1. Iehova guriguri henia karana be edena bamona ita laloa?

 GUBA bona tanobada ia karaia Diravana ese ita dekenai harihari gauna namona ta ia henia. Ia ese dala ia kehoa ia ita guriguri henia totona. Mani ita laloa: Nega bona gado idauidau ai Iehova dekenai iseda lalona ai idia noho gaudia ibounai ita herevalaia diba. Herevana hospital eiava dibura ruma dekenai ita guriguri, to ita diba momokani iseda lalokau Tamana be ita do ia kamonai henia. Guriguri karana ita laloa bada be namo.

2. Edena dala ai King Davida be guriguri karana ia laloa bada?

² King Davida be guriguri karana ia laloa bada. Iehova dekenai ane ia abia: “Lau ura egu guriguri be emu vairanai idia hegaegaelaia bonana namo muramura bamona.” (Sal. 141:1, 2) Davida ena negai, hahelaga tauna ese tomadiho totona ia gaukaralaia bonana namo muramura be idia hegaegaelaia namonamo. (Eso. 30:34, 35) Davida ia ura Iehova dekenai ia gurigurilaia herevadia ia laloa namonamo, unai bonana namo muramura idia hegaegaelaia namonamo bamona. Unai be iseda ura badana. Ita ura Iehova ese iseda guriguri do ia abia dae.

3. Edena dala ai Iehova ita guriguri henia, bona dahaka dainai?

³ Iehova dekenai mai hemataurai ida ita guriguri be namo. Isaia, Esekiela, Daniela, bona Ioane ese idia itaia matahanai mani ita laloa. Unai matahanai ta ta be idauidau, to  gau ta dekenai idia hegeregere. Idia hahedinaraia Iehova be King hairaina. Isaia ese ‘Iehova ia itaia ena ataiai terona hairaina ai ia helai.’ (Isa. 6:1-3) Esekiela ia itaia Iehova be kariota badana latanai ia helai, ia be “diari badana ese ia hagegea, . . . kevau be ori lalonai ia hedinarai hegeregerena.” (Ese. 1:26-28) Daniela ia itaia “Idaunegai Ia Noho Diravana” be dabua kurokuro ia karaia bona ena terona amo lahi hururuhururu ia raka-lasi. (Dan. 7:9, 10) Bona Ioane ia itaia Iehova be terona ai ia helai bona unai terona be kevau ena toana samaragi nadi bamona ese ia hagegea. (Apok. 4:2-4) Iehova ena hairai ita laloa neganai, unai ese ita ia hadibaia Ia ita guriguri henia karana be hahenamo badana bona mai hemataurai ida ita guriguri be namo. To dahaka gaudia ita gurigurilaia be namo?   

4. Mataio 6:9, 10 ai ia noho guriguri amo dahaka ita dibaia?

⁴ Mataio 6:9, 10 duahia. Ororo Harorona ai, Iesu be ena hahediba taudia dekenai Dirava ese ia moalelaia guriguri dalana ia hadibaia. Iesu ese inai hereva, “inai bamona do umui guriguri” ia gwauraia murinai, ia ese mai anina bada gaudia ia gwauraia guna: Iehova ena ladana hahelagaia karana, Basileia do ia mai bona unai ese Dirava ena inai taudia ibounai do ia hadikaia ore, bona tanobada bona taunimanima totona vaira nega ai do ia karaia gau namodia. Iseda guriguri ai unai gaudia ita herevalaia neganai, ita hahedinaraia Dirava ena ura be mai anina bada.

5. Iseda ura gaudia ita gurigurilaia be maoro, a?

⁵ Iesu ese ia gwauraia guriguri ena kahana ma ta ai, ia hahedinaraia iseda ura gaudia totona ita guriguri diba. Hegeregere, Iehova ita noia dina ta totona iseda aniani ia henia, eda dika ia gwauatao, hahetoho amo ita ia gimaia, bona dika tauna amo ita ia hamauria. (Mat. 6:11-13) Unai gaudia totona Iehova ita noia neganai, ita abia dae ia ese ita do ia durua bona ita ura ia ita hamoalea.

6. Ita guriguri neganai, Iesu ese ia gwauraia gaudia sibona ita gurigurilaia, a? Herevalaia.

⁶ Iesu ia ura lasi ena murinai idia raka taudia ese ena guriguri ai ia gwauraia herevadia idia tohotohoa. Nega ma haida ai ia ese mai  anina bada gaudia totona ia guriguri. (Mat. 26:39, 42; Ioa. 17:1-26) Unai hegeregerena, ita danu be mai anina bada gaudia totona ita guriguri be namo. Disisen ta ita ura karaia neganai, aonega bona laloparara totona ita guriguri diba. (Sal. 119:33, 34) Asainmen badana ta ita ura karaia neganai, diba bona laloa kehoa totona ita guriguri be namo. (Aon. 2:6) Tama sina be edia natudia totona idia guriguri, natudia be edia tama sina totona idia guriguri, bona ita ibounai be iseda Baibel stadi taudia bona ita haroro henia taudia totona ita guriguri be namo. Oibe, heduru abia totona sibona lasi to gau ma haida totona ita guriguri danu.

7. Dahaka dainai guriguri amo Iehova ita hanamoa be namo?

⁷ Ita laloatao iseda guriguri lalonai Iehova ita hanamoa be namo. Iseda Dirava sibona be hegeregere hanamoa ia abia totona. Ia “noho hegaegae dika gwauatao totona.” Danu ia be ‘hebogahisi Diravana, ia badu haraga lasi, ena lalokau be bada herea bona ia be kara momokani Diravana.’ (Sal. 86:5, 15) Ita ese Iehova bona ia karaia gaudia dainai Ia ita hanamoa.

8. Dahaka gaudia ma haida dainai Iehova ita tanikiu henia? (Salamo 104:12-15, 24)

⁸ Danu, guriguri lalonai Iehova ita hanamoa neganai, ita hahedinaraia ia henia gau namodia dainai ia ita tanikiu henia. Hegeregere, flaoaflaoa edia kala idauidau, aniani namodia, bona iseda tura namodia dainai Iehova ita tanikiu. Iseda lalokau guba tamana ese unai bamona gau namodia momo ia henia, ita ia hamoalea totona. (Salamo 104:12-15, 24 duahia.) Mai anina bada gauna be, Iehova ita tanikiu henia badina iseda abidadama hagoadaia gaudia momo bona vaira nega namona ena hahenamo ia henia.

9. Dahaka ese ita ia durua Iehova tanikiu henia karana ita laloatao totona? (1 Tesalonika 5:17, 18)

⁹ Nega momo ita laloaboio Iehova ese ita totona ia karaia gau namodia dainai ita tanikiu henia. Dahaka ese oi ia durua diba? Reana oi gurigurilaia gaudia be lista ta dekenai oi torea, bona gabeai lista oi sekea unai amo do oi itaia Iehova ese edena dala ai emu guriguri ia haerelaia. Bena Ia oi tanikiu henia badina  oi ia durua. (1 Tesalonika 5:17, 18 duahia.) Mani inai oi laloa: Haida be ita idia tanikiu henia neganai, ita moale bona ita mamia ita idia lalokau henia. Unai hegeregerena, Iehova be iseda guriguri ia haerelaia dainai Ia ita tanikiu henia neganai, ia moale bada. (Kol. 3:15) To, mai anina bada gauna ma ta dainai iseda Dirava ita tanikiu henia be namo.

10.  Petero Ginigunana 2:21 hegeregerena, dahaka dainai Iehova ita tanikiu henia?

¹⁰ Petero Ginigunana 2:21 duahia. Iehova ita tanikiu henia badina ena Natuna lalokauna ia siaia ita ia durua totona. Iesu ena sivarai ita stadilaia neganai, Iehova ena kara namodia bona ia hamoalea dalana ita dibaia. Bema Keriso ena boubou gauna ita abidadama henia, ita be Iehova Dirava ena turana namona ai ita lao bona Ia ida maino ai ita noho.​—Roma 5:1.

11. Dahaka dainai Iesu ena ladana dekenai ita guriguri?

¹¹ Iehova ita tanikiu henia badina iena Natuna amo ia ita guriguri henia diba. Iehova ese Iesu ia gaukaralaia ita noia gaudia ia henia totona. Ia ese Iesu ena ladana dekenai ita gwauraia guriguri ia kamonai henia bona haerelaia. Iesu ia gwau: “Egu ladanai dahaka umui noia be do lau karaia, unai amo Tamana be Natuna ese ia karaia gaudia amo hairai do ia abia.”​—Ioa. 14:13, 14.

12. Iehova ita tanikiu henia ena badina ma ta be dahaka?

¹² Iesu ena boubou gauna dainai Iehova ese iseda dika ia gwauatao. Baibel ese Iesu ia gwauraia “hahelaga tauna badana, ia be guba ai King Hereadaena ena terona ena idiba kahanai ia helai.” (Heb. 8:1) Iesu be iseda “durua tauna, ia be Tamana ida ia noho.” (1 Ioa. 2:1) Iehova ita tanikiu henia badina ia ese ita dekenai Hahelaga Tauna Badana ia henia, iseda manoka gaudia ia lalopararalaia bona “ita totona Dirava ia noinoi henia”! (Roma 8:34; Heb. 4:15) Ita be goevadae lasi taudia dainai bema Iesu ena boubou gauna be lasi, guriguri amo Iehova kahirakahira ita lao diba lasi. Unai dainai, nega ibounai Iehova ita tanikiu henia badina ita dekenai ena Natuna lalokauna ia henia, unai be harihari gauna namo hereana!

13. Iesu ena hanuaboi ginigabena ai, edena dala ai ia hahedinaraia ena hahediba taudia ia lalokau henia?

¹³ Iesu ena hanuaboi ginigabena ai, ena hahediba taudia totona guriguri latana ia gwauraia, ena Tamana ia noia ‘Dika Tauna amo idia do ia gimaia’ totona. (Ioa. 17:15) Unai ese ia hahedinaraia Iesu be idia ia lalokau henia bada! Ena be ia diba ia be hisihisi bada do ia abia, to ena aposetolo taudia totona ia lalohekwarahi.

14. Edena dala ai ita hahedinaraia iseda tadikaka bona taihu ita lalokau henia?

¹⁴ Ita be Iesu ita tohotohoa dainai eda ura gaudia sibona ita laloa lasi. To, hanaihanai iseda tadikaka bona taihu totona ita guriguri. Unai bamona ita karaia neganai, ita be Iesu ena hahegani, ta ta lalokau henia karana unai, ita badinaia bona Iehova dekenai ita hahedinaraia iseda tadikaka taihu ita lalokau henia bada. (Ioa. 13:34) Iseda tadikaka bona taihu totona ita guriguri karana ese idia do ia durua. Dirava ena Hereva ese ita ia hamaoroa “kara maoromaoro tauna ena noinoi be mai ena siahu.”​—Iam. 5:16.

15. Dahaka dainai iseda tadikaka bona taihu totona ita guriguri?

¹⁵ Iseda tadikaka taihu be hekwakwanai momo idia davaria, unai dainai idia totona  ita guriguri be namo. Iehova ita noia idia ia durua unai amo gorere, disasta idauidau, tuari, dagedage karadia eiava hekwakwanai ma haida idia haheaukalaia. Danu disasta idia vara neganai, heduru idia henia tadikaka taihu totona ita guriguri. Reana unai bamona hekwakwanai idia davaria taudia haida oi diba. Idia totona oi guriguri neganai, edia ladana oi gwauraia danu. Iehova ita noia idia ia durua idia haheauka totona, unai amo ita hahedinaraia idia ita lalokau henia.

16. Dahaka dainai ita idia gunalaia taudia totona ita guriguri?

¹⁶ Kongrigeisen ai idia gaukara goada tadikaka totona ita guriguri neganai, idia moale bada bona unai bamona guriguri ese idia ia durua. Aposetolo Paulo ia ura ma haida be ia totona idia guriguri. Ia gwau: “Lau totona umui guriguri danu, unai amo heduru lau abia diba lau hereva totona, bona mai gari lasi ida do lau hereva bona hunia hereva helagana ena sivarai namona do lau gwauraia hedinarai.” (Efe. 6:19) Hari inai negai, iseda huanai idia gaukara goada tadikaka momo idia noho danu. Iehova ita noia edia gaukara ia hanamoa, unai amo ita hahedinaraia idia ita lalokau henia.

17-18. Edena negai ita idia noia ma haida totona ita guriguri, bona dahaka ita laloatao be namo?

¹⁷ Nega haida, ita idia noia ma haida totona ita guriguri. Hegeregere, Baibel stadi ia naria taihu ese ia bamoa taihu ia noia diba guriguri ia gwauraia totona. Stadi naria taihu ia bamoa taihu be stiuden ia diba namonamo lasi dainai, reana do ia ura stadi ena dokonai guriguri ia gwauraia. Unai amo stiuden totona ia guriguri neganai, ia diba dahaka do ia gwauraia.

¹⁸ Tadikaka ta idia noia haroro hebouna eiava kongrigeisen hebouna ai ia guriguri totona. Guriguri idia gwauraia tadikaka ese hebou ita karaia ena badina idia laloatao be namo. Guriguri karana be kongrigeisen sisiba henia eiava hadibaia herevadia gwauraia totona lasi. Kongrigeisen heboudia ai miniti 5 be ane bona guriguri totona, unai dainai hebou hamatamaia totona guriguri ia gwauraia tadikaka ese “hereva momo” ia gaukaralaia lasi be namo.​—Mat. 6:7.

19. Dahaka ese ita do ia durua Iehova ena hahemaoro dinana ai ita hegaegae totona?

¹⁹ Iehova ena hahemaoro dinana ia kahirakahira dainai, guriguri karana ita laloa bada. Unai dainai, Iesu ia gwau: “Umui noga noho bona hanaihanai umui guriguri goadagoada, unai amo do idia vara gaudia amo do umui heau mauri bona taunimanima ena Natuna ena vairanai do umui gini diba.” (Luka 21:36) Bema hanaihanai ita guriguri, iseda abidadama do ia goada bona Dirava ena hahemaoro dinana ia ginidae neganai do ita hegaegae.

20. Edena dala ai ita gwauraia guriguri be bonana namo muramura bamona?

²⁰ Inai atikol ai dahaka ita herevalaia? Ita ese guriguri karana ita laloa bada. Guriguri lalonai Iehova ena ura gaudia ita gwauraia be mai anina bada. Danu iseda guriguri lalonai Dirava ena Natuna bona iena Basileia dainai ita tanikiu, bona iseda tadikaka taihu totona ita guriguri. Iehova ia ura tauanina durua gaudia bona iseda abidadama ia goada noho totona ita guriguri. Guriguri totona do ita herevalaia gaudia ita laloa namonamo neganai, ita hahedinarai guriguri ena hahenamo ita laloa bada. Iehova dekenai ita gwauraia herevadia be bonana namo muramura bamona, “Dirava ia hamoalea.”​—Aon. 15:8.