خدا دے بندیاں تے اپنا غصہ کڈھ رہیا اے۔ (مکاشفہ 12:13، 17) ایس وجہ توں شیطان دی دُنیا خدا دے بندیاں نال ہور زیادہ نفرت کرن لگ پئی اے۔ پر سانوں شیطان تے اوہدے ساتھیاں کولوں ڈرن دی لوڑ نئیں اے۔ ایہدی بجائے سانوں پولُس رسول دی ایس گل تے پورا یقین رکھنا چاہی دا اے کہ جے خدا ساڈے وَل اے تے کون ساڈے خلاف ہو سکدا اے؟ (رومیوں 8:31) سانوں یہوواہ تے پورا بھروسا اے کیونکہ اَسی ویکھیا اے کہ پیدایش 3:15 چ لکھیاں بوہت ساریاں گلاں پوریاں ہو گئیاں نیں۔
16-18. پیدایش 3:15 چ لکھی پیشینگوئی نُوں سمجھن نال بھرا کرٹس، بھین اُرسلا تے بھین جیسیکا نُوں کیہہ فائدہ ہویا اے؟
16 یہوواہ نے پیدایش 3:15 چ جیہڑا وعدہ کیتا اے اوہدے توں اَسی کسے وی طرحاں دی مشکل نال نبڑن دے قابل ہو سکنے آں۔ ذرا غور کرو کہ ایس حوالے نال بھرا کرٹس نے کیہہ کہیا جیہڑا مائیکرونیشیا دے علاقے چ مشنری اے۔ اوہنے کہیا: ”مینوں زندگی چ ایہو جہیاں مشکلاں چوں لنگھنا پیا جنہاں دی وجہ توں مینوں یہوواہ دا وفادار رہنا مشکل لگ رہیا سی۔ پر پیدایش 3:15 چ لکھی پیشینگوئی تے غور کرن نال میں اپنے اسمانی باپ تے بھروسا رکھ سکیا۔“ بھرا کرٹس اوس وقت نُوں ویکھن لئی بےتاب اے جدوں یہوواہ ساڈیاں ساریاں مشکلاں نُوں ختم کر دَوے گا۔
17 جرمنی توں اِک بھین اُرسلا نے دَسیا کہ پیدایش 3:15 دی پیشینگوئی نُوں سمجھن دی وجہ توں اوہنوں ایس گل دا یقین ہو گیا اے کہ بائبل خدا وَلّوں اے۔ اوہ ایس گل توں بڑی متاثر ہوئی کہ بائبل دِیاں دُوجیاں پیشینگوئیاں ایس پیشینگوئی نال جُڑیاں نیں۔ اوہنے کہیا: ”جدوں میں سکھیا کہ یہوواہ نے ساڈی مدد کرن لئی فوراً قدم چُکیا تے میرے دل چ اوہدے لئی محبت ہور ودھ گئی۔“
18 مائیکرونیشیا توں بھین جیسیکا نے کہیا: ”مینوں اَج وی یاد اے کہ میں اوس ویلے کِنّی خوش ہوئی ساں جدوں میں ایہہ سمجھ گئی ساں کہ مینوں سچی تلیم مل گئی اے۔ پیدایش 3:15 چ لکھیاں زیادہتر گلاں پوریاں ہو گئیاں سن۔ ایس پیشینگوئی دی وجہ توں مینوں ایہہ یاد رہندا اے کہ یہوواہ ایہہ کدی وی نئیں سی چاہندا کہ اَسی مشکلاں نال بھری ہوئی زندگی گزارئیے۔ ایس پیشینگوئی دی وجہ توں ایس گل تے میرا ایمان مضبوط ہویا اے کہ یہوواہ دی عبادت کرن نال میری زندگی نہ صرف اَج سگوں مستقبل چ وی خوشیاں نال بھری ہوئے گی۔“
19. اَسی ایس گل تے یقین کیوں رکھ سکنے آں کہ پیدایش 3:15 دی پیشینگوئی دا اگلا حصہ وی ضرور پورا ہوئے گا؟
19 اَسی ویکھیا اے کہ پیدایش 3:15 دی پیشینگوئی پوری ہو رہی اے۔ اَسی سمجھ گئے آں کہ عورت دی نسل تے سپ دی نسل کون اے۔ یسوع مسیح عورت دی نسل اے۔ اوہدی اَڈّی تے لگیا زخم ٹھیک ہو گیا تے ہن اوہ طاقتور بادشاہ اے جیہڑا ہمیشاں تک رہوے گا۔ عورت دی نسل چ ہور وی لوک شامل نیں جنہاں وچوں تقریباً ساریاں نُوں چنیا جا چُکیا اے۔ کیونکہ ایس پیشینگوئی دا پہلا حصہ پورا ہو چُکیا اے، ایس لئی اَسی ایس گل دا پورا یقین رکھ سکنے آں کہ ایس پیشینگوئی دا اگلا حصہ وی ضرور پورا ہوئے گا تے عورت دی نسل سپ دے سر نُوں مِد دَوے گی۔ ذرا سوچو کہ جدوں شیطان نُوں ہمیشاں لئی ختم کر دِتا جائے گا تے اوہ خدا دے بندیاں لئی کِنّاں خوشی دا ویلا ہوئے گا۔ پر جدوں تک اوہ وقت نئیں آندا اوہدوں تک ہمت نہ ہارو۔ ایس گل تے بھروسا رکھو کہ یہوواہ اپنے وعدیاں نُوں پورا کرے گا۔ اوہ اپنے وعدے مطابق عورت دی نسل دے ذریعے زمین دِیاں ساریاں قوماں نُوں ڈھیروں ڈھیر برکتاں دَوے گا۔—پیدایش 22:18۔
گیت نمبر 23: یہوواہ دا راج شروع ہو گیا
^ اَسی بائبل دے پیغام نُوں اوہدوں تک پوری طرحاں نئیں سمجھ سکدے جدوں تک اَسی پیدایش 3:15 چ لکھی پیشینگوئی نُوں نئیں سمجھ لیندے۔ ایس پیشینگوئی نُوں سمجھن نال یہوواہ تے اوہدے وعدیاں تے ساڈا ایمان مضبوط ہوئے گا۔
^ کتاب ”کتابِمُقدس کی تحقیق کے لیے گائیڈ“ دے حصہ نمبر 5 چ ”کتابِمُقدس کا پیغام“ نُوں ویکھو۔
^ بکس ”پیدایش 3:14، 15 چ کنہاں دا ذکر کیتا گیا اے؟“ نُوں ویکھو۔
^ بکس ” پیدایش 3:15 نال تعلق رکھن والے کجھ اہم واقعے“ نُوں ویکھو۔
