1. Ino raha nataony Jehovah, Adama ndreky Eva koa fa nanota? (Genesisy 3:15)

 ADAMA ndreky Eva koa fa nanota, nisy raha tsara nampan̈antin̈ainy Jehovah taranakandro. Amy Genesisy 3:15 ahitan̈a faminanian̈a miavaka io.​—Vakia.

2. Ino ma ten̈a mampiavaka faminanian̈a io?

² Amy boky voanalohany amy Baiboly ao misy faminanian̈a io. Ndray zen̈y, faminanian̈a hafa jiaby amy Baiboly ao misy ifandraisany amizio aby. Miran̈a taretry mampitambatra pazy jiaby amy boky araiky in̈y raha koran̈iny Genesisy 3:15, fotony izio mampitambatra raha koran̈iny boky tsiaraikiaraiky amy Baiboly ao, hanjary hafatra araiky fo. Koran̈inizio fa Jehovah han̈iraka olo araiky han̈avotro olombelon̈o, avio olo pan̈avotro io handripaka Devoly ndreky olo ratsy fan̈ahy jiaby man̈araka izy. * Fa lan̈iany olo tia Jehovah ndraiky hahita hatsaran̈a baka amizio.

3. Ino ma raha hidinihintsika ato?

³ Handiniky faminanian̈a amy Genesisy 3:15 atsika ato. Ke hivaliantsika fan̈ontanian̈a aby ty: Mikoran̈a momba azovy aby ma faminanian̈a io? Akory hampatanteraka izio? Avio ino hatsaran̈a ho azontsika baka amizio?

4. Azovy “bibilava” io, avio akory ahaizantsika zen̈y?

⁴ Genesisy 3:14, 15 io mikoran̈a momba “bibilava” araiky ndreky “taranakanany”, avio momba “man̈angy” araiky ndreky “taranakanany.” Efa Baiboly edy man̈ampy atsika hahay manôndro azovy iro io. * Anombohantsika izy, alô zahavantsika  azovy “bibilava” io. Izio tsy bibilava arabakiteny. Nan̈ino? Fotony bibilava arabakiteny tsy mety nahay dikany raha nikoran̈iny Jehovah tamy zaridain̈y Edena in̈y. Dikanizen̈y, didipitsaran̈any Jehovah tamy bibilava in̈y mandeha amy zavaboary araiky mahay mandiniky. Azovy izio? Koran̈iny Apokalypsy 12:9 mazava tsarabe fa Satana Devoly “bibilava araiky tamy voanalohany tan̈y in̈y.” Ke azovy fo basy taranakany bibilava io?

5. Azovy ma taranakany bibilava io?

⁵ Baiboly koa fa mikoran̈a momba taranaka an̈ohatra, izio ivolan̈ana olo mangala tahaka toetry na toetsain̈y na raha fataony baba araiky an̈ohatra. Ke kahian̈a taranakany bibilava io anjely nivadiky ndreky olombelon̈o manohitry Jehovah Zan̈ahary ndreky vahoakanany. An̈isanizen̈y iro anjely niala asa nan̈irahan̈a iro tandan̈itry tan̈y taminy andrany Noa in̈y, ndreky olo ratsy fan̈ahy mangala tahaka Devoly babandro.​—Gen. 6:1, 2; Jaona 8:44; 1 Jaona 5:19; Joda 6.

6. Nan̈ino ma atsika mivolan̈a fa tsy manôndro i Eva “man̈angy” io?

⁶ Atsika iziô ndraiky hizaha azovy “man̈angy” io. Izio tsy i Eva. Nan̈ino ma atsika mivolan̈a zen̈y? Alô atsika handiniky antony araiky. Koran̈iny faminanian̈a io fa taranakany man̈angy io ‘hanôrotôro’ lohany bibilava io. Efa haintsika fa manôndro anjely ratsy i bibilava io, tsy azovy zen̈y fa Satana. Fa ty fan̈ontanian̈a mipetraka: Vitanolombelon̈o tsy lavorary taranakany Eva ma hanôrotôro Satana? Hay be fa tsy hahavita zen̈y iro.

7. Izikoa Apokalypsy 12:1, 2, 5, 10 zahan̈a, azovy man̈angy koran̈iny Genesisy 3:15?

⁷ Koran̈iny boky farany amy Baiboly ao azovy man̈angy nambarany Genesisy 3:15 io. (Vakia Apokalypsy 12:1, 2, 5, 10.) Man̈angy io tsy ambony tany eto, fotony misy fanjava amy vitinany, avio misy lakintan̈a 12 amy  satroboninahitry amy lohany. Somary hafa hely koa zanakanany, tsy azovy zen̈y fa Fanjakan̈any Zan̈ahary. Andan̈itry an̈y Fanjakan̈a io, ke tsy maintsy andan̈itry an̈y koa misy man̈angy io. Azovy amy zay man̈angy io? Izio tapany andan̈itry amy fandaminan̈any Jehovah, tsy azovy zen̈y fa iro anjely tsy mivadiky aby io.​—Gal. 4:26.

8. Azovy ma taranakany man̈angy io voanalohany, avio ombian̈a izy nanjary taranakany man̈angy io? (Genesisy 22:15-18)

⁸ Volan̈a Zan̈ahary man̈ampy atsika hahay azovy marin̈y taranakany man̈angy io voanalohany. Baka aminy Abrahama hiboahany taranaka io. (Vakia Genesisy 22:15-18.) Eraka raha efa nambarany faminanian̈a, Jesosy taranakany lelahy tsy mivadiky io. (Lioka 3:23, 34) Ndray zen̈y, karaha hafahafa izikoa olombelon̈o taranaka io, fotony izio handeha hanôrotôro Satana Devoly. Jesosy koa fa kadiriny 30 taon̈o, izy nisôriny Zan̈ahary fan̈ahy masin̈y, ke nanjary Zanaka Zan̈ahary naterakany fan̈ahy. Tamy Jesosy voahosotro vo nanjary taranakany man̈angy io voanalohany. (Gal. 3:16) ‘Haja ndreky voninahitry satroko nasaron̈o’ Zan̈ahary tamy Jesosy, lera izy natsangany tamy maty. Ten̈a zen̈y ankitin̈y izy, fotony ‘namezany Jehovah izy fahifan̈a jiaby andan̈itry an̈y ndreky ambony tany eto’, an̈isanizen̈y fahifan̈a “handravan̈a asany Devoly.”​—Heb. 2:7; Mat. 28:18; 1 Jaona 3:8.

9-10. a) Azovy koa an̈isany taranakany man̈angy io, baka io ombian̈a iro vo manjary an̈isany taranaka io? b) Ino ndraiky raha hidinihintsika iziô?

⁹ Ankoatrany Jesosy, mbala misy olo hafa koa an̈isany taranaka io. Nikoran̈a momba iro io apostoly Paoly, taminizy nivolan̈a tamindro Kristianin̈y voahosotro jiosy ndreky hafa firenena aby io karaha ty: ‘Anaro koa niny Kristy, anaro taranaka Abrahama ankitin̈y, sady handova raha nampan̈antinain̈y.’ (Gal. 3:28, 29) Kristianin̈y araiky koa fa nifidìny Jehovah ho voahosotrony fan̈ahy masin̈y, komansy iô izy manjary an̈isany taranakany man̈angy io. Dikanizen̈y, Jesosy ndreky iro 144 000 hiaraka hanjaka aminany aby io izy taranakany man̈angy io. (Apok. 14:1) Miezaka iro baka fomba fisain̈anandro ndreky raha ataondro hitovy amy niny Jehovah.

¹⁰ Haintsika eky iziô azovy aby iro avoakoran̈a amy Genesisy 3:15. Fa iziô ndraiky, atsika hizaha akory nataony Jehovah beky faminanian̈a io tanteraka, baka io ino hatsaran̈a ho azontsika baka amy zen̈y.

11. Ino ma raha tiany faminanian̈a io havian̈a izikoa izy nivolan̈a fa niratraviny bibilava io hotrombitiny taranakany man̈angy io?

¹¹ Koran̈iny Genesisy 3:15 fa bibilava io handratra taranakany man̈angy io aminy “hotrombitinany.” Tanteraka raha zen̈y, Satana koa fa nampirisiky iro Jiosy ndreky iro Romanin̈y aby io hamono Zanaka Zan̈ahary. (Lioka 23:13, 20-24) Olo araiky koa misy bay aminy hotrombity, an̈atiny fotoan̈a hely fo izy mety tsy hahavita handeha, baka io izy efa janga edy. Karaha zen̈y koa, tsy nahavita raha i Jesosy tan̈atiny telo andra tiô, fotony izy naty, tampasan̈a tao.​—Mat. 16:21.

12. Akory ma hampatôrotôro lohany bibilava io, baka ombian̈a raha zen̈y ho tanteraka?

¹² Tsy tanteraka faminanian̈a amy Genesisy 3:15 io, izikoa Jesosy tsy nidôko tampasan̈a tao. Nan̈ino ma? Fotony faminanian̈a io nivolan̈a fa taranaka io handeha hanôrotôro lohany bibilava io. Dikanizen̈y, tokony ho janga antsendriky bay taminy hôtrombitinany. Zen̈y ankitin̈y raha nisy, fotony telo andra tafarany nifatesany, Jesosy nivilôminy Zan̈ahary, baka io nanjary anjely tsy mety maty. Amy fotoan̈a hitany Zan̈ahary fa  mety, Jesosy hanôrotôro i Satana. (Heb. 2:14) Kristy ndreky iro miaraka manjaka aminany aby io handeha handripaka fahavalony Zan̈ahary, tsy azovy zen̈y fa taranakany bibilava io.​—Apok. 17:14; 20:4, 10. *

13. Ino hatsaran̈a azontsika izikoa fa ho tanteraka faminanian̈a io?

¹³ Izikoa anao panompony Jehovah sady efa nanokanten̈a taminany, ho maro hatsaran̈a ho azonao izikoa fa ho tanteraka faminanian̈a io. Olombelon̈o i Jesosy taminizy navy tambony tany teto. Tsisy nihafa amy toetriny Babany toetrinany. (Jaona 14:9) Atsika koa fa mianatra raha momba izy, ho haintsika sady ho tiantsika koa Jehovah Zan̈ahary. Mahatsara atsika koa raha nampianariny Jesosy ndreky fomba itaritany fiangonan̈a kristianin̈y. An̈isany raha nampianariny atsika iziô, ino fomba fiain̈ana tokony hanan̈antsika beky Jehovah ho ravoravo amintsika. Mahazo hatsaran̈a koa atsika baka tamy nifatesany Jesosy, na izikoa atao amy volan̈a hafa, baka tamy Jesosy naratra taminy hotrombitinany in̈y. Taminizy nivilôminy Jehovah, izy nahavita nan̈efa tamy Jehovah vangany ain̈inany lavorary, beky atsika hadio ke ho afaka amy fahotan̈a jiaby.​—1 Jaona 1:7.

14. Akory ahaizantsika fa elaela vo ho tanteraka faminanian̈a nivolan̈iny Jehovah ta Edena in̈y?

¹⁴ Izikoa dinihin̈y volan̈any Jehovah tamy zaridain̈y Edena, faminanian̈a io tsy ho tanteraka betibety. Tsy maintsy ho elaela man̈angy io vo hanan̈a taranaka, avio tsy maintsy mila fotoan̈a koa Devoly vo hahavita hamory iro fanamany aby io. Tsy hifankahazo koa taranakany man̈angy io ndreky niny Devoly, ke zen̈y tsy ho vitany andra araiky. Nan̈ino mahatsara atsika mahay dikany faminanian̈a io? Fotony han̈ampy atsika han̈amboatra jery raha zen̈y. Haintsika baka fa tsy maintsy ho halanolo amy donia fiheziny Satana ty panompony Jehovah. Ary zen̈y edy raha efa nampitandreminy Jesosy iro pianatranany aby io tafara tatỳ. (Mar. 13:13; Jaona 17:14) Efa misy tanteraka faminanian̈a io, tan̈atiny 100 taon̈o tato, ary raha zen̈y hitantsika. Alô zahavantsika amy fomba akory.

15. Ino mahavy taranakany man̈angy io mahaihalany donia ty fo, kanefa nan̈ino atsika tsy tokony havozo Satana?

¹⁵ Tsy ela tafarany Jesosy nanjary Panjaka, taminy 1914, Satana niroasin̈y baka tandan̈itry tan̈y. (Apok. 12:9, 12) Izy iziô amy faritry man̈odidin̈y tany, miambin̈y fotoan̈a handripahan̈a izy. Ndray izy man̈ano zen̈y, Satana tsy mandandan̈a. Meloko mare izy salakady mitsapopa, ke ampariny amy vahoakany Jehovah helokonany. (Apok. 12:13, 17) Zen̈y mahavy atsika mahaihalany doniany Satana fo. Kanefa, tsisy raha tokony havozoantsika i Satana ndreky fanamany aby io. Ty raha atokisantsika karaha apostoly Paoly. Ho izy: ‘Izikoa Zan̈ahary man̈ampy atsika, azovy hahavita hanohitry atsika?’ (Rom. 8:31) Atsika mety matoky Jehovah amy fô jiaby, fotony erakany hitantsika tiô, ankamaraozany raha nambarany faminanian̈a amy Genesisy 3:15 io efa tanteraka.

16-18. Ino hatsaran̈a azony Curtis, Ursula, avio Jessica, izikoa fa nazava tamindro tsarabe raha koran̈iny Genesisy 3:15?

¹⁶ Fampan̈antinan̈any Jehovah amy Genesisy 3:15 io man̈ampy atsika hiatriky zay fitsapan̈a mandalo amintsika. Karaha ty nambarany Curtis, misionera a Guam: “Nisy raha sarotro mare nandalo tamy fiain̈ananaka, ke tsy nora taminaka tsy nivadiky tamy Jehovah. Kanefa, tsy nadosoko tamy jerinaka foeky faminanian̈a  koran̈iny Genesisy 3:15 io, ke zen̈y nan̈ampy zaho hatoky Babako andan̈itry an̈y.” Efa tsy din̈iny Curtis aviany fotoan̈a han̈adosoany Jehovah fitsapan̈a jiaby mahazo atsika.

¹⁷ Tsapany Ursula, ranabavy baka Bavière, fa ten̈a nahita hatsaran̈a izy izikoa fa nazava taminany raha volan̈iny Genesisy 3:15 io. Nanjary resy lahatra izy fa baka amy Zan̈ahary ankitin̈y Baiboly. Lany fan̈ahy izy fotony hitany fa mifandray aby faminanian̈a hafa jiaby. Ke karaha ty nambarany: “Tsy nirekireky foeky i Jehovah nan̈ano raha hanan̈antsika fan̈antinan̈a, ke lôso tiako mare izy.”

¹⁸ Jessica ndraiky mipetraka a Micronésie. Karaha ty ho izy: “Tsy mety adin̈ako raha tsapako tamy zaho nahita fahamarin̈ana. Tanteraka baka raha koran̈iny Genesisy 3:15 in̈y. Hitako baka amizio fa raha iain̈antsika izioty mbala tsy ten̈a fiain̈ana. Faminanian̈a io koa nan̈ampy zaho hatoky mare fa tsisy raha tsara mandilatra manompo Jehovah karaha ataoko amy zioty, ary mbala ho tsaratsaranizen̈y aminy hoavy.”

19. Nan̈ino ma atsika matoky fa ho tanteraka tapany farany amy faminanian̈a io?

¹⁹ Erakany efa hitantsika, Genesisy 3:15 io tsy tanteraka indraiky mipàka fa tsihelihely. Efa mazava amintsika iziô azovy taranakany man̈angy ndreky taranakany bibilava. Haintsika koa fa janga bay taminy hotrombitiny Jesosy, taranakany man̈angy io voanalohany. Iziô i Jesosy efa Panjaka be voninahitry sady tsy mety maty andan̈itry an̈y. Hely tavela, ho feno eky isakanolo hafa mahafôron̈o taranaka io. Efa tanteraka tapany voanalohany amy faminanian̈a io, ke matoky atsika fa mbala ho tanteraka koa tapany farany amizio. Tsy ino zen̈y fa fanorotoroan̈a lohany bibilava io. Ho ravoravo tsisy ambaka izy panompony Jehovah tsy mivadiky lera Satana tsy iô eky. Fa parpavianizen̈y, aza rivan̈a foeky, fotony atokisan̈a Jehovah Zan̈aharintsika io. Hitondra hatsaran̈a maro be ‘aminolo jiaby ambony tany eto’ i Jehovah, ke taranakany man̈angy io handeha hampiasainy han̈atanteraka raha zen̈y.​—Gen. 22:18.