1. Ányị ahị tị́ ka yẹ iwe ọlẹ kahị la nyọka raabwọ ha iJihova?

 ỌNGỌ họ epwoohe bala odehe ya āhị ọnyịịla-ọnyịịla hahị. Ọ ya ẹga da hahị nyọka raabwọ họọ. Kụ irya wẹẹ: Ahị ka jẹ́-ẹ kpa òja ọnyị myị́ ọnyị ya ẹla bala iJihova ụka myị́ ụka la o-ye ọnụ bwu ẹga nya ọngọngọhẹ ene ka. Ahị ka jẹ́-ẹ raabwọ họọ bwu ube-utoji lee ube nya agba myị́, la ahị ọdahile nyori Adahị ọ-la ọháha ka ke ụrụ wo lahị. Áhị kaa kpa iwe ọwẹ kọ ayịlọ kpong-kpong ka.

2. Ányị Adịrahụ iDevidi à tị́ mẹjẹ nyori iwe nya abwọ ọrịrị myọọ lẹhị yẹẹyẹẹ?

² Iwe nya abwọ ọrịrị myị Adịrahụ iDevidi lẹhị yẹẹyẹẹ. Ọ mweje ha iJihova yẹkẹẹ: “Ye abwọ ọrịrị nyam lala iya nya ịtangare ọlẹ kam kịla hang.” (Eje. 141:1, 2) Lụka nya iDevidi, ị kaa nwụla iya nya ịtangare ọlịgọgọ ọlẹ ká angịkiliya kaa kpa họ ụkụrwọ ẹ-ẹpwụ nya ịgba ọgbagba nyịlẹhị nọ yẹẹyẹẹ. (Ehe. 30:34, 35) IDevidi tịtọ kọ ka kụ irya rige-rige ju ẹla ọlẹ kọ ka ya ụka kọ ka raabwọ ha iJihova jaabwọ ká angị họ iya nya ịtangare ọwẹ kaa nwụlọọ nọ yẹẹyẹẹ. Irya ọlịnyị ahị la bwu ọkịlẹtụ nyahị ịnyịnyị lẹ. Ahị tịtọ ká abwọ ọrịrị nyahị ka kpụ iJihova ịpyọ.

3. Abwẹla ọlányị ahị tị́ ka mẹjẹ ụka kahị juwa raabwọ ha iJihova? Ịyẹ tị́ du?

³ Ụka kahị ka raabwọ ha iJihova, áhị ka hwoo lala ẹla nya ayịlọ ka. Ọkọkọ nyọọwa, ahị ka mẹ ihi okpori-kpori jẹ ụka kahị juwa raabwọ. Kụ irya u-uhye nya ọyị ọyẹyẹ a-arụrụ ịlẹbyẹbyị ịlẹ kị mẹjẹ Ayịsaya, Isikẹlụ, ịDanẹlụ bala ịJọn wẹẹ. Ọyị ọyẹyẹ ịịwa datị-datị hi awụlẹ, ma ị tị la ang okpokpo ọlẹ kọ me awụlẹ. Ịwa wuu chabwọ nya iJihova nya Adịrahụ ọla ụmụmẹ. Ayịsaya “yẹ [iJihova] kọ hụhụ u-uhye nya ẹchị-adịrahụ  nyamwụ ọlẹ kọ la gidogboo.” (Ayị. 6:1-3) Isikẹlụ yẹ iJihova kọ hụhụ u-uhye nya ang-ọrụnyẹ ọlịgọgọ nyamwụ ọlẹ ká “ila dagaga jwoo . . . lala ọwọ ọlẹ kọ kaa chị.” (Isik. 1:26-28) ỊDanẹlụ yẹ “ọngọ hịhị bwu orogo-orogo” kọ kụrụ ịwụrụ inyiiwuru, la ila juwa hụ́ mị́ra-mị́ra bwu ẹchị-adịrahụ Nyamwụ. (Dan. 7:9, 10) ỊJọn ịnyịnyị yẹ iJihova kọ hụhụ ẹ-ẹchị adịrahụ ọlẹ ká ịngịhyẹ lala ọwọ ọlẹ kọ chị ịna nya ẹjwọ ọnyịịla-ọnyịịla ọlẹ kị wụrụ nya ẹmaradị dagaga ju. (Ọwụ. 4:2-4) Jaabwọ kahị wẹẹ kụ irya u-uhye nya ogbo ọ-la ọchụme-ka nya iJihova, ọọwa ka kpụhị ịtịya nya iwe ọnyịịla-ọnyịịla ọlẹ kahị la nyọka kà ẹga nyamwụ ẹ-ẹpwụ nya abwọ ọrịrị bala ọ-baba nyọka họ ịnyị lihi-ihi. Ma ányị ahị tị́ ka bwu raabwọ?

4. Ẹlịyẹ ahị tị́ jẹ́ bwu omyi ẹla ịlẹ ká iJisọsị kpa wụrụ abwọ ọrịrị nya Ọngọlahị ọlụpwụ nya ịMatiyu 6:9, 10?

⁴ Wa ịMatiyu 6:9, 10. Ẹ-ẹpwụ nya Ang Ọmẹjẹ Oluhye nya Ọgbọdọ, iJisọsị mẹ ụgbẹyị ọlẹ ká angịjụgbẹyị nyamwụ ka bwu raabwọ kọ ka kpụ Ohe ịpyọ jáa. Nyọlẹ ká iJisọsị byaa nyori “ịịlẹ anụ ka bwu raabwọ ha Ohe Oluhye lẹlẹ” kpá, ọ gu ẹnyị nya ang ịlẹ kị baba gụgụ wuu jene ụka kọ wẹẹ raabwọ. Ọ raabwọ chajị nyọka chị ịgọgọ ju ẹnyị nya iJihova; Ịpyị-Adịrahụ ọ-ka wẹ, kọ ka ta aluji nya Ohe wuu ayịreji; bala ang ịnyịịla ịlẹ Kọ ka họ ị-ịlahị ha odehe ọlẹ tụ́ angịnyị ehe. Bwula o-gu ẹnyị nya ang ịlịịwẹ ẹ-ẹpwụ nya abwọ ọrịrị nyahị, ahị mẹjẹ nyori irya nya Ohe baba hahị.

5. Ọ tịpyọ nyọka raabwọ chajị nya ịbaba nyịlọhị?

⁵ Ụpa ọkịla nya abwọ ọrịrị ọwẹ, iJisọsị mẹjẹ nyori nyị́ tịpyọ nyọka raabwọ chajị nya ịbaba nyịlọhị ka ịnyịnyị. Ahị ka jẹ́-ẹ bịlẹ iJihova kọ ka ya ang oriri nya ahyẹẹnụ hahị, hịnyọhi ịhọbịrị nyahị, chewu keehi bwu ịmayẹ, bala ọ-ka gbahị kpehe bwu ẹpwụtụbwọ nya ọlọkwọ. (Mat. 6:11-13) Ụka kahị bịlẹ ang ịlịịwe bwu ẹga nya iJihova, ahị wẹẹ mẹjọ́ọ nyori ahị jẹ́ kahị baba nya ụbwọ ọdada nyamwụ bala o-ri ahị tịtọ nyọka họ ẹla kpọọ ịpyọ.

6. Ang ịlẹ kị gu ẹnyị a-abwọ ọrịrị nya Ọngọlahị kem, ahị ka jẹ́-ẹ raabwọ chajị nyaa lẹ? Ịyẹ tị́ du?

⁶ IJisọsị á tịtọ ká angịjụgbẹyị nyamwụ ka dịrẹ omyi ẹla nya abwọ ọrịrị ọwẹ rige-rige ka. Ẹ-ẹpwụ nya abwọ ọrịrị ịkịla ịlẹ ká iJisọsị rị, ọ gu ẹnyị nya ang ịkịla ịdatị ịlẹ kị baba họọ lụka  ọwẹ. (Mat. 26:39, 42; Jọn. 17:1-26) Lẹ, ahị ka jẹ́-ẹ raabwọ u-uhye nya ang myị́ ang ịlẹ kị ri uko ọchịchị nyahị ịnyịnyị. Ụka kahị ja ka cheje nya ẹla, ahị ka jẹ́-ẹ bịlẹ ẹla ọjẹ́jẹ bala ọ-jẹ́ myị̀myị̀. (Eje. 119:33, 34) Ụka kahị ja ka dọmwụ nya ụkụrwọ olujwo, ahị ka jẹ́-ẹ raabwọ bịlẹ ụbwọ ọdada nyọka jẹ́ jaabwọ kahị ka bwu họọ. (Etu 2:6) Adịda bala ịnịna ka jẹ́-ẹ raabwọ chajị nya anyị nyaa, anyị tị ka jẹ́-ẹ raabwọ chajị nya adaa bala ịnaa ịnyịnyị. Ahị wuu ka jẹ́-ẹ raabwọ chajị nya angịlẹ kahị kaa mẹ ịBayịbụụ jẹ bala ọ-ya ẹla nya Ohe ju, ọ tị chịla kahị ka họ ịnyị. Ma ụka kahị ka raabwọ, ụ-ụbwọ ọdada kem ahị ka bịlẹ bwu ẹga nya iJihova ka.

7. Ịyẹ tị́ du kahị ka gwogbo ha iJihova ẹ-ẹpwụ nya abwọ ọrịrị?

⁷ Ahị ka kpịtịya nyọka gwogbo ha iJihova ẹ-ẹpwụ nya abwọ ọrịrị nyahị. Ọngọngọhẹ-ẹ́ ji kọ chịla nyọka yogbo ha gụ Ohe nyahị kaka. Ọ kaa “hịnyọhi bala ọ-họ ang ọnyịịla hahị lụmẹ.” Ọ myịmyị ri ‘ọlọnahị bala ọ-yẹ ahyẹẹrwẹrwa, ọọ ju agbama hyaa ka, ọ kaa la ọháha o-gbu enyi-ka bala ọ-họ kpẹẹkpẹẹ ẹ-ẹga nya angịnyị nyamwụ.’ (Eje. 86:5, 15) Ahị la ang odudu ọnyịịla nyọka yogbo ha iJihova ịlẹhị chajị nya ụma nya ọngọlẹ ko ri bala ang ịlẹ kọ kaa họ.

8. U-uhye nya ang iyina ahị tị́ ka jẹ́-ẹ ji iJihova obe ọhọhọ myị́? (Eje Ọnyịịla 104:12-15, 24)

⁸ Datị hi o-gwogbo ha iJihova ẹ-ẹpwụ nya abwọ ọrịrị nyahị, ahị kaa joo obe ọhọhọ chajị nya ang ịnyịịla-ịnyịịla ịlẹ kọ họ hahị. Ọ-chụ pwokwita, ahị kaa joo obe ọhọhọ chajị nya ido ị-kpẹhị nyii ịlẹ kahị kaa yẹ ị-ịfụlawa, ang iriri ịdatị-datị ịlịpyọ-lịpyọ ịlẹ kahị ka jụ́ wa myị́ ka, bala ọkẹkẹnị nya ọ-la aligu ịlịkẹjẹ. Adahị ọ-la ọháha ya ang ịwẹ wuu bala ịkịla lụmẹ-lụmẹ hahị chajị kahị ka chị ọkẹkẹnị. (Wa Eje Ọnyịịla 104:12-15, 24.) Ọlẹ kọ tị baba gụgụ wuu, ahị ji iJihova obe ọhọhọ chajị nya iru nya ang oriri nya olegu ịlẹ kọ ya hahị bala ahị ọdahile nya ijuju ọnyịịla ọlẹ kahị la.

9. Ịyẹ à tị́ ka dahị ụbwọ kpịtịya nyọka ji iJihova obe ọhọhọ? (1 Ala ịTẹsalonika 5:17, 18)

⁹ Ọ chịkpẹẹ lụmẹ kahị ka deeri la ọ-ka ji iJihova obe ọhọhọ chajị nya ang ịlẹ wuu kọ họ hahị. Ịyẹ à tị́ ka dang ụbwọ nyọka kpịtịya? À ka jẹ́-ẹ da ang ịdatị-datị ịlẹ ka raabwọ bịlẹ ju ụpwụ myị́, bala ọ-chẹhị yaa myịmyị ụka  kọ nọ pyịnyẹng nyọka yẹ jaabwọ ká iJihova wẹ abwọ ọrịrị nyang. Ọọwa a raabwọ nyọka joo obe ọhọhọ nya ụbwọ ọdada nyamwụ lẹlẹ. (Wa 1 Ala ịTẹsalonika 5:17, 18.) Kụ irya u-uhye nya ẹla ọlẹ wẹẹ: Ọọ kpụhị ịpyọ ụka ká angịkịla á mẹjẹ nyori ang ọlẹ kahị họ haa myaa lẹhị, ahị kaa chị ọkẹkẹnị. Ịnyịnyị, iJihova kaa chị ọkẹkẹnị ụka kahị kpịtịya nyọka joo obe ọhọhọ nyọlẹ kọ wẹ abwọ ọrịrị nyahị. (Kol. 3:15) Ang ọkpọnchị ọkịla tị juwa ọlẹ kọ du kahị ka ji iJihova obe ọhọhọ.

10. Jaabwọ ká 1 iPita 2:21 ya, ịyẹ a tị́ du kahị ka ji iJihova obe ọhọhọ nyọlẹ kọ du iJisọsị wẹ odehe ọlẹ?

¹⁰ Wa 1 iPita 2:21. Ọ chịla kahị ka ji iJihova obe ọhọhọ nyọlẹ kọ du Ọnyẹwẹ nyamwụ wẹ ka mẹ ang jẹ́ẹhị. Ụka kahị wa ụpwụ u-uhye nya iJisọsị, ahị kaa jẹ́ ang lụmẹ-lụmẹ chajị nya iJihova bala ang ọlẹ kahị ka họ kọ ka chị ọkẹkẹnị. Kori kahị tị mẹjẹ nyori ahị la ọmyịmyị u-uhye nya iya ọkịlaakịla nya ịKịrayịsị, ahị ka jẹ́-ẹ ri oligu nya iJihova Ohe Oluhye la apatabwọ kiwa ka, ahị myịmyị ka la okpunyi balọọ.—Rom. 5:1.

11. Ịyẹ tị́ du kahị kaa raabwọ bwula ẹnyị nya iJisọsị?

¹¹ Ahị ji iJihova obe ọhọhọ nyori ahị ka jẹ́-ẹ raabwọ họọ la ẹnyị nya Ọnyị nyamwụ. IJihova kaa kpa iJisọsị họ ang ọlẹ kahị bịlọọ hahị. IJihova kaa ke ụrụ wo abwọ ọrịrị ịlẹ kaahị ri bwula ẹnyị nya iJisọsị bala ọ-wẹ́ẹhị ịnyịnyị. IJisọsị yẹkẹẹ: “Ang myị́ ang ọlẹ kanụ ka bịlẹ Ohe Oluhye la ẹnyị nyam, m ka họ ang ọọwa hanụ, chajị ká angịnyị ka jẹ́-ẹ gwogbo ha Ohe Oluhye Adịda bwula Ọnyẹwẹ nyamwụ.”—Jọn. 14:13, 14.

12. Ang ọkịla oyina à tị́ du kahị kaa ji iJihova obe ọhọhọ chajị nya Ọnyị nyamwụ?

¹² IJihova kaa hịnyọhi ịhọbịrị nyahị chajị nya iya ọkịlaakịla nya iJisọsị. Ụpwụ Ịgọgọ ya nyori iJisọsị nyị ri ‘olegbeju ọgbahị nya angịkiliya ọlẹ kọ hụhụ ụ-ụpwụriri nya ẹchị Adịrahụ nya Ohe Oluhye Adịrahụ Ọgụgụ ụ-ụwa e-epwoohe.’ (Hib. 8:1) IJisọsị à ri ọngọlẹ kọ “juwa i-ijata nya Ohe Oluhye Adahị juwa bịlọọ wọnụ nyahị ju” lẹ. (1 Jọn. 2:1) Ọ myịhị lẹhị lụmẹ nyọlẹ ká iJihova ya Olegbeju nya Angịkiliya ọlẹ kọ jẹ́ ọdẹwụ-dẹwụ nyahị bala ọ-kaa “bịlẹ Ohe Oluhye wọnụ nyahị ju” hahị! (Rom. 8:34; Hib. 4:15) Áhị la kpẹẹkpẹẹ ka, lẹ kori ká iJisọsị á kiliya wọnụ nyahị ju ka ịnọ, áhị ka jẹ́-ẹ raabwọ ha iJihova ka. M̀ jẹ́ a ka myị nyori áhị ka jẹ́-ẹ ji iJihova obe ọhọhọ nwà nya āhị ọnyịịla nya Ọnyẹwẹ nyamwụ ọlẹ kọ ya hahị wẹ ẹnẹnẹhẹ kaka!

13. Ányị iJisọsị à tị mẹjẹ lodu ọlẹ kọ chịpwụrụ ene kọọ gbu nyori angịjụgbẹyị nyamwụ họ́ọ?

¹³ Lodu ohyẹẹkpẹ ọlẹ kọ chịpwụrụ ene ká iJisọsị gbu, ọ raabwọ yẹẹyẹẹ chajị nya angịjụgbẹyị nyamwụ, juwa bịlẹ Adamwụ kọ ka “ke [angịjụgbẹyị ịịwa] wuu yẹẹyẹẹ, chajị ká Ohe Onyobyi á ka jwaa họ ịngịngịhyẹ myị́ kpong-kpong kaka.” (Jọn. 17:15) Ọọwa mẹjẹ jaabwọ kị há iJisọsị kaka ba! Nanana nyori ọ jẹ́ kọ ja ka yẹ akama ọtụka-ọtụka lụka o-kpii, ma ọ myịmyị kpa angịjụgbẹyị nyamwụ i-irya.

14. Ányị ahị tị́ ka bwu mẹjẹ nyori aanahị háahị?

¹⁴ Lala iJisọsị, áhị kaa kụ irya u-uhye nya ịbaba nyịlọhị kem ka. Ọkọkọ nyọọwa, ahị kaa raabwọ chajị nya aanahị alẹng bala anyang. Ụka kahị họ ịnyị, ahị wẹẹ ju ihi nya ehile ọlẹ ká iJisọsị dahị nyori ahị nyị la ọháha ẹ-ẹga nya awụlẹ. Ịnyịnyị, ahị ka mẹjẹ iJihova jaabwọ ká aanahị ịkịla háahị kaka ba. (Jọn. 13:34) Abwọ ọrịrị chajị nya aanahị ka daa ụbwọ. Omyi Ẹla nya Ohe byihi nyori “abwọ ọrịrị nya ọlabwẹla ọnyịịla kaa kpa ọngịrị nya Ohe Oluhye hireji warị kaka họ ụkụrwọ ọtụka myị́.”—Jem. 5:16.

15. Ịyẹ à tị́ du ká aanahị baba nya abwọ ọrịrị nyahị?

 ¹⁵ Aanahị baba nya abwọ ọrịrị nyahị chajị nya iru nya akama ịlẹ kị wẹẹ yẹ. Ẹ-ẹpwụ nya abwọ ọrịrị nyahị, ahị ka jẹ́-ẹ bịlẹ iJihova kọ ka da aanahị ụbwọ bọhụ ẹ-ẹpwụ nya ẹdụrụ, ang o-bwagaga, ẹwụ, ọtụpyịpyị lee akama ịdatị-datị ịkịla. Ịnyịnyị ahị ka jẹ́-ẹ raabwọ chajị nya aanahị ịlẹ kị kaa họ ụkụrwọ nyịlẹhị-ịlẹhị nyọka da aanahị ịlẹ kị la ọbaba ụbwọ. Ọ chịkpẹẹ myị́ kahị ka jẹ́ angịhyẹ ẹ-ẹpwụ nya angịlẹ kị wẹẹ yẹ ụma nya akama ịlẹ kahị gu ẹnyị wẹ. Ọ ka há lụmẹ kori kahị kpịtịya nya aanahị ịlịnyị ẹ-ẹpwụ nya abwọ ọrịrị. Ahị kaa mẹ ọháha okpori-kpori jẹ bwula ọ-bịlẹ iJihova kọ ka daa ụbwọ bọhụ.

16. Ịyẹ tị́ du kahị ka raabwọ chajị nya angịlẹ kị wẹẹ kpịlahị ẹ-ẹpwarịrị nyahị?

¹⁶ Ọ kaa myị angị kpịlahị ọọjịra-jịra lẹhị yẹẹyẹẹ ụka kahị gu ẹnyị nyaa bala ọ-kpịtịya nyaa ẹ-ẹpwụ nya abwọ ọrịrị nyahị, abwọ ọrịrị ịlịnyị tị kaa daa ụbwọ. Ọlẹrụ ịPọlụ ya ọwa ayịdang nyị baba nya abwọ ọrịrị nya angịkịla. Ọ da ụpwụ yẹkẹẹ: “Anụ-ụ́ juwa bịlẹ chajị nyam am ịPọlụ ịnyịnyị, chajị ká Ohe Oluhye ka hu ẹla oyaya myị́ ham, chajị ụka kam ka pyẹ ọnụ nyam maa, juwa ya ẹla nya Ohe Oluhye rụ́ ẹrụ ọnyịịla ọkpịbaa ọlẹ lẹ, kam ka jẹ́-ẹ juwa ya ẹla ọọwa la ọngịrị-ọngịrị myị́ mẹ.” (Efe. 6:19) Alẹ ịnyịnyị, ahị la iru nya aanahị ịlẹ kị wẹẹ kpịlahị la ila ọchịchị. Ahị kaa mẹ ọháha jẹ ẹ-ẹga nyaa bwula ọ-bịlẹ iJihova kọ ka daa ụbwọ ẹ-ẹpwụ nya ụkụrwọ ọlẹ kị wẹẹ họ.

17-18. Ụka ọlányị ị tị́ ka wụrụụhị nyọka kpịlahị ẹ-ẹpwụ nya abwọ ọrịrị myị́? Ẹlịyẹ ahị tị́ ka kpa i-irya?

¹⁷ Ụka ọhẹ, ị ka wụrụ́ụhị nyọka kụ ịlahị ẹ-ẹpwụ nya abwọ ọrịrị ha angịkịla myị́. Ọ-chụ pwokwita, ọọnahị ọnyang ọlẹ kọ wẹẹ mẹ ịBayịbụụ jẹ ọngịnyị ka byi ọngọlẹ kọ bọ́ọ kpehe nyị raabwọ myị́. Ọhẹka ọngọlẹ kọ bọ́ọ kpehe wẹ á ka jẹ́ ọngọlẹ kị wẹẹ mẹ ịBayịbụụ jẹ nwà lẹka, lẹ ọ ka chụ nyọka raabwọ la ocheju nya ang ọjẹ́jẹ myị́. Ọọwa ka du kọ ka jẹ́ ẹla ọlẹ kọ ka ya ụka kọ ka raabwọ chajị nya ọngọ wẹẹ jẹ́ ịBayịbụụ.

¹⁸ Ị ka wụrụ ọọnahị ọlẹng nyị raabwọ ọọjịra-jịra ịla epwihi lee ụka kahị tọ awụlẹ nyọka kpehe nya ẹla Ohe myị́. Aanahị ịlẹ kị wụrụ ụka ọlịnyị ka maga nyọka kpa ang odudu ọlẹ kị la ọjịra-jịra ịwẹ i-irya. Áhị ka kpa abwọ ọrịrị mẹ  ang jẹ alọjịra-jịra, nwaa rịrị lee ọ-dọmwụ kpa ya ẹla dodehe ka. Ọọjịra-jịra lụmẹ-lụmẹ ịla epwihi, iminiti ịrụ ị chị nọ nya abwọ ọrịrị bala eje omwumwu lẹ. Lẹ ọọnahị ọlẹng ọlẹ kọ ka kpịlahị ẹ-ẹpwụ nya abwọ ọrịrị á chịla nyọka raabwọ “onyudiyo” ka, ọgụgụ wuu ri ọmwụ ọdada nya ọjịra-jịra.—Mat. 6:7.

19. Ịyẹ à tị́ ka dahị ụbwọ nyọka nwụlanọ gbe ahyẹẹnụ nya eje nya iJihova?

¹⁹ Ahị baba nyọka hu abwọ ọrịrị nya ang ọkpọnchị ẹ-ẹpwụ nya ọhịhị nyahị chajị ahyẹẹnụ nya eje nya iJihova ju chwẹẹ lẹ. IJisọsị ya ẹla u-uhye nyọọwa yẹkẹẹ: “Anụ́-ụ cheri kanụ juwa gbe eji giri-giri ụka myị́ ụka wuu, kanụ juwa raabwọ ha Ohe Oluhye chajị kanụ ka ye ọngịrị ọ-ka kpa kụrụ ang ịlẹ wuu kị juwa ka họ jịra wuu ị-ịlahị mẹ.” (Luk. 21:36) Kori kahị raabwọ ụka wuu, ọọwa ka ju ọmyịmyị nyahị ọngịrị nyọka nwụlanọ gbe ahyẹẹnụ nya eje nya iJihova.

20. Ányị abwọ ọrịrị nyahị à tị́ ka lala ịtangare o-choru kwọkwọ?

²⁰ Ẹlịyẹ ahị tị́ kụ́ ẹhị yẹ wẹ wuu? Iwe nya abwọ ọrịrị ọlẹ kahị la myịhị lẹhị yẹẹyẹẹ. Ang ịkpọnchị ịlẹ kahị ka raabwọ u-uhye nyaa ri ẹla ịlẹ kị gu irya nya iJihova kpangga. Ahị baba nyọka ji iJihova obe chajị nya Ọnyẹẹwẹ nyamwụ bala Ịpyị-Adịrahụ nyamwụ. Ịnyịnyị, ahị ka kpịtịya nya aanahị ẹ-ẹpwụ nya abwọ ọrịrị. IJihova tịtọ kahị ka raabwọ chajị nya ang ịlẹ kị baba hahị bala ọ-ka bịlọọ kọ ka ju ọmyịmyị nyahị ọngịrị ịnyịnyị. Ụka kahị kụ irya rige-rige u-uhye nya ẹla ịlẹ kahị ka ya ẹ-ẹpwụ nya abwọ ọrịrị, ahị ka mẹjẹ nyori iwe ọnyịịla-ọnyịịla ọwẹ myịhị lẹhị. Omyi ẹla nyahị ka lala ịtangare o-choru kwọkwọ ọlẹ kị jụ ila ha iJihova, ọọwa tịị “họ́ọ.”—Etu 15:8.