1. Kouman nou divèt wè lapriyè ?

 NOU gen roun bèl lònò : nou pouvé palé pou Sa-la ki fè syèl-a ké latè-a ! To ka randé to kò kont : nou pouvé louvri nou tchò pou Jéova nenpòrt kitan, kèlkéswa lang nou ka palé, é nou pa bézwen pran randévou pou sa. Ki nou asou roun lit lopital, ki nou lajòl, nou pouvé priyè l’, é nou pouvé sir ki i ka kouté nou. An tout sans, lapriyè a pa roun ti bagaj ; a roun bèl lònò !

2. Kouman David montré ki lapriyè té gen bokou valò pou li ?

² Lapriyè té gen bokou valò pou rwa David. I chanté pou Jéova : « A pou mo lapriyè kou lansan yé ka préparé douvan to » (Ps. 141:1, 2). Annan lépòk David, lansan prèt-ya té ka boulé té sakré, é yé té ka pran tan byen préparé l’ (Ex. 30:34, 35). Donk, lò David konparé so lapriyè ké sa lansan-an, i té lé di ki i té ka pran tan byen réfléchi asou sa i té ké di so Papa ki annan syèl-a. A sa nou lé fè osi. Nou lé nou lapriyè fè Jéova plézi.

3. Kouman nou divèt vini douvan Jéova lò nou ka priyè, é poukisa ?

³ Lò nou ka priyè Jéova, nou pa divèt fè kousidiré a nou kanmarad. Nou divèt palé ké bokou rèspè. Réfléchi asou vizyon ki fè Izayi, Ézékyèl, Danyèl ké Jan rété èstébékwé. Sa vizyon-yan diféran, mé i gen roun bagaj nou ka jwenn annan yé tout : yé tout ka montré Jéova kou roun Rwa ki plen ké laglwar. Izayi wè Jéova « ki té asiz asou roun tronn ki té byen rot » (Is. 6:1-3). Ézékyèl wè li asiz asou so char annan syèl-a. Tout so lantou, i té gen « roun gro limyèr ka kléré ki té kou roun arkansyèl »  (Ézéch. 1:26-28). Danyèl wè « Sa-la ki la dipi tout-tan » ki té ka poté roun lenj blan é ki té asiz asou roun tronn koté difé té ka soti (Dan. 7:9, 10). É Jan wè Jéova ki té asiz asou roun tronn, é tout lantou sa tronn-an, i té gen roun « arkansyèl ki té ka sanblé roun pyèr ki gen bokou valò yé ka aplé émrod » (Rév. 4:2-4). A Bondjé rounso ki gen sa laglwar-a. Sa ka fè nou sonjé ki lapriyè sa roun bèl lònò, é ki sa enpòrtan pou nou palé pou li ké rèspè. Mé annou wè aprézan pou ki bagaj nou divèt priyè.

4. Kisa sa Jézi di an prémyé annan lapriyè ki annan Matthieu 6:9, 10 ka anprann nou ?

⁴ (Li Matthieu 6:9, 10.) Annan so Diskour asou montangn-an, Jézi montré so disip kouman yé té divèt priyè pou yé fè Bondjé plézi. Apré i di : « Atò, a konsa pou zòt priyè », i palé di plizyèr bagaj enpòrtan ki ka alé ansanm ké projè Jéova-a : so non ki divèt sanktifyé, so rwayonm ki pou vini é ki pou krazé tout so lèlmi, ké bénédiksyon i prévwè pou latè-a ké moun-yan. Lò nou ka palé di sa bagaj-ya annan nou lapriyè, nou ka montré ki volonté Bondjé enpòrtan pou nou.

5. Ès nou pouvé priyè pou noupa zafè ?

⁵ Lò Jézi kontinyé lapriyè i té ka anprann so disip, i montré ki nou pouvé priyè pou noupa zafè. Nou pouvé doumandé Jéova bay nou manjé nou bézwen chak jou, pardonnen péché nou ka fè, protéjé nou di tantasyon-yan, é libéré nou di méchan-an (Mat. 6:11-13). Lò nou ka doumandé Jéova sa bagaj-ya, nou ka rékonnèt ki nou ka dépann di li, é nou ka montré ki nou ka chaché fè l’ plézi.

6. Ès nou pouvé priyè pou ròt bagaj ki sa Jézi di annan lapriyè i anprann so disip ?

⁶ Jézi pa té ka doumandé so disip résité lapriyè i té montré yé. Annan ròt lapriyè i fè, i palé pou Jéova di plizyèr ròt bagaj ki té ka fè li enkyèt (Mat. 26:39, 42 ; Jean 17:1-26). Menm fason-an, nou pouvé priyè pou tousa ki  ka fè nou réfléchi bokou. Lò nou gen roun désizyon pou nou pran, nou pouvé doumandé Jéova bay nou sajès (Ps. 119:33, 34). Lò yé ka bay nou roun travay pou fè ki rèd, nou pouvé doumandé li idé nou konprann kouman pou nou fè l’ (Prov. 2:6). Papa ké manman-yan pouvé priyè pou yé timoun, é timoun-yan pouvé priyè pou yé papa ké yé manman. É nou tout, nou pouvé é nou divèt priyè pou moun-yan ki ka étidyé Labib-a ké nou épi pou moun-yan nou ka jwenn an prédikasyon. Mé a pa yenki doumandé nou divèt doumandé.

7. Poukisa nou divèt louwé Jéova lò nou ka priyè l’ ?

⁷ Lò nou ka priyè Jéova, nou pa divèt bliyé louwé l’. Pyès moun pa ka mérité louwanj kou li. I ‘bon é i paré pou pardonnen’. Épi osi, i ‘plen ké mizérikòrd ké konpasyon, i pa ka kouri faché é i plen ké lanmou ké fidélité’ (Ps. 86:5, 15). Donk, nou divèt louwé Jéova pou tout so bèl kalité ké tousa i ka fè.

8. Pou ki bagaj nou pouvé di Jéova mèrsi ? (Psaume 104:12-15, 24).

⁸ Annan nou lapriyè, anplis di louwé Jéova, nou lé di li mèrsi pou tout bèl bagaj i ka bay nou. Parèkzanp, nou pouvé di li mèrsi pou flèr-ya ké tout yé bèl koulò, pou tout kalité bon manjé ki chwit, é pou nou bon zanmi ki ka fè nou tchò kontan. Jéova ka bay nou tousa, é plis bagaj ankò, jis pou fè nou plézi (li Psaume 104:12-15, 24). Mé pi enpòrtan-an, nou lé di li mèrsi pou bon manjé èspirityèl i ka bay nou, é pou bèl èspwar i ka bay nou osi.

9. Kisa ki ké idé nou sonjé di Jéova mèrsi ? (1 Thessaloniciens 5:17, 18).

⁹ Détan, pitèt nou ka bliyé di Jéova mèrsi pou tousa i ka fè pou nou ! Kisa ki ké idé nou pa bliyé fè l’ ? Parèkzanp, nou pouvé marké bagaj nou doumandé l’ épi tanzantan, gadé wè sa nou marké pou wè kouman i réponn nou lapriyè. Apré sa, annou di li mèrsi paské i soutni nou (li 1 Thessaloniciens 5:17, 18).  Lò roun moun ka di nou mèrsi, nou ka santi ki i kontan nou, é sa ka fè nou plézi. Menm fason-an, lò nou ka sonjé di Jéova mèrsi paské i réponn nou lapriyè, sa ka fè li plézi toubonnman (Col. 3: 15). Mé annou wè aprézan rounòt bagaj ki ka bay nou anvi di nou Bondjé mèrsi.

10. Dapré 1 Pierre 2:21, poukisa nou pouvé di Jéova mèrsi paské i voyé Jézi asou latè-a ?

¹⁰ (Li 1 Pierre 2:21.) Nou divèt di Jéova mèrsi pou so Pitit i voyé asou latè-a pou i ansényé nou. Lò nou ka étidyé lavi Jézi, nou ka anprann bokou bagaj asou Jéova é asou sa nou divèt fè pou fè li plézi. Lafwa nou gen annan sakrifis Jézi ka pèrmèt nou gen roun bèl lanmityé ké Bondjé annan lapè (Rom. 5:1).

11. Poukisa nou ka priyè annan non Jézi ?

¹¹ Nou ka di Jéova mèrsi paské nou pouvé priyè l’ annan non Jézi. Jéova ka itilizé Jézi pou bay nou sa nou ka doumandé l’. I ka kouté lapriyè nou ka fè annan non Jézi, é i ka réponn yé. A sa Jézi èspliké : « Tousa zòt ké doumandé an mo non, mo ké fè l’, pou Papa-a glorifyé gras a Pitit-a » (Jean 14:13, 14).

12. Pou ki ròt bagaj nou pa ké janmen fini di Jéova mèrsi ?

¹² Jéova ka pardonnen nou péché gras a sakrifis Jézi-a. Labib-a ka di ki Jézi sa nou ‘Gran Prèt’, é ki i « asiz òbò tronn Majèsté-a annan syèl-a asou so drèt » (Héb. 8:1). A li ki sa osi nou « asistan òbò Papa-a » (1 Jean 2:1). Nou gen bokou rékonésans pou Jéova ki bay nou roun gran prèt ki pouvé « konprann nou féblès » é ki ka « sipliyé pou nou » ! (Rom. 8:34 ; Héb. 4:15). Kou nou pa parfè, si a pa té ranson-an, nou pa té ké pouvé palé pou Jéova annan lapriyè. Asiré pa pitèt, to ké dakò pou di ki nou pa ké janmen fini di Jéova mèrsi pou bèl kado i fè nou-a, lò i voyé so Pitit i kontan-an asou latè-a.

13. Lannwit anvan i mouri, kouman Jézi montré ki i té kontan so disip ?

¹³ Lannwit anvan i mouri, Jézi priyè pou so disip pannan lontan. I doumandé so Papa « véyé asou yé paské méchan-an la » (Jean 17:15). Sa té ka montré kouman i té kontan yé ! Li menm té paré pou pasé anba roun éprèv ki té rèd menm, é pourtan sa i té ka sonjé, a té so disip.

14. Kouman nou pouvé montré ki nou kontan nou frè ké sò-ya ?

¹⁴ Kou nou ka chaché imité Jézi, lò nou ka priyè, a pa di nou zafè rounso nou ka palé. Pasé nou fè sa, nou ka priyè souvan pou nou frè ké sò-ya. Konsa, nou ka obéyi Jézi ki ka doumandé nou kontan nou konpanyen, é nou ka montré Jéova kouman nou kontan nou frè ké sò-ya (Jean 13:34). Lò nou ka priyè pou yé, nou pa ka charyé dlo ké panyen. Labib-a ka di ki « lò roun moun ki jis ka priyè pou sipliyé Bondjé, a roun bagaj ki pwisan » (Jacq. 5:16).

15. Poukisa nou frè ké sò-ya bézwen nou priyè pou yé ?

¹⁵ Nou frè ké nou sò-ya bézwen nou priyè pou yé, paské yé ka jwenn roun patché éprèv. Parèkzanp, nou pouvé doumandé Jéova idé sa-ya ki malad,  sa-ya ki pèrsékité ké sa-ya ki ka rété roun koté tout bagaj krazé akoz di roun katastròf natirèl ouben roun lagèr. Nou pouvé priyè osi pou nou frè ké sò-ya ki ka bay annan opérasyon pou poté sékour. Pitèt to konnèt frè ké sò ki annan traka aprézan. To pouvé palé di yé, é nonmen yé non annan to lapriyè. Lò nou ka doumandé Jéova bay yé fòrs pou yé tchenbé, nou ka montré ki nou vréman kontan yé.

16. Poukisa nou divèt priyè pou frè-ya ki ka dirijé asanblé-a ?

¹⁶ Frè-ya ki ka dirijé asanblé-a, tou kontan savé ki nou ka priyè pou yé. É nou lapriyè ka idé yé. Apot Pòl té savé ki i té bézwen ròt-ya priyè pou li. I ékri : « Priyè pou mo osi, pou mo trapé sa pou mo di lò mo ka louvri mo bouch, pou mo pouvé palé ké kouraj lò mo ka fè moun konnèt sigré bon nouvèl-a ki sen » (Éph. 6:19). Jòdla osi, roun patché frè ka travay rèd pou asanblé-a. Nou ka montré ki nou kontan yé lò nou ka doumandé Jéova béni yé travay.

17-18. Détan, annan ki sitiasyon yé pouvé doumandé nou di roun lapriyè pou ròt moun, é kisa nou divèt sonjé ?

¹⁷ Yé pouvé doumandé nou di roun lapriyè pou ròt moun. Parèkzanp, roun sò ki ka fè roun léson biblik ké pitèt doumandé sò-a ki vini ké li di roun lapriyè. Si sa sò-a pa byen konnèt moun-an, i ké pitèt préféré di lapriyè-a lò léson-an ké fini. Konsa, annan so lapriyè, i ké pouvé palé pi fasilman di sa moun-an bézwen.

¹⁸ Yé pouvé doumandé roun frè di roun lapriyè pannan roun réinyon asanblé-a ouben roun réinyon pou prédikasyon-an. I ké divèt sonjé poukisa réinyon-an fèt. Lapriyè pa ka sèrvi bay asanblé-a konsèy ni bay nouvèl. Annan program près tout réinyon-yan, kantik-a ké lapriyè-a ka pran senk minit. Donk, frè-a ki ka di lapriyè-a pa divèt « palé bokou », èspésyalman lò a pou koumansé roun réinyon (Mat. 6:7).

19. Kisa ki ké pèrmèt nou paré pou jou jijman Jéova-a ?

¹⁹ Pi jou jijman Jéova-a ka proché, pi lapriyè divèt sa roun bagaj ki enpòrtan annan nou lavi. A pou sa, Jézi ka di nou : « Donk, pa dronmi é sipliyé toulong pou zòt rivé chapé anba tout sa bagaj-ya ki pou rivé » (Luc 21:36). Si nou ka priyè souvan, nou lafwa ké rété fò, é nou ké paré pou jou jijman Jéova-a.

20. Kisa nou divèt fè pou nou lapriyè santi bon kou lansan pou Jéova ?

²⁰ Kisa nou wè annan sa artik-a ? Lapriyè sa roun gran lònò pou nou. Nou divèt priyè an prémyé pou bagaj ki ka alé ké projè Jéova-a. Nou divèt di Bondjé mèrsi osi paské i voyé so Pitit asou latè-a é pou tout bénédiksyon so rwayonm ké mennen. Annou priyè pou nou frè ké sò-ya osi. É nou pouvé doumandé Bondjé idé nou trapé sa nou bézwen pou viv, é sa nou bézwen pou nou rété pròch di li. Si nou ka pran tan byen préparé sa nou ké di lò nou ké priyè, nou ké montré ki priyè Jéova sa roun lònò ki gen bokou valò pou nou. Konsa, pou Jéova, sa nou ké di ké santi bon kou lansan : a ké « roun plézi pou li » ! (Prov. 15:8).