1. ¿Xi biʼniʼ Jehová bichee si Adán ne Eva? (Génesis 3:15).

 DESPUÉ de bichee Adán ne Eva, bidii Jehová ti esperanza ca xiiñicabe lu ti profecía nabé risaca. Ca diidxaʼ ni guniʼbe ca zeeda ni lu Génesis 3:15 (biindaʼ ni).

2. ¿Xiñee nabé risaca profecía ni zeeda lu Génesis 3:15?

² Zeeda profecía riʼ lu primé libru stiʼ Biblia. Ne racané xcaadxi libru ni zeeda lu Biblia laanu guiénenu ni. Zeeda gaca profecía ni zeeda lu Génesis 3:15 casi resorte ni naaze guiráʼ yaza stiʼ ti cuadernu, purtiʼ racané ni chuʼ ca libru zeeda lu Biblia tobi si ne gapa ca ni ti mensaje si. ¿Xi mensaje ca yaʼ? Laani nga zuseendaʼ Dios tobi ni gulá ne gunitilú Binidxabaʼ ne ca binni zinanda laa. * ¡Guizáʼ sicarú mensaje riʼ para laanu, ca ni nadxiinu Jehová!

3. ¿Xi zazíʼdinu lu artículo riʼ?

³ Lu artículo riʼ zacábinu caadxi pregunta ni caníʼ de Génesis 3:15: ¿tuu nga ca ni riete lu profecía riʼ?, ¿ximodo cayaca cumplir ni? ne ¿ximodo racané ni laanu tiempu riʼ?

4. ¿Tuu nga beendaʼ ca, ne ximodo nánnanu ni?

⁴ Lu Génesis 3:14, 15 riete de ti «beendaʼ», «ni zá de beendaʼ ca», «ti gunaa» ne «ni zá de gunaa ca». Racané Biblia laanu gánnanu tu zeeda gácacabe. * Guininu tu zeeda gaca beendaʼ ca. Qué zanda diʼ gácani ti beendaʼ literal purtiʼ qué ñanda ñéneme ni guníʼ Jehová ndaaniʼ jardín de Edén. Napa xidé gaca ni tuuxa ni nuu xpiaaniʼ. Ne racané Biblia laanu gánnanu tu laabe. Apocalipsis 12:9 ná «beendaʼ yooxhoʼ» ca nga Diablu ne Binidxabaʼ. Yanna, ¿tuu nga ni zá de beendaʼ ca yaʼ?

5. ¿Tuu nga zeeda gaca ni zá de beendaʼ ca?

⁵ Ora ruzeeteʼ Biblia diidxaʼ «ni zá de» o descendencia, caniʼni de ca ni riníʼ ique ne runi ni runi bixhoze. Nga runi, ca ni zá de beedaʼ ca nácacabe ca ángel malu ne binni ni cucaalú Jehová ne xquidxi cásica cayuni Binidxabaʼ ni. Ládecabe nuu ca ángel ni bisaanaʼ xhiiñaʼ guibáʼ lu ca dxi stiʼ Noé ne ca binni malu ni cayuni casi cayuni Binidxabaʼ, bixhózecaʼ (Gén. 6:1, 2; Juan 8:44; 1 Juan 5:19; Jud. 6).

6. ¿Xiñee cadi Eva nga gunaa ni riete lu Génesis 3:15?

⁶ Guidúʼyanu tu zeeda gaca gunaa que. ¿Ñee laabe nga Eva la? Coʼ. Guiníʼ íquenu ndiʼ. Profecía que ná ni zá de gunaa ca zucaacheʼ ique beendaʼ que. Casi maʼ bidúʼyanu, beendaʼ que nga Binidxabaʼ. Nga runi, qué zanda gunitilú ti binni ni ruchee ni zá de Eva, Binidxabaʼ. Yanna, ¿ximodo guinitilú Binidxabaʼ yaʼ?

7. ¿Ximodo racané Apocalipsis 12:1, 2, 5, 10 laanu gánnanu tuu nga gunaa ni riete lu Génesis 3:15?

 ⁷ Últimu libru stiʼ Biblia cayabi laanu tuu nga gunaa ni riete lu Génesis 3:15 (biindaʼ Apocalipsis 12:1, 2, 5, 10). Cadi ti binni gunaa ca. Nexheʼ beeuʼ xhañeebe ne nuu ti corona de doce beleguí íquebe. Ne gúpabe ti hombrehuiiniʼ, laani nga Reinu stiʼ Dios. Cumu guibáʼ nuu Reinu riʼ la? gunaa ca laaca guibáʼ nuube. Laabe nga organización stiʼ Jehová ni nuu guibáʼ, ca ángel stiʼ ni qué rucheené laa (Gál. 4:26).

8. ¿Tuu nga binni risaca ni zá de gunaa ca, ne padxí beeda gácabe ni? (Génesis 22:15-18).

⁸ Racané Stiidxaʼ Dios laanu gánnanu tuu nga binni risaca ni zá de gunaa que. De ca xiiñiʼ Abrahán zaree ni zá de gunaa que (biindaʼ Génesis 22:15-18). Ne guca cumplir profecía riʼ luguiáʼ Jesús, purtiʼ zabe de Abrahán (Luc. 3:23, 34). Peru qué zanda gucaache ni zá de Abrahán riʼ ique Binidxabaʼ pa ti binni laabe. Nga runi, dxi napa Jesús biaʼ 30 iza, gulí Dios laa ne zaqué beeda gácacabe Xiiñiʼ Dios ni gulí né espíritu. Raqué nga beeda gácabe binni risaca ni zá de gunaa que (Gál. 3:16). Despué de guti Jesús ne biasa de lade gueʼtuʼ, biʼniʼ Dios «laabe nandxóʼ» ne bisisaca laabe, ne bidii laabe «guiráʼ xixé autoridad guibáʼ ne lu guidxilayú», ne pur autoridad stibe zanda gunitilube «guiráʼ ni cayuni Binidxabaʼ» (Heb. 2:7; Mat. 28:18; 1 Juan 3:8).

9, 10. a) ¿Turuʼ naca parte de ni zá de gunaa que, ne pora rácacabe ni? b) ¿Xi chiguidúʼyanu yanna?

⁹ Aparte de Jesús, nuu xcaadxi ni zá de gunaa ca. Apóstol Pablo guníʼ tu laacabe ora bicaa ra nuu ca ungidu judíu ne de xcaadxi nación: «Ne pa maʼ xpinni Cristu laatu la? dxandíʼ xiiñiʼ Abrahán laatu, ne zanda guicaatu herencia ni biʼniʼ prometer Dios Abrahán» (Gál. 3:28, 29). Ora ribí Jehová ti xpinni Cristu né espíritu santu, reeda gaca binni ca parte de ni zá de gunaa ca. Nga runi, ca ni zá de gunaa ca, laacabe nga Jesucristu ne 144,000 ni chiguni mandarné laabe (Apoc. 14:1). Guirácabe rúnicabe stipa guiníʼ íquecabe ne gúnicabe modo runi Jehová, Bixhózecabe.

¹⁰ Maʼ bidúʼyanu tuu nga ca ni riete lu Génesis 3:15. Yanna guidúʼyanu xi maʼ biʼniʼ Jehová para guni cumplir ca ni maʼ guníʼ, ne despué zadúʼyanu ximodo racané profecía riʼ laanu tiempu riʼ.

11. ¿Ximodo gucaná xatini ñee ni zá de gunaa que?

¹¹ Génesis 3:15 ná zuniná beendaʼ que xatini ñee ni zá de gunaa ca. Guca cumplir ni dxi bicaa Binidxabaʼ ca judíu ne ca romanu guuticaʼ Xiiñiʼ Dios (Luc. 23:13, 20-24). Ora gacaná xatini ñee tuuxa zándaca gaca nagana para laa saʼ ti tiempu. Zaqueca bizaaca Jesús, ra gútibe, qué ñanda ñúnibe gastiʼ purtiʼ guyuube chonna gubidxa ndaaniʼ baʼ (Mat. 16:21).

12. ¿Padxí ne ximodo zagaache ique beendaʼ que?

¹² Para gaca cumplir Génesis 3:15, cadi naquiiñeʼ guiaana Jesús ndaaniʼ baʼ purtiʼ profecía que ná ni zá de gunaa que zucaache ique beendaʼ que. Ngue runi, ra bizaa chonna gubidxa de guti Jesús, biásabe né ti cuerpu de espíritu. Zaqué nga casi ñaca bianda  xatini ñeebe. Ne ora guedandá dxi maʼ gudixhe Dios, zuxhatañeebe Binidxabaʼ ne zunitilube laa (Heb. 2:14). Ca ni guni mandarné Cristu zacanecaʼ laabe guiá Guidxilayú ra cueecaʼ ca enemigu stiʼ Dios, ca ni zá de beendaʼ ca (Apoc. 17:14; 20:4, 10). *

13. Ra cayaca cumplir profecía stiʼ Génesis 3:15, ¿ximodo cayacaneni laanu?

¹³ Pa nácaluʼ ti xpinni Dios ni maʼ guca dedicar, cayacané profecía riʼ lii lu xquendanabániluʼ. Beeda Jesús lu Guidxilayú casi binni ne bisihuinni ximodo naca Bixhoze (Juan 14:9). Ejemplu bisaanabe, cayacané ni laanu gunibiaʼnu ne gannaxhiinu Jehová. Ne laaca cayacané Jesús laanu né ca ni maʼ bisiidiʼ ne modo cayuni dirigir xquidxi Dios tiempu riʼ. Maʼ bisiidibe laanu ximodo guibáninu para gusiéchenu Jehová. Ne ra gútibe pur laanu, zanda cueendunu ni galán. Dxi biásabe de lade gueʼtuʼ, bidiibe rini stibe casi ti sacrificiu perfectu para guiá «guiráʼ pecadu stinu» (1 Juan 1:7).

14. ¿Ximodo nánnanu cadi nagueenda zaca cumplir profecía ni guníʼ Jehová ndaaniʼ jardín de Edén que?

¹⁴ Qué niníʼ diʼ Jehová zaca cumplir profecía riʼ nagueenda. Napa xidé tidiʼ tiempu para guihuinni tuu nga ni zá de gunaa que, gucaalisaa Binidxabaʼ ca xpinni ne zacá chuʼ guendaridinde lu guiropaʼ grupu riʼ. Racané ndiʼ laanu gatananu purtiʼ cucaa Binidxabaʼ binni guidxilayú gacananaláʼdxicaʼ ca xpinni Jehová. Gudiʼdi si tiempu, ngaca gudxi Jesús ca discípulo stiʼ (Mar. 13:13; Juan 17:14). Maʼ cadúʼyanu cayaca cumplir parte de profecía riʼ, jmaruʼ si lu ti gayuaa iza ni maʼ gudiʼdiʼ ca. ¿Ximodo nánnanu ni yaʼ?

15. a) ¿Xiñee jma nanalaʼdxiʼ binni laanu tiempu riʼ? b) ¿Xiñee cadi naquiiñeʼ guidxíbinu Binidxabaʼ?

¹⁵ Guca si Jesús Rey lu iza 1914, guládxibe Binidxabaʼ de guibáʼ. Yanna maʼ lu Guidxilayú si nga randa runi Binidxabaʼ ni ná, ne cabézabe dxi guinitilube (Apoc. 12:9, 12). Peru laga cabézabe dxi ca, cadxiichibe ne cucaalube xquidxi Dios (Apoc. 12:13, 17). Nga runi, jmaruʼ si nanalaʼdxiʼ binni xquidxi Dios tiempu riʼ. Peru cadi naquiiñeʼ diʼ guidxíbinu Binidxabaʼ ne ca xpinni. Naquiiñeʼ chuʼnu seguru casi guyuu apóstol Pablo, ora bicaa: «Pa nuu Dios pur laanu, ¿tu zanda gucaalú laanu yaʼ?» (Rom. 8:31). Zanda gápanu confianza Jehová purtiʼ casi maʼ bidúʼyanu, stale de ca cosa ni riete lu profecía stiʼ Génesis 3:15 maʼ guca cumplir ca ni.

16-18. Ra biene Curtis, Ursula ne Jessica Génesis 3:15, ¿ximodo gucané ni laacaʼ?

¹⁶ Promesa guníʼ Jehová lu Génesis 3:15 racané ni laanu gudxíʼlunu intiica guendanagana guidxaagalunu. Curtis, ti hermanu ni nabeza ndaaniʼ guidxi Guam, guníʼ: «Huayapaʼ guendanagana ni rucaa naa gulueeʼ pa dxandíʼ nadxieeʼ Jehová. Peru ora riníʼ iqueʼ ni ná profecía stiʼ Génesis 3:15 racané ni naa gapaʼ confianza Bixhozeʼ ni nuu guibáʼ». Guizáʼ maʼ racalaʼdxiʼ Curtis guedandá dxi cuee Jehová guiráʼ guendanagana stinu.

 ¹⁷ Ti hermana láʼ Ursula de guidxi Baviera (Alemania) guníʼ ra biene Génesis 3:15 gucané ni laa guni cré dxandíʼ Biblia nga Stiidxaʼ Dios. Ti cosa ni bidxagayaa Ursula nga tobi si naca ca profecía ni zeeda ndaaniʼ Biblia né Génesis 3:15. Sicaríʼ guniʼbe: «Jmaruʼ si gunnaxhieeʼ Jehová ora biziideʼ nagueenda ca bíʼnibe xiixa para gulabe binni».

¹⁸ Jessica, ti hermana de guidxi Micronesia, guníʼ: «De yanna rietenaladxeʼ xi bineʼ sentir ora biziideʼ ni dxandíʼ rusiidiʼ Biblia. ¡Bidieeʼ cuenta cayaca cumplir profecía stiʼ Génesis 3:15! Ra bieneʼ ni bidieeʼ cuenta cadi sicaríʼ diʼ nga gucalaʼdxiʼ Jehová nibani binni. Racané profecía riʼ naa gannaʼ pa qué gusaana de gúninu ni ná Jehová zacanebe laanu guibáninu galán yanna, ne lu ca dxi ni zeeda ca zudiibe laanu ti guendanabani jma galán».

19. ¿Xiñee nuunu seguru zaca cumplir últimu parte stiʼ profecía ni zeeda lu Génesis 3:15?

¹⁹ Casi maʼ bidúʼyanu, maʼ cayaca cumplir Génesis 3:15. Yanna maʼ nánnanu tuu nga zá de gunaa ca ne tuu nga zá de beendaʼ ca. Jesús nga binni jma risaca ni zá de gunaa ca, maʼ bianda ra gucaná xatini ñeebe ne yanna maʼ nácabe ti Rey ni nandxóʼ ne ni qué zati. Laaca mayaca guizaa ca binni ni chiguni mandarné Jesús, ne laaca nácacaʼ parte de ni zá de gunaa ca. Cumu maʼ guca cumplir primé parte stiʼ profecía riʼ la? nannadxíchinu zaca cumplir sti parte ca ne laani nga ra igaache ique beendaʼ que. Ora guinitilú Binidxabaʼ guizáʼ ziecheʼ ca binni ni ruzuubaʼ stiidxaʼ Dios. Nga runi, laga cabézanu guedandá dxi ca, cadi guireʼnu gana ne gápanu confianza Dios stinu. Pur ni zá de gunaa ca, zacaa «guiráʼ guidxi ni nuu lu guidxilayú» stale ndaayaʼ (Gén. 22:18).