1. Σο κερντάς ο Ιεχωβά χάνικ πο σοράν κατά αμαρτία ι Αδαμίσκι ντα ι Ευάκι; (Γένεση 3:15)

 ΧΑΝΙΚ πο σοράν κατά αμαρτία ι Αδαμίσκι ντα ι Ευάκι, ο Ιεχωβά ντινάς ελπίδα λένγκε προσαγγονίν αντράλ εκχέ σημαντικέ προφητειάταρ. Οντουλά σο βακερντάς ισί γραμμέ κο εδάφιος Γένεση 3:​15.​—Διαβάνεν.

2. Σόσκε ισί σημαντική ανταγιά προφητεία;

² Ανταγιά προφητεία ισί κο πρώτος βιβλίος κι Γραφιάκο. Αλλά εκχέ τροπόσαρ, σαρέ ο γιαβερά βιβλία ι Γραφιάκε τθερένα τι κερέν λάσαρ. Σόσκε; Σόσκε ο λάφια ι εδαφιόσκε Γένεση 3:​15 ισί ο πο σημαντικός πράγμας σο μανγκέλα τι βακερέλ η Αγία Γραφή, δηλαδή ότι ο Ντεβέλ κα μπουτσσαβέλας Οντουλές σο κα ανέλας ελευθερία για τι καταστραφίνελ ι Μπενγκές ντα σαρέ ι πφιρνέν σο τζάνα παλά-λέστε. * Σο μπαρί ευλογία κα αβέλ ανταγιά οντουλένγκε σο μανγκένα ι Ιεχωβάς!

3. Σο κα ντικχάς ανταλέ μαθημάστε;

³ Ανταλέ μαθημάστε, κα απαντίνας ακαλέ ερωτησιέντε σο τθερένα τι κερέν ι προφητειάσαρ ι εδαφιόσκι Γένεση 3:​15: Κον ισί οντουλά σο βακέρντιβενα λάτε; Σαρ νικιόλα μπαγιά η προφητεία; Ντα σο λατσσιπέ ντικχάσα αμέν λάταρ;

4. Κον ισί ο «σαπ», ντα σαρ τζανάσα-λες;

⁴ Κο εδάφια Γένεση 3:​14, 15 κερντιόλα λάφι εκχέ “σαπέσκε”, ι σαπέσκε “προσαγγονίσκε”, εκχέ “τζουβλιάκε” ντα ι τζουβλιάκε “προσαγγονίσκε”. Η Γραφή βοηθίνελα-αμέν τι αγαβάς κον  ισί ο κάθε εκ ανταλένταρ. * Πρώτα κα βακεράς κον ισί ο «σαπ». Εκ κανονικός σαπ ναστί κα αγαβέλας οντουλά σο βακερντάς ο Ιεχωβά κο κήπος της Εδέμ. Άρα, ο Ιεχωβά πρέπει τι βακερντάς ανταλά λάφια εκχέσκε σο τθερέλας γκοντί. Κον ισινέ οντουβά; Ο εδάφιος Αποκάλυψη 12:9 σικαβέλα-λες ξεκάθαρα. Βακερέλα ότι «ο σαπ σο ισινέ κι αρχή» ισί ο Μπενγκ. Αλλά κον ισί ο προσάγγονος ι σαπέσκο;

5. Κον ισί ο προσάγγονος ι σαπέσκο;

⁵ Κάνα η Γραφή βακερέλα συμβολικά ο λάφι «προσάγγονος», κερέλα λάφι οντουλένγκε σο μοιάζενα αζόμ μπουτ εκχέ γιαβερέστε σο σκεφτίνενα ντα κερένα πράγματα σαρ τι αβένας λέσκε τσσαβέ. Οτθάρ, ο προσάγγονος ι σαπέσκο ισί πφιρνέ άγγελοι ντα τζενέ σο, σαρ ο Μπενγκ, τζάνα κόντρα κο Ιεχωβά Ντεβέλ ντα Λέσκε λαόστε. Αντρέ ανταλέντε ισί ο πφιρνέ-ντα άγγελοι σο μουκχλέας πουμαρέ διορισμοί κο ουρανός αζομάν σο τζουβντιόλας ο Νώε, αλλά εμ ο πφιρνέ-ντα τζενέ σο κερένα οντουλά σο κερέλα λένγκο ντατ ο Μπενγκ.​—Γέν. 6:1, 2· Ιωάν. 8:​44· 1 Ιωάν. 5:​19· Ιούδα 6.

6. Σόσκε η «τζουβέλ» νανέ η Εύα;

⁶ Ακανά, κα βακεράς κον ισί η «τζουβέλ». Νανέ η Εύα. Σόσκε; Ντικχέν σάντε εκ λόγος. Η προφητεία βακερέλα ότι ο προσάγγονος ι τζουβλιάκο κα “ντέλας” κο σορό ι σαπές. Σαρ βακερντάμ, ο σαπ ισί εκ πφιρνό άγγελος, ο Μπενγκ. Καέκ ατελής τζενό σο κα αστάρντιβελας κατά Εύα ναστί κα καταστραφίνελας-λες. Σαρ κα αβέλας-πες ανταβά;

7. Κον ισί η τζουβέλ σο βακέρντιβελα κι Γένεση 3:​15 σαρ αγαβάσα κατά εδάφια Αποκάλυψη 12:1, 2, 5, 10;

⁷ Ο τελευταίος βιβλίος ι Γραφιάκο μουτθαβέλα αμένγκε κον ισί η τζουβέλ σο βακέρντιβελα κο εδάφιος Γένεση 3:​15. (Διαβάνεν Αποκάλυψη 12:1, 2, 5, 10) Βόι νανέ εκ τζουβέλ  κι πφουβ! Τθερέλα ο τσσιμούτ πι πιντρέντε ντα εκ στεφάνι 12 τσεργανίντζαρ πι σορέστε. Μπιανέλα εκχέ τσσαβές σο νανέ σαρ ο γιαβερά: ι Ντεβλέσκε Βασιλειά. Η Βασιλεία ισί κο ουρανός, οτθάρ η τζουβέλ-ντα πρέπει τι ισί κο ουρανός. Μανγκέλα τι σικαβέλ ο κομμάτι ι Ιεχωβάσκε οργανωσιάκο σο ισί κο ουρανός ντα αντρέ λέστε ισί ο πιστοί άγγελοι.​—Γαλ. 4:26.

8. Κον ισί ο πο σημαντικός προσάγγονος ι τζουβλιάκο, ντα κάνα αβιλό-πες ανταβά; (Γένεση 22:​15-18)

⁸ Ο Λάφι ι Ντεβλέσκο βοηθίνελα-αμέν τι αγαβάς κον ισί ο πο σημαντικός προσάγγονος ι τζουβλιάκο. Ανταβά προσάγγονος έπρεπε τι αστάρντιβελ κατά Αβραάμ. (Διαβάνεν Γένεση 22:​15-18) Σαρ βακερντάας η προφητεία, ο Ιησούς μπαγιά αστάρντιβελας οντουλέ πιστέ τζενέσταρ. (Λουκ. 3:​23, 34) Αλλά ο προσάγγονος έπρεπε τι αβέλ πο ζουρανό κατά τζενέ σόσκε κα καταστραφίνελας ι Μπενγκές για πάντα. Οτθάρ, κάνα ο Ιησούς ισινέ πασέ 30 μπρεσένγκο, αβιλό χρισμέ Τσσαβό ι Ντεβλέσκο σο μπιάντιλο κατά πνεύμας. Κάνα αβιλό χρισμέ, βοβ αβιλό ο πο σημαντικός προσάγγονος ι τζουβλιάκο. (Γαλ. 3:​16) Σοράν κατά μεριπέ ντα κατά ανάσταση ι Ιησούσκι, ο Ντεβέλ ντινάς-λες δόξα ντα “σαρί ι εξουσία κο ουρανός ντα κι πφουβ”, εμ ι εξουσία “τι καταστραφίνελ σαρέ ο μπέτι πράγματα σο κερέλα ο Μπενγκ”.​—Εβρ. 2:7· Ματθ. 28:​18· 1 Ιωάν. 3:8.

9, 10. (α) Καλά γιαβερά ισί κομμάτι ι τζουβλιάκε προσαγγονίσκο, ντα κάνα αβέλα-πες ανταβά; (β) Σο κα ντικχάς πο τελέ;

⁹ Αλλά, εκτός κατά Ιησούς, γιαβερά-ντα κα αβένας κομμάτι ι προσαγγονίσκο. Ο απόστολος Παύλος σικαντάς καβά κα αβέλας ανταβά κομμάτι ι προσαγγονίσκο κάνα βακερντάς ακαλά λάφια κο χρισμέ Χριστιανοί, σο ισινέ εμ Ιουδαίοι εμ γιαβερέ τθεμένταρ: «Άμα ισινέν γιεκ ι Ιησού Χριστόσαρ, ισινέν προσάγγονα ι Αβρααμίσκε, ντα κα λεν ι κληρονομιά αντικάς σαρ ντινάς πο λάφι ο Ντεβέλ». (Γαλ. 3:​28, 29) Κάνα ο Ιεχωβά κερέλα εκχέ Χριστιανός χρισμέ ι άγιε πνευμάσαρ, οντουβά τζενό αβέλα κομμάτι ι τζουβλιάκε προσαγγονίσκο. Άρα, ο προσάγγονος ισί ο Ιησούς Χριστός ντα ο 144.000 σο κα κυβερνίνεν γιεκ λέσαρ. (Αποκ. 14:1) Σαρέ οντουλά μοιάζενα πουμαρέ Νταντέστε, κο Ιεχωβά Ντεβέλ.

¹⁰ Ακανά σο ντικχλάμ κον ισί οντουλά σο βακέρντιβενα κο εδάφιος Γένεση 3:​15, κα σικλιάς χάνικ λαφίντζαρ σο τθερέλα κερντό ο Ιεχωβά για τι νικιόλ μπαγιά ανταγιά προφητεία ντα σο λατσσιπέ ντικχάσα αμέν λάταρ.

11. Σο μανγκέλας τι σικαβέλ η προφητεία κάνα βακερντάς ότι ι τζουβλιάκο προσάγγονος κα ντιντιόλας «κι πατούμ»;

¹¹ Σαρ βακερέλα η προφητεία ι εδαφιόσκι Γένεση 3:​15, ο σαπ κα ντέλας ι τζουβλιάκε προσαγγονίς «κι πατούμ». Ανταβά νικίστιλο μπαγιά κάνα ο Μπενγκ τσσιντιντάς ι Ιουδαιόν ντα ι Ρωμαιόν τι μουνταρέν ι Ντεβλέσκε Τσσαβές. (Λουκ. 23:​13, 20-24) Εκ κανονικός ντιπέ κι πατούμ μπορεί τι κερέλ εκχέ τζενές μα τι πφιρέλ για χάνικ βακίτι, αντικάς-ντα ο μεριπέ ι Ιησούσκο κερντάς-λες για χάνικ μα τι μπορίνελ τι κερέλ τίποτα σόσκε ισινέ μουλό κο μεζάρι μέχρι κο τρίτος ντιβές.​—Ματθ. 16:21.

12. Σαρ ντα κάνα κα αβέλ-πες ο ντιπέ κο σορό κι σαπέσκο;

¹² Για τι νικιόλ μπαγιά η προφητεία ι εδαφιόσκι Γένεση 3:​15, ο Ιησούς να αβέλας-πες τι ατσσόλ κο μεζάρι. Σόσκε; Σόσκε η προφητεία βακερέλας ότι ο προσάγγονος κα ντέλας κο σορό ι σαπές. Ανταβά μανγκέλας τι βακερέλ ότι ο ντιπέ κι πατούμ κι Ιησούσκι έπρεπε τι αβέλας λατσσές. Ντα μπαγιά αβιλό-πες ανταβά! Ο Ιησούς, κο τρίτος ντιβές σοράν πι μεριμάσταρ, αναστισάλο σαρ πνευματικός πλάσμας σο ναστί κα μερέλας ποτές. Κο βακίτι σο τραμπιντάς ο Ντεβέλ, ο Ιησούς κα καταστραφίνελ ι Μπενγκές ντα κα κερέλ-λες τι  χασάρντιβελ για πάντα. (Εβρ. 2:​14) Οντουλά σο κα κυβερνίνεν γιεκ ι Χριστόσαρ κα βοηθίνεν βον-ντα για τι χασάρντιβελ ο προσάγγονος ι σαπέσκο, σαρέ ι Ντεβλέσκε ντουσμάνια, κατά πφουβ.​—Αποκ. 17:​14· 20:4, 10. *

13. Σο λατσσιπέ ντικχάσα ανταλέ προφητειάταρ;

¹³ Άμα ντινέν τουμαρό λάφι τι υπηρετίνεν ι Ντεβλές, ντικχένα τουμέν-ντα λατσσιπέ ανταλέ προφητειάταρ. Ο Ιησούς αβιλό κι πφουβ σαρ τζενό. Τθερέλας ντα σικαβέλας ντιπ λατσσές ο χαρακτήρας πι Νταντέσκο. (Ιωάν. 14:9) Οτθάρ, αντράλ κατά Ιησούς, σικλιλάμ ντα μανγκλάμ ι Ιεχωβά Ντεβλές. Ντα ντικχλάμ λατσσιπέ εμ κατά σικλιαριπέ ι Ιησούσκο εμ κατά οδηγίες σο ντέλα κι Χριστιανική κχανγκιρί αντιβές. Σικλιαρντάς-αμέν σαρ τι τζουβντιάς εκχέ τροπόσαρ σο κερέλα ι Ιεχωβάσκο γκι. Ντα σαρέ μπορίνασα τι ντικχάς λατσσιπέ κατά μεριπέ ι Ιησούσκο, κατά ντιπέ λέσκε πατουμάκο. Σαρ; Κάνα ο Ιησούς ιστίντιλο κατά μεριπέ, ντινάς ι αξία πι ρατέσκι σαρ τέλεια θυσία σο «καθαρίνελα-αμέν σαρέ κατά αμαρτίες».​—1 Ιωάν. 1:7.

14. Έπρεπε ο τζενέ τι μπεκλεντίνεν τι νικιόλ μπαγιά, οντουβά βακίτι σο βακέρντιλι, η προφητεία σο ντινάς ο Ιεχωβά κι Εδέμ; Εξηγίνεν.

¹⁴ Ο λάφια σο βακερντάς ο Ιεχωβά κι Εδέμ σικαβένας ότι κα νακχέλας βακίτι μέχρι τι νικιόλ μπαγιά σαρί η προφητεία. Κα χρειαζίντιβελας βακίτι για τι κερέλ η τζουβέλ ι προσαγγονίς σο βακέρντιλοας, για τι γκίντελ ο Μπενγκ οντουλέν σο κα τζάνας παλά-λέστε ντα για τι αβέν ντουσμάνια (ή γιαβέρτουλους τι τθερέν μίσος) ο προσάγγονος ι σαπέσκο ι τζουβλιάκε προσαγγονίσαρ. Ντικχάσα λατσσιπέ σο τζανάσα ανταγιά προφητεία σόσκε βακερέλα αμένγκε ότι ο ντουνιάς σο ισί κι Μπενγκέσκε βαστά κα μισίνελ οντουλέν σο ντένα λατρεία ι Ιεχωβάς. Πο σοράν, ο Ιησούς-ντα βακερντάς-λες ανταβά πι μαθητένγκε. (Μάρκ. 13:​13· Ιωάν. 17:​14) Σίγουρα, τθεράσα ντικχλό ατζέ πο μπουτ ανταλά τελευταία 100 μπρεσά τι νικιόλ μπαγιά οντουβά κομμάτι κατά προφητεία. Σόσκε βακεράσα-λες ανταβά;

15. Σόσκε μπαριλό ο μίσος ι ντουνιάσκο, αλλά σόσκε να τθεράσα καέκ λόγος τι νταράς κατά Μπενγκ;

¹⁵ Χάνικ πο σοράν αφού ο Ιησούς αβιλό Βασιλιάς κο 1914, ο Μπενγκ παλντίντιλο κατά ουρανός. Ακανά ισί κι πφουβ, ναστί νασέλα ατθάρ ντα μπεκλεντίνελα πι καταστροφιάκε. (Αποκ. 12:9, 12) Αλλά να μπεσέλα πφαντέ βαστέντζαρ. Ο Μπενγκ να τθερέλα καέκ ελπίδα ντα ισί μπουτ χολιαμέ, οτθάρ νικαβέλα πι χολί οπράλ κι Ντεβλέσκο λαός. (Αποκ. 12:​13, 17) Άκ’ σόσκε μπαριλό ο μίσος σο τθερέλα ο ντουνιάς ι Ντεβλέσκε λαόσκε! Όμως, να τθεράσα καέκ λόγος τι νταράς κατά Μπενγκ ντα οντουλένταρ σο τζάνα παλά-λέστε. Οκιά μπάνταρ, τθεράσα ι ίδια σιγουριά σο τθερέλας ο απόστολος Παύλος-ντα, σο γραφιντάς: «Άμα ο Ντεβέλ ισί αμέντζαρ, κον κα τζαλ αμέντζαρ κόντρα;» (Ρωμ. 8:​31) Μπορίνασα τι ντας μπέσα ι Ιεχωβάσκε σαρέ αμαρέ γκίσαρ σόσκε, σαρ ντικχλάμ, εκ μπαρό κομμάτι ι προφητειάκο σο ισί γραμμέ κο εδάφιος Γένεση 3:​15 νικίστιλο μπαγιά.

16-18. Σο λατσσιπέ ντικχλέ ο Κέρτις, η Ούρσουλα ντα η Τζέσικα επειδή αγαντέ ο εδάφιος Γένεση 3:15;

¹⁶ Ο λάφι σο ντινάς ο Ιεχωβά ντα σο ισί γραμμέ κο εδάφιος Γένεση 3:​15 μπορίνελα τι βοηθίνελ-αμέν τι ντας-λεν πέρα σο-ντα πρόβλημας τι νακχάς. Ο Κέρτις, σο ισί ιεραπόστολος κο Γκουάμ, βακερέλα: «Ισινέ φαρ σο νακχλόμ προβλήματα ντα στεναχώριες, οτθάρ να ισινέ εύκολος μάνγκε τι ατσσάβ αφοσιωμέ κο Ιεχωβά. Αλλά ο σκέψεις σο κερντόμ  οπράλ κι προφητεία κι εδαφιόσκι Γένεση 3:​15 βοηθιντέ-μαν μα τι τσσιναβάβ τι νταβ μπέσα μι Νταντέσκε, ι Ιεχωβάσκε». Ο Κέρτις μπεσέλα σαρ σαρ τι αβέλ ο ντιβές σο ο Ιεχωβά κα τσσιναβέλ σαρέ αμαρέ προβλήματα.

¹⁷ Εκ πφεν κι Βαυαρία, η Ούρσουλα, βακερέλα ότι ο εδάφιος Γένεση 3:​15 κερντάς-λα τι αβέλ σίγουρη ότι η Γραφή ισί κατά Ντεβέλ. Η Ούρσουλα ντικχλάς σαρ τθερένα τι κερέν ανταλέ προφητειάσαρ σαρέ ο γιαβερά προφητείες ντα ανταβά μουκχλάς-λα πουταρντέ μόσαρ. Βόι βακερέλα: «Πουτάρντιλο μο γκι κάνα σικλιλόμ ότι ο Ιεχωβά κερντάς πράγματα σουγκό για μα τι ατσσόν ο τζενέ χωρίς ελπίδα».

¹⁸ Η Τζέσικα, κατά Μικρονησία, βακερέλα: «Ατζέκ ατζέκ ντάβα-μαν γκοντί σαρ νιωσάλομ κάνα αγαντόμ ότι αρακχλόμας ι αλήθεια. Ντικχλόμ ότι η προφητεία ι εδαφιόσκι Γένεση 3:​15 νικιόλας μπαγιά. Βοηθιντάς-μαν τι νταβ-μαν γκοντί ότι οντουλά σο τζουβντιάσα αντιβές νανέ η ζωή σο μανγκέλας ο Ιεχωβά τι τθεράς. Ανταγιά προφητεία κερντάς-μαν τι πακιάβ ατζέ πο μπουτ ότι η υπηρεσία ι Ιεχωβάσκι γκερέλα κι πο λατσσί ζωή σο μπορίναβα τι τθεράβ ακανά ντα εκχέ ατζέ πο λατσσέ ζωγιάτε κο ντιβεσά σο κα αβέν».

19. Σόσκε μπορίνασα τι αβάς σίγουροι ότι ο τελευταίος κομμάτι ι προφητειάκο κα νικιόλ μπαγιά;

¹⁹ Σαρ ντικχλάμ, ο εδάφιος Γένεση 3:​15 νικιόλα μπαγιά ακανά. Σικάντιλο ξεκάθαρα κον ισί ο προσάγγονος ι τζουβλιάκο ντα ο προσάγγονος ι σαπέσκο. Ο Ιησούς, ο πο σημαντικός προσάγγονος ι τζουβλιάκο, αβιλό λατσσές κατά ντιπέ κι πατούμ ντα ακανά ισί δοξασμέ Βασιλιάς σο ναστί μερέλα. Ακανά, ο Ιεχωβά τραμπιντάς σχεδόν σαρέ οντουλέν σο κα κυβερνίνεν ι Ιησούσαρ κο ουρανός ντα σο ισί κομμάτι ι προσαγγονίσκο. Αφού ο πρώτος κομμάτι ι προφητειάκο νικίστιλο μπαγιά, ισινάμ σίγουροι ότι κα νικιόλ μπαγιά ο τελευταίος-ντα κομμάτι, ο ντιπέ κο σορό κι σαπέσκο. Σο μπουτ κα λοκχιόν ο πιστά τζενέ κάνα κα αβέλ ο τέλος ι Μπενγκέσκο! Μέχρι αζομάν, μα μουκχέν-τουμέν. Αμαρό Ντεβέλ ατσσικιαρέλα πο λάφι. Βοβ, αντράλ κατά προσάγγονος ι τζουβλιάκο, κα ανέλ σαρέ “κο λαοί κι πφουβιάκε” αζόμ μπουτ ευλογίες σο ναστί κα γκιντιόν.​—Γέν. 22:18.