1. მუ აკეთ იეჰოვაქ ადამ დო ევაშ შეცოდებაშ უკულ ხეთეშე? (დაბ. 3:15)

 ᲐᲓᲐᲛ დო ევაშ შეცოდებაშ უკულ ხეთეშე, იეჰოვაქ თქუ მნიშვნელოვან წინასწარმეტყველება, მუდგაშ საშვალებათ იმენდ ქიმეჩ თინეფიშ გამნარყის. თე წინასწარმეტყველება მოჩამილ რე დაბადებაშ 3:15-ის (წეკითხით).

2. მუშენ რე მნიშვნელოვან თე წინასწარმეტყველება?

² თე წინასწარმეტყველება ბიბლიაშ პირველ წიგნის რე მოჩამილ, მარა მუდგარენით ბიბლიაშ არძა წიგნ რე თიწკუმა დაკავშირებულ. მუჭოთ წიგნიშ არძა ფურცელს აკოჭოფუნს ძაფ, თეშ დაბადებაშ 3:15-ის მოჩამილ სიტყვეფ ბიბლიაშ არძა წიგნის აერთიანენს ართ აზრის: ღორონთ გუტენდჷ მარსხებელს, ნამუთ სატანას დო თიშ უბადო მიმაჸუნალეფს განადგურენდჷ. b მუშმადიდა კურთხევა იჸი თენა იეჰოვაშ მოჸოროფეეფშო!

3. მუს გუვარჩიენთ თე სტატიას?

³ თე სტატიას დაბადებაშ 3:15-იშ გურშენ სუმ კითხვას ქიმეფჩანთ პასუხის: მი რე თე წინასწარმეტყველებას მოშინაფილ, მუჭო ისრულებ თინა დო მუ ჯგირობუა მოუღ ჩქინდა?

4. მი რე „გვერ“ დო სოვრეშე მიჩქნა თენა?

⁴ დაბადებაშ 3:14, 15-ის მოშინაფილ რე „გვერ“, გვერიშ „გამნარყ“, „ოსურკოჩ“ დო ოსურკოჩიშ „გამნარყ“. ბიბლია  მოგებაფუანა, მი რენა თინეფ. c მორთ ქიდიბჭყათ გვერშე. ნამდვილ გვერს ვეშიალებედ ქიგეგკო, მუ თქუ იეჰოვაქ ედემიშ ბაღის. თაშ ნამდა, იეჰოვაშ განაჩენ ოხუდ მოაზროვნე ქმნილებას. მი რდჷ თენა? თეს გამოცხადებაშ 12:9 არგამათ მოძირანა. თინა იჩიებ, ნამდა „ჯვეშ გვერ“ სატანა ეშმაკ რე. მარა მი რე „გვერიშ გამნარყ“?

5. მი მიშურს გვერიშ გამნარყშა?

⁵ მინშა ბიბლია სიტყვა გამნარყის თინეფიშ მიმართ ირინუანს, მით თიცალ ზუსტას მეჸუნს შხვაშ აზროვნებაშ დო საქციელიშ მაგალითის, ნამდა შილებე თიშ სქუათ იჸუან მოშინაფილქ. თაშ ნამდა, გვერიშ გამნარყშა მიშულა თი სულიერ ქმნილებეფ დო უბადო ადამიანეფ, მით სატანაცალო ოწინააღმდეგნა ღორონთის დო თიშ ხალხის. თინეფ შქას რენა თი ანგელოზეფ, მიდგაქ ნოეშ დროს მუნეფიშ დანიშნულება ქიდიტუეს დო თი უბადო ადამიანეფ ხოლო, მით მუნეფიშ მუმა ეშმაკცალო იქციებნა (დაბ. 6:1, 2; იოან. 8:44; 1 იოან. 5:19; იუდ. 6).

6. მუშენ ვეჸუაფუდ წინასწარმეტყველებას მოშინაფილ ოსურკოჩ ევა?

⁶ ასე გუვარჩუათ, მი რე ოსურკოჩ. თინა ვეჸუაფუდ ევა. ქობძირათ თეშ ართ-ართ მიზეზ. წინასწარმეტყველება იჩიებ, ნამდა ოსურკოჩიშ გამნარყ დუდის აკუჭყანჭყუნდჷ გვერს. მუჭოთ უკვე გუვარჩით, გვერ რე სულიერ ქმნილება — სატანა. ევაშ არასრულყოფილ გამნარყშე ნამთინს ვეშიალებე დუდ აკუჭყანჭყას თის. თეშო მუდგარენ შხვა რდჷ საჭირო.

7. მუჭოთ გამოცხადებაშ 12:1, 2, 5, 10-შე ვორწყეთ, მი რე დაბადებაშ 3:15-ის მოშინაფილ ოსურკოჩ?

⁷ ბიბლიაშ ბოლო წიგნ მოგებაფუანა,  მი იგულისხმებ დაბადებაშ 3:15-ის მოშინაფილ ოსურკოჩის (წეკითხით გამოცხადებაშ 12:1, 2, 5, 10). თინა ვა რე ჩვეულებრივ ოსურკოჩ. თიშ კუჩხეფწკუმა თუთა რე დო დუდის 12 მურიცხშე კეთებულ გვირგვინ გუმადგჷ. თინა ეიორჩქინანს ბაღანას, ნამუთ ჩვეულებრივ ვა რე — ღორონთიშ სამეფოს. თენა ზეციერ სამეფო რე. გიშურს, ნამდა ოსურკოჩ ხოლო ზეცას რე. თინა რე იეჰოვაშ ორგანიზაციაშ ზეციერ ნაწილ, ნამუთ ართგურ ანგელოზეფშე შითმოდირთუ (გალ. 4:26).

8. მი რე ოსურკოჩიშ გამნარყიშ მთავარ ნაწილ დო მუჟამიშ უკულ? (დაბ. 22:15—18)

⁸ ბიბლია თიშ გაგებას ხოლო მოხვარნა, მი რე ოსურკოჩიშ გამნარყიშ მთავარ ნაწილ. თინა ოკო ჸოფედკო აბრაამიშ საგვარეულო ხაზშე (წეკითხით დაბადებაშ 22:15—18). მუჭოთ წინასწარმეტყველება იჩიებუდ, იესო თე ართგურ პატრიარქიშ პირდაპირ გამნარყ რდჷ (ლუკ. 3:23, 34). მარა თე გამნარყის ჩვეულებრივ ადამიანშე უმოს ძალა ოკო უღუდკო, ნამდა განადგურკო სატანა ეშმაკ. თაშ ნამდა, მუჟამსით იესო სოდგარენ 30 წანერ რდჷ, თიქ წმინდა შურით იჸუ ცხებულქ, მუჭოთ ღორონთიშ სქუა. თე ცხებათ თიქ ოსურკოჩიშ გამნარყიშ მთავარ ნაწილო გინირთჷ (გალ. 3:16). ღურაშ დო გათელებაშ უკულ, ღორონთიქ თის „დიდებაშ დო პატიშ გვირგვინ ქიგედგჷ“ დო ქიმეჩ „მთელ ძალაუფლება ზეცას დო დედამიწას“, თინეფ შქას ძალაუფლება, ნამდა მოსპას „ეშმაკიშ საქმეეფ“ (ებრ. 2:7; მათ. 28:18; 1 იოან. 3:8).

9, 10. ხოლო მი მიშურს ოსურკოჩიშ გამნარყშა დო მუჟამ გინირთეს თინეფქ თიშ ნაწილო? ბ) მუს გუვარჩიენთ?

⁹ მარა იესოშ გარდა, შხვეფ ხოლო გინირთუდეს თე გამნარყიშ ნაწილო. მოციქულ პავლექ ქაძირუ, მი იჸუაფდეს თინეფ, მუჟამსით იუდეველ დო უცხოტომელ ცხებულ ქრისტიანეფს თეცალ სიტყვეფ მეჭარ: „ქრისტეშ ქორეთ-და, მართალო აბრაამიშ გამნარყ რეთ დო, მუჭოთ დუნაპირებ რე, მემკვიდრეეფ“ (გალ. 3:28, 29). მუჟამსით იეჰოვა ქრისტიანს წმინდა შურით ცხებულო გინაშქვანს, თი პიროვნება ოსურკოჩიშ გამნარყიშ ნაწილო გინირთუ. თაშ ნამდა, გამნარყშა მიშურს იესო ქრისტე დო თიშ 144 000 თანამართველ (გამოცხ. 14:1). თინეფ არძა ოცადნა, მიაჸუნან მუნეფიშ მუმაშ, იეჰოვაშ, მაგალითის.

¹⁰ უკვე ქიგებგით, მიშ გურშენ მეურს ჩიება დაბადებაშ 3:15-ის. ასე გუვარჩუათ, მუჭო ასრულენს იეჰოვა ჭიე-ჭიეთ თე წინასწარმეტყველებას დო მუ ჯგირობუა მოუღ თის ჩქინდა.

11. მუ იგულისხმებუდ ოსურკოჩიშ გამნარყიშ ქურშა ჩამინს?

¹¹ დაბადებაშ 3:15-ის მოჩამილ წინასწარმეტყველებაშე იძირე, ნამდა გვერ ოსურკოჩიშ გამნარყის „ქურს ქაჩამუდ“. თე სიტყვეფქ შისრულ, მუჟამსით სატანაქ იუდეველეფ დო რომაელეფ გეიახნარ დო დაჸვილაფუ ღორონთიშ სქუა (ლუკ. 23:13, 20—24). მუჭოთ ქურიშ წყუნაფაშ უკულ ჭიჭე ხანს ადამიანს ვეშულებ ვარდა უჭირს გილულა, თეშნერო იესო ხოლო ღურაშ უკულ სუმ დღას უმოქმედოთ რდჷ (მათ. 16:21).

12. მუჭო დო მუჟამ ეკიჭყანჭყუ გვერიშ დუდ?

¹² დაბადებაშ 3:15-ის მოჩამილ წინასწარმეტყველებაქ შისრულკონ, იესოქ ოკო გეთელკო, მუშენდა, მუჭოთ თექ ჭარჷ, გამნარყ დუდის აკუჭყანჭყუნდჷ გვერს. თაშ ნამდა, იესოს ოკო დუსქიდკო ნაჩამნაქ. თექ ქოთ თაშ ქუმოხვად — ღურაშე მასმა დღას იესოქ გეთელ, მუჭოთ უკვდავ სულიერ პიროვნებაქ. ღორონთიშ დანიშნულ დროს თინა განადგურენს  სატანას (ებრ. 2:14). ქრისტე დო თიშ თანამართველეფ დედამიწას გოწიმინდანა ღორონთიშ ნტერეფშე, გვერიშ გამნარყშე (გამოცხ. 17:14; 20:4, 10). d

13. მუ ჯგირობუა მოუღ ჩქინდა თე წინასწარმეტყველებაშ შესრულებას?

¹³ იეჰოვაშ მეძღვინელ მსახურ ქორეთ-და, თე წინასწარმეტყველებაშ შესრულება ჯგირობუას მოიღანა. მუჟამსით იესო დედამიწას ცხოვრენდჷ, სრულყოფილო მეჸუნდჷ ზეციერ მუმაშ მაგალითის (იოან. 14:9). იესოშ გურშენ მეტიშ გაგებათ გეფჩინებაფეთ დო ქიპჸოროფეთ იეჰოვა; ჩქინდა ჯგირობუა მოუღ იესოშ გურაფეფს დო თის, ნამდა თინა ხემძღვანელენს ქრისტიანულ კრებას; იესო თის ხოლო მოგურუანა, მუჭო იფცხოვრათ, ნამდა მიღდან იეჰოვაშ მოწონა; თეს გეძინელ, იესოშ ღურას, შხვანერო ქოფთქუათინ, თიშ ქურშა ჩამინს, არძაშა ჯგირობუა მოუღ. მუჟამსით იესოქ გეთელ, მუშ ზისხირით გეგნიგ სრულყოფილ მსხვერპლ, მუდგათ „ირნერ ცოდვაშე მასუფთენა“ (1 იოან. 1:7).

14. ოკო ელუდკონიო კაცობრიობა, ნამდა წინასწარმეტყველება ედემიშ ბაღის ხეთე შისრულებუდ? გენწყით.

¹⁴ ედემიშ ბაღის რაგადებულ იეჰოვაშ წინასწარმეტყველებაშე იძირედ, ნამდა თე სიტყვეფ თიმ დროს ვეშისრულებუდ. დრო რდჷ საჭირო, ნამდა ოსურკოჩიქ გეიორჩქინკო დუნაპირებ გამნარყ, ეშმაკიქ აკოშაყარუკო მუშ მიმაჸუნალეფ დო გორჩქინდკო ნტერალაქ თე ჟირ ჯგუფ შქას. თე წინასწარმეტყველებაშ რჩქინას ჩქინდა ჯგირობუა მოუღ, მუშენდა თინა მაფრთხილენა, ნამდა ქვეყნიერება, ნამდგას სატანა მართუნს, გიჯოგუანს ღორონთიშ მსახურეფს (მარ. 13:13; იოან. 17:14). ჩქინ თოლო ვორწყეთ წინასწარმეტყველებაშ თე ნაწილიშ შესრულებას, განსაკუთრებულო ბოლო ოშ წანაშ დინახალე.

15. მუშენ ბჯოგუთ ქვეყნიერებას უმოსო დო მუშენ ვა მიღნა სატანაშ მიმართ შიშიშ მიზეზ?

¹⁵ თიშ უკულ ხეთეშე, მუთ იესოქ 1914 წანას მესიანურ სამეფოშ მეფეთ დენიშნჷ, სატანაქ ზეცაშე იჸუ გითოჸოთამილქ. თის ასე ხვალე დედამიწას შეულებ იმოქმედას დო ელჷ მუშ განადგურებაშ დღას (გამოცხ. 12:9, 12). მარა თინა ართ წუთის ვადინუანს. სატანა მანგარ გაჟღამებულ დო უიმენდო მდგომარეობას რე. თინა ღორონთიშ ხალხის გინანქირუანს გურს. ათეშ გურშენ ქვეყნიერებას ღორონთიშ ხალხ უმოსო დო უმოსო ჯოგჷ, მარა მუთუნნერ მიზეზ ვა მიღნა მოშქურდან სატანაშა დო თიშ მიმაჸუნალეფშა. პავლე მოციქულცალო ჩქი ხოლო ბჯერა: „ღორონთ ჩქინ მხარეს ქორენ-და, მის მუ აქიმნე ჩქინ წინააღმდეგ?!“ (რომ. 8:31). შემლებნა სრულას ვენდათ იეჰოვას, მუშენდა, მუჭოთ ბძირით, დაბადებაშ 3:15-ის მოჩამილ წინასწარმეტყველებაშ დიდ ნაწილქ უკვე შისრულ.

16—18. მუ ჯგირობუა მოუღ კურტის, ურსულა დო ჯესიკას დაბადებაშ 3:15-იშ ენონჭაფაქ?

¹⁶ დაბადებაშ 3:15-ის ენოჭარილ იეჰოვაშ დუნაპირებუს შეულებ მიმეხვარან, გაურზათ ნებისმიერ განსაცდელს. კურტის, ნამუთ გუამს მისიონერო მსახურენს, იჩიებ: „მინშა სირთულეეფს ფხვადუდ დო გურ მიტირხუდ, მუთ გიმოცადუნდჷ იეჰოვაშ მიმართ ჩქიმ ართგურობას, მარა დაბადებაშ 3:15-ის ენოჭარილ წინასწარმეტყველებაშა ჯგირო დაფიქრებაქ მიმეხვარ, ვამდინუაფუდკო ზეციერ მუმაშ ნდობა“. კურტის მთელ გურით ელჷ თი დღას, მუჟამ ჩამთხინუანა იეჰოვა არძა ჩქინ განსაცდელს.

 ¹⁷ ბავარიას მახორუ და ურსულას დაბადებაშ 3:15-ის ენოჭარილ წინასწარმეტყველებაშ ენონჭაფაქ მეხვარ, დერწმუნკო, ნამდა ბიბლია ღორონთშე რე შთაგონებულ. თიშა მანგარო იმოქმედ თიშ ძირაფაქ, მუჭო რე დაკავშირებულ თე წინასწარმეტყველებაწკუმა შხვა წინასწარმეტყველებეფ. თინა იჩიებ: „ჩქიმ გურს მანგარო შეხუ თიშ გაგებაქ, მუჭო იმოქმედ იეჰოვაქ ხეთეშე, ნამდა კაცობრიობაქ უიმენდოთ ვა დოსქიდკო“.

¹⁸ ჯესიკა, ნამუთ მიკრონეზიას ცხოვრენს, იჩიებ: „ასე ხოლო ფშჷ, მუს ბგინაფლენდჷ, მუჟამსით ქიმეფხვად, ნამდა ჭეშმარიტებას ქიმვოგორე. დებრწმუნ, ნამდა დაბადებაშ 3:15-ის ენოჭარილ წინასწარმეტყველება ისრულებუდ. თენა მოხვარ ირიათო ფშუდას: ჩქინ ამდღანერ ცხოვრება ვა რე თინა, მუთ ღორონთის ჩქინო აფუდ განზრახულ. თექ თიშა ხოლო დუმარწმუნ, ნამდა იეჰოვაშ მსახურებას არძაშ უმოს აზრიან ცხოვრება მოუღ ამდღა დო მომავალს — ბრელით უჯგუშ“.

19. მუშენ შემლებნა ვორდათ დარწმუნებულ, ნამდა წინასწარმეტყველებაშ ბოლო ნაწილ შისრულებ?

¹⁹ მუჭოთ უკვე ბძირით, დაბადებაშ 3:15-ის ენოჭარილ წინასწარმეტყველება ამდღა ისრულებ. ქიგებგით, მი რე ოსურკოჩიშ გამნარყ დო მი — გვერიშ. იესოქ, ნამუთ ოსურკოჩიშ გამნარყიშ მთავარ ნაწილ რე, უკვე დისქილიდუ წყუნაფილ ქურ დო ასე ძალიერ, უკვდავ მეფე რე. თე გამნარყიშ შხვა ნაწილიშ გიშაგორუა მალას ითებ. წინასწარმეტყველებაშ პირველ ნაწილიშ შესრულებაშ უკულ ირნერ მიზეზ მიღნა, ბჯერდან, ნამდა თიშ ბოლო ნაწილ ხოლო — გვერიშ დუდიშ აკოჭყანჭყუა — ნამდვილო შისრულებ. სატანაშ განადგურება ართგურ ადამიანეფს შურს მოუდგუნს. თეიშახ მტკიცას ქიგედირთით; ჩქინ ღორონთ საიმენდო რე! ოსურკოჩიშ გამნარყიშ საშვალებათ, თინა ანაყუ კურთხევას მოუღანს მთელ დედამიწას (დაბ. 22:18).