1. ¿Kenijkatsa tijyolmatij pampa tiuelij timomaijtouaj?

 TIJPIAJ se ueyi tlateochiualistli pampa tiuelij tijnojnotsaj Katli kichijchijki nochi tlen onka. Ma timoiljuikaj ipan ni tlamantli: uelis tikiljuisej Jehová nochi tlen tijyolmatij kema tijnekisej uan ipan tlen ueli tlajtoli, uan amo moneki tikitasej tlake tonali uelis techtlakakilis. Uelis tijnojnotsasej uan ya techtlakakilis, maske tiitstokej ipan se hospital uan amo ueli timeuaj o maske titsaktokej. ¡Nelia tlauel tijtlaskamatij pampa tiuelij timomaijtouaj!

2. ¿Kenijkatsa David kinextik tlauel kipatiitayaya tlamaijtoli?

² Tlanauatijketl David tlauel kipatiitayaya momaijtos. Yeka ipan se uikatl, kiijtok: “Xijseli notlamaijtolis keja eliskia kopali tlen kitlatiaj” (Sal. 141:1, 2). Kema David itstoya, sacerdotes kuali kichijchiuayayaj se incienso o tlaajuiyajkayotl tlen san kitekiuiyayaj kema kiueyichiuayayaj Jehová (Éx. 30:34, 35). Yeka kema kiijtok nopa tlamantli, kinekiyaya kiijtos kema momaijtoskia monekiyaya kuali moiljuiskia tlen kiijtoskia. Tojuantij nojkia kiampa tijnekij tijchiuasej pampa tijnekij Jehová ma kipakti tlen tikijtouaj kema timomaijtouaj.

3. ¿Kenijkatsa moneki tijnojnotsasej Jehová, uan kenke moneki kiampa tijchiuasej?

³ Kema timomaijtouaj, moneki tijnojnotsasej Jehová ika tlajtoli tlen kinextis tijtlepanitaj. Ma timoiljuikaj ipan tlen kiitakej Isaías, Ezequiel, Daniel uan Juan. Maske amo sanse tlamantli kiitakej, nochi kiijtojkej kiitakej Jehová kej se Tlanauatijketl katli kipia tlauel miak chikaualistli. Isaías kiitak “moseuijtoya ipan isilla yejyektsi neluejkapa nepa ipan iluikak” (Is. 6:1-3). Ezequiel kiitak moseuijtoya ipan se carro uan kiyaualouayaya se  tlamantli tlen “chikauak tlauiyaya [...] keja nopa akosamalotl” (Ezeq. 1:26-28). Daniel kiitak “Yajaya Tlen Nochipa Itstok” moyoyontijtoya chipauak uan moseuijtoya ipan se ueyi silla kampa kisayaya uejueyi tlilelemektli (Dan. 7:9, 10). Uan Juan kiitak Jehová moseuijtoya ipan se ueyi silla uan kiyaualouayaya “se akosamalotl tlen neski keja nopa tetl [...] tlen itoka esmeralda” (Apoc. 4:2-4). Kema timoyoliljuiaj kenijkatsa eli Jehová, kichiua ma tikitakaj eli se ueyi tlateochiualistli pampa ueli tijnojnotsaj uan yeka moneki tijchiuasej ika miak tlatlepanitakayotl. Uan, ¿tlake uelis tikijtosej kema timomaijtosej?

4. Kej kiijtoua Mateo 6:9, 10, ¿tlake techmachtia kampa peua tlamaijtoli tlen Jesús kinmachtik itokilijkauaj?

⁴ (Xijpoua Mateo 6:9, 10). Ipan Sermón del Monte, Jesús kinmachtik itokilijkauaj ma momaijtokaj kej kinamiki. Teipa kiijtok “kema inmomaijtosej ipan toTeko, xikiljuikaj kej ni”, kinejki kiniljuis ma tlajtlanikaj ma mouejkapantlali Jehová itoka, ma uala iTlanauatijkayo tlen kintsontlamiltis ikualankaitakauaj, uan ma moaxiti nochi tlen mosentlalijtok kichiuas ipan Tlaltipaktli. Tlaj nojkia titlajtlanij ni tlamantli, tijnextiaj tijpatiitaj tlen Jehová kineki kichiuas.

5. ¿Kenke amo kenijki tlaj titlajtlanij tlen techpoloua?

⁵ Ipan nopa tlamaijtoli Jesús nojkia kinextik amo kenijki tlaj titlajtlanij tlen techpoloua. Uelis tikiljuisej Jehová ma techmaka tlen tijkuasej, ma techtlapojpoljui, ma techpaleui amo ma titlajtlakolchiuakaj uan ma techmanaui tlen Satanás (Mat. 6:11-13). Kema tijtlajtlaniaj Jehová ni tlamantli, tijnextiaj toselti amo tiuelij timoyakanaj uan tijnekij kuali ma techita.

6. ¿Moneki titlajtlanisej san tlen Jesús kiijtok?

⁶ Jesús amo kinekiyaya itokilijkauaj ma kiijtokaj san tlen ya kinmachtik. Ipan sekinok tlamaijtoli tlen kichijki, nojkia kiijtok sekinok tlamantli tlen kitekipachouayaya (Mat. 26:39, 42; Juan 17:1-26). Tojuantij nojkia uelis kiampa  tijchiuasej. Se neskayotl, kema moneki tijtlapejpenisej se tlenijki, uelis tikiljuisej toTeotsij ma techmaka tlalnamikilistli (Sal. 119:33, 34). Kema tijselisej se tekitl tlen tijmatij ouij, uelis tijtlajtlanisej ma techpaleui tijmatisej kenijkatsa tijchiuasej (Prov. 2:6). Tetajmej uelis kitlajtlanisej Jehová ma kinpaleui ininkoneuaj, uan konemej uelis kiiljuisej ma kinpaleui inintatauaj. Nojkia, moneki tikiljuisej ma kinpaleui katli tikinmachtiaj Biblia uan katli tikinkamanaljuiaj kema titlajtolmoyauaj. Kema timomaijtouaj, amo moneki san titlajtlanisej, nojkia uelis tikijtosej sekinok tlamantli.

7. ¿Kenke moneki tijueyichiuasej Jehová kema timomaijtouaj?

⁷ Kema timomaijtouaj, nojkia moneki tijueyichiuasej Jehová pampa san ya kinamiki ma tijueyichiuakaj. Se katli kiijkuilok se salmo kiijtok: “Nelia tikuali uan [...] timokualtlalijtok para titetlapojpoljuis”. Uan nojkia kiijtok: “Nelia titetlasojtla uan ueyi moyolo. Axnimantsi tikualani. San ta titeiknelia uan san ta timelauak” (Sal. 86:5, 15). Jehová kinextia uan kichiua miak tlamantli, uan nopa techyololinia ma tijueyichiuakaj.

8. Kej kiijtoua Salmo 104:12-15, 24, ¿tlake tlamantli uelis tijtlaskamatisej kema timomaijtouaj?

⁸ Kema timomaijtouaj moneki tijueyichiuasej Jehová uan nojkia tijtlaskamatisej pampa techmaka miak tlamantli tlen kuali, kej yejyektsitsij xochitl, miak tlakualistli tlen ajuiyak uan touampoyouaj. Nojkia, techmaka sekinok tlamantli pampa kineki tlauel ma tiyolpakikaj (xijpoua Salmo 104:12-15, 24). Tlauel tijtlaskamatij pampa techmaka miak tlamachtili tlen tlauel techpaleuia, uan nojkia pampa kichiuas teipa kuali ma tiitstokaj.

9. Kej kiijtoua 1 Tesalonicenses 5:17, 18, ¿tlake techpaleuis amo tikilkauasej tijtlaskamatisej Jehová?

⁹ Kemantika uelis tikilkauasej tijtlaskamatisej nochi tlen techmaka Jehová. ¿Tlake uelis techpaleuis amo kiampa ma techpano? Uelis tikijkuilosej tlen tijtlajtlanijtokej uan tikitstiasej kenijkatsa technankilia. Teipa, kema timomaijtosej uelis tijtlaskamatilisej pampa techpaleuik  (xijpoua 1 Tesalonicenses 5:17, 18). Ma timoiljuikaj, ¿kenijkatsa tijyolmatij kema techtlaskamatiliaj se tlenijki? Uelis tlauel tiyolpakij uan kinextiaj techikneliaj. Jehová nojkia tlauel yolpaki kema amo tikilkauaj tijtlaskamatilisej pampa kichijki tlen tijtlajtlanijkej (Col. 3:15). Maske kiampa tijchiuaj, nojua onka seyok tlamantli tlen uelis tijtlaskamatisej. Ma tikitakaj.

10. Kej kiijtoua 1 Pedro 2:21, ¿kenke moneki tijtlaskamatilisej Jehová pampa kititlanki iKone?

¹⁰ (Xijpoua 1 Pedro 2:21). Moneki tlauel tijtlaskamatilisej Jehová pampa kititlanki iKone ma techmachtiki. Kema timomachtiaj tlen Jesús kichijki, tijyekouaj miak tlamantli tlen Jehová uan tlake moneki tijchiuasej uan kiampa tijyolpakiltisej. Tlaj titlaneltokaj ipan Jesús imikilis, techpaleuis kuali ma timouampojchiuakaj ika Jehová uan kuali ma techita (Rom. 5:1).

11. ¿Kenke timomaijtouaj ika Jesús itoka?

¹¹ Tlauel tijtlaskamatiliaj Jehová pampa tiuelij tijnojnotsaj ika Jesús itoka. Ya kitekiuia iKone uan kiampa techmaka tlen tijtlajtlaniaj. Tlaj timomaijtouaj ika Jesús itoka, toTeotsij techtlakakilia uan technankilia. Jesús kiijtok: “Nochi tlamantli tlen inkitlajtlanisej noTata ipan notoka, niinmechchiuilis pampa na niiKone nijchiua ma kiueyitlalis noTata” (Juan 14:13, 14).

12. ¿Tlake seyok tlamantli tlen Jesús kichijtok nojkia moneki tijtlaskamatilisej Jehová?

¹² Jehová ueli techtlapojpoljuia pampa Jesús motemaktilik uan mijki. Biblia kiijtoua Jesús eli Sumo Sacerdote katli “moseuijtok nepa iluikak inejmatl toTeko” (Heb. 8:1). Nojkia kiijtoua eli se “totlatempaleuijka tlen itstok iixtla toTeko” (1 Juan 2:1). Tlauel tijtlaskamatiliaj Jehová pampa techmakatok se Sumo Sacerdote katli techtlasojtla, kimati amo tiuelij tijchiuaj nochi uan kiiljuia Jehová ma techpaleui (Rom. 8:34; Heb. 4:15). Tlaj Jesús amo techmakixtijtoskia, amo tiueliskiaj tijnojnotsasej Jehová pampa titlajtlakolejkej. Maske tijchiuasej miak tlamantli, amo kema uelis tikaxilisej tijtlaskamatilisej toTeotsij pampa kiualtitlanki iKone katli tlauel kiiknelia.

13. ¿Kenijkatsa Jesús kinextik kinikneliyaya itokilijkauaj kema nechka kimiktiskiaj?

¹³ Kema Jesús nechka kimiktiskiaj, uejkajki momaijtoua pampa kitlajtlanik iTata ma kinpaleui itokilijkauaj uan ma kinmanaui tlen Satanás (Juan 17:15). ¡Kinextik tlauel kinikneliyaya! Maske nechka kiixnamikiskia se ueyi tlaouijkayotl, nojua kitekipachok tlen ueliskia kinpanos itokilijkauaj.

14. ¿Kenijkatsa tijnextiaj tikinikneliaj toikniuaj?

¹⁴ Sanse kej Jesús, tojuantij nojkia amo timosentlaliaj san ipan tlen techtekipachoua o techpoloua. Nochipa tikiljuiaj Jehová ma kinpaleui toikniuaj. Kema kiampa tijchiuaj, tijnextiaj nelia timoikneliaj kej Jesús technauatik, uan Jehová kiita nelnelia tikinikneliaj toikniuaj (Juan 13:34). Kema tikiljuiaj Jehová ma kinpaleui itekipanojkauaj, amo eli san tlapik. Biblia kiijtoua “kema se tlakatl tlen itstok xitlauak iixpa toTeko kitlajtlania toTeko chikauak para se tlamantli, uajka toTeko kichiuas” (Sant. 5:16).

15. ¿Kenke moneki tikinmaijtosej toikniuaj?

 ¹⁵ Tlauel moneki ma tikinmaijtokaj toikniuaj pampa kiixnamikij miak tlaouijkayotl. Uelis tikiljuisej Jehová ma kinpaleui kiijiyouisej se kokolistli, kema kintlasojsoljuilia se tlenijki, tlauilankayotl o kema amo kinkauaj ma tlaueyichiuakaj. Nojkia, uelis tikinmaijtosej toikniuaj katli kinpaleuiaj sekinok kema kintlasojsoljuilia se tlenijki. Tlaj tikixmati se toikni katli kiixnamiki se tlen ni tlaouijkayotl, ¿uelis tijtokaxtis kema moselti timomaijtos? Kema kiampa tijchiuaj, tijnextiaj nelnelia tikinikneliaj toikniuaj.

16. ¿Kenke moneki tikinmaijtosej toikniuaj katli techyakanaj?

¹⁶ Toikniuaj katli techyakanaj ipan tlanechikoli, tlauel kipatiitaj kema tikinmaijtouaj uan tlauel kinpaleuia. Apóstol Pablo nojkia kiampa kiyolmatki, yeka kiijtok: “Ximomaijtokaj nopampa na. Xijtlajtlanikaj toTeko ma nechmaka nopa tlajtoli tlen kinamiki uan para ma nimoneltlali nikiniljuis tlakamej nochi itlalnamikilis toTeko tlen axaka kimatiyaya” (Efes. 6:19). Ipan ni tonali, nojkia itstokej toikniuaj katli techyakanaj uan tlauel tekitij. Kema tijtlajtlaniaj Jehová ma kiteochiua ininteki, tijnextiaj tikinikneliaj.

17, 18. 1) ¿Kema uelis techiljuisej ma timomaijtokaj kampa miakej itstokej? 2) ¿Tlake moneki tikilnamikisej?

¹⁷ Kemantika uelis techiljuisej ma timomaijtokaj kampa miakej itstokej. Se neskayotl, uelis se tosiuaikni katli kimachtia se akajya, kiiljuis seyok tosiuaikni katli iuaya tlamachtis ma kichiua se tlamaijtoli, ni tosiuaikni uelis kinekis kichiuas nopa tlamaijtoli tlen ika tlamisej pampa kiampa ya kimatis tlake nojua moneki kichiuas katli momachtia uan kimatis tlake tlajtlanis.

¹⁸ Uan, ¿tlaj kiiljuisej se toikni ma momaijto kema tlajtolmoyauasej o ipan tlanechikoli? Katli kiselijtokej ni tekitl, moneki kiilnamikisej kenke mosentilijtokej toikniuaj. Kema momaijtouaj moneki amo kakistis kintlajtolmakaj toikniuaj yon kinmatiltiaj se tlenijki. Ipan tlanechikoli san tijpiaj makuili minutos tlen  moneki tijtekiuisej kema timomaijtouaj uan tiuikaj. Yeka, toikni katli kichiuas tlamaijtoli moneki amo kiijtos miak tlamantli, uan nojua tlauel ipati kiampa kichiuas kema peuas tlanechikoli (Mat. 6:7).

19. ¿Tlake techpaleuis ma timomanauikaj kema Jehová kitsontlamiltis tlen amo kuali?

¹⁹ Moneki tlauel tijpatiitasej timomaijtosej pampa Jehová nechka kitsontlamiltis tlen amo kuali. Jesús kiijtok: “Ximokualchijchijtokaj mojmostla [...]. Xijtlajtlanikaj toTeko Dios para axmoneki inpanosej ipan nochi nopa tlamantli tlen ualas” (Luc. 21:36). Tlaj nochipa timomaijtouaj, techpaleuis nojua kuali ma titlaneltokatokaj, kiampa uelis timomanauisej kema Jehová kitsontlamiltis tlen amo kuali.

20. ¿Tlake uelis tijchiuasej uan kiampa kema timomaijtosej elis kej se tlaajuiyajkayotl?

²⁰ ¿Tlake tikitstokej ipan ni tlamachtili? Nelia tlauel tijpatiitaj pampa ueli timomaijtouaj. Tlauel ipati tijtlajtlanisej Jehová ma kichiua tlen ya kineki. Moneki tijtlaskamatisej pampa iKone techmakixtik uan pampa tekichiua ipan iTlanauatijkayo. Nojkia, moneki tikinmaijtosej toikniuaj uan uelis tikiljuisej Jehová ma techmaka tlen techpoloua uan ma techpaleui kuali titlaneltokasej. Kema kuali timoiljuiaj tlake tikijtosej, tijnextiaj tlauel tijpatiitaj tlamaijtoli. Uan Jehová kiitas tlen tikijtouaj eli kej tlaajuiyajkayotl tlen kimakas “miak pakilistli” (Prov. 15:8).