ARTIKEL PELAJAREN 31
Ergailah Hak Istimewa guna Ertoto man Jahwe
“Mbera-mbera totoku bagi kemenyan si enggo isikapken i lebe-lebeNdu.”—MS. 141:2.
LAGU 47 Ertotolah Tiap Wari
SI IBAHAS *
1. Uga arusna perasanta perban banci kita ertoto man Jahwe?
SADA hak istimewa kel siakap perban banci kita ertoto man Si Nciptaken langit ras doni. Cuba siukuri enda: Banci sipeseh kerina isi pusuhta man Jahwe, katawari pe, bas bahasa kai pe, janah la perlu lebe siban janji ras Ia. Banci ka kita ertoto man baNa sanga kita irawat bas rumah sakit, ntah pe sanga itahan bas penjara. Tek kita pasti ibegiken Bapakta si perkeleng totota e. Enda tuhu-tuhu sada hak istimewa!
2. Kai buktina iergai Raja Daud hak istimewa guna ertoto?
2 Iergai Raja Daud hak istimewa guna ertoto man Jahwe. Nina man Jahwe, “Mbera-mbera totoku bagi kemenyan si enggo isikapken i lebe-lebeNdu.” (Ms. 141:1, 2) Bas jaman Daud, kemenyan si ipake guna nembah Jahwe arus lebe ipersiapken imam-imam alu mehuli. (Kel. 30:34, 35) Emaka, sope ipeseh Daud totona man Jahwe, ibanna lebe persiapen si mehuli kerna kai si atena ipesehna. Kita pe bage ateta siban gelah meriah ukur Jahwe megi totota.
3. Uga arusna kita sanga ertoto man Jahwe, ras engkai?
3 Sanga ertoto kita man Jahwe, arus mehamat kel kita. Cuba ukuri pengenehenen si luar biasa si aloken Jesaya, Esekiel, Daniel, ras Johanes. Beda-beda pengenehenen e, tapi lit si seri. Icidahken man kalak e maka Jahwe e bali bagi Raja si seh kel muliana. Jesaya, idahna “Jahwe kundul bas tahta si meganjang.” (Jes. 6:1-3) Adi Esekiel idahna Jahwe kundul i datas geretaNa si ikelilingi “cahaya si bagi pelangi.” (Esek. 1:26-28) Adi Daniel idahna “Si Enggo Lit Nai Nari” make uis mbentar janah lit ndarat api arah tahtaNa. (Dan. 7:9, 10) Adi Johanes idahna Jahwe kundul i datas tahta si ikelilingi pelangi si warna meratah bagi zamrud. (Ket. 4:2-4) Adi siukuri uga belinna kemulian Jahwe, enda ngingetken kita maka luar biasa kel hak istimewata banci ertoto man baNa. Gundari, mari sibahas kai saja si banci sitotoken.
“BAGENDALAH KENA ERTOTO”
4. Kai si banci sipelajari kerna toto arah kata-kata Jesus si tangtangna bas Matius 6:9, 10?
4 Baca Matius 6:9, 10. Bas Khotbah i Gunung, iajari Jesus murid-muridna uga carana mpeseh toto si erban meriah ukur Dibata. Kenca ikataken Jesus “bagendalah kena ertoto,” si tangtangna ikatakenna eme kai si lit hubungenna ras sura-sura Jahwe. Kai e? Kerna gelar Jahwe ipebadia, kerehen Kerajan Dibata si engkernepken kerina musuh-musuh Dibata, bage pe pasu-pasu si ibereken Dibata pagi ku doni ras manusia. Adi sitotoken kerna si e, sibuktiken maka si pentingna siakap eme peraten Dibata.
5. Banci nge sitotoken kerna keperlunta?
5 Arah kata-kata Jesus selanjutna bas toto e, ibuktikenna maka banci nge sitotoken kerna keperlunta. Banci sitotoken man Jahwe gelah bereNa panganta bas wari e, gelah ampuniNa dosa-dosata, gelah lindungiNa kita arah percuban, bage pe gelah selamatkenNa kita arah si jahat nari. (Mat. 6:11-13) Adi sitotoken kerna si e man Jahwe, sibuktiken maka perlu kita penampatNa, janah nggit kita erban meriah ukurNa.
Sanga sekalak perbulangen ertoto ras ndeharana, kai saja si banci totokenna? (Nen paragrap 6) *
6. Si lit bas contoh toto e saja nge si banci sitotoken? Jelasken.
6 Labo iarapken Jesus gelah murid-muridna ertoto pas kel bagi contoh toto si ipesehna. Bas toto Jesus, pernah ka itotokenna kerna kai si ikuatirkenna paksa si e. (Mat. 26:39, 42; Joh. 17:1-26) Kita pe banci sitotoken kai si erban kita kuatir. Sanga arus siban sada keputusen, banci kita ertoto mindo kepentaren ras pengangkan. (Ms. 119:33, 34) Ntah, sanga silakoken ateta sada tugas si mesera, banci kita ertoto mindo penampat gelah siangka cara ngelakokenca. (Kua. 2:6) Orang tua banci totokenna anak-anakna, anak-anak banci totokenna orang tuana. Kerina kita banci notoken kalak si erlajar Pustaka ras kita bage pe si enggo megiken berita si meriah arah kita janah e perlu silakoken. Tapi sanga kita ertoto, ula min pemindon saja ngenca isina.
Sanga ertoto, kai saja si ngiahken kita muji Jahwe ras ngata bujur man baNa? (Nen paragrap 7-9) *
7. Engkai arus sipuji Jahwe bas totota?
7 Sanga kita ertoto, ula lupa guna muji Jahwe. Ia kap si metunggungna ngaloken pujin. Perban ‘mehuli kap Ia janah nggit ngampuni.’ Jahwe pe Dibata “si perkuah, si mehuli, la nukah merawa, janah dem alu kekelengen si setia ras kebenaren.” (Ms. 86:5, 15) Payo, melala alasenta guna muji Jahwe perban sipat-sipatNa, bage pe perban kai si enggo ilakokenNa.
8. Kerna kai saja kita banci ngata bujur man Jahwe? (Masmur 104:12-15, 24)
8 Selain muji Jahwe bas totota, banci ka kita ngata bujur man baNa perban kerina si enggo berekenNa man banta. Contohna, ngata bujur kita perban lit bunga-bunga si erbage-bage warnana, erbage-bage pangan si entabeh, bage pe teman-teman kompakta. Bapakta si perkeleng mereken si e kerina ras si debanna gelah meriah ukurta. (Baca Masmur 104:12-15, 24.) Tapi si lebih penting, ngata bujur kita man Jahwe perban enggo berekenNa pangan rohani si seh kel buena bage pe arapen si luar biasa bas wari si pepagi.
9. Kai nge si nampati kita gelah ula lupa ngata bujur man Jahwe? (1 Tesalonika 5:17, 18)
9 Nukah kel kita lupa ngata bujur man Jahwe kerna kerina si enggo lakokenNa man banta. Kai nge si banci nampati kita gelah ula lupa? Banci situlis daftar si jelas kerna pemindonta janah sipereksa alu ratur uga cara Jahwe njawap totota e. Kenca si e, ngata bujur kita man baNa. (Baca 1 Tesalonika 5:17, 18.) Cuba ukuri enda: Adi lit kalak si ngata bujur man banta, pasti meriah ukurta ras ergaina siakap kita. Jahwe pe meriah ukurNa adi siinget ngata bujur man baNa perban enggo jawapNa totota. (Kol. 3:15) Tapi, kai nge alasen penting si deban guna ngata bujur man Dibata?
NGATA BUJUR MAN JAHWE PERBAN ENGGO BERENA ANAKNA
10. Menurut 1 Petrus 2:21, engkai maka kita ngata bujur man Jahwe perban enggo utusNa Jesus ku doni?
10 Baca 1 Petrus 2:21. Arus kita ngata bujur man Jahwe perban enggo utusNa Anak si ikelengiNa guna ngajari kita. Alu mpelajari kegeluhen Jesus, melala kel si banci sipelajari kerna Jahwe ras uga carana erban meriah ukurNa. Adi erkiniteken kita nandangi korban tebusen Kristus, banci kita rembak ras Dibata Jahwe janah erdame kita ras Ia.—Rom. 5:1.
11. Engkai maka arus kita ertoto erkelangken gelar Jesus?
11 Ngata bujur kel kita man Jahwe perban banci kita ertoto man baNa erkelangken AnakNa. Adi ertoto kita erkelangken gelar Jesus, totota ibegiken Jahwe janah ijawapNa. Igunaken Jahwe Jesus guna mereken pemindonta. Bagenda nina Jesus, “Kai pe si pindo kena bas gelarku, kubereken nge, gelah Bapak imuliaken arah Anak.”—Joh. 14:13, 14.
12. Kai ka alasenta ngata bujur man Jahwe perban enggo bereNa AnakNa?
12 Banci iampuni Jahwe dosata perban enggo lit korban tebusen Jesus. Igambarken bas Pustaka maka Jesus eme ‘imam si mbelin si kundul i sebelah kanan tahta Dibata Si Madakuasa i surga.’ (Heb. 8:1) Selain si e, Jesus “si nampati kita si tading ras Bapak.” (1 Joh. 2:1) Ngata bujur kel kita perban enggo bereken Jahwe man banta Imam si Mbelin, si ngangkai kelemahenta ras ‘si erban pemindon guna kita’! (Rom. 8:34; Heb. 4:15) Kita jelma si la sempurna. Emaka adi la lit korban tebusen Jesus, labo kita banci ertoto man Jahwe. Pasti setuju kita maka labo erbias-bias pengatan bujurta man pemere Jahwe si meherga eme AnakNa, Jesus!
TOTOKENLAH TURANG SENINANDU
13. Bas berngi sope kematen Jesus, kai buktina maka keleng atena murid-muridna?
13 Bas berngi sope kematen Jesus, ndekah kel ia ertoto guna kepentingen murid-muridna. Ipindona man Bapakna gelah ‘jagaNa kalak e arah si jahat nari.’ (Joh. 17:15) E mbuktiken maka keleng kel ate Jesus murid-muridna! Amin pe tehna nandangi adapina tentangen si seh kel beratna, tetap perdiatekenna keadan kalak e.
Kai si banci sitotoken kerna turang seninata? (Nen paragrap 14-16) *
14. Uga carata mbuktiken maka keleng ateta turang seninata?
14 Perban siusih Jesus, labo kepentingenta ngenca siukuri, siukuri ka kepentingen turang seninata. Emaka rusur sitotoken kalak e. Adi bage siban, sipatuhi perentah Jesus guna engkelengi sada ras si debanna, janah sibuktiken man Jahwe uga belinna kekelengenta man turang seninata. (Joh. 13:34) Pasti lit gunana adi sitotoken turang seninata. Nina Kata Dibata, “Toto kalak si benar, mbelin kel pengaruhna.”—Jak. 5:16.
15. Engkai maka perlu sitotoken turang seninata?
15 Perlu sitotoken turang seninata perban melala tentangen si adapi kalak e. Banci sitotoken kalak e gelah sampati Jahwe kalak e megenggeng ngadapi penakit, bencana alam, perang, penganiayan, ntah pe tentangen si debanna. Banci ka sitotoken turang seninata si kerja keras guna nampati kalak si merluken penampat. Adi lit sitandai turang senina si bage, sibelaskenlah gelar kalak e bas totota. Adi sitotoken turang seninata, sibuktiken kekelengenta situhu-tuhu man kalak e.
16. Engkai maka arus sitotoken turang senina si lit tanggung jawapna bas organisasi?
16 Perlu ka sitotoken turang senina si lit tanggung jawapna bas organisasi. Banci sitotoken gelah pasu-pasu Jahwe kerja keras kalak e. Adi sitotoken kalak e, e buktina keleng ateta kalak e. Mbarenda, iergai Rasul Paulus kel toto si ipeseh turang seninana. Itulisna bagenda, “Totoken ka aku, gelah sanga kubuka babahku, ngasup aku ngerana alu pang bas mberitaken rahasia si badia kerna berita si meriah.” (Ep. 6:19) Gundari pe, enterem turang senina si lit tanggung jawapna bas organisasi. Ergai kalak e kel totota guna kalak e janah banci gejapkenna manpaatna.
SANGA IPINDO KITA SI MABA TOTO
17-18. Banci saja ndigan kita ipindo guna maba toto, janah kai si arus siinget?
17 Mon-mon, ipindoken gelah kita si maba toto. Contohna, lit sekalak turang seninata si diberu si ngajarken Pustaka banci saja mindo turang senina si nemani ia si maba toto. Turang senina si nemani e lenga tehna kel kerna kalak si erlajar e. Emaka banci saja pangen akapna kenca dung erlajar ia si maba toto. Alu bage, banci reh nukahna akapna nentuken kai si atena ipesehna sanga ertoto guna kepentingen si erlajar e.
18 Turang senina si dilaki banci saja ipindo guna maba toto bas perjumpan guna erberita ntah pe sanga perpulungen. Arus inget turang senina e kai kin tujun perjumpan e. Toto e tujunna labo guna mereken nasehat man runggun ntah pe guna erban pengumumen. Biasana, lima menit ngenca waktu si ipake guna rende ras ertoto bas perpulungen. Emaka turang senina si mpeseh toto, ula min “gedang” totona, terlebih bas toto pembuka.—Mat. 6:7.
TERUSLAH ERTOTO
19. Kai si banci nampati kita gelah ersikap ngadapi Wari Penghakimen Jahwe?
19 Perban Wari Penghakimen Jahwe enggo reh deherna, reh tutusna min ateta ertoto. Kerna si e bagenda nina Jesus, “Tetaplah erjaga-jaga ras teruslah ertoto mindo gelah banci kena selamat ngelewati kerina si arus terjadi e.” (Luk. 21:36) Adi ratur kita ertoto, kinitekenta banci paguh, janah enggo ersikap kita sanga reh Wari Penghakimen Dibata.
20. Uga totota banci bagi kemenyan si merim?
20 Kai saja si enggo sibahas? Siergai kel hak istimewa banci ertoto man Jahwe. Si pentingna si arus sitotoken eme kai si lit hubungenna ras sura-sura Jahwe. Banci ka kita ngata bujur perban enggo ibere Jahwe AnakNa ras enggo ilantikNa ia jadi Raja. Perlu ka sitotoken turang seninata. Banci ka sitotoken keperlunta tiap wari, janah sipindo penampat Jahwe gelah paguh kinitekenta. Adi siukuri kai ateta sitotoken, sibuktiken maka siergai hak istimewa si luar biasa e. Alu bage, totota banci ‘ngena ate Jahwe’ bali bagi kemenyan si merim.—Kua. 15:8.
LAGU 45 Isi Pusuhku
^ Ngata bujur kel kita perban banci kita ertoto man Jahwe. Ateta min totota bali bagi kemenyan si merim, si erban meriah ukur Jahwe. Bas artikel enda, sibahas kari kai saja si banci sitotoken. Sibahas ka kari kai saja si arus siinget sanga ipindoken kita guna maba toto.
^ KETERANGEN GAMBAR: Sekalak turang senina ertoto ras diberuna. Ertoto ia gelah lindungi Jahwe anakna bas sekolah, gelah pegegehi Jahwe mamana si sangana sakit, ras sampati Jahwe kalak si erlajar Pustaka ras diberuna gelah erban kemajun.
^ KETERANGEN GAMBAR: Sekalak dilaki ngata bujur man Jahwe perban berekenNa korban tebusen Jesus, doni si mejile, ras pangan si ergizi.
^ KETERANGEN GAMBAR: Sekalak diberu ertoto man Jahwe gelah pasu-pasuNa Badan Pinpinen alu kesah si badia ras sampatiNa kalak si ngadapi kiniseran perban bencana alam ntah pe penganiayan.
