1. Iehova baita ḡuriḡuri henia diba karana be ede baita laloa toma na namo?

 ITA na hahenamo hereadaena ta e henida​—una na guba bona tanobada e karadia Tauna baita ḡuriḡuri henia diba. Mani a laloa: Herevana edena nega ai eiava edena gado ai, to kudouda ai e miamu ḡaudia na Iehova baita hamaorolaia diba, bona gwaumaoro na basita abimu. Ta abia daemu hospele ai eiava dibura ruma ai, Tamada lalokauna ese eda ḡuriḡuri na be kamonaimu. Una hahenamo na basita laloa maraḡi.

2. Edena dalai King David ese e hahedinaraia ḡuriḡuri karana ena hahenamo na e laloa bada?

² King David ese ḡuriḡuri karana ena hahenamo na e laloa bada. Iehova dainai ane e abi neganai eto: “Egu ḡuriḡuri na muramura mai bonana ai bainela oi vairamu ai.” (Sal. 141:1, 2) David ena negai, tomadiho momokanina totona hahelaḡa taudia ese e ḡaukaralaiava muramura helaḡana na e heḡaeḡaelaiava neganai, una muramura na e karaia namonamova. (Eso. 30:34, 35) David ese muramura mai bonana e herevalaia neganai, e hahedinaraia ia na e ura Tamana gubai e nohomu baine ḡuriḡuri henia neganai, ena hereva na baine lalodia namonamo. Ita danu ta uramu unu baita kara toma. Ta uramu eda ḡuriḡuri ese Iehova baine hamoalea.

3. Iehova ta ḡuriḡuri heniamu neganai, dahaka baita hahedinaraia, bona dahaka dainai?

³ Iehova ta ḡuriḡuri heniamu neganai, dia namo ma ta ta hereva heniamu bamona baita hereva. To, mai eda hemataurai bada ida baita ḡuriḡuri. Mani Isaia, Esekiel, Daniel, bona Ioane ese e abi mata-hanaidia a lalo. Unu mata-hanai ta ta na  i’idau, to ḡau tamona e hahedinaraia. Idia ese e hahedinaraia Iehova na Pavapava hereadaena ta. Isaia ese Iehova na e ‘itaia, terono ai e helai, atai ai e heabi isi.’ (Isa. 6:1-3) Esekiel ese Iehova e itaia ena guba kariotana ai e helai, bona “diari badana ese e ḡeḡea dae . . . kevau na ori ai e hedinaraimu na heto.” (Ese. 1:26-28) Daniel ese “Ḡauka” e itaia, dabua kuroka-kurokadia e hahedokilai, bona lahi na ena terono amo e lasiva. (Dan. 7:9, 10) Bona Ioane ese Iehova na e itaia terono ai e helai, bona samarago o emerald nadina na heto kevauna ese e ḡeḡea. (Apok. 4:2-4) Iehova ena hairai, ḡau ta ida basita haheḡereḡerea diba hairaina, baita laloa karana ese be hadibadamu ḡuriḡuri karana na hahenamo bada hereana ta bona ta ḡuriḡurimu neganai mai eda hemataurai bada ida baita ḡuriḡuri. To, ede baita ḡuriḡuri toma?

4. Iesu ese Mataio 6:9, 10 matamanai ḡuriḡuri dalana ai e gwaurai herevadia amo dahaka ta dibamu?

⁴ Mataio 6:9, 10 ba duahi. Iesu na Ororo Harorona ai, ena hahediba ese edia ḡuriḡuri ai Dirava bae hamoalea dalana na e hadibadia. Ina hereva “ini ba ḡuriḡuri toma” e gwauraia murinai, Iesu ese Iehova ena ura ihaḡuḡuruna ai mai anina bada ḡaudia e herevalai: Iehova ladana ihahelaḡana; Basileia bainema bena Dirava inaina iboudiai baine haoredia; bona tanobada bona taunimanima totodia vaira negai baine kara ḡau namodia idauidau. Eda ḡuriḡuri ai unu ḡau baita ḡuriḡurilaimu neganai, ta hahedinaraiamu ita edai Dirava ena ura na mai anina bada.

5. Eda ura ḡaudia daidiai baita ḡuriḡuri be maoro, a?

⁵ Iesu na ena ḡuriḡuri kahana ma ta ai, e hahedinaraia siboda eda ura ḡaudia daidiai baita ḡuriḡuri na asi ena kerere. Iehova baita noia diba una dina totona ada baine heni, eda kara dika baine gwautao, hedibaḡani amo baine gimada, bona dika tauna ena amo baine hamaurida. (Mat. 6:11-13) Unu ḡau daidiai Iehova baita noiamu neganai, ta hahedinaraiamu ita na ienai ta tabekaumu bona ta uramu ena lalonamo baita abia.

6. Baita ḡuriḡurilai ḡaudia be Iesu ese ena ḡuriḡuri ai e gwaurai ḡaudia mo, a? A gwauraia hedinarai.

⁶ Iesu na dia e gwa una ḡuriḡuri ai e gwaurai herevadia iboudiai na ena hahediba ese  bae badina ḡoevaḡoeva. Iesu ese e gwaurai ḡuriḡuridia ma haida ai, ia na ḡau idaudia, unu nega ai ienai mai anina bada ḡaudia, e gwaurai. (Mat. 26:39, 42; Ioa. 17:1-26) Una heḡereḡerena, ita danu ta lalohekwarahilaimu ḡaudia iboudiai baita ḡuriḡurilai diba. Abi hidi ta ta uramu baita karaia neganai, aonega bona laloparara totona baita ḡuriḡuri diba. (Sal. 119:33, 34) Bema ḡaukara aukana ta uramu baita karaia, una ḡaukara ilalopararalaina totona baita ḡuriḡuri diba. (Her. 2:6) Tama sina na natudia daidiai bae ḡuriḡuri diba, natu be tamadia sinadia daidiai bae ḡuriḡuri diba, bona namona na ita iboudai ese eda Baibul stiuden bona ta haroro henidiamu taudia daidiai baita ḡuriḡuri. To, ta ḡuriḡurimu neganai, dia Iehova ese baine durulaida ḡaudia mo baita ḡuriḡurilai.

7. Dahaka dainai ḡuriḡuri ai Iehova baita imodaia?

⁷ Baita helalotao eda ḡuriḡuri ai Iehova baita imodaia na namo. Eda Dirava ese heimodai baine abia na maoro. Iehova na “namo” bona noho heḡaeḡae ‘dika e gwaua taomu.’ Bona, Ia na ‘hebogahisi bona harihari-bada Diravana, ena badu ai e halahemu, ena hebogahisi bona ena heabidadama na bada herea.’ (Sal. 86:5, 15) Unu badi namodia daidiai, Iehova bona e kara ḡaudia na baita imodaidia.

8. Ededia ḡau daidiai Iehova baita tenkiu henia diba? (Salamo 104:12-15, 24)

⁸ Eda ḡuriḡuri ai Iehova ta imodaiamu neganai, baita tenkiu henia danu na namo, badina ḡau namodia momo e henidamu. Heḡereḡere, flaoaflaoa kaladia namodia, aniani mamidia namodia idauidau, bona tura namodia edia hebamo namona. Tamada lalokauna ese unu bona ma ḡau momo e henidamu, baita moale helaoreana. (Salamo 104:12-15, 24 ba duahi.) Bona baita tenkiu henia badina badana ta na, Iehova ese lauma aniani bada herea e henidamu bona helaro namo hereana vaira nega ai, e henida.

9. Dahaka ese baine hahelalotaoda diba, Iehova baita tenkiu henia totona? (1 Tesalonika 5:17, 18)

⁹ Ita na kara dika taudia dainai baita helaloboio haraḡa dibamu, Iehova ese ita daidai e kara ḡaudia daidiai baita tenkiu henia. Dahaka ese baine durumu diba ba helalotao totona? O ḡuriḡurilai ḡaudia na ba toredia  diho, bona nega ta ta ai ba seke ededia be Iehova ese vada e haerelaidia. Bena emu ḡuriḡuri amo ba tenkiu henia. (1 Tesalonika 5:17, 18 ba duahi.) Mani ina a laloa: Haida ese e lalodamu bona e tenkiu henidamu neganai ta moalemu. Una heḡereḡerena, bema Iehova ese eda ḡuriḡuri e haerelai dainai ta tenkiu, una ese Iehova kudouna na e hamoaleamu. (Kol. 3:15) To, eda Dirava baita tenkiu henia badina badana ma ta be dahaka?

10. Petro Ginigunana 2:21 ena hereva heḡereḡerena, dahaka dainai Iehova baita tenkiu henia Iesu e siaia ema tanobada dainai?

¹⁰ Petro Ginigunana 2:21 ba duahia. Namona na Iehova baita tenkiu henia badina Natuna lalokauna e siaia ita baine hadibada totona. Iesu ena mauri sivaraina baita stadilaiamu neganai, Iehova bona Ia baita hanamoa daladia baita dibamu. Bema Keriso ena boubou ḡauna baita abidadama heniamu, eda hetura karana Iehova Dirava ida be hanamoamu, bona Ia ese be lalonamo henidamu dainai maino ai baita nohomu.​—Roma 5:1.

11. Dahaka dainai Iesu ladanai Iehova baita ḡuriḡuri henia?

¹¹ Iehova ta tenkiu heniamu badina Natuna amo Ia baita ḡuriḡuri henia diba. Iehova ese Iesu ena amo eda noinoi e haerelaidiamu. Iehova ese Iesu ladanai ta gwauraimu ḡuriḡuridia na e kamonaimu bona e haerelaimu. Iesu na e gwa: “Ladagu ai ba noi ḡaudia iboudiai do baina kara, bena Tamagu bae heatolaia, Natuna dainai.”​—Ioa. 14:13, 14.

12. Iehova Natuna dainai, ia baita tenkiu henia badina ma ta be dahaka?

¹² Iehova ese eda kara dika na Iesu ena mauri idavalaina boubouna amo e gwauataomu. Baibul ese Iesu na e gwauraia, “hahelaḡa tauna badana, Herea Mikamika Diravana ena terono idibana kahana ai vada e helaimu.” (Heb. 8:1) Tamada vairanai Iesu na ita “ikahada tauna.” (1 Ioa. 2:1) Ta moale dikadikamu badina Iehova ese e abia hidi Hahelaḡa Tauna Badana ese eda manoka ḡaudia na e lalopararalai bona “ita daidai e noinoimu”! (Roma 8:34; Heb. 4:15) Ita na kara dika tauda dainai, bema Iesu ena boubou ḡauna na basinema heni, ḡuriḡuri amo Iehova na basitama hereva henia diba. Momokani, Iehova ena harihari ḡauna hereadaena​—Natuna lalokauna e heni karana dainai, eda tenkiu karana na eda hereva amo basita hahedinaraia ḡoevaḡoeva dibamu!

13. Iesu do se mase hanuaboina ai, edena dalai e hahedinaraia ena hahediba na e lalokau henidia?

¹³ Iesu do se mase hanuaboinai, nega daudau lalonai ena hahediba daidiai e ḡuriḡuri, Tamana e noia ‘Tau Dikana ena amo baine hamauridia.’ (Ioa. 17:15) Iesu ese ena hahediba na e lalokau henidia bada! Ena be kahirakahira hahetoho badana ta baine davaria; to dounu ena hahediba taudia edia namo e laloa bada.

14. Edena dalai baita hahedinaraia diba tadikaka taihu na ta lalokau henidiamu?

¹⁴ Iesu baita tohotohoa totona, dia eda ura ḡaudia mo baita lalo. To, hanaihanai tadikaka taihu daidiai baita ḡuriḡuri. Unu baita kara tomamu neganai, ita na Iesu ena haheḡani, ba helalokau heheni karana, ta badinaiamu bona Iehova enai ta hahedinaraiamu tadikaka bona taihu na ta lalokau henidia badamu. (Ioa. 13:34) Eda tadikaka taihu daidiai ta ḡuriḡurimu karana na dia nega ta haorea kavamu karana. Baibul ese e hadibadamu “kara maoromaoro tauna ena ḡuriḡuri ese anina e havaraiamu mai siahuna ida.”​—Iak. 5:16.

15. Dahaka dainai tadikaka taihu daidiai baita ḡuriḡuri na namo?

 ¹⁵ Eda tadikaka taihu daidiai baita ḡuriḡuri na namo, badina idia ese hahetoho idauidau e davarimu. Iehova baita noia diba baine durudia gorere, e vara kavamu dika idauidau, tuari, daḡedaḡe, eiava hekwakwanai ma haida bae haheaukalaidia. Ita ese e dabumu tadikakadia taihudia e durudiamu tadikakadia daidiai baita ḡuriḡuri diba danu. Reana unu hekwakwanai e davarimu tadikakadia haida na mai dibamu. Emu ḡuriḡuri lalodiai ladadia ba gwaurai diba. Iehova ta noiamu baine durudia bae haheauka neganai, ita ese lalokau korikorina ta hahedinaraiamu.

16. Dahaka dainai e gunalaidamu taudia daidiai baita ḡuriḡuri na namo?

¹⁶ Kongrigeisin e gunalaiamu taudia ese idia daidiai ta ḡuriḡurimu bona unu ḡuriḡuri daidiai hahenamo e abimu karana na e laloa bada. Aposetolo Paulo danu una kara na e laloa bada. Ia na e gwa: “Lau daigu ai danu ba noinoi, baina haroro negadia ai sivarai namo ena hereva hehunidia baina hahedinarai ḡoevaḡoeva.” (Efe. 6:19) Hari ina negai danu, ita bogaraḡidai e ḡaukara goadagoadamu hegunalai tadikakadia na momo. Iehova ta noiamu edia ḡaukara baine hanamoa neganai, ta hahedinaraiamu idia na ta lalokau henidiamu.

17-18. Ededia nega haida ai be noidamu baita ḡuriḡurimu, bona dahaka baita laloatao na ḡau badana?

¹⁷ Nega haida, ita na be noidamu haida daidiai baita ḡuriḡuri. Heḡereḡere, Baibul stadi e hakauamu taihuna ese reana e bamoa taihuna be noiamu baine ḡuriḡuri. Hebamo taihuna na reana una stiuden na asi dibana namonamo dainai, be uramu stadi ikouna ḡuriḡurina hari baine gwauraia. Unu amo, ena ḡuriḡuri ai stiuden baine durua diba ḡaudia baine gwauraidia diba.

¹⁸ Tadikaka ta na reana be noiamu haroro grup eiava kongrigeisin hebouna totona baine ḡuriḡuri. Una hahenamo baine abia tadikakana ese una hebou baine heabi badina baine laloatao na namo. Ḡuriḡuri na basie ḡaukaralaia kongrigeisin bae sisiba henia eiava hahediba herevadia bae gwaurai. Kongrigeisin heboudia momo ai, ane bona ḡuriḡuri na 5 miniti lalonai bae karaia, una dainai hebou  ikehona ḡuriḡurina e gwauraiamu tadikakana ese “hereva momo” basine gwaurai na namo.​—Mat. 6:7.

19. Dahaka ese be durudamu Iehova ena hahemaoro dinana totona baita heḡaeḡae?

¹⁹ Iehova ena hahemaoro dinana e kahirakahiramu neganai, namona na eda mauri ai ḡuriḡuri karana na mai anina bada ḡauna ai baita halaoa. Una na Iesu ese na ini e herevalaia toma, e gwa: “Ba gima, nega idoinai ba ḡuriḡuri, bena unu dika amo ba roho mauri, Taunimanima Natuna vairanai do ba gini.” (Luka 21:36) Oibe, hanaihanai ḡuriḡuri karana ese be durudamu lauma dalanai baita noga, unu amo Dirava ena hahemaoro dinana baine kau neganai, basita hoa.

20. Edena dalai eda ḡuriḡuri na muramura mai bonana namona heḡereḡerena?

²⁰ Ita be dahaka da tame herevalai? Ḡuriḡuri karana ena hahenamo baita laloa bada. Namona na eda ḡuriḡuri ai baita lalo bada ḡaudia na, Iehova ena ura ihaḡuḡuruna karana baine durua ḡaudia. Bona eda ḡuriḡuri ai baita lalo bada ḡaudia ma haida na, Dirava Natuna bona ena Basileia ena lohia karana, bona tadikaka taihu daidiai baita ḡuriḡuri. Bona danu, eda dabu ḡaudia tauanina bona lauma dalanai daidiai baita ḡuriḡuri diba. Ḡuriḡuri ai ta gwauraimu herevadia baita lalodia namonamo karana ese e hahedinaraiamu una hahenamo namo hereana na ta laloa badamu. Iehova enai ta gwauraimu herevadia na muramura mai bonana namona heḡereḡerena​—‘[Ia] ese be moalelaiamu.’​—Her. 15:8.