1. Ano ang ginabatyag naton kay ginhatagan kita ni Jehova sang pribilehiyo nga makapangamuyo sa iya?

 GINHATAGAN kita sang Manunuga sang langit kag sang duta sang isa ka hamili nga regalo nga amo ang pribilehiyo nga makapangamuyo sa iya. Hunahunaa ini: Masugid naton kay Jehova ang aton ginabatyag sa bisan ano nga oras kag sa bisan ano nga lenguahe, kag indi naton kinahanglan magpaiskedyul sa iya. Makapangamuyo kita sa iya bisan ara kita sa ospital ukon sa prisuhan, kag makasalig kita nga pamatian kita sang aton mahigugmaon nga Amay. Ginapasalamatan gid naton ini nga regalo.

2. Paano ginpabaloran ni Hari David ang iya pribilehiyo nga makapangamuyo?

² Ginpabaloran ni Hari David ang iya pribilehiyo nga makapangamuyo. Nag-amba sia kay Jehova: “Kabay nga ang akon pangamuyo mangin subong sang incienso nga nahanda sa atubangan mo.” (Sal. 141:1, 2) Sang panahon ni David, ginahanda gid sing maayo sang mga saserdote ang balaan nga incienso nga ginagamit para sa matuod nga pagsimba. (Ex. 30:34, 35) Gani ginapakita sang ginsiling ni David nga gusto niya nga hunahunaon sing maayo kon ano ang iya ipangamuyo sa iya Amay sa langit. Amo man sina ang gusto naton himuon. Gusto naton nga mahamuot si Jehova sa aton pangamuyo.

3. Ano dapat ang aton panimuot kon nagapangamuyo kita kay Jehova, kag ngaa?

³ Kon nagapangamuyo kita kay Jehova, dapat naton ipakita ang tudok nga pagtahod. Binagbinaga ang palanan-awon nga nabaton nanday Isaias, Ezequiel, Daniel, kag Juan. Lainlain ang palanan-awon nga ila nakita, pero may pareho man sa sini nga mga palanan-awon. Ginlaragway sa sini nga mga palanan-awon si Jehova bilang isa ka halangdon nga Hari. “Nakita [ni Isaias] si Jehova nga nagapungko sa isa ka trono nga mataas kag nabayaw.” (Isa. 6:1-3) Nakita ni Ezequiel si Jehova nga nagapungko  sa iya langitnon nga kangga, kag “ginapalibutan sia sang kasanag kaangay sa balangaw.” (Ezeq. 1:26-28) Nakita ni Daniel ang “Dumaan sang mga Adlaw” kag maputi ang Iya panapton, kag may kalayo nga nagailig halin sa Iya trono. (Dan. 7:9, 10) Kag nakita ni Juan nga nagapungko si Jehova sa iya trono, kag sa palibot sini may balangaw nga kaangay sang esmeralda. (Bug. 4:2-4) Wala gid sing makatupong sa himaya ni Jehova. Nagapasalamat gid kita kay ginhatagan niya kita sang pribilehiyo nga makapangamuyo sa iya, gani dapat naton ini himuon nga may tudok nga pagtahod. Pero ano ang ipangamuyo naton sa iya?

4. Ano ang matun-an naton sa ginsiling ni Jesus sa umpisa sang iya pangamuyo sa Mateo 6:9, 10?

⁴ Basaha ang Mateo 6:9, 10. Sa Sermon sa Bukid, gintudluan ni Jesus ang iya mga disipulo kon paano mangamuyo nga makapahamuot sa Dios. Pagkatapos ginsiling ni Jesus nga “gani, mangamuyo kamo sing subong sini,” ginsambit niya sa umpisa sang iya pangamuyo ang pinakaimportante nga mga butang nga may labot sa katuyuan ni Jehova. Ginpangamuyo niya ang pagpakabalaan sa ngalan ni Jehova, ang pag-abot sang Ginharian nga amo ang magalaglag sa tanan nga kaaway sang Dios, kag ang mga pagpakamaayo nga himuon sang Dios sa duta kag sa mga tawo sa palaabuton. Dapat man naton ini ilakip sa aton mga pangamuyo. Paagi sa sini, mapakita naton nga importante gid sa aton ang kabubut-on sang Dios.

5. Puede bala naton ipangamuyo ang personal nga mga butang?

⁵ Ginapakita sang masunod nga ginsiling ni Jesus sa iya pangamuyo nga puede naton ipangamuyo ang personal nga mga butang. Puede kita makapangabay kay Jehova nga hatagan kita sang pagkaon para sa sini nga adlaw, patawaron kita sa aton mga sala, buligan kita nga indi madaug sang pagsulay, kag luwason kita sa isa nga malauton. (Mat. 6:11-13) Kon ilakip naton ini sa aton mga pangamuyo, ginapakita naton nga nagasalig kita nga buligan kita ni Jehova kag gusto naton nga mahamuot sia sa aton.

6. Ang mga ginsambit lang bala sa modelo nga pangamuyo ang puede naton ipangamuyo? Ipaathag.

⁶ Wala nagsiling si Jesus nga pareho gid nga mga tinaga sa modelo nga pangamuyo ang gamiton sang iya mga sumulunod. Sa iban pa nga  mga pangamuyo ni Jesus, ginsambit naman niya ang parte sa iya mga ginakabalak-an. (Mat. 26:39, 42; Juan 17:1-26) Pareho kay Jesus, puede man naton ipangamuyo ang mga ginakabalak-an naton. Puede naton ipangamuyo nga hatagan kita sing kaalam kag paghangop kon may himuon kita nga desisyon. (Sal. 119:33, 34) Kon ginhatagan kita sang mabudlay nga responsibilidad, puede naton ipangamuyo nga buligan kita nga mahangpan kon paano ini himuon. (Hulu. 2:6) Puede ipangamuyo sang mga ginikanan ang ila kabataan, kag puede man ipangamuyo sang kabataan ang ila mga ginikanan. Kag dapat naton tanan ipangamuyo ang aton mga Bible study kag ang aton mga ginabantalaan. Pero, indi lang dapat puro pangabay ang aton ipangamuyo.

7. Ngaa dapat naton dayawon si Jehova sa aton mga pangamuyo?

⁷ Dapat naton dayawon si Jehova sa aton mga pangamuyo. Takus gid nga dayawon ang aton Dios. “Maayo [sia] kag handa sa pagpatawad.” “Maluluy-on [man sia] kag mainawaon, indi dali maakig kag bugana sa mainunungon nga gugma kag katutom.” (Sal. 86:5, 15) Nagakaigo gid nga dayawon naton si Jehova bangod sa iya mga kinaiya kag mga ginhimo.

8. Ano ang pila ka butang nga ginhatag ni Jehova nga puede naton pasalamatan? (Salmo 104:12-15, 24)

⁸ Magluwas nga dapat naton dayawon si Jehova sa aton mga pangamuyo, dapat man naton sia pasalamatan sa dalayawon nga mga butang nga ginahatag niya sa aton. Halimbawa, puede naton sia pasalamatan sa matahom kag sarisari nga kolor nga makita naton sa mga bulak, sa manamit kag sarisari sing sabor nga pagkaon, kag sa mga abyan nga nagapaumpaw gid sa aton. Magluwas sa sini, madamo pa gid sing ginahatag ang aton mahigugmaon nga Amay sa langit kay gusto niya nga malipay kita. (Basaha ang Salmo 104:12-15, 24.) Pero ang mas dapat naton pasalamatan kay Jehova amo ang mga instruksion nga ginahatag niya para mangin mabakod ang aton pagtuo kag ang aton dalayawon nga paglaum sa palaabuton.

9. Ano ang makabulig sa aton para indi kita malipat nga magpasalamat kay Jehova? (1 Tesalonica 5:17, 18)

⁹ Mahapos lang naton malipatan nga pasalamatan si Jehova sa tanan niya nga ginhimo para sa aton. Ano ang makabulig sa imo para  indi ka malipat? Puede mo ilista ang mga ginpangabay mo kay Jehova kag tan-awa ini kon kaisa para makita mo kon paano niya ginsabat ang imo mga pangamuyo. Dayon pasalamati sia kay ginbuligan ka niya. (Basaha ang 1 Tesalonica 5:17, 18.) Hunahunaa ini: Nalipay gid kita kon ginapasalamatan kita sang iban. Sing kaanggid, nalipay man si Jehova kon pasalamatan naton sia kay ginsabat niya ang aton mga pangamuyo. (Col. 3:15) Pero may isa pa ka importante nga rason kon ngaa dapat naton pasalamatan ang aton Dios.

10. Suno sa 1 Pedro 2:21, ngaa dapat naton pasalamatan si Jehova kay ginpadala niya si Jesus sa duta?

¹⁰ Basaha ang 1 Pedro 2:21. Dapat naton pasalamatan si Jehova kay ginpadala niya ang iya pinalangga nga Anak para tudluan kita. Kon tun-an naton ang kabuhi ni Jesus, madamo gid kita sing matun-an parte kay Jehova kag kon ano ang mga puede naton himuon para malipay sia. Kon magtuo kita sa halad sang Cristo, mangin suod kita kay Jehova nga Dios kag mangin maayo ang aton kaangtanan sa Iya.—Roma 5:1.

11. Ngaa nagapangamuyo kita paagi sa ngalan ni Jesus?

¹¹ Ginapasalamatan naton si Jehova kay makapangamuyo kita sa iya paagi sa iya Anak. Ginagamit ni Jehova si Jesus para ihatag ang aton mga ginapangabay. Kon mangamuyo kita paagi sa ngalan ni Jesus, ginapamatian kag ginasabat ini ni Jehova. Ginpaathag ini ni Jesus sang nagsiling sia: “Bisan ano ang pangayuon ninyo sa akon ngalan, ihatag ko ini, agod ang Amay mahimaya paagi sa Anak.”—Juan 14:13, 14.

12. Ano pa ang isa ka rason kon ngaa dapat naton pasalamatan si Jehova bangod sa iya Anak?

¹² Paagi sa halad-gawad ni Jesus, ginapatawad ni Jehova ang aton mga sala. Suno sa Kasulatan, si Jesus amo ang aton “mataas nga saserdote [nga nagapungko] sa tuo sang trono sang Halangdon sa langit.” (Heb. 8:1) Ginatawag si Jesus nga “manugbulig [naton] nga kaupod sang Amay.” (1 Juan 2:1) Nagapasalamat gid kita kay Jehova kay ginhatagan niya kita sang Mataas nga Saserdote nga nakahangop gid sa aton mga kaluyahon kag “nagapangabay man para sa aton.” (Roma 8:34; Heb. 4:15) Kag kon wala ang halad ni Jesus, imposible gid para sa aton bilang indi perpekto nga mga tawo nga magpangamuyo kay Jehova. Hamili gid nga regalo ni Jehova ang iya pinalangga nga Anak sa aton. Pero sigurado nga magaugyon kita nga indi gid naton sia mapasalamatan sing bug-os sa sini nga regalo.

13. Sang gab-i antes napatay si Jesus, paano niya ginpakita nga palangga niya ang iya mga disipulo?

¹³ Sang gab-i antes napatay si Jesus, nangamuyo sia sing malawig para sa iya mga disipulo, kag ginpangabay niya ang iya Amay nga ‘bantayan sila bangod sa isa nga malauton.’ (Juan 17:15) Palangga gid sila ni Jesus. Bisan pa kabalo sia nga sa indi na lang madugay magaantos sia, ginakabalak-an niya gihapon ang iya mga apostoles.

14. Paano naton mapakita nga palangga naton ang aton mga kauturan?

¹⁴ Gusto naton ilugon si Jesus, gani indi lang ang aton mga kinahanglanon ang aton ginahunahuna. Sa baylo, regular naton nga ginapangamuyo ang aton mga kauturan. Kon ginahimo naton ina, ginasunod naton ang sugo ni Jesus nga maghigugmaanay kag ginapakita naton kay Jehova nga palangga gid naton ang aton mga kauturan. (Juan 13:34) Indi naton paghunahunaon nga usik lang sa tion ang pagpangamuyo para sa aton mga kauturan. Ginasilingan kita sang Pulong sang Dios nga “ang pag-ampo sang matarong nga tawo may gamhanan nga epekto.”—Sant. 5:16.

15. Ngaa dapat naton ipangamuyo ang aton mga kauturan?

 ¹⁵ Bangod sang madamo nga kabudlayan sang aton mga kauturan, dapat gid naton sila ipangamuyo. Nagaantos sila bangod sa balatian, kalamidad, inaway, paghingabot, kag iban pa nga kabudlayan. Gani puede naton pangabayon si Jehova nga buligan sila nga mabatas ini. Puede man naton ipangamuyo ang aton mga kauturan nga nagabulig sa mga nahalitan sang kalamidad. Posible nga may mga kilala ka nga may amo sini nga mga kabudlayan. Puede mo sambiton sa imo mga pangamuyo ang ila mga ngalan. Kon ginapangabay naton kay Jehova nga buligan sila nga makabatas, ginapakita naton nga palangga gid naton ang aton mga kauturan.

16. Ngaa dapat naton ipangamuyo ang mga nagapanguna sa aton?

¹⁶ Nagapasalamat gid ang mga nagapanguna sa kongregasyon kay ginapangamuyo naton sila. Nakabulig gid sa ila ang aton mga pangamuyo. Kabalo si apostol Pablo nga kinahanglan niya ang pangamuyo sang iban. Nagsulat sia: “Mangamuyo man kamo para sa akon, agod ihatag sa akon ang pulong kon maghambal ako, para mabantala ko nga may kaisog ang tuhoy sa sagrado nga likom sang maayong balita.” (Efe. 6:19) Subong, nagapangabudlay gid ang madamo nga kauturan nga nagapanguna sa aton. Mapakita naton nga palangga naton sila kon ipangamuyo naton kay Jehova nga pakamaayuhon sila.

17-18. Sa ano nga mga sitwasyon nga posible kita ang pangabayon nga magpangamuyo, kag ano ang dapat naton dumdumon?

¹⁷ May mga sitwasyon nga kita ang pangabayon nga magpangamuyo. Halimbawa, ibutang ta nga ginhagad sang sister ang isa pa ka sister nga updan sia sa iya Bible study. Posible pangabayon sang sister ang iya ginhagad nga amo ang magpangamuyo. Bangod indi pa masyado kilala sang nag-upod nga sister ang Bible study, posible nga magpanugda sia nga pagkatapos na lang sia sang pagtuon mangamuyo. Paagi sa sini, masambit niya sa iya pangamuyo ang mga kinahanglanon sang Bible study.

¹⁸ Posible pangabayon ang isa ka brother nga sia ang magpangamuyo sa miting para sa pag-alagad sa latagon ukon sa miting sang kongregasyon. Dapat dumdumon sang mga brother nga ginpangabay kon ano ang katuyuan sang  miting. Indi nila dapat paggamiton ang pangamuyo para laygayan ang mga kauturan ukon ihambal ang mga pahibalo. Sa kalabanan nga miting sang kongregasyon, lima lang ka minuto ang para sa ambahanon kag pangamuyo, gani indi dapat ‘madamo sing ginasiling’ ang nagapangamuyo nga brother, ilabi na gid sa umpisa sang miting.—Mat. 6:7.

19. Ano ang makabulig sa aton nga mangin handa sa adlaw sang paghukom ni Jehova?

¹⁹ Malapit na gid ang adlaw sang paghukom ni Jehova, gani dapat hatagan pa gid naton sing importansia ang pagpangamuyo. Parte sa sini, si Jesus nagsiling: “Gani, magpadayon kamo nga nagamata kag nagaampo sa tanan nga tion agod magmadinalag-on kamo sa pagpalagyo sa sining tanan nga butang nga mahanabo.” (Luc. 21:36) Mangin mabakod gid ang aton pagtuo kon regular kita nga magpangamuyo, kag makabulig ini sa aton nga mangin handa sa adlaw sang paghukom sang Dios.

20. Paano ang aton mga pangamuyo mangin pareho sa mahamot nga incienso?

²⁰ Ano ang mga ginbinagbinag naton? Ginbinagbinag naton nga dapat gid naton pabaloran ang aton pribilehiyo nga makapangamuyo. Ang pinakaimportante nga mga butang nga dapat naton ipangamuyo amo ang may labot sa katuyuan ni Jehova. Ginapasalamatan man naton ang Anak sang Dios kag ang iya paggahom sa Ginharian, kag ginapangamuyo naton ang aton mga kauturan. Kag gusto ni Jehova nga ipangamuyo naton nga hatagan niya kita sang aton kinahanglanon kada adlaw kag buligan niya kita nga mangin mabakod ang aton pagtuo. Kon hunahunaon naton sing maayo kon ano ang aton ipangamuyo, ginapakita naton nga ginapabaloran naton ining hamili nga pribilehiyo. Mangin pareho sa mahamot nga incienso para kay Jehova ang aton mga pangamuyo, kag ‘kahamut-an Niya ini.’—Hulu. 15:8.