1. ¿Tuku tlawalh Jehová akxni aku xlakgalhinankgonit Adán chu Eva? (Génesis 3:15).

 AKXNI nina makgas la Adán chu Eva xlakgalhinankgonit, Jehová kamaxkilh akgtum takgalhkgalhin xkamanan Adán chu Eva. Tlan natekgsaw tuku wa anta kʼGénesis 3:15 (kalikgalhtawakga).

2. ¿Tuku xlakata lu xlakaskinka tuku lichuwinan Génesis 3:15?

² Uma tuku lichuwinankanit tatekgsa kxapulana libro xalak Biblia. Chu putum amakgapitsi libros xalak Biblia tatalakxtumi uma tuku xlichuwinankanit. Xtachuna la kgantum tasiw makxtum katlawa kiwi akxni kapachikan, tuku lichuwinan Génesis 3:15 tlawa pi putuminika libros xalak Biblia makxtum nalakgo chu watiya tuku nalichuwinankgo. ¿Tuku lichuwinankgo? Pi Dios x’ama malakgacha chatum lakgmaxtuna xlakata xmasputulh Akgskgawini chu putum tiku stalanikgo. * ¡Uma tuku lichuwinan lu kinkamakgapaxuwayan putum tiku paxkiyaw Jehová!

3. ¿Tuku nalichuwinanaw kʼuma artículo?

³ Kʼuma artículo nakgalhtiyaw makgapitsi takgalhskinin  nema tatalakxtumi Génesis 3:15: ¿tiku kalichuwinankan anta?, ¿la kgantaxtuma? chu ¿la kinkamakgtayayan la uku?

4. ¿Tiku kilhchanima «luwa», chu la katsiyaw?

⁴ Anta kʼGénesis 3:14, 15 lichuwinankan «luwa», “xkamanan” uma luwa, chatum «puskat» chu «xkam» uma puskat. Biblia tlan nakinkamakgtayayan nakatsiyaw tiku umakgolh tiku kalichuwinankan. * Pulana kalichuwinaw «luwa». Nila kilhchani tantum xaxlikana luwa xlakata ni xʼakgatekgsli tuku Jehová lichuwinalh anta kjardín xla Edén. Wata xkilhchanima chatum espíritu. Chu Biblia liwana masiya tiku kilhchanima. Apocalipsis 12:9 wan pi «xapulana luwa» wa Satanás, Akgskgawini. ¿Chu tiku xkamanan luwa?

5. ¿Tiku umakgolh xkamanan «luwa»?

⁵ Akxni Biblia maklakaskin tachuwin “xkamanan” nema kaj wi tuku kilhchanima, kakilhchanima tiku nachuna lakpuwankgo chu likatsikgo, tiku tlan kawanikan xkamanan. Wa xlakata xkamanan luwa makgtanumakgo tiku ángeles xwankgonit chu latamanin tiku talalakatawakakgo Jehová chu xkachikin, chuna la tlawa Satanás. Anta makgtanumakgo ángeles tiku kxkilhtamaku Noé makgxtakgkgolh tuku xlakgayakgo kʼakgapun chu latamanin tiku nitlan likatsikgo chuna la xtlatkan, Akgskgawini (Gén. 6:1, 2; Juan 8:44; 1 Juan 5:19; Jud. 6).

6. ¿Tuku xlakata ni wa kilhchanima Eva «puskat» tiku talichuwinan kʼGénesis 3:15?

⁶ La uku kalichuwinaw tiku kilhchanima «uma puskat». ¿Kilhchanima Eva? Nichuna.  Kalilakpuwaw uma. Tuku xlichuwinankanit pi xʼama la, wan pi xkamanan puskat xʼama aktayami luwa. Chuna la akxilhwi, luwa kilhchanima, Satanás. Wa xlakata, chatum tiku xalak xfamilia Eva, chatum lataman tiku kgalhi talakgalhin, nila katimasputulh Satanás. Wa xlakata, ¿la xʼamaka masputukan Satanás?

7. ¿La kinkamakgtayayan Apocalipsis 12:1, 2, 5, 10 nakatsiyaw tiku uma puskat tiku talichuwinan kʼGénesis 3:15?

⁷ Xaʼawatiya libro xalak Biblia lichuwinan tiku uma puskat tiku talichuwinan kʼGénesis 3:15 (kalikgalhtawakga Apocalipsis 12:1, 2, 5, 10). Ni kilhchanima chatum xaxlikana puskat. Akwi akgtum corona nema kgalhi 12 staku chu kxtampin kxtantun wi akgtum papaʼ. Nachuna, malakachini chatum skgata nema lu xlakaskinka, xTamapakgsin Dios. Xlakata Tamapakgsin xalak akgapun, puskat na xalak akgapun xliwanat. Kilhchanima xkachikin Jehová nema wi kʼakgapun, nema likgatsikgo ángeles nema ni makgxtakgkgo Jehová (Gál. 4:26).

8. ¿Tiku tlakg xlakaskinka xkam puskat, chu tuku kilhtamaku chuna litaxtulh? (Génesis 22:15-18).

⁸ Anta kxTachuwin Dios, na tlan nakatsiyaw tiku tlakg xlakaskinka xkam puskat. Uma kam xʼama min kxfamilia Abrahán (kalikgalhtawakga Génesis 22:15-18). Chu uma kgantaxtulh, xlakata Jesús xminacha kxfamilia Abrahán (Luc. 3:23, 34). Pero xlakata uma kam tlan xmasputulh Satanás ni kaj chatum lataman xliwanat xwanit. Wa xlakata, akxni Jesús xkgalhi 30 kata, laksakka, chu chuna xKgawasa Dios litaxtulh nema lilaksakka espíritu santo. Uma kilhtamaku, Jesús wa tiku tlakg xlakaskinka xkam puskat litaxtulh (Gál. 3:16). Akxni nilh chu lakastakwanalh, Dios maxkilh «lilanka chu likakni» chu maxkilh «putum limapakgsin […] kʼakgapun chu kkatiyatni», chu limapakgsin «xlakata namalakgsputu putum tuku tlawanit Akgskgawini» (Heb. 2:7; Mat. 28:18; 1 Juan 3:8).

9, 10. 1) ¿Tiku na makgtapakgsikgo xkam puskat, chu tuku kilhtamaku chuna litaxtukgo? 2) ¿Tuku naʼakxilhaw la uku?

⁹ Pero ni kajwatiya Jesús xʼama litaxtu xkam puskat, nachuna amakgapitsi. Apóstol Pablo kalichuwinalh tiku umakgolh akxni katsokgnanilh judíos tiku xatalaksakni chu xalak atanu kachikinin: «Komo tapakgsiniyatit Cristo, xlikana xkamanan Abrahán litaxtuyatit, chu tlan namakglhtinanatit tamaskiwin nema malaknunika Abrahán» (Gál. 3:28, 29). Akxni Jehová lilaksaka espíritu santo chatum kstalanina Cristo, uma lataman xkam puskat litaxtu. Wa xlakata, Jesucristo chu 144,000 tiku natamapakgsinankgo wa xkamanan puskat (Apoc. 14:1). Xlakan liskujkgo xlakata nalakpuwankgo chu nalikatsikgo chuna la xTlatkan, Jehová.

¹⁰ Katsinitawa tiku kalichuwinankan kʼGénesis 3:15. La uku nalichuwinanaw tsinu tuku tlawanit Jehová xlakata namakgantaxti xtachuwin, chu alistalh naʼakxilhaw la kinkamakgtayayan la uku uma tuku xlichuwinankanit pi xʼama la.

11. ¿La tsankxkitika xkam puskat?

¹¹ Génesis 3:15 wan pi luwa xʼama tsankxkiti xkam puskat. Uma kgantaxtulh akxni Satanás kamalakpuwanilh judíos chu romanos namakgnikgo xKgawasa Dios (Luc. 23:13, 20-24). Akxni wi tiku tsankxkitikan max natlawa pi nila natlawan akglhuwa kilhtamaku. Xtachuna la uma, ni lhuwa kilhtamaku, Jesús nila tuku tlawalh akxni xwi kputaknun (Mat. 16:21).

12. ¿Tuku kilhtamaku chu la naʼaktayamikan luwa?

¹² Xlakata Génesis 3:15 xkgantaxtulh, Jesús  nila putum kilhtamaku xtawi kputaknun xlakata tuku xlichuwinankanit xwan pi xkam puskat xʼama aktayami luwa. Wa xlakata, niku tsankxkitika Jesús xlipaksat xwanit. ¡Chu putuminika paksli! Xliʼakgtutu kilhtamaku la xninit, Jesús lakastakwanalh la chatum espíritu tiku nikxni katinilh. Chu, akxni nachan kilhtamaku nema lakkaxwilinit Dios, naʼaktayami Satanás, chu namasputu (Heb. 2:14). Tiku natamapakgsinankgo Cristo namakgtayakgo xlakata namasputukgo kKatiyatni xtalamakgasitsin Dios, xkamanan luwa (Apoc. 17:14; 20:4, 10). *

13. ¿La kinkamakgtayayan la kgantaxtu uma tuku xlichuwinankanit?

¹³ Komo wix tamakamastaninita Dios, chuna la kgantaxtuma uma tuku xlichuwinankanit makgtayaman kmilatamat. Jesús milh latama kKatiyatni la chatum chixku chu liwana limasiyalh xtayat xTlat (Juan 14:9). Xliʼakxilhtit kinkamakgtayanitan nalakgapasaw chu napaxkiyaw Jehová. Jesús na kinkalimakgtayanitan xtamasiy chu la pulalin congregación xalak kinkilhtamakujkan. Kinkamakgtayanitan nakgalhiyaw latamat nema makgapaxuwa Jehová. Chu asta la tsankxkitika Jesús, uma wamputun, xlinin, tlan kimputumkan litamakgtayayaw. Akxni lakastakwanalh, makamastalh xtapalh xkgalhni nema «kinkalimaskulunkiyan xliputum talakgalhin» (1 Juan 1:7).

14. ¿La katsiyaw pi tuku lichuwinalh Jehová anta kʼEdén ni tunkun xʼama kgantaxtu?

¹⁴ Tuku Jehová wa kʼEdén limasiyalh pi tuku xlichuwinankanit ni tunkun xʼama kgantaxtu. Xlakata puskat tlan xkgalhilh kam nema xlichuwinankanit xtalakaskin xtitaxtulh kilhtamaku, chu xlakata xlasitsinilh umakgolh akgtiy grupos xtalakaskin pi Akgskgawini xkamamakxtumilh kstalaninanin. Uma tuku xlichuwinankanit kinkamakgtayayan xlakata katsiyaw pi uma kakilhtamaku nema akgchipanit Satanás ni xʼama kaʼakxilhputun xlakskujnin Jehová. Titaxtulh akglhuwa kata, Jesús nachuna kawanilh kstalaninanin (Mar. 13:13; Juan 17:14). Xlikana pi akxilhnitaw la kgantaxtuma uma tuku xlichuwinankanit, liwaka uma 100 kata nema titaxtunit. ¿Tuku xlakata chuna wanaw?

15. 1) ¿Tuku xlakata kakilhtamaku lu kinkasitsiniyan? 2) ¿Tuku xlakata ni kilipekuanitkan Satanás?

¹⁵ Jesús Mapakgsina litaxtulh kkata 1914 chu ni makgas kilhtamaku tamakxtulh Satanás kʼakgapun. La uku Akgskgawini kajwatiya tlawa tuku nitlan kKatiyatni chu kgalhkgalhima namasputukan (Apoc. 12:9, 12). Pero ni kajwatiya kgalhkgalhiwi. Xatasitsi kaputsastalanima xkachikin Dios (Apoc. 12:13, 17). Wa xlakata la uku kakilhtamaku lu kinkasitsinikgoyan. Pero ni anan tuku xlakata napekuaniyaw Satanás chu tiku stalanikgo. Wata na nalakpuwanaw la apóstol Pablo, tiku tsokgli: «Komo Dios kinkamakgtayayan, ¿tiku nakinkatlajayan?» (Rom. 8:31). Tlan nalipawanaw Jehová xlakata, chuna la akxilhnitaw, tuku xlichuwinankanit kʼGénesis 3:15 kgantaxtumaja.

16-18. ¿La kamakgtayanit Curtis, Ursula chu Jessica chuna la akgatekgskgonit Génesis 3:15?

¹⁶ Tuku malaknunit Jehová kʼGénesis 3:15 kinkamakgtayayan natayaniyaw kaxatukawa taputsan nema natitaxtuyaw. Curtis, chatum tala tiku misionero kʼGuam, wan: «Minit kilhtamaku ktitaxtunit tuku tuwa kkilatamat chu uma tlawanit pi tuwa nakmakgkatsi naklimasiya komo ktataya Jehová o ni. Pero akxni  klilakpuwan tuku lichuwinan Génesis 3:15 kimakgtayanit chuntiya naklipawan kinTlat xalak akgapun». Curtis kgalhkgalhima pi kachilha uma kilhtamaku akxni Jehová namasputu kintaʼakglhuwitkan.

¹⁷ Chatum tala xalak Baviera (Alemania) tiku wanikan Ursula wan pi akgatekgskan Génesis 3:15 makgtayalh nakanajla pi Biblia wa xTachuwin Dios. Pulaktum tuku makgtayalh wa pi putum tuku lichuwinankanit tatalakxtumi tuku lichuwinan Génesis 3:15. Xla wan: «Lu tlan klimakgkatsilh akxni kkatsilh pi Jehová wi tuku lakapala tlawalh xlakata latamanin xkgalhikgolh takgalhkgalhin».

¹⁸ Jessica, chatum tala xalak Micronesia, wan: «Chuntiyaku klakapastaka akxni kkatsilh pi xaktekgsnit tuku xaxlikana. ¡Xkgantaxtuma tuku xlichuwinankanit kʼGénesis 3:15! Xlakata kʼakgatekgsli kimalakapastaka pi latamat nema kgalhiyaw la uku ni wa xaxlikana latamat. Chu uma tuku xlichuwinankanit kimakanajli pi skujnanikan Jehová kinkamaxkiyan tlan latamat chu tlakg xatlan nawan kkilhtamaku nema aku mima».

19. ¿Tuku xlakata katsiyaw pi nakgantaxtu xaʼawatiya tuku lichuwinan Génesis 3:15?

¹⁹ Chuna la akxilhnitawa, Génesis 3:15 kgantaxtuma. Liwana katsiyaw tiku xkamanan puskat chu xkamanan luwa. Jesús, tiku tlakg xlakaskinka xkam puskat, paksli la tsankxkitika chu la uku chatum Mapakgsina tiku nikxni katinilh chu litsama lilanka. Nachuna, nialh makgas natakgatsi la Jehová kalaksakma tiku natamapakgsinankgo xKgawasa kʼakgapun. Xlakata kgantaxtunita xapulana tuku xlichuwinankanit, liwana katsiyaw pi na nakgantaxtu xaʼawatiya tuku lichuwinan Génesis 3:15: ¡luwa naʼaktayamikan! Akxni namasputukan Satanás lu tlan namakgkatsikgo latamanin tiku ni makgxtakgkgo Jehová. Xlakata nina chin uma kilhtamaku, ni kataxlajwaniw. Talakaskin nalimasiyaniyaw kiDioskan pi lipawanaw. Xlakata xkam puskat nakasikulunatlawa «putum kachikinin xalak katiyatni» (Gén. 22:18).