1. Kunnasi tam nga imammatan i pribilehio nga makimallo kani Jehova?

 NEDDAN ittam tu makapabbaw nga pribilehio—i makaranni ta Namaratu ta langi anna davvun gukaban na pakimallo. Nonopan yaw: Awayya tam nga ivuvvu i naddian na futu tam kani Jehova ta maski anni nga oras, maski anni nga lengguahe, anna ari tam kawagan i maki-appointment. Awayya tam i makimallo maski agga-confine ittam ta hospital onu agga-fuku ittam. Makkomfiansa ittam nga ginnan ittam na minaggiddu nga Yama tam. Ari tam tagilappawan yaw nga pribilehio.

2. Kunnasi nga nipasingan ni Patul David nga tagibaloran na i pribilehio nga makimallo?

² Tinagibalor ni Patul David i pribilehio nga makimallo. Nikansion na kani Jehova: “Kari tu alawatam-mu i pakimallo ku nga kunna atu na insensu.” (Sal. 141:1, 2) Ta tiempo ni David, meprepara tu mapia i sagradu nga insensu nga usan na papari ta kurug nga paddayaw. (Ex. 30:34, 35) Megafu ta ammu yatun ni David, kayà na nga pannonopan tu mapia nu anni i ikagi na ta nelangitan nga Yama na. Yatun i kuruga kakayà tam gapa. Ikaya tam nga makapagayayya kani Jehova i pakimallo tam ira.

3. Anni i mawag tu ipasingattam nu makimallo ittam kani Jehova, anna ngatta?

³ Nu makimallo ittam kani Jehova, mawag nga ipasingattam i dakal nga respeto. Nonopan i makapabbaw nga sirmata nga nasingan ni Isaias, Ezekiel, Daniel, anna ni Juan. Madduruma yatun ira nga sirmata, ngem egga i napparehassadda. Ipasingan  natun ira nga si Jehova ay makapabbaw nga Patul. Nasingan ni Isaias si “Jehova nga agga-itubang ta marayaw anna atannang nga trono.” (Isa. 6:1-3) Nasingan ni Ezekiel si Jehova nga agga-itubang ta nelangitan nga karuahe nga napalevutan ta ‘nawag nga negitta ta vullangun.’ (Eze. 1:26-28) Nasingan ni Daniel nga agga-sinnun tu furaw “i Ollu ta Aggaggaw” anna umafa-afi i trono Na. (Dan. 7:9, 10) Nasingan gapa ni Juan si Jehova nga agga-itubang ta trono nga napalevutan tu vullangun nga kagitta na kulor na esmeralda. (Nep. 4:2-4) Nu pannonopattam i makapabbaw nga dayaw ni Jehova, meperaddam ta nittam i daka-dakal nga pribilehio nga umaranni ta nisa gukaban na pakimallo. Mawag gafu nga ipasingattam i respeto nu makimallo ittam. Ngem anni i mawag tu ipakimallo tam?

4. Anni i magigiammu tam ta ollu ira nga nakagi ta modelo nga pakimallo ta Mateo 6:9, 10?

⁴ Bibbigan i Mateo 6:9, 10. Ta Sermon ta Vukig, nituddu ni Jesus ta disipulo na ira i akkimallo nga mamagayayya ta Dios. Kabalin na kinagi nga “kunnoye gafu i akkimallo nu,” ollu nga kinagi na i importante ira nga gannug meyannung ta gakkag ni Jehova: i pamakasanto ta ngagan Na; i paddattal na Pappatulan nga manaral ta ngamin nga kumokkontra ta Dios; anna i mappange ira nga bendision nga iyawa Na ta davvun anna ta ngamin nga totolay. Nu ilavu tam danatun ta pakimallo tam, ipasa-pasingattam nga importante ta nittam i gakkag na Dios.

5. Mepangngo kari nga ipakimallo tam i personal ira nga gannug?

⁵ Ta tumunug nga parte na pakimallo ni Jesus, nituddu na nga mepangngo gapa tu ipakimallo tam i personal ira nga gannug. Awayya tam nga ipakimallo kani Jehova nga iddan na ittam tu makan ta tangaggaw, pakoman na i liwi-liwa tam, protektan na ittam ta tentasion, anna paliaran na ittam kani Satanas. (Mat. 6:11-13) Nu ipakimallo tam kani Jehova danatun, mepasingattam nga kawagattam i uffun na anna ikaya tam nga mapagayayya yayya.

6. I awayya tam laman kari nga ipakimallo ay danuri nakagi ta modelo nga pakimallo? Ipakanawag.

⁶ Ari nga kayà ni Jesus nga parigan na tagatuttul na ira i mismu nga uvovug nga kinagi  na ta modelo nga pakimallo. Ta karuan nga pakimallo ni Jesus, nikagi na i madduruma nga pakavurungan na. (Mat. 26:39, 42; Juan 17:1-26) Puede tam gapa ipakimallo i anni laman nga kavurungattam. Nu maddesision ittam, awayya tam nga ipakimallo i sirib anna pakalippawa. (Sal. 119:33, 34) Nu egga i mariga nga annungattam, awayya tam ipakimallo i pakalippawa nu kunnasi tam nga ituppal yatun. (Prov. 2:6) Puede nga ipakimallo na magana ira i ána da. I ána gapa ira, puede da nga ipakimallo i magana da ira. Mawag tam gapa ngamin nga ipakimallo i Bible study tam ira anna i ngamin nga layyagayyattam. Siempre, ari laman nakuan tu puru kiddaw i ipakimallo tam.

7. Ngatta mawag tu dayawattam si Jehova ta pakimallo?

⁷ Mawag nga dayawattam si Jehova ta pakimallo tam ira. Awan ngana tu mas mepangngo ta dayaw anne ta Dios tam. ‘Mapia anna minammakoma yayya.’ ‘Minaggallallo anna minaggiddu gapa yayya, kanayun i appasensia na tuange ta pangaya anna kekatalo na.’ (Sal. 86:5, 15) Mepappangngo gafu nga dayawattam si Jehova megafu ta kualidad na ira anna ta kukukuan na ira.

8. Anni i karuan nga awayya tam ipappabalo kani Jehova? (Salmo 104:12-15, 24)

⁸ Fuera paga ta pangidayaw tam kani Jehova ta pakimallo tam ira, mapaguyu ittam nga mappabalo ta nisa ta makapabbaw ira nga gannug nga iyayawa na. Angngarigan na, awayya tam nga ipappabalo i makakkasta nga kulor ira na lappaw, i napakaru nga masingngo nga makan, anna i makapagayayya nga pakikavulu ta madukko nga kokkofun. Maggafu ngamin yatun ta minaggiddu nga Yama tam anna mas aru paga i iyayawa na tapenu laman mapagayayya na ittam. (Bibbigan i Salmo 104:12-15, 24.) Pinaka-importante tatun, mappabalo ittam kani Jehova megafu ta abundansia nga espiritual nga makan nga iyayawa na anna ta makapabbaw nga iddanama tam ta mappange.

9. Anni i kuattam tapenu kattam mattaman i mappabalo kani Jehova? (1 Tesalonica 5:17, 18)

⁹ Alistu laman nga mattamattam i mappabalo kani Jehova ta ngamin nga kukukuan na para ta nittam. Anni i kuammu tapenu kammu  mattaman i mappabalo? Awayyam nga ilista i nipakimallo mu ira tapus kada kua, innammu nu kunnasi nga sinabbag ni Jehova danatun nga nilistam. Tapus mappabalo ka ta nisa megafu ta uffun na. (Bibbigan i 1 Tesalonica 5:17, 18.) Nonopan yaw: Magayayya ittam anna matageno tam nga meddeddu ittam nu mappabalo i tanakuan ta nittam. Kunnari gapa, magayayya si Jehova nu mappabalo ittam ta nisa megafu ta pattabbag na ta pakimallo tam ira. (Col. 3:15) Ngem egga paga i importante nga rason tapenu mappabalo ta Dios.

10. Base ta 1 Pedro 2:21, ngatta mappabalo ittam kani Jehova ta pangidog na kani Jesus ta davvun?

¹⁰ Bibbigan i 1 Pedro 2:21. Mappabalo ittam kani Jehova ta pangidog na ta meddu nga Ana na tapenu tudduan ittam. Ta paggigiammu tam ta pattolay ni Jesus, aru i mammuattam meyannung kani Jehova anna nu kunnasi tam yayya mapagayayya. Nu ipasingattam i pangurug ta sakrifisio ni Cristo, mapeggan ittam tu madukko nga pakikkofun kani Jehova nga Dios anna memammo i relasiottam ta Nisa.​—Roma 5:1.

11. Ngatta makimallo ittam ta ngagan ni Jesus?

¹¹ Mappabalo ittam kani Jehova megafu ta awayya tam i makimallo ta nisa gukaban na Ana na. Usu-usan ni Jehova si Jesus tapenu tabbagan i pakimallo tam ira. Ginnan ni Jehova anna tattabbagan na i pakimallo ira nga nekiddaw ta ngagan ni Jesus. Nipakanawag ni Jesus: “Kuak-ku i anni laman nga ikiddaw nu ta ngagak-ku tapenu iddan na Ana tu dayaw i Yama.”​—Juan 14:13, 14.

12. Anni paga i rason tapenu mappabalo ittam kani Jehova megafu ta Ana na?

¹² Pakoman ni Jehova i liwi-liwa tam ira megafu ta sakrifisio nga tavvu ni Jesus. Ta Biblia, si Jesus i ‘Katannangan nga Pari tam nga nagitubang ta ziwanan na trono na Katannangan nga Patul ta langi.’ (Heb. 8:1) Si Jesus i “mangipakimemallo nittam ta Yama.” (1 Juan 2:1) Anni ngana mabba i pappabalo tam kani Jehova ta pangiyawa na ta minangngikallo nga Atannang nga Pari nga makalippawa ta pakkafiattam ira anna ‘mangipakimemallo ta nittam!’ (Roma 8:34; Heb. 4:15) Megafu ta imperfekto ittam, ari ittam nakuan nga makaranni kani Jehova gukaban na pakimallo. Pia ngana laman ta egga i sakrifisio ni Jesus. Siguradu nga umanugu ka nga ari vuluvuga makalanno i pappabalo tam ta nabalor nga regalu ni Jehova ta nittam—i meddu nga Ana na!

13. Ta gabi nage na patay ni Jesus, kunnasi na nga nipasingan nga iddeddukan na i disipulos na ira?

¹³ Ta gabi nage na patay ni Jesus, apapaddu i pakimallo na para ta disipulos na ira. Nikiddona ta Yama na nga ‘paliaran na ira ta Demonio.’ (Juan 17:15) Talaga iddeddukan ni Jesus i disipulos na ira! Maski nu ammu na nga mappapange ngana yayya ta kuruga kitazziga nga kapurueba, agga-nono na lagapa i disipulos na ira.

14. Kunnasi tam mepasingan nga talaga iddeddu tam i wawwaragi tam?

¹⁴ Kunna pamarig tam kani Jesus, ari laman tu pakawagattam i agga-nono tam. Lallagu, kanayuttam nga ipakimallo i wawwaragi tam. Nu kuattam yatun, tuttuttulattam i dob ni Jesus nga makka-aya-aya ittam anna ipasa-pasingattam kani Jehova nga kuruga ayatattam i kapangngurug tam ira. (Juan 13:34) Masayang kari i oras tam nu ipakimallo tam i wawwaragi tam? Ari, megafu ta kagian na Biblia nga “dakal i pakawayya na pakimallo na tolay nga matunung.”​—Sant. 5:16.

15. Ngatta kawagan na kapangngurug tam ira i pakimallo tam?

 ¹⁵ Kuruga kawagan na kapangngurug tam ira i pakimallo tam megafu ta aru i pakaziga-rigatadda. Awayya tam nga ipakimallo kani Jehova nga duffungan na ira tapenu makapagattam ta taki, kalamidad, gerra, pameppersigi, onu karuan paga. Awayya tam gapa nga ipakimallo i minassakrifisio nga wawwaragi tam nga manguffun ta disaster relief. Awayya na tu egga i kilalam nga meparubang ta kunnatun ira nga ziga. Ilavu mu i ngagadda ta personal nga pakimallo mu. Mepasingattam i kuru-kurug nga pagiddu ta wawwaragi tam nu kiddawattam kani Jehova nga uffunan na ira nga makapagattam.

16. Ngatta mawag tu ipakimallo tam danuri mangirollu ta nittam?

¹⁶ Appresian na mangirollu ira ta kongregasion i pakimallo na tanakuan para ta nira megafu ta makoffun yatun ta nira. Ammu ni apostol Pablo nga kawagan na i pakimallo na tanakuan. Nitura na: “Isipi-sipo nù gapa ta pakimallo nu tapenu iyawa niakan na Dios i uvovug nga ikaya na nga ipekagi. Ta kunnuri, mabbalin ngà tu magutu nga mangilammuyag ta sekreto na evanghelio.” (Efe. 6:19) Sangawe, napakaru nga brother i malallappo nga mangirollu ta nittam. Mepasingattam i pangaya ta nira nu ipakimallo tam kani Jehova nga bendisionan na i kukukuadda.

17-18. Ta anni ira nga situasion nga mekiddaw ta nittam nga irollu tam i pakimallo, anna anni nakuan i daddammattam?

¹⁷ Nu karuan, awayya na tu mekiddaw ta nittam nga irollu tam i pakimallo. Angngarigan na, baka kiddawan na sister nga mangikondukta tu Bible study ta sister nga namulu ta nisa nga irollu i pakimallo. Awayya na tu ari kuruga kilala natun nga sister i Bible study, yayya nga mas mepangngo nu yayya ngana laman ta closing prayer. Nu kunnatun, mas mebagay na ngana i pakimallo na ta pakawagan na Bible study.

¹⁸ Awayya na tu mekiddaw ta brother nga irollu na i pakimallo ta meeting ta field service onu ta study. Daddamman nakuan na brother ira nga neddan tu kunnaw nga pribilehio i gakkag danatun nga paggarammammung. Ari nakuan nga meyusa i pakimallo  tapenu manabarang ta kongregasion onu mangiyanunsio. Ta study ira, maruddu nga i kansion anna pakimallo ay lima minuto laman. Yari tu ari nakuan mangusa tu “kuruga aru nga uvovug” i brother ira nga mangirollu ta pakimallo, mas ngana ta gafu na study.​—Mat. 6:7.

19. Anni i mawag nga kuattam tapenu ari ittam makaddagan ta aggaw na pamanunnu ni Jehova?

¹⁹ Mas paga nakuan nga pabbalinattam tu prayoridad i pakimallo megafu ta aranni ngana i aggaw na pamanunnu ni Jehova. Kinagi ni Jesus: “Mappara-parak-kamu anna kanayuk-kamu nga maddasal tapenu egga i sikan nu nga mangililli taw ngamin nga mesissimmu.” (Luc. 21:36) Nu regular ittam nga makimallo, mabbalin ittam tu agga-lukag ta espiritual tapenu ari ittam makaddagan ta dattal na aggaw na Dios.

20. Kunnasi nga mabbalin tu kagitta na mabangug nga insensu i pakimallo tam ira?

²⁰ Anni ira i nagigiammu tam? Kuruga tagibalorattam i pribilehio nga makimallo. I pinaka-importante nga ipakimallo tam ay i gannug ira nga konektadu ta gakkag ni Jehova. Ipappabalo tam gapa i Ana na Dios anna i pammagurena ta Pappatulan, anna ipakimallo tam i kapangngurug tam ira. Siempre, awayya tam gapa nga ipakimallo i pisikal anna espiritual ira nga kawagattam. Nu pannonopattam tu mapia i kagiattam ta pakimallo tam ira, ipasa-pasingattam nga tagibalorattam yaw nga makapabbaw nga pribilehio. I pakimallo tam ira ay mabbalin tu kagitta na mabangug nga insensu nga ‘mamagayayya kani Jehova.’—Prov. 15:8.