1. Otu na okukala tu uvitile ngiini uuthembahenda mboka tu na wokugalikana kuJehova?

 OTWA pewa uuthembahenda uuwanawa wokugalikana Omushiti gwegulu nogwevi. Dhiladhila kwaashika: Ohatu vulu okugalikana Jehova tashi zi komutima ethimbo kehe, melaka kehe nopwaa na okuninga oshilage. Ohatu vulu okugalikana uuna tu li moshipangelo nenge mondholongo, tu na uushili kutya Tate yetu gwomegulu, ote ketu pulakena. Otwa pandula shili kuuthembahenda mboka.

2. Omukwaniilwa David okwa li u ulike ngiini kutya okwa lenga uuthembahenda wokugalikana?

² Omukwaniilwa David okwa li a lenga uuthembahenda wokugalikana. Okwi imbile Jehova a ti: “Taamba omagalikano gandje ngaashi omatsinino.” (Eps. 141:1, 2) Pethimbo lyaDavid, iitsinino iiyapuki mbyoka ya li hayi longithwa melongelokalunga lyashili kaayambi, oya li hayi ningwa nuunkulungu. (Eks. 30:34, 35) Onkee David sho a popi kombinga yiitsinino, okwa li a hala okudhiladhila kombinga yaashoka ta ka popya manga inaa galikana kuJehova ngaashi owala iitsinino ya li hayi longekidhwa nawa. Natse otwa pumbwa okuninga oshinima sha faathana. Otwa hala omagalikano getu ga kale ga hokiwa kuJehova.

3. Otu na okugalikana Jehova momukalo guni nomolwashike?

³ Uuna tatu galikana kuJehova, otu na oku shi ninga nesimaneko. Dhiladhila kombinga yomamoniko omakumithi ngoka Jesaja, Hesekiel, Daniel naJohannes ya li ya mono. Omamoniko ngoka oga li ga yoolokathana, ihe agehe otaga popi oshinima sha faathana. Agehe oga li taga ulike Jehova e li Omukwaniilwa a dhenga  mbanda. Jesaja okwa “mono Omuwa. Okwa li a kuutumba koshipangelapundi she, pombanda puule meadhimo.” (Jes. 6:1-3) Hesekiel okwa mono Jehova a kuutumba ketemba a dhingolokwa ‘kuuyelele wa fa omalwaala agehe guutamvula.’ (Hes. 1:26-28) Daniel okwa mono “ngoka ta kala e na omwenyo aluhe sigo aluhe,” a zala oonguwo oontokele totototo nomulilo tagu zi moshipangelapundi she. (Dan. 7:9, 10) Johannes okwa mono Jehova a kuutumba koshipangelapundi a dhingolokwa koshinima sha fa uutamvula wolwaala lwa fa emanya lyosmaragdi. (Eh. 4:2-4) Uuna tatu dhiladhila kuuyapuki waJehova, mboka itaawu vulu okuyelekwa nasha, ohashi tu dhimbulukitha uuthembahenda wetu uunene wokugalikana kuye nankene sha simana oku shi ninga netilosimaneko. Ihe otu na okugalikana kombinga yashike?

4. Oshike tatu ilongo moohapu dhopetameko lyegalikano ndyoka tali adhika muMateus 6:9, 10?

⁴ Lesha Mateus 6:9, 10. MEuvitho lyokOndundu, Jesus okwa li a longo aalongwa ye nkene ye na okugalikana momukalo moka Kalunga a hokwa. Konima sho Jesus a ti kutya “one omu na okugalikana ngeyi,” okwa li ta popi kombinga yiinima ya simana yi na ko nasha nelalakano lyaJehova, ngaashi okuyapulithwa kwedhina lye; Uukwaniilwa we wu ye, mboka tawu ya wu hanagule po aapataneki yaKalunga nosho wo kombinga yiinima iiwanawa mbyoka ta ka ningila aantu nosho wo evi. Uuna tatu kwatele mo iinima mbyoka momagalikano getu, otatu ulike kutya ehalo lyaKalunga olyo lya simana kutse.

5. Oshi li ngaa mondjila okugalikana kombinga yiinima yopaumwene?

⁵ Moshitopolwa sha landula ko shegalikano ndyoka, Jesus oku ulike kutya oshi li mondjila tu kwatele mo iinima yopaumwene momagalikano getu. Otatu vulu okupula Jehova e tu pe iikulya yesiku kehe, e tu dhimine po oondjo dhetu noku tu gamene kumwiinayi. (Mat. 6:11-13) Uuna tatu pula Jehova iinima mbika, otatu ulike kutya otwa pumbwa ekwatho lye notwa hala oku mu nyanyudha.

6. Mbela otu na owala okugalikana kombinga yiinima mbyono yi li megalikano lyOmuwa? Shi yelitha.

⁶ Jesus ka li a tegelela aalanduli ye ya kale owala haya galikana egalikano ndyoka e ya longa li li ngaashi li li. Momagalikano galwe ngono Jesus a galikana, okwa li a tumbula iinima ya yoolokathana mbyoka a li ti ipula nayo pethimbo ndyoka. (Mat. 26:39, 42; Joh. 17:1-26)  Sha faathana, otatu vulu okugalikana kombinga yakehe shimwe shono tatu ipula nasho. Pashiholelwa, otatu vulu okugalikana tu pewe owino nuunongo, uuna tu li pokuninga etokolo lyontumba. (Eps. 119:33, 34) Otatu vulu okugalikana tu pewe owino neuvoko lyankene tu na okugwanitha po oshilonga oshidhigu shoka twa pewa. (Omayel. 2:6) Aavali otaya vulu okukwatela oyana momagalikano gawo, naanona otaya vulu okukwatela aavali yawo momagalikano gawo. Atuhe otatu vulu wo okukwatela momagalikano getu aakonakonimbiimbeli yetu naamboka hatu uvithile. Ihe uuna tatu galikana, katu na owala okukala hatu pula Jehova e tu kwathele.

7. Omolwashike tu na okutanga Jehova megalikano?

⁷ Otu na okudhimbulukwa okutanga Jehova aluhe momagalikano getu. Omolwashike mbela? Omolwaashoka oye awike a gwana okutangwa. ‘Omunalukeno nohe tu dhimine po.’ Shimwe ishewe, “Omunesilohenda nomunahole, omwiidhidhimiki . . . nomwiinekelwa.” (Eps. 86:5, 15) Onkee ano, otu na etompelo ewanawa lyokutanga Jehova omolwomaukwatya ge nomolwiinima mbyoka he tu ningile.

8. Iinima yimwe yini tatu vulu okupandulila Jehova momagalikano getu? (Episalomi 104:12-15, 24)

⁸ Kakele kokutanga Jehova momagalikano getu, otatu vulu oku mu pandula, omolwiinima iiwanawa mbyoka he tu pe. Pashiholelwa, otatu vulu oku mu pandula, omolwomalwaala omawanawa kaaku na we goongala, iikulya iitoye yomaludhi gi ili nogi ili nosho wo ookuume aawanawa. Tate yetu omunahole ohe tu pe iinima mbika nosho wo yilwe oyindji nelalakano lyoku tu nyanyudha. (Lesha Episalomi 104:12-15, 24.) Ihe shoka sha simanenena, otwa hala okupandula Jehova, omolwelongo ndyoka he tu pe, opo tu kale tu na eitaalo lya kola nosho wo etegameno ekumithi lyonakuyiwa ndyoka e tu pa.

9. Oshike tashi vulu oku tu kwathela tu kale hatu dhimbulukwa okupandula Jehova megalikano? (1 Aatessalonika 5:17, 18)

⁹ Oshipu okudhimbwa okupandula Jehova omolwiinima ayihe mbyoka he tu ningile. Oshike tashi vulu oku ku kwathela wu kale ho dhimbulukwa oku mu pandula? Oto vulu okuninga omusholondondo gwiinima mbyoka wa pula Jehova megalikano. Opo nduno, kala ho tala mo wu mone nkene a yamukula omagalikano goye.  Konima yaashono, kala ho galikana wu mu pandule sho e ku kwathela. (Lesha 1 Aatessalonika 5:17, 18.) Dhiladhila kwaashika: Ohatu kala twa nyanyukwa notu uvite tu holike uuna yalwe ye tu pandula. Sha faathana, ngele otwa kala hatu dhimbulukwa okupandula Jehova sho a yamukula omagalikano getu, ohashi mu nyanyudha. (Kol. 3:15) Ihe oshinima shimwe ishewe shini sha simanenena tu na okupandulila Kalunga ketu?

10. Shi ikolelela kuPetrus gwotango 2:21, omolwashike tu na okupandula Jehova sho a tumu Jesus kombanda yevi?

¹⁰ Lesha 1 Petrus 2:21. Otu na okupandula Jehova sho e tu pa Omwana omuholike e tu longe. Ohatu ilongo oshindji noonkondo kombinga yaJehova nokombinga yankene tu na oku mu nyanyudha, uuna tatu lesha kombinga yonkalamwenyo yaJesus. Ngele otu ulike eitaalo mekuliloyambo lyaKristus, otatu ka kala tu na ekwatathano lya kola naJehova Kalunga notatu ka kala tu na ombili naye. — Rom. 5:1.

11. Omolwashike hatu galikana kuJehova okupitila medhina lyaJesus?

¹¹ Ohatu pandula Jehova sho hatu mu galikana okupitila mOmwana. Jehova oha longitha Jesus opo e tu pe shoka twa pula. Jehova oha pulakene noha yamukula omagalikano ngoka taga galikanwa okupitila medhina lyaJesus. Jesus okwe shi popi a ti: “Shaa shoka tamu shi indile medhina lyandje, otandi shi ningi, Tate opo a simanekithwe mOmwana.” — Joh. 14:13, 14.

12. Otu na etompelo lilwe lini lyokupandula Jehova omolwOmwana?

¹² Jehova ohe tu dhimine po omayono getu omolwekuliloyambo lyaJesus. Omanyolo otaga popi Jesus kutya oku li ‘omuyambi gwetu omukuluntu, ngoka a kuutumba kolulyo lwoshipangelapundi shOmunankondo megulu.’ (Heb. 8:1) Jesus oku li wo ‘omupopili gwetu puTate.’ (1 Joh. 2:1) Inatu pandula tuu sho Jehova e tu pa Omuyambi Omukuluntu ngoka e shi omaunkundi getu nohe “tu galikanene”! (Rom. 8:34; Heb. 4:15) Otu li aantu inaatu gwanenena, onkee andola opwa li kaapu na ekuliloyambo, ando ihatu vulu okugalikana kuJehova. Nokaapu na omalimbililo, nangoye oto shi zimine kutya itatu vulu okupandula Jehova sha gwana omolwomagano gondilo ngoka e tu pa, ano Omwana omuholike!

13. Ongulohi ndjoka manga Jesus inaa sa, okwa li a ulike ngiini kutya oku hole aalongwa ye?

¹³ Ongulohi ndjoka manga Jesus inaa sa, okwa li a galikanene aalongwa ye ethimbo ele, ta pula He e “ya gamene kuMwiinayi.” (Joh. 17:15) Shoka oshu ulike kutya Jesus okwa li e ya hole. Nonando okwa li e shi kutya oku li poku ka monithwa iihuna, okwa li unene ti ipula nonkalonawa yaayapostoli ye.

14. Ongiini tatu vulu okuulika kutya otu hole aamwatate naamwameme?

¹⁴ Molwaashoka ohatu holele Jesus, ihatu gandja owala eitulomo koompumbwe dhetu yene. Pehala lyaashono, ohatu kwatele aluhe momagalikano getu aamwatate naamwameme. Uuna tatu shi ningi, otatu vulika koshipango shaJesus shokuholathana, notatu ulukile wo Jehova kutya otu hole ooitaali ooyakwetu shi thike peni. (Joh. 13:34) Okukwatela aamwatate naamwameme momagalikano getu kaku shi emanopo lyethimbo. Oohapu dhaKalunga otadhi tu lombwele kutya “egalikano lyomuyuuki oli na oonkondo okuninga sha.” — Jak. 5:16.

15. Omolwashike twa pumbwa okukala hatu kwatele aamwatate naamwameme momagalikano getu?

¹⁵ Otwa pumbwa okukala hatu kwatele ooitaali ooyakwetu momagalikano getu, molwaashoka ohaya adhika komaupyakadhi ogendji. Otatu  vulu okupula Jehova e ya kwathele yi idhidhimikile omauwehame, iiponga mbyoka hayi holoka meshito, iita, omahepeko, nenge omaupyakadhi galwe. Otatu vulu wo okukwatela momagalikano getu aamwatate naamwameme mboka haya iyamba nehalo ewanawa ya kwathele mboka ye na ompumbwe. Otashi vulika wu shi po yamwe mboka ye li momaupyakadhi ga fa ngoka. Omolwashike itoo ya tumbula komadhina megalikano lyoye lyopaumwene? Ohatu ulike kutya otu hole shili aamwatate mokupula Jehova e ya kwathele yi idhidhimike.

16. Omolwashike tu na okukwatela momagalikano getu aamwatate mboka haye tu kwatele komeho?

¹⁶ Mboka haya kwatele komeho megongalo, ohaya pandula sho hatu ya kwatele momagalikano getu nohage ya kwathele. Omuyapostoli Paulus okwa li e shi kutya okwa pumbwa yalwe ye mu galikanene. Okwa nyola a ti: “Galikanenii ndje wo, opo Kalunga a pe ndje oohapu ndhoka ndi na okupopya pethimbo ndyoka, opo ndi popye nuulaadhi oshiholekwa shika shevaangeli.” (Ef. 6:19) Kunena, natse otu na aamwatate oyendji haya longo nuudhiginini mboka haye tu kwatele komeho. Ohatu ulike kutya otu ya hole mokupula Jehova a yambeke iilonga yawo.

17-18. Opoompito dhini tashi vulika tu pulwe tu galikane pehala lyayalwe, noshike tu na okukaleka momadhiladhilo?

¹⁷ Omathimbo gamwe ohatu pulwa tu galikane pehala lyayalwe. Pashiholelwa, omumwameme ngoka ta kwatele komeho ekonakonombiimbeli otashi vulika a pule omumwameme ngoka e ya naye a tameke negalikano. Ihe omumwameme ngoka otashi vulika kee shi nawa omukonakonimbiimbeli, onkee otashi ka kala shi li nawa a galikane pehulilo lyekonakono. Oshoka pompito ndjoka opo ha kala e shi nawa kutya na galikane ta ti ngiini kombinga yomukonakoni.

¹⁸ Omumwatate gumwe otashi vulika a pulwe a galikane pelongekidho lyiilonga yomomapya nenge pokugongala kulwe kwegongalo. Aamwatate mboka ye na uuthembahenda mboka oye na okukaleka momadhiladhilo elalakano lyokugongala hoka. Kaye na okugalikana taya pe egongalo omayele nenge taya ningi omatseyitho. Konyala okugongala kehe kwegongalo okwa pewa ominute ntano petameko nopehulilo dhokwiimba nokugalikana, onkee omumwatate ngoka ta galikana ina pumbwa ‘okupopyagana’ nenge tu tye a popye oohapu odhindji, unene tuu petameko lyokugongala. — Mat. 6:7.

19. Oshike tashi tu kwathele tu kale twi ilongekidhila esiku lyaJehova lyepangulo?

¹⁹ Otwa pumbwa okukala twa pititha komeho egalikano monkalamwenyo yetu, unene tuu sho esiku lyaJehova lyepangulo tali hedha popepi. Moshinima shika Jesus okwe tu lombwele a ti: “Tonateni, ne mu galikane ethimbo kehe, mu mone oonkondo dhoku mu pititha mumbika ayihe tayi ka ningwa.” (Luk. 21:36) Odhoshili kutya ngele otwa kala hatu galikana pandjigilile, eitaalo lyetu otali ka kala lya kola notatu ka adhika twi ilongekidhila esiku lyaKalunga lyepangulo ndyoka tali ya.

20. Ongiini omagalikano getu taga vulu okukala ga fa iitsinino tayi nika nawa?

²⁰ Otwa kundathaneni shike moshitopolwa shika? Otwa kundathaneni kutya otwa lenga noonkondo uuthembahenda wetu wegalikano. Otwi ilongo kutya iinima ya simanenena mbyoka tu na okugalikana kombinga yayo oombyoka yi na ko nasha nelalakano lyaJehova. Ohatu mu pandula wo sho e tu pa Omwana nosho wo Uukwaniilwa we, nohatu kwatele aamwatate naamwameme momagalikano getu. Shimwe ishewe otatu vulu okugalikana kombinga yoompumbwe dhetu dhopalutu nosho wo Jehova e tu kwathele tu kale tu na eitaalo lya kola. Ngele otwa kala hatu dhiladhila muule kombinga yaashoka tatu ka popya momagalikano getu, otatu ulike kutya otwa lenga uuthembahenda mbuka wa dhenga mbanda. Oohapu dhetu otadhi ka kala dha fa iitsinino tayi nika nawa kuJehova, ano ‘e dhi hokwa.’ — Omayel. 15:8.