1. So kergja o Jehova odma otkeda o Adam hem i Eva grešingje? (1. Mojseeva 3:15).

 ODMA otkeda o Adam hem i Eva grešingje, o Jehova dengja nadež lengere potomconge preku jekh važno proroštvo. Adava proroštvo tano pišimo ki 1. Mojseeva 3:15. (Čitin.)

2. Soske akava proroštvo tano nešto posebno?

² Akava proroštvo pojavinela pe ko prvo lil tari Biblija. Ama ov tano posebno adaleske so sa o javera da bibliska lila tane povrzime lea. Isto sar o lepako so spojnela sa o listija ko jekh lil, agjaar o proroštvo tari 1. Mojseeva 3:15 povrzinela i sodržina taro sekova biblisko lil ko jekh haberi, a adava tano kaj o Devel ka bičhalel Spasiteli kova so ka uništinel e Satana hem sa leskere sledbenikon. * Adava ka ovel baro bereketi sarinenge kola so mangena e Jehova!

3. Bašo so ka kera lafi ki akaja statija?

³ Ki akaja statija, ka dobina odgovor ko sledna pučiba povrzime e proroštvoja tari 1. Mojseeva 3:15: Koj tane spomnime ko adava proroštvo? Sar ispolningja pe akava proroštvo? Hem sar isi amen korist lestar?

4. Koj tano o „sap“ hem kotar džanaja adava?

⁴ Ki 1. Mojseeva 3:14, 15 tane spomnime o „sap“, o „potomstvo“ e sapeskoro, i „džuvli“ hem o „potomstvo“ e džuvljakoro. I Biblija pomožinela amenge te haljova kas pretstavinena ola. * Prvo te dikha koj tano o sap. Jekh doslovno sap našti sine te haljovel so vakergja o Jehova ki Edensko gradina. Znači o Jehova sigurno vakergja adaja osuda nekaske so šaj sine te haljovel adava. Kaske? Taro Otkrovenie 12:9 jasno dikhaja koj tano o sap. Adathe amenge otkrimo kaj o „najpurano sap“ tano o Satana o Beng. Ama koj tano o potomstvo e sapeskoro?

5. Koj tano o potomstvo e sapeskoro?

⁵ Ponekogaš i Biblija koristinela o lafi potomstvo ki simbolično smisla te šaj te opišinel okolen so razmislinena hem postapinena sar pumaro simbolično dad. Znači ko potomstvo e sapeskoro tane vklučime duhovna suštestvija hem o manuša kola so slično sar o Satana protivinena pe e Jehovaske hem leskere narodoske. Adala tane o angelija so mukle pli zadača ko nebo ko e Noeskere dive hem sa o lošna manuša kola so ponašinena pe sar pumaro dad o Beng (1. Moj. 6:1, 2; Jovan 8:44; 1. Jov. 5:19; Juda 6).

6. Soske i Eva našti te ovel „i džuvli“ taro proroštvo?

⁶ Akana te dikha koj tani „i džuvli“. Akaja džuvli na sine i Eva. Kotar džanaja adava? Te dikha samo jekh pričina. O proroštvo vakerela kaj o potomstvo e džuvljakoro ka „zgmečinel“ e sapeskoro šero. Sar so dikhlem, o sap tano o lošno angeli o Satana hem adaleske nijekh nesovršeno manuš so  avela tari Eva našti te uništinel le. Tegani sar ka ovel uništimo o Satana?

7. Sprema Otkrovenie 12:1, 2, 5, 10, koj tani i džuvli soj spomnimi ki 1. Mojseeva 3:15?

⁷ O posledno lil tari Biblija otkrinela amenge koj tani i džuvli soj spomnimi ki 1. Mojseeva 3:15. (Čitin Otkrovenie 12:1, 2, 5, 10.) Akaja džuvli nane tari phuv. Telo lakere pre tani i mesečina hem isi la kruna ko šero taro 12 zvezde. Oj bijanela jekhe posebno čhave — e Devleskoro Carstvo. Adaleske so o Carstvo tano ko nebo, znači i džuvli da mora te ovel ko nebo. Oj pretstavinela o nebesno delo tari e Jehovaskiri organizacija kolate soj o verna angelija (Gal. 4:26).

8. Koj tano o glavno delo taro potomstvo e džuvljakoro, hem keda pojavingja pe? (1. Mojseeva 22:15-18).

⁸ E Devleskoro Lafi isto agjaar pomožinela amenge te otkrina koj tano o glavno delo taro potomstvo e džuvljakoro. Akava potomstvo valjani sine te avel taro Avraam. (Čitin 1. Mojseeva 22:15-18.) Baš sar so vakergja o proroštvo, o Isus sine potomco taro adava verno manuš (Luka 3:23, 34). Ama o potomstvo valjani te ovel sine but pomokjno taro obično manuš soske ov valjani sine te uništinel e Satana. Adaleske, keda e Isuse sine le 30 berš ov sine pomazimo sveti duhoja. Keda sine pomazimo, o Isus ulo o glavno delo taro potomstvo e džuvljakoro (Gal. 3:16). Otkeda mulo hem voskresningja, o Devel dengja le „slava hem čest“ hem „celo vlast ko nebo hem ki phuv“ isto agjaar dengja le i vlast te uništinel o bukja so kergja o Beng (Evr. 2:7; Mat. 28:18; 1. Jov. 3:8).

9-10. a) Koj tane isto agjaar delo taro potomstvo e džuvljakoro, hem keda ovena delo taro potomstvo? b) So ka dikha akana?

⁹ Ama osven o Isus, javera da ka oven delo taro potomstvo e džuvljakoro. O apostol Pavle otkringja koj tano akava delo taro potomstvo keda vakergja e pomazime hristijanenge kola so sine hem Evreija hem taro javera nacie: „Ako pripadinena e Hristoseske, tegani sien e Avraameskoro potomstvo, naslednikija sprema jekh vetuvanje“ (Gal. 3:28, 29). Jekh hristijani ovela delo taro potomstvo e džuvljakoro keda o Jehova pomazinela le sveti duhoja. Znači, ko potomstvo tane vklučime o Isus Hristos hem o 144.000 kola so ka vladinen lea zaedno (Otk. 14:1). Sarine ola trudinena pe te razmislinen hem te postapinen sar pumaro Dad, o Jehova.

¹⁰ Akana otkeda džanaja koj tane adala soj spomnime ki 1. Mojseeva 3:15, te dikha so više kergja o Jehova te šaj te ispolninel akava proroštvo hem sar adava koristinela amenge.

11. Ki savi smisla sine o potomstvo e džuvljakoro kicimo „ki peta“?

¹¹ Sprema o proroštvo tari 1. Mojseeva 3:15, o sap valjani te kicinel e džuvljakere potomstvo „ki peta“. Akava ispolningja pe keda o Satana koristingja e Evreen hem e Rimjanen te mudaren e Devleskere Čhave (Luka 23:13, 20-24). Isto sar keda nekoj tano povredimo ki peta hem nesavo vreme našti te phirel, agjaar o Isus da nesavo vreme našti sine te kerel ništo soske sine trin dive mulo (Mat. 16:21).

12. Sar hem keda ka ovel zgmečimo e sapeskoro šero?

¹² O proroštvo tari 1. Mojseeva 3:15 sikavela kaj o Isus našti sine te ačhovel ko grobo. Soske na? Sprema o proroštvo, o potomstvo valjani sine te zgmečinel e sapeskoro šero. Akava značinela sine kaj e Isuseskiri peta valjani sine te sasljol.  Hem čače ulo agjaar! O trito dive palo leskoro meribe o Isus sine voskresnimo hem sine leske dendo besmrtno životo ko nebo. Ko vreme so odredingja le o Devel, o Isus ka uništinel e Satana (Evr. 2:14). O Hristos hem okola so vladinena zaedno lea ka uništinen sa e Devleskere dušmanen — e sapeskere potomstvo * (Otk. 17:14; 20:4, 10).

13. Sar koristinela amenge adava so ispolninela pe akava proroštvo?

¹³ Ako sian e Devleskoro sluga, tegani isi tut korist taro adava so ispolninela pe o proroštvo. Keda o Isus alo ki phuv sar manuš ov ko sovršeno način sikavgja ple Dadeskiri ličnost (Jovan 14:9). Adaleske, preku leste šaj sine te zapoznajna hem te zamanga e Jehova. Isto agjaar but koristinena amenge e Isuseskere sikljojba hem o način sar vodinela o hristijanska sobranija avdive. Ov sikavgja amen te živina ko način kova so ka pomožinel amenge te kera e Jehovaskiri volja. Hem adaleske so o Isus sine kicimo ki peta hem mulo, sarinen amen isi amen korist taro adava. Sar? Otkeda o Isus voskresningja, o Jehova prifatingja ple Čhaveskiri sovršeno žrtva koja so čistinela amen taro sa amare grevija (1. Jov. 1:7).

14. Kotar džanaja kaj o proroštvo so dengja le o Jehova ki Edensko gradina na ispolningja pe odma? Objasnin.

¹⁴ O proroštvo so vakergja le o Jehova ki Edensko gradina sikavela kaj valjani sine te nakhel nesavo vreme te šaj celosno te ispolninel pe. Valjani sine te nakhel vreme te šaj e džuvlja te ovel la potomstvo, te šaj o Satana te khedel ple sledbenikon hem te šaj te ovel dušmanluko maškar adala duj grupe. But pomožinela amenge adava so haljovaja akava proroštvo soske predupredinela amen kaj o sveto kolea so vladinela o Satana ka mrzinel e Jehovaskere slugen. Pokasno, o Isus dengja slično predupreduvanje ple učenikonge (Mar. 13:13; Jovan 17:14). Posebno ko posledna 100 berš dikhlem sar ispolninela pe akava delo taro proroštvo. Sar?

15. Soske o sveto sa poviše mrzinela amen, ama soske na valjani te dara taro Satana?

¹⁵ Kratko otkeda o Isus ulo Cari ko e Devleskoro Carstvo ko 1914 berš, o Satana sine frdimo taro nebo tele ki phuv. Hem akana našti više te iranel pe ko nebo hem adžikerela te ovel uništimo (Otk. 12:9, 12). Ama ov na bešela, ov tano but holjamo hem ikalela pli holi upro e Devleskoro narodo (Otk. 12:13, 17). Adaleske o sveto sa poviše hem poviše mrzinela e Devleskere narodo. Ama na valjani te dara taro Satana hem taro leskere sledbenikija. Namesto adava, valjani te ova uverime isto sar o apostol Pavle kova so pišingja: „Ako o Devel tano amencar, tegani koj ka ovel protiv amende?“ (Rim. 8:31). Šaj te ovel amen celosno doverba ko Jehova soske sar so dikhlem, pobaro delo taro proroštvo so arakhljovela ki 1. Mojseeva 3:15 više ispolningja pe.

16-18. Savi korist sine e Kertise, e Ursula hem e Džesika taro adava so halile o proroštvo tari 1. Mojseeva 3:15?

¹⁶ E Jehovaskoro vetuvanje so arakhljovela ki 1. Mojseeva 3:15 šaj te pomožinel amenge te izdržina bilo savo pharipe. O Kertis kova so služinela sar misioneri ko Guam vakerela: „Ponekogaš slučingje pe mange bukja kola so kergje mange pharo te  ačhovav verno e Jehovaske. Ama adava so hor razmislinava sine bašo proroštvo tari 1. Mojseeva 3:15 pomožingja mange te na našavav mi doverba ko mlo nebesno Dad“. O Kertis edvaj adžikerela o dive keda o Jehova ka anel krajo sa amare mukenge.

¹⁷ Jekh phen tari Germanija so vikinela pe Ursula vakerela kaj adava so halili o proroštvo tari 1. Mojseeva 3:15 pomožingja lake te uverinel pe kaj i Biblija tani taro Devel. But vlijajngja upri late adava so halili sar sa o javera proroštvija tane povrzime akale proroštvoja. Oj isto agjaar vakerela: „Keda doznajngjum kaj o Jehova odma kergja nešto te šaj te del amen nadež, adava kergja panda poviše te zamangav le“.

¹⁸ I Džesika, jekh phen tari Mikronezija, vakerela: „Panda šaj te setinav man sar osetinava man sine keda haliljum kaj arakhljum o čačipe! Adava so ispolninela pe o proroštvo tari 1. Mojseeva 3:15 pomožingja mange te dikhav kaj o muke so cidaja len avdive nane delo tari e Jehovaskiri namera amencar. Akava proroštvo isto agjaar uveringja man kaj te služinel pe e Jehovaske tano o najšukar životo so šaj te ovel amen avdive a panda poviše ki idnina“.

19. Soske šaj te ova sigurna kaj o posledno delo taro proroštvo ka ispolninel pe?

¹⁹ Sar so dikhlem, o proroštvo tari 1. Mojseeva 3:15 panda ispolninela pe. O potomstvo e džuvljakoro hem o potomstvo e sapeskoro tane otkrime. O Isus, o glavno delo taro potomstvo e džuvljakoro, sastilo tari pli rana ki peta hem akana tano mokjno, besmrtno Cari. Akana o Jehova biringja skoro sarinen so ka vladinen leskere Čhavea upre ko nebo. Adaleske so o prvo delo taro proroštvo ispolningja pe, šaj te ova sigurna kaj o posledno delo — te zgmečinel pe e sapeskoro šero — isto agjaar ka ispolninel pe. Kobor ka ova bahtale keda o Satana ka ovel uništimo. Dži tegani ma te otkažina amen. Šaj te ovel amen doverba ko amaro Devel. Preku e džuvljakoro potomstvo, ov ka del but bereketija sa e narodonge ki phuv (1. Moj. 22:18).