1. Мӱргӱйтен аргага кандый кӧрӱмдӱ болор керек?

 БИСКЕ Иегова Кудайга, јер-телекейдиҥ Јайаачызына, мӱргӱйтен јаан кӱндӱ берилген. Оныҥ учун бис ого кандый ла ӧйдӧ, кандый ла тилге, озодо куучындашпаганыс та болзоос, јӱрегисте не барын ӱзе куучындап турар аргалу. Керек дезе бис больницада да болзоос, тӱрмеде де болзоос, ол бистиҥ мӱргӱӱлисти угат. Бис мындый сӱреен јакшы сый учун Кудайыска јаан быйанду.

2. Давид каан мӱргӱӱлди баалап турганын канайып кӧргӱскен?

² Давид каан мӱргӱйтен арганы сӱреен тыҥ баалаган. Ол чӱмдеген сарынында Иеговага мынайып кожоҥдогон: «Мениҥ мӱргӱӱлим сениҥ алдыҥа белетеп койгон фимиамдый болзын» (Сар. 141:1, 2). Давидтиҥ ӧйинде абыстар Кудайдыҥ агару ижинде фимиамды јазап туруп белетеп туратан (Чыг. 30:34, 35). Давид фимиам керегинде тегиндӱ айтпаган. Ол мӱргӱӱрдеҥ озо нени айдарын јазап шӱӱп сананган болор. Бис Давид ле чилеп мӱргӱӱрге кӱӱнзейдис. Анайда ок бистиҥ кажыбыстыҥ ла мӱргӱӱлис Кудайга јарап турзын деп сананадыс.

3. Бис мӱргӱп турзаас, Иеговага канайып баштанарыс, нениҥ учун?

³ Кудайга мӱргӱген тужыста, бодоп ло анаар-мынаар мӱргӱбей јадыс. Бис Иегованы тереҥ тооп, ого тоомјылу баштанар учурлу. Агару Бичикте Исайя, Иезекииль, Даниил ле Иоанн кандый кӧрӱлтелер кӧргӧнин эске алып ийектер. Бу кӧрӱлтелер башка-башка да болгон болзо, је олордо бир тӱҥей неме бар. Олордыҥ кӧрӱлтелериниҥ кажызында ла Иегова ширееде отурган улу Каан деп кӧрӱлген. Темдектезе, Исайя Иегованы «бийик ширееде отурган» деп кӧргӧн (Иса. 6:1—3).  Иезекиильдиҥ кӧрӱлтезинде Иегова бойыныҥ абразында отурган ла «оны айландыра солоҥыдый јаркын болгон» деп кӧрӱнген (Иез. 1:26—28). Даниилге дезе «Кӱндериле јебрен» кӧрӱнген. Оныҥ кийими ак, «отурган ширеези јалбырап кӱйген оттый» болгон (Дан. 7:9, 10). Иоанныҥ кӧргӧн кӧрӱлтезинде, Иегова ширеезинде отурган, «ширеени эбире солоҥы смарагд [изумруд] таш чылап мызылдаган» (Ачыл. 4:2—4). Иегованыҥ мындый улу магына кем де тӱҥейлежип болбос! Мыны шӱӱп сананзаас, мӱргӱйтен сый учун Иеговага оноҥ јаан быйанду болорыс. Анайда ок Иеговага баштанып јатсаас, тоомјылу эдип мӱргӱйтенин ундыбазыс. Је не керегинде мӱргӱӱр керек?

4. «Теҥеридеги Адабыс» деген мӱргӱӱлдиҥ баштапкы сӧстӧринеҥ бис неге ӱренедис? (Матфей 6:9, 10).

⁴ Матфей 6:9, 10 кычырыгар. Иисус Кырдагы куучынында ӱренчиктерин мӱргӱӱрге ӱреткен. Анайда ок олордыҥ мӱргӱӱли Кудайга јарап турзын деп, нени эдерин јартап берген. Оноҥ ол «мынайып мӱргигер» деген сӧстиҥ кийнинеҥ Кудайдыҥ амадузына не кирип турганын кӧргӱскен: Кудайдыҥ адын агарулаарын, Кудайдыҥ ӧштӱлерин јоголтотон Каандыктыҥ келерин, албатыны келер ӧйдӧ кандый алкыш сакып јатканын. Бис мыны ундыбай турзаас, Кудайдыҥ кӱӱн-таабын баалап турган болорыс.

5. Иегова бистиҥ бойыска керектӱ немени сураганысты угар ба?

⁵ Оныҥ кийнинде Иисус бойыска керектӱзин сураарында бир де јаман неме јок деп кӧргӱскен. Бис Иегованаҥ бӱгӱнги јийтен курсак сурайдыс ла јаманысты таштазын деп сурап јадыс. Анайда ок ченелтеге кирбеске ле Дьяволдоҥ корулазын деп, болуш сурайдыс (Матф. 6:11—13). Мынайып сураганыстаҥ Иегованыҥ болужы јогынаҥ јӱрӱп болбозысты ла оноҥ јараду аларга турганысты кӧргӱзедис.

6. Бис Иисустыҥ кӧргӱзӱ мӱргӱӱлинде нени айтканын оныла айдарыс па? Јартап беригер.

⁶ Иисус бойыныҥ ӱренчиктерин оныҥ  кӧргӱзӱ мӱргӱӱлиниҥ кажы ла сӧзин такып-такып айтсын деп, бир де кӱӱнзебеген эмтир. Качан Иисус санааркап турган ӧйдӧ, не оны токунатпай турганын ӱзе Кудайга мӱргӱӱлинде ачыгынча айткан (Матф. 26:39, 42; Иоанн 17:1—26). Бис те анайып ла мӱргӱӱр аргалу. Анайда ок кандый бир јӧп чыгарардаҥ озо, биске Кудайыстаҥ ойгор сураар керек (Сар. 119:33, 34). Качан биске јаҥы иш берилген болзо, оны оҥдоорго ло оны канай јазап эдер деп билерге, Кудайдаҥ болуш не сурабас? (Укаа 2:6). Ол эмезе ада-энелер балдары учун, а балдары эне-адазы учун мӱргӱӱрге јараар. Ого ӱзеери јарлап турган ла ӱредӱ ӧткӱрип турган улузыс кӧгӱс јанынаҥ ӧссин деп мӱргӱӱрге јараар. Је биске Кудайдаҥ јӱк ле суранар керек эмес.

7. Мӱргӱп јатсаас, Иегованы нениҥ учун мактаар керек?

⁷ Мӱргӱп јатсагар, Иегованы мактаарга ундыбагар. Макты јӱк ле бистиҥ Кудайыс алар јаҥду. Нениҥ учун дезе Иегова Кудайыс јалакай ла јаманды таштаарга белен. Анайда ок «Кудай, буурзак, килеҥкей, чыдамкай, бӱдӱмјилӱ ле чындык сӱӱшле толо» (Сар. 86:5, 15). Оныҥ кылык-јаҥы сӱреен јараш, эткен керектери де кайкамчылу! Оны канайып мактабайтан!

8. Бис нениҥ учун быйанысты Кудайга айдар учурлу? (Сарын 104:12—15, 24).

⁸ Је биске Иегованы јаҥыс ла мактаар керек эмес, је оныҥ берген кӧп сыйлары учун быйанысты да айдар керек. Темдектезе, андый јараш чечектер учун, амтанду курсак ла јуук најыларыс учун быйанысты айдарыс. Иегова мынаҥ да ӧскӧ сыйларды бисти сӱӱнчилӱ јӱрӱм јӱрзин деп берген. (Сарын 104:12—15, 24 кычырыгар.) Је эҥ јаан быйанысты артыгынча берип турган кӧгӱс курсак ла келер ӧйгӧ андый јараш ижемји берип турганы учун айдар керек.

9. Иеговага быйанысты айдарга ундыбаска не болужар? (1 Фессалоникадагыларга 5:17, 18).

⁹ Кезикте бис Кудайыска быйанысты айдарга ундып саладыс. Мындый ӧйдӧ  нени эдер керек? Иегованаҥ нени сураганаарды бичип алала, канча да ӧйдиҥ бажынаҥ Иегова карууны канай бергенин кӧрӱп туругар. Карууны алган болзоос, быйанысты айдарга ундыбай јадыс. (1 Фессалоникадагыларга 5:17, 18 кычырыгар, ЈТ.) Темдектезе, улус биске быйанын айтса, сӱӱнгениске јӱрегис чечектей берет. Анайып ла бис Иеговага быйанысты айтсаас, Кудайыс тыҥ сӱӱнип јат (Кол. 3:15). Је Иеговага быйанысты айдатан база да бир шылтак бар.

10. Биске Иеговага Иисусты јерге ийгенине нениҥ учун быйанду болор керек? (1 Пётр 2:21).

¹⁰ 1 Пётр 2:21 кычырыгар. Бисти ӱретсин деп, сок јаҥыс сӱӱген Уулын ийгени учун Иегова быйанысты айдарга ундыбас керек. Иисустыҥ јӱрӱмиле таныжып турзаас, бис Иегова керегинде кӧптӧдӧ билип аларыс ла оны канай сӱӱндиретенин оҥдоп аларыс. Анайда ок Иеговага јуук најы болорго ло оныла јакшы колбуларлу болорго турган болзоос, Иисустыҥ бис учун берген толынты тайылгазына бӱдер керек (Рим. 5:1).

11. Бис нениҥ учун Иисус Христос ажыра Кудайга мӱргӱп јадыс?

¹¹ Бис Иеговага Иисус ажыра мӱргӱӱр арга бергенине быйанысты айдып јадыс. Иегова јӱк ле ол ажыра мӱргӱгенисти угуп јат. Иеговага Иисус ажыра мӱргӱзеес, ол бисти угуп, керектӱ немени берип јат. Бу керегинде Иисус мынайып јартаган: «Мениҥ адымда нени де суразагар, Ада Уулында мактазын деп, оныгарды бӱдӱрерим» (Иоанн 14:13, 14).

12. Иеговага оныҥ Уулы учун быйанаарды айдатан база кандый шылтак бар?

¹² Иегова Иисустыҥ толынты тайылгазы ажыра бистиҥ кинчектеристи таштап јат. Иисус Агару Бичикте Улу Абыс деп айдылат. Ол «теҥеридеги Улу Кудайдыҥ ширеезиниҥ оҥ јанында отурган» (Евр. 8:1). Анайда ок ол Кудайдыҥ јанында болушчы (1 Иоанн 2:1). Бис Иеговага ондый килеҥкей Улу Абыс бергенине јаан быйанду. Иисус бистиҥ јаҥыс ла уйан јандарысты оҥдоп турган эмес, је Кудайдаҥ «бис учун сурап јат» (Рим. 8:34; Евр. 4:15). Толо кеминеҥ тыҥ ыраап калганыстаҥ улам, бисте толынты тайылга јогынаҥ мӱргӱӱр арга да јок болор эди. Слер байла јӧпсинер болороор, Кудайдыҥ берген баалу сыйы учун јажын-чакка быйанду болор керек деп!

13. Иисус божоор алдында тӱнде, бойыныҥ ӱренчиктерин сӱӱгенин канай кӧргӱскен?

¹³ Иисус божоор алдында тӱнде бойыныҥ ӱренчиктерин сананып, Адазына: «Олорды јаманнаҥ корула» — деп, узак мӱргӱген (Иоанн 17:15). Ол ӧйдӧ Иисуска коркышту кӱч ченелтелер ӧдӧргӧ келишкен де болзо, ол бойын сананбай, апостолдорын сананган. Мынаҥ ол ӱренчиктерин сӱреен тын сӱӱген деп кӧрӱнет.

14. Ака-эјелерге сӱӱжис недеҥ кӧрӱнер?

¹⁴ Бис Иисустаҥ тем алып, јаҥыс бойысты сананбай јадыс. Оныҥ учун мӱргӱӱлдеристе ака-эјелер учун јаантайын сурап јадыс. Анайып бис Иисустыҥ: «Бой-бойыгарды сӱӱп јӱрӱгер» — деген јакылтазын бӱдӱрип јӱредис (Иоанн 13:34, ЈТ). Анайда ок олорго бастыра јӱрегистеҥ јакшы баштанып турзаас,  Иегованы сӱӱндиредис. Бис ака-эјелер учун мӱргӱп турзаас, олорго јаан болуш болот. Нениҥ учун дезе Кудайдыҥ Сӧзинде мындый сӧстӧр айдылган: «Акту кижиниҥ тыҥыдылган мӱргӱзи кӧпти эдер аргалу» (Иак. 5:16).

15. Бистиҥ мӱргӱӱлис ака-эјелерге нениҥ учун керектӱ?

¹⁵ Ака-эјелерге бистиҥ мӱргӱӱлис сӱреен керектӱ. Нениҥ учун дезе олор кӧп ченелтелерге табартат. Темдектезе, кайда да ар-бӱткенниҥ тӱбеги болот эмезе гражданский јуу-согуш ла истежӱлер болот. Та кем де оору ол эмезе ӧскӧ кӱчтердеҥ санааркап јат. Анайда ок тӱбекке тӱшкен улузыска бойын кысканбай болужып турган ака-эјелерис учун мӱргӱп јадыс. Слер олордыҥ бир-бирӱзин билетен болзоор, оныҥ адын адап, Иеговага не мӱргӱбес? Анайып, слер ака-эјелериске јаан сӱӱжеерди кӧргӱзип јадаар.

16. Нениҥ учун бис јуунды башкарып турган акалар учун мӱргӱӱр учурлу?

¹⁶ Јуунды башкарып турган акалар бистиҥ олор учун мӱргӱп турганыска јаан быйанду. Бистиҥ мӱргӱӱлис јокко олорго бойлорыныҥ молјузын бӱдӱререге кӱч болор эди. Ол керегинде апостол Павел мынайып айткан: «Мен де учун сурагар, айдып баштазам, Кудай меге керектӱ сӧстӧр берзин деп, Сӱӱнчилӱ Јардыҥ јажыдын ачыгынча јарлазын деп» (Эф. 6:19, ЈК 2003). Бӱгӱн апостол Павелге тӱҥей акалар база кӧп. Бистиҥ олорды сӱӱгенис Иегованы олорго болушсын деп сураганыстаҥ кӧрӱнет.

17, 18. Бисти кандый айалгаларда улус алдына мӱргӱзин деп сураар болор? Биске нени ундыбас керек?

¹⁷ Кезикте бисти улус алдына мӱргӱзин деп сураар болор. Темдектезе, эје бисти Агару Бичик ӱренип турган ӱредӱзине кычырып, бисти мӱргӱзин деп сураган болзын. Је бис ӱредип турган кижиниҥ айалгазын билбезистеҥ улам, ӱредӱ божогон кийнинде мӱргӱӱрге јӧпсинер болорыс.

¹⁸ Аканы јуунда ол эмезе јарлаар иштиҥ туштажузында мӱргӱзин деп сураган болзын. Ого нени ундыбас керек?  Ол элдеҥ ле озо улус не керектӱ јуулганын сананып јат. Ака мӱргӱӱлинде улуска јӧп бербес ле јар айтпас учурлу. Анайда ок мӱргӱӱл ле кожоҥго беш ле минут берилип турганын ундыбас керек. Айдарда, туштажуны ачып јаткан мӱргӱӱл кыска болгон болзо, јакшы болор эди (Матф. 6:7).

19. Биске Иегованыҥ јаргы берер кӱнине белен болорго не болужат?

¹⁹ Бис Иегованыҥ јаргы эдер кӱӱни јууктаган сайын, кӧптӧдӧ мӱргӱп турар учурлу. Бот оныҥ да учун Иисус мындый сӧстӧр айткан: «Келип јаткан ончо тӱбектеҥ кыйып ӧдӧргӧ... јаантайын сергек болуп, мӱргип јӱрӱгер» (Лука 21:36). Анайып, кӧгӱс јаныс та бек болор, Иегованыҥ кӱнине де белен болорыс.

20. Кандый учуралда Иеговага бистиҥ мӱргӱӱлис јараш јытту фимиамдый билдирер?

²⁰ Бис бу јӧрмӧлдӧ нени кӧрдис? Биске мӱргӱйтен арганы баалап турар керек. Мӱргӱӱлисте нени айдып турганыс Иегованыҥ амадузыла колбулу болзын. Иеговага мӱргӱӱлисте Иисус ла оныҥ Каандыгы учун быйанысты айдып турар керек. Анайда ок ака-эјелер учун мӱргӱп турза јакшы болор. Ого ӱзеери мӱргӱӱлде кажы ла кӱн биске не керектӱ болгонын берип турзын ла кӧгӱс јанынаҥ бек болорго болужып турзын деп сураар керек. Мӱргӱӱлде нени айдарын сананып турзаас, Иеговага баштанарын баалап турганысты кӧргӱзерис. Ол тушта мӱргӱӱлде айткан сӧстӧрис Иеговага јараш јытту фимиамдый билдирер (Укаа 15:8).