1. ¿Ken timomachiliaj toTajtsin Dios techkauilia matiktlatlaujtikan?

 JEHOVÁ techkauilia itlaj matikchiuakan: iuan matimotlapouikan ijkuak timotlatlaujtiaj. Uelis nochipa tikiluiskej tlen onka itech toyolo ika totlajtol, uan amo moneki timochiaskej para matechkaki. Tikneltokaj ye techkakis maski tiyetoskej itech hospital noso tla otechtsakuatoj. Ik non, nochipa matiktlatlaujtikan Jehová.

2. ¿Ken okiteititi David okipatioitaya ijkuak omotlatlaujtiaya?

² Tekiua David sapanoua okipatioitaya motlatlaujtis. Itech se tlakuikali okilui Jehová: “Ijkuak nimotlatlaujtia, mayeto moixpan ken kopali ajuiak; ijkuak nikajkokui nomauan mayeto ken se tlamanali tlen yitiotlak niktemaka” (Sal. 141:1, 2). Yiuejkika ijkuak okatka David, teopixkej okichijchiuayaj se kopali para kiueyichiuaskej Jehová (Éx. 30:34, 35). Ijkuak David okijto kopali, xamo okinekiaya kijtos kuali mokuayejyekoskia tlen kiluiskia ijkuak kitlatlaujtiskia toTajtsin Dios. Tejuan noijki ijkon tiknekij tikchiuaskej porque tiknekij makiyolpakti Jehová tlen tikiluiaj.

3. ¿Ken moneki tiktlatlaujtiskej Jehová uan tleka?

³ Ijkuak timotlatlaujtiaj, tlen tikijtoskej nochipa makiteititi tiktlakaitaj Jehová. Matikilnamikikan ijkuak Jehová okichi itlaj makitakan Isaías, Ezequiel, Daniel uan Juan. Maski tlatlamantli tlen okitakej, nochtin okijtojkej Jehová ken se tekiua tlen kipia sapanoua chikaualistli. Isaías okitak Jehová euatok itech itrono tlen kajki sapanoua uejkapan (Is. 6:1-3). Ezequiel okitak euatok  itech icarro uan okiyaualojtoka itlaj tlen opetlantoka ken se kosamalotl (Ezeq. 1:26-28). Daniel okitak “Akin nochipa kajki”, itlaken okatka istak uan oeuatoka ipan itrono tlen oxotlatoka (Dan. 7:9, 10). Juan noijki okitak Jehová ouetoka ipan itrono uan “okiyawalojtoka se kosamalotl non satlawel otsotlania kemi se tetl non itoka esmeralda” (Apoc. 4:2-4). Tla timokuayejyekouaj ken Jehová sapanoua ueyititok, techilnamiktis se ueyi tetliokolil timotlatlaujtiskej uan moneki tiktlakaitaskej. Pero ¿tlen uelis tikiluiskej ijkuak timotlatlaujtiaj?

4. ¿Tlen techmachtia tlen Jesús achto okijto ijkuak otechititi ken moneki timotlatlaujtiskej? (Mateo 6:9, 10, TNM)

⁴ (Xiktlajtolti Mateo 6:9, 10, TNM). Ijkuak Jesús otlamachti itech tepetl okinmititi imachtijkauan ken kipaktia toTajtsin Dios matiktlatlaujtikan. Ijkuak okijto “moneki ijkin nanmotlatlaujtiskej”, satepan okijto tlen toTajtsin Dios kineki mamochiua: Mamochipaua itoka, mauiki iTekiuajkayo uan ijkon kinmixpolos nochtin akinmej kikokoliaj toTajtsin Dios uan matlateochiua nikan tlaltikpak uan makinteochiua akinmej nikan chantij. Tla ijkon timotlatlaujtiaj, tikteititiaj tikpatioitaj tlen Jehová kichiuas.

5. ¿Ken tikmatij amo tlajtlakoli tiktlatlaujtiskej toTajtsin Dios matechpaleui?

⁵ Okseki tlamantli tlen Jesús okijto ijkuak okiteititi ken moneki timotlatlaujtiskej, omotak amo tlajtlakoli tla tiktlatlaujtiaj Jehová matechpaleui. Uelis tiktlatlaujtiskej matechmaka tlen ika timopanoltiskej mojmostla, matechtlapojpolui tlen amo kuali otikchijkej, amo makitekauili matechyoltilana tlen amo kuali uan matechmakixti imak Satanás (Mat. 6:11-13). Ijkuak non tiktlajtlaniliaj Jehová, tikteititiaj tiknekij matechpaleui uan tiknekij tikyolpaktiskej.

6. ¿San moneki tikijtojtoskej tlen Jesús otlamachti ijkuak timotlatlaujtiskej? Xikyekijto.

⁶ Jesús amo okinekiaya imachtijkauan san makijtojtokan tlen ye otlamachti ijkuak motlatlaujtiskiaj. Okse  tonal ijkuak omotlatlaujti okilui Jehová okseki tlamantli tlen okitekipachouaya (Mat. 26:39, 42; Juan 17:1-26). Tejuan noijki uelis ijkon tiktlatlaujtiskej Jehová. Uelis tikiluiskej matechmaka ixtlamatilistli uan matikajsikamatikan ijkuak itlaj tikpejpenaskej (Sal. 119:33, 34). Ijkuak moneki itlaj tikchiuaskej uan tikitaj oui, matikiluikan matechpaleui para tikmatiskej ken tikchiuaskej (Prov. 2:6). Tetajmej uelis kitlatlaujtiskej Jehová makinpaleui inkoneuan, noijki konemej uelis kitlatlaujtiskej Jehová makinpaleui intatajuan. Tinochtin matiktlatlaujtikan makinpaleui akinmej tikinmachtiaj uan akinmej tikintlapouiaj. Pero ijkuak timotlatlaujtiskej amo san matikiluikan matechpaleui.

7. ¿Tleka moneki tikueyichiuaskej Jehová ijkuak timotlatlaujtiaj?

⁷ Ijkuak timotlatlaujtiaj noijki matikilnamikikan moneki tikueyichiuaskej Jehová. San ye moneki matikueyichiuakan. Se salmista okijto: “Tiyolkuali uan tikneki titetlapojpoluis”. Noijki okijto: “TiTotajtsin Dios titeiknomati, tikmati timochias, sapanoua titetlasojtla ika nochi moyolo uan amo keman techkaua” (Sal. 86:5, 15). Moneki tikueyichiuaskej Jehová porque yolkuali uan sapanoua techteochiua.

8. ¿Tlen moneki tiktlasojkamatiliskej Jehová ijkuak tiktlatlaujtiaj? (Salmo 104:12-15, 24).

⁸ Ijkuak timotlatlaujtiaj noijki moneki tiktlasojkamatiliskej Jehová porque techmaka miak tlamantli kualtsin, ken tlatlamantli xochitl, tlatlamantli tlakuali uelik uan toyolikniuan. Nochi non techmaka Jehová uan okseki tlamantli porque kineki matiyolpakikan (xiktlajtolti Salmo 104:12-15, 24). Okachi tiktlasojkamatiliaj porque techmaka nochi tlen moneki para iuan matimouikakan uan tlen techiluia techmakas satepan.

9. ¿Tlen moneki tikchiuaskej para amo tikilkauaskej tiktlasojkamatiliskej Jehová? (1 Tesalonicenses 5:17, 18).

⁹ San niman uelis tikilkauaskej tiktlasojkamatiliskej Jehová. ¿Tlen moneki matikchiuakan para amo ijkon matechpano?  Matikijkuilokan tlen yotiktlajtlanilijkej uan matikitakan ken yotechnankili, satepan matiktlasojkamatilikan porque otechpaleui (xiktlajtolti 1 Tesalonicenses 5:17, 18). ¿Tiyolpakij uan tikmachiliaj techtlasojtlaj ijkuak oksekimej techtlasojkamatiliaj? Noijki tikyolpaktiaj Jehová ijkuak tiktlasojkamatiliaj porque technankilia ijkuak tiktlatlaujtiaj (Col. 3:15). Miak ipati matiktlasojkamatilikan Jehová porque okichi itlaj topatka. Matikitakan.

10. ¿Tleka moneki tiktlasojkamatiliskej Jehová okiualtitlanki Jesús? (1 Pedro 2:21).

¹⁰ (Xiktlajtolti 1 Pedro 2:21). Moneki tiktlasojkamatiliskej Jehová okiualtitlanki Jesús matechmachtiki. Ijkuak timomachtiaj inemilis Jesús, timomachtiaj ken Jehová uan tlen moneki tikchiuaskej para tikyolpaktiskej. Tla titlaneltokaj itech imikilis Jesús, uelis timouikaskej iuan Jehová uan tikpiaskej yolseuilistli (Rom. 5:1).

11. ¿Tleka timotlatlaujtiaj ika itoka Jesús?

¹¹ Tiktlasojkamatiliaj Jehová porque ueli tiktlatlaujtiaj ika itoka iKone. Jehová ika Jesús techmaka tlen tiktlajtlaniliaj. Tla timotlatlaujtiaj ika itoka iKone, Jehová techkaki uan technankilia. Jesús okijto: “Nochi tlan nonkitlajtlaniliskeh Notajtsi ika Notoka, Ne nikchiwas, para makiseli weyílistli Notajtsi por Ne” (Juan 14:13, 14).

12. ¿Tleka noijki moneki tiktlasojkamatiliskej Jehová porque okitemakak iKone?

¹² Jehová techtlapojpoluia porque Jesús topatka omotemakak. Biblia kijtoua Jesús “tiopixkatlayákanki” uan “ewatok ik iyekma n Totajtsi Dios” (Heb. 8:1). Biblia noijki kijtoua “tikpiah Akin techtlajtolpalewia inawak Totajtsi Dios, Ye Cristo Jesús” (1 Juan 2:1). Sapanoua tiktlasojkamatiliaj Jehová porque otechmakak se Ueyi Teopixki tlen techiknomati, kajsikamati amo nochi ueli tikchiuaj uan “motlatlaujtijtok por tejwah” (Rom. 8:34; Heb. 4:15). Tla Jesús amo mikiskia topatka, amo uelis tiktlatlaujtiskiaj Jehová porque titlajtlakolejkej. Sapanoua tiktlasojkamatiliaj porque Jehová otechmakak se ueyi tetliokolil: iKone omotemakak topatka.

13. ¿Ken okiteititi Jesús okintlasojtlak imachtijkauan ijkuak yikimiktiskiaj?

¹³ Youak ijkuak ayamo okimiktiayaj Jesús, sapanoua okitlatlaujti Jehová makinpaleui imachtijkauan para amo makinkajkayaua Satanás (Juan 17:15). ¡Sapanoua okintlasojtlak! Maski sapanoua tlajyouiskia, okitak ken kinpaleuis imachtijkauan.

14. ¿Ken tikteititiaj tikintlasojtlaj tokniuan?

¹⁴ Ijkon ken okichi Jesús, amo san totech timotekipachouaj. Nochipa tiktlatlaujtiaj Jehová makinpaleui tokniuan. Ijkon tikchiuaj tlen Jesús otechnauati, matimotlasojtlakan, noijki tikititiaj Jehová sapanoua tikintlasojtlaj tokniuan (Juan 13:34). Tikmatij Jehová techkaki ijkuak tiktlatlaujtiaj makinpaleui oksekimej tokniuan. Biblia kijtoua: “Tiotsajtsílistli non se tlakatl yolchipawak kichiwa ika nochi iyolo, kipia miak weletílistli” (Sant. 5:16).

15. ¿Tleka moneki tiktlatlaujtiskej Jehová makinpaleui tokniuan?

 ¹⁵ Tokniuan kinpanoua miak tlamantli tlen amo kuali, ik non, moneki tiktlatlaujtiskej Jehová makinpaleui. Uelis tikiluiskej makinpaleui matlaxikokan ijkuak mokokouaj, ijkuak tlaxixini inmialtepe, onka guerra noso kintlajyouiltiaj. Noijki uelis timotlatlaujtiskej inpatka tokniuan tlen kinpaleuiaj oksekimej tokniuan ijkuak tlajyouiaj. Xamo tikixmati ikaj tlen ijkon kipanotok. ¿Uelis tiktlatlaujtis Jehová makipaleui? Ijkuak tiktlatlaujtiaj makinpaleui tokniuan, tikteititiaj melauak tikintlasojtlaj.

16. ¿Tleka moneki tiktlatlaujtiskej Jehová makinpaleui tokniuan tlayekankej?

¹⁶ Tokniuan tlen tlayekanaj motlasojkamatij porque tiktlatlaujtiaj Jehová makinpaleui uan ye ijkon kichiua. Apóstol Pablo okijto: “Noiwa xiktlatlaujtikah n Toteko manechpalewi, iwa manechinmaka tlájtolteh ijkuak monekis nitetlapowis. Iwa manechmaka yolchikawálistli iwa maniweleti manikinteajsikamatilti non amo kixmatih de n kualitlájtoli” (Efes. 6:19). Axkan noijki katej tokniuan tlen techyekanaj uan sapanoua kitekichiuiliaj Jehová. Ijkuak tikiluiaj makiteochiua tlen kichiuaj, tikteititiaj tikintlasojtlaj.

17, 18. ¿Keman uelis techiluiskej matimotlatlaujtikan teixpan uan tlen moneki tikilnamiktoskej?

¹⁷ Xamo ualeua techiluiskej matimotlatlaujtikan teixpan. Se tokni siuatl tlen kimachtia ikaj xamo uelis kiluis tokni siuatl tlen iuan tlamachtia mamotlatlaujti. Xamo tokni amo kixmati akin kimachtiaj, ik non, xamo saiktlami kinekis motlatlaujtis. Ijkon uelis kiluis Jehová ken moneki makipaleui akin kimachtiaj.

¹⁸ ¿Uan tla tokniuan tlakamej kinmiluiaj mamotlatlaujtikan ijkuak monechikouaj noso ijkuak tetlapouiaj? Tokniuan tlen kinmiluiaj mamotlatlaujtikan teixpan moneki kimatiskej tlen kijtoskej. Ijkuakon amo moneki kijtoskej tlen moneki kichiuaskej tokniuan nion moneki tlamachtiskej. Ijkuak timonechikouaj  san onka makuili minutos para titlakuikaskej uan timotlatlaujtiskej, ik non, tokni tlen motlatlaujtis amo moneki kijtos miak tlamantli (Mat. 6:7).

19. ¿Tlen techpaleuis matimoyektlalikan ijkuak Jehová tlaixkomakas?

¹⁹ Ayakmo miak poliui Jehová tlaixkomakas, ik non, moneki nochipa timotlatlaujtiskej. Jesús okijto: “Xiijsatokah, iwa nochipa ximotiotsajtsilijtokah para weletis nonmakisaskeh de nochi tlan panos” (Luc. 21:36). Tla nochipa timotlatlaujtiaj, kuali timouikaskej iuan Jehová uan ijkon timomakixtiskej ijkuak ye tlaixkomakas.

20. ¿Tlen moneki tikchiuaskej para mayeto ken kopali ajuiak ijkuak timotlatlaujtiaj?

²⁰ ¿Tlen yotimomachtijkej? Sapanoua tikpatioitaj tiktlatlaujtiskej Jehová. Okachi moneki matimotlatlaujtikan tlen ye kineki mamochiua. Noijki tiktlasojkamatiliaj porque kajki iTekiuajkayo, Jesús topatka omotemakak uan tiktlatlaujtiaj Jehová makinpaleui tokniuan. Noijki uelis tikiluiskej matechpaleui matikpiakan tlen ika timopanoltiskej uan matikpiakan tlen moneki para iuan timouikaskej. Kuali matimokuayejyekokan tlen tikiluiskej Jehová ijkuak timotlatlaujtiskej uan ijkon tikteititiskej tikpatioitaj iuan timotlapouiskej. Ijkuak ijkon tiktlatlaujtiskej Jehová kiyolpaktis porque yetoskia ken kopali ajuiak (Prov. 15:8).