1. Thutholere ithwalhangira thuthi akaghisa k’erisaba Yehova?

 THWABIRIHEBWA olhusunzo lhubuyanga​—olhw’erikolesya omusabe thukakania n’Oyuwakolha olhubulha n’ekihugho. Thakilengekaniako: Thwangana bwira Yehova y’ebyosi ebiri okwa muthima okwa ndambi yosi-yosi n’omwa mubughe wosi-wosi, isithuthatsuka erimumanyisya. Thwangana musaba ithune okwa ngyingo okwa sipatara kutse omwa ngomo, ithunayikethere ngoku Thatha wethu w’olhwanzo akendi thuhulikirira. Sithuli lenza-lenzaya olhusunzo olhu.

2. Omwami Dawudi mwakangania athi kw’akalhangira olhusunzo lhw’erisaba mwa lhw’obughuli?

² Omwami Dawudi mwalhangira olhusunzo lhw’erisaba mwa lhw’obughuli. Mwimbira Yehova athi: “Wangirire erisaba lyaghe ng’obukwa obukakumba ndeke.” (Esy. 141:1, 2) Omwa biro bya Dawudi, obukwa obubuyirire obwa abahereri babya bakakolesya ibukatheghekawa omw’iyitheya linene. (Eri. 30:34, 35) Dawudi erikania okwa bukwa mwakangania ngoku aby’anzire eritsuka erilengekania ndeke okwa by’akayabwira Thatha wiwe w’elhubulha. Nethu ekyo kya thwanzire. Thwanzire emisabe yethu iyatsemesya Yehova.

3. Thutholere ithwasaba Yehova ya thuthi, kandi busana naki?

³ Omughulhu thukasaba Yehova, thutholere ithwayihighulha okw’ikolesya ebinywe by’olhughalha-ghalha. Aliwe thutholere ithwakangania erisikya thukamusaba. Thalengekania okwa syonzoli esya Isaya, Ezekieli, Danieli, na Yoane bathunga. Esyonzoli esyo sisighumerere aliwe sinawithe ekindu ekya sisosenemu. Esyosi sikakanganaya Yehova ng’Omwami omukulhu. Isaya mwalholha “oko Mukama inian’ikere  okwa kithumbi ky’obwami, ekiri endatha n’ekisumbire endatha.” (Isa. 6:1-3) Ezekieli mwalhangira Yehova inian’ikere okwa kiggali kiwe, ekithimbirweko ekindu “ekikakangabasanaya . . . ng’ekisosekanio ky’ekima.” (Eze. 1:26-28) Danieli mwalhangira ‘Omukulhu w’Ebiro’ iniambithe olhukimba lhweru-lhweru, olhuli kw’ekirimi ky’omuliro erilhua okwa kithumbi kiwe ky’Obwami. (Dan. 7:9, 10) Na Yoane mwalhangira Yehova inian’ikere okwa kithumbi ky’Obwami ekithimbirweko ekindu ekiri ng’ekima ekyuwene eky’erangyi ye zumaridi. (Erib. 4:2-4) Thukabya thukaghanirya okwa lhukengerwa lhunene lhwa Yehova, thuk’ibuka ngoku ni lhusunzo lhunene erikania nayu omwa musabe kandi ku ni kikulhu erikolha ekyo ithunamusikirye. Aliwe thutholere ithwasaba thuthi?

4. Ebinywe ebikatsuka omwa musabe w’eky’erileberyako ebiri omu Matayo 6:9, 10 bikathweghesayaki?

⁴ Soma Matayo 6:9, 10. Omw’ikangirirya liwe ly’okwa Kithwe, Yesu mwakangirirya abigha biwe ngoku banga saba omwa nzira eyikatsemesaya Nyamuhanga. Abere abiribugha athi “neryo ko musabe muthya, muthi,” Yesu mwatsuka n’ebindu bikulhu ebihambire ndeke okwa kighendererwa kya Yehova: eriyira erina Liwe mwa libuyirire; eryasa ly’Obwami obukendi thoghothya abosi abakahakanisaya Nyamuhanga; n’emighisa ey’obuthuku obukasa ey’akasunzira ekihugho n’abandu. Omw’ihira ebindu ng’ebyo omwa misabe yethu, thukakanganaya ngoku erisonda lya Nyamuhanga lya thukalhangira mwa likulhu.

5. Mbwino kinatholere erisaba busana n’ebiyithawa byethu?

⁵ Omwa kitsweka ekikakwamako omwa musabe oyo, Yesu mwakangania ngoku kitholere erisaba busana n’ebiyithawa byethu. Thwangana saba Yehova thuthi athuhe ebyalya byethu by’obuli kiro, erithughanyira ebibi byethu, erithutheya okw’ilengwako, n’erithulhamya okwa mubi. (Mt. 6:11-13) Thwamasaba Yehova y’ebindu ebi, thukakanganaya ku thukamuyikethera kandi ku thwanzire iniathusima.

6. Mbwino ebiri omwa musabe w’eky’erileberyako bisa bya thutholere ithwahira omwa misabe yethu? Soborera.

⁶ Yesu mwathabugha athi abigha biwe ibabera erisaba omusabe w’eky’erileberyako  omw’isubirira omwa binywe ibyan’ebyo. Omwa yindi misabe eyo Yesu aha, mwahulha ebindu ebiri mbaghane ebyabya bikulhu okwa ndambi eyo. (Mt. 26:39, 42; Yn. 17:1-26) Kuthya, thwangana saba busana n’ekyosi-kyosi ekikathulyambaya. Thwamabya b’erithwamu, thwangana saba Nyamuhanga y’amenge n’eriminya. (Esy. 119:33, 34) Thwamabya ithukayatsuka erikolha omubiiri owakalire, ithwangana musaba amenge n’obuyitheghererya. (Emi. 2:6) Ababuthi bangana sabira abaana babu, abaana bangana sabira ababuthi babu, kandi ithwe bosi thutholere ithwasabira abigha bethu be Biblia n’abathukathulira. Nomwabine, emisabe yethu siyitholere yikasubulira okw’isaba ebyo thukayithagha bisa.

7. Busana naki thutholere ithwapipa Yehova omwa musabe?

⁷ Thutholere ithwibuka eripipa Yehova omwa misabe yethu. Sihali oyutholere eripipwa kwilhaba Nyamuhanga wethu. Iyo ni ‘mubuya, kandi akabuyira.’ Kandi ni ‘w’erighanyira, n’olhwanzo. Syali hithana lhuba, ni w’obwenge ebiro byosi [olhwanzo olhuthyusa], syali leghulha.’ (Esy. 86:5, 15) Ahathe erithika-thika, thuwithe enzumwa mbuya y’eripipa Yehova busana n’ekyo ali kandi busana n’eby’akakolha.

8. Ni bindu nga byahi ebyo thwanga simirako Yehova? (Esyonyimbo 104:12-15, 24)

⁸ Eryongera okw’ipipa Yehova omwa misabe yethu, thukahirawa mw’omuhwa w’erimusima busana n’ebindu bibuya eby’akathuha. Ng’eky’erileberyako, thwangana musima busana n’esyorangyi esyuwene esyo thukalhangira omwa bimole, n’ebyalya muthina-muthina ebisihire ebithehwayo, n’eritsemera eribya n’abanywani abuwene. Thatha wethu ow’olhwanzo akathuha ebi n’ebindi bingyi, erithanza erithutsemesya. (Soma Esyonyimbo 104:12-15, 24.) Nibya ekikulhu kutsibu, thukasima Yehova busana n’ebyalya bingyi by’obunyakirimu eby’akathuha kandi busana n’amaha mabuyanga aw’obuthuku obukasa agho thuwithe.

9. Ni kyahi ekyanga thuwathikya eryibuka erisima Yehova? (1 Abanya Tesalonika 5:17, 18)

⁹ Kyangan’olhoba eribirirwa erisima Yehova busana n’ebyosi eby’akathukolera. Ni kyahi ekyanga kuwathikya eryibuka? Wangana  kolha elisti y’ebindu ebyo wasaba n’eribya iwunemulebya Yehova ng’abiribisubirya athi. Neryo iha omusabe ow’erimusima busana n’obuwathikya bwiwe. (Soma 1 Abanya Tesalonika 5:17, 18.) Thalengekania oku kino: Thukatsema kandi ithwayowa ndeke abandi bakathusima. Kuthya, thwamibuka erisima Yehova busana n’erisubirya emisabe yethu kikamutsemesaya. (Kol. 3:15) Aliwe, ni yindi nzumwa yahi ngulhu eyanga leka ithwasima Nyamuhanga wethu?

10. Ngoku kiri omu 1 Petero 2:21, busana naki thuwithe enzumwa mbuya y’erisima Yehova busana n’erithuma Yesu y’okwa kihugho?

¹⁰ Soma 1 Petero 2:21. Thutholere ithwasima Yehova busana n’erithuma Mughalha wiwe mwanzwa erisyathukangirirya. Thuk’igha bingyi oku Yehova kandi ngoku thwanga mutsemesya omw’igha okwa ngebe ya Yesu. Thwam’ikirirya omwa kihongo kya Kristo, ithukendibya n’obughuma obughumire ndeke na Yehova Nyamuhanga, kandi ithwabya buholho Nayu.​—Abar. 5:1.

11. Yesu awithe lhukwamirwaki omwa misabe eya thukasaba Yehova?

¹¹ Thukasima Yehova kundi thwangana musaba erilhabira omwa Mughalha wiwe. Yesu ya nzira eyo Yehova akakolesaya erithuha ebyo thukayithagha. Yehova akahulikirira kandi akasubiraya emisabe yethu eyo thukasaba erilhabira omwa lina lya Yesu. Yesu mwasoborera athi: “Nasyakolha obuli mwatsi agho mwasyabulya omo lina lyaghe, Thatha apipawe omo Mughalha.”​—Yn. 14:13, 14.

12. Ni yindi nzumwa yahi eyanga leka ithwasima Yehova busana na Mughalha wiwe?

¹² Yehova akaghanyira amalholho wethu busana n’ekihongo eky’endongolya ya Yesu. Amasako akakanaya oku Yesu ‘ng’omuhereri wethu mukulhu oko bahereri bosi w’omusindo oyu. Ikere okwa lhuhandi lhw’amali lhw’ekithumbi ky’omwinye Obukulhu omo lhubulha.’ (Ebr. 8:1) Yesu ni ‘mbuyi yethu oku Thatha.’ (1 Yn. 2:1) Ka thukasima Yehova ya kutsibu busana n’erithuha Omuhereri Mukulhu oyukathukwira obulighe, oyukayitheghereraya erilemererwa lyethu kandi “oyukathwimira”! (Abar. 8:34; Ebr. 4:15) Thuli bandu abathahikene, neryo ahathe ekihongo kya Yesu sithwanga thokire erikania na Yehova omwa musabe. Ahathe erithika-thika wangana ligha ngoku sithwanga thoka erisima Yehova ya ndeke-ndeke busana n’ekihembo eky’obughuli ekyo abirithuha​—ekihembo ky’Omughalha wiwe mwanzwa!

13. Omw’ithumbi athali aholha, Yesu mwakangania athi kw’anzire abigha biwe?

¹³ Omw’ithumbi athali aholha, Yesu mwaghunza endambi inianemusabira abigha biwe, erisaba Thatha wiwe athi ‘atheghayebo oko mubi.’ (Yn. 17:15) Ekyo mukyakangania Yesu ng’abanzire bungahi! Abya inianasi kw’akayabana ekitsibu ekikalire; aliwe, abya iniane mulengekania okwa ngebe y’abakwenda biwe.

14. Thwanga kangania thuthi ku thwanzire balikyethu?

¹⁴ Omw’igherererya Yesu, sithuli hweraya amalengekania w’okwa biyithawa byethu bisa. Omwakanya k’ekyo, thukabya ithunemusaba busana n’abalikyethu. Thukabya thukakolha ekyo, thukabya ithwamakenga ekihano kya Yesu eky’erianzana n’erikangania Yehova nga thwanzire bungahi abikirirya balikyethu. (Yn. 13:34) Erisabira balikyethu si tsandya buthuku. Ekinywe kya Nyamuhanga kikathubwira kithi “erisaba ly’omundu muthunganene likathoka mwatsi munene.”​—Yak. 5:16.

15. Busana naki abaramya balikyethu bakayithagha emisabe yethu?

 ¹⁵ Abaramya balikyethu bakayithagha emisabe yethu kundi bakalhaba omwa bitsibu bingyi. Thwangana saba Yehova thuthi abawathikaye baghumire obulhwere, ebitsinduli, esyonyuhi, eriendereribwa, kutse ebindi bitsibu. Kandi thwangana sabira balikyethu abakayihayo eriwathikya balikyethu abali omwa buyithawa ng’obo. Wanganabya iwunasi abali omwa bitsibu ng’ebyo. Busana naki iwuthahulha amena wabu omwa misabe yawu? Thukakanganaya balikyethu b’olhwanzo lhw’okwenene omw’isaba Yehova thuthi abawathikaye eriyiyinia.

16. Busana naki thutholere ithwasabira abakathusondolha?

¹⁶ Abakasondolha omwa kithunga bakasima kutsibu abandi bakabahira omwa misabe yabu kandi kikabaghasira. Ekyo ky’ekyabya oku mukwenda Paulo. Mwahandika athi: “Naghe, munyisabire, Nyamuhanga ambe ebinywe eby’eribugha omughulhu ngakumbulha obuno bwaghe omo bulhume-lhume eriminyisya abandu b’erikumbo ly’engulhu yuwene.” (Efe. 6:19) Kuthya namunabwire, thuwithe baghalha bethu bangyi abakakolha kutsibu abakathusondolha. Thukakanganaya ku thubanzire omw’isaba Yehova thuthi atsumule emibiiri yabu.

17-18. Ni mughulhu wahi thwanga sabwa eryembembera abandi omwa musabe, kandi thutholere ithwabya ithun’ibukireki?

¹⁷ Hanganayira ithwasabwa eryembembera abandi b’omwa musabe. Ng’eky’erileberyako, mwali wethu oyukasondolha omwigha angana saba owundi mwali wethu oyo balyaghenda nayu athi ahe omusabe. Mwali wethu oyo balyaghenda nayu anganabya isyasi omwigha oyo ya ndeke, neryo iniangananza eriha omusabe w’erighunzerera. Omwa nzira eyi, kyangana mwolhobera erihambania omusabe wiwe n’ebiyithawa by’omwigha.

¹⁸ Mughalha wethu angana sabwa eriha omusabe okwa muhindano w’eriyathulira kutse okwa mihindano y’ekithunga. Baghalha bethu abawithe olhusunzo olho batholere ibabya iban’ibukire ekighendererwa ky’emihindano. Omusabe syatholere erikolesibwa ng’enzira y’erihabulha ekithunga kutse erilhabya  ebirango. Okwa mihindano mingyi y’ekithunga, olhwimbo n’omusabe bihebirwe dakika ithanu, neryo mughalha wethu oyukaha omusabe syatholere akakolesya ‘ebinywe bingyi,’ kutsibu-tsibu okw’itsuka ly’emihindano.​—Mt. 6:7.

19. Ni kyahi ekikendi thuwathikya eribya ithunayitheghekere ekiro kya Yehova eky’eritswera?

¹⁹ Ekiro kya Yehova ky’eritswera kinemuseghera hakuhi, neryo thutholere ithwongera erilhangira omusabe mwa kindu kikulhu. Okw’eki, Yesu mwabugha athi: “Nikwa mutheghaye emighulhu yosi, n’erisaba, muthoke eribana akaghalha k’eribalha emyatsi yosi eyi eyikasonda erihika.” (Lk. 21:36) Kwesi, erisaba mughulhu wosi kikendi thuwathikya eribya ithunabukire bunyakirimu nuku ekiro kya Nyamuhanga kireke erithubulikirirania.

20. Emisabe yethu yangabya yithi ng’obukwa obukakumba ndeke?

²⁰ Ni byahi ebya thwamabirikaniako? Thukalhangira olhusunzo lhwethu lhw’erisaba mwa lhw’obughuli bunene kutsibu. Ekilhubirirwa kikulhu ky’emisabe yethu kitholere ikyahambana ndeke n’ekighendererwa kya Yehova. Kandi thukasima Mughalha wa Nyamuhanga n’erithabalha ly’Obwami bwiwe, kandi thukasabira abaramya balikyethu. Kandi nibya, thwangana saba busana n’ebiyithawa byethu by’ekinyamubiri n’eby’obunyakirimu. Thukabya thukalengekania ndeke okwa bya thukayabugha omwa misabe yethu, thukakanganaya ku thukalhangira olhusunzo lhubuyanga olhu mwa lhw’obughuli. Ebinywe byethu ibikendibya ng’obukwa obukakumba ndeke embere sya Yehova​—‘obutseme bwiwe.’​—Emi. 15:8.