1. Met meefiach ren án Jiowa mut ngenikich ach sipwe iótek ngeni?

 EWE mi Fératá láng me fénúfan a fang ngenikich eú liffang mi fókkun aúchea. A mut ngenikich ach sipwe iótek ngeni. Anchangei mwo ei: Sia tongeni iinaawu ngeni Jiowa masouen letipach lón ach kewe iótek ineet chék sia mochen me lón ese lifilifil fós, me ese pwal lamot an epwe wor ach appointment. Sia tongeni iótek ngeni atun sia kokkoon wóón ach bed lón pioing, are seni lón kalapus me lúkúlúk pwe Semach na mi tong a aúselingakich. Sia fókkun kilisou ren ena liffang.

2. Ifa usun King Tafit a pwári an aúcheani ewe mettóch iótek?

² King Tafit a fókkun aúcheani ewe mettóch iótek. A kélú ei ngeni Jiowa: “Ai iotek epwe wewe ngeni eu asoren apach mi pwokus me mwom.” (Kölf. 141:1, 2) Lón fansoun Tafit we, a pin ewe appach mi pwokkus ekkewe souasor ra áeá fán iten fel mi enlet, ina popun chókkewe mi wisen fériir ra fókkun túmúnúéchú fférún. (Eks. 30:34, 35) Alon Tafit na usun appach mi pwokkus, eli a wewe ngeni pwe a mochen lóóm ekiekifichi met epwe apasa ngeni Seman we lón láng. Ina met sia pwal mochen. Sia mochen pwe Jiowa epwe pwapwa ren ach kewe iótek.

3. Met sókkun napanap mi lamot sipwe pwári atun sia iótek ngeni Jiowa, me pwata?

³ Atun sia iótek ngeni Jiowa, sipwe fós ngeni fán watteen súfél. Ekieki usun ekkewe lángipwi mi amwarar Aisea, Isikiel, Taniel, me Johannes ra kúna. Ekkena lángipwi ra sókkofesen, nge a wor eú mettóch ra léllé wóón. Iir meinisin ra áweweei pwe Jiowa i emén King mi fókkun tekia. Aisea a “küna ewe Samol, a mot won eu lenien motun king mi fokun tekia.”  (Ais. 6:1-3) Isikiel a kúna án Jiowa mwoot wóón waan we woken lón láng me “och saram . . . usun lapalapen ewe resim” a pwellifeili. (Is. 1:26-28) Taniel a kúna “ewe mi nom seni me lomlom” a úféúf úf mi pwechepwech, nge ngeten ekkei a ngetewu seni an we leenien mwottun king. (Tan. 7:9, 10) Johannes a pwal kúna án Jiowa mwoot wóón an we leenien mwottun king me eú resim mi ling mi anúwen ewe faú aúchea itan emeralt a pwellifeili. (Pwär. 4:2-4) Atun sia ekieki usun lingemwararen Jiowa, sia mirititi úkúkún watteen feiéchúch le iótek ngeni, me aúchean ach sipwe féri ena fán watteen mennin me súfél. Nge, met sipwe iótek usun?

4. Met sia káé seni kapasen lepoputáán ewe iótekin ach Samol lón Mateus 6:9, 10?

⁴ Álleani Mateus 6:9, 10. Lón án Jesus we Afalafal Wóón ewe Chuuk, a áiti ngeni néún kewe chón káé ifa usun repwe eáni ekkewe sókkun iótek Kot epwe pwapwa ren. Mwirin án Jesus erá “iwe, iei usun ämi oupwe iotek,” a eiteita ekkewe mettóch mi kon aúchea atun a iótek. A ióteki pinilóón iten Jiowa we, warotoon Mwúún Kot we, ewe epwe áeá le nieló meinisin chón oputa I, me a ióteki ekkewe feiéch Kot epwe atoto lón mwachkkan ngeni fénúfan me aramas. Atun sia apachaalong ekkena mettóch lón ach kewe iótek, sia pwári pwe letipen Kot a aúchea me rech.

5. Mi fich ach sipwe iótek usun ekkewe mettóch mi weneiti pwisin manawach?

⁵ Lón sópwósópwólóón ewe iótek, Jesus a affata pwe a fich ach sipwe iótek usun ekkewe mettóch mi weneiti pwisin manawach. Sia tongeni tingorei Jiowa an epwe awora ngenikich anach mwéngé lón ewe rán, omusaaló tipisich, túmúnúkich seni sóssót, me angasakich seni ewe mi ngaw. (Mat. 6:11-13) Atun sia tingorei Jiowa ekkena sókkun mettóch, sia pwári pwe manawach a lóngólóng wóón i, me sia mochen apwapwaai i.

6. Itá ekkewe mettóch mi mak lón ewe iótekin ach Samol, ikkena chék met sia tongeni iótek usur? Áweweei.

⁶ Jesus ese mochen án chókkewe mi tapweló mwirin repwe chék nikáppirú kapasen an we iótek. Lón ekkewe ekkóch iótek Jesus  a eáni, a ióteki pwal ekkóch mettóch mi aúchea me ren lón ekkena atun. (Mat. 26:39, 42; Joh. 17:1-26) Pwal ina chék usun, sia tongeni iótek usun ese lifilifil met sia lólileniesini. Ika sipwe eáni eú kefil, sia tongeni tingor tipachem me silelap. (Kölf. 119:33, 34) Atun sia poputá le féri eú angang mi áweires, sia tongeni tingorei Jiowa an epwe álisikich pwe sipwe silei ifa usun sipwe féri. (SalF. 2:6) Ekkewe sam me in ra tongeni ióteki néúr kewe, ekkewe nau ra tongeni ióteki semer kewe me iner, me oukich meinisin sia tongeni ióteki néúch kewe chón káé, me chókkewe sia afalafal ngeniir. Nge atun sia iótek, mi lamot sisap chék tittingor.

7. Pwata a lamot sipwe mwareiti Jiowa lón iótek?

⁷ Mi lamot sipwe chemeni ach sipwe mwareiti Jiowa lón ach kewe iótek. A fich ngeni Jiowa chék ach sipwe mwareiti. I a “kirikiröch o amusala tipis.” A pwal “ümöümöch” me “songomang o wöün tong ellet me allükülük.” (Kölf. 86:5, 15) A wor popun mi pwúng ach sipwe mwareiti Jiowa ren napanapan kewe me minne a kan féfféri.

8. Ikkefa ekkóch mettóch sia tongeni kilisou ngeni Jiowa ren? (Kölfel 104:12-15, 24)

⁸ Me lúkún ach mwareiti Jiowa lón iótek, a chúng letipach le kilisou ngeni ren an awora chómmóng mettóch mi fókkun amwarar. Áwewe chék, sia tongeni kilisou ngeni ren lingéchún anúwen ekkewe péén irá, tepetepen ekkewe sókkun mwéngé mi anné, me ewe pwapwa sia meefi ren ach chiechi ngeni chiechiach kewe. Semach na mi tong a fang ngenikich ekkena mettóch me pwal chómmóng mettóch pwe sipwe pwapwa. (Álleani Kölfel 104:12-15, 24.) Nge ewe a kon aúchea seni ekkena, ina ach kilisou ngeni ren chómmóngun ekkewe mwéngé lón pekin ngún a awora me ach we ápilúkúlúk mi amwarar fán iten mwachkkan.

9. Met a tongeni álisikich ach sipwe chemeni le kilisou ngeni Jiowa? (1 Tesalonika 5:17, 18)

⁹ A mecheres ach sipwe ménúki le kilisou ngeni Jiowa ren meinisin met a féri fán itach. Met a tongeni álisuk le chemeni? Ka tongeni makkeetiw met ekkewe ka tingor me chechcheki ifa usun Jiowa a pélúweniir. Mwirin, kilisou ngeni lón iótek ren an álillis.  (Álleani 1 Tesalonika 5:17, 18.) Ekieki ei: Sia kan pwapwa me meefi aúcheach atun ekkewe ekkóch ra pwári ar kilisou ngenikich. Pwal ina usun ren Jiowa, a pwal pwapwa atun sia chemeni ach sipwe kilisou ngeni ren an pélúweni ach kewe iótek. (Kol. 3:15) Nge mi pwal wor eú popun mi fókkun aúchea ach sipwe kilisou ngeni ach we Kot.

10. Me ren 1 Petrus 2:21, pwata a wor popun ach sipwe kilisou ngeni Jiowa ren an tiinaato Jesus ngeni fénúfan?

¹⁰ Álleani 1 Petrus 2:21. A lamot ach sipwe kilisou ngeni Jiowa ren an tiinaato Néún we mi áchengicheng an epwe asukulakich. Lupwen sia álleani pwóróusen manawen Jesus, sia káé chómmóng mettóch usun Jiowa, me ifa usun sipwe apwapwaai i. Ika sia lúkú án Kraist asorun méén kepich, sia tongeni ririéch ngeni Jiowa Kot me kinamwefengen me i.​—Rom 5:1.

11. Met wisen Jesus lón ach kewe iótek?

¹¹ Sia kilisou ngeni Jiowa pwe sia tongeni iótek ngeni i me ren Néún we. Jiowa a néúnéú Jesus le awora ngenikich met ekkewe sia tingorei. Jiowa a aúseling me pélúweni ekkewe iótek sia eáni lón iten Jesus. Iei met Jesus a erá: “Meinisin mine oupwe tüngor fän itei üpwe apwönüetä, pwe Semei epwe küna ling rei.”​—Joh. 14:13, 14.

12. Ifa pwal eú popun ach sipwe kilisou ngeni Jiowa ren Néún we?

¹² Jiowa a omusaaló ach kewe tipis pokiten án Jesus asorun méén kepich. Ewe Paipel a apasa pwe Jesus i ach “Souasor mi Lap a mot lepelifichin ewe mi Unusen Tekia lon läng.” (Ipru 8:1) Jesus “a nom ren ewe Sam o a tütüngor fänäsengesich.” (1 Joh. 2:1) A ifa me kilisouch ngeni Jiowa ren an awora ngenikich ena Souasor mi Lap mi tong, mi weweiti apwangapwangach me “iotek fänäsengesich”! (Rom 8:34; Ipru 4:15) Kich aramas tipis, iwe ika esap pwúlún án Jesus we asor, sisap tongeni fós ngeni Jiowa lón iótek. Ese mwáál ka tipeeú ngeni pwe esap tongeni naf ach kapasen kilisou ngeni Jiowa ren úkúkún watteen an na liffang ngenikich, ina i Néún we mi áchengicheng!

13. Lón ewe pwinin me mwen án Jesus epwele máló, ifa usun a pwári pwe a tongei néún kewe chón káé?

¹³ Lón ewe pwinin me mwen án Jesus epwele máló, a iótek ren fansoun langattam fán iten néún kewe chón káé, me tingorei Seman we an epwe “tümwünüür seni ewe Eman mi Ngau.” (Joh. 17:15) Ena mettóch a pwári úkúkún watteen an tongeer. Inaamwo ika a silei pwe epwele tolong lón watteen riáfféú, nge a chúen ekieki néún kana aposel.

14. Ifa usun sipwe pwári pwe sia tongei chienach kewe Chón Kraist?

¹⁴ Sia mochen áppirú Jesus ren ach sisap ekieki chék pwisin osupwangach. Nge sipwe ikkiótek fán iten chienach kewe Chón Kraist. Ika sia féri ena, sia álleasochisi án Jesus we allúk ach sipwe tongfengen lefilach, me sia pwári ngeni Jiowa úkúkún ach tongei chienach kewe Chón Kraist. (Joh. 13:34) Ese lusmwáál ach ikkiótek fán iten chienach kewe. Án Kot we Kapas a erá pwe “än eman chon pwüng iotek a manaman o a fokun pwönüetä.”​—Jas. 5:16.

15. Pwata a lamot ach sipwe iótek fán iten chienach kewe Chón Kraist?

¹⁵ A lamot ach sipwe iótek fán iten chienach kewe Chón Kraist pokiten ra kúna chómmóng weires. Sia tongeni tingorei Jiowa an epwe álisiir le likiitú atun ra semmwen,  atun a fis ngeniir feiengaw watte, maun, riáfféúmwáál, are pwal ekkóch weires. Sia pwal tongeni iótek fán iten chienach kewe iir mi angang weires le álisi chókkewe iir mi nóm lón watteen osupwang. Eli ka sissilei ekkóch lein chókkana iir mi nóm fán ekkena esin weires. Iwe, pwata kese féúni iter lón óm kewe iótek? Ach tingorei Jiowa an epwe álisiir le likiitú, a pwári pwe sia enletin tongeer.

16. Pwata a lamot ach sipwe ióteki chókkewe mi wisen emmwenikich?

¹⁶ Chókkewe mi wisen emmweni ewe mwichefel ra fókkun kilisou ren ach chemeniir lón ach kewe iótek, me ach kana iótek ra fókkun álisiir. Aposel Paulus a silei pwe a lamot ngeni án ekkewe ekkóch repwe iótek fán itan. Ina popun a makkeei: “Oupwe pwal iotek fän itei pwe Kot epwe aiti ngeniei ekewe kapas üpwe apasa lon ai afalafal, pwe üpwe pwora le kapas o asile ngeni aramas monomonen ewe Pworausen Manau.” (Ef. 6:19) Lón ei fansoun, a pwal chómmóng ekkewe Chón Kraist mwán mi angang weires le emmwenikich. Sia pwári ach tongeer ren ach tingorei Jiowa an epwe efeiéchú ar angang.

17-18. Ineet atun neman sipwe kefil le wisen iótek, me met a lamot ach sipwe chemeni?

¹⁷ Fán ekkóch, sia kefil ach sipwe wisen iótek. Áwewe chék, eli emén Chón Kraist fefin mi káé ngeni emén a tingorei chienan we pwal emén Chón Kraist fefin an epwe wisen iótek. Eli chienan na ese kon sissilei ena chón káé, ina popun eli a meefi pwe a éch an epwe wisen iótek lesópwólóón ena káé. Ika ina, iwe epwe silei met epwe apasa atun epwe ióteki ena chón káé.

¹⁸ Eli emén Chón Kraist mwán epwe kefil an epwe wisen iótek atun eú mwichen afalafal are atun eú ach kewe mwich. A lamot án chókkewe mi kefil ar repwe wisen iótek, repwe chemeni popun ewe mwich ra iótek lón. Fansoun ra iótek, esap ina ewe atun repwe áwena chón ewe mwichefel are eáni pwóróus esilesil. Lón lape ngeni ach kewe mwich, a fen káimuló úkúkún nimu minich fán iten kél me iótek. Ina popun a lamot án ekkewe mwán mi wisen iótek resap “kapas chommong,”  ákkáeúin lón ar iótek lepoputáán eú mwich.​—Mat. 6:7, Testament mi Fö.

19. Met epwe álisikich le mmólnetá ngeni warotoon án Jiowa we ránin kapwúng?

¹⁹ A lamot ach sipwe alapaaló ach aúcheani iótek lón manawach pún a arapoto án Jiowa we ránin kapwúng. Pokiten ena, iei met Jesus a erá: “Oupwe mamasa o iotek fansoun meinisin, pwe epwe wor ämi pöchökül pwe oupwe tongeni sü seni ekei mettoch meinisin lupwen repwe fisitä.” (Luk. 21:36) Ika sia ikkiótek iteitan, epwe péchékkúl ach lúkú me sipwe mmólnetá ngeni warotoon án Jiowa we ránin kapwúng.

20. Ifa usun ach kewe iótek epwe tongeni usun pwonen appach mi pwokkus?

²⁰ Met sia fen káé me lón ei lesen? Sia fókkun aúcheani ewe mettóch iótek. Ekkewe mettóch mi weneiti letipen Jiowa, ikkena ekkewe mettóch mi kon aúchea sipwe iótek usur. Sipwe pwal pwári ach kilisou ren Néún Kot we me an nemenem lón ewe Mwúún Kot, me sipwe pwal ióteki chienach kewe Chón Kraist. Jiowa a pwal mochen ach sipwe iótek fán iten met mi lamot ngenikich iteiten rán, me an epwe álisikich pwe epwe péchékkúl ach lúkú. Atun sia ekiekifichi met sipwe apasa lón ach kewe iótek, sia pwári pwe sia aúcheani ena liffang mi aúchea. Ach kapas lón ach kewe iótek repwe usun pwonen appach mi pwokkus me ren Jiowa, weween epwe “pwapwa ren.”​—SalF. 15:8.